| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੧੦. ਦੁਚ੍ਚਰਿਤવਿਪਾਕਸੁਤ੍ਤવਣ੍ਣਨਾ
10. Duccaritavipākasuttavaṇṇanā
੪੦. ਦਸਮੇ ਪਾਣਾਤਿਪਾਤੋਤਿ ਪਾਣਾਤਿਪਾਤਚੇਤਨਾ। ਸਬ੍ਬਲਹੁਸੋਤਿ ਸਬ੍ਬਲਹੁਕੋ। ਅਪ੍ਪਾਯੁਕਸਂવਤ੍ਤਨਿਕੋਤਿ ਤੇਨ ਪਰਿਤ੍ਤਕੇਨ ਕਮ੍ਮવਿਪਾਕੇਨ ਅਪ੍ਪਾਯੁਕੋ ਹੋਤਿ, ਦਿਨ੍ਨਮਤ੍ਤਾਯ વਾ ਪਟਿਸਨ੍ਧਿਯਾ વਿਲੀਯਤਿ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤਮਤ੍ਤੇ વਾ। ਏવਰੂਪੋ ਹਿ ਨ ਅਞ੍ਞਸ੍ਸ ਕਸ੍ਸਚਿ ਨਿਸ੍ਸਨ੍ਦੋ, ਪਾਣਾਤਿਪਾਤਸ੍ਸੇવ ਗਤਮਗ੍ਗੋ ਏਸੋਤਿ। ਭੋਗਬ੍ਯਸਨਸਂવਤ੍ਤਨਿਕੋਤਿ ਯਥਾ ਕਾਕਣਿਕਾਮਤ੍ਤਮ੍ਪਿ ਹਤ੍ਥੇ ਨ ਤਿਟ੍ਠਤਿ, ਏવਂ ਭੋਗਬ੍ਯਸਨਂ ਸਂવਤ੍ਤੇਤਿ। ਸਪਤ੍ਤવੇਰਸਂવਤ੍ਤਨਿਕੋ ਹੋਤੀਤਿ ਸਹ ਸਪਤ੍ਤੇਹਿ વੇਰਂ ਸਂવਤ੍ਤੇਤਿ। ਤਸ੍ਸ ਹਿ ਸਪਤ੍ਤਾ ਚ ਬਹੁਕਾ ਹੋਨ੍ਤਿ। ਯੋ ਚ ਨਂ ਪਸ੍ਸਤਿ, ਤਸ੍ਮਿਂ વੇਰਮੇવ ਉਪ੍ਪਾਦੇਤਿ ਨ ਨਿਬ੍ਬਾਯਤਿ। ਏવਰੂਪੋ ਹਿ ਪਰਸ੍ਸ ਰਕ੍ਖਿਤਗੋਪਿਤਭਣ੍ਡੇ ਅਪਰਾਧਸ੍ਸ ਨਿਸ੍ਸਨ੍ਦੋ।
40. Dasame pāṇātipātoti pāṇātipātacetanā. Sabbalahusoti sabbalahuko. Appāyukasaṃvattanikoti tena parittakena kammavipākena appāyuko hoti, dinnamattāya vā paṭisandhiyā vilīyati mātukucchito nikkhantamatte vā. Evarūpo hi na aññassa kassaci nissando, pāṇātipātasseva gatamaggo esoti. Bhogabyasanasaṃvattanikoti yathā kākaṇikāmattampi hatthe na tiṭṭhati, evaṃ bhogabyasanaṃ saṃvatteti. Sapattaverasaṃvattaniko hotīti saha sapattehi veraṃ saṃvatteti. Tassa hi sapattā ca bahukā honti. Yo ca naṃ passati, tasmiṃ verameva uppādeti na nibbāyati. Evarūpo hi parassa rakkhitagopitabhaṇḍe aparādhassa nissando.
ਅਭੂਤਬ੍ਭਕ੍ਖਾਨਸਂવਤ੍ਤਨਿਕੋ ਹੋਤੀਤਿ ਅਭੂਤੇਨ ਅਬ੍ਭਕ੍ਖਾਨਂ ਸਂવਤ੍ਤੇਤਿ, ਯੇਨ ਕੇਨਚਿ ਕਤਂ ਤਸ੍ਸੇવ ਉਪਰਿ ਪਤਤਿ। ਮਿਤ੍ਤੇਹਿ ਭੇਦਨਸਂવਤ੍ਤਨਿਕੋਤਿ ਮਿਤ੍ਤੇਹਿ ਭੇਦਂ ਸਂવਤ੍ਤੇਤਿ। ਯਂ ਯਂ ਮਿਤ੍ਤਂ ਕਰੋਤਿ, ਸੋ ਸੋ ਭਿਜ੍ਜਤਿਯੇવ। ਅਮਨਾਪਸਦ੍ਦਸਂવਤ੍ਤਨਿਕੋਤਿ ਅਮਨਾਪਸਦ੍ਦਂ ਸਂવਤ੍ਤੇਤਿ। ਯਾ ਸਾ વਾਚਾ ਕਣ੍ਟਕਾ ਕਕ੍ਕਸਾ ਕਟੁਕਾ ਅਭਿਸਜ੍ਜਨੀ ਮਮ੍ਮਚ੍ਛੇਦਿਕਾ, ਗਤਗਤਟ੍ਠਾਨੇ ਤਮੇવ ਸੁਣਾਤਿ, ਮਨਾਪਸਦ੍ਦਸવਨਂ ਨਾਮ ਨ ਲਭਤਿ। ਏવਰੂਪੋ ਫਰੁਸવਾਚਾਯ ਗਤਮਗ੍ਗੋ ਨਾਮ। ਅਨਾਦੇਯ੍ਯવਾਚਾਸਂવਤ੍ਤਨਿਕੋਤਿ ਅਗ੍ਗਹੇਤਬ੍ਬવਚਨਤਂ ਸਂવਤ੍ਤੇਤਿ, ‘‘ਤ੍વਂ ਕਸ੍ਮਾ ਕਥੇਸਿ, ਕੋ ਹਿ ਤવ વਚਨਂ ਗਹੇਸ੍ਸਤੀ’’ਤਿ વਤ੍ਤਬ੍ਬਤਂ ਆਪਜ੍ਜਤਿ। ਅਯਂ ਸਮ੍ਫਪ੍ਪਲਾਪਸ੍ਸ ਗਤਮਗ੍ਗੋ। ਉਮ੍ਮਤ੍ਤਕਸਂવਤ੍ਤਨਿਕੋ ਹੋਤੀਤਿ ਉਮ੍ਮਤ੍ਤਕਭਾવਂ ਸਂવਤ੍ਤੇਤਿ। ਤੇਨ ਹਿ ਮਨੁਸ੍ਸੋ ਉਮ੍ਮਤ੍ਤੋ વਾ ਖਿਤ੍ਤਚਿਤ੍ਤੋ વਾ ਏਲ਼ਮੂਗੋ વਾ ਹੋਤਿ। ਅਯਂ ਸੁਰਾਪਾਨਸ੍ਸ ਨਿਸ੍ਸਨ੍ਦੋ। ਇਮਸ੍ਮਿਂ ਸੁਤ੍ਤੇ વਟ੍ਟਮੇવ ਕਥਿਤਨ੍ਤਿ।
Abhūtabbhakkhānasaṃvattaniko hotīti abhūtena abbhakkhānaṃ saṃvatteti, yena kenaci kataṃ tasseva upari patati. Mittehibhedanasaṃvattanikoti mittehi bhedaṃ saṃvatteti. Yaṃ yaṃ mittaṃ karoti, so so bhijjatiyeva. Amanāpasaddasaṃvattanikoti amanāpasaddaṃ saṃvatteti. Yā sā vācā kaṇṭakā kakkasā kaṭukā abhisajjanī mammacchedikā, gatagataṭṭhāne tameva suṇāti, manāpasaddasavanaṃ nāma na labhati. Evarūpo pharusavācāya gatamaggo nāma. Anādeyyavācāsaṃvattanikoti aggahetabbavacanataṃ saṃvatteti, ‘‘tvaṃ kasmā kathesi, ko hi tava vacanaṃ gahessatī’’ti vattabbataṃ āpajjati. Ayaṃ samphappalāpassa gatamaggo. Ummattakasaṃvattaniko hotīti ummattakabhāvaṃ saṃvatteti. Tena hi manusso ummatto vā khittacitto vā eḷamūgo vā hoti. Ayaṃ surāpānassa nissando. Imasmiṃ sutte vaṭṭameva kathitanti.
ਦਾਨવਗ੍ਗੋ ਚਤੁਤ੍ਥੋ।
Dānavaggo catuttho.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਦੁਚ੍ਚਰਿਤવਿਪਾਕਸੁਤ੍ਤਂ • 10. Duccaritavipākasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੯-੧੦. ਅਭਿਸਨ੍ਦਸੁਤ੍ਤਾਦਿવਣ੍ਣਨਾ • 9-10. Abhisandasuttādivaṇṇanā
