| Library / Tipiṭaka / ತಿಪಿಟಕ • Tipiṭaka / ಧಮ್ಮಸಙ್ಗಣೀಪಾಳಿ • Dhammasaṅgaṇīpāḷi |
ದುಕಅತ್ಥುದ್ಧಾರೋ
Dukaatthuddhāro
ಹೇತುಗೋಚ್ಛಕಂ
Hetugocchakaṃ
೧೪೪೧. ಕತಮೇ ಧಮ್ಮಾ ಹೇತೂ? ತಯೋ ಕುಸಲಹೇತೂ, ತಯೋ ಅಕುಸಲಹೇತೂ, ತಯೋ ಅಬ್ಯಾಕತಹೇತೂ। ಅಲೋಭೋ ಕುಸಲಹೇತು, ಅದೋಸೋ ಕುಸಲಹೇತು, ಚತೂಸು ಭೂಮೀಸು ಕುಸಲೇಸು ಉಪ್ಪಜ್ಜನ್ತಿ। ಅಮೋಹೋ ಕುಸಲಹೇತು, ಕಾಮಾವಚರಕುಸಲತೋ ಚತ್ತಾರೋ ಞಾಣವಿಪ್ಪಯುತ್ತೇ ಚಿತ್ತುಪ್ಪಾದೇ ಠಪೇತ್ವಾ, ಚತೂಸು ಭೂಮೀಸು ಕುಸಲೇಸು ಉಪ್ಪಜ್ಜತಿ।
1441. Katame dhammā hetū? Tayo kusalahetū, tayo akusalahetū, tayo abyākatahetū. Alobho kusalahetu, adoso kusalahetu, catūsu bhūmīsu kusalesu uppajjanti. Amoho kusalahetu, kāmāvacarakusalato cattāro ñāṇavippayutte cittuppāde ṭhapetvā, catūsu bhūmīsu kusalesu uppajjati.
ಲೋಭೋ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ದೋಸೋ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಮೋಹೋ ಸಬ್ಬಾಕುಸಲೇಸು ಉಪ್ಪಜ್ಜತಿ।
Lobho aṭṭhasu lobhasahagatesu cittuppādesu uppajjati. Doso dvīsu domanassasahagatesu cittuppādesu uppajjati. Moho sabbākusalesu uppajjati.
ಅಲೋಭೋ ವಿಪಾಕಹೇತು ಅದೋಸೋ ವಿಪಾಕಹೇತು, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ, ಚತೂಸು ಭೂಮೀಸು ವಿಪಾಕೇಸು ಉಪ್ಪಜ್ಜನ್ತಿ। ಅಮೋಹೋ ವಿಪಾಕಹೇತು, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ, ಚತ್ತಾರೋ ಞಾಣವಿಪ್ಪಯುತ್ತೇ ಚಿತ್ತುಪ್ಪಾದೇ ಠಪೇತ್ವಾ, ಚತೂಸು ಭೂಮೀಸು ವಿಪಾಕೇಸು ಉಪ್ಪಜ್ಜತಿ।
Alobho vipākahetu adoso vipākahetu, kāmāvacarassa vipākato ahetuke cittuppāde ṭhapetvā, catūsu bhūmīsu vipākesu uppajjanti. Amoho vipākahetu, kāmāvacarassa vipākato ahetuke cittuppāde ṭhapetvā, cattāro ñāṇavippayutte cittuppāde ṭhapetvā, catūsu bhūmīsu vipākesu uppajjati.
ಅಲೋಭೋ ಕಿರಿಯಹೇತು ಅದೋಸೋ ಕಿರಿಯಹೇತು, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ, ತೀಸು ಭೂಮೀಸು ಕಿರಿಯೇಸು ಉಪ್ಪಜ್ಜನ್ತಿ । ಅಮೋಹೋ ಕಿರಿಯಹೇತು, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ, ಚತ್ತಾರೋ ಞಾಣವಿಪ್ಪಯುತ್ತೇ ಚಿತ್ತುಪ್ಪಾದೇ ಠಪೇತ್ವಾ, ತೀಸು ಭೂಮೀಸು ಕಿರಿಯೇಸು ಉಪ್ಪಜ್ಜತಿ – ಇಮೇ ಧಮ್ಮಾ ಹೇತೂ।
Alobho kiriyahetu adoso kiriyahetu, kāmāvacarakiriyato ahetuke cittuppāde ṭhapetvā, tīsu bhūmīsu kiriyesu uppajjanti . Amoho kiriyahetu, kāmāvacarakiriyato ahetuke cittuppāde ṭhapetvā, cattāro ñāṇavippayutte cittuppāde ṭhapetvā, tīsu bhūmīsu kiriyesu uppajjati – ime dhammā hetū.
೧೪೪೨. ಕತಮೇ ಧಮ್ಮಾ ನ ಹೇತೂ? ಠಪೇತ್ವಾ ಹೇತೂ, ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಹೇತೂ।
1442. Katame dhammā na hetū? Ṭhapetvā hetū, catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na hetū.
೧೪೪೩. ಕತಮೇ ಧಮ್ಮಾ ಸಹೇತುಕಾ? ವಿಚಿಕಿಚ್ಛಾಸಹಗತಂ ಉದ್ಧಚ್ಚಸಹಗತಂ ಮೋಹಂ ಠಪೇತ್ವಾ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ – ಇಮೇ ಧಮ್ಮಾ ಸಹೇತುಕಾ।
1443. Katame dhammā sahetukā? Vicikicchāsahagataṃ uddhaccasahagataṃ mohaṃ ṭhapetvā avasesaṃ akusalaṃ, catūsu bhūmīsu kusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ – ime dhammā sahetukā.
೧೪೪೪. ಕತಮೇ ಧಮ್ಮಾ ಅಹೇತುಕಾ? ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಮೋಹೋ, ದ್ವೇಪಞ್ಚವಿಞ್ಞಾಣಾನಿ, ತಿಸ್ಸೋ ಚ ಮನೋಧಾತುಯೋ, ಪಞ್ಚ ಚ ಅಹೇತುಕಮನೋವಿಞ್ಞಾಣಧಾತುಯೋ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಹೇತುಕಾ।
1444. Katame dhammā ahetukā? Vicikicchāsahagato moho, uddhaccasahagato moho, dvepañcaviññāṇāni, tisso ca manodhātuyo, pañca ca ahetukamanoviññāṇadhātuyo, rūpañca, nibbānañca – ime dhammā ahetukā.
೧೪೪೫. ಕತಮೇ ಧಮ್ಮಾ ಹೇತುಸಮ್ಪಯುತ್ತಾ? ವಿಚಿಕಿಚ್ಛಾಸಹಗತಂ ಉದ್ಧಚ್ಚಸಹಗತಂ ಮೋಹಂ ಠಪೇತ್ವಾ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ – ಇಮೇ ಧಮ್ಮಾ ಹೇತುಸಮ್ಪಯುತ್ತಾ।
1445. Katame dhammā hetusampayuttā? Vicikicchāsahagataṃ uddhaccasahagataṃ mohaṃ ṭhapetvā avasesaṃ akusalaṃ, catūsu bhūmīsu kusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ – ime dhammā hetusampayuttā.
೧೪೪೬. ಕತಮೇ ಧಮ್ಮಾ ಹೇತುವಿಪ್ಪಯುತ್ತಾ? ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಮೋಹೋ, ದ್ವೇಪಞ್ಚವಿಞ್ಞಾಣಾನಿ ತಿಸ್ಸೋ ಚ ಮನೋಧಾತುಯೋ ಪಞ್ಚ ಚ ಅಹೇತುಕಮನೋವಿಞ್ಞಾಣಧಾತುಯೋ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಹೇತುವಿಪ್ಪಯುತ್ತಾ।
1446. Katame dhammā hetuvippayuttā? Vicikicchāsahagato moho, uddhaccasahagato moho, dvepañcaviññāṇāni tisso ca manodhātuyo pañca ca ahetukamanoviññāṇadhātuyo, rūpañca, nibbānañca – ime dhammā hetuvippayuttā.
೧೪೪೭. ಕತಮೇ ಧಮ್ಮಾ ಹೇತೂ ಚೇವ ಸಹೇತುಕಾ ಚ? ಯತ್ಥ ದ್ವೇ ತಯೋ ಹೇತೂ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಹೇತೂ ಚೇವ ಸಹೇತುಕಾ ಚ।
1447. Katame dhammā hetū ceva sahetukā ca? Yattha dve tayo hetū ekato uppajjanti – ime dhammā hetū ceva sahetukā ca.
೧೪೪೮. ಕತಮೇ ಧಮ್ಮಾ ಸಹೇತುಕಾ ಚೇವ ನ ಚ ಹೇತೂ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ, ಏತ್ಥುಪ್ಪನ್ನೇ ಹೇತೂ ಠಪೇತ್ವಾ – ಇಮೇ ಧಮ್ಮಾ ಸಹೇತುಕಾ ಚೇವ ನ ಚ ಹೇತೂ। ಅಹೇತುಕಾ ಧಮ್ಮಾ ನ ವತ್ತಬ್ಬಾ – ಹೇತೂ ಚೇವ ಸಹೇತುಕಾ ಚಾತಿಪಿ, ಸಹೇತುಕಾ ಚೇವ ನ ಚ ಹೇತೂತಿಪಿ।
1448. Katame dhammā sahetukā ceva na ca hetū? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā sahetukā ceva na ca hetū. Ahetukā dhammā na vattabbā – hetū ceva sahetukā cātipi, sahetukā ceva na ca hetūtipi.
೧೪೪೯. ಕತಮೇ ಧಮ್ಮಾ ಹೇತೂ ಚೇವ ಹೇತುಸಮ್ಪಯುತ್ತಾ ಚ? ಯತ್ಥ ದ್ವೇ ತಯೋ ಹೇತೂ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಹೇತೂ ಚೇವ ಹೇತುಸಮ್ಪಯುತ್ತಾ ಚ।
1449. Katame dhammā hetū ceva hetusampayuttā ca? Yattha dve tayo hetū ekato uppajjanti – ime dhammā hetū ceva hetusampayuttā ca.
೧೪೫೦. ಕತಮೇ ಧಮ್ಮಾ ಹೇತುಸಮ್ಪಯುತ್ತಾ ಚೇವ ನ ಚ ಹೇತೂ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ, ಏತ್ಥುಪ್ಪನ್ನೇ ಹೇತೂ ಠಪೇತ್ವಾ – ಇಮೇ ಧಮ್ಮಾ ಹೇತುಸಮ್ಪಯುತ್ತಾ ಚೇವ ನ ಚ ಹೇತೂ। ಹೇತುವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಹೇತೂ ಚೇವ ಹೇತುಸಮ್ಪಯುತ್ತಾ ಚಾತಿಪಿ, ಹೇತುಸಮ್ಪಯುತ್ತಾ ಚೇವ ನ ಚ ಹೇತೂತಿಪಿ।
1450. Katame dhammā hetusampayuttā ceva na ca hetū? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā hetusampayuttā ceva na ca hetū. Hetuvippayuttā dhammā na vattabbā – hetū ceva hetusampayuttā cātipi, hetusampayuttā ceva na ca hetūtipi.
೧೪೫೧. ಕತಮೇ ಧಮ್ಮಾ ನ ಹೇತೂ ಸಹೇತುಕಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಕಾಮಾವಚರಸ್ಸ ವಿಪಾಕತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ಚತೂಸು ಭೂಮೀಸು ವಿಪಾಕೋ, ಕಾಮಾವಚರಕಿರಿಯತೋ ಅಹೇತುಕೇ ಚಿತ್ತುಪ್ಪಾದೇ ಠಪೇತ್ವಾ ತೀಸು ಭೂಮೀಸು ಕಿರಿಯಾಬ್ಯಾಕತಂ, ಏತ್ಥುಪ್ಪನ್ನೇ ಹೇತೂ ಠಪೇತ್ವಾ – ಇಮೇ ಧಮ್ಮಾ ನ ಹೇತೂ ಸಹೇತುಕಾ।
1451. Katame dhammā na hetū sahetukā? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā na hetū sahetukā.
೧೪೫೨. ಕತಮೇ ಧಮ್ಮಾ ನ ಹೇತೂ ಅಹೇತುಕಾ? ದ್ವೇಪಞ್ಚವಿಞ್ಞಾಣಾನಿ, ತಿಸ್ಸೋ ಚ ಮನೋಧಾತುಯೋ, ಪಞ್ಚ ಚ ಅಹೇತುಕಮನೋವಿಞ್ಞಾಣಧಾತುಯೋ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಹೇತೂ ಅಹೇತುಕಾ । ಹೇತೂ ಧಮ್ಮಾ ನ ವತ್ತಬ್ಬಾ – ನ ಹೇತೂ ಸಹೇತುಕಾತಿಪಿ, ನ ಹೇತೂ ಅಹೇತುಕಾತಿಪಿ।
1452. Katame dhammā na hetū ahetukā? Dvepañcaviññāṇāni, tisso ca manodhātuyo, pañca ca ahetukamanoviññāṇadhātuyo, rūpañca, nibbānañca – ime dhammā na hetū ahetukā . Hetū dhammā na vattabbā – na hetū sahetukātipi, na hetū ahetukātipi.
ಚೂಳನ್ತರದುಕಂ
Cūḷantaradukaṃ
೧೪೫೩. ಕತಮೇ ಧಮ್ಮಾ ಸಪ್ಪಚ್ಚಯಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಪ್ಪಚ್ಚಯಾ।
1453. Katame dhammā sappaccayā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sappaccayā.
೧೪೫೪. ಕತಮೇ ಧಮ್ಮಾ ಅಪ್ಪಚ್ಚಯಾ? ನಿಬ್ಬಾನಂ – ಇಮೇ ಧಮ್ಮಾ ಅಪ್ಪಚ್ಚಯಾ।
1454. Katame dhammā appaccayā? Nibbānaṃ – ime dhammā appaccayā.
೧೪೫೫. ಕತಮೇ ಧಮ್ಮಾ ಸಙ್ಖತಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಙ್ಖತಾ।
1455. Katame dhammā saṅkhatā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṅkhatā.
೧೪೫೬. ಕತಮೇ ಧಮ್ಮಾ ಅಸಙ್ಖತಾ? ನಿಬ್ಬಾನಂ – ಇಮೇ ಧಮ್ಮಾ ಅಸಙ್ಖತಾ।
1456. Katame dhammā asaṅkhatā? Nibbānaṃ – ime dhammā asaṅkhatā.
೧೪೫೭. ಕತಮೇ ಧಮ್ಮಾ ಸನಿದಸ್ಸನಾ? ರೂಪಾಯತನಂ – ಇಮೇ ಧಮ್ಮಾ ಸನಿದಸ್ಸನಾ।
1457. Katame dhammā sanidassanā? Rūpāyatanaṃ – ime dhammā sanidassanā.
೧೪೫೮. ಕತಮೇ ಧಮ್ಮಾ ಅನಿದಸ್ಸನಾ? ಚಕ್ಖಾಯತನಂ …ಪೇ॰… ಫೋಟ್ಠಬ್ಬಾಯತನಂ, ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಯಞ್ಚ ರೂಪಂ ಅನಿದಸ್ಸನಂ ಅಪ್ಪಟಿಘಂ ಧಮ್ಮಾಯತನಪರಿಯಾಪನ್ನಂ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನಿದಸ್ಸನಾ।
1458. Katame dhammā anidassanā? Cakkhāyatanaṃ …pe… phoṭṭhabbāyatanaṃ, catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā anidassanā.
೧೪೫೯. ಕತಮೇ ಧಮ್ಮಾ ಸಪ್ಪಟಿಘಾ? ಚಕ್ಖಾಯತನಂ…ಪೇ॰… ಫೋಟ್ಠಬ್ಬಾಯತನಂ – ಇಮೇ ಧಮ್ಮಾ ಸಪ್ಪಟಿಘಾ।
1459. Katame dhammā sappaṭighā? Cakkhāyatanaṃ…pe… phoṭṭhabbāyatanaṃ – ime dhammā sappaṭighā.
೧೪೬೦. ಕತಮೇ ಧಮ್ಮಾ ಅಪ್ಪಟಿಘಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಯಞ್ಚ ರೂಪಂ ಅನಿದಸ್ಸನಂ ಅಪ್ಪಟಿಘಂ ಧಮ್ಮಾಯತನಪರಿಯಾಪನ್ನಂ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಪ್ಪಟಿಘಾ।
1460. Katame dhammā appaṭighā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā appaṭighā.
೧೪೬೧. ಕತಮೇ ಧಮ್ಮಾ ರೂಪಿನೋ? ಚತ್ತಾರೋ ಚ ಮಹಾಭೂತಾ, ಚತುನ್ನಞ್ಚ ಮಹಾಭೂತಾನಂ ಉಪಾದಾಯ ರೂಪಂ – ಇಮೇ ಧಮ್ಮಾ ರೂಪಿನೋ।
1461. Katame dhammā rūpino? Cattāro ca mahābhūtā, catunnañca mahābhūtānaṃ upādāya rūpaṃ – ime dhammā rūpino.
೧೪೬೨. ಕತಮೇ ಧಮ್ಮಾ ಅರೂಪಿನೋ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ನಿಬ್ಬಾನಞ್ಚ – ಇಮೇ ಧಮ್ಮಾ ಅರೂಪಿನೋ।
1462. Katame dhammā arūpino? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, nibbānañca – ime dhammā arūpino.
೧೪೬೩. ಕತಮೇ ಧಮ್ಮಾ ಲೋಕಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಲೋಕಿಯಾ।
1463. Katame dhammā lokiyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā lokiyā.
೧೪೬೪. ಕತಮೇ ಧಮ್ಮಾ ಲೋಕುತ್ತರಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಲೋಕುತ್ತರಾ। ಸಬ್ಬೇ 1 ಧಮ್ಮಾ ಕೇನಚಿ ವಿಞ್ಞೇಯ್ಯಾ, ಕೇನಚಿ ನ ವಿಞ್ಞೇಯ್ಯಾ।
1464. Katame dhammā lokuttarā? Cattāro maggā apariyāpannā, cattāri ca sāmaññaphalāni, nibbānañca – ime dhammā lokuttarā. Sabbe 2 dhammā kenaci viññeyyā, kenaci na viññeyyā.
ಆಸವಗೋಚ್ಛಕಂ
Āsavagocchakaṃ
೧೪೬೫. ಕತಮೇ ಧಮ್ಮಾ ಆಸವಾ? ಚತ್ತಾರೋ ಆಸವಾ – ಕಾಮಾಸವೋ, ಭವಾಸವೋ, ದಿಟ್ಠಾಸವೋ, ಅವಿಜ್ಜಾಸವೋ। ಕಾಮಾಸವೋ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ ಭವಾಸವೋ ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ ದಿಟ್ಠಾಸವೋ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಅವಿಜ್ಜಾಸವೋ ಸಬ್ಬಾಕುಸಲೇಸು ಉಪ್ಪಜ್ಜತಿ – ಇಮೇ ಧಮ್ಮಾ ಆಸವಾ।
1465. Katame dhammā āsavā? Cattāro āsavā – kāmāsavo, bhavāsavo, diṭṭhāsavo, avijjāsavo. Kāmāsavo aṭṭhasu lobhasahagatesu cittuppādesu uppajjati bhavāsavo catūsu diṭṭhigatavippayuttalobhasahagatesu cittuppādesu uppajjati diṭṭhāsavo catūsu diṭṭhigatasampayuttesu cittuppādesu uppajjati. Avijjāsavo sabbākusalesu uppajjati – ime dhammā āsavā.
೧೪೬೬. ಕತಮೇ ಧಮ್ಮಾ ನೋ ಆಸವಾ? ಠಪೇತ್ವಾ ಆಸವೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ , ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಆಸವಾ।
1466. Katame dhammā no āsavā? Ṭhapetvā āsave avasesaṃ akusalaṃ, catūsu bhūmīsu kusalaṃ , catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no āsavā.
೧೪೬೭. ಕತಮೇ ಧಮ್ಮಾ ಸಾಸವಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಾಸವಾ।
1467. Katame dhammā sāsavā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sāsavā.
೧೪೬೮. ಕತಮೇ ಧಮ್ಮಾ ಅನಾಸವಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನಾಸವಾ।
1468. Katame dhammā anāsavā? Cattāro maggā apariyāpannā, cattāri ca sāmaññaphalāni, nibbānañca – ime dhammā anāsavā.
೧೪೬೯. ಕತಮೇ ಧಮ್ಮಾ ಆಸವಸಮ್ಪಯುತ್ತಾ? ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ ಏತ್ಥುಪ್ಪನ್ನಂ ಮೋಹಂ ಠಪೇತ್ವಾ, ವಿಚಿಕಿಚ್ಛಾಸಹಗತಂ ಉದ್ಧಚ್ಚಸಹಗತಂ ಮೋಹಂ ಠಪೇತ್ವಾ, ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಆಸವಸಮ್ಪಯುತ್ತಾ।
1469. Katame dhammā āsavasampayuttā? Dve domanassasahagatacittuppādā etthuppannaṃ mohaṃ ṭhapetvā, vicikicchāsahagataṃ uddhaccasahagataṃ mohaṃ ṭhapetvā, avasesaṃ akusalaṃ – ime dhammā āsavasampayuttā.
೧೪೭೦. ಕತಮೇ ಧಮ್ಮಾ ಆಸವವಿಪ್ಪಯುತ್ತಾ? ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಮೋಹೋ, ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಮೋಹೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಆಸವವಿಪ್ಪಯುತ್ತಾ।
1470. Katame dhammā āsavavippayuttā? Dvīsu domanassasahagatesu cittuppādesu uppanno moho, vicikicchāsahagato moho, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā āsavavippayuttā.
೧೪೭೧. ಕತಮೇ ಧಮ್ಮಾ ಆಸವಾ ಚೇವ ಸಾಸವಾ ಚ? ತೇವ ಆಸವಾ ಆಸವಾ ಚೇವ ಸಾಸವಾ ಚ।
1471. Katame dhammā āsavā ceva sāsavā ca? Teva āsavā āsavā ceva sāsavā ca.
೧೪೭೨. ಕತಮೇ ಧಮ್ಮಾ ಸಾಸವಾ ಚೇವ ನೋ ಚ ಆಸವಾ? ಠಪೇತ್ವಾ ಆಸವೇ, ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಾಸವಾ ಚೇವ ನೋ ಚ ಆಸವಾ। ಅನಾಸವಾ ಧಮ್ಮಾ ನ ವತ್ತಬ್ಬಾ – ಆಸವಾ ಚೇವ ಸಾಸವಾ ಚಾತಿಪಿ, ಸಾಸವಾ ಚೇವ ನೋ ಚ ಆಸವಾತಿಪಿ।
1472. Katame dhammā sāsavā ceva no ca āsavā? Ṭhapetvā āsave, avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sāsavā ceva no ca āsavā. Anāsavā dhammā na vattabbā – āsavā ceva sāsavā cātipi, sāsavā ceva no ca āsavātipi.
೧೪೭೩. ಕತಮೇ ಧಮ್ಮಾ ಆಸವಾ ಚೇವ ಆಸವಸಮ್ಪಯುತ್ತಾ ಚ? ಯತ್ಥ ದ್ವೇ ತಯೋ ಆಸವಾ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಆಸವಾ ಚೇವ ಆಸವಸಮ್ಪಯುತ್ತಾ ಚ।
1473. Katame dhammā āsavā ceva āsavasampayuttā ca? Yattha dve tayo āsavā ekato uppajjanti – ime dhammā āsavā ceva āsavasampayuttā ca.
೧೪೭೪. ಕತಮೇ ಧಮ್ಮಾ ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾ? ಠಪೇತ್ವಾ ಆಸವೇ, ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾ। ಆಸವವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಆಸವಾ ಚೇವ ಆಸವಸಮ್ಪಯುತ್ತಾ ಚಾತಿಪಿ, ಆಸವಸಮ್ಪಯುತ್ತಾ ಚೇವ ನೋ ಚ ಆಸವಾತಿಪಿ।
1474. Katame dhammā āsavasampayuttā ceva no ca āsavā? Ṭhapetvā āsave, avasesaṃ akusalaṃ – ime dhammā āsavasampayuttā ceva no ca āsavā. Āsavavippayuttā dhammā na vattabbā – āsavā ceva āsavasampayuttā cātipi, āsavasampayuttā ceva no ca āsavātipi.
೧೪೭೫. ಕತಮೇ ಧಮ್ಮಾ ಆಸವವಿಪ್ಪಯುತ್ತಾ ಸಾಸವಾ? ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಮೋಹೋ, ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಮೋಹೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಆಸವವಿಪ್ಪಯುತ್ತಾ ಸಾಸವಾ।
1475. Katame dhammā āsavavippayuttā sāsavā? Dvīsu domanassasahagatesu cittuppādesu uppanno moho, vicikicchāsahagato moho, uddhaccasahagato moho, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā āsavavippayuttā sāsavā.
೧೪೭೬. ಕತಮೇ ಧಮ್ಮಾ ಆಸವವಿಪ್ಪಯುತ್ತಾ ಅನಾಸವಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಆಸವವಿಪ್ಪಯುತ್ತಾ ಅನಾಸವಾ। ಆಸವಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಆಸವವಿಪ್ಪಯುತ್ತಾ ಸಾಸವಾತಿಪಿ, ಆಸವವಿಪ್ಪಯುತ್ತಾ ಅನಾಸವಾತಿಪಿ।
1476. Katame dhammā āsavavippayuttā anāsavā? Cattāro maggā apariyāpannā, cattāri ca sāmaññaphalāni, nibbānañca – ime dhammā āsavavippayuttā anāsavā. Āsavasampayuttā dhammā na vattabbā – āsavavippayuttā sāsavātipi, āsavavippayuttā anāsavātipi.
ಸಂಯೋಜನಗೋಚ್ಛಕಂ
Saṃyojanagocchakaṃ
೧೪೭೭. ಕತಮೇ ಧಮ್ಮಾ ಸಂಯೋಜನಾ? ದಸ ಸಂಯೋಜನಾನಿ – ಕಾಮರಾಗಸಂಯೋಜನಂ, ಪಟಿಘಸಂಯೋಜನಂ, ಮಾನಸಂಯೋಜನಂ, ದಿಟ್ಠಿಸಂಯೋಜನಂ, ವಿಚಿಕಿಚ್ಛಾಸಂಯೋಜನಂ, ಸೀಲಬ್ಬತಪರಾಮಾಸಸಂಯೋಜನಂ, ಭವರಾಗಸಂಯೋಜನಂ, ಇಸ್ಸಾಸಂಯೋಜನಂ, ಮಚ್ಛರಿಯಸಂಯೋಜನಂ, ಅವಿಜ್ಜಾಸಂಯೋಜನಂ। ಕಾಮರಾಗಸಂಯೋಜನಂ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಪಟಿಘಸಂಯೋಜನಂ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಮಾನಸಂಯೋಜನಂ ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ದಿಟ್ಠಿಸಂಯೋಜನಂ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ವಿಚಿಕಿಚ್ಛಾಸಂಯೋಜನಂ ವಿಚಿಕಿಚ್ಛಾಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಸೀಲಬ್ಬತಪರಾಮಾಸಸಂಯೋಜನಂ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಭವರಾಗಸಂಯೋಜನಂ ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಇಸ್ಸಾಸಂಯೋಜನಞ್ಚ ಮಚ್ಛರಿಯಸಂಯೋಜನಞ್ಚ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜನ್ತಿ। ಅವಿಜ್ಜಾಸಂಯೋಜನಂ ಸಬ್ಬಾಕುಸಲೇಸು ಉಪ್ಪಜ್ಜತಿ – ಇಮೇ ಧಮ್ಮಾ ಸಂಯೋಜನಾ।
1477. Katame dhammā saṃyojanā? Dasa saṃyojanāni – kāmarāgasaṃyojanaṃ, paṭighasaṃyojanaṃ, mānasaṃyojanaṃ, diṭṭhisaṃyojanaṃ, vicikicchāsaṃyojanaṃ, sīlabbataparāmāsasaṃyojanaṃ, bhavarāgasaṃyojanaṃ, issāsaṃyojanaṃ, macchariyasaṃyojanaṃ, avijjāsaṃyojanaṃ. Kāmarāgasaṃyojanaṃ aṭṭhasu lobhasahagatesu cittuppādesu uppajjati. Paṭighasaṃyojanaṃ dvīsu domanassasahagatesu cittuppādesu uppajjati. Mānasaṃyojanaṃ catūsu diṭṭhigatavippayuttalobhasahagatesu cittuppādesu uppajjati. Diṭṭhisaṃyojanaṃ catūsu diṭṭhigatasampayuttesu cittuppādesu uppajjati. Vicikicchāsaṃyojanaṃ vicikicchāsahagatesu cittuppādesu uppajjati. Sīlabbataparāmāsasaṃyojanaṃ catūsu diṭṭhigatasampayuttesu cittuppādesu uppajjati. Bhavarāgasaṃyojanaṃ catūsu diṭṭhigatavippayuttalobhasahagatesu cittuppādesu uppajjati. Issāsaṃyojanañca macchariyasaṃyojanañca dvīsu domanassasahagatesu cittuppādesu uppajjanti. Avijjāsaṃyojanaṃ sabbākusalesu uppajjati – ime dhammā saṃyojanā.
೧೪೭೮. ಕತಮೇ ಧಮ್ಮಾ ನೋ ಸಂಯೋಜನಾ। ಠಪೇತ್ವಾ ಸಂಯೋಜನೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಸಂಯೋಜನಾ।
1478. Katame dhammā no saṃyojanā. Ṭhapetvā saṃyojane avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no saṃyojanā.
೧೪೭೯. ಕತಮೇ ಧಮ್ಮಾ ಸಂಯೋಜನಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಯೋಜನಿಯಾ।
1479. Katame dhammā saṃyojaniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojaniyā.
೧೪೮೦. ಕತಮೇ ಧಮ್ಮಾ ಅಸಂಯೋಜನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಸಂಯೋಜನಿಯಾ।
1480. Katame dhammā asaṃyojaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃyojaniyā.
೧೪೮೧. ಕತಮೇ ಧಮ್ಮಾ ಸಂಯೋಜನಸಮ್ಪಯುತ್ತಾ? ಉದ್ಧಚ್ಚಸಹಗತಂ ಮೋಹಂ ಠಪೇತ್ವಾ ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಸಂಯೋಜನಸಮ್ಪಯುತ್ತಾ।
1481. Katame dhammā saṃyojanasampayuttā? Uddhaccasahagataṃ mohaṃ ṭhapetvā avasesaṃ akusalaṃ – ime dhammā saṃyojanasampayuttā.
೧೪೮೨. ಕತಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ? ಉದ್ಧಚ್ಚಸಹಗತೋ ಮೋಹೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ।
1482. Katame dhammā saṃyojanavippayuttā? Uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā saṃyojanavippayuttā.
೧೪೮೩. ಕತಮೇ ಧಮ್ಮಾ ಸಂಯೋಜನಾ ಚೇವ ಸಂಯೋಜನಿಯಾ ಚ? ತಾನೇವ ಸಂಯೋಜನಾನಿ ಸಂಯೋಜನಾ ಚೇವ ಸಂಯೋಜನಿಯಾ ಚ।
1483. Katame dhammā saṃyojanā ceva saṃyojaniyā ca? Tāneva saṃyojanāni saṃyojanā ceva saṃyojaniyā ca.
೧೪೮೪. ಕತಮೇ ಧಮ್ಮಾ ಸಂಯೋಜನಿಯಾ ಚೇವ ನೋ ಚ ಸಂಯೋಜನಾ? ಠಪೇತ್ವಾ ಸಂಯೋಜನೇ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಯೋಜನಿಯಾ ಚೇವ ನೋ ಚ ಸಂಯೋಜನಾ। ಅಸಂಯೋಜನಿಯಾ ಧಮ್ಮಾ ನ ವತ್ತಬ್ಬಾ – ಸಂಯೋಜನಾ ಚೇವ ಸಂಯೋಜನಿಯಾ ಚಾತಿಪಿ, ಸಂಯೋಜನಿಯಾ ಚೇವ ನೋ ಚ ಸಂಯೋಜನಾತಿಪಿ।
1484. Katame dhammā saṃyojaniyā ceva no ca saṃyojanā? Ṭhapetvā saṃyojane avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojaniyā ceva no ca saṃyojanā. Asaṃyojaniyā dhammā na vattabbā – saṃyojanā ceva saṃyojaniyā cātipi, saṃyojaniyā ceva no ca saṃyojanātipi.
೧೪೮೫. ಕತಮೇ ಧಮ್ಮಾ ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚ? ಯತ್ಥ ದ್ವೇ ತೀಣಿ ಸಂಯೋಜನಾನಿ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚ।
1485. Katame dhammā saṃyojanā ceva saṃyojanasampayuttā ca? Yattha dve tīṇi saṃyojanāni ekato uppajjanti – ime dhammā saṃyojanā ceva saṃyojanasampayuttā ca.
೧೪೮೬. ಕತಮೇ ಧಮ್ಮಾ ಸಂಯೋಜನಸಮ್ಪಯುತ್ತಾ ಚೇವ ನೋ ಚ ಸಂಯೋಜನಾ? ಠಪೇತ್ವಾ ಸಂಯೋಜನೇ, ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಸಂಯೋಜನಸಮ್ಪಯುತ್ತಾ ಚೇವ ನೋ ಚ ಸಂಯೋಜನಾ। ಸಂಯೋಜನವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಸಂಯೋಜನಾ ಚೇವ ಸಂಯೋಜನಸಮ್ಪಯುತ್ತಾ ಚಾತಿಪಿ, ಸಂಯೋಜನಸಮ್ಪಯುತ್ತಾ ಚೇವ ನೋ ಚ ಸಂಯೋಜನಾತಿಪಿ।
1486. Katame dhammā saṃyojanasampayuttā ceva no ca saṃyojanā? Ṭhapetvā saṃyojane, avasesaṃ akusalaṃ – ime dhammā saṃyojanasampayuttā ceva no ca saṃyojanā. Saṃyojanavippayuttā dhammā na vattabbā – saṃyojanā ceva saṃyojanasampayuttā cātipi, saṃyojanasampayuttā ceva no ca saṃyojanātipi.
೧೪೮೭. ಕತಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ ಸಂಯೋಜನಿಯಾ? ಉದ್ಧಚ್ಚಸಹಗತೋ ಮೋಹೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ ಸಂಯೋಜನಿಯಾ।
1487. Katame dhammā saṃyojanavippayuttā saṃyojaniyā? Uddhaccasahagato moho, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojanavippayuttā saṃyojaniyā.
೧೪೮೮. ಕತಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ ಅಸಂಯೋಜನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಸಂಯೋಜನವಿಪ್ಪಯುತ್ತಾ ಅಸಂಯೋಜನಿಯಾ। ಸಂಯೋಜನಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಸಂಯೋಜನವಿಪ್ಪಯುತ್ತಾ ಸಂಯೋಜನಿಯಾತಿಪಿ, ಸಂಯೋಜನವಿಪ್ಪಯುತ್ತಾ ಅಸಂಯೋಜನಿಯಾತಿಪಿ।
1488. Katame dhammā saṃyojanavippayuttā asaṃyojaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā saṃyojanavippayuttā asaṃyojaniyā. Saṃyojanasampayuttā dhammā na vattabbā – saṃyojanavippayuttā saṃyojaniyātipi, saṃyojanavippayuttā asaṃyojaniyātipi.
ಗನ್ಥಗೋಚ್ಛಕಂ
Ganthagocchakaṃ
೧೪೮೯. ಕತಮೇ ಧಮ್ಮಾ ಗನ್ಥಾ? ಚತ್ತಾರೋ ಗನ್ಥಾ – ಅಭಿಜ್ಝಾಕಾಯಗನ್ಥೋ, ಬ್ಯಾಪಾದೋ ಕಾಯಗನ್ಥೋ, ಸೀಲಬ್ಬತಪರಾಮಾಸೋ ಕಾಯಗನ್ಥೋ, ಇದಂಸಚ್ಚಾಭಿನಿವೇಸೋ ಕಾಯಗನ್ಥೋ। ಅಭಿಜ್ಝಾಕಾಯಗನ್ಥೋ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಬ್ಯಾಪಾದೋ ಕಾಯಗನ್ಥೋ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಸೀಲಬ್ಬತಪರಾಮಾಸೋ ಕಾಯಗನ್ಥೋ ಚ ಇದಂಸಚ್ಚಾಭಿನಿವೇಸೋ ಕಾಯಗನ್ಥೋ ಚ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜನ್ತಿ – ಇಮೇ ಧಮ್ಮಾ ಗನ್ಥಾ।
1489. Katame dhammā ganthā? Cattāro ganthā – abhijjhākāyagantho, byāpādo kāyagantho, sīlabbataparāmāso kāyagantho, idaṃsaccābhiniveso kāyagantho. Abhijjhākāyagantho aṭṭhasu lobhasahagatesu cittuppādesu uppajjati. Byāpādo kāyagantho dvīsu domanassasahagatesu cittuppādesu uppajjati. Sīlabbataparāmāso kāyagantho ca idaṃsaccābhiniveso kāyagantho ca catūsu diṭṭhigatasampayuttesu cittuppādesu uppajjanti – ime dhammā ganthā.
೧೪೯೦. ಕತಮೇ ಧಮ್ಮಾ ನೋ ಗನ್ಥಾ? ಠಪೇತ್ವಾ ಗನ್ಥೇ, ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಗನ್ಥಾ।
1490. Katame dhammā no ganthā? Ṭhapetvā ganthe, avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no ganthā.
೧೪೯೧. ಕತಮೇ ಧಮ್ಮಾ ಗನ್ಥನಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಗನ್ಥನಿಯಾ।
1491. Katame dhammā ganthaniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthaniyā.
೧೪೯೨. ಕತಮೇ ಧಮ್ಮಾ ಅಗನ್ಥನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಗನ್ಥನಿಯಾ।
1492. Katame dhammā aganthaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā aganthaniyā.
೧೪೯೩. ಕತಮೇ ಧಮ್ಮಾ ಗನ್ಥಸಮ್ಪಯುತ್ತಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ , ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನಂ ಲೋಭಂ ಠಪೇತ್ವಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನಂ ಪಟಿಘಂ ಠಪೇತ್ವಾ – ಇಮೇ ಧಮ್ಮಾ ಗನ್ಥಸಮ್ಪಯುತ್ತಾ।
1493. Katame dhammā ganthasampayuttā? Cattāro diṭṭhigatasampayuttacittuppādā , cattāro diṭṭhigatavippayuttalobhasahagatacittuppādā, etthuppannaṃ lobhaṃ ṭhapetvā, dve domanassasahagatacittuppādā, etthuppannaṃ paṭighaṃ ṭhapetvā – ime dhammā ganthasampayuttā.
೧೪೯೪. ಕತಮೇ ಧಮ್ಮಾ ಗನ್ಥವಿಪ್ಪಯುತ್ತಾ? ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಲೋಭೋ, ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನಂ ಪಟಿಘಂ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಗನ್ಥವಿಪ್ಪಯುತ್ತಾ।
1494. Katame dhammā ganthavippayuttā? Catūsu diṭṭhigatavippayuttalobhasahagatesu cittuppādesu uppanno lobho, dvīsu domanassasahagatesu cittuppādesu uppannaṃ paṭighaṃ, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā ganthavippayuttā.
೧೪೯೫. ಕತಮೇ ಧಮ್ಮಾ ಗನ್ಥಾ ಚೇವ ಗನ್ಥನಿಯಾ ಚ? ತೇವ ಗನ್ಥಾ ಗನ್ಥಾ ಚೇವ ಗನ್ಥನಿಯಾ ಚ।
1495. Katame dhammā ganthā ceva ganthaniyā ca? Teva ganthā ganthā ceva ganthaniyā ca.
೧೪೯೬. ಕತಮೇ ಧಮ್ಮಾ ಗನ್ಥನಿಯಾ ಚೇವ ನೋ ಚ ಗನ್ಥಾ? ಠಪೇತ್ವಾ ಗನ್ಥೇ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಗನ್ಥನಿಯಾ ಚೇವ ನೋ ಚ ಗನ್ಥಾ। ಅಗನ್ಥನಿಯಾ ಧಮ್ಮಾ ನ ವತ್ತಬ್ಬಾ – ಗನ್ಥಾ ಚೇವ ಗನ್ಥನಿಯಾ ಚಾತಿಪಿ, ಗನ್ಥನಿಯಾ ಚೇವ ನೋ ಚ ಗನ್ಥಾತಿಪಿ।
1496. Katame dhammā ganthaniyā ceva no ca ganthā? Ṭhapetvā ganthe avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthaniyā ceva no ca ganthā. Aganthaniyā dhammā na vattabbā – ganthā ceva ganthaniyā cātipi, ganthaniyā ceva no ca ganthātipi.
೧೪೯೭. ಕತಮೇ ಧಮ್ಮಾ ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚ? ಯತ್ಥ ದಿಟ್ಠಿ ಚ ಲೋಭೋ ಚ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚ।
1497. Katame dhammā ganthā ceva ganthasampayuttā ca? Yattha diṭṭhi ca lobho ca ekato uppajjanti – ime dhammā ganthā ceva ganthasampayuttā ca.
೧೪೯೮. ಕತಮೇ ಧಮ್ಮಾ ಗನ್ಥಸಮ್ಪಯುತ್ತಾ ಚೇವ ನೋ ಚ ಗನ್ಥಾ? ಅಟ್ಠ ಲೋಭಸಹಗತಚಿತ್ತುಪ್ಪಾದಾ ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನೇ ಗನ್ಥೇ ಠಪೇತ್ವಾ – ಇಮೇ ಧಮ್ಮಾ ಗನ್ಥಸಮ್ಪಯುತ್ತಾ ಚೇವ ನೋ ಚ ಗನ್ಥಾ। ಗನ್ಥವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಗನ್ಥಾ ಚೇವ ಗನ್ಥಸಮ್ಪಯುತ್ತಾ ಚಾತಿಪಿ, ಗನ್ಥಸಮ್ಪಯುತ್ತಾ ಚೇವ ನೋ ಚ ಗನ್ಥಾತಿಪಿ।
1498. Katame dhammā ganthasampayuttā ceva no ca ganthā? Aṭṭha lobhasahagatacittuppādā dve domanassasahagatacittuppādā, etthuppanne ganthe ṭhapetvā – ime dhammā ganthasampayuttā ceva no ca ganthā. Ganthavippayuttā dhammā na vattabbā – ganthā ceva ganthasampayuttā cātipi, ganthasampayuttā ceva no ca ganthātipi.
೧೪೯೯. ಕತಮೇ ಧಮ್ಮಾ ಗನ್ಥವಿಪ್ಪಯುತ್ತಾ ಗನ್ಥನಿಯಾ? ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಲೋಭೋ, ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನಂ ಪಟಿಘಂ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಗನ್ಥವಿಪ್ಪಯುತ್ತಾ ಗನ್ಥನಿಯಾ।
1499. Katame dhammā ganthavippayuttā ganthaniyā? Catūsu diṭṭhigatavippayuttalobhasahagatesu cittuppādesu uppanno lobho, dvīsu domanassasahagatesu cittuppādesu uppannaṃ paṭighaṃ, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthavippayuttā ganthaniyā.
೧೫೦೦. ಕತಮೇ ಧಮ್ಮಾ ಗನ್ಥವಿಪ್ಪಯುತ್ತಾ ಅಗನ್ಥನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಗನ್ಥವಿಪ್ಪಯುತ್ತಾ ಅಗನ್ಥನಿಯಾ। ಗನ್ಥಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಗನ್ಥವಿಪ್ಪಯುತ್ತಾ ಗನ್ಥನಿಯಾತಿಪಿ, ಗನ್ಥವಿಪ್ಪಯುತ್ತಾ ಅಗನ್ಥನಿಯಾತಿಪಿ।
1500. Katame dhammā ganthavippayuttā aganthaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā ganthavippayuttā aganthaniyā. Ganthasampayuttā dhammā na vattabbā – ganthavippayuttā ganthaniyātipi, ganthavippayuttā aganthaniyātipi.
ಓಘಗೋಚ್ಛಕಂ
Oghagocchakaṃ
೧೫೦೧. ಕತಮೇ ಧಮ್ಮಾ ಓಘಾ…ಪೇ॰…।
1501. Katame dhammā oghā…pe….
ಯೋಗಗೋಚ್ಛಕಂ
Yogagocchakaṃ
೧೫೦೨. ಕತಮೇ ಧಮ್ಮಾ ಯೋಗಾ…ಪೇ॰…।
1502. Katame dhammā yogā…pe….
ನೀವರಣಗೋಚ್ಛಕಂ
Nīvaraṇagocchakaṃ
೧೫೦೩. ಕತಮೇ ಧಮ್ಮಾ ನೀವರಣಾ? ಛ ನೀವರಣಾ – ಕಾಮಚ್ಛನ್ದನೀವರಣಂ, ಬ್ಯಾಪಾದನೀವರಣಂ, ಥಿನಮಿದ್ಧನೀವರಣಂ, ಉದ್ಧಚ್ಚಕುಕ್ಕುಚ್ಚನೀವರಣಂ, ವಿಚಿಕಿಚ್ಛಾನೀವರಣಂ, ಅವಿಜ್ಜಾನೀವರಣಂ । ಕಾಮಚ್ಛನ್ದನೀವರಣಂ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ಬ್ಯಾಪಾದನೀವರಣಂ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ಥಿನಮಿದ್ಧನೀವರಣಂ ಸಸಙ್ಖಾರಿಕೇಸು ಅಕುಸಲೇಸು ಉಪ್ಪಜ್ಜತಿ, ಉದ್ಧಚ್ಚನೀವರಣಂ ಉದ್ಧಚ್ಚಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ಕುಕ್ಕುಚ್ಚನೀವರಣಂ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ವಿಚಿಕಿಚ್ಛಾನೀವರಣಂ ವಿಚಿಕಿಚ್ಛಾಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ, ಅವಿಜ್ಜಾನೀವರಣಂ ಸಬ್ಬಾಕುಸಲೇಸು ಉಪ್ಪಜ್ಜತಿ – ಇಮೇ ಧಮ್ಮಾ ನೀವರಣಾ।
1503. Katame dhammā nīvaraṇā? Cha nīvaraṇā – kāmacchandanīvaraṇaṃ, byāpādanīvaraṇaṃ, thinamiddhanīvaraṇaṃ, uddhaccakukkuccanīvaraṇaṃ, vicikicchānīvaraṇaṃ, avijjānīvaraṇaṃ . Kāmacchandanīvaraṇaṃ aṭṭhasu lobhasahagatesu cittuppādesu uppajjati, byāpādanīvaraṇaṃ dvīsu domanassasahagatesu cittuppādesu uppajjati, thinamiddhanīvaraṇaṃ sasaṅkhārikesu akusalesu uppajjati, uddhaccanīvaraṇaṃ uddhaccasahagatesu cittuppādesu uppajjati, kukkuccanīvaraṇaṃ dvīsu domanassasahagatesu cittuppādesu uppajjati, vicikicchānīvaraṇaṃ vicikicchāsahagatesu cittuppādesu uppajjati, avijjānīvaraṇaṃ sabbākusalesu uppajjati – ime dhammā nīvaraṇā.
೧೫೦೪. ಕತಮೇ ಧಮ್ಮಾ ನೋ ನೀವರಣಾ? ಠಪೇತ್ವಾ ನೀವರಣೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ನೀವರಣಾ।
1504. Katame dhammā no nīvaraṇā? Ṭhapetvā nīvaraṇe avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no nīvaraṇā.
೧೫೦೫. ಕತಮೇ ಧಮ್ಮಾ ನೀವರಣಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ನೀವರಣಿಯಾ।
1505. Katame dhammā nīvaraṇiyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇiyā.
೧೫೦೬. ಕತಮೇ ಧಮ್ಮಾ ಅನೀವರಣಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನೀವರಣಿಯಾ।
1506. Katame dhammā anīvaraṇiyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anīvaraṇiyā.
೧೫೦೭. ಕತಮೇ ಧಮ್ಮಾ ನೀವರಣಸಮ್ಪಯುತ್ತಾ? ದ್ವಾದಸ ಅಕುಸಲಚಿತ್ತುಪ್ಪಾದಾ – ಇಮೇ ಧಮ್ಮಾ ನೀವರಣಸಮ್ಪಯುತ್ತಾ।
1507. Katame dhammā nīvaraṇasampayuttā? Dvādasa akusalacittuppādā – ime dhammā nīvaraṇasampayuttā.
೧೫೦೮. ಕತಮೇ ಧಮ್ಮಾ ನೀವರಣವಿಪ್ಪಯುತ್ತಾ? ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೀವರಣವಿಪ್ಪಯುತ್ತಾ।
1508. Katame dhammā nīvaraṇavippayuttā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā nīvaraṇavippayuttā.
೧೫೦೯. ಕತಮೇ ಧಮ್ಮಾ ನೀವರಣಾ ಚೇವ ನೀವರಣಿಯಾ ಚ? ತಾನೇವ ನೀವರಣಾನಿ ನೀವರಣಾ ಚೇವ ನೀವರಣಿಯಾ ಚ।
1509. Katame dhammā nīvaraṇā ceva nīvaraṇiyā ca? Tāneva nīvaraṇāni nīvaraṇā ceva nīvaraṇiyā ca.
೧೫೧೦. ಕತಮೇ ಧಮ್ಮಾ ನೀವರಣಿಯಾ ಚೇವ ನೋ ಚ ನೀವರಣಾ? ಠಪೇತ್ವಾ ನೀವರಣೇ, ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ನೀವರಣಿಯಾ ಚೇವ ನೋ ಚ ನೀವರಣಾ। ಅನೀವರಣಿಯಾ ಧಮ್ಮಾ ನ ವತ್ತಬ್ಬಾ – ನೀವರಣಾ ಚೇವ ನೀವರಣಿಯಾ ಚಾತಿಪಿ, ನೀವರಣಿಯಾ ಚೇವ ನೋ ಚ ನೀವರಣಾತಿಪಿ।
1510. Katame dhammā nīvaraṇiyā ceva no ca nīvaraṇā? Ṭhapetvā nīvaraṇe, avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇiyā ceva no ca nīvaraṇā. Anīvaraṇiyā dhammā na vattabbā – nīvaraṇā ceva nīvaraṇiyā cātipi, nīvaraṇiyā ceva no ca nīvaraṇātipi.
೧೫೧೧. ಕತಮೇ ಧಮ್ಮಾ ನೀವರಣಾ ಚೇವ ನೀವರಣಸಮ್ಪಯುತ್ತಾ ಚ? ಯತ್ಥ ದ್ವೇ ತೀಣಿ ನೀವರಣಾನಿ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ನೀವರಣಾ ಚೇವ ನೀವರಣಸಮ್ಪಯುತ್ತಾ ಚ।
1511. Katame dhammā nīvaraṇā ceva nīvaraṇasampayuttā ca? Yattha dve tīṇi nīvaraṇāni ekato uppajjanti – ime dhammā nīvaraṇā ceva nīvaraṇasampayuttā ca.
೧೫೧೨. ಕತಮೇ ಧಮ್ಮಾ ನೀವರಣಸಮ್ಪಯುತ್ತಾ ಚೇವ ನೋ ಚ ನೀವರಣಾ? ಠಪೇತ್ವಾ ನೀವರಣೇ, ಅವಸೇಸಂ ಅಕುಸಲಂ – ಇಮೇ ಧಮ್ಮಾ ನೀವರಣಸಮ್ಪಯುತ್ತಾ ಚೇವ ನೋ ಚ ನೀವರಣಾ। ನೀವರಣವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ನೀವರಣಾ ಚೇವ ನೀವರಣಸಮ್ಪಯುತ್ತಾ ಚಾತಿಪಿ, ನೀವರಣಸಮ್ಪಯುತ್ತಾ ಚೇವ ನೋ ಚ ನೀವರಣಾತಿಪಿ।
1512. Katame dhammā nīvaraṇasampayuttā ceva no ca nīvaraṇā? Ṭhapetvā nīvaraṇe, avasesaṃ akusalaṃ – ime dhammā nīvaraṇasampayuttā ceva no ca nīvaraṇā. Nīvaraṇavippayuttā dhammā na vattabbā – nīvaraṇā ceva nīvaraṇasampayuttā cātipi, nīvaraṇasampayuttā ceva no ca nīvaraṇātipi.
೧೫೧೩. ಕತಮೇ ಧಮ್ಮಾ ನೀವರಣವಿಪ್ಪಯುತ್ತಾ ನೀವರಣಿಯಾ? ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ನೀವರಣವಿಪ್ಪಯುತ್ತಾ ನೀವರಣಿಯಾ।
1513. Katame dhammā nīvaraṇavippayuttā nīvaraṇiyā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇavippayuttā nīvaraṇiyā.
೧೫೧೪. ಕತಮೇ ಧಮ್ಮಾ ನೀವರಣವಿಪ್ಪಯುತ್ತಾ ಅನೀವರಣಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ನೀವರಣವಿಪ್ಪಯುತ್ತಾ ಅನೀವರಣಿಯಾ। ನೀವರಣಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ನೀವರಣವಿಪ್ಪಯುತ್ತಾ ನೀವರಣಿಯಾತಿಪಿ, ನೀವರಣವಿಪ್ಪಯುತ್ತಾ ಅನೀವರಣಿಯಾತಿಪಿ।
1514. Katame dhammā nīvaraṇavippayuttā anīvaraṇiyā? Cattāro maggā apariyāpannā, cattāri ca sāmaññaphalāni, nibbānañca – ime dhammā nīvaraṇavippayuttā anīvaraṇiyā. Nīvaraṇasampayuttā dhammā na vattabbā – nīvaraṇavippayuttā nīvaraṇiyātipi, nīvaraṇavippayuttā anīvaraṇiyātipi.
ಪರಾಮಾಸಗೋಚ್ಛಕಂ
Parāmāsagocchakaṃ
೧೫೧೫. ಕತಮೇ ಧಮ್ಮಾ ಪರಾಮಾಸಾ? ದಿಟ್ಠಿಪರಾಮಾಸೋ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ – ಇಮೇ ಧಮ್ಮಾ ಪರಾಮಾಸಾ।
1515. Katame dhammā parāmāsā? Diṭṭhiparāmāso catūsu diṭṭhigatasampayuttesu cittuppādesu uppajjati – ime dhammā parāmāsā.
೧೫೧೬. ಕತಮೇ ಧಮ್ಮಾ ನೋ ಪರಾಮಾಸಾ? ಠಪೇತ್ವಾ ಪರಾಮಾಸಂ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಪರಾಮಾಸಾ।
1516. Katame dhammā no parāmāsā? Ṭhapetvā parāmāsaṃ avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no parāmāsā.
೧೫೧೭. ಕತಮೇ ಧಮ್ಮಾ ಪರಾಮಟ್ಠಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಪರಾಮಟ್ಠಾ।
1517. Katame dhammā parāmaṭṭhā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmaṭṭhā.
೧೫೧೮. ಕತಮೇ ಧಮ್ಮಾ ಅಪರಾಮಟ್ಠಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ ನಿಬ್ಬಾನಞ್ಚ – ಇಮೇ ಧಮ್ಮಾ ಅಪರಾಮಟ್ಠಾ।
1518. Katame dhammā aparāmaṭṭhā? Cattāro maggā apariyāpannā, cattāri ca sāmaññaphalāni nibbānañca – ime dhammā aparāmaṭṭhā.
೧೫೧೯. ಕತಮೇ ಧಮ್ಮಾ ಪರಾಮಾಸಸಮ್ಪಯುತ್ತಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ, ಏತ್ಥುಪ್ಪನ್ನಂ ಪರಾಮಾಸಂ ಠಪೇತ್ವಾ – ಇಮೇ ಧಮ್ಮಾ ಪರಾಮಾಸಸಮ್ಪಯುತ್ತಾ।
1519. Katame dhammā parāmāsasampayuttā? Cattāro diṭṭhigatasampayuttacittuppādā, etthuppannaṃ parāmāsaṃ ṭhapetvā – ime dhammā parāmāsasampayuttā.
೧೫೨೦. ಕತಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ? ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ , ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ। ಪರಾಮಾಸೋ ನ ವತ್ತಬ್ಬೋ – ಪರಾಮಾಸಸಮ್ಪಯುತ್ತೋತಿಪಿ, ಪರಾಮಾಸವಿಪ್ಪಯುತ್ತೋತಿಪಿ।
1520. Katame dhammā parāmāsavippayuttā? Cattāro diṭṭhigatavippayuttalobhasahagatacittuppādā , dve domanassasahagatacittuppādā, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā parāmāsavippayuttā. Parāmāso na vattabbo – parāmāsasampayuttotipi, parāmāsavippayuttotipi.
೧೫೨೧. ಕತಮೇ ಧಮ್ಮಾ ಪರಾಮಾಸಾ ಚೇವ ಪರಾಮಟ್ಠಾ ಚ? ಸೋ ಏವ ಪರಾಮಾಸೋ ಪರಾಮಾಸೋ ಚೇವ ಪರಾಮಟ್ಠೋ ಚ।
1521. Katame dhammā parāmāsā ceva parāmaṭṭhā ca? So eva parāmāso parāmāso ceva parāmaṭṭho ca.
೧೫೨೨. ಕತಮೇ ಧಮ್ಮಾ ಪರಾಮಟ್ಠಾ ಚೇವ ನೋ ಚ ಪರಾಮಾಸಾ? ಠಪೇತ್ವಾ ಪರಾಮಾಸಂ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಪರಾಮಟ್ಠಾ ಚೇವ ನೋ ಚ ಪರಾಮಾಸಾ। ಅಪರಾಮಟ್ಠಾ ಧಮ್ಮಾ ನ ವತ್ತಬ್ಬಾ – ಪರಾಮಾಸಾ ಚೇವ ಪರಾಮಟ್ಠಾ ಚಾತಿಪಿ, ಪರಾಮಟ್ಠಾ ಚೇವ ನೋ ಚ ಪರಾಮಾಸಾತಿಪಿ।
1522. Katame dhammā parāmaṭṭhā ceva no ca parāmāsā? Ṭhapetvā parāmāsaṃ avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmaṭṭhā ceva no ca parāmāsā. Aparāmaṭṭhā dhammā na vattabbā – parāmāsā ceva parāmaṭṭhā cātipi, parāmaṭṭhā ceva no ca parāmāsātipi.
೧೫೨೩. ಕತಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ ಪರಾಮಟ್ಠಾ? ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ ಪರಾಮಟ್ಠಾ।
1523. Katame dhammā parāmāsavippayuttā parāmaṭṭhā? Cattāro diṭṭhigatavippayuttalobhasahagatacittuppādā, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmāsavippayuttā parāmaṭṭhā.
೧೫೨೪. ಕತಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ ಅಪರಾಮಟ್ಠಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಪರಾಮಾಸವಿಪ್ಪಯುತ್ತಾ ಅಪರಾಮಟ್ಠಾ। ಪರಾಮಾಸಾ ಚ ಪರಾಮಾಸಸಮ್ಪಯುತ್ತಾ ಚ ಧಮ್ಮಾ ನ ವತ್ತಬ್ಬಾ – ಪರಾಮಾಸವಿಪ್ಪಯುತ್ತಾ ಪರಾಮಟ್ಠಾತಿಪಿ, ಪರಾಮಾಸವಿಪ್ಪಯುತ್ತಾ ಅಪರಾಮಟ್ಠಾತಿಪಿ।
1524. Katame dhammā parāmāsavippayuttā aparāmaṭṭhā? Cattāro maggā apariyāpannā, cattāri ca sāmaññaphalāni, nibbānañca – ime dhammā parāmāsavippayuttā aparāmaṭṭhā. Parāmāsā ca parāmāsasampayuttā ca dhammā na vattabbā – parāmāsavippayuttā parāmaṭṭhātipi, parāmāsavippayuttā aparāmaṭṭhātipi.
ಮಹನ್ತರದುಕಂ
Mahantaradukaṃ
೧೫೨೫. ಕತಮೇ ಧಮ್ಮಾ ಸಾರಮ್ಮಣಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ – ಇಮೇ ಧಮ್ಮಾ ಸಾರಮ್ಮಣಾ।
1525. Katame dhammā sārammaṇā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ – ime dhammā sārammaṇā.
೧೫೨೬. ಕತಮೇ ಧಮ್ಮಾ ಅನಾರಮ್ಮಣಾ? ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನಾರಮ್ಮಣಾ।
1526. Katame dhammā anārammaṇā? Rūpañca, nibbānañca – ime dhammā anārammaṇā.
೧೫೨೭. ಕತಮೇ ಧಮ್ಮಾ ಚಿತ್ತಾ? ಚಕ್ಖುವಿಞ್ಞಾಣಂ, ಸೋತವಿಞ್ಞಾಣಂ, ಘಾನವಿಞ್ಞಾಣಂ, ಜಿವ್ಹಾವಿಞ್ಞಾಣಂ, ಕಾಯವಿಞ್ಞಾಣಂ, ಮನೋಧಾತು, ಮನೋವಿಞ್ಞಾಣಧಾತು – ಇಮೇ ಧಮ್ಮಾ ಚಿತ್ತಾ।
1527. Katame dhammā cittā? Cakkhuviññāṇaṃ, sotaviññāṇaṃ, ghānaviññāṇaṃ, jivhāviññāṇaṃ, kāyaviññāṇaṃ, manodhātu, manoviññāṇadhātu – ime dhammā cittā.
೧೫೨೮. ಕತಮೇ ಧಮ್ಮಾ ನೋ ಚಿತ್ತಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಾ।
1528. Katame dhammā no cittā? Vedanākkhandho, saññākkhandho, saṅkhārakkhandho, rūpañca, nibbānañca – ime dhammā no cittā.
೧೫೨೯. ಕತಮೇ ಧಮ್ಮಾ ಚೇತಸಿಕಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚೇತಸಿಕಾ।
1529. Katame dhammā cetasikā? Vedanākkhandho, saññākkhandho, saṅkhārakkhandho – ime dhammā cetasikā.
೧೫೩೦. ಕತಮೇ ಧಮ್ಮಾ ಅಚೇತಸಿಕಾ? ಚಿತ್ತಞ್ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಚೇತಸಿಕಾ।
1530. Katame dhammā acetasikā? Cittañca, rūpañca, nibbānañca – ime dhammā acetasikā.
೧೫೩೧. ಕತಮೇ ಧಮ್ಮಾ ಚಿತ್ತಸಮ್ಪಯುತ್ತಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಮ್ಪಯುತ್ತಾ।
1531. Katame dhammā cittasampayuttā? Vedanākkhandho, saññākkhandho, saṅkhārakkhandho – ime dhammā cittasampayuttā.
೧೫೩೨. ಕತಮೇ ಧಮ್ಮಾ ಚಿತ್ತವಿಪ್ಪಯುತ್ತಾ? ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಚಿತ್ತವಿಪ್ಪಯುತ್ತಾ। ಚಿತ್ತಂ ನ ವತ್ತಬ್ಬಂ – ಚಿತ್ತೇನ ಸಮ್ಪಯುತ್ತನ್ತಿಪಿ, ಚಿತ್ತೇನ ವಿಪ್ಪಯುತ್ತನ್ತಿಪಿ।
1532. Katame dhammā cittavippayuttā? Rūpañca, nibbānañca – ime dhammā cittavippayuttā. Cittaṃ na vattabbaṃ – cittena sampayuttantipi, cittena vippayuttantipi.
೧೫೩೩. ಕತಮೇ ಧಮ್ಮಾ ಚಿತ್ತಸಂಸಟ್ಠಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಂಸಟ್ಠಾ।
1533. Katame dhammā cittasaṃsaṭṭhā? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhā.
೧೫೩೪. ಕತಮೇ ಧಮ್ಮಾ ಚಿತ್ತವಿಸಂಸಟ್ಠಾ? ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಚಿತ್ತವಿಸಂಸಟ್ಠಾ। ಚಿತ್ತಂ ನ ವತ್ತಬ್ಬಂ – ಚಿತ್ತೇನ ಸಂಸಟ್ಠನ್ತಿಪಿ, ಚಿತ್ತೇನ ವಿಸಂಸಟ್ಠನ್ತಿಪಿ।
1534. Katame dhammā cittavisaṃsaṭṭhā? Rūpañca, nibbānañca – ime dhammā cittavisaṃsaṭṭhā. Cittaṃ na vattabbaṃ – cittena saṃsaṭṭhantipi, cittena visaṃsaṭṭhantipi.
೧೫೩೫. ಕತಮೇ ಧಮ್ಮಾ ಚಿತ್ತಸಮುಟ್ಠಾನಾ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ, ಕಾಯವಿಞ್ಞತ್ತಿ, ವಚೀವಿಞ್ಞತ್ತಿ, ಯಂ ವಾ ಪನಞ್ಞಮ್ಪಿ ಅತ್ಥಿ ರೂಪಂ ಚಿತ್ತಜಂ ಚಿತ್ತಹೇತುಕಂ ಚಿತ್ತಸಮುಟ್ಠಾನಂ – ರೂಪಾಯತನಂ ಸದ್ದಾಯತನಂ ಗನ್ಧಾಯತನಂ ರಸಾಯತನಂ ಫೋಟ್ಠಬ್ಬಾಯತನಂ ಆಕಾಸಧಾತು ಆಪೋಧಾತು ರೂಪಸ್ಸ ಲಹುತಾ ರೂಪಸ್ಸ ಮುದುತಾ ರೂಪಸ್ಸ ಕಮ್ಮಞ್ಞತಾ ರೂಪಸ್ಸ ಉಪಚಯೋ ರೂಪಸ್ಸ ಸನ್ತತಿ ಕಬಳೀಕಾರೋ ಆಹಾರೋ – ಇಮೇ ಧಮ್ಮಾ ಚಿತ್ತಸಮುಟ್ಠಾನಾ।
1535. Katame dhammā cittasamuṭṭhānā? Vedanākkhandho, saññākkhandho, saṅkhārakkhandho, kāyaviññatti, vacīviññatti, yaṃ vā panaññampi atthi rūpaṃ cittajaṃ cittahetukaṃ cittasamuṭṭhānaṃ – rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa lahutā rūpassa mudutā rūpassa kammaññatā rūpassa upacayo rūpassa santati kabaḷīkāro āhāro – ime dhammā cittasamuṭṭhānā.
೧೫೩೬. ಕತಮೇ ಧಮ್ಮಾ ನೋ ಚಿತ್ತಸಮುಟ್ಠಾನಾ? ಚಿತ್ತಞ್ಚ, ಅವಸೇಸಞ್ಚ ರೂಪಂ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಮುಟ್ಠಾನಾ।
1536. Katame dhammā no cittasamuṭṭhānā? Cittañca, avasesañca rūpaṃ, nibbānañca – ime dhammā no cittasamuṭṭhānā.
೧೫೩೭. ಕತಮೇ ಧಮ್ಮಾ ಚಿತ್ತಸಹಭುನೋ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ, ಕಾಯವಿಞ್ಞತ್ತಿ, ವಚೀವಿಞ್ಞತ್ತಿ – ಇಮೇ ಧಮ್ಮಾ ಚಿತ್ತಸಹಭುನೋ।
1537. Katame dhammā cittasahabhuno? Vedanākkhandho, saññākkhandho, saṅkhārakkhandho, kāyaviññatti, vacīviññatti – ime dhammā cittasahabhuno.
೧೫೩೮. ಕತಮೇ ಧಮ್ಮಾ ನೋ ಚಿತ್ತಸಹಭುನೋ? ಚಿತ್ತಞ್ಚ, ಅವಸೇಸಞ್ಚ ರೂಪಂ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಹಭುನೋ।
1538. Katame dhammā no cittasahabhuno? Cittañca, avasesañca rūpaṃ, nibbānañca – ime dhammā no cittasahabhuno.
೧೫೩೯. ಕತಮೇ ಧಮ್ಮಾ ಚಿತ್ತಾನುಪರಿವತ್ತಿನೋ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ, ಕಾಯವಿಞ್ಞತ್ತಿ, ವಚೀವಿಞ್ಞತ್ತಿ – ಇಮೇ ಧಮ್ಮಾ ಚಿತ್ತಾನುಪರಿವತ್ತಿನೋ।
1539. Katame dhammā cittānuparivattino? Vedanākkhandho, saññākkhandho, saṅkhārakkhandho, kāyaviññatti, vacīviññatti – ime dhammā cittānuparivattino.
೧೫೪೦. ಕತಮೇ ಧಮ್ಮಾ ನೋ ಚಿತ್ತಾನುಪರಿವತ್ತಿನೋ? ಚಿತ್ತಞ್ಚ, ಅವಸೇಸಞ್ಚ ರೂಪಂ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಾನುಪರಿವತ್ತಿನೋ।
1540. Katame dhammā no cittānuparivattino? Cittañca, avasesañca rūpaṃ, nibbānañca – ime dhammā no cittānuparivattino.
೧೫೪೧. ಕತಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಾ? ವೇದನಾಕ್ಖನ್ಧೋ , ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಾ।
1541. Katame dhammā cittasaṃsaṭṭhasamuṭṭhānā? Vedanākkhandho , saññākkhandho, saṅkhārakkhandho – ime dhammā cittasaṃsaṭṭhasamuṭṭhānā.
೧೫೪೨. ಕತಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಾ? ಚಿತ್ತಞ್ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಾ।
1542. Katame dhammā no cittasaṃsaṭṭhasamuṭṭhānā? Cittañca, rūpañca, nibbānañca – ime dhammā no cittasaṃsaṭṭhasamuṭṭhānā.
೧೫೪೩. ಕತಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ।
1543. Katame dhammā cittasaṃsaṭṭhasamuṭṭhānasahabhuno? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhasamuṭṭhānasahabhuno.
೧೫೪೪. ಕತಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ? ಚಿತ್ತಞ್ಚ, ರೂಪಞ್ಚ , ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಸಹಭುನೋ।
1544. Katame dhammā no cittasaṃsaṭṭhasamuṭṭhānasahabhuno? Cittañca, rūpañca , nibbānañca – ime dhammā no cittasaṃsaṭṭhasamuṭṭhānasahabhuno.
೧೫೪೫. ಕತಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ? ವೇದನಾಕ್ಖನ್ಧೋ, ಸಞ್ಞಾಕ್ಖನ್ಧೋ, ಸಙ್ಖಾರಕ್ಖನ್ಧೋ – ಇಮೇ ಧಮ್ಮಾ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ।
1545. Katame dhammā cittasaṃsaṭṭhasamuṭṭhānānuparivattino? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhasamuṭṭhānānuparivattino.
೧೫೪೬. ಕತಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ? ಚಿತ್ತಞ್ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಚಿತ್ತಸಂಸಟ್ಠಸಮುಟ್ಠಾನಾನುಪರಿವತ್ತಿನೋ।
1546. Katame dhammā no cittasaṃsaṭṭhasamuṭṭhānānuparivattino? Cittañca, rūpañca, nibbānañca – ime dhammā no cittasaṃsaṭṭhasamuṭṭhānānuparivattino.
೧೫೪೭. ಕತಮೇ ಧಮ್ಮಾ ಅಜ್ಝತ್ತಿಕಾ? ಚಕ್ಖಾಯತನಂ…ಪೇ॰… ಮನಾಯತನಂ – ಇಮೇ ಧಮ್ಮಾ ಅಜ್ಝತ್ತಿಕಾ।
1547. Katame dhammā ajjhattikā? Cakkhāyatanaṃ…pe… manāyatanaṃ – ime dhammā ajjhattikā.
೧೫೪೮. ಕತಮೇ ಧಮ್ಮಾ ಬಾಹಿರಾ? ರೂಪಾಯತನಂ…ಪೇ॰… ಧಮ್ಮಾಯತನಂ – ಇಮೇ ಧಮ್ಮಾ ಬಾಹಿರಾ।
1548. Katame dhammā bāhirā? Rūpāyatanaṃ…pe… dhammāyatanaṃ – ime dhammā bāhirā.
೧೫೪೯. ಕತಮೇ ಧಮ್ಮಾ ಉಪಾದಾ? ಚಕ್ಖಾಯತನಂ…ಪೇ॰… ಕಬಳೀಕಾರೋ ಆಹಾರೋ – ಇಮೇ ಧಮ್ಮಾ ಉಪಾದಾ।
1549. Katame dhammā upādā? Cakkhāyatanaṃ…pe… kabaḷīkāro āhāro – ime dhammā upādā.
೧೫೫೦. ಕತಮೇ ಧಮ್ಮಾ ನೋ ಉಪಾದಾ? ಚತೂಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಚತ್ತಾರೋ ಚ ಮಹಾಭೂತಾ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಉಪಾದಾ।
1550. Katame dhammā no upādā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, cattāro ca mahābhūtā, nibbānañca – ime dhammā no upādā.
೧೫೫೧. ಕತಮೇ ಧಮ್ಮಾ ಉಪಾದಿಣ್ಣಾ? ತೀಸು ಭೂಮೀಸು ವಿಪಾಕೋ, ಯಞ್ಚ ರೂಪಂ ಕಮ್ಮಸ್ಸ ಕತತ್ತಾ – ಇಮೇ ಧಮ್ಮಾ ಉಪಾದಿಣ್ಣಾ।
1551. Katame dhammā upādiṇṇā? Tīsu bhūmīsu vipāko, yañca rūpaṃ kammassa katattā – ime dhammā upādiṇṇā.
೧೫೫೨. ಕತಮೇ ಧಮ್ಮಾ ಅನುಪಾದಿಣ್ಣಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಯಞ್ಚ ರೂಪಂ ನ ಕಮ್ಮಸ್ಸ ಕತತ್ತಾ, ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನುಪಾದಿಣ್ಣಾ।
1552. Katame dhammā anupādiṇṇā? Tīsu bhūmīsu kusalaṃ, akusalaṃ, tīsu bhūmīsu kiriyābyākataṃ, yañca rūpaṃ na kammassa katattā, cattāro maggā apariyāpannā, cattāri ca sāmaññaphalāni, nibbānañca – ime dhammā anupādiṇṇā.
ಉಪಾದಾನಗೋಚ್ಛಕಂ
Upādānagocchakaṃ
೧೫೫೩. ಕತಮೇ ಧಮ್ಮಾ ಉಪಾದಾನಾ? ಚತ್ತಾರಿ ಉಪಾದಾನಾನಿ – ಕಾಮುಪಾದಾನಂ , ದಿಟ್ಠುಪಾದಾನಂ, ಸೀಲಬ್ಬತುಪಾದಾನಂ, ಅತ್ತವಾದುಪಾದಾನಂ। ಕಾಮುಪಾದಾನಂ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ದಿಟ್ಠುಪಾದಾನಞ್ಚ ಸೀಲಬ್ಬತುಪಾದಾನಞ್ಚ ಅತ್ತವಾದುಪಾದಾನಞ್ಚ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜನ್ತಿ – ಇಮೇ ಧಮ್ಮಾ ಉಪಾದಾನಾ।
1553. Katame dhammā upādānā? Cattāri upādānāni – kāmupādānaṃ , diṭṭhupādānaṃ, sīlabbatupādānaṃ, attavādupādānaṃ. Kāmupādānaṃ aṭṭhasu lobhasahagatesu cittuppādesu uppajjati. Diṭṭhupādānañca sīlabbatupādānañca attavādupādānañca catūsu diṭṭhigatasampayuttesu cittuppādesu uppajjanti – ime dhammā upādānā.
೧೫೫೪. ಕತಮೇ ಧಮ್ಮಾ ನೋ ಉಪಾದಾನಾ? ಠಪೇತ್ವಾ ಉಪಾದಾನೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಉಪಾದಾನಾ।
1554. Katame dhammā no upādānā? Ṭhapetvā upādāne avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no upādānā.
೧೫೫೫. ಕತಮೇ ಧಮ್ಮಾ ಉಪಾದಾನಿಯಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಉಪಾದಾನಿಯಾ।
1555. Katame dhammā upādāniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādāniyā.
೧೫೫೬. ಕತಮೇ ಧಮ್ಮಾ ಅನುಪಾದಾನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನುಪಾದಾನಿಯಾ।
1556. Katame dhammā anupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anupādāniyā.
೧೫೫೭. ಕತಮೇ ಧಮ್ಮಾ ಉಪಾದಾನಸಮ್ಪಯುತ್ತಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನಂ ಲೋಭಂ ಠಪೇತ್ವಾ – ಇಮೇ ಧಮ್ಮಾ ಉಪಾದಾನಸಮ್ಪಯುತ್ತಾ।
1557. Katame dhammā upādānasampayuttā? Cattāro diṭṭhigatasampayuttalobhasahagatacittuppādā, cattāro diṭṭhigatavippayuttalobhasahagatacittuppādā, etthuppannaṃ lobhaṃ ṭhapetvā – ime dhammā upādānasampayuttā.
೧೫೫೮. ಕತಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ? ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಲೋಭೋ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ।
1558. Katame dhammā upādānavippayuttā? Catūsu diṭṭhigatavippayuttalobhasahagatesu cittuppādesu uppanno lobho, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā upādānavippayuttā.
೧೫೫೯. ಕತಮೇ ಧಮ್ಮಾ ಉಪಾದಾನಾ ಚೇವ ಉಪಾದಾನಿಯಾ ಚ? ತಾನೇವ ಉಪಾದಾನಾನಿ ಉಪಾದಾನಾ ಚೇವ ಉಪಾದಾನಿಯಾ ಚ।
1559. Katame dhammā upādānā ceva upādāniyā ca? Tāneva upādānāni upādānā ceva upādāniyā ca.
೧೫೬೦. ಕತಮೇ ಧಮ್ಮಾ ಉಪಾದಾನಿಯಾ ಚೇವ ನೋ ಚ ಉಪಾದಾನಾ? ಠಪೇತ್ವಾ ಉಪಾದಾನೇ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಉಪಾದಾನಿಯಾ ಚೇವ ನೋ ಚ ಉಪಾದಾನಾ । ಅನುಪಾದಾನಿಯಾ ಧಮ್ಮಾ ನ ವತ್ತಬ್ಬಾ – ಉಪಾದಾನಾ ಚೇವ ಉಪಾದಾನಿಯಾ ಚಾತಿಪಿ, ಉಪಾದಾನಿಯಾ ಚೇವ ನೋ ಚ ಉಪಾದಾನಾತಿಪಿ।
1560. Katame dhammā upādāniyā ceva no ca upādānā? Ṭhapetvā upādāne avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādāniyā ceva no ca upādānā . Anupādāniyā dhammā na vattabbā – upādānā ceva upādāniyā cātipi, upādāniyā ceva no ca upādānātipi.
೧೫೬೧. ಕತಮೇ ಧಮ್ಮಾ ಉಪಾದಾನಾ ಚೇವ ಉಪಾದಾನಸಮ್ಪಯುತ್ತಾ ಚ? ಯತ್ಥ ದಿಟ್ಠಿ ಚ ಲೋಭೋ ಚ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಉಪಾದಾನಾ ಚೇವ ಉಪಾದಾನಸಮ್ಪಯುತ್ತಾ ಚ।
1561. Katame dhammā upādānā ceva upādānasampayuttā ca? Yattha diṭṭhi ca lobho ca ekato uppajjanti – ime dhammā upādānā ceva upādānasampayuttā ca.
೧೫೬೨. ಕತಮೇ ಧಮ್ಮಾ ಉಪಾದಾನಸಮ್ಪಯುತ್ತಾ ಚೇವ ನೋ ಚ ಉಪಾದಾನಾ? ಅಟ್ಠ ಲೋಭಸಹಗತಚಿತ್ತುಪ್ಪಾದಾ, ಏತ್ಥುಪ್ಪನ್ನೇ ಉಪಾದಾನೇ ಠಪೇತ್ವಾ – ಇಮೇ ಧಮ್ಮಾ ಉಪಾದಾನಸಮ್ಪಯುತ್ತಾ ಚೇವ ನೋ ಚ ಉಪಾದಾನಾ। ಉಪಾದಾನವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಉಪಾದಾನಾ ಚೇವ ಉಪಾದಾನಸಮ್ಪಯುತ್ತಾ ಚಾತಿಪಿ, ಉಪಾದಾನಸಮ್ಪಯುತ್ತಾ ಚೇವ ನೋ ಚ ಉಪಾದಾನಾತಿಪಿ।
1562. Katame dhammā upādānasampayuttā ceva no ca upādānā? Aṭṭha lobhasahagatacittuppādā, etthuppanne upādāne ṭhapetvā – ime dhammā upādānasampayuttā ceva no ca upādānā. Upādānavippayuttā dhammā na vattabbā – upādānā ceva upādānasampayuttā cātipi, upādānasampayuttā ceva no ca upādānātipi.
೧೫೬೩. ಕತಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ ಉಪಾದಾನಿಯಾ? ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪನ್ನೋ ಲೋಭೋ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ ಉಪಾದಾನಿಯಾ।
1563. Katame dhammā upādānavippayuttā upādāniyā? Catūsu diṭṭhigatavippayuttalobhasahagatesu cittuppādesu uppanno lobho, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādānavippayuttā upādāniyā.
೧೫೬೪. ಕತಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ ಅನುಪಾದಾನಿಯಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಉಪಾದಾನವಿಪ್ಪಯುತ್ತಾ ಅನುಪಾದಾನಿಯಾ। ಉಪಾದಾನಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಉಪಾದಾನವಿಪ್ಪಯುತ್ತಾ ಉಪಾದಾನಿಯಾತಿಪಿ, ಉಪಾದಾನವಿಪ್ಪಯುತ್ತಾ ಅನುಪಾದಾನಿಯಾತಿಪಿ।
1564. Katame dhammā upādānavippayuttā anupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā upādānavippayuttā anupādāniyā. Upādānasampayuttā dhammā na vattabbā – upādānavippayuttā upādāniyātipi, upādānavippayuttā anupādāniyātipi.
ಕಿಲೇಸಗೋಚ್ಛಕಂ
Kilesagocchakaṃ
೧೫೬೫. ಕತಮೇ ಧಮ್ಮಾ ಕಿಲೇಸಾ? ದಸ ಕಿಲೇಸವತ್ಥೂನಿ – ಲೋಭೋ, ದೋಸೋ, ಮೋಹೋ, ಮಾನೋ, ದಿಟ್ಠಿ, ವಿಚಿಕಿಚ್ಛಾ, ಥಿನಂ, ಉದ್ಧಚ್ಚಂ, ಅಹಿರಿಕಂ, ಅನೋತ್ತಪ್ಪಂ। ಲೋಭೋ ಅಟ್ಠಸು ಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ದೋಸೋ ದ್ವೀಸು ದೋಮನಸ್ಸಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಮೋಹೋ ಸಬ್ಬಾಕುಸಲೇಸು ಉಪ್ಪಜ್ಜತಿ। ಮಾನೋ ಚತೂಸು ದಿಟ್ಠಿಗತವಿಪ್ಪಯುತ್ತಲೋಭಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ದಿಟ್ಠಿ ಚತೂಸು ದಿಟ್ಠಿಗತಸಮ್ಪಯುತ್ತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ವಿಚಿಕಿಚ್ಛಾ ವಿಚಿಕಿಚ್ಛಾಸಹಗತೇಸು ಚಿತ್ತುಪ್ಪಾದೇಸು ಉಪ್ಪಜ್ಜತಿ। ಥಿನಂ ಸಸಙ್ಖಾರಿಕೇಸು ಅಕುಸಲೇಸು ಉಪ್ಪಜ್ಜತಿ। ಉದ್ಧಚ್ಚಞ್ಚ ಅಹಿರಿಕಞ್ಚ ಅನೋತ್ತಪ್ಪಞ್ಚ ಸಬ್ಬಾಕುಸಲೇಸು ಉಪ್ಪಜ್ಜನ್ತಿ – ಇಮೇ ಧಮ್ಮಾ ಕಿಲೇಸಾ।
1565. Katame dhammā kilesā? Dasa kilesavatthūni – lobho, doso, moho, māno, diṭṭhi, vicikicchā, thinaṃ, uddhaccaṃ, ahirikaṃ, anottappaṃ. Lobho aṭṭhasu lobhasahagatesu cittuppādesu uppajjati. Doso dvīsu domanassasahagatesu cittuppādesu uppajjati. Moho sabbākusalesu uppajjati. Māno catūsu diṭṭhigatavippayuttalobhasahagatesu cittuppādesu uppajjati. Diṭṭhi catūsu diṭṭhigatasampayuttesu cittuppādesu uppajjati. Vicikicchā vicikicchāsahagatesu cittuppādesu uppajjati. Thinaṃ sasaṅkhārikesu akusalesu uppajjati. Uddhaccañca ahirikañca anottappañca sabbākusalesu uppajjanti – ime dhammā kilesā.
೧೫೬೬. ಕತಮೇ ಧಮ್ಮಾ ನೋ ಕಿಲೇಸಾ? ಠಪೇತ್ವಾ ಕಿಲೇಸೇ ಅವಸೇಸಂ ಅಕುಸಲಂ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನೋ ಕಿಲೇಸಾ।
1566. Katame dhammā no kilesā? Ṭhapetvā kilese avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no kilesā.
೧೫೬೭. ಕತಮೇ ಧಮ್ಮಾ ಸಂಕಿಲೇಸಿಕಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಕಿಲೇಸಿಕಾ।
1567. Katame dhammā saṃkilesikā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ sabbañca rūpaṃ – ime dhammā saṃkilesikā.
೧೫೬೮. ಕತಮೇ ಧಮ್ಮಾ ಅಸಂಕಿಲೇಸಿಕಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಸಂಕಿಲೇಸಿಕಾ।
1568. Katame dhammā asaṃkilesikā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃkilesikā.
೧೫೬೯. ಕತಮೇ ಧಮ್ಮಾ ಸಂಕಿಲಿಟ್ಠಾ? ದ್ವಾದಸ ಅಕುಸಲಚಿತ್ತುಪ್ಪಾದಾ – ಇಮೇ ಧಮ್ಮಾ ಸಂಕಿಲಿಟ್ಠಾ।
1569. Katame dhammā saṃkiliṭṭhā? Dvādasa akusalacittuppādā – ime dhammā saṃkiliṭṭhā.
೧೫೭೦. ಕತಮೇ ಧಮ್ಮಾ ಅಸಂಕಿಲಿಟ್ಠಾ? ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಸಂಕಿಲಿಟ್ಠಾ।
1570. Katame dhammā asaṃkiliṭṭhā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā asaṃkiliṭṭhā.
೧೫೭೧. ಕತಮೇ ಧಮ್ಮಾ ಕಿಲೇಸಸಮ್ಪಯುತ್ತಾ? ದ್ವಾದಸ ಅಕುಸಲಚಿತ್ತುಪ್ಪಾದಾ – ಇಮೇ ಧಮ್ಮಾ ಕಿಲೇಸಸಮ್ಪಯುತ್ತಾ।
1571. Katame dhammā kilesasampayuttā? Dvādasa akusalacittuppādā – ime dhammā kilesasampayuttā.
೧೫೭೨. ಕತಮೇ ಧಮ್ಮಾ ಕಿಲೇಸವಿಪ್ಪಯುತ್ತಾ? ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಕಿಲೇಸವಿಪ್ಪಯುತ್ತಾ।
1572. Katame dhammā kilesavippayuttā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā kilesavippayuttā.
೧೫೭೩. ಕತಮೇ ಧಮ್ಮಾ ಕಿಲೇಸಾ ಚೇವ ಸಂಕಿಲೇಸಿಕಾ ಚ? ತೇವ ಕಿಲೇಸಾ ಕಿಲೇಸಾ ಚೇವ ಸಂಕಿಲೇಸಿಕಾ ಚ।
1573. Katame dhammā kilesā ceva saṃkilesikā ca? Teva kilesā kilesā ceva saṃkilesikā ca.
೧೫೭೪. ಕತಮೇ ಧಮ್ಮಾ ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾ? ಠಪೇತ್ವಾ ಕಿಲೇಸೇ ಅವಸೇಸಂ ಅಕುಸಲಂ, ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾ। ಅಸಂಕಿಲೇಸಿಕಾ ಧಮ್ಮಾ ನ ವತ್ತಬ್ಬಾ – ಕಿಲೇಸಾ ಚೇವ ಸಂಕಿಲೇಸಿಕಾ ಚಾತಿಪಿ, ಸಂಕಿಲೇಸಿಕಾ ಚೇವ ನೋ ಚ ಕಿಲೇಸಾತಿಪಿ।
1574. Katame dhammā saṃkilesikā ceva no ca kilesā? Ṭhapetvā kilese avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃkilesikā ceva no ca kilesā. Asaṃkilesikā dhammā na vattabbā – kilesā ceva saṃkilesikā cātipi, saṃkilesikā ceva no ca kilesātipi.
೧೫೭೫. ಕತಮೇ ಧಮ್ಮಾ ಕಿಲೇಸಾ ಚೇವ ಸಂಕಿಲಿಟ್ಠಾ ಚ? ತೇವ ಕಿಲೇಸಾ ಕಿಲೇಸಾ ಚೇವ ಸಂಕಿಲಿಟ್ಠಾ ಚ।
1575. Katame dhammā kilesā ceva saṃkiliṭṭhā ca? Teva kilesā kilesā ceva saṃkiliṭṭhā ca.
೧೫೭೬. ಕತಮೇ ಧಮ್ಮಾ ಸಂಕಿಲಿಟ್ಠಾ ಚೇವ ನೋ ಚ ಕಿಲೇಸಾ? ಠಪೇತ್ವಾ ಕಿಲೇಸೇ ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಸಂಕಿಲಿಟ್ಠಾ ಚೇವ ನೋ ಚ ಕಿಲೇಸಾ । ಅಸಂಕಿಲಿಟ್ಠಾ ಧಮ್ಮಾ ನ ವತ್ತಬ್ಬಾ – ಕಿಲೇಸಾ ಚೇವ ಸಂಕಿಲಿಟ್ಠಾ ಚಾತಿಪಿ, ಸಂಕಿಲಿಟ್ಠಾ ಚೇವ ನೋ ಚ ಕಿಲೇಸಾತಿಪಿ।
1576. Katame dhammā saṃkiliṭṭhā ceva no ca kilesā? Ṭhapetvā kilese avasesaṃ akusalaṃ – ime dhammā saṃkiliṭṭhā ceva no ca kilesā . Asaṃkiliṭṭhā dhammā na vattabbā – kilesā ceva saṃkiliṭṭhā cātipi, saṃkiliṭṭhā ceva no ca kilesātipi.
೧೫೭೭. ಕತಮೇ ಧಮ್ಮಾ ಕಿಲೇಸಾ ಚೇವ ಕಿಲೇಸಸಮ್ಪಯುತ್ತಾ ಚ? ಯತ್ಥ ದ್ವೇ ತಯೋ ಕಿಲೇಸಾ ಏಕತೋ ಉಪ್ಪಜ್ಜನ್ತಿ – ಇಮೇ ಧಮ್ಮಾ ಕಿಲೇಸಾ ಚೇವ ಕಿಲೇಸಸಮ್ಪಯುತ್ತಾ ಚ।
1577. Katame dhammā kilesā ceva kilesasampayuttā ca? Yattha dve tayo kilesā ekato uppajjanti – ime dhammā kilesā ceva kilesasampayuttā ca.
೧೫೭೮. ಕತಮೇ ಧಮ್ಮಾ ಕಿಲೇಸಸಮ್ಪಯುತ್ತಾ ಚೇವ ನೋ ಚ ಕಿಲೇಸಾ? ಠಪೇತ್ವಾ ಕಿಲೇಸೇ ಅವಸೇಸಂ ಅಕುಸಲಂ – ಇಮೇ ಧಮ್ಮಾ ಕಿಲೇಸಸಮ್ಪಯುತ್ತಾ ಚೇವ ನೋ ಚ ಕಿಲೇಸಾ। ಕಿಲೇಸವಿಪ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಕಿಲೇಸಾ ಚೇವ ಕಿಲೇಸಸಮ್ಪಯುತ್ತಾ ಚಾತಿಪಿ, ಕಿಲೇಸಸಮ್ಪಯುತ್ತಾ ಚೇವ ನೋ ಚ ಕಿಲೇಸಾತಿಪಿ।
1578. Katame dhammā kilesasampayuttā ceva no ca kilesā? Ṭhapetvā kilese avasesaṃ akusalaṃ – ime dhammā kilesasampayuttā ceva no ca kilesā. Kilesavippayuttā dhammā na vattabbā – kilesā ceva kilesasampayuttā cātipi, kilesasampayuttā ceva no ca kilesātipi.
೧೫೭೯. ಕತಮೇ ಧಮ್ಮಾ ಕಿಲೇಸವಿಪ್ಪಯುತ್ತಾ ಸಂಕಿಲೇಸಿಕಾ? ತೀಸು ಭೂಮೀಸು ಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಕಿಲೇಸವಿಪ್ಪಯುತ್ತಾ ಸಂಕಿಲೇಸಿಕಾ।
1579. Katame dhammā kilesavippayuttā saṃkilesikā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā kilesavippayuttā saṃkilesikā.
೧೫೮೦. ಕತಮೇ ಧಮ್ಮಾ ಕಿಲೇಸವಿಪ್ಪಯುತ್ತಾ ಅಸಂಕಿಲೇಸಿಕಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ , ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಕಿಲೇಸವಿಪ್ಪಯುತ್ತಾ ಅಸಂಕಿಲೇಸಿಕಾ। ಕಿಲೇಸಸಮ್ಪಯುತ್ತಾ ಧಮ್ಮಾ ನ ವತ್ತಬ್ಬಾ – ಕಿಲೇಸವಿಪ್ಪಯುತ್ತಾ ಸಂಕಿಲೇಸಿಕಾತಿಪಿ, ಕಿಲೇಸವಿಪ್ಪಯುತ್ತಾ ಅಸಂಕಿಲೇಸಿಕಾತಿಪಿ।
1580. Katame dhammā kilesavippayuttā asaṃkilesikā? Cattāro maggā apariyāpannā , cattāri ca sāmaññaphalāni, nibbānañca – ime dhammā kilesavippayuttā asaṃkilesikā. Kilesasampayuttā dhammā na vattabbā – kilesavippayuttā saṃkilesikātipi, kilesavippayuttā asaṃkilesikātipi.
ಪಿಟ್ಠಿದುಕಂ
Piṭṭhidukaṃ
೧೫೮೧. ಕತಮೇ ಧಮ್ಮಾ ದಸ್ಸನೇನ ಪಹಾತಬ್ಬಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ – ಇಮೇ ಧಮ್ಮಾ ದಸ್ಸನೇನ ಪಹಾತಬ್ಬಾ। ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ – ಇಮೇ ಧಮ್ಮಾ ಸಿಯಾ ದಸ್ಸನೇನ ಪಹಾತಬ್ಬಾ, ಸಿಯಾ ನ ದಸ್ಸನೇನ ಪಹಾತಬ್ಬಾ।
1581. Katame dhammā dassanena pahātabbā? Cattāro diṭṭhigatasampayuttacittuppādā, vicikicchāsahagato cittuppādo – ime dhammā dassanena pahātabbā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā dassanena pahātabbā, siyā na dassanena pahātabbā.
೧೫೮೨. ಕತಮೇ ಧಮ್ಮಾ ನ ದಸ್ಸನೇನ ಪಹಾತಬ್ಬಾ? ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ದಸ್ಸನೇನ ಪಹಾತಬ್ಬಾ।
1582. Katame dhammā na dassanena pahātabbā? Uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na dassanena pahātabbā.
೧೫೮೩. ಕತಮೇ ಧಮ್ಮಾ ಭಾವನಾಯ ಪಹಾತಬ್ಬಾ? ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ – ಇಮೇ ಧಮ್ಮಾ ಭಾವನಾಯ ಪಹಾತಬ್ಬಾ। ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ – ಇಮೇ ಧಮ್ಮಾ ಸಿಯಾ ಭಾವನಾಯ ಪಹಾತಬ್ಬಾ, ಸಿಯಾ ನ ಭಾವನಾಯ ಪಹಾತಬ್ಬಾ।
1583. Katame dhammā bhāvanāya pahātabbā? Uddhaccasahagato cittuppādo – ime dhammā bhāvanāya pahātabbā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā bhāvanāya pahātabbā, siyā na bhāvanāya pahātabbā.
೧೫೮೪. ಕತಮೇ ಧಮ್ಮಾ ನ ಭಾವನಾಯ ಪಹಾತಬ್ಬಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಭಾವನಾಯ ಪಹಾತಬ್ಬಾ।
1584. Katame dhammā na bhāvanāya pahātabbā? Cattāro diṭṭhigatasampayuttacittuppādā, vicikicchāsahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na bhāvanāya pahātabbā.
೧೫೮೫. ಕತಮೇ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಏತ್ಥುಪ್ಪನ್ನಂ ಮೋಹಂ ಠಪೇತ್ವಾ – ಇಮೇ ಧಮ್ಮಾ ದಸ್ಸನೇನ ಪಹಾತಬ್ಬಹೇತುಕಾ। ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ – ಇಮೇ ಧಮ್ಮಾ ಸಿಯಾ ದಸ್ಸನೇನ ಪಹಾತಬ್ಬಹೇತುಕಾ, ಸಿಯಾ ನ ದಸ್ಸನೇನ ಪಹಾತಬ್ಬಹೇತುಕಾ।
1585. Katame dhammā dassanena pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, etthuppannaṃ mohaṃ ṭhapetvā – ime dhammā dassanena pahātabbahetukā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā dassanena pahātabbahetukā, siyā na dassanena pahātabbahetukā.
೧೫೮೬. ಕತಮೇ ಧಮ್ಮಾ ನ ದಸ್ಸನೇನ ಪಹಾತಬ್ಬಹೇತುಕಾ? ವಿಚಿಕಿಚ್ಛಾಸಹಗತೋ ಮೋಹೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ದಸ್ಸನೇನ ಪಹಾತಬ್ಬಹೇತುಕಾ।
1586. Katame dhammā na dassanena pahātabbahetukā? Vicikicchāsahagato moho, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na dassanena pahātabbahetukā.
೧೫೮೭. ಕತಮೇ ಧಮ್ಮಾ ಭಾವನಾಯ ಪಹಾತಬ್ಬಹೇತುಕಾ? ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ಏತ್ಥುಪ್ಪನ್ನಂ ಮೋಹಂ ಠಪೇತ್ವಾ – ಇಮೇ ಧಮ್ಮಾ ಭಾವನಾಯ ಪಹಾತಬ್ಬಹೇತುಕಾ। ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ – ಇಮೇ ಧಮ್ಮಾ ಸಿಯಾ ಭಾವನಾಯ ಪಹಾತಬ್ಬಹೇತುಕಾ, ಸಿಯಾ ನ ಭಾವನಾಯ ಪಹಾತಬ್ಬಹೇತುಕಾ।
1587. Katame dhammā bhāvanāya pahātabbahetukā? Uddhaccasahagato cittuppādo, etthuppannaṃ mohaṃ ṭhapetvā – ime dhammā bhāvanāya pahātabbahetukā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā bhāvanāya pahātabbahetukā, siyā na bhāvanāya pahātabbahetukā.
೧೫೮೮. ಕತಮೇ ಧಮ್ಮಾ ನ ಭಾವನಾಯ ಪಹಾತಬ್ಬಹೇತುಕಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಮೋಹೋ, ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಭಾವನಾಯ ಪಹಾತಬ್ಬಹೇತುಕಾ।
1588. Katame dhammā na bhāvanāya pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na bhāvanāya pahātabbahetukā.
೧೫೮೯. ಕತಮೇ ಧಮ್ಮಾ ಸವಿತಕ್ಕಾ? ಕಾಮಾವಚರಕುಸಲಂ, ಅಕುಸಲಂ, ಕಾಮಾವಚರಕುಸಲಸ್ಸ ವಿಪಾಕತೋ ಏಕಾದಸ ಚಿತ್ತುಪ್ಪಾದಾ, ಅಕುಸಲಸ್ಸ ವಿಪಾಕತೋ ದ್ವೇ, ಕಿರಿಯತೋ ಏಕಾದಸ, ರೂಪಾವಚರಂ ಪಠಮಂ ಝಾನಂ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ ಲೋಕುತ್ತರಂ ಪಠಮಂ ಝಾನಂ ಕುಸಲತೋ ಚ ವಿಪಾಕತೋ ಚ, ಏತ್ಥುಪ್ಪನ್ನಂ ವಿತಕ್ಕಂ ಠಪೇತ್ವಾ – ಇಮೇ ಧಮ್ಮಾ ಸವಿತಕ್ಕಾ।
1589. Katame dhammā savitakkā? Kāmāvacarakusalaṃ, akusalaṃ, kāmāvacarakusalassa vipākato ekādasa cittuppādā, akusalassa vipākato dve, kiriyato ekādasa, rūpāvacaraṃ paṭhamaṃ jhānaṃ kusalato ca vipākato ca kiriyato ca lokuttaraṃ paṭhamaṃ jhānaṃ kusalato ca vipākato ca, etthuppannaṃ vitakkaṃ ṭhapetvā – ime dhammā savitakkā.
೧೫೯೦. ಕತಮೇ ಧಮ್ಮಾ ಅವಿತಕ್ಕಾ? ದ್ವೇಪಞ್ಚವಿಞ್ಞಾಣಾನಿ, ರೂಪಾವಚರತಿಕಚತುಕ್ಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಚತ್ತಾರೋ ಅರೂಪಾವಚರಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರತಿಕಚತುಕ್ಕಜ್ಝಾನಾ ಕುಸಲತೋ ಚ ವಿಪಾಕತೋ ಚ, ವಿತಕ್ಕೋ ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅವಿತಕ್ಕಾ।
1590. Katame dhammā avitakkā? Dvepañcaviññāṇāni, rūpāvacaratikacatukkajjhānā kusalato ca vipākato ca kiriyato ca, cattāro arūpāvacarā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, vitakko ca, rūpañca, nibbānañca – ime dhammā avitakkā.
೧೫೯೧. ಕತಮೇ ಧಮ್ಮಾ ಸವಿಚಾರಾ? ಕಾಮಾವಚರಕುಸಲಂ , ಅಕುಸಲಂ, ಕಾಮಾವಚರಕುಸಲಸ್ಸ ವಿಪಾಕತೋ ಏಕಾದಸ ಚಿತ್ತುಪ್ಪಾದಾ, ಅಕುಸಲಸ್ಸ ವಿಪಾಕತೋ ದ್ವೇ ಕಿರಿಯತೋ ಏಕಾದಸ, ರೂಪಾವಚರಏಕಕದುಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರಏಕಕದುಕಜ್ಝಾನಾ ಕುಸಲತೋ ಚ ವಿಪಾಕತೋ ಚ, ಏತ್ಥುಪ್ಪನ್ನಂ ವಿಚಾರಂ ಠಪೇತ್ವಾ – ಇಮೇ ಧಮ್ಮಾ ಸವಿಚಾರಾ।
1591. Katame dhammā savicārā? Kāmāvacarakusalaṃ , akusalaṃ, kāmāvacarakusalassa vipākato ekādasa cittuppādā, akusalassa vipākato dve kiriyato ekādasa, rūpāvacaraekakadukajjhānā kusalato ca vipākato ca kiriyato ca, lokuttaraekakadukajjhānā kusalato ca vipākato ca, etthuppannaṃ vicāraṃ ṭhapetvā – ime dhammā savicārā.
೧೫೯೨. ಕತಮೇ ಧಮ್ಮಾ ಅವಿಚಾರಾ? ದ್ವೇಪಞ್ಚವಿಞ್ಞಾಣಾನಿ, ರೂಪಾವಚರತಿಕತಿಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಚತ್ತಾರೋ ಆರುಪ್ಪಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರತಿಕತಿಕಜ್ಝಾನಾ ಕುಸಲತೋ ಚ ವಿಪಾಕತೋ ಚ, ವಿಚಾರೋ ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅವಿಚಾರಾ।
1592. Katame dhammā avicārā? Dvepañcaviññāṇāni, rūpāvacaratikatikajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaratikatikajjhānā kusalato ca vipākato ca, vicāro ca, rūpañca, nibbānañca – ime dhammā avicārā.
೧೫೯೩. ಕತಮೇ ಧಮ್ಮಾ ಸಪ್ಪೀತಿಕಾ? ಕಾಮಾವಚರಕುಸಲತೋ ಚತ್ತಾರೋ ಸೋಮನಸ್ಸಸಹಗತಚಿತ್ತುಪ್ಪಾದಾ, ಅಕುಸಲತೋ ಚತ್ತಾರೋ, ಕಾಮಾವಚರಕುಸಲಸ್ಸ ವಿಪಾಕತೋ ಪಞ್ಚ, ಕಿರಿಯತೋ ಪಞ್ಚ, ರೂಪಾವಚರದುಕತಿಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರದುಕತಿಕಜ್ಝಾನಾ ಕುಸಲತೋ ಚ ವಿಪಾಕತೋ ಚ, ಏತ್ಥುಪ್ಪನ್ನಂ ಪೀತಿಂ ಠಪೇತ್ವಾ – ಇಮೇ ಧಮ್ಮಾ ಸಪ್ಪೀತಿಕಾ।
1593. Katame dhammā sappītikā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā sappītikā.
೧೫೯೪. ಕತಮೇ ಧಮ್ಮಾ ಅಪ್ಪೀತಿಕಾ? ಕಾಮಾವಚರಕುಸಲತೋ ಚತ್ತಾರೋ ಉಪೇಕ್ಖಾಸಹಗತಚಿತ್ತುಪ್ಪಾದಾ, ಅಕುಸಲತೋ ಅಟ್ಠ, ಕಾಮಾವಚರಕುಸಲಸ್ಸ ವಿಪಾಕತೋ ಏಕಾದಸ, ಅಕುಸಲಸ್ಸ ವಿಪಾಕತೋ ಸತ್ತ, ಕಿರಿಯತೋ ಛ, ರೂಪಾವಚರದುಕದುಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಚತ್ತಾರೋ ಆರುಪ್ಪಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರದುಕದುಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಪೀತಿ ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಪ್ಪೀತಿಕಾ।
1594. Katame dhammā appītikā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato ekādasa, akusalassa vipākato satta, kiriyato cha, rūpāvacaradukadukajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaradukadukajjhānā kusalato ca vipākato ca pīti ca, rūpañca, nibbānañca – ime dhammā appītikā.
೧೫೯೫. ಕತಮೇ ಧಮ್ಮಾ ಪೀತಿಸಹಗತಾ? ಕಾಮಾವಚರಕುಸಲತೋ ಚತ್ತಾರೋ ಸೋಮನಸ್ಸಸಹಗತಚಿತ್ತುಪ್ಪಾದಾ, ಅಕುಸಲತೋ ಚತ್ತಾರೋ, ಕಾಮಾವಚರಕುಸಲಸ್ಸ ವಿಪಾಕತೋ ಪಞ್ಚ, ಕಿರಿಯತೋ ಪಞ್ಚ, ರೂಪಾವಚರದುಕತಿಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರದುಕತಿಕಜ್ಝಾನಾ ಕುಸಲತೋ ಚ ವಿಪಾಕತೋ ಚ, ಏತ್ಥುಪ್ಪನ್ನಂ ಪೀತಿಂ ಠಪೇತ್ವಾ – ಇಮೇ ಧಮ್ಮಾ ಪೀತಿಸಹಗತಾ।
1595. Katame dhammā pītisahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā pītisahagatā.
೧೫೯೬. ಕತಮೇ ಧಮ್ಮಾ ನ ಪೀತಿಸಹಗತಾ? ಕಾಮಾವಚರಕುಸಲತೋ ಚತ್ತಾರೋ ಉಪೇಕ್ಖಾಸಹಗತಚಿತ್ತುಪ್ಪಾದಾ, ಅಕುಸಲತೋ ಅಟ್ಠ, ಕಾಮಾವಚರಕುಸಲಸ್ಸ ವಿಪಾಕತೋ ಏಕಾದಸ, ಅಕುಸಲಸ್ಸ ವಿಪಾಕತೋ ಸತ್ತ, ಕಿರಿಯತೋ ಛ, ರೂಪಾವಚರದುಕದುಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಚತ್ತಾರೋ ಆರುಪ್ಪಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರದುಕದುಕಜ್ಝಾನಾ ಕುಸಲತೋ ಚ ವಿಪಾಕತೋ ಚ, ಪೀತಿ ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಪೀತಿಸಹಗತಾ।
1596. Katame dhammā na pītisahagatā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato ekādasa, akusalassa vipākato satta, kiriyato cha, rūpāvacaradukadukajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaradukadukajjhānā kusalato ca vipākato ca, pīti ca, rūpañca, nibbānañca – ime dhammā na pītisahagatā.
೧೫೯೭. ಕತಮೇ ಧಮ್ಮಾ ಸುಖಸಹಗತಾ? ಕಾಮಾವಚರಕುಸಲತೋ ಚತ್ತಾರೋ ಸೋಮನಸ್ಸಸಹಗತಚಿತ್ತುಪ್ಪಾದಾ, ಅಕುಸಲತೋ ಚತ್ತಾರೋ, ಕಾಮಾವಚರಕುಸಲಸ್ಸ ವಿಪಾಕತೋ ಛ, ಕಿರಿಯತೋ ಪಞ್ಚ, ರೂಪಾವಚರತಿಕಚತುಕ್ಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ ಲೋಕುತ್ತರತಿಕಚತುಕ್ಕಜ್ಝಾನಾ ಕುಸಲತೋ ಚ ವಿಪಾಕತೋ ಚ, ಏತ್ಥುಪ್ಪನ್ನಂ ಸುಖಂ ಠಪೇತ್ವಾ – ಇಮೇ ಧಮ್ಮಾ ಸುಖಸಹಗತಾ।
1597. Katame dhammā sukhasahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato cha, kiriyato pañca, rūpāvacaratikacatukkajjhānā kusalato ca vipākato ca kiriyato ca lokuttaratikacatukkajjhānā kusalato ca vipākato ca, etthuppannaṃ sukhaṃ ṭhapetvā – ime dhammā sukhasahagatā.
೧೫೯೮. ಕತಮೇ ಧಮ್ಮಾ ನ ಸುಖಸಹಗತಾ? ಕಾಮಾವಚರಕುಸಲತೋ ಚತ್ತಾರೋ ಉಪೇಕ್ಖಾಸಹಗತಚಿತ್ತುಪ್ಪಾದಾ, ಅಕುಸಲತೋ ಅಟ್ಠ, ಕಾಮಾವಚರಕುಸಲಸ್ಸ ವಿಪಾಕತೋ ದಸ, ಅಕುಸಲಸ್ಸ ವಿಪಾಕತೋ ಸತ್ತ, ಕಿರಿಯತೋ ಛ, ರೂಪಾವಚರಂ ಚತುತ್ಥಂ ಝಾನಂ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಚತ್ತಾರೋ ಆರುಪ್ಪಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ ಲೋಕುತ್ತರಂ ಚತುತ್ಥಂ ಝಾನಂ ಕುಸಲತೋ ಚ ವಿಪಾಕತೋ ಚ, ಸುಖಞ್ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಸುಖಸಹಗತಾ।
1598. Katame dhammā na sukhasahagatā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato dasa, akusalassa vipākato satta, kiriyato cha, rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca lokuttaraṃ catutthaṃ jhānaṃ kusalato ca vipākato ca, sukhañca, rūpañca, nibbānañca – ime dhammā na sukhasahagatā.
೧೫೯೯. ಕತಮೇ ಧಮ್ಮಾ ಉಪೇಕ್ಖಾಸಹಗತಾ? ಕಾಮಾವಚರಕುಸಲತೋ ಚತ್ತಾರೋ ಉಪೇಕ್ಖಾಸಹಗತಚಿತ್ತುಪ್ಪಾದಾ, ಅಕುಸಲತೋ ಛ, ಕಾಮಾವಚರಕುಸಲಸ್ಸ ವಿಪಾಕತೋ ದಸ, ಅಕುಸಲಸ್ಸ ವಿಪಾಕತೋ ಛ, ಕಿರಿಯತೋ ಛ , ರೂಪಾವಚರಂ ಚತುತ್ಥಂ ಝಾನಂ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಚತ್ತಾರೋ ಆರುಪ್ಪಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರಂ ಚತುತ್ಥಂ ಝಾನಂ ಕುಸಲತೋ ಚ ವಿಪಾಕತೋ ಚ, ಏತ್ಥುಪ್ಪನ್ನಂ ಉಪೇಕ್ಖಂ ಠಪೇತ್ವಾ – ಇಮೇ ಧಮ್ಮಾ ಉಪೇಕ್ಖಾಸಹಗತಾ।
1599. Katame dhammā upekkhāsahagatā? Kāmāvacarakusalato cattāro upekkhāsahagatacittuppādā, akusalato cha, kāmāvacarakusalassa vipākato dasa, akusalassa vipākato cha, kiriyato cha , rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaraṃ catutthaṃ jhānaṃ kusalato ca vipākato ca, etthuppannaṃ upekkhaṃ ṭhapetvā – ime dhammā upekkhāsahagatā.
೧೬೦೦. ಕತಮೇ ಧಮ್ಮಾ ನ ಉಪೇಕ್ಖಾಸಹಗತಾ? ಕಾಮಾವಚರಕುಸಲತೋ ಚತ್ತಾರೋ ಸೋಮನಸ್ಸಸಹಗತಚಿತ್ತುಪ್ಪಾದಾ, ಅಕುಸಲತೋ ಛ, ಕಾಮಾವಚರಕುಸಲಸ್ಸ ವಿಪಾಕತೋ ಛ, ಅಕುಸಲಸ್ಸ ವಿಪಾಕತೋ ಏಕೋ, ಕಿರಿಯತೋ ಪಞ್ಚ, ರೂಪಾವಚರತಿಕಚತುಕ್ಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ, ಲೋಕುತ್ತರತಿಕಚತುಕ್ಕಜ್ಝಾನಾ ಕುಸಲತೋ ಚ ವಿಪಾಕತೋ ಚ, ಉಪೇಕ್ಖಾ ಚ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ನ ಉಪೇಕ್ಖಾಸಹಗತಾ।
1600. Katame dhammā na upekkhāsahagatā? Kāmāvacarakusalato cattāro somanassasahagatacittuppādā, akusalato cha, kāmāvacarakusalassa vipākato cha, akusalassa vipākato eko, kiriyato pañca, rūpāvacaratikacatukkajjhānā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, upekkhā ca, rūpañca, nibbānañca – ime dhammā na upekkhāsahagatā.
೧೬೦೧. ಕತಮೇ ಧಮ್ಮಾ ಕಾಮಾವಚರಾ? ಕಾಮಾವಚರಕುಸಲಂ, ಅಕುಸಲಂ, ಸಬ್ಬೋ ಕಾಮಾವಚರಸ್ಸ ವಿಪಾಕೋ, ಕಾಮಾವಚರಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಕಾಮಾವಚರಾ।
1601. Katame dhammā kāmāvacarā? Kāmāvacarakusalaṃ, akusalaṃ, sabbo kāmāvacarassa vipāko, kāmāvacarakiriyābyākataṃ, sabbañca rūpaṃ – ime dhammā kāmāvacarā.
೧೬೦೨. ಕತಮೇ ಧಮ್ಮಾ ನ ಕಾಮಾವಚರಾ? ರೂಪಾವಚರಾ , ಅರೂಪಾವಚರಾ, ಅಪರಿಯಾಪನ್ನಾ – ಇಮೇ ಧಮ್ಮಾ ನ ಕಾಮಾವಚರಾ।
1602. Katame dhammā na kāmāvacarā? Rūpāvacarā , arūpāvacarā, apariyāpannā – ime dhammā na kāmāvacarā.
೧೬೦೩. ಕತಮೇ ಧಮ್ಮಾ ರೂಪಾವಚರಾ? ರೂಪಾವಚರಚತುಕ್ಕಪಞ್ಚಕಜ್ಝಾನಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ – ಇಮೇ ಧಮ್ಮಾ ರೂಪಾವಚರಾ।
1603. Katame dhammā rūpāvacarā? Rūpāvacaracatukkapañcakajjhānā kusalato ca vipākato ca kiriyato ca – ime dhammā rūpāvacarā.
೧೬೦೪. ಕತಮೇ ಧಮ್ಮಾ ನ ರೂಪಾವಚರಾ? ಕಾಮಾವಚರಾ, ಅರೂಪಾವಚರಾ, ಅಪರಿಯಾಪನ್ನಾ – ಇಮೇ ಧಮ್ಮಾ ನ ರೂಪಾವಚರಾ।
1604. Katame dhammā na rūpāvacarā? Kāmāvacarā, arūpāvacarā, apariyāpannā – ime dhammā na rūpāvacarā.
೧೬೦೫. ಕತಮೇ ಧಮ್ಮಾ ಅರೂಪಾವಚರಾ? ಚತ್ತಾರೋ ಆರುಪ್ಪಾ ಕುಸಲತೋ ಚ ವಿಪಾಕತೋ ಚ ಕಿರಿಯತೋ ಚ – ಇಮೇ ಧಮ್ಮಾ ಅರೂಪಾವಚರಾ।
1605. Katame dhammā arūpāvacarā? Cattāro āruppā kusalato ca vipākato ca kiriyato ca – ime dhammā arūpāvacarā.
೧೬೦೬. ಕತಮೇ ಧಮ್ಮಾ ನ ಅರೂಪಾವಚರಾ? ಕಾಮಾವಚರಾ, ರೂಪಾವಚರಾ, ಅಪರಿಯಾಪನ್ನಾ – ಇಮೇ ಧಮ್ಮಾ ನ ಅರೂಪಾವಚರಾ।
1606. Katame dhammā na arūpāvacarā? Kāmāvacarā, rūpāvacarā, apariyāpannā – ime dhammā na arūpāvacarā.
೧೬೦೭. ಕತಮೇ ಧಮ್ಮಾ ಪರಿಯಾಪನ್ನಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಪರಿಯಾಪನ್ನಾ।
1607. Katame dhammā pariyāpannā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā pariyāpannā.
೧೬೦೮. ಕತಮೇ ಧಮ್ಮಾ ಅಪರಿಯಾಪನ್ನಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅಪರಿಯಾಪನ್ನಾ।
1608. Katame dhammā apariyāpannā? Cattāro maggā apariyāpannā, cattāri ca sāmaññaphalāni, nibbānañca – ime dhammā apariyāpannā.
೧೬೦೯. ಕತಮೇ ಧಮ್ಮಾ ನಿಯ್ಯಾನಿಕಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ – ಇಮೇ ಧಮ್ಮಾ ನಿಯ್ಯಾನಿಕಾ।
1609. Katame dhammā niyyānikā? Cattāro maggā apariyāpannā – ime dhammā niyyānikā.
೧೬೧೦. ಕತಮೇ ಧಮ್ಮಾ ಅನಿಯ್ಯಾನಿಕಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನಿಯ್ಯಾನಿಕಾ।
1610. Katame dhammā aniyyānikā? Tīsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyyānikā.
೧೬೧೧. ಕತಮೇ ಧಮ್ಮಾ ನಿಯತಾ? ಚತ್ತಾರೋ ದಿಟ್ಠಿಗತಸಮ್ಪಯುತ್ತಚಿತ್ತುಪ್ಪಾದಾ, ದ್ವೇ ದೋಮನಸ್ಸಸಹಗತಚಿತ್ತುಪ್ಪಾದಾ – ಇಮೇ ಧಮ್ಮಾ ಸಿಯಾ ನಿಯತಾ ಸಿಯಾ ಅನಿಯತಾ। ಚತ್ತಾರೋ ಮಗ್ಗಾ ಅಪರಿಯಾಪನ್ನಾ – ಇಮೇ ಧಮ್ಮಾ ನಿಯತಾ।
1611. Katame dhammā niyatā? Cattāro diṭṭhigatasampayuttacittuppādā, dve domanassasahagatacittuppādā – ime dhammā siyā niyatā siyā aniyatā. Cattāro maggā apariyāpannā – ime dhammā niyatā.
೧೬೧೨. ಕತಮೇ ಧಮ್ಮಾ ಅನಿಯತಾ? ಚತ್ತಾರೋ ದಿಟ್ಠಿಗತವಿಪ್ಪಯುತ್ತಲೋಭಸಹಗತಚಿತ್ತುಪ್ಪಾದಾ, ವಿಚಿಕಿಚ್ಛಾಸಹಗತೋ ಚಿತ್ತುಪ್ಪಾದೋ, ಉದ್ಧಚ್ಚಸಹಗತೋ ಚಿತ್ತುಪ್ಪಾದೋ, ತೀಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನಿಯತಾ।
1612. Katame dhammā aniyatā? Cattāro diṭṭhigatavippayuttalobhasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyatā.
೧೬೧೩. ಕತಮೇ ಧಮ್ಮಾ ಸಉತ್ತರಾ? ತೀಸು ಭೂಮೀಸು ಕುಸಲಂ, ಅಕುಸಲಂ, ತೀಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ಸಬ್ಬಞ್ಚ ರೂಪಂ – ಇಮೇ ಧಮ್ಮಾ ಸಉತ್ತರಾ।
1613. Katame dhammā sauttarā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sauttarā.
೧೬೧೪. ಕತಮೇ ಧಮ್ಮಾ ಅನುತ್ತರಾ? ಚತ್ತಾರೋ ಮಗ್ಗಾ ಅಪರಿಯಾಪನ್ನಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಅನುತ್ತರಾ।
1614. Katame dhammā anuttarā? Cattāro maggā apariyāpannā, cattāri ca sāmaññaphalāni, nibbānañca – ime dhammā anuttarā.
೧೬೧೫. ಕತಮೇ ಧಮ್ಮಾ ಸರಣಾ? ದ್ವಾದಸ ಅಕುಸಲಚಿತ್ತುಪ್ಪಾದಾ – ಇಮೇ ಧಮ್ಮಾ ಸರಣಾ।
1615. Katame dhammā saraṇā? Dvādasa akusalacittuppādā – ime dhammā saraṇā.
೧೬೧೬. ಕತಮೇ ಧಮ್ಮಾ ಅರಣಾ? ಚತೂಸು ಭೂಮೀಸು ಕುಸಲಂ, ಚತೂಸು ಭೂಮೀಸು ವಿಪಾಕೋ, ತೀಸು ಭೂಮೀಸು ಕಿರಿಯಾಬ್ಯಾಕತಂ, ರೂಪಞ್ಚ, ನಿಬ್ಬಾನಞ್ಚ – ಇಮೇ ಧಮ್ಮಾ ಅರಣಾ।
1616. Katame dhammā araṇā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā araṇā.
ಅತ್ಥುದ್ಧಾರೋ ನಿಟ್ಠಿತೋ।
Atthuddhāro niṭṭhito.
ಧಮ್ಮಸಙ್ಗಣೀಪಕರಣಂ ನಿಟ್ಠಿತಂ।
Dhammasaṅgaṇīpakaraṇaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಧಮ್ಮಸಙ್ಗಣಿ-ಅಟ್ಠಕಥಾ • Dhammasaṅgaṇi-aṭṭhakathā / ದುಕಅತ್ಥುದ್ಧಾರವಣ್ಣನಾ • Dukaatthuddhāravaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಧಮ್ಮಸಙ್ಗಣೀ-ಮೂಲಟೀಕಾ • Dhammasaṅgaṇī-mūlaṭīkā / ದುಕಅತ್ಥುದ್ಧಾರವಣ್ಣನಾ • Dukaatthuddhāravaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಧಮ್ಮಸಙ್ಗಣೀ-ಅನುಟೀಕಾ • Dhammasaṅgaṇī-anuṭīkā / ದುಕಅತ್ಥುದ್ಧಾರವಣ್ಣನಾ • Dukaatthuddhāravaṇṇanā
