| Library / Tipiṭaka / তিপিটক • Tipiṭaka / ধম্মসঙ্গণীপাল়ি • Dhammasaṅgaṇīpāḷi |
দুকঅত্থুদ্ধারো
Dukaatthuddhāro
হেতুগোচ্ছকং
Hetugocchakaṃ
১৪৪১. কতমে ধম্মা হেতূ? তযো কুসলহেতূ, তযো অকুসলহেতূ, তযো অব্যাকতহেতূ। অলোভো কুসলহেতু, অদোসো কুসলহেতু, চতূসু ভূমীসু কুসলেসু উপ্পজ্জন্তি। অমোহো কুসলহেতু, কামাৰচরকুসলতো চত্তারো ঞাণৰিপ্পযুত্তে চিত্তুপ্পাদে ঠপেত্ৰা, চতূসু ভূমীসু কুসলেসু উপ্পজ্জতি।
1441. Katame dhammā hetū? Tayo kusalahetū, tayo akusalahetū, tayo abyākatahetū. Alobho kusalahetu, adoso kusalahetu, catūsu bhūmīsu kusalesu uppajjanti. Amoho kusalahetu, kāmāvacarakusalato cattāro ñāṇavippayutte cittuppāde ṭhapetvā, catūsu bhūmīsu kusalesu uppajjati.
লোভো অট্ঠসু লোভসহগতেসু চিত্তুপ্পাদেসু উপ্পজ্জতি। দোসো দ্ৰীসু দোমনস্সসহগতেসু চিত্তুপ্পাদেসু উপ্পজ্জতি। মোহো সব্বাকুসলেসু উপ্পজ্জতি।
Lobho aṭṭhasu lobhasahagatesu cittuppādesu uppajjati. Doso dvīsu domanassasahagatesu cittuppādesu uppajjati. Moho sabbākusalesu uppajjati.
অলোভো ৰিপাকহেতু অদোসো ৰিপাকহেতু, কামাৰচরস্স ৰিপাকতো অহেতুকে চিত্তুপ্পাদে ঠপেত্ৰা, চতূসু ভূমীসু ৰিপাকেসু উপ্পজ্জন্তি। অমোহো ৰিপাকহেতু, কামাৰচরস্স ৰিপাকতো অহেতুকে চিত্তুপ্পাদে ঠপেত্ৰা, চত্তারো ঞাণৰিপ্পযুত্তে চিত্তুপ্পাদে ঠপেত্ৰা, চতূসু ভূমীসু ৰিপাকেসু উপ্পজ্জতি।
Alobho vipākahetu adoso vipākahetu, kāmāvacarassa vipākato ahetuke cittuppāde ṭhapetvā, catūsu bhūmīsu vipākesu uppajjanti. Amoho vipākahetu, kāmāvacarassa vipākato ahetuke cittuppāde ṭhapetvā, cattāro ñāṇavippayutte cittuppāde ṭhapetvā, catūsu bhūmīsu vipākesu uppajjati.
অলোভো কিরিযহেতু অদোসো কিরিযহেতু, কামাৰচরকিরিযতো অহেতুকে চিত্তুপ্পাদে ঠপেত্ৰা, তীসু ভূমীসু কিরিযেসু উপ্পজ্জন্তি । অমোহো কিরিযহেতু, কামাৰচরকিরিযতো অহেতুকে চিত্তুপ্পাদে ঠপেত্ৰা, চত্তারো ঞাণৰিপ্পযুত্তে চিত্তুপ্পাদে ঠপেত্ৰা, তীসু ভূমীসু কিরিযেসু উপ্পজ্জতি – ইমে ধম্মা হেতূ।
Alobho kiriyahetu adoso kiriyahetu, kāmāvacarakiriyato ahetuke cittuppāde ṭhapetvā, tīsu bhūmīsu kiriyesu uppajjanti . Amoho kiriyahetu, kāmāvacarakiriyato ahetuke cittuppāde ṭhapetvā, cattāro ñāṇavippayutte cittuppāde ṭhapetvā, tīsu bhūmīsu kiriyesu uppajjati – ime dhammā hetū.
১৪৪২. কতমে ধম্মা ন হেতূ? ঠপেত্ৰা হেতূ, চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা ন হেতূ।
1442. Katame dhammā na hetū? Ṭhapetvā hetū, catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na hetū.
১৪৪৩. কতমে ধম্মা সহেতুকা? ৰিচিকিচ্ছাসহগতং উদ্ধচ্চসহগতং মোহং ঠপেত্ৰা অৰসেসং অকুসলং, চতূসু ভূমীসু কুসলং, কামাৰচরস্স ৰিপাকতো অহেতুকে চিত্তুপ্পাদে ঠপেত্ৰা চতূসু ভূমীসু ৰিপাকো, কামাৰচরকিরিযতো অহেতুকে চিত্তুপ্পাদে ঠপেত্ৰা তীসু ভূমীসু কিরিযাব্যাকতং – ইমে ধম্মা সহেতুকা।
1443. Katame dhammā sahetukā? Vicikicchāsahagataṃ uddhaccasahagataṃ mohaṃ ṭhapetvā avasesaṃ akusalaṃ, catūsu bhūmīsu kusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ – ime dhammā sahetukā.
১৪৪৪. কতমে ধম্মা অহেতুকা? ৰিচিকিচ্ছাসহগতো মোহো, উদ্ধচ্চসহগতো মোহো, দ্ৰেপঞ্চৰিঞ্ঞাণানি, তিস্সো চ মনোধাতুযো, পঞ্চ চ অহেতুকমনোৰিঞ্ঞাণধাতুযো, রূপঞ্চ, নিব্বানঞ্চ – ইমে ধম্মা অহেতুকা।
1444. Katame dhammā ahetukā? Vicikicchāsahagato moho, uddhaccasahagato moho, dvepañcaviññāṇāni, tisso ca manodhātuyo, pañca ca ahetukamanoviññāṇadhātuyo, rūpañca, nibbānañca – ime dhammā ahetukā.
১৪৪৫. কতমে ধম্মা হেতুসম্পযুত্তা? ৰিচিকিচ্ছাসহগতং উদ্ধচ্চসহগতং মোহং ঠপেত্ৰা অৰসেসং অকুসলং, চতূসু ভূমীসু কুসলং, কামাৰচরস্স ৰিপাকতো অহেতুকে চিত্তুপ্পাদে ঠপেত্ৰা চতূসু ভূমীসু ৰিপাকো, কামাৰচরকিরিযতো অহেতুকে চিত্তুপ্পাদে ঠপেত্ৰা তীসু ভূমীসু কিরিযাব্যাকতং – ইমে ধম্মা হেতুসম্পযুত্তা।
1445. Katame dhammā hetusampayuttā? Vicikicchāsahagataṃ uddhaccasahagataṃ mohaṃ ṭhapetvā avasesaṃ akusalaṃ, catūsu bhūmīsu kusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ – ime dhammā hetusampayuttā.
১৪৪৬. কতমে ধম্মা হেতুৰিপ্পযুত্তা? ৰিচিকিচ্ছাসহগতো মোহো, উদ্ধচ্চসহগতো মোহো, দ্ৰেপঞ্চৰিঞ্ঞাণানি তিস্সো চ মনোধাতুযো পঞ্চ চ অহেতুকমনোৰিঞ্ঞাণধাতুযো, রূপঞ্চ, নিব্বানঞ্চ – ইমে ধম্মা হেতুৰিপ্পযুত্তা।
1446. Katame dhammā hetuvippayuttā? Vicikicchāsahagato moho, uddhaccasahagato moho, dvepañcaviññāṇāni tisso ca manodhātuyo pañca ca ahetukamanoviññāṇadhātuyo, rūpañca, nibbānañca – ime dhammā hetuvippayuttā.
১৪৪৭. কতমে ধম্মা হেতূ চেৰ সহেতুকা চ? যত্থ দ্ৰে তযো হেতূ একতো উপ্পজ্জন্তি – ইমে ধম্মা হেতূ চেৰ সহেতুকা চ।
1447. Katame dhammā hetū ceva sahetukā ca? Yattha dve tayo hetū ekato uppajjanti – ime dhammā hetū ceva sahetukā ca.
১৪৪৮. কতমে ধম্মা সহেতুকা চেৰ ন চ হেতূ? চতূসু ভূমীসু কুসলং, অকুসলং, কামাৰচরস্স ৰিপাকতো অহেতুকে চিত্তুপ্পাদে ঠপেত্ৰা চতূসু ভূমীসু ৰিপাকো, কামাৰচরকিরিযতো অহেতুকে চিত্তুপ্পাদে ঠপেত্ৰা তীসু ভূমীসু কিরিযাব্যাকতং, এত্থুপ্পন্নে হেতূ ঠপেত্ৰা – ইমে ধম্মা সহেতুকা চেৰ ন চ হেতূ। অহেতুকা ধম্মা ন ৰত্তব্বা – হেতূ চেৰ সহেতুকা চাতিপি, সহেতুকা চেৰ ন চ হেতূতিপি।
1448. Katame dhammā sahetukā ceva na ca hetū? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā sahetukā ceva na ca hetū. Ahetukā dhammā na vattabbā – hetū ceva sahetukā cātipi, sahetukā ceva na ca hetūtipi.
১৪৪৯. কতমে ধম্মা হেতূ চেৰ হেতুসম্পযুত্তা চ? যত্থ দ্ৰে তযো হেতূ একতো উপ্পজ্জন্তি – ইমে ধম্মা হেতূ চেৰ হেতুসম্পযুত্তা চ।
1449. Katame dhammā hetū ceva hetusampayuttā ca? Yattha dve tayo hetū ekato uppajjanti – ime dhammā hetū ceva hetusampayuttā ca.
১৪৫০. কতমে ধম্মা হেতুসম্পযুত্তা চেৰ ন চ হেতূ? চতূসু ভূমীসু কুসলং, অকুসলং, কামাৰচরস্স ৰিপাকতো অহেতুকে চিত্তুপ্পাদে ঠপেত্ৰা চতূসু ভূমীসু ৰিপাকো, কামাৰচরকিরিযতো অহেতুকে চিত্তুপ্পাদে ঠপেত্ৰা তীসু ভূমীসু কিরিযাব্যাকতং, এত্থুপ্পন্নে হেতূ ঠপেত্ৰা – ইমে ধম্মা হেতুসম্পযুত্তা চেৰ ন চ হেতূ। হেতুৰিপ্পযুত্তা ধম্মা ন ৰত্তব্বা – হেতূ চেৰ হেতুসম্পযুত্তা চাতিপি, হেতুসম্পযুত্তা চেৰ ন চ হেতূতিপি।
1450. Katame dhammā hetusampayuttā ceva na ca hetū? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā hetusampayuttā ceva na ca hetū. Hetuvippayuttā dhammā na vattabbā – hetū ceva hetusampayuttā cātipi, hetusampayuttā ceva na ca hetūtipi.
১৪৫১. কতমে ধম্মা ন হেতূ সহেতুকা? চতূসু ভূমীসু কুসলং, অকুসলং, কামাৰচরস্স ৰিপাকতো অহেতুকে চিত্তুপ্পাদে ঠপেত্ৰা চতূসু ভূমীসু ৰিপাকো, কামাৰচরকিরিযতো অহেতুকে চিত্তুপ্পাদে ঠপেত্ৰা তীসু ভূমীসু কিরিযাব্যাকতং, এত্থুপ্পন্নে হেতূ ঠপেত্ৰা – ইমে ধম্মা ন হেতূ সহেতুকা।
1451. Katame dhammā na hetū sahetukā? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā na hetū sahetukā.
১৪৫২. কতমে ধম্মা ন হেতূ অহেতুকা? দ্ৰেপঞ্চৰিঞ্ঞাণানি, তিস্সো চ মনোধাতুযো, পঞ্চ চ অহেতুকমনোৰিঞ্ঞাণধাতুযো, রূপঞ্চ, নিব্বানঞ্চ – ইমে ধম্মা ন হেতূ অহেতুকা । হেতূ ধম্মা ন ৰত্তব্বা – ন হেতূ সহেতুকাতিপি, ন হেতূ অহেতুকাতিপি।
1452. Katame dhammā na hetū ahetukā? Dvepañcaviññāṇāni, tisso ca manodhātuyo, pañca ca ahetukamanoviññāṇadhātuyo, rūpañca, nibbānañca – ime dhammā na hetū ahetukā . Hetū dhammā na vattabbā – na hetū sahetukātipi, na hetū ahetukātipi.
চূল়ন্তরদুকং
Cūḷantaradukaṃ
১৪৫৩. কতমে ধম্মা সপ্পচ্চযা? চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সপ্পচ্চযা।
1453. Katame dhammā sappaccayā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sappaccayā.
১৪৫৪. কতমে ধম্মা অপ্পচ্চযা? নিব্বানং – ইমে ধম্মা অপ্পচ্চযা।
1454. Katame dhammā appaccayā? Nibbānaṃ – ime dhammā appaccayā.
১৪৫৫. কতমে ধম্মা সঙ্খতা? চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সঙ্খতা।
1455. Katame dhammā saṅkhatā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṅkhatā.
১৪৫৬. কতমে ধম্মা অসঙ্খতা? নিব্বানং – ইমে ধম্মা অসঙ্খতা।
1456. Katame dhammā asaṅkhatā? Nibbānaṃ – ime dhammā asaṅkhatā.
১৪৫৭. কতমে ধম্মা সনিদস্সনা? রূপাযতনং – ইমে ধম্মা সনিদস্সনা।
1457. Katame dhammā sanidassanā? Rūpāyatanaṃ – ime dhammā sanidassanā.
১৪৫৮. কতমে ধম্মা অনিদস্সনা? চক্খাযতনং …পে॰… ফোট্ঠব্বাযতনং, চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, যঞ্চ রূপং অনিদস্সনং অপ্পটিঘং ধম্মাযতনপরিযাপন্নং, নিব্বানঞ্চ – ইমে ধম্মা অনিদস্সনা।
1458. Katame dhammā anidassanā? Cakkhāyatanaṃ …pe… phoṭṭhabbāyatanaṃ, catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā anidassanā.
১৪৫৯. কতমে ধম্মা সপ্পটিঘা? চক্খাযতনং…পে॰… ফোট্ঠব্বাযতনং – ইমে ধম্মা সপ্পটিঘা।
1459. Katame dhammā sappaṭighā? Cakkhāyatanaṃ…pe… phoṭṭhabbāyatanaṃ – ime dhammā sappaṭighā.
১৪৬০. কতমে ধম্মা অপ্পটিঘা? চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, যঞ্চ রূপং অনিদস্সনং অপ্পটিঘং ধম্মাযতনপরিযাপন্নং, নিব্বানঞ্চ – ইমে ধম্মা অপ্পটিঘা।
1460. Katame dhammā appaṭighā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā appaṭighā.
১৪৬১. কতমে ধম্মা রূপিনো? চত্তারো চ মহাভূতা, চতুন্নঞ্চ মহাভূতানং উপাদায রূপং – ইমে ধম্মা রূপিনো।
1461. Katame dhammā rūpino? Cattāro ca mahābhūtā, catunnañca mahābhūtānaṃ upādāya rūpaṃ – ime dhammā rūpino.
১৪৬২. কতমে ধম্মা অরূপিনো? চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, নিব্বানঞ্চ – ইমে ধম্মা অরূপিনো।
1462. Katame dhammā arūpino? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, nibbānañca – ime dhammā arūpino.
১৪৬৩. কতমে ধম্মা লোকিযা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা লোকিযা।
1463. Katame dhammā lokiyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā lokiyā.
১৪৬৪. কতমে ধম্মা লোকুত্তরা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা লোকুত্তরা। সব্বে 1 ধম্মা কেনচি ৰিঞ্ঞেয্যা, কেনচি ন ৰিঞ্ঞেয্যা।
1464. Katame dhammā lokuttarā? Cattāro maggā apariyāpannā, cattāri ca sāmaññaphalāni, nibbānañca – ime dhammā lokuttarā. Sabbe 2 dhammā kenaci viññeyyā, kenaci na viññeyyā.
আসৰগোচ্ছকং
Āsavagocchakaṃ
১৪৬৫. কতমে ধম্মা আসৰা? চত্তারো আসৰা – কামাসৰো, ভৰাসৰো, দিট্ঠাসৰো, অৰিজ্জাসৰো। কামাসৰো অট্ঠসু লোভসহগতেসু চিত্তুপ্পাদেসু উপ্পজ্জতি ভৰাসৰো চতূসু দিট্ঠিগতৰিপ্পযুত্তলোভসহগতেসু চিত্তুপ্পাদেসু উপ্পজ্জতি দিট্ঠাসৰো চতূসু দিট্ঠিগতসম্পযুত্তেসু চিত্তুপ্পাদেসু উপ্পজ্জতি। অৰিজ্জাসৰো সব্বাকুসলেসু উপ্পজ্জতি – ইমে ধম্মা আসৰা।
1465. Katame dhammā āsavā? Cattāro āsavā – kāmāsavo, bhavāsavo, diṭṭhāsavo, avijjāsavo. Kāmāsavo aṭṭhasu lobhasahagatesu cittuppādesu uppajjati bhavāsavo catūsu diṭṭhigatavippayuttalobhasahagatesu cittuppādesu uppajjati diṭṭhāsavo catūsu diṭṭhigatasampayuttesu cittuppādesu uppajjati. Avijjāsavo sabbākusalesu uppajjati – ime dhammā āsavā.
১৪৬৬. কতমে ধম্মা নো আসৰা? ঠপেত্ৰা আসৰে অৰসেসং অকুসলং, চতূসু ভূমীসু কুসলং , চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নো আসৰা।
1466. Katame dhammā no āsavā? Ṭhapetvā āsave avasesaṃ akusalaṃ, catūsu bhūmīsu kusalaṃ , catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no āsavā.
১৪৬৭. কতমে ধম্মা সাসৰা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সাসৰা।
1467. Katame dhammā sāsavā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sāsavā.
১৪৬৮. কতমে ধম্মা অনাসৰা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অনাসৰা।
1468. Katame dhammā anāsavā? Cattāro maggā apariyāpannā, cattāri ca sāmaññaphalāni, nibbānañca – ime dhammā anāsavā.
১৪৬৯. কতমে ধম্মা আসৰসম্পযুত্তা? দ্ৰে দোমনস্সসহগতচিত্তুপ্পাদা এত্থুপ্পন্নং মোহং ঠপেত্ৰা, ৰিচিকিচ্ছাসহগতং উদ্ধচ্চসহগতং মোহং ঠপেত্ৰা, অৰসেসং অকুসলং – ইমে ধম্মা আসৰসম্পযুত্তা।
1469. Katame dhammā āsavasampayuttā? Dve domanassasahagatacittuppādā etthuppannaṃ mohaṃ ṭhapetvā, vicikicchāsahagataṃ uddhaccasahagataṃ mohaṃ ṭhapetvā, avasesaṃ akusalaṃ – ime dhammā āsavasampayuttā.
১৪৭০. কতমে ধম্মা আসৰৰিপ্পযুত্তা? দ্ৰীসু দোমনস্সসহগতেসু চিত্তুপ্পাদেসু উপ্পন্নো মোহো, ৰিচিকিচ্ছাসহগতো মোহো, উদ্ধচ্চসহগতো মোহো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা আসৰৰিপ্পযুত্তা।
1470. Katame dhammā āsavavippayuttā? Dvīsu domanassasahagatesu cittuppādesu uppanno moho, vicikicchāsahagato moho, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā āsavavippayuttā.
১৪৭১. কতমে ধম্মা আসৰা চেৰ সাসৰা চ? তেৰ আসৰা আসৰা চেৰ সাসৰা চ।
1471. Katame dhammā āsavā ceva sāsavā ca? Teva āsavā āsavā ceva sāsavā ca.
১৪৭২. কতমে ধম্মা সাসৰা চেৰ নো চ আসৰা? ঠপেত্ৰা আসৰে, অৰসেসং অকুসলং, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সাসৰা চেৰ নো চ আসৰা। অনাসৰা ধম্মা ন ৰত্তব্বা – আসৰা চেৰ সাসৰা চাতিপি, সাসৰা চেৰ নো চ আসৰাতিপি।
1472. Katame dhammā sāsavā ceva no ca āsavā? Ṭhapetvā āsave, avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sāsavā ceva no ca āsavā. Anāsavā dhammā na vattabbā – āsavā ceva sāsavā cātipi, sāsavā ceva no ca āsavātipi.
১৪৭৩. কতমে ধম্মা আসৰা চেৰ আসৰসম্পযুত্তা চ? যত্থ দ্ৰে তযো আসৰা একতো উপ্পজ্জন্তি – ইমে ধম্মা আসৰা চেৰ আসৰসম্পযুত্তা চ।
1473. Katame dhammā āsavā ceva āsavasampayuttā ca? Yattha dve tayo āsavā ekato uppajjanti – ime dhammā āsavā ceva āsavasampayuttā ca.
১৪৭৪. কতমে ধম্মা আসৰসম্পযুত্তা চেৰ নো চ আসৰা? ঠপেত্ৰা আসৰে, অৰসেসং অকুসলং – ইমে ধম্মা আসৰসম্পযুত্তা চেৰ নো চ আসৰা। আসৰৰিপ্পযুত্তা ধম্মা ন ৰত্তব্বা – আসৰা চেৰ আসৰসম্পযুত্তা চাতিপি, আসৰসম্পযুত্তা চেৰ নো চ আসৰাতিপি।
1474. Katame dhammā āsavasampayuttā ceva no ca āsavā? Ṭhapetvā āsave, avasesaṃ akusalaṃ – ime dhammā āsavasampayuttā ceva no ca āsavā. Āsavavippayuttā dhammā na vattabbā – āsavā ceva āsavasampayuttā cātipi, āsavasampayuttā ceva no ca āsavātipi.
১৪৭৫. কতমে ধম্মা আসৰৰিপ্পযুত্তা সাসৰা? দ্ৰীসু দোমনস্সসহগতেসু চিত্তুপ্পাদেসু উপ্পন্নো মোহো, ৰিচিকিচ্ছাসহগতো মোহো, উদ্ধচ্চসহগতো মোহো, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা আসৰৰিপ্পযুত্তা সাসৰা।
1475. Katame dhammā āsavavippayuttā sāsavā? Dvīsu domanassasahagatesu cittuppādesu uppanno moho, vicikicchāsahagato moho, uddhaccasahagato moho, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā āsavavippayuttā sāsavā.
১৪৭৬. কতমে ধম্মা আসৰৰিপ্পযুত্তা অনাসৰা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা আসৰৰিপ্পযুত্তা অনাসৰা। আসৰসম্পযুত্তা ধম্মা ন ৰত্তব্বা – আসৰৰিপ্পযুত্তা সাসৰাতিপি, আসৰৰিপ্পযুত্তা অনাসৰাতিপি।
1476. Katame dhammā āsavavippayuttā anāsavā? Cattāro maggā apariyāpannā, cattāri ca sāmaññaphalāni, nibbānañca – ime dhammā āsavavippayuttā anāsavā. Āsavasampayuttā dhammā na vattabbā – āsavavippayuttā sāsavātipi, āsavavippayuttā anāsavātipi.
সংযোজনগোচ্ছকং
Saṃyojanagocchakaṃ
১৪৭৭. কতমে ধম্মা সংযোজনা? দস সংযোজনানি – কামরাগসংযোজনং, পটিঘসংযোজনং, মানসংযোজনং, দিট্ঠিসংযোজনং, ৰিচিকিচ্ছাসংযোজনং, সীলব্বতপরামাসসংযোজনং, ভৰরাগসংযোজনং, ইস্সাসংযোজনং, মচ্ছরিযসংযোজনং, অৰিজ্জাসংযোজনং। কামরাগসংযোজনং অট্ঠসু লোভসহগতেসু চিত্তুপ্পাদেসু উপ্পজ্জতি। পটিঘসংযোজনং দ্ৰীসু দোমনস্সসহগতেসু চিত্তুপ্পাদেসু উপ্পজ্জতি। মানসংযোজনং চতূসু দিট্ঠিগতৰিপ্পযুত্তলোভসহগতেসু চিত্তুপ্পাদেসু উপ্পজ্জতি। দিট্ঠিসংযোজনং চতূসু দিট্ঠিগতসম্পযুত্তেসু চিত্তুপ্পাদেসু উপ্পজ্জতি। ৰিচিকিচ্ছাসংযোজনং ৰিচিকিচ্ছাসহগতেসু চিত্তুপ্পাদেসু উপ্পজ্জতি। সীলব্বতপরামাসসংযোজনং চতূসু দিট্ঠিগতসম্পযুত্তেসু চিত্তুপ্পাদেসু উপ্পজ্জতি। ভৰরাগসংযোজনং চতূসু দিট্ঠিগতৰিপ্পযুত্তলোভসহগতেসু চিত্তুপ্পাদেসু উপ্পজ্জতি। ইস্সাসংযোজনঞ্চ মচ্ছরিযসংযোজনঞ্চ দ্ৰীসু দোমনস্সসহগতেসু চিত্তুপ্পাদেসু উপ্পজ্জন্তি। অৰিজ্জাসংযোজনং সব্বাকুসলেসু উপ্পজ্জতি – ইমে ধম্মা সংযোজনা।
1477. Katame dhammā saṃyojanā? Dasa saṃyojanāni – kāmarāgasaṃyojanaṃ, paṭighasaṃyojanaṃ, mānasaṃyojanaṃ, diṭṭhisaṃyojanaṃ, vicikicchāsaṃyojanaṃ, sīlabbataparāmāsasaṃyojanaṃ, bhavarāgasaṃyojanaṃ, issāsaṃyojanaṃ, macchariyasaṃyojanaṃ, avijjāsaṃyojanaṃ. Kāmarāgasaṃyojanaṃ aṭṭhasu lobhasahagatesu cittuppādesu uppajjati. Paṭighasaṃyojanaṃ dvīsu domanassasahagatesu cittuppādesu uppajjati. Mānasaṃyojanaṃ catūsu diṭṭhigatavippayuttalobhasahagatesu cittuppādesu uppajjati. Diṭṭhisaṃyojanaṃ catūsu diṭṭhigatasampayuttesu cittuppādesu uppajjati. Vicikicchāsaṃyojanaṃ vicikicchāsahagatesu cittuppādesu uppajjati. Sīlabbataparāmāsasaṃyojanaṃ catūsu diṭṭhigatasampayuttesu cittuppādesu uppajjati. Bhavarāgasaṃyojanaṃ catūsu diṭṭhigatavippayuttalobhasahagatesu cittuppādesu uppajjati. Issāsaṃyojanañca macchariyasaṃyojanañca dvīsu domanassasahagatesu cittuppādesu uppajjanti. Avijjāsaṃyojanaṃ sabbākusalesu uppajjati – ime dhammā saṃyojanā.
১৪৭৮. কতমে ধম্মা নো সংযোজনা। ঠপেত্ৰা সংযোজনে অৰসেসং অকুসলং, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নো সংযোজনা।
1478. Katame dhammā no saṃyojanā. Ṭhapetvā saṃyojane avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no saṃyojanā.
১৪৭৯. কতমে ধম্মা সংযোজনিযা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সংযোজনিযা।
1479. Katame dhammā saṃyojaniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojaniyā.
১৪৮০. কতমে ধম্মা অসংযোজনিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অসংযোজনিযা।
1480. Katame dhammā asaṃyojaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃyojaniyā.
১৪৮১. কতমে ধম্মা সংযোজনসম্পযুত্তা? উদ্ধচ্চসহগতং মোহং ঠপেত্ৰা অৰসেসং অকুসলং – ইমে ধম্মা সংযোজনসম্পযুত্তা।
1481. Katame dhammā saṃyojanasampayuttā? Uddhaccasahagataṃ mohaṃ ṭhapetvā avasesaṃ akusalaṃ – ime dhammā saṃyojanasampayuttā.
১৪৮২. কতমে ধম্মা সংযোজনৰিপ্পযুত্তা? উদ্ধচ্চসহগতো মোহো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা সংযোজনৰিপ্পযুত্তা।
1482. Katame dhammā saṃyojanavippayuttā? Uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā saṃyojanavippayuttā.
১৪৮৩. কতমে ধম্মা সংযোজনা চেৰ সংযোজনিযা চ? তানেৰ সংযোজনানি সংযোজনা চেৰ সংযোজনিযা চ।
1483. Katame dhammā saṃyojanā ceva saṃyojaniyā ca? Tāneva saṃyojanāni saṃyojanā ceva saṃyojaniyā ca.
১৪৮৪. কতমে ধম্মা সংযোজনিযা চেৰ নো চ সংযোজনা? ঠপেত্ৰা সংযোজনে অৰসেসং অকুসলং, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সংযোজনিযা চেৰ নো চ সংযোজনা। অসংযোজনিযা ধম্মা ন ৰত্তব্বা – সংযোজনা চেৰ সংযোজনিযা চাতিপি, সংযোজনিযা চেৰ নো চ সংযোজনাতিপি।
1484. Katame dhammā saṃyojaniyā ceva no ca saṃyojanā? Ṭhapetvā saṃyojane avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojaniyā ceva no ca saṃyojanā. Asaṃyojaniyā dhammā na vattabbā – saṃyojanā ceva saṃyojaniyā cātipi, saṃyojaniyā ceva no ca saṃyojanātipi.
১৪৮৫. কতমে ধম্মা সংযোজনা চেৰ সংযোজনসম্পযুত্তা চ? যত্থ দ্ৰে তীণি সংযোজনানি একতো উপ্পজ্জন্তি – ইমে ধম্মা সংযোজনা চেৰ সংযোজনসম্পযুত্তা চ।
1485. Katame dhammā saṃyojanā ceva saṃyojanasampayuttā ca? Yattha dve tīṇi saṃyojanāni ekato uppajjanti – ime dhammā saṃyojanā ceva saṃyojanasampayuttā ca.
১৪৮৬. কতমে ধম্মা সংযোজনসম্পযুত্তা চেৰ নো চ সংযোজনা? ঠপেত্ৰা সংযোজনে, অৰসেসং অকুসলং – ইমে ধম্মা সংযোজনসম্পযুত্তা চেৰ নো চ সংযোজনা। সংযোজনৰিপ্পযুত্তা ধম্মা ন ৰত্তব্বা – সংযোজনা চেৰ সংযোজনসম্পযুত্তা চাতিপি, সংযোজনসম্পযুত্তা চেৰ নো চ সংযোজনাতিপি।
1486. Katame dhammā saṃyojanasampayuttā ceva no ca saṃyojanā? Ṭhapetvā saṃyojane, avasesaṃ akusalaṃ – ime dhammā saṃyojanasampayuttā ceva no ca saṃyojanā. Saṃyojanavippayuttā dhammā na vattabbā – saṃyojanā ceva saṃyojanasampayuttā cātipi, saṃyojanasampayuttā ceva no ca saṃyojanātipi.
১৪৮৭. কতমে ধম্মা সংযোজনৰিপ্পযুত্তা সংযোজনিযা? উদ্ধচ্চসহগতো মোহো, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সংযোজনৰিপ্পযুত্তা সংযোজনিযা।
1487. Katame dhammā saṃyojanavippayuttā saṃyojaniyā? Uddhaccasahagato moho, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojanavippayuttā saṃyojaniyā.
১৪৮৮. কতমে ধম্মা সংযোজনৰিপ্পযুত্তা অসংযোজনিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা সংযোজনৰিপ্পযুত্তা অসংযোজনিযা। সংযোজনসম্পযুত্তা ধম্মা ন ৰত্তব্বা – সংযোজনৰিপ্পযুত্তা সংযোজনিযাতিপি, সংযোজনৰিপ্পযুত্তা অসংযোজনিযাতিপি।
1488. Katame dhammā saṃyojanavippayuttā asaṃyojaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā saṃyojanavippayuttā asaṃyojaniyā. Saṃyojanasampayuttā dhammā na vattabbā – saṃyojanavippayuttā saṃyojaniyātipi, saṃyojanavippayuttā asaṃyojaniyātipi.
গন্থগোচ্ছকং
Ganthagocchakaṃ
১৪৮৯. কতমে ধম্মা গন্থা? চত্তারো গন্থা – অভিজ্ঝাকাযগন্থো, ব্যাপাদো কাযগন্থো, সীলব্বতপরামাসো কাযগন্থো, ইদংসচ্চাভিনিৰেসো কাযগন্থো। অভিজ্ঝাকাযগন্থো অট্ঠসু লোভসহগতেসু চিত্তুপ্পাদেসু উপ্পজ্জতি। ব্যাপাদো কাযগন্থো দ্ৰীসু দোমনস্সসহগতেসু চিত্তুপ্পাদেসু উপ্পজ্জতি। সীলব্বতপরামাসো কাযগন্থো চ ইদংসচ্চাভিনিৰেসো কাযগন্থো চ চতূসু দিট্ঠিগতসম্পযুত্তেসু চিত্তুপ্পাদেসু উপ্পজ্জন্তি – ইমে ধম্মা গন্থা।
1489. Katame dhammā ganthā? Cattāro ganthā – abhijjhākāyagantho, byāpādo kāyagantho, sīlabbataparāmāso kāyagantho, idaṃsaccābhiniveso kāyagantho. Abhijjhākāyagantho aṭṭhasu lobhasahagatesu cittuppādesu uppajjati. Byāpādo kāyagantho dvīsu domanassasahagatesu cittuppādesu uppajjati. Sīlabbataparāmāso kāyagantho ca idaṃsaccābhiniveso kāyagantho ca catūsu diṭṭhigatasampayuttesu cittuppādesu uppajjanti – ime dhammā ganthā.
১৪৯০. কতমে ধম্মা নো গন্থা? ঠপেত্ৰা গন্থে, অৰসেসং অকুসলং, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নো গন্থা।
1490. Katame dhammā no ganthā? Ṭhapetvā ganthe, avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no ganthā.
১৪৯১. কতমে ধম্মা গন্থনিযা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা গন্থনিযা।
1491. Katame dhammā ganthaniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthaniyā.
১৪৯২. কতমে ধম্মা অগন্থনিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অগন্থনিযা।
1492. Katame dhammā aganthaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā aganthaniyā.
১৪৯৩. কতমে ধম্মা গন্থসম্পযুত্তা? চত্তারো দিট্ঠিগতসম্পযুত্তচিত্তুপ্পাদা , চত্তারো দিট্ঠিগতৰিপ্পযুত্তলোভসহগতচিত্তুপ্পাদা, এত্থুপ্পন্নং লোভং ঠপেত্ৰা, দ্ৰে দোমনস্সসহগতচিত্তুপ্পাদা, এত্থুপ্পন্নং পটিঘং ঠপেত্ৰা – ইমে ধম্মা গন্থসম্পযুত্তা।
1493. Katame dhammā ganthasampayuttā? Cattāro diṭṭhigatasampayuttacittuppādā , cattāro diṭṭhigatavippayuttalobhasahagatacittuppādā, etthuppannaṃ lobhaṃ ṭhapetvā, dve domanassasahagatacittuppādā, etthuppannaṃ paṭighaṃ ṭhapetvā – ime dhammā ganthasampayuttā.
১৪৯৪. কতমে ধম্মা গন্থৰিপ্পযুত্তা? চতূসু দিট্ঠিগতৰিপ্পযুত্তলোভসহগতেসু চিত্তুপ্পাদেসু উপ্পন্নো লোভো, দ্ৰীসু দোমনস্সসহগতেসু চিত্তুপ্পাদেসু উপ্পন্নং পটিঘং, ৰিচিকিচ্ছাসহগতো চিত্তুপ্পাদো, উদ্ধচ্চসহগতো চিত্তুপ্পাদো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা গন্থৰিপ্পযুত্তা।
1494. Katame dhammā ganthavippayuttā? Catūsu diṭṭhigatavippayuttalobhasahagatesu cittuppādesu uppanno lobho, dvīsu domanassasahagatesu cittuppādesu uppannaṃ paṭighaṃ, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā ganthavippayuttā.
১৪৯৫. কতমে ধম্মা গন্থা চেৰ গন্থনিযা চ? তেৰ গন্থা গন্থা চেৰ গন্থনিযা চ।
1495. Katame dhammā ganthā ceva ganthaniyā ca? Teva ganthā ganthā ceva ganthaniyā ca.
১৪৯৬. কতমে ধম্মা গন্থনিযা চেৰ নো চ গন্থা? ঠপেত্ৰা গন্থে অৰসেসং অকুসলং, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা গন্থনিযা চেৰ নো চ গন্থা। অগন্থনিযা ধম্মা ন ৰত্তব্বা – গন্থা চেৰ গন্থনিযা চাতিপি, গন্থনিযা চেৰ নো চ গন্থাতিপি।
1496. Katame dhammā ganthaniyā ceva no ca ganthā? Ṭhapetvā ganthe avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthaniyā ceva no ca ganthā. Aganthaniyā dhammā na vattabbā – ganthā ceva ganthaniyā cātipi, ganthaniyā ceva no ca ganthātipi.
১৪৯৭. কতমে ধম্মা গন্থা চেৰ গন্থসম্পযুত্তা চ? যত্থ দিট্ঠি চ লোভো চ একতো উপ্পজ্জন্তি – ইমে ধম্মা গন্থা চেৰ গন্থসম্পযুত্তা চ।
1497. Katame dhammā ganthā ceva ganthasampayuttā ca? Yattha diṭṭhi ca lobho ca ekato uppajjanti – ime dhammā ganthā ceva ganthasampayuttā ca.
১৪৯৮. কতমে ধম্মা গন্থসম্পযুত্তা চেৰ নো চ গন্থা? অট্ঠ লোভসহগতচিত্তুপ্পাদা দ্ৰে দোমনস্সসহগতচিত্তুপ্পাদা, এত্থুপ্পন্নে গন্থে ঠপেত্ৰা – ইমে ধম্মা গন্থসম্পযুত্তা চেৰ নো চ গন্থা। গন্থৰিপ্পযুত্তা ধম্মা ন ৰত্তব্বা – গন্থা চেৰ গন্থসম্পযুত্তা চাতিপি, গন্থসম্পযুত্তা চেৰ নো চ গন্থাতিপি।
1498. Katame dhammā ganthasampayuttā ceva no ca ganthā? Aṭṭha lobhasahagatacittuppādā dve domanassasahagatacittuppādā, etthuppanne ganthe ṭhapetvā – ime dhammā ganthasampayuttā ceva no ca ganthā. Ganthavippayuttā dhammā na vattabbā – ganthā ceva ganthasampayuttā cātipi, ganthasampayuttā ceva no ca ganthātipi.
১৪৯৯. কতমে ধম্মা গন্থৰিপ্পযুত্তা গন্থনিযা? চতূসু দিট্ঠিগতৰিপ্পযুত্তলোভসহগতেসু চিত্তুপ্পাদেসু উপ্পন্নো লোভো, দ্ৰীসু দোমনস্সসহগতেসু চিত্তুপ্পাদেসু উপ্পন্নং পটিঘং, ৰিচিকিচ্ছাসহগতো চিত্তুপ্পাদো, উদ্ধচ্চসহগতো চিত্তুপ্পাদো, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা গন্থৰিপ্পযুত্তা গন্থনিযা।
1499. Katame dhammā ganthavippayuttā ganthaniyā? Catūsu diṭṭhigatavippayuttalobhasahagatesu cittuppādesu uppanno lobho, dvīsu domanassasahagatesu cittuppādesu uppannaṃ paṭighaṃ, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthavippayuttā ganthaniyā.
১৫০০. কতমে ধম্মা গন্থৰিপ্পযুত্তা অগন্থনিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা গন্থৰিপ্পযুত্তা অগন্থনিযা। গন্থসম্পযুত্তা ধম্মা ন ৰত্তব্বা – গন্থৰিপ্পযুত্তা গন্থনিযাতিপি, গন্থৰিপ্পযুত্তা অগন্থনিযাতিপি।
1500. Katame dhammā ganthavippayuttā aganthaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā ganthavippayuttā aganthaniyā. Ganthasampayuttā dhammā na vattabbā – ganthavippayuttā ganthaniyātipi, ganthavippayuttā aganthaniyātipi.
ওঘগোচ্ছকং
Oghagocchakaṃ
১৫০১. কতমে ধম্মা ওঘা…পে॰…।
1501. Katame dhammā oghā…pe….
যোগগোচ্ছকং
Yogagocchakaṃ
১৫০২. কতমে ধম্মা যোগা…পে॰…।
1502. Katame dhammā yogā…pe….
নীৰরণগোচ্ছকং
Nīvaraṇagocchakaṃ
১৫০৩. কতমে ধম্মা নীৰরণা? ছ নীৰরণা – কামচ্ছন্দনীৰরণং, ব্যাপাদনীৰরণং, থিনমিদ্ধনীৰরণং, উদ্ধচ্চকুক্কুচ্চনীৰরণং, ৰিচিকিচ্ছানীৰরণং, অৰিজ্জানীৰরণং । কামচ্ছন্দনীৰরণং অট্ঠসু লোভসহগতেসু চিত্তুপ্পাদেসু উপ্পজ্জতি, ব্যাপাদনীৰরণং দ্ৰীসু দোমনস্সসহগতেসু চিত্তুপ্পাদেসু উপ্পজ্জতি, থিনমিদ্ধনীৰরণং সসঙ্খারিকেসু অকুসলেসু উপ্পজ্জতি, উদ্ধচ্চনীৰরণং উদ্ধচ্চসহগতেসু চিত্তুপ্পাদেসু উপ্পজ্জতি, কুক্কুচ্চনীৰরণং দ্ৰীসু দোমনস্সসহগতেসু চিত্তুপ্পাদেসু উপ্পজ্জতি, ৰিচিকিচ্ছানীৰরণং ৰিচিকিচ্ছাসহগতেসু চিত্তুপ্পাদেসু উপ্পজ্জতি, অৰিজ্জানীৰরণং সব্বাকুসলেসু উপ্পজ্জতি – ইমে ধম্মা নীৰরণা।
1503. Katame dhammā nīvaraṇā? Cha nīvaraṇā – kāmacchandanīvaraṇaṃ, byāpādanīvaraṇaṃ, thinamiddhanīvaraṇaṃ, uddhaccakukkuccanīvaraṇaṃ, vicikicchānīvaraṇaṃ, avijjānīvaraṇaṃ . Kāmacchandanīvaraṇaṃ aṭṭhasu lobhasahagatesu cittuppādesu uppajjati, byāpādanīvaraṇaṃ dvīsu domanassasahagatesu cittuppādesu uppajjati, thinamiddhanīvaraṇaṃ sasaṅkhārikesu akusalesu uppajjati, uddhaccanīvaraṇaṃ uddhaccasahagatesu cittuppādesu uppajjati, kukkuccanīvaraṇaṃ dvīsu domanassasahagatesu cittuppādesu uppajjati, vicikicchānīvaraṇaṃ vicikicchāsahagatesu cittuppādesu uppajjati, avijjānīvaraṇaṃ sabbākusalesu uppajjati – ime dhammā nīvaraṇā.
১৫০৪. কতমে ধম্মা নো নীৰরণা? ঠপেত্ৰা নীৰরণে অৰসেসং অকুসলং, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নো নীৰরণা।
1504. Katame dhammā no nīvaraṇā? Ṭhapetvā nīvaraṇe avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no nīvaraṇā.
১৫০৫. কতমে ধম্মা নীৰরণিযা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা নীৰরণিযা।
1505. Katame dhammā nīvaraṇiyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇiyā.
১৫০৬. কতমে ধম্মা অনীৰরণিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অনীৰরণিযা।
1506. Katame dhammā anīvaraṇiyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anīvaraṇiyā.
১৫০৭. কতমে ধম্মা নীৰরণসম্পযুত্তা? দ্ৰাদস অকুসলচিত্তুপ্পাদা – ইমে ধম্মা নীৰরণসম্পযুত্তা।
1507. Katame dhammā nīvaraṇasampayuttā? Dvādasa akusalacittuppādā – ime dhammā nīvaraṇasampayuttā.
১৫০৮. কতমে ধম্মা নীৰরণৰিপ্পযুত্তা? চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নীৰরণৰিপ্পযুত্তা।
1508. Katame dhammā nīvaraṇavippayuttā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā nīvaraṇavippayuttā.
১৫০৯. কতমে ধম্মা নীৰরণা চেৰ নীৰরণিযা চ? তানেৰ নীৰরণানি নীৰরণা চেৰ নীৰরণিযা চ।
1509. Katame dhammā nīvaraṇā ceva nīvaraṇiyā ca? Tāneva nīvaraṇāni nīvaraṇā ceva nīvaraṇiyā ca.
১৫১০. কতমে ধম্মা নীৰরণিযা চেৰ নো চ নীৰরণা? ঠপেত্ৰা নীৰরণে, অৰসেসং অকুসলং, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা নীৰরণিযা চেৰ নো চ নীৰরণা। অনীৰরণিযা ধম্মা ন ৰত্তব্বা – নীৰরণা চেৰ নীৰরণিযা চাতিপি, নীৰরণিযা চেৰ নো চ নীৰরণাতিপি।
1510. Katame dhammā nīvaraṇiyā ceva no ca nīvaraṇā? Ṭhapetvā nīvaraṇe, avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇiyā ceva no ca nīvaraṇā. Anīvaraṇiyā dhammā na vattabbā – nīvaraṇā ceva nīvaraṇiyā cātipi, nīvaraṇiyā ceva no ca nīvaraṇātipi.
১৫১১. কতমে ধম্মা নীৰরণা চেৰ নীৰরণসম্পযুত্তা চ? যত্থ দ্ৰে তীণি নীৰরণানি একতো উপ্পজ্জন্তি – ইমে ধম্মা নীৰরণা চেৰ নীৰরণসম্পযুত্তা চ।
1511. Katame dhammā nīvaraṇā ceva nīvaraṇasampayuttā ca? Yattha dve tīṇi nīvaraṇāni ekato uppajjanti – ime dhammā nīvaraṇā ceva nīvaraṇasampayuttā ca.
১৫১২. কতমে ধম্মা নীৰরণসম্পযুত্তা চেৰ নো চ নীৰরণা? ঠপেত্ৰা নীৰরণে, অৰসেসং অকুসলং – ইমে ধম্মা নীৰরণসম্পযুত্তা চেৰ নো চ নীৰরণা। নীৰরণৰিপ্পযুত্তা ধম্মা ন ৰত্তব্বা – নীৰরণা চেৰ নীৰরণসম্পযুত্তা চাতিপি, নীৰরণসম্পযুত্তা চেৰ নো চ নীৰরণাতিপি।
1512. Katame dhammā nīvaraṇasampayuttā ceva no ca nīvaraṇā? Ṭhapetvā nīvaraṇe, avasesaṃ akusalaṃ – ime dhammā nīvaraṇasampayuttā ceva no ca nīvaraṇā. Nīvaraṇavippayuttā dhammā na vattabbā – nīvaraṇā ceva nīvaraṇasampayuttā cātipi, nīvaraṇasampayuttā ceva no ca nīvaraṇātipi.
১৫১৩. কতমে ধম্মা নীৰরণৰিপ্পযুত্তা নীৰরণিযা? তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা নীৰরণৰিপ্পযুত্তা নীৰরণিযা।
1513. Katame dhammā nīvaraṇavippayuttā nīvaraṇiyā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇavippayuttā nīvaraṇiyā.
১৫১৪. কতমে ধম্মা নীৰরণৰিপ্পযুত্তা অনীৰরণিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা নীৰরণৰিপ্পযুত্তা অনীৰরণিযা। নীৰরণসম্পযুত্তা ধম্মা ন ৰত্তব্বা – নীৰরণৰিপ্পযুত্তা নীৰরণিযাতিপি, নীৰরণৰিপ্পযুত্তা অনীৰরণিযাতিপি।
1514. Katame dhammā nīvaraṇavippayuttā anīvaraṇiyā? Cattāro maggā apariyāpannā, cattāri ca sāmaññaphalāni, nibbānañca – ime dhammā nīvaraṇavippayuttā anīvaraṇiyā. Nīvaraṇasampayuttā dhammā na vattabbā – nīvaraṇavippayuttā nīvaraṇiyātipi, nīvaraṇavippayuttā anīvaraṇiyātipi.
পরামাসগোচ্ছকং
Parāmāsagocchakaṃ
১৫১৫. কতমে ধম্মা পরামাসা? দিট্ঠিপরামাসো চতূসু দিট্ঠিগতসম্পযুত্তেসু চিত্তুপ্পাদেসু উপ্পজ্জতি – ইমে ধম্মা পরামাসা।
1515. Katame dhammā parāmāsā? Diṭṭhiparāmāso catūsu diṭṭhigatasampayuttesu cittuppādesu uppajjati – ime dhammā parāmāsā.
১৫১৬. কতমে ধম্মা নো পরামাসা? ঠপেত্ৰা পরামাসং অৰসেসং অকুসলং, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নো পরামাসা।
1516. Katame dhammā no parāmāsā? Ṭhapetvā parāmāsaṃ avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no parāmāsā.
১৫১৭. কতমে ধম্মা পরামট্ঠা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা পরামট্ঠা।
1517. Katame dhammā parāmaṭṭhā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmaṭṭhā.
১৫১৮. কতমে ধম্মা অপরামট্ঠা? চত্তারো মগ্গা অপরিযাপন্না, চত্তারি চ সামঞ্ঞফলানি নিব্বানঞ্চ – ইমে ধম্মা অপরামট্ঠা।
1518. Katame dhammā aparāmaṭṭhā? Cattāro maggā apariyāpannā, cattāri ca sāmaññaphalāni nibbānañca – ime dhammā aparāmaṭṭhā.
১৫১৯. কতমে ধম্মা পরামাসসম্পযুত্তা? চত্তারো দিট্ঠিগতসম্পযুত্তচিত্তুপ্পাদা, এত্থুপ্পন্নং পরামাসং ঠপেত্ৰা – ইমে ধম্মা পরামাসসম্পযুত্তা।
1519. Katame dhammā parāmāsasampayuttā? Cattāro diṭṭhigatasampayuttacittuppādā, etthuppannaṃ parāmāsaṃ ṭhapetvā – ime dhammā parāmāsasampayuttā.
১৫২০. কতমে ধম্মা পরামাসৰিপ্পযুত্তা? চত্তারো দিট্ঠিগতৰিপ্পযুত্তলোভসহগতচিত্তুপ্পাদা , দ্ৰে দোমনস্সসহগতচিত্তুপ্পাদা, ৰিচিকিচ্ছাসহগতো চিত্তুপ্পাদো, উদ্ধচ্চসহগতো চিত্তুপ্পাদো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা পরামাসৰিপ্পযুত্তা। পরামাসো ন ৰত্তব্বো – পরামাসসম্পযুত্তোতিপি, পরামাসৰিপ্পযুত্তোতিপি।
1520. Katame dhammā parāmāsavippayuttā? Cattāro diṭṭhigatavippayuttalobhasahagatacittuppādā , dve domanassasahagatacittuppādā, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā parāmāsavippayuttā. Parāmāso na vattabbo – parāmāsasampayuttotipi, parāmāsavippayuttotipi.
১৫২১. কতমে ধম্মা পরামাসা চেৰ পরামট্ঠা চ? সো এৰ পরামাসো পরামাসো চেৰ পরামট্ঠো চ।
1521. Katame dhammā parāmāsā ceva parāmaṭṭhā ca? So eva parāmāso parāmāso ceva parāmaṭṭho ca.
১৫২২. কতমে ধম্মা পরামট্ঠা চেৰ নো চ পরামাসা? ঠপেত্ৰা পরামাসং অৰসেসং অকুসলং, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা পরামট্ঠা চেৰ নো চ পরামাসা। অপরামট্ঠা ধম্মা ন ৰত্তব্বা – পরামাসা চেৰ পরামট্ঠা চাতিপি, পরামট্ঠা চেৰ নো চ পরামাসাতিপি।
1522. Katame dhammā parāmaṭṭhā ceva no ca parāmāsā? Ṭhapetvā parāmāsaṃ avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmaṭṭhā ceva no ca parāmāsā. Aparāmaṭṭhā dhammā na vattabbā – parāmāsā ceva parāmaṭṭhā cātipi, parāmaṭṭhā ceva no ca parāmāsātipi.
১৫২৩. কতমে ধম্মা পরামাসৰিপ্পযুত্তা পরামট্ঠা? চত্তারো দিট্ঠিগতৰিপ্পযুত্তলোভসহগতচিত্তুপ্পাদা, দ্ৰে দোমনস্সসহগতচিত্তুপ্পাদা, ৰিচিকিচ্ছাসহগতো চিত্তুপ্পাদো, উদ্ধচ্চসহগতো চিত্তুপ্পাদো, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা পরামাসৰিপ্পযুত্তা পরামট্ঠা।
1523. Katame dhammā parāmāsavippayuttā parāmaṭṭhā? Cattāro diṭṭhigatavippayuttalobhasahagatacittuppādā, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmāsavippayuttā parāmaṭṭhā.
১৫২৪. কতমে ধম্মা পরামাসৰিপ্পযুত্তা অপরামট্ঠা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা পরামাসৰিপ্পযুত্তা অপরামট্ঠা। পরামাসা চ পরামাসসম্পযুত্তা চ ধম্মা ন ৰত্তব্বা – পরামাসৰিপ্পযুত্তা পরামট্ঠাতিপি, পরামাসৰিপ্পযুত্তা অপরামট্ঠাতিপি।
1524. Katame dhammā parāmāsavippayuttā aparāmaṭṭhā? Cattāro maggā apariyāpannā, cattāri ca sāmaññaphalāni, nibbānañca – ime dhammā parāmāsavippayuttā aparāmaṭṭhā. Parāmāsā ca parāmāsasampayuttā ca dhammā na vattabbā – parāmāsavippayuttā parāmaṭṭhātipi, parāmāsavippayuttā aparāmaṭṭhātipi.
মহন্তরদুকং
Mahantaradukaṃ
১৫২৫. কতমে ধম্মা সারম্মণা? চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং – ইমে ধম্মা সারম্মণা।
1525. Katame dhammā sārammaṇā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ – ime dhammā sārammaṇā.
১৫২৬. কতমে ধম্মা অনারম্মণা? রূপঞ্চ, নিব্বানঞ্চ – ইমে ধম্মা অনারম্মণা।
1526. Katame dhammā anārammaṇā? Rūpañca, nibbānañca – ime dhammā anārammaṇā.
১৫২৭. কতমে ধম্মা চিত্তা? চক্খুৰিঞ্ঞাণং, সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং, কাযৰিঞ্ঞাণং, মনোধাতু, মনোৰিঞ্ঞাণধাতু – ইমে ধম্মা চিত্তা।
1527. Katame dhammā cittā? Cakkhuviññāṇaṃ, sotaviññāṇaṃ, ghānaviññāṇaṃ, jivhāviññāṇaṃ, kāyaviññāṇaṃ, manodhātu, manoviññāṇadhātu – ime dhammā cittā.
১৫২৮. কতমে ধম্মা নো চিত্তা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, রূপঞ্চ, নিব্বানঞ্চ – ইমে ধম্মা নো চিত্তা।
1528. Katame dhammā no cittā? Vedanākkhandho, saññākkhandho, saṅkhārakkhandho, rūpañca, nibbānañca – ime dhammā no cittā.
১৫২৯. কতমে ধম্মা চেতসিকা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো – ইমে ধম্মা চেতসিকা।
1529. Katame dhammā cetasikā? Vedanākkhandho, saññākkhandho, saṅkhārakkhandho – ime dhammā cetasikā.
১৫৩০. কতমে ধম্মা অচেতসিকা? চিত্তঞ্চ, রূপঞ্চ, নিব্বানঞ্চ – ইমে ধম্মা অচেতসিকা।
1530. Katame dhammā acetasikā? Cittañca, rūpañca, nibbānañca – ime dhammā acetasikā.
১৫৩১. কতমে ধম্মা চিত্তসম্পযুত্তা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো – ইমে ধম্মা চিত্তসম্পযুত্তা।
1531. Katame dhammā cittasampayuttā? Vedanākkhandho, saññākkhandho, saṅkhārakkhandho – ime dhammā cittasampayuttā.
১৫৩২. কতমে ধম্মা চিত্তৰিপ্পযুত্তা? রূপঞ্চ, নিব্বানঞ্চ – ইমে ধম্মা চিত্তৰিপ্পযুত্তা। চিত্তং ন ৰত্তব্বং – চিত্তেন সম্পযুত্তন্তিপি, চিত্তেন ৰিপ্পযুত্তন্তিপি।
1532. Katame dhammā cittavippayuttā? Rūpañca, nibbānañca – ime dhammā cittavippayuttā. Cittaṃ na vattabbaṃ – cittena sampayuttantipi, cittena vippayuttantipi.
১৫৩৩. কতমে ধম্মা চিত্তসংসট্ঠা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো – ইমে ধম্মা চিত্তসংসট্ঠা।
1533. Katame dhammā cittasaṃsaṭṭhā? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhā.
১৫৩৪. কতমে ধম্মা চিত্তৰিসংসট্ঠা? রূপঞ্চ, নিব্বানঞ্চ – ইমে ধম্মা চিত্তৰিসংসট্ঠা। চিত্তং ন ৰত্তব্বং – চিত্তেন সংসট্ঠন্তিপি, চিত্তেন ৰিসংসট্ঠন্তিপি।
1534. Katame dhammā cittavisaṃsaṭṭhā? Rūpañca, nibbānañca – ime dhammā cittavisaṃsaṭṭhā. Cittaṃ na vattabbaṃ – cittena saṃsaṭṭhantipi, cittena visaṃsaṭṭhantipi.
১৫৩৫. কতমে ধম্মা চিত্তসমুট্ঠানা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, কাযৰিঞ্ঞত্তি, ৰচীৰিঞ্ঞত্তি, যং ৰা পনঞ্ঞম্পি অত্থি রূপং চিত্তজং চিত্তহেতুকং চিত্তসমুট্ঠানং – রূপাযতনং সদ্দাযতনং গন্ধাযতনং রসাযতনং ফোট্ঠব্বাযতনং আকাসধাতু আপোধাতু রূপস্স লহুতা রূপস্স মুদুতা রূপস্স কম্মঞ্ঞতা রূপস্স উপচযো রূপস্স সন্ততি কবল়ীকারো আহারো – ইমে ধম্মা চিত্তসমুট্ঠানা।
1535. Katame dhammā cittasamuṭṭhānā? Vedanākkhandho, saññākkhandho, saṅkhārakkhandho, kāyaviññatti, vacīviññatti, yaṃ vā panaññampi atthi rūpaṃ cittajaṃ cittahetukaṃ cittasamuṭṭhānaṃ – rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa lahutā rūpassa mudutā rūpassa kammaññatā rūpassa upacayo rūpassa santati kabaḷīkāro āhāro – ime dhammā cittasamuṭṭhānā.
১৫৩৬. কতমে ধম্মা নো চিত্তসমুট্ঠানা? চিত্তঞ্চ, অৰসেসঞ্চ রূপং, নিব্বানঞ্চ – ইমে ধম্মা নো চিত্তসমুট্ঠানা।
1536. Katame dhammā no cittasamuṭṭhānā? Cittañca, avasesañca rūpaṃ, nibbānañca – ime dhammā no cittasamuṭṭhānā.
১৫৩৭. কতমে ধম্মা চিত্তসহভুনো? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, কাযৰিঞ্ঞত্তি, ৰচীৰিঞ্ঞত্তি – ইমে ধম্মা চিত্তসহভুনো।
1537. Katame dhammā cittasahabhuno? Vedanākkhandho, saññākkhandho, saṅkhārakkhandho, kāyaviññatti, vacīviññatti – ime dhammā cittasahabhuno.
১৫৩৮. কতমে ধম্মা নো চিত্তসহভুনো? চিত্তঞ্চ, অৰসেসঞ্চ রূপং, নিব্বানঞ্চ – ইমে ধম্মা নো চিত্তসহভুনো।
1538. Katame dhammā no cittasahabhuno? Cittañca, avasesañca rūpaṃ, nibbānañca – ime dhammā no cittasahabhuno.
১৫৩৯. কতমে ধম্মা চিত্তানুপরিৰত্তিনো? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, কাযৰিঞ্ঞত্তি, ৰচীৰিঞ্ঞত্তি – ইমে ধম্মা চিত্তানুপরিৰত্তিনো।
1539. Katame dhammā cittānuparivattino? Vedanākkhandho, saññākkhandho, saṅkhārakkhandho, kāyaviññatti, vacīviññatti – ime dhammā cittānuparivattino.
১৫৪০. কতমে ধম্মা নো চিত্তানুপরিৰত্তিনো? চিত্তঞ্চ, অৰসেসঞ্চ রূপং, নিব্বানঞ্চ – ইমে ধম্মা নো চিত্তানুপরিৰত্তিনো।
1540. Katame dhammā no cittānuparivattino? Cittañca, avasesañca rūpaṃ, nibbānañca – ime dhammā no cittānuparivattino.
১৫৪১. কতমে ধম্মা চিত্তসংসট্ঠসমুট্ঠানা? ৰেদনাক্খন্ধো , সঞ্ঞাক্খন্ধো, সঙ্খারক্খন্ধো – ইমে ধম্মা চিত্তসংসট্ঠসমুট্ঠানা।
1541. Katame dhammā cittasaṃsaṭṭhasamuṭṭhānā? Vedanākkhandho , saññākkhandho, saṅkhārakkhandho – ime dhammā cittasaṃsaṭṭhasamuṭṭhānā.
১৫৪২. কতমে ধম্মা নো চিত্তসংসট্ঠসমুট্ঠানা? চিত্তঞ্চ, রূপঞ্চ, নিব্বানঞ্চ – ইমে ধম্মা নো চিত্তসংসট্ঠসমুট্ঠানা।
1542. Katame dhammā no cittasaṃsaṭṭhasamuṭṭhānā? Cittañca, rūpañca, nibbānañca – ime dhammā no cittasaṃsaṭṭhasamuṭṭhānā.
১৫৪৩. কতমে ধম্মা চিত্তসংসট্ঠসমুট্ঠানসহভুনো? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো – ইমে ধম্মা চিত্তসংসট্ঠসমুট্ঠানসহভুনো।
1543. Katame dhammā cittasaṃsaṭṭhasamuṭṭhānasahabhuno? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhasamuṭṭhānasahabhuno.
১৫৪৪. কতমে ধম্মা নো চিত্তসংসট্ঠসমুট্ঠানসহভুনো? চিত্তঞ্চ, রূপঞ্চ , নিব্বানঞ্চ – ইমে ধম্মা নো চিত্তসংসট্ঠসমুট্ঠানসহভুনো।
1544. Katame dhammā no cittasaṃsaṭṭhasamuṭṭhānasahabhuno? Cittañca, rūpañca , nibbānañca – ime dhammā no cittasaṃsaṭṭhasamuṭṭhānasahabhuno.
১৫৪৫. কতমে ধম্মা চিত্তসংসট্ঠসমুট্ঠানানুপরিৰত্তিনো? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো – ইমে ধম্মা চিত্তসংসট্ঠসমুট্ঠানানুপরিৰত্তিনো।
1545. Katame dhammā cittasaṃsaṭṭhasamuṭṭhānānuparivattino? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhasamuṭṭhānānuparivattino.
১৫৪৬. কতমে ধম্মা নো চিত্তসংসট্ঠসমুট্ঠানানুপরিৰত্তিনো? চিত্তঞ্চ, রূপঞ্চ, নিব্বানঞ্চ – ইমে ধম্মা নো চিত্তসংসট্ঠসমুট্ঠানানুপরিৰত্তিনো।
1546. Katame dhammā no cittasaṃsaṭṭhasamuṭṭhānānuparivattino? Cittañca, rūpañca, nibbānañca – ime dhammā no cittasaṃsaṭṭhasamuṭṭhānānuparivattino.
১৫৪৭. কতমে ধম্মা অজ্ঝত্তিকা? চক্খাযতনং…পে॰… মনাযতনং – ইমে ধম্মা অজ্ঝত্তিকা।
1547. Katame dhammā ajjhattikā? Cakkhāyatanaṃ…pe… manāyatanaṃ – ime dhammā ajjhattikā.
১৫৪৮. কতমে ধম্মা বাহিরা? রূপাযতনং…পে॰… ধম্মাযতনং – ইমে ধম্মা বাহিরা।
1548. Katame dhammā bāhirā? Rūpāyatanaṃ…pe… dhammāyatanaṃ – ime dhammā bāhirā.
১৫৪৯. কতমে ধম্মা উপাদা? চক্খাযতনং…পে॰… কবল়ীকারো আহারো – ইমে ধম্মা উপাদা।
1549. Katame dhammā upādā? Cakkhāyatanaṃ…pe… kabaḷīkāro āhāro – ime dhammā upādā.
১৫৫০. কতমে ধম্মা নো উপাদা? চতূসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, চত্তারো চ মহাভূতা, নিব্বানঞ্চ – ইমে ধম্মা নো উপাদা।
1550. Katame dhammā no upādā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, cattāro ca mahābhūtā, nibbānañca – ime dhammā no upādā.
১৫৫১. কতমে ধম্মা উপাদিণ্ণা? তীসু ভূমীসু ৰিপাকো, যঞ্চ রূপং কম্মস্স কতত্তা – ইমে ধম্মা উপাদিণ্ণা।
1551. Katame dhammā upādiṇṇā? Tīsu bhūmīsu vipāko, yañca rūpaṃ kammassa katattā – ime dhammā upādiṇṇā.
১৫৫২. কতমে ধম্মা অনুপাদিণ্ণা? তীসু ভূমীসু কুসলং, অকুসলং, তীসু ভূমীসু কিরিযাব্যাকতং, যঞ্চ রূপং ন কম্মস্স কতত্তা, চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অনুপাদিণ্ণা।
1552. Katame dhammā anupādiṇṇā? Tīsu bhūmīsu kusalaṃ, akusalaṃ, tīsu bhūmīsu kiriyābyākataṃ, yañca rūpaṃ na kammassa katattā, cattāro maggā apariyāpannā, cattāri ca sāmaññaphalāni, nibbānañca – ime dhammā anupādiṇṇā.
উপাদানগোচ্ছকং
Upādānagocchakaṃ
১৫৫৩. কতমে ধম্মা উপাদানা? চত্তারি উপাদানানি – কামুপাদানং , দিট্ঠুপাদানং, সীলব্বতুপাদানং, অত্তৰাদুপাদানং। কামুপাদানং অট্ঠসু লোভসহগতেসু চিত্তুপ্পাদেসু উপ্পজ্জতি। দিট্ঠুপাদানঞ্চ সীলব্বতুপাদানঞ্চ অত্তৰাদুপাদানঞ্চ চতূসু দিট্ঠিগতসম্পযুত্তেসু চিত্তুপ্পাদেসু উপ্পজ্জন্তি – ইমে ধম্মা উপাদানা।
1553. Katame dhammā upādānā? Cattāri upādānāni – kāmupādānaṃ , diṭṭhupādānaṃ, sīlabbatupādānaṃ, attavādupādānaṃ. Kāmupādānaṃ aṭṭhasu lobhasahagatesu cittuppādesu uppajjati. Diṭṭhupādānañca sīlabbatupādānañca attavādupādānañca catūsu diṭṭhigatasampayuttesu cittuppādesu uppajjanti – ime dhammā upādānā.
১৫৫৪. কতমে ধম্মা নো উপাদানা? ঠপেত্ৰা উপাদানে অৰসেসং অকুসলং, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নো উপাদানা।
1554. Katame dhammā no upādānā? Ṭhapetvā upādāne avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no upādānā.
১৫৫৫. কতমে ধম্মা উপাদানিযা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা উপাদানিযা।
1555. Katame dhammā upādāniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādāniyā.
১৫৫৬. কতমে ধম্মা অনুপাদানিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অনুপাদানিযা।
1556. Katame dhammā anupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anupādāniyā.
১৫৫৭. কতমে ধম্মা উপাদানসম্পযুত্তা? চত্তারো দিট্ঠিগতসম্পযুত্তলোভসহগতচিত্তুপ্পাদা, চত্তারো দিট্ঠিগতৰিপ্পযুত্তলোভসহগতচিত্তুপ্পাদা, এত্থুপ্পন্নং লোভং ঠপেত্ৰা – ইমে ধম্মা উপাদানসম্পযুত্তা।
1557. Katame dhammā upādānasampayuttā? Cattāro diṭṭhigatasampayuttalobhasahagatacittuppādā, cattāro diṭṭhigatavippayuttalobhasahagatacittuppādā, etthuppannaṃ lobhaṃ ṭhapetvā – ime dhammā upādānasampayuttā.
১৫৫৮. কতমে ধম্মা উপাদানৰিপ্পযুত্তা? চতূসু দিট্ঠিগতৰিপ্পযুত্তলোভসহগতেসু চিত্তুপ্পাদেসু উপ্পন্নো লোভো, দ্ৰে দোমনস্সসহগতচিত্তুপ্পাদা, ৰিচিকিচ্ছাসহগতো চিত্তুপ্পাদো, উদ্ধচ্চসহগতো চিত্তুপ্পাদো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা উপাদানৰিপ্পযুত্তা।
1558. Katame dhammā upādānavippayuttā? Catūsu diṭṭhigatavippayuttalobhasahagatesu cittuppādesu uppanno lobho, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā upādānavippayuttā.
১৫৫৯. কতমে ধম্মা উপাদানা চেৰ উপাদানিযা চ? তানেৰ উপাদানানি উপাদানা চেৰ উপাদানিযা চ।
1559. Katame dhammā upādānā ceva upādāniyā ca? Tāneva upādānāni upādānā ceva upādāniyā ca.
১৫৬০. কতমে ধম্মা উপাদানিযা চেৰ নো চ উপাদানা? ঠপেত্ৰা উপাদানে অৰসেসং অকুসলং, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা উপাদানিযা চেৰ নো চ উপাদানা । অনুপাদানিযা ধম্মা ন ৰত্তব্বা – উপাদানা চেৰ উপাদানিযা চাতিপি, উপাদানিযা চেৰ নো চ উপাদানাতিপি।
1560. Katame dhammā upādāniyā ceva no ca upādānā? Ṭhapetvā upādāne avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādāniyā ceva no ca upādānā . Anupādāniyā dhammā na vattabbā – upādānā ceva upādāniyā cātipi, upādāniyā ceva no ca upādānātipi.
১৫৬১. কতমে ধম্মা উপাদানা চেৰ উপাদানসম্পযুত্তা চ? যত্থ দিট্ঠি চ লোভো চ একতো উপ্পজ্জন্তি – ইমে ধম্মা উপাদানা চেৰ উপাদানসম্পযুত্তা চ।
1561. Katame dhammā upādānā ceva upādānasampayuttā ca? Yattha diṭṭhi ca lobho ca ekato uppajjanti – ime dhammā upādānā ceva upādānasampayuttā ca.
১৫৬২. কতমে ধম্মা উপাদানসম্পযুত্তা চেৰ নো চ উপাদানা? অট্ঠ লোভসহগতচিত্তুপ্পাদা, এত্থুপ্পন্নে উপাদানে ঠপেত্ৰা – ইমে ধম্মা উপাদানসম্পযুত্তা চেৰ নো চ উপাদানা। উপাদানৰিপ্পযুত্তা ধম্মা ন ৰত্তব্বা – উপাদানা চেৰ উপাদানসম্পযুত্তা চাতিপি, উপাদানসম্পযুত্তা চেৰ নো চ উপাদানাতিপি।
1562. Katame dhammā upādānasampayuttā ceva no ca upādānā? Aṭṭha lobhasahagatacittuppādā, etthuppanne upādāne ṭhapetvā – ime dhammā upādānasampayuttā ceva no ca upādānā. Upādānavippayuttā dhammā na vattabbā – upādānā ceva upādānasampayuttā cātipi, upādānasampayuttā ceva no ca upādānātipi.
১৫৬৩. কতমে ধম্মা উপাদানৰিপ্পযুত্তা উপাদানিযা? চতূসু দিট্ঠিগতৰিপ্পযুত্তলোভসহগতেসু চিত্তুপ্পাদেসু উপ্পন্নো লোভো, দ্ৰে দোমনস্সসহগতচিত্তুপ্পাদা, ৰিচিকিচ্ছাসহগতো চিত্তুপ্পাদো, উদ্ধচ্চসহগতো চিত্তুপ্পাদো, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা উপাদানৰিপ্পযুত্তা উপাদানিযা।
1563. Katame dhammā upādānavippayuttā upādāniyā? Catūsu diṭṭhigatavippayuttalobhasahagatesu cittuppādesu uppanno lobho, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādānavippayuttā upādāniyā.
১৫৬৪. কতমে ধম্মা উপাদানৰিপ্পযুত্তা অনুপাদানিযা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা উপাদানৰিপ্পযুত্তা অনুপাদানিযা। উপাদানসম্পযুত্তা ধম্মা ন ৰত্তব্বা – উপাদানৰিপ্পযুত্তা উপাদানিযাতিপি, উপাদানৰিপ্পযুত্তা অনুপাদানিযাতিপি।
1564. Katame dhammā upādānavippayuttā anupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā upādānavippayuttā anupādāniyā. Upādānasampayuttā dhammā na vattabbā – upādānavippayuttā upādāniyātipi, upādānavippayuttā anupādāniyātipi.
কিলেসগোচ্ছকং
Kilesagocchakaṃ
১৫৬৫. কতমে ধম্মা কিলেসা? দস কিলেসৰত্থূনি – লোভো, দোসো, মোহো, মানো, দিট্ঠি, ৰিচিকিচ্ছা, থিনং, উদ্ধচ্চং, অহিরিকং, অনোত্তপ্পং। লোভো অট্ঠসু লোভসহগতেসু চিত্তুপ্পাদেসু উপ্পজ্জতি। দোসো দ্ৰীসু দোমনস্সসহগতেসু চিত্তুপ্পাদেসু উপ্পজ্জতি। মোহো সব্বাকুসলেসু উপ্পজ্জতি। মানো চতূসু দিট্ঠিগতৰিপ্পযুত্তলোভসহগতেসু চিত্তুপ্পাদেসু উপ্পজ্জতি। দিট্ঠি চতূসু দিট্ঠিগতসম্পযুত্তেসু চিত্তুপ্পাদেসু উপ্পজ্জতি। ৰিচিকিচ্ছা ৰিচিকিচ্ছাসহগতেসু চিত্তুপ্পাদেসু উপ্পজ্জতি। থিনং সসঙ্খারিকেসু অকুসলেসু উপ্পজ্জতি। উদ্ধচ্চঞ্চ অহিরিকঞ্চ অনোত্তপ্পঞ্চ সব্বাকুসলেসু উপ্পজ্জন্তি – ইমে ধম্মা কিলেসা।
1565. Katame dhammā kilesā? Dasa kilesavatthūni – lobho, doso, moho, māno, diṭṭhi, vicikicchā, thinaṃ, uddhaccaṃ, ahirikaṃ, anottappaṃ. Lobho aṭṭhasu lobhasahagatesu cittuppādesu uppajjati. Doso dvīsu domanassasahagatesu cittuppādesu uppajjati. Moho sabbākusalesu uppajjati. Māno catūsu diṭṭhigatavippayuttalobhasahagatesu cittuppādesu uppajjati. Diṭṭhi catūsu diṭṭhigatasampayuttesu cittuppādesu uppajjati. Vicikicchā vicikicchāsahagatesu cittuppādesu uppajjati. Thinaṃ sasaṅkhārikesu akusalesu uppajjati. Uddhaccañca ahirikañca anottappañca sabbākusalesu uppajjanti – ime dhammā kilesā.
১৫৬৬. কতমে ধম্মা নো কিলেসা? ঠপেত্ৰা কিলেসে অৰসেসং অকুসলং, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা নো কিলেসা।
1566. Katame dhammā no kilesā? Ṭhapetvā kilese avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no kilesā.
১৫৬৭. কতমে ধম্মা সংকিলেসিকা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং সব্বঞ্চ রূপং – ইমে ধম্মা সংকিলেসিকা।
1567. Katame dhammā saṃkilesikā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ sabbañca rūpaṃ – ime dhammā saṃkilesikā.
১৫৬৮. কতমে ধম্মা অসংকিলেসিকা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অসংকিলেসিকা।
1568. Katame dhammā asaṃkilesikā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃkilesikā.
১৫৬৯. কতমে ধম্মা সংকিলিট্ঠা? দ্ৰাদস অকুসলচিত্তুপ্পাদা – ইমে ধম্মা সংকিলিট্ঠা।
1569. Katame dhammā saṃkiliṭṭhā? Dvādasa akusalacittuppādā – ime dhammā saṃkiliṭṭhā.
১৫৭০. কতমে ধম্মা অসংকিলিট্ঠা? চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা অসংকিলিট্ঠা।
1570. Katame dhammā asaṃkiliṭṭhā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā asaṃkiliṭṭhā.
১৫৭১. কতমে ধম্মা কিলেসসম্পযুত্তা? দ্ৰাদস অকুসলচিত্তুপ্পাদা – ইমে ধম্মা কিলেসসম্পযুত্তা।
1571. Katame dhammā kilesasampayuttā? Dvādasa akusalacittuppādā – ime dhammā kilesasampayuttā.
১৫৭২. কতমে ধম্মা কিলেসৰিপ্পযুত্তা? চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা কিলেসৰিপ্পযুত্তা।
1572. Katame dhammā kilesavippayuttā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā kilesavippayuttā.
১৫৭৩. কতমে ধম্মা কিলেসা চেৰ সংকিলেসিকা চ? তেৰ কিলেসা কিলেসা চেৰ সংকিলেসিকা চ।
1573. Katame dhammā kilesā ceva saṃkilesikā ca? Teva kilesā kilesā ceva saṃkilesikā ca.
১৫৭৪. কতমে ধম্মা সংকিলেসিকা চেৰ নো চ কিলেসা? ঠপেত্ৰা কিলেসে অৰসেসং অকুসলং, তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সংকিলেসিকা চেৰ নো চ কিলেসা। অসংকিলেসিকা ধম্মা ন ৰত্তব্বা – কিলেসা চেৰ সংকিলেসিকা চাতিপি, সংকিলেসিকা চেৰ নো চ কিলেসাতিপি।
1574. Katame dhammā saṃkilesikā ceva no ca kilesā? Ṭhapetvā kilese avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃkilesikā ceva no ca kilesā. Asaṃkilesikā dhammā na vattabbā – kilesā ceva saṃkilesikā cātipi, saṃkilesikā ceva no ca kilesātipi.
১৫৭৫. কতমে ধম্মা কিলেসা চেৰ সংকিলিট্ঠা চ? তেৰ কিলেসা কিলেসা চেৰ সংকিলিট্ঠা চ।
1575. Katame dhammā kilesā ceva saṃkiliṭṭhā ca? Teva kilesā kilesā ceva saṃkiliṭṭhā ca.
১৫৭৬. কতমে ধম্মা সংকিলিট্ঠা চেৰ নো চ কিলেসা? ঠপেত্ৰা কিলেসে অৰসেসং অকুসলং – ইমে ধম্মা সংকিলিট্ঠা চেৰ নো চ কিলেসা । অসংকিলিট্ঠা ধম্মা ন ৰত্তব্বা – কিলেসা চেৰ সংকিলিট্ঠা চাতিপি, সংকিলিট্ঠা চেৰ নো চ কিলেসাতিপি।
1576. Katame dhammā saṃkiliṭṭhā ceva no ca kilesā? Ṭhapetvā kilese avasesaṃ akusalaṃ – ime dhammā saṃkiliṭṭhā ceva no ca kilesā . Asaṃkiliṭṭhā dhammā na vattabbā – kilesā ceva saṃkiliṭṭhā cātipi, saṃkiliṭṭhā ceva no ca kilesātipi.
১৫৭৭. কতমে ধম্মা কিলেসা চেৰ কিলেসসম্পযুত্তা চ? যত্থ দ্ৰে তযো কিলেসা একতো উপ্পজ্জন্তি – ইমে ধম্মা কিলেসা চেৰ কিলেসসম্পযুত্তা চ।
1577. Katame dhammā kilesā ceva kilesasampayuttā ca? Yattha dve tayo kilesā ekato uppajjanti – ime dhammā kilesā ceva kilesasampayuttā ca.
১৫৭৮. কতমে ধম্মা কিলেসসম্পযুত্তা চেৰ নো চ কিলেসা? ঠপেত্ৰা কিলেসে অৰসেসং অকুসলং – ইমে ধম্মা কিলেসসম্পযুত্তা চেৰ নো চ কিলেসা। কিলেসৰিপ্পযুত্তা ধম্মা ন ৰত্তব্বা – কিলেসা চেৰ কিলেসসম্পযুত্তা চাতিপি, কিলেসসম্পযুত্তা চেৰ নো চ কিলেসাতিপি।
1578. Katame dhammā kilesasampayuttā ceva no ca kilesā? Ṭhapetvā kilese avasesaṃ akusalaṃ – ime dhammā kilesasampayuttā ceva no ca kilesā. Kilesavippayuttā dhammā na vattabbā – kilesā ceva kilesasampayuttā cātipi, kilesasampayuttā ceva no ca kilesātipi.
১৫৭৯. কতমে ধম্মা কিলেসৰিপ্পযুত্তা সংকিলেসিকা? তীসু ভূমীসু কুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা কিলেসৰিপ্পযুত্তা সংকিলেসিকা।
1579. Katame dhammā kilesavippayuttā saṃkilesikā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā kilesavippayuttā saṃkilesikā.
১৫৮০. কতমে ধম্মা কিলেসৰিপ্পযুত্তা অসংকিলেসিকা? চত্তারো মগ্গা অপরিযাপন্না , চত্তারি চ সামঞ্ঞফলানি, নিব্বানঞ্চ – ইমে ধম্মা কিলেসৰিপ্পযুত্তা অসংকিলেসিকা। কিলেসসম্পযুত্তা ধম্মা ন ৰত্তব্বা – কিলেসৰিপ্পযুত্তা সংকিলেসিকাতিপি, কিলেসৰিপ্পযুত্তা অসংকিলেসিকাতিপি।
1580. Katame dhammā kilesavippayuttā asaṃkilesikā? Cattāro maggā apariyāpannā , cattāri ca sāmaññaphalāni, nibbānañca – ime dhammā kilesavippayuttā asaṃkilesikā. Kilesasampayuttā dhammā na vattabbā – kilesavippayuttā saṃkilesikātipi, kilesavippayuttā asaṃkilesikātipi.
পিট্ঠিদুকং
Piṭṭhidukaṃ
১৫৮১. কতমে ধম্মা দস্সনেন পহাতব্বা? চত্তারো দিট্ঠিগতসম্পযুত্তচিত্তুপ্পাদা, ৰিচিকিচ্ছাসহগতো চিত্তুপ্পাদো – ইমে ধম্মা দস্সনেন পহাতব্বা। চত্তারো দিট্ঠিগতৰিপ্পযুত্তলোভসহগতচিত্তুপ্পাদা, দ্ৰে দোমনস্সসহগতচিত্তুপ্পাদা – ইমে ধম্মা সিযা দস্সনেন পহাতব্বা, সিযা ন দস্সনেন পহাতব্বা।
1581. Katame dhammā dassanena pahātabbā? Cattāro diṭṭhigatasampayuttacittuppādā, vicikicchāsahagato cittuppādo – ime dhammā dassanena pahātabbā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā dassanena pahātabbā, siyā na dassanena pahātabbā.
১৫৮২. কতমে ধম্মা ন দস্সনেন পহাতব্বা? উদ্ধচ্চসহগতো চিত্তুপ্পাদো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা ন দস্সনেন পহাতব্বা।
1582. Katame dhammā na dassanena pahātabbā? Uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na dassanena pahātabbā.
১৫৮৩. কতমে ধম্মা ভাৰনায পহাতব্বা? উদ্ধচ্চসহগতো চিত্তুপ্পাদো – ইমে ধম্মা ভাৰনায পহাতব্বা। চত্তারো দিট্ঠিগতৰিপ্পযুত্তলোভসহগতচিত্তুপ্পাদা, দ্ৰে দোমনস্সসহগতচিত্তুপ্পাদা – ইমে ধম্মা সিযা ভাৰনায পহাতব্বা, সিযা ন ভাৰনায পহাতব্বা।
1583. Katame dhammā bhāvanāya pahātabbā? Uddhaccasahagato cittuppādo – ime dhammā bhāvanāya pahātabbā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā bhāvanāya pahātabbā, siyā na bhāvanāya pahātabbā.
১৫৮৪. কতমে ধম্মা ন ভাৰনায পহাতব্বা? চত্তারো দিট্ঠিগতসম্পযুত্তচিত্তুপ্পাদা, ৰিচিকিচ্ছাসহগতো চিত্তুপ্পাদো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা ন ভাৰনায পহাতব্বা।
1584. Katame dhammā na bhāvanāya pahātabbā? Cattāro diṭṭhigatasampayuttacittuppādā, vicikicchāsahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na bhāvanāya pahātabbā.
১৫৮৫. কতমে ধম্মা দস্সনেন পহাতব্বহেতুকা? চত্তারো দিট্ঠিগতসম্পযুত্তচিত্তুপ্পাদা, ৰিচিকিচ্ছাসহগতো চিত্তুপ্পাদো, এত্থুপ্পন্নং মোহং ঠপেত্ৰা – ইমে ধম্মা দস্সনেন পহাতব্বহেতুকা। চত্তারো দিট্ঠিগতৰিপ্পযুত্তলোভসহগতচিত্তুপ্পাদা, দ্ৰে দোমনস্সসহগতচিত্তুপ্পাদা – ইমে ধম্মা সিযা দস্সনেন পহাতব্বহেতুকা, সিযা ন দস্সনেন পহাতব্বহেতুকা।
1585. Katame dhammā dassanena pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, etthuppannaṃ mohaṃ ṭhapetvā – ime dhammā dassanena pahātabbahetukā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā dassanena pahātabbahetukā, siyā na dassanena pahātabbahetukā.
১৫৮৬. কতমে ধম্মা ন দস্সনেন পহাতব্বহেতুকা? ৰিচিকিচ্ছাসহগতো মোহো, উদ্ধচ্চসহগতো চিত্তুপ্পাদো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা ন দস্সনেন পহাতব্বহেতুকা।
1586. Katame dhammā na dassanena pahātabbahetukā? Vicikicchāsahagato moho, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na dassanena pahātabbahetukā.
১৫৮৭. কতমে ধম্মা ভাৰনায পহাতব্বহেতুকা? উদ্ধচ্চসহগতো চিত্তুপ্পাদো, এত্থুপ্পন্নং মোহং ঠপেত্ৰা – ইমে ধম্মা ভাৰনায পহাতব্বহেতুকা। চত্তারো দিট্ঠিগতৰিপ্পযুত্তলোভসহগতচিত্তুপ্পাদা, দ্ৰে দোমনস্সসহগতচিত্তুপ্পাদা – ইমে ধম্মা সিযা ভাৰনায পহাতব্বহেতুকা, সিযা ন ভাৰনায পহাতব্বহেতুকা।
1587. Katame dhammā bhāvanāya pahātabbahetukā? Uddhaccasahagato cittuppādo, etthuppannaṃ mohaṃ ṭhapetvā – ime dhammā bhāvanāya pahātabbahetukā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā bhāvanāya pahātabbahetukā, siyā na bhāvanāya pahātabbahetukā.
১৫৮৮. কতমে ধম্মা ন ভাৰনায পহাতব্বহেতুকা? চত্তারো দিট্ঠিগতসম্পযুত্তচিত্তুপ্পাদা, ৰিচিকিচ্ছাসহগতো চিত্তুপ্পাদো, উদ্ধচ্চসহগতো মোহো, চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা ন ভাৰনায পহাতব্বহেতুকা।
1588. Katame dhammā na bhāvanāya pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na bhāvanāya pahātabbahetukā.
১৫৮৯. কতমে ধম্মা সৰিতক্কা? কামাৰচরকুসলং, অকুসলং, কামাৰচরকুসলস্স ৰিপাকতো একাদস চিত্তুপ্পাদা, অকুসলস্স ৰিপাকতো দ্ৰে, কিরিযতো একাদস, রূপাৰচরং পঠমং ঝানং কুসলতো চ ৰিপাকতো চ কিরিযতো চ লোকুত্তরং পঠমং ঝানং কুসলতো চ ৰিপাকতো চ, এত্থুপ্পন্নং ৰিতক্কং ঠপেত্ৰা – ইমে ধম্মা সৰিতক্কা।
1589. Katame dhammā savitakkā? Kāmāvacarakusalaṃ, akusalaṃ, kāmāvacarakusalassa vipākato ekādasa cittuppādā, akusalassa vipākato dve, kiriyato ekādasa, rūpāvacaraṃ paṭhamaṃ jhānaṃ kusalato ca vipākato ca kiriyato ca lokuttaraṃ paṭhamaṃ jhānaṃ kusalato ca vipākato ca, etthuppannaṃ vitakkaṃ ṭhapetvā – ime dhammā savitakkā.
১৫৯০. কতমে ধম্মা অৰিতক্কা? দ্ৰেপঞ্চৰিঞ্ঞাণানি, রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ, চত্তারো অরূপাৰচরা কুসলতো চ ৰিপাকতো চ কিরিযতো চ, লোকুত্তরতিকচতুক্কজ্ঝানা কুসলতো চ ৰিপাকতো চ, ৰিতক্কো চ, রূপঞ্চ, নিব্বানঞ্চ – ইমে ধম্মা অৰিতক্কা।
1590. Katame dhammā avitakkā? Dvepañcaviññāṇāni, rūpāvacaratikacatukkajjhānā kusalato ca vipākato ca kiriyato ca, cattāro arūpāvacarā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, vitakko ca, rūpañca, nibbānañca – ime dhammā avitakkā.
১৫৯১. কতমে ধম্মা সৰিচারা? কামাৰচরকুসলং , অকুসলং, কামাৰচরকুসলস্স ৰিপাকতো একাদস চিত্তুপ্পাদা, অকুসলস্স ৰিপাকতো দ্ৰে কিরিযতো একাদস, রূপাৰচরএককদুকজ্ঝানা কুসলতো চ ৰিপাকতো চ কিরিযতো চ, লোকুত্তরএককদুকজ্ঝানা কুসলতো চ ৰিপাকতো চ, এত্থুপ্পন্নং ৰিচারং ঠপেত্ৰা – ইমে ধম্মা সৰিচারা।
1591. Katame dhammā savicārā? Kāmāvacarakusalaṃ , akusalaṃ, kāmāvacarakusalassa vipākato ekādasa cittuppādā, akusalassa vipākato dve kiriyato ekādasa, rūpāvacaraekakadukajjhānā kusalato ca vipākato ca kiriyato ca, lokuttaraekakadukajjhānā kusalato ca vipākato ca, etthuppannaṃ vicāraṃ ṭhapetvā – ime dhammā savicārā.
১৫৯২. কতমে ধম্মা অৰিচারা? দ্ৰেপঞ্চৰিঞ্ঞাণানি, রূপাৰচরতিকতিকজ্ঝানা কুসলতো চ ৰিপাকতো চ কিরিযতো চ, চত্তারো আরুপ্পা কুসলতো চ ৰিপাকতো চ কিরিযতো চ, লোকুত্তরতিকতিকজ্ঝানা কুসলতো চ ৰিপাকতো চ, ৰিচারো চ, রূপঞ্চ, নিব্বানঞ্চ – ইমে ধম্মা অৰিচারা।
1592. Katame dhammā avicārā? Dvepañcaviññāṇāni, rūpāvacaratikatikajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaratikatikajjhānā kusalato ca vipākato ca, vicāro ca, rūpañca, nibbānañca – ime dhammā avicārā.
১৫৯৩. কতমে ধম্মা সপ্পীতিকা? কামাৰচরকুসলতো চত্তারো সোমনস্সসহগতচিত্তুপ্পাদা, অকুসলতো চত্তারো, কামাৰচরকুসলস্স ৰিপাকতো পঞ্চ, কিরিযতো পঞ্চ, রূপাৰচরদুকতিকজ্ঝানা কুসলতো চ ৰিপাকতো চ কিরিযতো চ, লোকুত্তরদুকতিকজ্ঝানা কুসলতো চ ৰিপাকতো চ, এত্থুপ্পন্নং পীতিং ঠপেত্ৰা – ইমে ধম্মা সপ্পীতিকা।
1593. Katame dhammā sappītikā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā sappītikā.
১৫৯৪. কতমে ধম্মা অপ্পীতিকা? কামাৰচরকুসলতো চত্তারো উপেক্খাসহগতচিত্তুপ্পাদা, অকুসলতো অট্ঠ, কামাৰচরকুসলস্স ৰিপাকতো একাদস, অকুসলস্স ৰিপাকতো সত্ত, কিরিযতো ছ, রূপাৰচরদুকদুকজ্ঝানা কুসলতো চ ৰিপাকতো চ কিরিযতো চ, চত্তারো আরুপ্পা কুসলতো চ ৰিপাকতো চ কিরিযতো চ, লোকুত্তরদুকদুকজ্ঝানা কুসলতো চ ৰিপাকতো চ পীতি চ, রূপঞ্চ, নিব্বানঞ্চ – ইমে ধম্মা অপ্পীতিকা।
1594. Katame dhammā appītikā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato ekādasa, akusalassa vipākato satta, kiriyato cha, rūpāvacaradukadukajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaradukadukajjhānā kusalato ca vipākato ca pīti ca, rūpañca, nibbānañca – ime dhammā appītikā.
১৫৯৫. কতমে ধম্মা পীতিসহগতা? কামাৰচরকুসলতো চত্তারো সোমনস্সসহগতচিত্তুপ্পাদা, অকুসলতো চত্তারো, কামাৰচরকুসলস্স ৰিপাকতো পঞ্চ, কিরিযতো পঞ্চ, রূপাৰচরদুকতিকজ্ঝানা কুসলতো চ ৰিপাকতো চ কিরিযতো চ, লোকুত্তরদুকতিকজ্ঝানা কুসলতো চ ৰিপাকতো চ, এত্থুপ্পন্নং পীতিং ঠপেত্ৰা – ইমে ধম্মা পীতিসহগতা।
1595. Katame dhammā pītisahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā pītisahagatā.
১৫৯৬. কতমে ধম্মা ন পীতিসহগতা? কামাৰচরকুসলতো চত্তারো উপেক্খাসহগতচিত্তুপ্পাদা, অকুসলতো অট্ঠ, কামাৰচরকুসলস্স ৰিপাকতো একাদস, অকুসলস্স ৰিপাকতো সত্ত, কিরিযতো ছ, রূপাৰচরদুকদুকজ্ঝানা কুসলতো চ ৰিপাকতো চ কিরিযতো চ, চত্তারো আরুপ্পা কুসলতো চ ৰিপাকতো চ কিরিযতো চ, লোকুত্তরদুকদুকজ্ঝানা কুসলতো চ ৰিপাকতো চ, পীতি চ, রূপঞ্চ, নিব্বানঞ্চ – ইমে ধম্মা ন পীতিসহগতা।
1596. Katame dhammā na pītisahagatā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato ekādasa, akusalassa vipākato satta, kiriyato cha, rūpāvacaradukadukajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaradukadukajjhānā kusalato ca vipākato ca, pīti ca, rūpañca, nibbānañca – ime dhammā na pītisahagatā.
১৫৯৭. কতমে ধম্মা সুখসহগতা? কামাৰচরকুসলতো চত্তারো সোমনস্সসহগতচিত্তুপ্পাদা, অকুসলতো চত্তারো, কামাৰচরকুসলস্স ৰিপাকতো ছ, কিরিযতো পঞ্চ, রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ লোকুত্তরতিকচতুক্কজ্ঝানা কুসলতো চ ৰিপাকতো চ, এত্থুপ্পন্নং সুখং ঠপেত্ৰা – ইমে ধম্মা সুখসহগতা।
1597. Katame dhammā sukhasahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato cha, kiriyato pañca, rūpāvacaratikacatukkajjhānā kusalato ca vipākato ca kiriyato ca lokuttaratikacatukkajjhānā kusalato ca vipākato ca, etthuppannaṃ sukhaṃ ṭhapetvā – ime dhammā sukhasahagatā.
১৫৯৮. কতমে ধম্মা ন সুখসহগতা? কামাৰচরকুসলতো চত্তারো উপেক্খাসহগতচিত্তুপ্পাদা, অকুসলতো অট্ঠ, কামাৰচরকুসলস্স ৰিপাকতো দস, অকুসলস্স ৰিপাকতো সত্ত, কিরিযতো ছ, রূপাৰচরং চতুত্থং ঝানং কুসলতো চ ৰিপাকতো চ কিরিযতো চ, চত্তারো আরুপ্পা কুসলতো চ ৰিপাকতো চ কিরিযতো চ লোকুত্তরং চতুত্থং ঝানং কুসলতো চ ৰিপাকতো চ, সুখঞ্চ, রূপঞ্চ, নিব্বানঞ্চ – ইমে ধম্মা ন সুখসহগতা।
1598. Katame dhammā na sukhasahagatā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato dasa, akusalassa vipākato satta, kiriyato cha, rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca lokuttaraṃ catutthaṃ jhānaṃ kusalato ca vipākato ca, sukhañca, rūpañca, nibbānañca – ime dhammā na sukhasahagatā.
১৫৯৯. কতমে ধম্মা উপেক্খাসহগতা? কামাৰচরকুসলতো চত্তারো উপেক্খাসহগতচিত্তুপ্পাদা, অকুসলতো ছ, কামাৰচরকুসলস্স ৰিপাকতো দস, অকুসলস্স ৰিপাকতো ছ, কিরিযতো ছ , রূপাৰচরং চতুত্থং ঝানং কুসলতো চ ৰিপাকতো চ কিরিযতো চ, চত্তারো আরুপ্পা কুসলতো চ ৰিপাকতো চ কিরিযতো চ, লোকুত্তরং চতুত্থং ঝানং কুসলতো চ ৰিপাকতো চ, এত্থুপ্পন্নং উপেক্খং ঠপেত্ৰা – ইমে ধম্মা উপেক্খাসহগতা।
1599. Katame dhammā upekkhāsahagatā? Kāmāvacarakusalato cattāro upekkhāsahagatacittuppādā, akusalato cha, kāmāvacarakusalassa vipākato dasa, akusalassa vipākato cha, kiriyato cha , rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaraṃ catutthaṃ jhānaṃ kusalato ca vipākato ca, etthuppannaṃ upekkhaṃ ṭhapetvā – ime dhammā upekkhāsahagatā.
১৬০০. কতমে ধম্মা ন উপেক্খাসহগতা? কামাৰচরকুসলতো চত্তারো সোমনস্সসহগতচিত্তুপ্পাদা, অকুসলতো ছ, কামাৰচরকুসলস্স ৰিপাকতো ছ, অকুসলস্স ৰিপাকতো একো, কিরিযতো পঞ্চ, রূপাৰচরতিকচতুক্কজ্ঝানা কুসলতো চ ৰিপাকতো চ কিরিযতো চ, লোকুত্তরতিকচতুক্কজ্ঝানা কুসলতো চ ৰিপাকতো চ, উপেক্খা চ, রূপঞ্চ, নিব্বানঞ্চ – ইমে ধম্মা ন উপেক্খাসহগতা।
1600. Katame dhammā na upekkhāsahagatā? Kāmāvacarakusalato cattāro somanassasahagatacittuppādā, akusalato cha, kāmāvacarakusalassa vipākato cha, akusalassa vipākato eko, kiriyato pañca, rūpāvacaratikacatukkajjhānā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, upekkhā ca, rūpañca, nibbānañca – ime dhammā na upekkhāsahagatā.
১৬০১. কতমে ধম্মা কামাৰচরা? কামাৰচরকুসলং, অকুসলং, সব্বো কামাৰচরস্স ৰিপাকো, কামাৰচরকিরিযাব্যাকতং, সব্বঞ্চ রূপং – ইমে ধম্মা কামাৰচরা।
1601. Katame dhammā kāmāvacarā? Kāmāvacarakusalaṃ, akusalaṃ, sabbo kāmāvacarassa vipāko, kāmāvacarakiriyābyākataṃ, sabbañca rūpaṃ – ime dhammā kāmāvacarā.
১৬০২. কতমে ধম্মা ন কামাৰচরা? রূপাৰচরা , অরূপাৰচরা, অপরিযাপন্না – ইমে ধম্মা ন কামাৰচরা।
1602. Katame dhammā na kāmāvacarā? Rūpāvacarā , arūpāvacarā, apariyāpannā – ime dhammā na kāmāvacarā.
১৬০৩. কতমে ধম্মা রূপাৰচরা? রূপাৰচরচতুক্কপঞ্চকজ্ঝানা কুসলতো চ ৰিপাকতো চ কিরিযতো চ – ইমে ধম্মা রূপাৰচরা।
1603. Katame dhammā rūpāvacarā? Rūpāvacaracatukkapañcakajjhānā kusalato ca vipākato ca kiriyato ca – ime dhammā rūpāvacarā.
১৬০৪. কতমে ধম্মা ন রূপাৰচরা? কামাৰচরা, অরূপাৰচরা, অপরিযাপন্না – ইমে ধম্মা ন রূপাৰচরা।
1604. Katame dhammā na rūpāvacarā? Kāmāvacarā, arūpāvacarā, apariyāpannā – ime dhammā na rūpāvacarā.
১৬০৫. কতমে ধম্মা অরূপাৰচরা? চত্তারো আরুপ্পা কুসলতো চ ৰিপাকতো চ কিরিযতো চ – ইমে ধম্মা অরূপাৰচরা।
1605. Katame dhammā arūpāvacarā? Cattāro āruppā kusalato ca vipākato ca kiriyato ca – ime dhammā arūpāvacarā.
১৬০৬. কতমে ধম্মা ন অরূপাৰচরা? কামাৰচরা, রূপাৰচরা, অপরিযাপন্না – ইমে ধম্মা ন অরূপাৰচরা।
1606. Katame dhammā na arūpāvacarā? Kāmāvacarā, rūpāvacarā, apariyāpannā – ime dhammā na arūpāvacarā.
১৬০৭. কতমে ধম্মা পরিযাপন্না? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা পরিযাপন্না।
1607. Katame dhammā pariyāpannā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā pariyāpannā.
১৬০৮. কতমে ধম্মা অপরিযাপন্না? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অপরিযাপন্না।
1608. Katame dhammā apariyāpannā? Cattāro maggā apariyāpannā, cattāri ca sāmaññaphalāni, nibbānañca – ime dhammā apariyāpannā.
১৬০৯. কতমে ধম্মা নিয্যানিকা? চত্তারো মগ্গা অপরিযাপন্না – ইমে ধম্মা নিয্যানিকা।
1609. Katame dhammā niyyānikā? Cattāro maggā apariyāpannā – ime dhammā niyyānikā.
১৬১০. কতমে ধম্মা অনিয্যানিকা? তীসু ভূমীসু কুসলং, অকুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা অনিয্যানিকা।
1610. Katame dhammā aniyyānikā? Tīsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyyānikā.
১৬১১. কতমে ধম্মা নিযতা? চত্তারো দিট্ঠিগতসম্পযুত্তচিত্তুপ্পাদা, দ্ৰে দোমনস্সসহগতচিত্তুপ্পাদা – ইমে ধম্মা সিযা নিযতা সিযা অনিযতা। চত্তারো মগ্গা অপরিযাপন্না – ইমে ধম্মা নিযতা।
1611. Katame dhammā niyatā? Cattāro diṭṭhigatasampayuttacittuppādā, dve domanassasahagatacittuppādā – ime dhammā siyā niyatā siyā aniyatā. Cattāro maggā apariyāpannā – ime dhammā niyatā.
১৬১২. কতমে ধম্মা অনিযতা? চত্তারো দিট্ঠিগতৰিপ্পযুত্তলোভসহগতচিত্তুপ্পাদা, ৰিচিকিচ্ছাসহগতো চিত্তুপ্পাদো, উদ্ধচ্চসহগতো চিত্তুপ্পাদো, তীসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা অনিযতা।
1612. Katame dhammā aniyatā? Cattāro diṭṭhigatavippayuttalobhasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyatā.
১৬১৩. কতমে ধম্মা সউত্তরা? তীসু ভূমীসু কুসলং, অকুসলং, তীসু ভূমীসু ৰিপাকো, তীসু ভূমীসু কিরিযাব্যাকতং, সব্বঞ্চ রূপং – ইমে ধম্মা সউত্তরা।
1613. Katame dhammā sauttarā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sauttarā.
১৬১৪. কতমে ধম্মা অনুত্তরা? চত্তারো মগ্গা অপরিযাপন্না, চত্তারি চ সামঞ্ঞফলানি, নিব্বানঞ্চ – ইমে ধম্মা অনুত্তরা।
1614. Katame dhammā anuttarā? Cattāro maggā apariyāpannā, cattāri ca sāmaññaphalāni, nibbānañca – ime dhammā anuttarā.
১৬১৫. কতমে ধম্মা সরণা? দ্ৰাদস অকুসলচিত্তুপ্পাদা – ইমে ধম্মা সরণা।
1615. Katame dhammā saraṇā? Dvādasa akusalacittuppādā – ime dhammā saraṇā.
১৬১৬. কতমে ধম্মা অরণা? চতূসু ভূমীসু কুসলং, চতূসু ভূমীসু ৰিপাকো, তীসু ভূমীসু কিরিযাব্যাকতং, রূপঞ্চ, নিব্বানঞ্চ – ইমে ধম্মা অরণা।
1616. Katame dhammā araṇā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā araṇā.
অত্থুদ্ধারো নিট্ঠিতো।
Atthuddhāro niṭṭhito.
ধম্মসঙ্গণীপকরণং নিট্ঠিতং।
Dhammasaṅgaṇīpakaraṇaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / ধম্মসঙ্গণি-অট্ঠকথা • Dhammasaṅgaṇi-aṭṭhakathā / দুকঅত্থুদ্ধারৰণ্ণনা • Dukaatthuddhāravaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-মূলটীকা • Dhammasaṅgaṇī-mūlaṭīkā / দুকঅত্থুদ্ধারৰণ্ণনা • Dukaatthuddhāravaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / দুকঅত্থুদ্ধারৰণ্ণনা • Dukaatthuddhāravaṇṇanā
