| Library / Tipiṭaka / ਤਿਪਿਟਕ • Tipiṭaka / ਇਤਿવੁਤ੍ਤਕ-ਅਟ੍ਠਕਥਾ • Itivuttaka-aṭṭhakathā |
੫. ਦੁਚ੍ਚਰਿਤਸੁਤ੍ਤવਣ੍ਣਨਾ
5. Duccaritasuttavaṇṇanā
੬੪. ਪਞ੍ਚਮੇ ਦੁਟ੍ਠੁ ਚਰਿਤਾਨਿ, ਦੁਟ੍ਠਾਨਿ વਾ ਚਰਿਤਾਨਿ ਦੁਚ੍ਚਰਿਤਾਨਿ। ਕਾਯੇਨ ਦੁਚ੍ਚਰਿਤਂ, ਕਾਯਤੋ વਾ ਪવਤ੍ਤਂ ਦੁਚ੍ਚਰਿਤਂ ਕਾਯਦੁਚ੍ਚਰਿਤਂ। ਸੇਸੇਸੁਪਿ ਏਸੇવ ਨਯੋ । ਇਮਾਨਿ ਚ ਦੁਚ੍ਚਰਿਤਾਨਿ ਪਞ੍ਞਤ੍ਤਿਯਾ વਾ ਕਥੇਤਬ੍ਬਾਨਿ ਕਮ੍ਮਪਥੇਹਿ વਾ। ਤਤ੍ਥ ਪਞ੍ਞਤ੍ਤਿਯਾ ਤਾવ ਕਾਯਦ੍વਾਰੇ ਪਞ੍ਞਤ੍ਤਸਿਕ੍ਖਾਪਦਸ੍ਸ વੀਤਿਕ੍ਕਮੋ ਕਾਯਦੁਚ੍ਚਰਿਤਂ, વਚੀਦ੍વਾਰੇ ਪਞ੍ਞਤ੍ਤਸਿਕ੍ਖਾਪਦਸ੍ਸ વੀਤਿਕ੍ਕਮੋ વਚੀਦੁਚ੍ਚਰਿਤਂ, ਉਭਯਤ੍ਥ ਪਞ੍ਞਤ੍ਤਸ੍ਸ વੀਤਿਕ੍ਕਮੋ ਮਨੋਦੁਚ੍ਚਰਿਤਨ੍ਤਿ ਅਯਂ ਪਞ੍ਞਤ੍ਤਿਕਥਾ। ਪਾਣਾਤਿਪਾਤਾਦਯੋ ਪਨ ਤਿਸ੍ਸੋ ਚੇਤਨਾ ਕਾਯਦ੍વਾਰੇਪਿ, વਚੀਦ੍વਾਰੇਪਿ, ਉਪ੍ਪਨ੍ਨਾ ਕਾਯਦੁਚ੍ਚਰਿਤਂ, ਤਥਾ ਚਤਸ੍ਸੋ ਮੁਸਾવਾਦਾਦਿਚੇਤਨਾ વਚੀਦੁਚ੍ਚਰਿਤਂ, ਅਭਿਜ੍ਝਾ, ਬ੍ਯਾਪਾਦੋ, ਮਿਚ੍ਛਾਦਿਟ੍ਠੀਤਿ ਤਯੋ ਚੇਤਨਾਸਮ੍ਪਯੁਤ੍ਤਧਮ੍ਮਾ ਮਨੋਦੁਚ੍ਚਰਿਤਨ੍ਤਿ ਅਯਂ ਕਮ੍ਮਪਥਕਥਾ।
64. Pañcame duṭṭhu caritāni, duṭṭhāni vā caritāni duccaritāni. Kāyena duccaritaṃ, kāyato vā pavattaṃ duccaritaṃ kāyaduccaritaṃ. Sesesupi eseva nayo . Imāni ca duccaritāni paññattiyā vā kathetabbāni kammapathehi vā. Tattha paññattiyā tāva kāyadvāre paññattasikkhāpadassa vītikkamo kāyaduccaritaṃ, vacīdvāre paññattasikkhāpadassa vītikkamo vacīduccaritaṃ, ubhayattha paññattassa vītikkamo manoduccaritanti ayaṃ paññattikathā. Pāṇātipātādayo pana tisso cetanā kāyadvārepi, vacīdvārepi, uppannā kāyaduccaritaṃ, tathā catasso musāvādādicetanā vacīduccaritaṃ, abhijjhā, byāpādo, micchādiṭṭhīti tayo cetanāsampayuttadhammā manoduccaritanti ayaṃ kammapathakathā.
ਗਾਥਾਯਂ ਕਮ੍ਮਪਥਪ੍ਪਤ੍ਤੋਯੇવ ਪਾਪਧਮ੍ਮੋ ਕਾਯਦੁਚ੍ਚਰਿਤਾਦਿਭਾવੇਨ વੁਤ੍ਤੋਤਿ ਤਦਞ੍ਞਂ ਪਾਪਧਮ੍ਮਂ ਸਙ੍ਗਣ੍ਹਿਤੁਂ ‘‘ਯਞ੍ਚਞ੍ਞਂ ਦੋਸਸਞ੍ਹਿਤ’’ਨ੍ਤਿ વੁਤ੍ਤਂ। ਤਤ੍ਥ ਦੋਸਸਞ੍ਹਿਤਨ੍ਤਿ ਰਾਗਾਦਿਕਿਲੇਸਸਂਹਿਤਂ। ਸੇਸਂ ਸੁવਿਞ੍ਞੇਯ੍ਯਮੇવ।
Gāthāyaṃ kammapathappattoyeva pāpadhammo kāyaduccaritādibhāvena vuttoti tadaññaṃ pāpadhammaṃ saṅgaṇhituṃ ‘‘yañcaññaṃ dosasañhita’’nti vuttaṃ. Tattha dosasañhitanti rāgādikilesasaṃhitaṃ. Sesaṃ suviññeyyameva.
ਪਞ੍ਚਮਸੁਤ੍ਤવਣ੍ਣਨਾ ਨਿਟ੍ਠਿਤਾ।
Pañcamasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਇਤਿવੁਤ੍ਤਕਪਾਲ਼ਿ • Itivuttakapāḷi / ੫. ਦੁਚ੍ਚਰਿਤਸੁਤ੍ਤਂ • 5. Duccaritasuttaṃ
