| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. து³ச்சரிதவிபாகஸுத்தவண்ணனா
10. Duccaritavipākasuttavaṇṇanā
40. த³ஸமே பாணாதிபாதோதி பாணாதிபாதசேதனா. ஸப்³ப³லஹுஸோதி ஸப்³ப³லஹுகோ. அப்பாயுகஸங்வத்தனிகோதி தேன பரித்தகேன கம்மவிபாகேன அப்பாயுகோ ஹோதி, தி³ன்னமத்தாய வா படிஸந்தி⁴யா விலீயதி மாதுகுச்சி²தோ நிக்க²ந்தமத்தே வா. ஏவரூபோ ஹி ந அஞ்ஞஸ்ஸ கஸ்ஸசி நிஸ்ஸந்தோ³, பாணாதிபாதஸ்ஸேவ க³தமக்³கோ³ ஏஸோதி. போ⁴க³ப்³யஸனஸங்வத்தனிகோதி யதா² காகணிகாமத்தம்பி ஹத்தே² ந திட்ட²தி, ஏவங் போ⁴க³ப்³யஸனங் ஸங்வத்தேதி. ஸபத்தவேரஸங்வத்தனிகோ ஹோதீதி ஸஹ ஸபத்தேஹி வேரங் ஸங்வத்தேதி. தஸ்ஸ ஹி ஸபத்தா ச ப³ஹுகா ஹொந்தி. யோ ச நங் பஸ்ஸதி, தஸ்மிங் வேரமேவ உப்பாதே³தி ந நிப்³பா³யதி. ஏவரூபோ ஹி பரஸ்ஸ ரக்கி²தகோ³பிதப⁴ண்டே³ அபராத⁴ஸ்ஸ நிஸ்ஸந்தோ³.
40. Dasame pāṇātipātoti pāṇātipātacetanā. Sabbalahusoti sabbalahuko. Appāyukasaṃvattanikoti tena parittakena kammavipākena appāyuko hoti, dinnamattāya vā paṭisandhiyā vilīyati mātukucchito nikkhantamatte vā. Evarūpo hi na aññassa kassaci nissando, pāṇātipātasseva gatamaggo esoti. Bhogabyasanasaṃvattanikoti yathā kākaṇikāmattampi hatthe na tiṭṭhati, evaṃ bhogabyasanaṃ saṃvatteti. Sapattaverasaṃvattaniko hotīti saha sapattehi veraṃ saṃvatteti. Tassa hi sapattā ca bahukā honti. Yo ca naṃ passati, tasmiṃ verameva uppādeti na nibbāyati. Evarūpo hi parassa rakkhitagopitabhaṇḍe aparādhassa nissando.
அபூ⁴தப்³ப⁴க்கா²னஸங்வத்தனிகோ ஹோதீதி அபூ⁴தேன அப்³ப⁴க்கா²னங் ஸங்வத்தேதி, யேன கேனசி கதங் தஸ்ஸேவ உபரி பததி. மித்தேஹி பே⁴த³னஸங்வத்தனிகோதி மித்தேஹி பே⁴த³ங் ஸங்வத்தேதி. யங் யங் மித்தங் கரோதி, ஸோ ஸோ பி⁴ஜ்ஜதியேவ. அமனாபஸத்³த³ஸங்வத்தனிகோதி அமனாபஸத்³த³ங் ஸங்வத்தேதி. யா ஸா வாசா கண்டகா கக்கஸா கடுகா அபி⁴ஸஜ்ஜனீ மம்மச்சே²தி³கா, க³தக³தட்டா²னே தமேவ ஸுணாதி, மனாபஸத்³த³ஸவனங் நாம ந லப⁴தி. ஏவரூபோ ப²ருஸவாசாய க³தமக்³கோ³ நாம. அனாதெ³ய்யவாசாஸங்வத்தனிகோதி அக்³க³ஹேதப்³ப³வசனதங் ஸங்வத்தேதி, ‘‘த்வங் கஸ்மா கதே²ஸி, கோ ஹி தவ வசனங் க³ஹெஸ்ஸதீ’’தி வத்தப்³ப³தங் ஆபஜ்ஜதி. அயங் ஸம்ப²ப்பலாபஸ்ஸ க³தமக்³கோ³. உம்மத்தகஸங்வத்தனிகோ ஹோதீதி உம்மத்தகபா⁴வங் ஸங்வத்தேதி. தேன ஹி மனுஸ்ஸோ உம்மத்தோ வா கி²த்தசித்தோ வா ஏளமூகோ³ வா ஹோதி. அயங் ஸுராபானஸ்ஸ நிஸ்ஸந்தோ³. இமஸ்மிங் ஸுத்தே வட்டமேவ கதி²தந்தி.
Abhūtabbhakkhānasaṃvattaniko hotīti abhūtena abbhakkhānaṃ saṃvatteti, yena kenaci kataṃ tasseva upari patati. Mittehibhedanasaṃvattanikoti mittehi bhedaṃ saṃvatteti. Yaṃ yaṃ mittaṃ karoti, so so bhijjatiyeva. Amanāpasaddasaṃvattanikoti amanāpasaddaṃ saṃvatteti. Yā sā vācā kaṇṭakā kakkasā kaṭukā abhisajjanī mammacchedikā, gatagataṭṭhāne tameva suṇāti, manāpasaddasavanaṃ nāma na labhati. Evarūpo pharusavācāya gatamaggo nāma. Anādeyyavācāsaṃvattanikoti aggahetabbavacanataṃ saṃvatteti, ‘‘tvaṃ kasmā kathesi, ko hi tava vacanaṃ gahessatī’’ti vattabbataṃ āpajjati. Ayaṃ samphappalāpassa gatamaggo. Ummattakasaṃvattaniko hotīti ummattakabhāvaṃ saṃvatteti. Tena hi manusso ummatto vā khittacitto vā eḷamūgo vā hoti. Ayaṃ surāpānassa nissando. Imasmiṃ sutte vaṭṭameva kathitanti.
தா³னவக்³கோ³ சதுத்தோ².
Dānavaggo catuttho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. து³ச்சரிதவிபாகஸுத்தங் • 10. Duccaritavipākasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9-10. அபி⁴ஸந்த³ஸுத்தாதி³வண்ணனா • 9-10. Abhisandasuttādivaṇṇanā
