| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၂. ဒ္ဝာဒသမဝဂ္ဂော
12. Dvādasamavaggo
(၁၂၄) ၉. ဒုဂ္ဂတိကထာ
(124) 9. Duggatikathā
၆၅၀. ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတီတိ? အာမန္တာ။ ဒိဋ္ဌိသမ္ပန္နော ပုဂ္ဂလော အာပာယိကေ ရူပေ ရဇ္ဇေယ္ယာတိ? အာမန္တာ။ ဟဉ္စိ ဒိဋ္ဌိသမ္ပန္နော ပုဂ္ဂလော အာပာယိကေ ရူပေ ရဇ္ဇေယ္ယ, နော စ ဝတ ရေ ဝတ္တဗ္ဗေ – ‘‘ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတီ’’တိ။
650. Diṭṭhisampannassa puggalassa pahīnā duggatīti? Āmantā. Diṭṭhisampanno puggalo āpāyike rūpe rajjeyyāti? Āmantā. Hañci diṭṭhisampanno puggalo āpāyike rūpe rajjeyya, no ca vata re vattabbe – ‘‘diṭṭhisampannassa puggalassa pahīnā duggatī’’ti.
ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတီတိ? အာမန္တာ။ ဒိဋ္ဌိသမ္ပန္နော ပုဂ္ဂလော အာပာယိကေ သဒ္ဒေ။ပေ.။ ဂန္ဓေ။ ရသေ။ ဖောဋ္ဌဗ္ဗေ။ပေ.။ အမနုသ္သိတ္ထိယာ တိရစ္ဆာနဂတိတ္ထိယာ နာဂကညာယ မေထုနံ ဓမ္မံ ပဋိသေဝေယ္ယ, အဇေဠကံ ပဋိဂ္ဂဏ္ဟေယ္ယ, ကုက္ကုဋသူကရံ ပဋိဂ္ဂဏ္ဟေယ္ယ, ဟတ္ထိဂဝသ္သဝဠဝံ ပဋိဂ္ဂဏ္ဟေယ္ယ။ တိတ္တိရဝဋ္ဋကမောရကပိဉ္ဇရံ 1 ပဋိဂ္ဂဏ္ဟေယ္ယာတိ? အာမန္တာ။ ဟဉ္စိ ဒိဋ္ဌိသမ္ပန္နော ပုဂ္ဂလော တိတ္တိရဝဋ္ဋကမောရကပိဉ္ဇရံ ပဋိဂ္ဂဏ္ဟေယ္ယ, နော စ ဝတ ရေ ဝတ္တဗ္ဗေ – ‘‘ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတီ’’တိ။
Diṭṭhisampannassa puggalassa pahīnā duggatīti? Āmantā. Diṭṭhisampanno puggalo āpāyike sadde…pe… gandhe… rase… phoṭṭhabbe…pe… amanussitthiyā tiracchānagatitthiyā nāgakaññāya methunaṃ dhammaṃ paṭiseveyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya… tittiravaṭṭakamorakapiñjaraṃ 2 paṭiggaṇheyyāti? Āmantā. Hañci diṭṭhisampanno puggalo tittiravaṭṭakamorakapiñjaraṃ paṭiggaṇheyya, no ca vata re vattabbe – ‘‘diṭṭhisampannassa puggalassa pahīnā duggatī’’ti.
၆၅၁. ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတိ, ဒိဋ္ဌိသမ္ပန္နော ပုဂ္ဂလော အာပာယိကေ ရူပေ ရဇ္ဇေယ္ယာတိ? အာမန္တာ။ အရဟတော ပဟီနာ ဒုဂ္ဂတိ, အရဟာ အာပာယိကေ ရူပေ ရဇ္ဇေယ္ယာတိ? န ဟေဝံ ဝတ္တဗ္ဗေ။ပေ.။ ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတိ, ဒိဋ္ဌိသမ္ပန္နော ပုဂ္ဂလော အာပာယိကေ သဒ္ဒေ။ ဂန္ဓေ။ ရသေ။ ဖောဋ္ဌဗ္ဗေ။ပေ.။ တိတ္တိရဝဋ္ဋကမောရကပိဉ္ဇရံ ပဋိဂ္ဂဏ္ဟေယ္ယာတိ? အာမန္တာ ။ အရဟတော ပဟီနာ ဒုဂ္ဂတိ, အရဟာ တိတ္တိရဝဋ္ဋကမောရကပိဉ္ဇရံ ပဋိဂ္ဂဏ္ဟေယ္ယာတိ? န ဟေဝံ ဝတ္တဗ္ဗေ။ပေ.။။
651. Diṭṭhisampannassa puggalassa pahīnā duggati, diṭṭhisampanno puggalo āpāyike rūpe rajjeyyāti? Āmantā. Arahato pahīnā duggati, arahā āpāyike rūpe rajjeyyāti? Na hevaṃ vattabbe…pe… diṭṭhisampannassa puggalassa pahīnā duggati, diṭṭhisampanno puggalo āpāyike sadde… gandhe… rase… phoṭṭhabbe…pe… tittiravaṭṭakamorakapiñjaraṃ paṭiggaṇheyyāti? Āmantā . Arahato pahīnā duggati, arahā tittiravaṭṭakamorakapiñjaraṃ paṭiggaṇheyyāti? Na hevaṃ vattabbe…pe….
အရဟတော ပဟီနာ ဒုဂ္ဂတိ, န စ အရဟာ အာပာယိကေ ရူပေ ရဇ္ဇေယ္ယာတိ? အာမန္တာ။ ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတိ, န စ ဒိဋ္ဌိသမ္ပန္နော ပုဂ္ဂလော အာပာယိကေ ရူပေ ရဇ္ဇေယ္ယာတိ? န ဟေဝံ ဝတ္တဗ္ဗေ။ပေ.။ အရဟတော ပဟီနာ ဒုဂ္ဂတိ, န စ အရဟာ အာပာယိကေ သဒ္ဒေ။ပေ.။ ဂန္ဓေ။ပေ.။ ရသေ။ပေ.။ ဖောဋ္ဌဗ္ဗေ။ပေ.။ အမနုသ္သိတ္ထိယာ တိရစ္ဆာနဂတိတ္ထိယာ နာဂကညာယ မေထုနံ ဓမ္မံ ပဋိသေဝေယ္ယ, အဇေဠကံ ပဋိဂ္ဂဏ္ဟေယ္ယ, ကုက္ကုဋသူကရံ ပဋိဂ္ဂဏ္ဟေယ္ယ, ဟတ္ထိဂဝသ္သဝဠဝံ ပဋိဂ္ဂဏ္ဟေယ္ယ။ပေ.။ တိတ္တိရဝဋ္ဋကမောရကပိဉ္ဇရံ ပဋိဂ္ဂဏ္ဟေယ္ယာတိ? အာမန္တာ ။ ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတိ, န စ ဒိဋ္ဌိသမ္ပန္နော ပုဂ္ဂလော တိတ္တိရဝဋ္ဋကမောရကပိဉ္ဇရံ ပဋိဂ္ဂဏ္ဟေယ္ယာတိ? န ဟေဝံ ဝတ္တဗ္ဗေ။ပေ.။။
Arahato pahīnā duggati, na ca arahā āpāyike rūpe rajjeyyāti? Āmantā. Diṭṭhisampannassa puggalassa pahīnā duggati, na ca diṭṭhisampanno puggalo āpāyike rūpe rajjeyyāti? Na hevaṃ vattabbe…pe… arahato pahīnā duggati, na ca arahā āpāyike sadde…pe… gandhe…pe… rase…pe… phoṭṭhabbe…pe… amanussitthiyā tiracchānagatitthiyā nāgakaññāya methunaṃ dhammaṃ paṭiseveyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya…pe… tittiravaṭṭakamorakapiñjaraṃ paṭiggaṇheyyāti? Āmantā . Diṭṭhisampannassa puggalassa pahīnā duggati, na ca diṭṭhisampanno puggalo tittiravaṭṭakamorakapiñjaraṃ paṭiggaṇheyyāti? Na hevaṃ vattabbe…pe….
၆၅၂. 3 န ဝတ္တဗ္ဗံ – ‘‘ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတီ’’တိ? အာမန္တာ။ ဒိဋ္ဌိသမ္ပန္နော ပုဂ္ဂလော နိရယံ ဥပပဇ္ဇေယ္ယ။ပေ.။ တိရစ္ဆာနယောနိံ ဥပပဇ္ဇေယ္ယ။ ပေတ္တိဝိသယံ ဥပပဇ္ဇေယ္ယာတိ? န ဟေဝံ ဝတ္တဗ္ဗေ။ တေန ဟိ ဒိဋ္ဌိသမ္ပန္နသ္သ ပုဂ္ဂလသ္သ ပဟီနာ ဒုဂ္ဂတီတိ။
652. 4 Na vattabbaṃ – ‘‘diṭṭhisampannassa puggalassa pahīnā duggatī’’ti? Āmantā. Diṭṭhisampanno puggalo nirayaṃ upapajjeyya…pe… tiracchānayoniṃ upapajjeyya… pettivisayaṃ upapajjeyyāti? Na hevaṃ vattabbe. Tena hi diṭṭhisampannassa puggalassa pahīnā duggatīti.
ဒုဂ္ဂတိကထာ နိဋ္ဌိတာ။
Duggatikathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၉. ဒုဂ္ဂတိကထာဝဏ္ဏနာ • 9. Duggatikathāvaṇṇanā
