Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi

    ༡༢. དྭཱདསམཝགྒོ

    12. Dvādasamavaggo

    (༡༢༤) ༩. དུགྒཏིཀཐཱ

    (124) 9. Duggatikathā

    ༦༥༠. དིཊྛིསམྤནྣསྶ པུགྒལསྶ པཧཱིནཱ དུགྒཏཱིཏི? ཨཱམནྟཱ། དིཊྛིསམྤནྣོ པུགྒལོ ཨཱཔཱཡིཀེ རཱུཔེ རཛྫེཡྻཱཏི? ཨཱམནྟཱ། ཧཉྩི དིཊྛིསམྤནྣོ པུགྒལོ ཨཱཔཱཡིཀེ རཱུཔེ རཛྫེཡྻ, ནོ ཙ ཝཏ རེ ཝཏྟབྦེ – ‘‘དིཊྛིསམྤནྣསྶ པུགྒལསྶ པཧཱིནཱ དུགྒཏཱི’’ཏི།

    650. Diṭṭhisampannassa puggalassa pahīnā duggatīti? Āmantā. Diṭṭhisampanno puggalo āpāyike rūpe rajjeyyāti? Āmantā. Hañci diṭṭhisampanno puggalo āpāyike rūpe rajjeyya, no ca vata re vattabbe – ‘‘diṭṭhisampannassa puggalassa pahīnā duggatī’’ti.

    དིཊྛིསམྤནྣསྶ པུགྒལསྶ པཧཱིནཱ དུགྒཏཱིཏི? ཨཱམནྟཱ། དིཊྛིསམྤནྣོ པུགྒལོ ཨཱཔཱཡིཀེ སདྡེ…པེ॰… གནྡྷེ… རསེ… ཕོཊྛབྦེ…པེ॰… ཨམནུསྶིཏྠིཡཱ ཏིརཙྪཱནགཏིཏྠིཡཱ ནཱགཀཉྙཱཡ མེཐུནཾ དྷམྨཾ པཊིསེཝེཡྻ, ཨཛེལ༹ཀཾ པཊིགྒཎྷེཡྻ, ཀུཀྐུཊསཱུཀརཾ པཊིགྒཎྷེཡྻ, ཧཏྠིགཝསྶཝལ༹ཝཾ པཊིགྒཎྷེཡྻ… ཏིཏྟིརཝཊྚཀམོརཀཔིཉྫརཾ 1 པཊིགྒཎྷེཡྻཱཏི? ཨཱམནྟཱ། ཧཉྩི དིཊྛིསམྤནྣོ པུགྒལོ ཏིཏྟིརཝཊྚཀམོརཀཔིཉྫརཾ པཊིགྒཎྷེཡྻ, ནོ ཙ ཝཏ རེ ཝཏྟབྦེ – ‘‘དིཊྛིསམྤནྣསྶ པུགྒལསྶ པཧཱིནཱ དུགྒཏཱི’’ཏི།

    Diṭṭhisampannassa puggalassa pahīnā duggatīti? Āmantā. Diṭṭhisampanno puggalo āpāyike sadde…pe… gandhe… rase… phoṭṭhabbe…pe… amanussitthiyā tiracchānagatitthiyā nāgakaññāya methunaṃ dhammaṃ paṭiseveyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya… tittiravaṭṭakamorakapiñjaraṃ 2 paṭiggaṇheyyāti? Āmantā. Hañci diṭṭhisampanno puggalo tittiravaṭṭakamorakapiñjaraṃ paṭiggaṇheyya, no ca vata re vattabbe – ‘‘diṭṭhisampannassa puggalassa pahīnā duggatī’’ti.

    ༦༥༡. དིཊྛིསམྤནྣསྶ པུགྒལསྶ པཧཱིནཱ དུགྒཏི, དིཊྛིསམྤནྣོ པུགྒལོ ཨཱཔཱཡིཀེ རཱུཔེ རཛྫེཡྻཱཏི? ཨཱམནྟཱ། ཨརཧཏོ པཧཱིནཱ དུགྒཏི, ཨརཧཱ ཨཱཔཱཡིཀེ རཱུཔེ རཛྫེཡྻཱཏི? ན ཧེཝཾ ཝཏྟབྦེ…པེ॰… དིཊྛིསམྤནྣསྶ པུགྒལསྶ པཧཱིནཱ དུགྒཏི, དིཊྛིསམྤནྣོ པུགྒལོ ཨཱཔཱཡིཀེ སདྡེ… གནྡྷེ… རསེ… ཕོཊྛབྦེ…པེ॰… ཏིཏྟིརཝཊྚཀམོརཀཔིཉྫརཾ པཊིགྒཎྷེཡྻཱཏི? ཨཱམནྟཱ ། ཨརཧཏོ པཧཱིནཱ དུགྒཏི, ཨརཧཱ ཏིཏྟིརཝཊྚཀམོརཀཔིཉྫརཾ པཊིགྒཎྷེཡྻཱཏི? ན ཧེཝཾ ཝཏྟབྦེ…པེ॰…།

    651. Diṭṭhisampannassa puggalassa pahīnā duggati, diṭṭhisampanno puggalo āpāyike rūpe rajjeyyāti? Āmantā. Arahato pahīnā duggati, arahā āpāyike rūpe rajjeyyāti? Na hevaṃ vattabbe…pe… diṭṭhisampannassa puggalassa pahīnā duggati, diṭṭhisampanno puggalo āpāyike sadde… gandhe… rase… phoṭṭhabbe…pe… tittiravaṭṭakamorakapiñjaraṃ paṭiggaṇheyyāti? Āmantā . Arahato pahīnā duggati, arahā tittiravaṭṭakamorakapiñjaraṃ paṭiggaṇheyyāti? Na hevaṃ vattabbe…pe….

    ཨརཧཏོ པཧཱིནཱ དུགྒཏི, ན ཙ ཨརཧཱ ཨཱཔཱཡིཀེ རཱུཔེ རཛྫེཡྻཱཏི? ཨཱམནྟཱ། དིཊྛིསམྤནྣསྶ པུགྒལསྶ པཧཱིནཱ དུགྒཏི, ན ཙ དིཊྛིསམྤནྣོ པུགྒལོ ཨཱཔཱཡིཀེ རཱུཔེ རཛྫེཡྻཱཏི? ན ཧེཝཾ ཝཏྟབྦེ…པེ॰… ཨརཧཏོ པཧཱིནཱ དུགྒཏི, ན ཙ ཨརཧཱ ཨཱཔཱཡིཀེ སདྡེ…པེ॰… གནྡྷེ…པེ॰… རསེ…པེ॰… ཕོཊྛབྦེ…པེ॰… ཨམནུསྶིཏྠིཡཱ ཏིརཙྪཱནགཏིཏྠིཡཱ ནཱགཀཉྙཱཡ མེཐུནཾ དྷམྨཾ པཊིསེཝེཡྻ, ཨཛེལ༹ཀཾ པཊིགྒཎྷེཡྻ, ཀུཀྐུཊསཱུཀརཾ པཊིགྒཎྷེཡྻ, ཧཏྠིགཝསྶཝལ༹ཝཾ པཊིགྒཎྷེཡྻ…པེ॰… ཏིཏྟིརཝཊྚཀམོརཀཔིཉྫརཾ པཊིགྒཎྷེཡྻཱཏི? ཨཱམནྟཱ ། དིཊྛིསམྤནྣསྶ པུགྒལསྶ པཧཱིནཱ དུགྒཏི, ན ཙ དིཊྛིསམྤནྣོ པུགྒལོ ཏིཏྟིརཝཊྚཀམོརཀཔིཉྫརཾ པཊིགྒཎྷེཡྻཱཏི? ན ཧེཝཾ ཝཏྟབྦེ…པེ॰…།

    Arahato pahīnā duggati, na ca arahā āpāyike rūpe rajjeyyāti? Āmantā. Diṭṭhisampannassa puggalassa pahīnā duggati, na ca diṭṭhisampanno puggalo āpāyike rūpe rajjeyyāti? Na hevaṃ vattabbe…pe… arahato pahīnā duggati, na ca arahā āpāyike sadde…pe… gandhe…pe… rase…pe… phoṭṭhabbe…pe… amanussitthiyā tiracchānagatitthiyā nāgakaññāya methunaṃ dhammaṃ paṭiseveyya, ajeḷakaṃ paṭiggaṇheyya, kukkuṭasūkaraṃ paṭiggaṇheyya, hatthigavassavaḷavaṃ paṭiggaṇheyya…pe… tittiravaṭṭakamorakapiñjaraṃ paṭiggaṇheyyāti? Āmantā . Diṭṭhisampannassa puggalassa pahīnā duggati, na ca diṭṭhisampanno puggalo tittiravaṭṭakamorakapiñjaraṃ paṭiggaṇheyyāti? Na hevaṃ vattabbe…pe….

    ༦༥༢. 3 ན ཝཏྟབྦཾ – ‘‘དིཊྛིསམྤནྣསྶ པུགྒལསྶ པཧཱིནཱ དུགྒཏཱི’’ཏི? ཨཱམནྟཱ། དིཊྛིསམྤནྣོ པུགྒལོ ནིརཡཾ ཨུཔཔཛྫེཡྻ…པེ॰… ཏིརཙྪཱནཡོནིཾ ཨུཔཔཛྫེཡྻ… པེཏྟིཝིསཡཾ ཨུཔཔཛྫེཡྻཱཏི? ན ཧེཝཾ ཝཏྟབྦེ། ཏེན ཧི དིཊྛིསམྤནྣསྶ པུགྒལསྶ པཧཱིནཱ དུགྒཏཱིཏི།

    652. 4 Na vattabbaṃ – ‘‘diṭṭhisampannassa puggalassa pahīnā duggatī’’ti? Āmantā. Diṭṭhisampanno puggalo nirayaṃ upapajjeyya…pe… tiracchānayoniṃ upapajjeyya… pettivisayaṃ upapajjeyyāti? Na hevaṃ vattabbe. Tena hi diṭṭhisampannassa puggalassa pahīnā duggatīti.

    དུགྒཏིཀཐཱ ནིཊྛིཏཱ།

    Duggatikathā niṭṭhitā.




    Next: (༡༢༥) ༡༠. སཏྟམབྷཝིཀཀཐཱ • (125) 10. Sattamabhavikakathā




    Footnotes:
    1. … ཀཔིཉྫལཾ (སྱཱ॰ ཀཾ॰ པཱི॰)
    2. … kapiñjalaṃ (syā. kaṃ. pī.)
    3. ཨཊྛཀཐཱནུལོམཾ པརཝཱདཱིཔུཙྪཱལཀྑཎཾ། ཏཐཱཔཱཡཾ པུཙྪཱ སཀཝཱདིསྶ, པུརིམཱཡོ ཙ ཨིམིསྶཾ དུགྒཏིཀཐཱཡཾ པརཝཱདིསྶཱཏི གཧེཏབྦཱ ཝིཡ དིསྶནྟི
    4. aṭṭhakathānulomaṃ paravādīpucchālakkhaṇaṃ. tathāpāyaṃ pucchā sakavādissa, purimāyo ca imissaṃ duggatikathāyaṃ paravādissāti gahetabbā viya dissanti



    Related texts:



    ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༩. དུགྒཏིཀཐཱཝཎྞནཱ • 9. Duggatikathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact