| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১২. দ্ৰাদসমৰগ্গো
12. Dvādasamavaggo
(১২৪) ৯. দুগ্গতিকথা
(124) 9. Duggatikathā
৬৫০. দিট্ঠিসম্পন্নস্স পুগ্গলস্স পহীনা দুগ্গতীতি? আমন্তা। দিট্ঠিসম্পন্নো পুগ্গলো আপাযিকে রূপে রজ্জেয্যাতি? আমন্তা। হঞ্চি দিট্ঠিসম্পন্নো পুগ্গলো আপাযিকে রূপে রজ্জেয্য, নো চ ৰত রে ৰত্তব্বে – ‘‘দিট্ঠিসম্পন্নস্স পুগ্গলস্স পহীনা দুগ্গতী’’তি।
650. Diṭṭhisampannassa puggalassa pahīnā duggatīti? Āmantā. Diṭṭhisampanno puggalo āpāyike rūpe rajjeyyāti? Āmantā. Hañci diṭṭhisampanno puggalo āpāyike rūpe rajjeyya, no ca vata re vattabbe – ‘‘diṭṭhisampannassa puggalassa pahīnā duggatī’’ti.
দিট্ঠিসম্পন্নস্স পুগ্গলস্স পহীনা দুগ্গতীতি? আমন্তা। দিট্ঠিসম্পন্নো পুগ্গলো আপাযিকে সদ্দে…পে॰… গন্ধে… রসে… ফোট্ঠব্বে…পে॰… অমনুস্সিত্থিযা তিরচ্ছানগতিত্থিযা নাগকঞ্ঞায মেথুনং ধম্মং পটিসেৰেয্য, অজেল়কং পটিগ্গণ্হেয্য, কুক্কুটসূকরং পটিগ্গণ্হেয্য, হত্থিগৰস্সৰল়ৰং পটিগ্গণ্হেয্য… তিত্তিরৰট্টকমোরকপিঞ্জরং 1 পটিগ্গণ্হেয্যাতি? আমন্তা। হঞ্চি দিট্ঠিসম্পন্নো পুগ্গলো তিত্তিরৰট্টকমোরকপিঞ্জরং পটিগ্গণ্হেয্য, নো চ ৰত রে ৰত্তব্বে – ‘‘দিট্ঠিসম্পন্নস্স পুগ্গলস্স পহীনা দুগ্গতী’’তি।
Diṭṭhisampannassa puggalassa pahīnā duggatīti? Āmantā. Diṭṭhisampanno puggalo āpāyike sadde…pe… gandhe… rase… phoṭṭhabbe…pe… amanussitthiyā tiracchānagatitthiyā nāgakaññāya methunaṃ dhammaṃ paṭiseveyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya… tittiravaṭṭakamorakapiñjaraṃ 2 paṭiggaṇheyyāti? Āmantā. Hañci diṭṭhisampanno puggalo tittiravaṭṭakamorakapiñjaraṃ paṭiggaṇheyya, no ca vata re vattabbe – ‘‘diṭṭhisampannassa puggalassa pahīnā duggatī’’ti.
৬৫১. দিট্ঠিসম্পন্নস্স পুগ্গলস্স পহীনা দুগ্গতি, দিট্ঠিসম্পন্নো পুগ্গলো আপাযিকে রূপে রজ্জেয্যাতি? আমন্তা। অরহতো পহীনা দুগ্গতি, অরহা আপাযিকে রূপে রজ্জেয্যাতি? ন হেৰং ৰত্তব্বে…পে॰… দিট্ঠিসম্পন্নস্স পুগ্গলস্স পহীনা দুগ্গতি, দিট্ঠিসম্পন্নো পুগ্গলো আপাযিকে সদ্দে… গন্ধে… রসে… ফোট্ঠব্বে…পে॰… তিত্তিরৰট্টকমোরকপিঞ্জরং পটিগ্গণ্হেয্যাতি? আমন্তা । অরহতো পহীনা দুগ্গতি, অরহা তিত্তিরৰট্টকমোরকপিঞ্জরং পটিগ্গণ্হেয্যাতি? ন হেৰং ৰত্তব্বে…পে॰…।
651. Diṭṭhisampannassa puggalassa pahīnā duggati, diṭṭhisampanno puggalo āpāyike rūpe rajjeyyāti? Āmantā. Arahato pahīnā duggati, arahā āpāyike rūpe rajjeyyāti? Na hevaṃ vattabbe…pe… diṭṭhisampannassa puggalassa pahīnā duggati, diṭṭhisampanno puggalo āpāyike sadde… gandhe… rase… phoṭṭhabbe…pe… tittiravaṭṭakamorakapiñjaraṃ paṭiggaṇheyyāti? Āmantā . Arahato pahīnā duggati, arahā tittiravaṭṭakamorakapiñjaraṃ paṭiggaṇheyyāti? Na hevaṃ vattabbe…pe….
অরহতো পহীনা দুগ্গতি, ন চ অরহা আপাযিকে রূপে রজ্জেয্যাতি? আমন্তা। দিট্ঠিসম্পন্নস্স পুগ্গলস্স পহীনা দুগ্গতি, ন চ দিট্ঠিসম্পন্নো পুগ্গলো আপাযিকে রূপে রজ্জেয্যাতি? ন হেৰং ৰত্তব্বে…পে॰… অরহতো পহীনা দুগ্গতি, ন চ অরহা আপাযিকে সদ্দে…পে॰… গন্ধে…পে॰… রসে…পে॰… ফোট্ঠব্বে…পে॰… অমনুস্সিত্থিযা তিরচ্ছানগতিত্থিযা নাগকঞ্ঞায মেথুনং ধম্মং পটিসেৰেয্য, অজেল়কং পটিগ্গণ্হেয্য, কুক্কুটসূকরং পটিগ্গণ্হেয্য, হত্থিগৰস্সৰল়ৰং পটিগ্গণ্হেয্য…পে॰… তিত্তিরৰট্টকমোরকপিঞ্জরং পটিগ্গণ্হেয্যাতি? আমন্তা । দিট্ঠিসম্পন্নস্স পুগ্গলস্স পহীনা দুগ্গতি, ন চ দিট্ঠিসম্পন্নো পুগ্গলো তিত্তিরৰট্টকমোরকপিঞ্জরং পটিগ্গণ্হেয্যাতি? ন হেৰং ৰত্তব্বে…পে॰…।
Arahato pahīnā duggati, na ca arahā āpāyike rūpe rajjeyyāti? Āmantā. Diṭṭhisampannassa puggalassa pahīnā duggati, na ca diṭṭhisampanno puggalo āpāyike rūpe rajjeyyāti? Na hevaṃ vattabbe…pe… arahato pahīnā duggati, na ca arahā āpāyike sadde…pe… gandhe…pe… rase…pe… phoṭṭhabbe…pe… amanussitthiyā tiracchānagatitthiyā nāgakaññāya methunaṃ dhammaṃ paṭiseveyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya…pe… tittiravaṭṭakamorakapiñjaraṃ paṭiggaṇheyyāti? Āmantā . Diṭṭhisampannassa puggalassa pahīnā duggati, na ca diṭṭhisampanno puggalo tittiravaṭṭakamorakapiñjaraṃ paṭiggaṇheyyāti? Na hevaṃ vattabbe…pe….
৬৫২. 3 ন ৰত্তব্বং – ‘‘দিট্ঠিসম্পন্নস্স পুগ্গলস্স পহীনা দুগ্গতী’’তি? আমন্তা। দিট্ঠিসম্পন্নো পুগ্গলো নিরযং উপপজ্জেয্য…পে॰… তিরচ্ছানযোনিং উপপজ্জেয্য… পেত্তিৰিসযং উপপজ্জেয্যাতি? ন হেৰং ৰত্তব্বে। তেন হি দিট্ঠিসম্পন্নস্স পুগ্গলস্স পহীনা দুগ্গতীতি।
652. 4 Na vattabbaṃ – ‘‘diṭṭhisampannassa puggalassa pahīnā duggatī’’ti? Āmantā. Diṭṭhisampanno puggalo nirayaṃ upapajjeyya…pe… tiracchānayoniṃ upapajjeyya… pettivisayaṃ upapajjeyyāti? Na hevaṃ vattabbe. Tena hi diṭṭhisampannassa puggalassa pahīnā duggatīti.
দুগ্গতিকথা নিট্ঠিতা।
Duggatikathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৯. দুগ্গতিকথাৰণ্ণনা • 9. Duggatikathāvaṇṇanā
