| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
10. දුච්‌චරිතවිපාකසුත්‌තවණ්‌ණනා
10. Duccaritavipākasuttavaṇṇanā
40. දසමෙ පාණාතිපාතොති පාණාතිපාතචෙතනා. සබ්‌බලහුසොති සබ්‌බලහුකො. අප්‌පායුකසංවත්‌තනිකොති තෙන පරිත්‌තකෙන කම්‌මවිපාකෙන අප්‌පායුකො හොති, දින්‌නමත්‌තාය වා පටිසන්‌ධියා විලීයති මාතුකුච්‌ඡිතො නික්‌ඛන්‌තමත්‌තෙ වා. එවරූපො හි න අඤ්‌ඤස්‌ස කස්‌සචි නිස්‌සන්‌දො, පාණාතිපාතස්‌සෙව ගතමග්‌ගො එසොති. භොගබ්‍යසනසංවත්‌තනිකොති යථා කාකණිකාමත්‌තම්‌පි හත්‌ථෙ න තිට්‌ඨති, එවං භොගබ්‍යසනං සංවත්‌තෙති. සපත්‌තවෙරසංවත්‌තනිකො හොතීති සහ සපත්‌තෙහි වෙරං සංවත්‌තෙති. තස්‌ස හි සපත්‌තා ච බහුකා හොන්‌ති. යො ච නං පස්‌සති, තස්‌මිං වෙරමෙව උප්‌පාදෙති න නිබ්‌බායති. එවරූපො හි පරස්‌ස රක්‌ඛිතගොපිතභණ්‌ඩෙ අපරාධස්‌ස නිස්‌සන්‌දො.
40. Dasame pāṇātipātoti pāṇātipātacetanā. Sabbalahusoti sabbalahuko. Appāyukasaṃvattanikoti tena parittakena kammavipākena appāyuko hoti, dinnamattāya vā paṭisandhiyā vilīyati mātukucchito nikkhantamatte vā. Evarūpo hi na aññassa kassaci nissando, pāṇātipātasseva gatamaggo esoti. Bhogabyasanasaṃvattanikoti yathā kākaṇikāmattampi hatthe na tiṭṭhati, evaṃ bhogabyasanaṃ saṃvatteti. Sapattaverasaṃvattaniko hotīti saha sapattehi veraṃ saṃvatteti. Tassa hi sapattā ca bahukā honti. Yo ca naṃ passati, tasmiṃ verameva uppādeti na nibbāyati. Evarūpo hi parassa rakkhitagopitabhaṇḍe aparādhassa nissando.
අභූතබ්‌භක්‌ඛානසංවත්‌තනිකො හොතීති අභූතෙන අබ්‌භක්‌ඛානං සංවත්‌තෙති, යෙන කෙනචි කතං තස්‌සෙව උපරි පතති. මිත්‌තෙහි භෙදනසංවත්‌තනිකොති මිත්‌තෙහි භෙදං සංවත්‌තෙති. යං යං මිත්‌තං කරොති, සො සො භිජ්‌ජතියෙව. අමනාපසද්‌දසංවත්‌තනිකොති අමනාපසද්‌දං සංවත්‌තෙති. යා සා වාචා කණ්‌ටකා කක්‌කසා කටුකා අභිසජ්‌ජනී මම්‌මච්‌ඡෙදිකා, ගතගතට්‌ඨානෙ තමෙව සුණාති, මනාපසද්‌දසවනං නාම න ලභති. එවරූපො ඵරුසවාචාය ගතමග්‌ගො නාම. අනාදෙය්‍යවාචාසංවත්‌තනිකොති අග්‌ගහෙතබ්‌බවචනතං සංවත්‌තෙති, ‘‘ත්‌වං කස්‌මා කථෙසි, කො හි තව වචනං ගහෙස්‌සතී’’ති වත්‌තබ්‌බතං ආපජ්‌ජති. අයං සම්‌ඵප්‌පලාපස්‌ස ගතමග්‌ගො. උම්‌මත්‌තකසංවත්‌තනිකො හොතීති උම්‌මත්‌තකභාවං සංවත්‌තෙති. තෙන හි මනුස්‌සො උම්‌මත්‌තො වා ඛිත්‌තචිත්‌තො වා එළමූගො වා හොති. අයං සුරාපානස්‌ස නිස්‌සන්‌දො. ඉමස්‌මිං සුත්‌තෙ වට්‌ටමෙව කථිතන්‌ති.
Abhūtabbhakkhānasaṃvattaniko hotīti abhūtena abbhakkhānaṃ saṃvatteti, yena kenaci kataṃ tasseva upari patati. Mittehibhedanasaṃvattanikoti mittehi bhedaṃ saṃvatteti. Yaṃ yaṃ mittaṃ karoti, so so bhijjatiyeva. Amanāpasaddasaṃvattanikoti amanāpasaddaṃ saṃvatteti. Yā sā vācā kaṇṭakā kakkasā kaṭukā abhisajjanī mammacchedikā, gatagataṭṭhāne tameva suṇāti, manāpasaddasavanaṃ nāma na labhati. Evarūpo pharusavācāya gatamaggo nāma. Anādeyyavācāsaṃvattanikoti aggahetabbavacanataṃ saṃvatteti, ‘‘tvaṃ kasmā kathesi, ko hi tava vacanaṃ gahessatī’’ti vattabbataṃ āpajjati. Ayaṃ samphappalāpassa gatamaggo. Ummattakasaṃvattaniko hotīti ummattakabhāvaṃ saṃvatteti. Tena hi manusso ummatto vā khittacitto vā eḷamūgo vā hoti. Ayaṃ surāpānassa nissando. Imasmiṃ sutte vaṭṭameva kathitanti.
දානවග්‌ගො චතුත්‌ථො.
Dānavaggo catuttho.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 10. දුච්‌චරිතවිපාකසුත්‌තං • 10. Duccaritavipākasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 9-10. අභිසන්‌දසුත්‌තාදිවණ්‌ණනා • 9-10. Abhisandasuttādivaṇṇanā
