| Library / Tipiṭaka / තිපිටක • Tipiṭaka / ධම්‌මසඞ්‌ගණීපාළි • Dhammasaṅgaṇīpāḷi |
දුකඅත්‌ථුද්‌ධාරො
Dukaatthuddhāro
හෙතුගොච්‌ඡකං
Hetugocchakaṃ
1441. කතමෙ ධම්‌මා හෙතූ? තයො කුසලහෙතූ, තයො අකුසලහෙතූ, තයො අබ්‍යාකතහෙතූ. අලොභො කුසලහෙතු, අදොසො කුසලහෙතු, චතූසු භූමීසු කුසලෙසු උප්‌පජ්‌ජන්‌ති. අමොහො කුසලහෙතු, කාමාවචරකුසලතො චත්‌තාරො ඤාණවිප්‌පයුත්‌තෙ චිත්‌තුප්‌පාදෙ ඨපෙත්‌වා, චතූසු භූමීසු කුසලෙසු උප්‌පජ්‌ජති.
1441. Katame dhammā hetū? Tayo kusalahetū, tayo akusalahetū, tayo abyākatahetū. Alobho kusalahetu, adoso kusalahetu, catūsu bhūmīsu kusalesu uppajjanti. Amoho kusalahetu, kāmāvacarakusalato cattāro ñāṇavippayutte cittuppāde ṭhapetvā, catūsu bhūmīsu kusalesu uppajjati.
ලොභො අට්‌ඨසු ලොභසහගතෙසු චිත්‌තුප්‌පාදෙසු උප්‌පජ්‌ජති. දොසො ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පජ්‌ජති. මොහො සබ්‌බාකුසලෙසු උප්‌පජ්‌ජති.
Lobho aṭṭhasu lobhasahagatesu cittuppādesu uppajjati. Doso dvīsu domanassasahagatesu cittuppādesu uppajjati. Moho sabbākusalesu uppajjati.
අලොභො විපාකහෙතු අදොසො විපාකහෙතු, කාමාවචරස්‌ස විපාකතො අහෙතුකෙ චිත්‌තුප්‌පාදෙ ඨපෙත්‌වා, චතූසු භූමීසු විපාකෙසු උප්‌පජ්‌ජන්‌ති. අමොහො විපාකහෙතු, කාමාවචරස්‌ස විපාකතො අහෙතුකෙ චිත්‌තුප්‌පාදෙ ඨපෙත්‌වා, චත්‌තාරො ඤාණවිප්‌පයුත්‌තෙ චිත්‌තුප්‌පාදෙ ඨපෙත්‌වා, චතූසු භූමීසු විපාකෙසු උප්‌පජ්‌ජති.
Alobho vipākahetu adoso vipākahetu, kāmāvacarassa vipākato ahetuke cittuppāde ṭhapetvā, catūsu bhūmīsu vipākesu uppajjanti. Amoho vipākahetu, kāmāvacarassa vipākato ahetuke cittuppāde ṭhapetvā, cattāro ñāṇavippayutte cittuppāde ṭhapetvā, catūsu bhūmīsu vipākesu uppajjati.
අලොභො කිරියහෙතු අදොසො කිරියහෙතු, කාමාවචරකිරියතො අහෙතුකෙ චිත්‌තුප්‌පාදෙ ඨපෙත්‌වා, තීසු භූමීසු කිරියෙසු උප්‌පජ්‌ජන්‌ති . අමොහො කිරියහෙතු, කාමාවචරකිරියතො අහෙතුකෙ චිත්‌තුප්‌පාදෙ ඨපෙත්‌වා, චත්‌තාරො ඤාණවිප්‌පයුත්‌තෙ චිත්‌තුප්‌පාදෙ ඨපෙත්‌වා, තීසු භූමීසු කිරියෙසු උප්‌පජ්‌ජති – ඉමෙ ධම්‌මා හෙතූ.
Alobho kiriyahetu adoso kiriyahetu, kāmāvacarakiriyato ahetuke cittuppāde ṭhapetvā, tīsu bhūmīsu kiriyesu uppajjanti . Amoho kiriyahetu, kāmāvacarakiriyato ahetuke cittuppāde ṭhapetvā, cattāro ñāṇavippayutte cittuppāde ṭhapetvā, tīsu bhūmīsu kiriyesu uppajjati – ime dhammā hetū.
1442. කතමෙ ධම්‌මා න හෙතූ? ඨපෙත්‌වා හෙතූ, චතූසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා න හෙතූ.
1442. Katame dhammā na hetū? Ṭhapetvā hetū, catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na hetū.
1443. කතමෙ ධම්‌මා සහෙතුකා? විචිකිච්‌ඡාසහගතං උද්‌ධච්‌චසහගතං මොහං ඨපෙත්‌වා අවසෙසං අකුසලං, චතූසු භූමීසු කුසලං, කාමාවචරස්‌ස විපාකතො අහෙතුකෙ චිත්‌තුප්‌පාදෙ ඨපෙත්‌වා චතූසු භූමීසු විපාකො, කාමාවචරකිරියතො අහෙතුකෙ චිත්‌තුප්‌පාදෙ ඨපෙත්‌වා තීසු භූමීසු කිරියාබ්‍යාකතං – ඉමෙ ධම්‌මා සහෙතුකා.
1443. Katame dhammā sahetukā? Vicikicchāsahagataṃ uddhaccasahagataṃ mohaṃ ṭhapetvā avasesaṃ akusalaṃ, catūsu bhūmīsu kusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ – ime dhammā sahetukā.
1444. කතමෙ ධම්‌මා අහෙතුකා? විචිකිච්‌ඡාසහගතො මොහො, උද්‌ධච්‌චසහගතො මොහො, ද්‌වෙපඤ්‌චවිඤ්‌ඤාණානි, තිස්‌සො ච මනොධාතුයො, පඤ්‌ච ච අහෙතුකමනොවිඤ්‌ඤාණධාතුයො, රූපඤ්‌ච, නිබ්‌බානඤ්‌ච – ඉමෙ ධම්‌මා අහෙතුකා.
1444. Katame dhammā ahetukā? Vicikicchāsahagato moho, uddhaccasahagato moho, dvepañcaviññāṇāni, tisso ca manodhātuyo, pañca ca ahetukamanoviññāṇadhātuyo, rūpañca, nibbānañca – ime dhammā ahetukā.
1445. කතමෙ ධම්‌මා හෙතුසම්‌පයුත්‌තා? විචිකිච්‌ඡාසහගතං උද්‌ධච්‌චසහගතං මොහං ඨපෙත්‌වා අවසෙසං අකුසලං, චතූසු භූමීසු කුසලං, කාමාවචරස්‌ස විපාකතො අහෙතුකෙ චිත්‌තුප්‌පාදෙ ඨපෙත්‌වා චතූසු භූමීසු විපාකො, කාමාවචරකිරියතො අහෙතුකෙ චිත්‌තුප්‌පාදෙ ඨපෙත්‌වා තීසු භූමීසු කිරියාබ්‍යාකතං – ඉමෙ ධම්‌මා හෙතුසම්‌පයුත්‌තා.
1445. Katame dhammā hetusampayuttā? Vicikicchāsahagataṃ uddhaccasahagataṃ mohaṃ ṭhapetvā avasesaṃ akusalaṃ, catūsu bhūmīsu kusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ – ime dhammā hetusampayuttā.
1446. කතමෙ ධම්‌මා හෙතුවිප්‌පයුත්‌තා? විචිකිච්‌ඡාසහගතො මොහො, උද්‌ධච්‌චසහගතො මොහො, ද්‌වෙපඤ්‌චවිඤ්‌ඤාණානි තිස්‌සො ච මනොධාතුයො පඤ්‌ච ච අහෙතුකමනොවිඤ්‌ඤාණධාතුයො, රූපඤ්‌ච, නිබ්‌බානඤ්‌ච – ඉමෙ ධම්‌මා හෙතුවිප්‌පයුත්‌තා.
1446. Katame dhammā hetuvippayuttā? Vicikicchāsahagato moho, uddhaccasahagato moho, dvepañcaviññāṇāni tisso ca manodhātuyo pañca ca ahetukamanoviññāṇadhātuyo, rūpañca, nibbānañca – ime dhammā hetuvippayuttā.
1447. කතමෙ ධම්‌මා හෙතූ චෙව සහෙතුකා ච? යත්‌ථ ද්‌වෙ තයො හෙතූ එකතො උප්‌පජ්‌ජන්‌ති – ඉමෙ ධම්‌මා හෙතූ චෙව සහෙතුකා ච.
1447. Katame dhammā hetū ceva sahetukā ca? Yattha dve tayo hetū ekato uppajjanti – ime dhammā hetū ceva sahetukā ca.
1448. කතමෙ ධම්‌මා සහෙතුකා චෙව න ච හෙතූ? චතූසු භූමීසු කුසලං, අකුසලං, කාමාවචරස්‌ස විපාකතො අහෙතුකෙ චිත්‌තුප්‌පාදෙ ඨපෙත්‌වා චතූසු භූමීසු විපාකො, කාමාවචරකිරියතො අහෙතුකෙ චිත්‌තුප්‌පාදෙ ඨපෙත්‌වා තීසු භූමීසු කිරියාබ්‍යාකතං, එත්‌ථුප්‌පන්‌නෙ හෙතූ ඨපෙත්‌වා – ඉමෙ ධම්‌මා සහෙතුකා චෙව න ච හෙතූ. අහෙතුකා ධම්‌මා න වත්‌තබ්‌බා – හෙතූ චෙව සහෙතුකා චාතිපි, සහෙතුකා චෙව න ච හෙතූතිපි.
1448. Katame dhammā sahetukā ceva na ca hetū? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā sahetukā ceva na ca hetū. Ahetukā dhammā na vattabbā – hetū ceva sahetukā cātipi, sahetukā ceva na ca hetūtipi.
1449. කතමෙ ධම්‌මා හෙතූ චෙව හෙතුසම්‌පයුත්‌තා ච? යත්‌ථ ද්‌වෙ තයො හෙතූ එකතො උප්‌පජ්‌ජන්‌ති – ඉමෙ ධම්‌මා හෙතූ චෙව හෙතුසම්‌පයුත්‌තා ච.
1449. Katame dhammā hetū ceva hetusampayuttā ca? Yattha dve tayo hetū ekato uppajjanti – ime dhammā hetū ceva hetusampayuttā ca.
1450. කතමෙ ධම්‌මා හෙතුසම්‌පයුත්‌තා චෙව න ච හෙතූ? චතූසු භූමීසු කුසලං, අකුසලං, කාමාවචරස්‌ස විපාකතො අහෙතුකෙ චිත්‌තුප්‌පාදෙ ඨපෙත්‌වා චතූසු භූමීසු විපාකො, කාමාවචරකිරියතො අහෙතුකෙ චිත්‌තුප්‌පාදෙ ඨපෙත්‌වා තීසු භූමීසු කිරියාබ්‍යාකතං, එත්‌ථුප්‌පන්‌නෙ හෙතූ ඨපෙත්‌වා – ඉමෙ ධම්‌මා හෙතුසම්‌පයුත්‌තා චෙව න ච හෙතූ. හෙතුවිප්‌පයුත්‌තා ධම්‌මා න වත්‌තබ්‌බා – හෙතූ චෙව හෙතුසම්‌පයුත්‌තා චාතිපි, හෙතුසම්‌පයුත්‌තා චෙව න ච හෙතූතිපි.
1450. Katame dhammā hetusampayuttā ceva na ca hetū? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā hetusampayuttā ceva na ca hetū. Hetuvippayuttā dhammā na vattabbā – hetū ceva hetusampayuttā cātipi, hetusampayuttā ceva na ca hetūtipi.
1451. කතමෙ ධම්‌මා න හෙතූ සහෙතුකා? චතූසු භූමීසු කුසලං, අකුසලං, කාමාවචරස්‌ස විපාකතො අහෙතුකෙ චිත්‌තුප්‌පාදෙ ඨපෙත්‌වා චතූසු භූමීසු විපාකො, කාමාවචරකිරියතො අහෙතුකෙ චිත්‌තුප්‌පාදෙ ඨපෙත්‌වා තීසු භූමීසු කිරියාබ්‍යාකතං, එත්‌ථුප්‌පන්‌නෙ හෙතූ ඨපෙත්‌වා – ඉමෙ ධම්‌මා න හෙතූ සහෙතුකා.
1451. Katame dhammā na hetū sahetukā? Catūsu bhūmīsu kusalaṃ, akusalaṃ, kāmāvacarassa vipākato ahetuke cittuppāde ṭhapetvā catūsu bhūmīsu vipāko, kāmāvacarakiriyato ahetuke cittuppāde ṭhapetvā tīsu bhūmīsu kiriyābyākataṃ, etthuppanne hetū ṭhapetvā – ime dhammā na hetū sahetukā.
1452. කතමෙ ධම්‌මා න හෙතූ අහෙතුකා? ද්‌වෙපඤ්‌චවිඤ්‌ඤාණානි, තිස්‌සො ච මනොධාතුයො, පඤ්‌ච ච අහෙතුකමනොවිඤ්‌ඤාණධාතුයො, රූපඤ්‌ච, නිබ්‌බානඤ්‌ච – ඉමෙ ධම්‌මා න හෙතූ අහෙතුකා . හෙතූ ධම්‌මා න වත්‌තබ්‌බා – න හෙතූ සහෙතුකාතිපි, න හෙතූ අහෙතුකාතිපි.
1452. Katame dhammā na hetū ahetukā? Dvepañcaviññāṇāni, tisso ca manodhātuyo, pañca ca ahetukamanoviññāṇadhātuyo, rūpañca, nibbānañca – ime dhammā na hetū ahetukā . Hetū dhammā na vattabbā – na hetū sahetukātipi, na hetū ahetukātipi.
චූළන්‌තරදුකං
Cūḷantaradukaṃ
1453. කතමෙ ධම්‌මා සප්‌පච්‌චයා? චතූසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සප්‌පච්‌චයා.
1453. Katame dhammā sappaccayā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sappaccayā.
1454. කතමෙ ධම්‌මා අප්‌පච්‌චයා? නිබ්‌බානං – ඉමෙ ධම්‌මා අප්‌පච්‌චයා.
1454. Katame dhammā appaccayā? Nibbānaṃ – ime dhammā appaccayā.
1455. කතමෙ ධම්‌මා සඞ්‌ඛතා? චතූසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සඞ්‌ඛතා.
1455. Katame dhammā saṅkhatā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṅkhatā.
1456. කතමෙ ධම්‌මා අසඞ්‌ඛතා? නිබ්‌බානං – ඉමෙ ධම්‌මා අසඞ්‌ඛතා.
1456. Katame dhammā asaṅkhatā? Nibbānaṃ – ime dhammā asaṅkhatā.
1457. කතමෙ ධම්‌මා සනිදස්‌සනා? රූපායතනං – ඉමෙ ධම්‌මා සනිදස්‌සනා.
1457. Katame dhammā sanidassanā? Rūpāyatanaṃ – ime dhammā sanidassanā.
1458. කතමෙ ධම්‌මා අනිදස්‌සනා? චක්‌ඛායතනං …පෙ.… ඵොට්‌ඨබ්‌බායතනං, චතූසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං, යඤ්‌ච රූපං අනිදස්‌සනං අප්‌පටිඝං ධම්‌මායතනපරියාපන්‌නං, නිබ්‌බානඤ්‌ච – ඉමෙ ධම්‌මා අනිදස්‌සනා.
1458. Katame dhammā anidassanā? Cakkhāyatanaṃ …pe… phoṭṭhabbāyatanaṃ, catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā anidassanā.
1459. කතමෙ ධම්‌මා සප්‌පටිඝා? චක්‌ඛායතනං…පෙ.… ඵොට්‌ඨබ්‌බායතනං – ඉමෙ ධම්‌මා සප්‌පටිඝා.
1459. Katame dhammā sappaṭighā? Cakkhāyatanaṃ…pe… phoṭṭhabbāyatanaṃ – ime dhammā sappaṭighā.
1460. කතමෙ ධම්‌මා අප්‌පටිඝා? චතූසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං, යඤ්‌ච රූපං අනිදස්‌සනං අප්‌පටිඝං ධම්‌මායතනපරියාපන්‌නං, නිබ්‌බානඤ්‌ච – ඉමෙ ධම්‌මා අප්‌පටිඝා.
1460. Katame dhammā appaṭighā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca – ime dhammā appaṭighā.
1461. කතමෙ ධම්‌මා රූපිනො? චත්‌තාරො ච මහාභූතා, චතුන්‌නඤ්‌ච මහාභූතානං උපාදාය රූපං – ඉමෙ ධම්‌මා රූපිනො.
1461. Katame dhammā rūpino? Cattāro ca mahābhūtā, catunnañca mahābhūtānaṃ upādāya rūpaṃ – ime dhammā rūpino.
1462. කතමෙ ධම්‌මා අරූපිනො? චතූසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං, නිබ්‌බානඤ්‌ච – ඉමෙ ධම්‌මා අරූපිනො.
1462. Katame dhammā arūpino? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, nibbānañca – ime dhammā arūpino.
1463. කතමෙ ධම්‌මා ලොකියා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා ලොකියා.
1463. Katame dhammā lokiyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā lokiyā.
1464. කතමෙ ධම්‌මා ලොකුත්‌තරා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා ලොකුත්‌තරා. සබ්‌බෙ 1 ධම්‌මා කෙනචි විඤ්‌ඤෙය්‍යා, කෙනචි න විඤ්‌ඤෙය්‍යා.
1464. Katame dhammā lokuttarā? Cattāro maggā apariyāpannā, cattāri ca sāmaññaphalāni, nibbānañca – ime dhammā lokuttarā. Sabbe 2 dhammā kenaci viññeyyā, kenaci na viññeyyā.
ආසවගොච්‌ඡකං
Āsavagocchakaṃ
1465. කතමෙ ධම්‌මා ආසවා? චත්‌තාරො ආසවා – කාමාසවො, භවාසවො, දිට්‌ඨාසවො, අවිජ්‌ජාසවො. කාමාසවො අට්‌ඨසු ලොභසහගතෙසු චිත්‌තුප්‌පාදෙසු උප්‌පජ්‌ජති භවාසවො චතූසු දිට්‌ඨිගතවිප්‌පයුත්‌තලොභසහගතෙසු චිත්‌තුප්‌පාදෙසු උප්‌පජ්‌ජති දිට්‌ඨාසවො චතූසු දිට්‌ඨිගතසම්‌පයුත්‌තෙසු චිත්‌තුප්‌පාදෙසු උප්‌පජ්‌ජති. අවිජ්‌ජාසවො සබ්‌බාකුසලෙසු උප්‌පජ්‌ජති – ඉමෙ ධම්‌මා ආසවා.
1465. Katame dhammā āsavā? Cattāro āsavā – kāmāsavo, bhavāsavo, diṭṭhāsavo, avijjāsavo. Kāmāsavo aṭṭhasu lobhasahagatesu cittuppādesu uppajjati bhavāsavo catūsu diṭṭhigatavippayuttalobhasahagatesu cittuppādesu uppajjati diṭṭhāsavo catūsu diṭṭhigatasampayuttesu cittuppādesu uppajjati. Avijjāsavo sabbākusalesu uppajjati – ime dhammā āsavā.
1466. කතමෙ ධම්‌මා නො ආසවා? ඨපෙත්‌වා ආසවෙ අවසෙසං අකුසලං, චතූසු භූමීසු කුසලං , චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා නො ආසවා.
1466. Katame dhammā no āsavā? Ṭhapetvā āsave avasesaṃ akusalaṃ, catūsu bhūmīsu kusalaṃ , catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no āsavā.
1467. කතමෙ ධම්‌මා සාසවා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සාසවා.
1467. Katame dhammā sāsavā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sāsavā.
1468. කතමෙ ධම්‌මා අනාසවා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අනාසවා.
1468. Katame dhammā anāsavā? Cattāro maggā apariyāpannā, cattāri ca sāmaññaphalāni, nibbānañca – ime dhammā anāsavā.
1469. කතමෙ ධම්‌මා ආසවසම්‌පයුත්‌තා? ද්‌වෙ දොමනස්‌සසහගතචිත්‌තුප්‌පාදා එත්‌ථුප්‌පන්‌නං මොහං ඨපෙත්‌වා, විචිකිච්‌ඡාසහගතං උද්‌ධච්‌චසහගතං මොහං ඨපෙත්‌වා, අවසෙසං අකුසලං – ඉමෙ ධම්‌මා ආසවසම්‌පයුත්‌තා.
1469. Katame dhammā āsavasampayuttā? Dve domanassasahagatacittuppādā etthuppannaṃ mohaṃ ṭhapetvā, vicikicchāsahagataṃ uddhaccasahagataṃ mohaṃ ṭhapetvā, avasesaṃ akusalaṃ – ime dhammā āsavasampayuttā.
1470. කතමෙ ධම්‌මා ආසවවිප්‌පයුත්‌තා? ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පන්‌නො මොහො, විචිකිච්‌ඡාසහගතො මොහො, උද්‌ධච්‌චසහගතො මොහො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා ආසවවිප්‌පයුත්‌තා.
1470. Katame dhammā āsavavippayuttā? Dvīsu domanassasahagatesu cittuppādesu uppanno moho, vicikicchāsahagato moho, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā āsavavippayuttā.
1471. කතමෙ ධම්‌මා ආසවා චෙව සාසවා ච? තෙව ආසවා ආසවා චෙව සාසවා ච.
1471. Katame dhammā āsavā ceva sāsavā ca? Teva āsavā āsavā ceva sāsavā ca.
1472. කතමෙ ධම්‌මා සාසවා චෙව නො ච ආසවා? ඨපෙත්‌වා ආසවෙ, අවසෙසං අකුසලං, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සාසවා චෙව නො ච ආසවා. අනාසවා ධම්‌මා න වත්‌තබ්‌බා – ආසවා චෙව සාසවා චාතිපි, සාසවා චෙව නො ච ආසවාතිපි.
1472. Katame dhammā sāsavā ceva no ca āsavā? Ṭhapetvā āsave, avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sāsavā ceva no ca āsavā. Anāsavā dhammā na vattabbā – āsavā ceva sāsavā cātipi, sāsavā ceva no ca āsavātipi.
1473. කතමෙ ධම්‌මා ආසවා චෙව ආසවසම්‌පයුත්‌තා ච? යත්‌ථ ද්‌වෙ තයො ආසවා එකතො උප්‌පජ්‌ජන්‌ති – ඉමෙ ධම්‌මා ආසවා චෙව ආසවසම්‌පයුත්‌තා ච.
1473. Katame dhammā āsavā ceva āsavasampayuttā ca? Yattha dve tayo āsavā ekato uppajjanti – ime dhammā āsavā ceva āsavasampayuttā ca.
1474. කතමෙ ධම්‌මා ආසවසම්‌පයුත්‌තා චෙව නො ච ආසවා? ඨපෙත්‌වා ආසවෙ, අවසෙසං අකුසලං – ඉමෙ ධම්‌මා ආසවසම්‌පයුත්‌තා චෙව නො ච ආසවා. ආසවවිප්‌පයුත්‌තා ධම්‌මා න වත්‌තබ්‌බා – ආසවා චෙව ආසවසම්‌පයුත්‌තා චාතිපි, ආසවසම්‌පයුත්‌තා චෙව නො ච ආසවාතිපි.
1474. Katame dhammā āsavasampayuttā ceva no ca āsavā? Ṭhapetvā āsave, avasesaṃ akusalaṃ – ime dhammā āsavasampayuttā ceva no ca āsavā. Āsavavippayuttā dhammā na vattabbā – āsavā ceva āsavasampayuttā cātipi, āsavasampayuttā ceva no ca āsavātipi.
1475. කතමෙ ධම්‌මා ආසවවිප්‌පයුත්‌තා සාසවා? ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පන්‌නො මොහො, විචිකිච්‌ඡාසහගතො මොහො, උද්‌ධච්‌චසහගතො මොහො, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා ආසවවිප්‌පයුත්‌තා සාසවා.
1475. Katame dhammā āsavavippayuttā sāsavā? Dvīsu domanassasahagatesu cittuppādesu uppanno moho, vicikicchāsahagato moho, uddhaccasahagato moho, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā āsavavippayuttā sāsavā.
1476. කතමෙ ධම්‌මා ආසවවිප්‌පයුත්‌තා අනාසවා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා ආසවවිප්‌පයුත්‌තා අනාසවා. ආසවසම්‌පයුත්‌තා ධම්‌මා න වත්‌තබ්‌බා – ආසවවිප්‌පයුත්‌තා සාසවාතිපි, ආසවවිප්‌පයුත්‌තා අනාසවාතිපි.
1476. Katame dhammā āsavavippayuttā anāsavā? Cattāro maggā apariyāpannā, cattāri ca sāmaññaphalāni, nibbānañca – ime dhammā āsavavippayuttā anāsavā. Āsavasampayuttā dhammā na vattabbā – āsavavippayuttā sāsavātipi, āsavavippayuttā anāsavātipi.
සංයොජනගොච්‌ඡකං
Saṃyojanagocchakaṃ
1477. කතමෙ ධම්‌මා සංයොජනා? දස සංයොජනානි – කාමරාගසංයොජනං, පටිඝසංයොජනං, මානසංයොජනං, දිට්‌ඨිසංයොජනං, විචිකිච්‌ඡාසංයොජනං, සීලබ්‌බතපරාමාසසංයොජනං, භවරාගසංයොජනං, ඉස්‌සාසංයොජනං, මච්‌ඡරියසංයොජනං, අවිජ්‌ජාසංයොජනං. කාමරාගසංයොජනං අට්‌ඨසු ලොභසහගතෙසු චිත්‌තුප්‌පාදෙසු උප්‌පජ්‌ජති. පටිඝසංයොජනං ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පජ්‌ජති. මානසංයොජනං චතූසු දිට්‌ඨිගතවිප්‌පයුත්‌තලොභසහගතෙසු චිත්‌තුප්‌පාදෙසු උප්‌පජ්‌ජති. දිට්‌ඨිසංයොජනං චතූසු දිට්‌ඨිගතසම්‌පයුත්‌තෙසු චිත්‌තුප්‌පාදෙසු උප්‌පජ්‌ජති. විචිකිච්‌ඡාසංයොජනං විචිකිච්‌ඡාසහගතෙසු චිත්‌තුප්‌පාදෙසු උප්‌පජ්‌ජති. සීලබ්‌බතපරාමාසසංයොජනං චතූසු දිට්‌ඨිගතසම්‌පයුත්‌තෙසු චිත්‌තුප්‌පාදෙසු උප්‌පජ්‌ජති. භවරාගසංයොජනං චතූසු දිට්‌ඨිගතවිප්‌පයුත්‌තලොභසහගතෙසු චිත්‌තුප්‌පාදෙසු උප්‌පජ්‌ජති. ඉස්‌සාසංයොජනඤ්‌ච මච්‌ඡරියසංයොජනඤ්‌ච ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පජ්‌ජන්‌ති. අවිජ්‌ජාසංයොජනං සබ්‌බාකුසලෙසු උප්‌පජ්‌ජති – ඉමෙ ධම්‌මා සංයොජනා.
1477. Katame dhammā saṃyojanā? Dasa saṃyojanāni – kāmarāgasaṃyojanaṃ, paṭighasaṃyojanaṃ, mānasaṃyojanaṃ, diṭṭhisaṃyojanaṃ, vicikicchāsaṃyojanaṃ, sīlabbataparāmāsasaṃyojanaṃ, bhavarāgasaṃyojanaṃ, issāsaṃyojanaṃ, macchariyasaṃyojanaṃ, avijjāsaṃyojanaṃ. Kāmarāgasaṃyojanaṃ aṭṭhasu lobhasahagatesu cittuppādesu uppajjati. Paṭighasaṃyojanaṃ dvīsu domanassasahagatesu cittuppādesu uppajjati. Mānasaṃyojanaṃ catūsu diṭṭhigatavippayuttalobhasahagatesu cittuppādesu uppajjati. Diṭṭhisaṃyojanaṃ catūsu diṭṭhigatasampayuttesu cittuppādesu uppajjati. Vicikicchāsaṃyojanaṃ vicikicchāsahagatesu cittuppādesu uppajjati. Sīlabbataparāmāsasaṃyojanaṃ catūsu diṭṭhigatasampayuttesu cittuppādesu uppajjati. Bhavarāgasaṃyojanaṃ catūsu diṭṭhigatavippayuttalobhasahagatesu cittuppādesu uppajjati. Issāsaṃyojanañca macchariyasaṃyojanañca dvīsu domanassasahagatesu cittuppādesu uppajjanti. Avijjāsaṃyojanaṃ sabbākusalesu uppajjati – ime dhammā saṃyojanā.
1478. කතමෙ ධම්‌මා නො සංයොජනා. ඨපෙත්‌වා සංයොජනෙ අවසෙසං අකුසලං, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා නො සංයොජනා.
1478. Katame dhammā no saṃyojanā. Ṭhapetvā saṃyojane avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no saṃyojanā.
1479. කතමෙ ධම්‌මා සංයොජනියා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සංයොජනියා.
1479. Katame dhammā saṃyojaniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojaniyā.
1480. කතමෙ ධම්‌මා අසංයොජනියා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අසංයොජනියා.
1480. Katame dhammā asaṃyojaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃyojaniyā.
1481. කතමෙ ධම්‌මා සංයොජනසම්‌පයුත්‌තා? උද්‌ධච්‌චසහගතං මොහං ඨපෙත්‌වා අවසෙසං අකුසලං – ඉමෙ ධම්‌මා සංයොජනසම්‌පයුත්‌තා.
1481. Katame dhammā saṃyojanasampayuttā? Uddhaccasahagataṃ mohaṃ ṭhapetvā avasesaṃ akusalaṃ – ime dhammā saṃyojanasampayuttā.
1482. කතමෙ ධම්‌මා සංයොජනවිප්‌පයුත්‌තා? උද්‌ධච්‌චසහගතො මොහො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා සංයොජනවිප්‌පයුත්‌තා.
1482. Katame dhammā saṃyojanavippayuttā? Uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā saṃyojanavippayuttā.
1483. කතමෙ ධම්‌මා සංයොජනා චෙව සංයොජනියා ච? තානෙව සංයොජනානි සංයොජනා චෙව සංයොජනියා ච.
1483. Katame dhammā saṃyojanā ceva saṃyojaniyā ca? Tāneva saṃyojanāni saṃyojanā ceva saṃyojaniyā ca.
1484. කතමෙ ධම්‌මා සංයොජනියා චෙව නො ච සංයොජනා? ඨපෙත්‌වා සංයොජනෙ අවසෙසං අකුසලං, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සංයොජනියා චෙව නො ච සංයොජනා. අසංයොජනියා ධම්‌මා න වත්‌තබ්‌බා – සංයොජනා චෙව සංයොජනියා චාතිපි, සංයොජනියා චෙව නො ච සංයොජනාතිපි.
1484. Katame dhammā saṃyojaniyā ceva no ca saṃyojanā? Ṭhapetvā saṃyojane avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojaniyā ceva no ca saṃyojanā. Asaṃyojaniyā dhammā na vattabbā – saṃyojanā ceva saṃyojaniyā cātipi, saṃyojaniyā ceva no ca saṃyojanātipi.
1485. කතමෙ ධම්‌මා සංයොජනා චෙව සංයොජනසම්‌පයුත්‌තා ච? යත්‌ථ ද්‌වෙ තීණි සංයොජනානි එකතො උප්‌පජ්‌ජන්‌ති – ඉමෙ ධම්‌මා සංයොජනා චෙව සංයොජනසම්‌පයුත්‌තා ච.
1485. Katame dhammā saṃyojanā ceva saṃyojanasampayuttā ca? Yattha dve tīṇi saṃyojanāni ekato uppajjanti – ime dhammā saṃyojanā ceva saṃyojanasampayuttā ca.
1486. කතමෙ ධම්‌මා සංයොජනසම්‌පයුත්‌තා චෙව නො ච සංයොජනා? ඨපෙත්‌වා සංයොජනෙ, අවසෙසං අකුසලං – ඉමෙ ධම්‌මා සංයොජනසම්‌පයුත්‌තා චෙව නො ච සංයොජනා. සංයොජනවිප්‌පයුත්‌තා ධම්‌මා න වත්‌තබ්‌බා – සංයොජනා චෙව සංයොජනසම්‌පයුත්‌තා චාතිපි, සංයොජනසම්‌පයුත්‌තා චෙව නො ච සංයොජනාතිපි.
1486. Katame dhammā saṃyojanasampayuttā ceva no ca saṃyojanā? Ṭhapetvā saṃyojane, avasesaṃ akusalaṃ – ime dhammā saṃyojanasampayuttā ceva no ca saṃyojanā. Saṃyojanavippayuttā dhammā na vattabbā – saṃyojanā ceva saṃyojanasampayuttā cātipi, saṃyojanasampayuttā ceva no ca saṃyojanātipi.
1487. කතමෙ ධම්‌මා සංයොජනවිප්‌පයුත්‌තා සංයොජනියා? උද්‌ධච්‌චසහගතො මොහො, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සංයොජනවිප්‌පයුත්‌තා සංයොජනියා.
1487. Katame dhammā saṃyojanavippayuttā saṃyojaniyā? Uddhaccasahagato moho, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃyojanavippayuttā saṃyojaniyā.
1488. කතමෙ ධම්‌මා සංයොජනවිප්‌පයුත්‌තා අසංයොජනියා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා සංයොජනවිප්‌පයුත්‌තා අසංයොජනියා. සංයොජනසම්‌පයුත්‌තා ධම්‌මා න වත්‌තබ්‌බා – සංයොජනවිප්‌පයුත්‌තා සංයොජනියාතිපි, සංයොජනවිප්‌පයුත්‌තා අසංයොජනියාතිපි.
1488. Katame dhammā saṃyojanavippayuttā asaṃyojaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā saṃyojanavippayuttā asaṃyojaniyā. Saṃyojanasampayuttā dhammā na vattabbā – saṃyojanavippayuttā saṃyojaniyātipi, saṃyojanavippayuttā asaṃyojaniyātipi.
ගන්‌ථගොච්‌ඡකං
Ganthagocchakaṃ
1489. කතමෙ ධම්‌මා ගන්‌ථා? චත්‌තාරො ගන්‌ථා – අභිජ්‌ඣාකායගන්‌ථො, බ්‍යාපාදො කායගන්‌ථො, සීලබ්‌බතපරාමාසො කායගන්‌ථො, ඉදංසච්‌චාභිනිවෙසො කායගන්‌ථො. අභිජ්‌ඣාකායගන්‌ථො අට්‌ඨසු ලොභසහගතෙසු චිත්‌තුප්‌පාදෙසු උප්‌පජ්‌ජති. බ්‍යාපාදො කායගන්‌ථො ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පජ්‌ජති. සීලබ්‌බතපරාමාසො කායගන්‌ථො ච ඉදංසච්‌චාභිනිවෙසො කායගන්‌ථො ච චතූසු දිට්‌ඨිගතසම්‌පයුත්‌තෙසු චිත්‌තුප්‌පාදෙසු උප්‌පජ්‌ජන්‌ති – ඉමෙ ධම්‌මා ගන්‌ථා.
1489. Katame dhammā ganthā? Cattāro ganthā – abhijjhākāyagantho, byāpādo kāyagantho, sīlabbataparāmāso kāyagantho, idaṃsaccābhiniveso kāyagantho. Abhijjhākāyagantho aṭṭhasu lobhasahagatesu cittuppādesu uppajjati. Byāpādo kāyagantho dvīsu domanassasahagatesu cittuppādesu uppajjati. Sīlabbataparāmāso kāyagantho ca idaṃsaccābhiniveso kāyagantho ca catūsu diṭṭhigatasampayuttesu cittuppādesu uppajjanti – ime dhammā ganthā.
1490. කතමෙ ධම්‌මා නො ගන්‌ථා? ඨපෙත්‌වා ගන්‌ථෙ, අවසෙසං අකුසලං, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා නො ගන්‌ථා.
1490. Katame dhammā no ganthā? Ṭhapetvā ganthe, avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no ganthā.
1491. කතමෙ ධම්‌මා ගන්‌ථනියා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා ගන්‌ථනියා.
1491. Katame dhammā ganthaniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthaniyā.
1492. කතමෙ ධම්‌මා අගන්‌ථනියා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අගන්‌ථනියා.
1492. Katame dhammā aganthaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā aganthaniyā.
1493. කතමෙ ධම්‌මා ගන්‌ථසම්‌පයුත්‌තා? චත්‌තාරො දිට්‌ඨිගතසම්‌පයුත්‌තචිත්‌තුප්‌පාදා , චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා, එත්‌ථුප්‌පන්‌නං ලොභං ඨපෙත්‌වා, ද්‌වෙ දොමනස්‌සසහගතචිත්‌තුප්‌පාදා, එත්‌ථුප්‌පන්‌නං පටිඝං ඨපෙත්‌වා – ඉමෙ ධම්‌මා ගන්‌ථසම්‌පයුත්‌තා.
1493. Katame dhammā ganthasampayuttā? Cattāro diṭṭhigatasampayuttacittuppādā , cattāro diṭṭhigatavippayuttalobhasahagatacittuppādā, etthuppannaṃ lobhaṃ ṭhapetvā, dve domanassasahagatacittuppādā, etthuppannaṃ paṭighaṃ ṭhapetvā – ime dhammā ganthasampayuttā.
1494. කතමෙ ධම්‌මා ගන්‌ථවිප්‌පයුත්‌තා? චතූසු දිට්‌ඨිගතවිප්‌පයුත්‌තලොභසහගතෙසු චිත්‌තුප්‌පාදෙසු උප්‌පන්‌නො ලොභො, ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පන්‌නං පටිඝං, විචිකිච්‌ඡාසහගතො චිත්‌තුප්‌පාදො, උද්‌ධච්‌චසහගතො චිත්‌තුප්‌පාදො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා ගන්‌ථවිප්‌පයුත්‌තා.
1494. Katame dhammā ganthavippayuttā? Catūsu diṭṭhigatavippayuttalobhasahagatesu cittuppādesu uppanno lobho, dvīsu domanassasahagatesu cittuppādesu uppannaṃ paṭighaṃ, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā ganthavippayuttā.
1495. කතමෙ ධම්‌මා ගන්‌ථා චෙව ගන්‌ථනියා ච? තෙව ගන්‌ථා ගන්‌ථා චෙව ගන්‌ථනියා ච.
1495. Katame dhammā ganthā ceva ganthaniyā ca? Teva ganthā ganthā ceva ganthaniyā ca.
1496. කතමෙ ධම්‌මා ගන්‌ථනියා චෙව නො ච ගන්‌ථා? ඨපෙත්‌වා ගන්‌ථෙ අවසෙසං අකුසලං, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා ගන්‌ථනියා චෙව නො ච ගන්‌ථා. අගන්‌ථනියා ධම්‌මා න වත්‌තබ්‌බා – ගන්‌ථා චෙව ගන්‌ථනියා චාතිපි, ගන්‌ථනියා චෙව නො ච ගන්‌ථාතිපි.
1496. Katame dhammā ganthaniyā ceva no ca ganthā? Ṭhapetvā ganthe avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthaniyā ceva no ca ganthā. Aganthaniyā dhammā na vattabbā – ganthā ceva ganthaniyā cātipi, ganthaniyā ceva no ca ganthātipi.
1497. කතමෙ ධම්‌මා ගන්‌ථා චෙව ගන්‌ථසම්‌පයුත්‌තා ච? යත්‌ථ දිට්‌ඨි ච ලොභො ච එකතො උප්‌පජ්‌ජන්‌ති – ඉමෙ ධම්‌මා ගන්‌ථා චෙව ගන්‌ථසම්‌පයුත්‌තා ච.
1497. Katame dhammā ganthā ceva ganthasampayuttā ca? Yattha diṭṭhi ca lobho ca ekato uppajjanti – ime dhammā ganthā ceva ganthasampayuttā ca.
1498. කතමෙ ධම්‌මා ගන්‌ථසම්‌පයුත්‌තා චෙව නො ච ගන්‌ථා? අට්‌ඨ ලොභසහගතචිත්‌තුප්‌පාදා ද්‌වෙ දොමනස්‌සසහගතචිත්‌තුප්‌පාදා, එත්‌ථුප්‌පන්‌නෙ ගන්‌ථෙ ඨපෙත්‌වා – ඉමෙ ධම්‌මා ගන්‌ථසම්‌පයුත්‌තා චෙව නො ච ගන්‌ථා. ගන්‌ථවිප්‌පයුත්‌තා ධම්‌මා න වත්‌තබ්‌බා – ගන්‌ථා චෙව ගන්‌ථසම්‌පයුත්‌තා චාතිපි, ගන්‌ථසම්‌පයුත්‌තා චෙව නො ච ගන්‌ථාතිපි.
1498. Katame dhammā ganthasampayuttā ceva no ca ganthā? Aṭṭha lobhasahagatacittuppādā dve domanassasahagatacittuppādā, etthuppanne ganthe ṭhapetvā – ime dhammā ganthasampayuttā ceva no ca ganthā. Ganthavippayuttā dhammā na vattabbā – ganthā ceva ganthasampayuttā cātipi, ganthasampayuttā ceva no ca ganthātipi.
1499. කතමෙ ධම්‌මා ගන්‌ථවිප්‌පයුත්‌තා ගන්‌ථනියා? චතූසු දිට්‌ඨිගතවිප්‌පයුත්‌තලොභසහගතෙසු චිත්‌තුප්‌පාදෙසු උප්‌පන්‌නො ලොභො, ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පන්‌නං පටිඝං, විචිකිච්‌ඡාසහගතො චිත්‌තුප්‌පාදො, උද්‌ධච්‌චසහගතො චිත්‌තුප්‌පාදො, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා ගන්‌ථවිප්‌පයුත්‌තා ගන්‌ථනියා.
1499. Katame dhammā ganthavippayuttā ganthaniyā? Catūsu diṭṭhigatavippayuttalobhasahagatesu cittuppādesu uppanno lobho, dvīsu domanassasahagatesu cittuppādesu uppannaṃ paṭighaṃ, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā ganthavippayuttā ganthaniyā.
1500. කතමෙ ධම්‌මා ගන්‌ථවිප්‌පයුත්‌තා අගන්‌ථනියා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා ගන්‌ථවිප්‌පයුත්‌තා අගන්‌ථනියා. ගන්‌ථසම්‌පයුත්‌තා ධම්‌මා න වත්‌තබ්‌බා – ගන්‌ථවිප්‌පයුත්‌තා ගන්‌ථනියාතිපි, ගන්‌ථවිප්‌පයුත්‌තා අගන්‌ථනියාතිපි.
1500. Katame dhammā ganthavippayuttā aganthaniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā ganthavippayuttā aganthaniyā. Ganthasampayuttā dhammā na vattabbā – ganthavippayuttā ganthaniyātipi, ganthavippayuttā aganthaniyātipi.
ඔඝගොච්‌ඡකං
Oghagocchakaṃ
1501. කතමෙ ධම්‌මා ඔඝා…පෙ.….
1501. Katame dhammā oghā…pe….
යොගගොච්‌ඡකං
Yogagocchakaṃ
1502. කතමෙ ධම්‌මා යොගා…පෙ.….
1502. Katame dhammā yogā…pe….
නීවරණගොච්‌ඡකං
Nīvaraṇagocchakaṃ
1503. කතමෙ ධම්‌මා නීවරණා? ඡ නීවරණා – කාමච්‌ඡන්‌දනීවරණං, බ්‍යාපාදනීවරණං, ථිනමිද්‌ධනීවරණං, උද්‌ධච්‌චකුක්‌කුච්‌චනීවරණං, විචිකිච්‌ඡානීවරණං, අවිජ්‌ජානීවරණං . කාමච්‌ඡන්‌දනීවරණං අට්‌ඨසු ලොභසහගතෙසු චිත්‌තුප්‌පාදෙසු උප්‌පජ්‌ජති, බ්‍යාපාදනීවරණං ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පජ්‌ජති, ථිනමිද්‌ධනීවරණං සසඞ්‌ඛාරිකෙසු අකුසලෙසු උප්‌පජ්‌ජති, උද්‌ධච්‌චනීවරණං උද්‌ධච්‌චසහගතෙසු චිත්‌තුප්‌පාදෙසු උප්‌පජ්‌ජති, කුක්‌කුච්‌චනීවරණං ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පජ්‌ජති, විචිකිච්‌ඡානීවරණං විචිකිච්‌ඡාසහගතෙසු චිත්‌තුප්‌පාදෙසු උප්‌පජ්‌ජති, අවිජ්‌ජානීවරණං සබ්‌බාකුසලෙසු උප්‌පජ්‌ජති – ඉමෙ ධම්‌මා නීවරණා.
1503. Katame dhammā nīvaraṇā? Cha nīvaraṇā – kāmacchandanīvaraṇaṃ, byāpādanīvaraṇaṃ, thinamiddhanīvaraṇaṃ, uddhaccakukkuccanīvaraṇaṃ, vicikicchānīvaraṇaṃ, avijjānīvaraṇaṃ . Kāmacchandanīvaraṇaṃ aṭṭhasu lobhasahagatesu cittuppādesu uppajjati, byāpādanīvaraṇaṃ dvīsu domanassasahagatesu cittuppādesu uppajjati, thinamiddhanīvaraṇaṃ sasaṅkhārikesu akusalesu uppajjati, uddhaccanīvaraṇaṃ uddhaccasahagatesu cittuppādesu uppajjati, kukkuccanīvaraṇaṃ dvīsu domanassasahagatesu cittuppādesu uppajjati, vicikicchānīvaraṇaṃ vicikicchāsahagatesu cittuppādesu uppajjati, avijjānīvaraṇaṃ sabbākusalesu uppajjati – ime dhammā nīvaraṇā.
1504. කතමෙ ධම්‌මා නො නීවරණා? ඨපෙත්‌වා නීවරණෙ අවසෙසං අකුසලං, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා නො නීවරණා.
1504. Katame dhammā no nīvaraṇā? Ṭhapetvā nīvaraṇe avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no nīvaraṇā.
1505. කතමෙ ධම්‌මා නීවරණියා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා නීවරණියා.
1505. Katame dhammā nīvaraṇiyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇiyā.
1506. කතමෙ ධම්‌මා අනීවරණියා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අනීවරණියා.
1506. Katame dhammā anīvaraṇiyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anīvaraṇiyā.
1507. කතමෙ ධම්‌මා නීවරණසම්‌පයුත්‌තා? ද්‌වාදස අකුසලචිත්‌තුප්‌පාදා – ඉමෙ ධම්‌මා නීවරණසම්‌පයුත්‌තා.
1507. Katame dhammā nīvaraṇasampayuttā? Dvādasa akusalacittuppādā – ime dhammā nīvaraṇasampayuttā.
1508. කතමෙ ධම්‌මා නීවරණවිප්‌පයුත්‌තා? චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා නීවරණවිප්‌පයුත්‌තා.
1508. Katame dhammā nīvaraṇavippayuttā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā nīvaraṇavippayuttā.
1509. කතමෙ ධම්‌මා නීවරණා චෙව නීවරණියා ච? තානෙව නීවරණානි නීවරණා චෙව නීවරණියා ච.
1509. Katame dhammā nīvaraṇā ceva nīvaraṇiyā ca? Tāneva nīvaraṇāni nīvaraṇā ceva nīvaraṇiyā ca.
1510. කතමෙ ධම්‌මා නීවරණියා චෙව නො ච නීවරණා? ඨපෙත්‌වා නීවරණෙ, අවසෙසං අකුසලං, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා නීවරණියා චෙව නො ච නීවරණා. අනීවරණියා ධම්‌මා න වත්‌තබ්‌බා – නීවරණා චෙව නීවරණියා චාතිපි, නීවරණියා චෙව නො ච නීවරණාතිපි.
1510. Katame dhammā nīvaraṇiyā ceva no ca nīvaraṇā? Ṭhapetvā nīvaraṇe, avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇiyā ceva no ca nīvaraṇā. Anīvaraṇiyā dhammā na vattabbā – nīvaraṇā ceva nīvaraṇiyā cātipi, nīvaraṇiyā ceva no ca nīvaraṇātipi.
1511. කතමෙ ධම්‌මා නීවරණා චෙව නීවරණසම්‌පයුත්‌තා ච? යත්‌ථ ද්‌වෙ තීණි නීවරණානි එකතො උප්‌පජ්‌ජන්‌ති – ඉමෙ ධම්‌මා නීවරණා චෙව නීවරණසම්‌පයුත්‌තා ච.
1511. Katame dhammā nīvaraṇā ceva nīvaraṇasampayuttā ca? Yattha dve tīṇi nīvaraṇāni ekato uppajjanti – ime dhammā nīvaraṇā ceva nīvaraṇasampayuttā ca.
1512. කතමෙ ධම්‌මා නීවරණසම්‌පයුත්‌තා චෙව නො ච නීවරණා? ඨපෙත්‌වා නීවරණෙ, අවසෙසං අකුසලං – ඉමෙ ධම්‌මා නීවරණසම්‌පයුත්‌තා චෙව නො ච නීවරණා. නීවරණවිප්‌පයුත්‌තා ධම්‌මා න වත්‌තබ්‌බා – නීවරණා චෙව නීවරණසම්‌පයුත්‌තා චාතිපි, නීවරණසම්‌පයුත්‌තා චෙව නො ච නීවරණාතිපි.
1512. Katame dhammā nīvaraṇasampayuttā ceva no ca nīvaraṇā? Ṭhapetvā nīvaraṇe, avasesaṃ akusalaṃ – ime dhammā nīvaraṇasampayuttā ceva no ca nīvaraṇā. Nīvaraṇavippayuttā dhammā na vattabbā – nīvaraṇā ceva nīvaraṇasampayuttā cātipi, nīvaraṇasampayuttā ceva no ca nīvaraṇātipi.
1513. කතමෙ ධම්‌මා නීවරණවිප්‌පයුත්‌තා නීවරණියා? තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා නීවරණවිප්‌පයුත්‌තා නීවරණියා.
1513. Katame dhammā nīvaraṇavippayuttā nīvaraṇiyā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā nīvaraṇavippayuttā nīvaraṇiyā.
1514. කතමෙ ධම්‌මා නීවරණවිප්‌පයුත්‌තා අනීවරණියා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා නීවරණවිප්‌පයුත්‌තා අනීවරණියා. නීවරණසම්‌පයුත්‌තා ධම්‌මා න වත්‌තබ්‌බා – නීවරණවිප්‌පයුත්‌තා නීවරණියාතිපි, නීවරණවිප්‌පයුත්‌තා අනීවරණියාතිපි.
1514. Katame dhammā nīvaraṇavippayuttā anīvaraṇiyā? Cattāro maggā apariyāpannā, cattāri ca sāmaññaphalāni, nibbānañca – ime dhammā nīvaraṇavippayuttā anīvaraṇiyā. Nīvaraṇasampayuttā dhammā na vattabbā – nīvaraṇavippayuttā nīvaraṇiyātipi, nīvaraṇavippayuttā anīvaraṇiyātipi.
පරාමාසගොච්‌ඡකං
Parāmāsagocchakaṃ
1515. කතමෙ ධම්‌මා පරාමාසා? දිට්‌ඨිපරාමාසො චතූසු දිට්‌ඨිගතසම්‌පයුත්‌තෙසු චිත්‌තුප්‌පාදෙසු උප්‌පජ්‌ජති – ඉමෙ ධම්‌මා පරාමාසා.
1515. Katame dhammā parāmāsā? Diṭṭhiparāmāso catūsu diṭṭhigatasampayuttesu cittuppādesu uppajjati – ime dhammā parāmāsā.
1516. කතමෙ ධම්‌මා නො පරාමාසා? ඨපෙත්‌වා පරාමාසං අවසෙසං අකුසලං, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා නො පරාමාසා.
1516. Katame dhammā no parāmāsā? Ṭhapetvā parāmāsaṃ avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no parāmāsā.
1517. කතමෙ ධම්‌මා පරාමට්‌ඨා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා පරාමට්‌ඨා.
1517. Katame dhammā parāmaṭṭhā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmaṭṭhā.
1518. කතමෙ ධම්‌මා අපරාමට්‌ඨා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි නිබ්‌බානඤ්‌ච – ඉමෙ ධම්‌මා අපරාමට්‌ඨා.
1518. Katame dhammā aparāmaṭṭhā? Cattāro maggā apariyāpannā, cattāri ca sāmaññaphalāni nibbānañca – ime dhammā aparāmaṭṭhā.
1519. කතමෙ ධම්‌මා පරාමාසසම්‌පයුත්‌තා? චත්‌තාරො දිට්‌ඨිගතසම්‌පයුත්‌තචිත්‌තුප්‌පාදා, එත්‌ථුප්‌පන්‌නං පරාමාසං ඨපෙත්‌වා – ඉමෙ ධම්‌මා පරාමාසසම්‌පයුත්‌තා.
1519. Katame dhammā parāmāsasampayuttā? Cattāro diṭṭhigatasampayuttacittuppādā, etthuppannaṃ parāmāsaṃ ṭhapetvā – ime dhammā parāmāsasampayuttā.
1520. කතමෙ ධම්‌මා පරාමාසවිප්‌පයුත්‌තා? චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා , ද්‌වෙ දොමනස්‌සසහගතචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො, උද්‌ධච්‌චසහගතො චිත්‌තුප්‌පාදො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා පරාමාසවිප්‌පයුත්‌තා. පරාමාසො න වත්‌තබ්‌බො – පරාමාසසම්‌පයුත්‌තොතිපි, පරාමාසවිප්‌පයුත්‌තොතිපි.
1520. Katame dhammā parāmāsavippayuttā? Cattāro diṭṭhigatavippayuttalobhasahagatacittuppādā , dve domanassasahagatacittuppādā, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā parāmāsavippayuttā. Parāmāso na vattabbo – parāmāsasampayuttotipi, parāmāsavippayuttotipi.
1521. කතමෙ ධම්‌මා පරාමාසා චෙව පරාමට්‌ඨා ච? සො එව පරාමාසො පරාමාසො චෙව පරාමට්‌ඨො ච.
1521. Katame dhammā parāmāsā ceva parāmaṭṭhā ca? So eva parāmāso parāmāso ceva parāmaṭṭho ca.
1522. කතමෙ ධම්‌මා පරාමට්‌ඨා චෙව නො ච පරාමාසා? ඨපෙත්‌වා පරාමාසං අවසෙසං අකුසලං, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා පරාමට්‌ඨා චෙව නො ච පරාමාසා. අපරාමට්‌ඨා ධම්‌මා න වත්‌තබ්‌බා – පරාමාසා චෙව පරාමට්‌ඨා චාතිපි, පරාමට්‌ඨා චෙව නො ච පරාමාසාතිපි.
1522. Katame dhammā parāmaṭṭhā ceva no ca parāmāsā? Ṭhapetvā parāmāsaṃ avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmaṭṭhā ceva no ca parāmāsā. Aparāmaṭṭhā dhammā na vattabbā – parāmāsā ceva parāmaṭṭhā cātipi, parāmaṭṭhā ceva no ca parāmāsātipi.
1523. කතමෙ ධම්‌මා පරාමාසවිප්‌පයුත්‌තා පරාමට්‌ඨා? චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා, ද්‌වෙ දොමනස්‌සසහගතචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො, උද්‌ධච්‌චසහගතො චිත්‌තුප්‌පාදො, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා පරාමාසවිප්‌පයුත්‌තා පරාමට්‌ඨා.
1523. Katame dhammā parāmāsavippayuttā parāmaṭṭhā? Cattāro diṭṭhigatavippayuttalobhasahagatacittuppādā, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā parāmāsavippayuttā parāmaṭṭhā.
1524. කතමෙ ධම්‌මා පරාමාසවිප්‌පයුත්‌තා අපරාමට්‌ඨා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා පරාමාසවිප්‌පයුත්‌තා අපරාමට්‌ඨා. පරාමාසා ච පරාමාසසම්‌පයුත්‌තා ච ධම්‌මා න වත්‌තබ්‌බා – පරාමාසවිප්‌පයුත්‌තා පරාමට්‌ඨාතිපි, පරාමාසවිප්‌පයුත්‌තා අපරාමට්‌ඨාතිපි.
1524. Katame dhammā parāmāsavippayuttā aparāmaṭṭhā? Cattāro maggā apariyāpannā, cattāri ca sāmaññaphalāni, nibbānañca – ime dhammā parāmāsavippayuttā aparāmaṭṭhā. Parāmāsā ca parāmāsasampayuttā ca dhammā na vattabbā – parāmāsavippayuttā parāmaṭṭhātipi, parāmāsavippayuttā aparāmaṭṭhātipi.
මහන්‌තරදුකං
Mahantaradukaṃ
1525. කතමෙ ධම්‌මා සාරම්‌මණා? චතූසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං – ඉමෙ ධම්‌මා සාරම්‌මණා.
1525. Katame dhammā sārammaṇā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ – ime dhammā sārammaṇā.
1526. කතමෙ ධම්‌මා අනාරම්‌මණා? රූපඤ්‌ච, නිබ්‌බානඤ්‌ච – ඉමෙ ධම්‌මා අනාරම්‌මණා.
1526. Katame dhammā anārammaṇā? Rūpañca, nibbānañca – ime dhammā anārammaṇā.
1527. කතමෙ ධම්‌මා චිත්‌තා? චක්‌ඛුවිඤ්‌ඤාණං, සොතවිඤ්‌ඤාණං, ඝානවිඤ්‌ඤාණං, ජිව්‌හාවිඤ්‌ඤාණං, කායවිඤ්‌ඤාණං, මනොධාතු, මනොවිඤ්‌ඤාණධාතු – ඉමෙ ධම්‌මා චිත්‌තා.
1527. Katame dhammā cittā? Cakkhuviññāṇaṃ, sotaviññāṇaṃ, ghānaviññāṇaṃ, jivhāviññāṇaṃ, kāyaviññāṇaṃ, manodhātu, manoviññāṇadhātu – ime dhammā cittā.
1528. කතමෙ ධම්‌මා නො චිත්‌තා? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො, රූපඤ්‌ච, නිබ්‌බානඤ්‌ච – ඉමෙ ධම්‌මා නො චිත්‌තා.
1528. Katame dhammā no cittā? Vedanākkhandho, saññākkhandho, saṅkhārakkhandho, rūpañca, nibbānañca – ime dhammā no cittā.
1529. කතමෙ ධම්‌මා චෙතසිකා? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො – ඉමෙ ධම්‌මා චෙතසිකා.
1529. Katame dhammā cetasikā? Vedanākkhandho, saññākkhandho, saṅkhārakkhandho – ime dhammā cetasikā.
1530. කතමෙ ධම්‌මා අචෙතසිකා? චිත්‌තඤ්‌ච, රූපඤ්‌ච, නිබ්‌බානඤ්‌ච – ඉමෙ ධම්‌මා අචෙතසිකා.
1530. Katame dhammā acetasikā? Cittañca, rūpañca, nibbānañca – ime dhammā acetasikā.
1531. කතමෙ ධම්‌මා චිත්‌තසම්‌පයුත්‌තා? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො – ඉමෙ ධම්‌මා චිත්‌තසම්‌පයුත්‌තා.
1531. Katame dhammā cittasampayuttā? Vedanākkhandho, saññākkhandho, saṅkhārakkhandho – ime dhammā cittasampayuttā.
1532. කතමෙ ධම්‌මා චිත්‌තවිප්‌පයුත්‌තා? රූපඤ්‌ච, නිබ්‌බානඤ්‌ච – ඉමෙ ධම්‌මා චිත්‌තවිප්‌පයුත්‌තා. චිත්‌තං න වත්‌තබ්‌බං – චිත්‌තෙන සම්‌පයුත්‌තන්‌තිපි, චිත්‌තෙන විප්‌පයුත්‌තන්‌තිපි.
1532. Katame dhammā cittavippayuttā? Rūpañca, nibbānañca – ime dhammā cittavippayuttā. Cittaṃ na vattabbaṃ – cittena sampayuttantipi, cittena vippayuttantipi.
1533. කතමෙ ධම්‌මා චිත්‌තසංසට්‌ඨා? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො – ඉමෙ ධම්‌මා චිත්‌තසංසට්‌ඨා.
1533. Katame dhammā cittasaṃsaṭṭhā? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhā.
1534. කතමෙ ධම්‌මා චිත්‌තවිසංසට්‌ඨා? රූපඤ්‌ච, නිබ්‌බානඤ්‌ච – ඉමෙ ධම්‌මා චිත්‌තවිසංසට්‌ඨා. චිත්‌තං න වත්‌තබ්‌බං – චිත්‌තෙන සංසට්‌ඨන්‌තිපි, චිත්‌තෙන විසංසට්‌ඨන්‌තිපි.
1534. Katame dhammā cittavisaṃsaṭṭhā? Rūpañca, nibbānañca – ime dhammā cittavisaṃsaṭṭhā. Cittaṃ na vattabbaṃ – cittena saṃsaṭṭhantipi, cittena visaṃsaṭṭhantipi.
1535. කතමෙ ධම්‌මා චිත්‌තසමුට්‌ඨානා? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො, කායවිඤ්‌ඤත්‌ති, වචීවිඤ්‌ඤත්‌ති, යං වා පනඤ්‌ඤම්‌පි අත්‌ථි රූපං චිත්‌තජං චිත්‌තහෙතුකං චිත්‌තසමුට්‌ඨානං – රූපායතනං සද්‌දායතනං ගන්‌ධායතනං රසායතනං ඵොට්‌ඨබ්‌බායතනං ආකාසධාතු ආපොධාතු රූපස්‌ස ලහුතා රූපස්‌ස මුදුතා රූපස්‌ස කම්‌මඤ්‌ඤතා රූපස්‌ස උපචයො රූපස්‌ස සන්‌තති කබළීකාරො ආහාරො – ඉමෙ ධම්‌මා චිත්‌තසමුට්‌ඨානා.
1535. Katame dhammā cittasamuṭṭhānā? Vedanākkhandho, saññākkhandho, saṅkhārakkhandho, kāyaviññatti, vacīviññatti, yaṃ vā panaññampi atthi rūpaṃ cittajaṃ cittahetukaṃ cittasamuṭṭhānaṃ – rūpāyatanaṃ saddāyatanaṃ gandhāyatanaṃ rasāyatanaṃ phoṭṭhabbāyatanaṃ ākāsadhātu āpodhātu rūpassa lahutā rūpassa mudutā rūpassa kammaññatā rūpassa upacayo rūpassa santati kabaḷīkāro āhāro – ime dhammā cittasamuṭṭhānā.
1536. කතමෙ ධම්‌මා නො චිත්‌තසමුට්‌ඨානා? චිත්‌තඤ්‌ච, අවසෙසඤ්‌ච රූපං, නිබ්‌බානඤ්‌ච – ඉමෙ ධම්‌මා නො චිත්‌තසමුට්‌ඨානා.
1536. Katame dhammā no cittasamuṭṭhānā? Cittañca, avasesañca rūpaṃ, nibbānañca – ime dhammā no cittasamuṭṭhānā.
1537. කතමෙ ධම්‌මා චිත්‌තසහභුනො? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො, කායවිඤ්‌ඤත්‌ති, වචීවිඤ්‌ඤත්‌ති – ඉමෙ ධම්‌මා චිත්‌තසහභුනො.
1537. Katame dhammā cittasahabhuno? Vedanākkhandho, saññākkhandho, saṅkhārakkhandho, kāyaviññatti, vacīviññatti – ime dhammā cittasahabhuno.
1538. කතමෙ ධම්‌මා නො චිත්‌තසහභුනො? චිත්‌තඤ්‌ච, අවසෙසඤ්‌ච රූපං, නිබ්‌බානඤ්‌ච – ඉමෙ ධම්‌මා නො චිත්‌තසහභුනො.
1538. Katame dhammā no cittasahabhuno? Cittañca, avasesañca rūpaṃ, nibbānañca – ime dhammā no cittasahabhuno.
1539. කතමෙ ධම්‌මා චිත්‌තානුපරිවත්‌තිනො? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො, කායවිඤ්‌ඤත්‌ති, වචීවිඤ්‌ඤත්‌ති – ඉමෙ ධම්‌මා චිත්‌තානුපරිවත්‌තිනො.
1539. Katame dhammā cittānuparivattino? Vedanākkhandho, saññākkhandho, saṅkhārakkhandho, kāyaviññatti, vacīviññatti – ime dhammā cittānuparivattino.
1540. කතමෙ ධම්‌මා නො චිත්‌තානුපරිවත්‌තිනො? චිත්‌තඤ්‌ච, අවසෙසඤ්‌ච රූපං, නිබ්‌බානඤ්‌ච – ඉමෙ ධම්‌මා නො චිත්‌තානුපරිවත්‌තිනො.
1540. Katame dhammā no cittānuparivattino? Cittañca, avasesañca rūpaṃ, nibbānañca – ime dhammā no cittānuparivattino.
1541. කතමෙ ධම්‌මා චිත්‌තසංසට්‌ඨසමුට්‌ඨානා? වෙදනාක්‌ඛන්‌ධො , සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො – ඉමෙ ධම්‌මා චිත්‌තසංසට්‌ඨසමුට්‌ඨානා.
1541. Katame dhammā cittasaṃsaṭṭhasamuṭṭhānā? Vedanākkhandho , saññākkhandho, saṅkhārakkhandho – ime dhammā cittasaṃsaṭṭhasamuṭṭhānā.
1542. කතමෙ ධම්‌මා නො චිත්‌තසංසට්‌ඨසමුට්‌ඨානා? චිත්‌තඤ්‌ච, රූපඤ්‌ච, නිබ්‌බානඤ්‌ච – ඉමෙ ධම්‌මා නො චිත්‌තසංසට්‌ඨසමුට්‌ඨානා.
1542. Katame dhammā no cittasaṃsaṭṭhasamuṭṭhānā? Cittañca, rūpañca, nibbānañca – ime dhammā no cittasaṃsaṭṭhasamuṭṭhānā.
1543. කතමෙ ධම්‌මා චිත්‌තසංසට්‌ඨසමුට්‌ඨානසහභුනො? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො – ඉමෙ ධම්‌මා චිත්‌තසංසට්‌ඨසමුට්‌ඨානසහභුනො.
1543. Katame dhammā cittasaṃsaṭṭhasamuṭṭhānasahabhuno? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhasamuṭṭhānasahabhuno.
1544. කතමෙ ධම්‌මා නො චිත්‌තසංසට්‌ඨසමුට්‌ඨානසහභුනො? චිත්‌තඤ්‌ච, රූපඤ්‌ච , නිබ්‌බානඤ්‌ච – ඉමෙ ධම්‌මා නො චිත්‌තසංසට්‌ඨසමුට්‌ඨානසහභුනො.
1544. Katame dhammā no cittasaṃsaṭṭhasamuṭṭhānasahabhuno? Cittañca, rūpañca , nibbānañca – ime dhammā no cittasaṃsaṭṭhasamuṭṭhānasahabhuno.
1545. කතමෙ ධම්‌මා චිත්‌තසංසට්‌ඨසමුට්‌ඨානානුපරිවත්‌තිනො? වෙදනාක්‌ඛන්‌ධො, සඤ්‌ඤාක්‌ඛන්‌ධො, සඞ්‌ඛාරක්‌ඛන්‌ධො – ඉමෙ ධම්‌මා චිත්‌තසංසට්‌ඨසමුට්‌ඨානානුපරිවත්‌තිනො.
1545. Katame dhammā cittasaṃsaṭṭhasamuṭṭhānānuparivattino? Vedanākkhandho, saññākkhandho, saṅkhārakkhandho – ime dhammā cittasaṃsaṭṭhasamuṭṭhānānuparivattino.
1546. කතමෙ ධම්‌මා නො චිත්‌තසංසට්‌ඨසමුට්‌ඨානානුපරිවත්‌තිනො? චිත්‌තඤ්‌ච, රූපඤ්‌ච, නිබ්‌බානඤ්‌ච – ඉමෙ ධම්‌මා නො චිත්‌තසංසට්‌ඨසමුට්‌ඨානානුපරිවත්‌තිනො.
1546. Katame dhammā no cittasaṃsaṭṭhasamuṭṭhānānuparivattino? Cittañca, rūpañca, nibbānañca – ime dhammā no cittasaṃsaṭṭhasamuṭṭhānānuparivattino.
1547. කතමෙ ධම්‌මා අජ්‌ඣත්‌තිකා? චක්‌ඛායතනං…පෙ.… මනායතනං – ඉමෙ ධම්‌මා අජ්‌ඣත්‌තිකා.
1547. Katame dhammā ajjhattikā? Cakkhāyatanaṃ…pe… manāyatanaṃ – ime dhammā ajjhattikā.
1548. කතමෙ ධම්‌මා බාහිරා? රූපායතනං…පෙ.… ධම්‌මායතනං – ඉමෙ ධම්‌මා බාහිරා.
1548. Katame dhammā bāhirā? Rūpāyatanaṃ…pe… dhammāyatanaṃ – ime dhammā bāhirā.
1549. කතමෙ ධම්‌මා උපාදා? චක්‌ඛායතනං…පෙ.… කබළීකාරො ආහාරො – ඉමෙ ධම්‌මා උපාදා.
1549. Katame dhammā upādā? Cakkhāyatanaṃ…pe… kabaḷīkāro āhāro – ime dhammā upādā.
1550. කතමෙ ධම්‌මා නො උපාදා? චතූසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං, චත්‌තාරො ච මහාභූතා, නිබ්‌බානඤ්‌ච – ඉමෙ ධම්‌මා නො උපාදා.
1550. Katame dhammā no upādā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, cattāro ca mahābhūtā, nibbānañca – ime dhammā no upādā.
1551. කතමෙ ධම්‌මා උපාදිණ්‌ණා? තීසු භූමීසු විපාකො, යඤ්‌ච රූපං කම්‌මස්‌ස කතත්‌තා – ඉමෙ ධම්‌මා උපාදිණ්‌ණා.
1551. Katame dhammā upādiṇṇā? Tīsu bhūmīsu vipāko, yañca rūpaṃ kammassa katattā – ime dhammā upādiṇṇā.
1552. කතමෙ ධම්‌මා අනුපාදිණ්‌ණා? තීසු භූමීසු කුසලං, අකුසලං, තීසු භූමීසු කිරියාබ්‍යාකතං, යඤ්‌ච රූපං න කම්‌මස්‌ස කතත්‌තා, චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අනුපාදිණ්‌ණා.
1552. Katame dhammā anupādiṇṇā? Tīsu bhūmīsu kusalaṃ, akusalaṃ, tīsu bhūmīsu kiriyābyākataṃ, yañca rūpaṃ na kammassa katattā, cattāro maggā apariyāpannā, cattāri ca sāmaññaphalāni, nibbānañca – ime dhammā anupādiṇṇā.
උපාදානගොච්‌ඡකං
Upādānagocchakaṃ
1553. කතමෙ ධම්‌මා උපාදානා? චත්‌තාරි උපාදානානි – කාමුපාදානං , දිට්‌ඨුපාදානං, සීලබ්‌බතුපාදානං, අත්‌තවාදුපාදානං. කාමුපාදානං අට්‌ඨසු ලොභසහගතෙසු චිත්‌තුප්‌පාදෙසු උප්‌පජ්‌ජති. දිට්‌ඨුපාදානඤ්‌ච සීලබ්‌බතුපාදානඤ්‌ච අත්‌තවාදුපාදානඤ්‌ච චතූසු දිට්‌ඨිගතසම්‌පයුත්‌තෙසු චිත්‌තුප්‌පාදෙසු උප්‌පජ්‌ජන්‌ති – ඉමෙ ධම්‌මා උපාදානා.
1553. Katame dhammā upādānā? Cattāri upādānāni – kāmupādānaṃ , diṭṭhupādānaṃ, sīlabbatupādānaṃ, attavādupādānaṃ. Kāmupādānaṃ aṭṭhasu lobhasahagatesu cittuppādesu uppajjati. Diṭṭhupādānañca sīlabbatupādānañca attavādupādānañca catūsu diṭṭhigatasampayuttesu cittuppādesu uppajjanti – ime dhammā upādānā.
1554. කතමෙ ධම්‌මා නො උපාදානා? ඨපෙත්‌වා උපාදානෙ අවසෙසං අකුසලං, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා නො උපාදානා.
1554. Katame dhammā no upādānā? Ṭhapetvā upādāne avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no upādānā.
1555. කතමෙ ධම්‌මා උපාදානියා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා උපාදානියා.
1555. Katame dhammā upādāniyā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādāniyā.
1556. කතමෙ ධම්‌මා අනුපාදානියා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අනුපාදානියා.
1556. Katame dhammā anupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā anupādāniyā.
1557. කතමෙ ධම්‌මා උපාදානසම්‌පයුත්‌තා? චත්‌තාරො දිට්‌ඨිගතසම්‌පයුත්‌තලොභසහගතචිත්‌තුප්‌පාදා, චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා, එත්‌ථුප්‌පන්‌නං ලොභං ඨපෙත්‌වා – ඉමෙ ධම්‌මා උපාදානසම්‌පයුත්‌තා.
1557. Katame dhammā upādānasampayuttā? Cattāro diṭṭhigatasampayuttalobhasahagatacittuppādā, cattāro diṭṭhigatavippayuttalobhasahagatacittuppādā, etthuppannaṃ lobhaṃ ṭhapetvā – ime dhammā upādānasampayuttā.
1558. කතමෙ ධම්‌මා උපාදානවිප්‌පයුත්‌තා? චතූසු දිට්‌ඨිගතවිප්‌පයුත්‌තලොභසහගතෙසු චිත්‌තුප්‌පාදෙසු උප්‌පන්‌නො ලොභො, ද්‌වෙ දොමනස්‌සසහගතචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො, උද්‌ධච්‌චසහගතො චිත්‌තුප්‌පාදො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා උපාදානවිප්‌පයුත්‌තා.
1558. Katame dhammā upādānavippayuttā? Catūsu diṭṭhigatavippayuttalobhasahagatesu cittuppādesu uppanno lobho, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā upādānavippayuttā.
1559. කතමෙ ධම්‌මා උපාදානා චෙව උපාදානියා ච? තානෙව උපාදානානි උපාදානා චෙව උපාදානියා ච.
1559. Katame dhammā upādānā ceva upādāniyā ca? Tāneva upādānāni upādānā ceva upādāniyā ca.
1560. කතමෙ ධම්‌මා උපාදානියා චෙව නො ච උපාදානා? ඨපෙත්‌වා උපාදානෙ අවසෙසං අකුසලං, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා උපාදානියා චෙව නො ච උපාදානා . අනුපාදානියා ධම්‌මා න වත්‌තබ්‌බා – උපාදානා චෙව උපාදානියා චාතිපි, උපාදානියා චෙව නො ච උපාදානාතිපි.
1560. Katame dhammā upādāniyā ceva no ca upādānā? Ṭhapetvā upādāne avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādāniyā ceva no ca upādānā . Anupādāniyā dhammā na vattabbā – upādānā ceva upādāniyā cātipi, upādāniyā ceva no ca upādānātipi.
1561. කතමෙ ධම්‌මා උපාදානා චෙව උපාදානසම්‌පයුත්‌තා ච? යත්‌ථ දිට්‌ඨි ච ලොභො ච එකතො උප්‌පජ්‌ජන්‌ති – ඉමෙ ධම්‌මා උපාදානා චෙව උපාදානසම්‌පයුත්‌තා ච.
1561. Katame dhammā upādānā ceva upādānasampayuttā ca? Yattha diṭṭhi ca lobho ca ekato uppajjanti – ime dhammā upādānā ceva upādānasampayuttā ca.
1562. කතමෙ ධම්‌මා උපාදානසම්‌පයුත්‌තා චෙව නො ච උපාදානා? අට්‌ඨ ලොභසහගතචිත්‌තුප්‌පාදා, එත්‌ථුප්‌පන්‌නෙ උපාදානෙ ඨපෙත්‌වා – ඉමෙ ධම්‌මා උපාදානසම්‌පයුත්‌තා චෙව නො ච උපාදානා. උපාදානවිප්‌පයුත්‌තා ධම්‌මා න වත්‌තබ්‌බා – උපාදානා චෙව උපාදානසම්‌පයුත්‌තා චාතිපි, උපාදානසම්‌පයුත්‌තා චෙව නො ච උපාදානාතිපි.
1562. Katame dhammā upādānasampayuttā ceva no ca upādānā? Aṭṭha lobhasahagatacittuppādā, etthuppanne upādāne ṭhapetvā – ime dhammā upādānasampayuttā ceva no ca upādānā. Upādānavippayuttā dhammā na vattabbā – upādānā ceva upādānasampayuttā cātipi, upādānasampayuttā ceva no ca upādānātipi.
1563. කතමෙ ධම්‌මා උපාදානවිප්‌පයුත්‌තා උපාදානියා? චතූසු දිට්‌ඨිගතවිප්‌පයුත්‌තලොභසහගතෙසු චිත්‌තුප්‌පාදෙසු උප්‌පන්‌නො ලොභො, ද්‌වෙ දොමනස්‌සසහගතචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො, උද්‌ධච්‌චසහගතො චිත්‌තුප්‌පාදො, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා උපාදානවිප්‌පයුත්‌තා උපාදානියා.
1563. Katame dhammā upādānavippayuttā upādāniyā? Catūsu diṭṭhigatavippayuttalobhasahagatesu cittuppādesu uppanno lobho, dve domanassasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā upādānavippayuttā upādāniyā.
1564. කතමෙ ධම්‌මා උපාදානවිප්‌පයුත්‌තා අනුපාදානියා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා උපාදානවිප්‌පයුත්‌තා අනුපාදානියා. උපාදානසම්‌පයුත්‌තා ධම්‌මා න වත්‌තබ්‌බා – උපාදානවිප්‌පයුත්‌තා උපාදානියාතිපි, උපාදානවිප්‌පයුත්‌තා අනුපාදානියාතිපි.
1564. Katame dhammā upādānavippayuttā anupādāniyā? Cattāro maggā apariyāpannā, cattāri ca sāmaññaphalāni, nibbānañca – ime dhammā upādānavippayuttā anupādāniyā. Upādānasampayuttā dhammā na vattabbā – upādānavippayuttā upādāniyātipi, upādānavippayuttā anupādāniyātipi.
කිලෙසගොච්‌ඡකං
Kilesagocchakaṃ
1565. කතමෙ ධම්‌මා කිලෙසා? දස කිලෙසවත්‌ථූනි – ලොභො, දොසො, මොහො, මානො, දිට්‌ඨි, විචිකිච්‌ඡා, ථිනං, උද්‌ධච්‌චං, අහිරිකං, අනොත්‌තප්‌පං. ලොභො අට්‌ඨසු ලොභසහගතෙසු චිත්‌තුප්‌පාදෙසු උප්‌පජ්‌ජති. දොසො ද්‌වීසු දොමනස්‌සසහගතෙසු චිත්‌තුප්‌පාදෙසු උප්‌පජ්‌ජති. මොහො සබ්‌බාකුසලෙසු උප්‌පජ්‌ජති. මානො චතූසු දිට්‌ඨිගතවිප්‌පයුත්‌තලොභසහගතෙසු චිත්‌තුප්‌පාදෙසු උප්‌පජ්‌ජති. දිට්‌ඨි චතූසු දිට්‌ඨිගතසම්‌පයුත්‌තෙසු චිත්‌තුප්‌පාදෙසු උප්‌පජ්‌ජති. විචිකිච්‌ඡා විචිකිච්‌ඡාසහගතෙසු චිත්‌තුප්‌පාදෙසු උප්‌පජ්‌ජති. ථිනං සසඞ්‌ඛාරිකෙසු අකුසලෙසු උප්‌පජ්‌ජති. උද්‌ධච්‌චඤ්‌ච අහිරිකඤ්‌ච අනොත්‌තප්‌පඤ්‌ච සබ්‌බාකුසලෙසු උප්‌පජ්‌ජන්‌ති – ඉමෙ ධම්‌මා කිලෙසා.
1565. Katame dhammā kilesā? Dasa kilesavatthūni – lobho, doso, moho, māno, diṭṭhi, vicikicchā, thinaṃ, uddhaccaṃ, ahirikaṃ, anottappaṃ. Lobho aṭṭhasu lobhasahagatesu cittuppādesu uppajjati. Doso dvīsu domanassasahagatesu cittuppādesu uppajjati. Moho sabbākusalesu uppajjati. Māno catūsu diṭṭhigatavippayuttalobhasahagatesu cittuppādesu uppajjati. Diṭṭhi catūsu diṭṭhigatasampayuttesu cittuppādesu uppajjati. Vicikicchā vicikicchāsahagatesu cittuppādesu uppajjati. Thinaṃ sasaṅkhārikesu akusalesu uppajjati. Uddhaccañca ahirikañca anottappañca sabbākusalesu uppajjanti – ime dhammā kilesā.
1566. කතමෙ ධම්‌මා නො කිලෙසා? ඨපෙත්‌වා කිලෙසෙ අවසෙසං අකුසලං, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා නො කිලෙසා.
1566. Katame dhammā no kilesā? Ṭhapetvā kilese avasesaṃ akusalaṃ, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā no kilesā.
1567. කතමෙ ධම්‌මා සංකිලෙසිකා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං සබ්‌බඤ්‌ච රූපං – ඉමෙ ධම්‌මා සංකිලෙසිකා.
1567. Katame dhammā saṃkilesikā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ sabbañca rūpaṃ – ime dhammā saṃkilesikā.
1568. කතමෙ ධම්‌මා අසංකිලෙසිකා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අසංකිලෙසිකා.
1568. Katame dhammā asaṃkilesikā? Cattāro maggā apariyāpannā, cattāri ca sāmaññaphalāni, nibbānañca – ime dhammā asaṃkilesikā.
1569. කතමෙ ධම්‌මා සංකිලිට්‌ඨා? ද්‌වාදස අකුසලචිත්‌තුප්‌පාදා – ඉමෙ ධම්‌මා සංකිලිට්‌ඨා.
1569. Katame dhammā saṃkiliṭṭhā? Dvādasa akusalacittuppādā – ime dhammā saṃkiliṭṭhā.
1570. කතමෙ ධම්‌මා අසංකිලිට්‌ඨා? චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා අසංකිලිට්‌ඨා.
1570. Katame dhammā asaṃkiliṭṭhā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā asaṃkiliṭṭhā.
1571. කතමෙ ධම්‌මා කිලෙසසම්‌පයුත්‌තා? ද්‌වාදස අකුසලචිත්‌තුප්‌පාදා – ඉමෙ ධම්‌මා කිලෙසසම්‌පයුත්‌තා.
1571. Katame dhammā kilesasampayuttā? Dvādasa akusalacittuppādā – ime dhammā kilesasampayuttā.
1572. කතමෙ ධම්‌මා කිලෙසවිප්‌පයුත්‌තා? චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා කිලෙසවිප්‌පයුත්‌තා.
1572. Katame dhammā kilesavippayuttā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā kilesavippayuttā.
1573. කතමෙ ධම්‌මා කිලෙසා චෙව සංකිලෙසිකා ච? තෙව කිලෙසා කිලෙසා චෙව සංකිලෙසිකා ච.
1573. Katame dhammā kilesā ceva saṃkilesikā ca? Teva kilesā kilesā ceva saṃkilesikā ca.
1574. කතමෙ ධම්‌මා සංකිලෙසිකා චෙව නො ච කිලෙසා? ඨපෙත්‌වා කිලෙසෙ අවසෙසං අකුසලං, තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සංකිලෙසිකා චෙව නො ච කිලෙසා. අසංකිලෙසිකා ධම්‌මා න වත්‌තබ්‌බා – කිලෙසා චෙව සංකිලෙසිකා චාතිපි, සංකිලෙසිකා චෙව නො ච කිලෙසාතිපි.
1574. Katame dhammā saṃkilesikā ceva no ca kilesā? Ṭhapetvā kilese avasesaṃ akusalaṃ, tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā saṃkilesikā ceva no ca kilesā. Asaṃkilesikā dhammā na vattabbā – kilesā ceva saṃkilesikā cātipi, saṃkilesikā ceva no ca kilesātipi.
1575. කතමෙ ධම්‌මා කිලෙසා චෙව සංකිලිට්‌ඨා ච? තෙව කිලෙසා කිලෙසා චෙව සංකිලිට්‌ඨා ච.
1575. Katame dhammā kilesā ceva saṃkiliṭṭhā ca? Teva kilesā kilesā ceva saṃkiliṭṭhā ca.
1576. කතමෙ ධම්‌මා සංකිලිට්‌ඨා චෙව නො ච කිලෙසා? ඨපෙත්‌වා කිලෙසෙ අවසෙසං අකුසලං – ඉමෙ ධම්‌මා සංකිලිට්‌ඨා චෙව නො ච කිලෙසා . අසංකිලිට්‌ඨා ධම්‌මා න වත්‌තබ්‌බා – කිලෙසා චෙව සංකිලිට්‌ඨා චාතිපි, සංකිලිට්‌ඨා චෙව නො ච කිලෙසාතිපි.
1576. Katame dhammā saṃkiliṭṭhā ceva no ca kilesā? Ṭhapetvā kilese avasesaṃ akusalaṃ – ime dhammā saṃkiliṭṭhā ceva no ca kilesā . Asaṃkiliṭṭhā dhammā na vattabbā – kilesā ceva saṃkiliṭṭhā cātipi, saṃkiliṭṭhā ceva no ca kilesātipi.
1577. කතමෙ ධම්‌මා කිලෙසා චෙව කිලෙසසම්‌පයුත්‌තා ච? යත්‌ථ ද්‌වෙ තයො කිලෙසා එකතො උප්‌පජ්‌ජන්‌ති – ඉමෙ ධම්‌මා කිලෙසා චෙව කිලෙසසම්‌පයුත්‌තා ච.
1577. Katame dhammā kilesā ceva kilesasampayuttā ca? Yattha dve tayo kilesā ekato uppajjanti – ime dhammā kilesā ceva kilesasampayuttā ca.
1578. කතමෙ ධම්‌මා කිලෙසසම්‌පයුත්‌තා චෙව නො ච කිලෙසා? ඨපෙත්‌වා කිලෙසෙ අවසෙසං අකුසලං – ඉමෙ ධම්‌මා කිලෙසසම්‌පයුත්‌තා චෙව නො ච කිලෙසා. කිලෙසවිප්‌පයුත්‌තා ධම්‌මා න වත්‌තබ්‌බා – කිලෙසා චෙව කිලෙසසම්‌පයුත්‌තා චාතිපි, කිලෙසසම්‌පයුත්‌තා චෙව නො ච කිලෙසාතිපි.
1578. Katame dhammā kilesasampayuttā ceva no ca kilesā? Ṭhapetvā kilese avasesaṃ akusalaṃ – ime dhammā kilesasampayuttā ceva no ca kilesā. Kilesavippayuttā dhammā na vattabbā – kilesā ceva kilesasampayuttā cātipi, kilesasampayuttā ceva no ca kilesātipi.
1579. කතමෙ ධම්‌මා කිලෙසවිප්‌පයුත්‌තා සංකිලෙසිකා? තීසු භූමීසු කුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා කිලෙසවිප්‌පයුත්‌තා සංකිලෙසිකා.
1579. Katame dhammā kilesavippayuttā saṃkilesikā? Tīsu bhūmīsu kusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā kilesavippayuttā saṃkilesikā.
1580. කතමෙ ධම්‌මා කිලෙසවිප්‌පයුත්‌තා අසංකිලෙසිකා? චත්‌තාරො මග්‌ගා අපරියාපන්‌නා , චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා කිලෙසවිප්‌පයුත්‌තා අසංකිලෙසිකා. කිලෙසසම්‌පයුත්‌තා ධම්‌මා න වත්‌තබ්‌බා – කිලෙසවිප්‌පයුත්‌තා සංකිලෙසිකාතිපි, කිලෙසවිප්‌පයුත්‌තා අසංකිලෙසිකාතිපි.
1580. Katame dhammā kilesavippayuttā asaṃkilesikā? Cattāro maggā apariyāpannā , cattāri ca sāmaññaphalāni, nibbānañca – ime dhammā kilesavippayuttā asaṃkilesikā. Kilesasampayuttā dhammā na vattabbā – kilesavippayuttā saṃkilesikātipi, kilesavippayuttā asaṃkilesikātipi.
පිට්‌ඨිදුකං
Piṭṭhidukaṃ
1581. කතමෙ ධම්‌මා දස්‌සනෙන පහාතබ්‌බා? චත්‌තාරො දිට්‌ඨිගතසම්‌පයුත්‌තචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො – ඉමෙ ධම්‌මා දස්‌සනෙන පහාතබ්‌බා. චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා, ද්‌වෙ දොමනස්‌සසහගතචිත්‌තුප්‌පාදා – ඉමෙ ධම්‌මා සියා දස්‌සනෙන පහාතබ්‌බා, සියා න දස්‌සනෙන පහාතබ්‌බා.
1581. Katame dhammā dassanena pahātabbā? Cattāro diṭṭhigatasampayuttacittuppādā, vicikicchāsahagato cittuppādo – ime dhammā dassanena pahātabbā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā dassanena pahātabbā, siyā na dassanena pahātabbā.
1582. කතමෙ ධම්‌මා න දස්‌සනෙන පහාතබ්‌බා? උද්‌ධච්‌චසහගතො චිත්‌තුප්‌පාදො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා න දස්‌සනෙන පහාතබ්‌බා.
1582. Katame dhammā na dassanena pahātabbā? Uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na dassanena pahātabbā.
1583. කතමෙ ධම්‌මා භාවනාය පහාතබ්‌බා? උද්‌ධච්‌චසහගතො චිත්‌තුප්‌පාදො – ඉමෙ ධම්‌මා භාවනාය පහාතබ්‌බා. චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා, ද්‌වෙ දොමනස්‌සසහගතචිත්‌තුප්‌පාදා – ඉමෙ ධම්‌මා සියා භාවනාය පහාතබ්‌බා, සියා න භාවනාය පහාතබ්‌බා.
1583. Katame dhammā bhāvanāya pahātabbā? Uddhaccasahagato cittuppādo – ime dhammā bhāvanāya pahātabbā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā bhāvanāya pahātabbā, siyā na bhāvanāya pahātabbā.
1584. කතමෙ ධම්‌මා න භාවනාය පහාතබ්‌බා? චත්‌තාරො දිට්‌ඨිගතසම්‌පයුත්‌තචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා න භාවනාය පහාතබ්‌බා.
1584. Katame dhammā na bhāvanāya pahātabbā? Cattāro diṭṭhigatasampayuttacittuppādā, vicikicchāsahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na bhāvanāya pahātabbā.
1585. කතමෙ ධම්‌මා දස්‌සනෙන පහාතබ්‌බහෙතුකා? චත්‌තාරො දිට්‌ඨිගතසම්‌පයුත්‌තචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො, එත්‌ථුප්‌පන්‌නං මොහං ඨපෙත්‌වා – ඉමෙ ධම්‌මා දස්‌සනෙන පහාතබ්‌බහෙතුකා. චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා, ද්‌වෙ දොමනස්‌සසහගතචිත්‌තුප්‌පාදා – ඉමෙ ධම්‌මා සියා දස්‌සනෙන පහාතබ්‌බහෙතුකා, සියා න දස්‌සනෙන පහාතබ්‌බහෙතුකා.
1585. Katame dhammā dassanena pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, etthuppannaṃ mohaṃ ṭhapetvā – ime dhammā dassanena pahātabbahetukā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā dassanena pahātabbahetukā, siyā na dassanena pahātabbahetukā.
1586. කතමෙ ධම්‌මා න දස්‌සනෙන පහාතබ්‌බහෙතුකා? විචිකිච්‌ඡාසහගතො මොහො, උද්‌ධච්‌චසහගතො චිත්‌තුප්‌පාදො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා න දස්‌සනෙන පහාතබ්‌බහෙතුකා.
1586. Katame dhammā na dassanena pahātabbahetukā? Vicikicchāsahagato moho, uddhaccasahagato cittuppādo, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na dassanena pahātabbahetukā.
1587. කතමෙ ධම්‌මා භාවනාය පහාතබ්‌බහෙතුකා? උද්‌ධච්‌චසහගතො චිත්‌තුප්‌පාදො, එත්‌ථුප්‌පන්‌නං මොහං ඨපෙත්‌වා – ඉමෙ ධම්‌මා භාවනාය පහාතබ්‌බහෙතුකා. චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා, ද්‌වෙ දොමනස්‌සසහගතචිත්‌තුප්‌පාදා – ඉමෙ ධම්‌මා සියා භාවනාය පහාතබ්‌බහෙතුකා, සියා න භාවනාය පහාතබ්‌බහෙතුකා.
1587. Katame dhammā bhāvanāya pahātabbahetukā? Uddhaccasahagato cittuppādo, etthuppannaṃ mohaṃ ṭhapetvā – ime dhammā bhāvanāya pahātabbahetukā. Cattāro diṭṭhigatavippayuttalobhasahagatacittuppādā, dve domanassasahagatacittuppādā – ime dhammā siyā bhāvanāya pahātabbahetukā, siyā na bhāvanāya pahātabbahetukā.
1588. කතමෙ ධම්‌මා න භාවනාය පහාතබ්‌බහෙතුකා? චත්‌තාරො දිට්‌ඨිගතසම්‌පයුත්‌තචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො, උද්‌ධච්‌චසහගතො මොහො, චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා න භාවනාය පහාතබ්‌බහෙතුකා.
1588. Katame dhammā na bhāvanāya pahātabbahetukā? Cattāro diṭṭhigatasampayuttacittuppādā, vicikicchāsahagato cittuppādo, uddhaccasahagato moho, catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā na bhāvanāya pahātabbahetukā.
1589. කතමෙ ධම්‌මා සවිතක්‌කා? කාමාවචරකුසලං, අකුසලං, කාමාවචරකුසලස්‌ස විපාකතො එකාදස චිත්‌තුප්‌පාදා, අකුසලස්‌ස විපාකතො ද්‌වෙ, කිරියතො එකාදස, රූපාවචරං පඨමං ඣානං කුසලතො ච විපාකතො ච කිරියතො ච ලොකුත්‌තරං පඨමං ඣානං කුසලතො ච විපාකතො ච, එත්‌ථුප්‌පන්‌නං විතක්‌කං ඨපෙත්‌වා – ඉමෙ ධම්‌මා සවිතක්‌කා.
1589. Katame dhammā savitakkā? Kāmāvacarakusalaṃ, akusalaṃ, kāmāvacarakusalassa vipākato ekādasa cittuppādā, akusalassa vipākato dve, kiriyato ekādasa, rūpāvacaraṃ paṭhamaṃ jhānaṃ kusalato ca vipākato ca kiriyato ca lokuttaraṃ paṭhamaṃ jhānaṃ kusalato ca vipākato ca, etthuppannaṃ vitakkaṃ ṭhapetvā – ime dhammā savitakkā.
1590. කතමෙ ධම්‌මා අවිතක්‌කා? ද්‌වෙපඤ්‌චවිඤ්‌ඤාණානි, රූපාවචරතිකචතුක්‌කජ්‌ඣානා කුසලතො ච විපාකතො ච කිරියතො ච, චත්‌තාරො අරූපාවචරා කුසලතො ච විපාකතො ච කිරියතො ච, ලොකුත්‌තරතිකචතුක්‌කජ්‌ඣානා කුසලතො ච විපාකතො ච, විතක්‌කො ච, රූපඤ්‌ච, නිබ්‌බානඤ්‌ච – ඉමෙ ධම්‌මා අවිතක්‌කා.
1590. Katame dhammā avitakkā? Dvepañcaviññāṇāni, rūpāvacaratikacatukkajjhānā kusalato ca vipākato ca kiriyato ca, cattāro arūpāvacarā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, vitakko ca, rūpañca, nibbānañca – ime dhammā avitakkā.
1591. කතමෙ ධම්‌මා සවිචාරා? කාමාවචරකුසලං , අකුසලං, කාමාවචරකුසලස්‌ස විපාකතො එකාදස චිත්‌තුප්‌පාදා, අකුසලස්‌ස විපාකතො ද්‌වෙ කිරියතො එකාදස, රූපාවචරඑකකදුකජ්‌ඣානා කුසලතො ච විපාකතො ච කිරියතො ච, ලොකුත්‌තරඑකකදුකජ්‌ඣානා කුසලතො ච විපාකතො ච, එත්‌ථුප්‌පන්‌නං විචාරං ඨපෙත්‌වා – ඉමෙ ධම්‌මා සවිචාරා.
1591. Katame dhammā savicārā? Kāmāvacarakusalaṃ , akusalaṃ, kāmāvacarakusalassa vipākato ekādasa cittuppādā, akusalassa vipākato dve kiriyato ekādasa, rūpāvacaraekakadukajjhānā kusalato ca vipākato ca kiriyato ca, lokuttaraekakadukajjhānā kusalato ca vipākato ca, etthuppannaṃ vicāraṃ ṭhapetvā – ime dhammā savicārā.
1592. කතමෙ ධම්‌මා අවිචාරා? ද්‌වෙපඤ්‌චවිඤ්‌ඤාණානි, රූපාවචරතිකතිකජ්‌ඣානා කුසලතො ච විපාකතො ච කිරියතො ච, චත්‌තාරො ආරුප්‌පා කුසලතො ච විපාකතො ච කිරියතො ච, ලොකුත්‌තරතිකතිකජ්‌ඣානා කුසලතො ච විපාකතො ච, විචාරො ච, රූපඤ්‌ච, නිබ්‌බානඤ්‌ච – ඉමෙ ධම්‌මා අවිචාරා.
1592. Katame dhammā avicārā? Dvepañcaviññāṇāni, rūpāvacaratikatikajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaratikatikajjhānā kusalato ca vipākato ca, vicāro ca, rūpañca, nibbānañca – ime dhammā avicārā.
1593. කතමෙ ධම්‌මා සප්‌පීතිකා? කාමාවචරකුසලතො චත්‌තාරො සොමනස්‌සසහගතචිත්‌තුප්‌පාදා, අකුසලතො චත්‌තාරො, කාමාවචරකුසලස්‌ස විපාකතො පඤ්‌ච, කිරියතො පඤ්‌ච, රූපාවචරදුකතිකජ්‌ඣානා කුසලතො ච විපාකතො ච කිරියතො ච, ලොකුත්‌තරදුකතිකජ්‌ඣානා කුසලතො ච විපාකතො ච, එත්‌ථුප්‌පන්‌නං පීතිං ඨපෙත්‌වා – ඉමෙ ධම්‌මා සප්‌පීතිකා.
1593. Katame dhammā sappītikā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā sappītikā.
1594. කතමෙ ධම්‌මා අප්‌පීතිකා? කාමාවචරකුසලතො චත්‌තාරො උපෙක්‌ඛාසහගතචිත්‌තුප්‌පාදා, අකුසලතො අට්‌ඨ, කාමාවචරකුසලස්‌ස විපාකතො එකාදස, අකුසලස්‌ස විපාකතො සත්‌ත, කිරියතො ඡ, රූපාවචරදුකදුකජ්‌ඣානා කුසලතො ච විපාකතො ච කිරියතො ච, චත්‌තාරො ආරුප්‌පා කුසලතො ච විපාකතො ච කිරියතො ච, ලොකුත්‌තරදුකදුකජ්‌ඣානා කුසලතො ච විපාකතො ච පීති ච, රූපඤ්‌ච, නිබ්‌බානඤ්‌ච – ඉමෙ ධම්‌මා අප්‌පීතිකා.
1594. Katame dhammā appītikā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato ekādasa, akusalassa vipākato satta, kiriyato cha, rūpāvacaradukadukajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaradukadukajjhānā kusalato ca vipākato ca pīti ca, rūpañca, nibbānañca – ime dhammā appītikā.
1595. කතමෙ ධම්‌මා පීතිසහගතා? කාමාවචරකුසලතො චත්‌තාරො සොමනස්‌සසහගතචිත්‌තුප්‌පාදා, අකුසලතො චත්‌තාරො, කාමාවචරකුසලස්‌ස විපාකතො පඤ්‌ච, කිරියතො පඤ්‌ච, රූපාවචරදුකතිකජ්‌ඣානා කුසලතො ච විපාකතො ච කිරියතො ච, ලොකුත්‌තරදුකතිකජ්‌ඣානා කුසලතො ච විපාකතො ච, එත්‌ථුප්‌පන්‌නං පීතිං ඨපෙත්‌වා – ඉමෙ ධම්‌මා පීතිසහගතා.
1595. Katame dhammā pītisahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato pañca, kiriyato pañca, rūpāvacaradukatikajjhānā kusalato ca vipākato ca kiriyato ca, lokuttaradukatikajjhānā kusalato ca vipākato ca, etthuppannaṃ pītiṃ ṭhapetvā – ime dhammā pītisahagatā.
1596. කතමෙ ධම්‌මා න පීතිසහගතා? කාමාවචරකුසලතො චත්‌තාරො උපෙක්‌ඛාසහගතචිත්‌තුප්‌පාදා, අකුසලතො අට්‌ඨ, කාමාවචරකුසලස්‌ස විපාකතො එකාදස, අකුසලස්‌ස විපාකතො සත්‌ත, කිරියතො ඡ, රූපාවචරදුකදුකජ්‌ඣානා කුසලතො ච විපාකතො ච කිරියතො ච, චත්‌තාරො ආරුප්‌පා කුසලතො ච විපාකතො ච කිරියතො ච, ලොකුත්‌තරදුකදුකජ්‌ඣානා කුසලතො ච විපාකතො ච, පීති ච, රූපඤ්‌ච, නිබ්‌බානඤ්‌ච – ඉමෙ ධම්‌මා න පීතිසහගතා.
1596. Katame dhammā na pītisahagatā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato ekādasa, akusalassa vipākato satta, kiriyato cha, rūpāvacaradukadukajjhānā kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaradukadukajjhānā kusalato ca vipākato ca, pīti ca, rūpañca, nibbānañca – ime dhammā na pītisahagatā.
1597. කතමෙ ධම්‌මා සුඛසහගතා? කාමාවචරකුසලතො චත්‌තාරො සොමනස්‌සසහගතචිත්‌තුප්‌පාදා, අකුසලතො චත්‌තාරො, කාමාවචරකුසලස්‌ස විපාකතො ඡ, කිරියතො පඤ්‌ච, රූපාවචරතිකචතුක්‌කජ්‌ඣානා කුසලතො ච විපාකතො ච කිරියතො ච ලොකුත්‌තරතිකචතුක්‌කජ්‌ඣානා කුසලතො ච විපාකතො ච, එත්‌ථුප්‌පන්‌නං සුඛං ඨපෙත්‌වා – ඉමෙ ධම්‌මා සුඛසහගතා.
1597. Katame dhammā sukhasahagatā? Kāmāvacarakusalato cattāro somanassasahagatacittuppādā, akusalato cattāro, kāmāvacarakusalassa vipākato cha, kiriyato pañca, rūpāvacaratikacatukkajjhānā kusalato ca vipākato ca kiriyato ca lokuttaratikacatukkajjhānā kusalato ca vipākato ca, etthuppannaṃ sukhaṃ ṭhapetvā – ime dhammā sukhasahagatā.
1598. කතමෙ ධම්‌මා න සුඛසහගතා? කාමාවචරකුසලතො චත්‌තාරො උපෙක්‌ඛාසහගතචිත්‌තුප්‌පාදා, අකුසලතො අට්‌ඨ, කාමාවචරකුසලස්‌ස විපාකතො දස, අකුසලස්‌ස විපාකතො සත්‌ත, කිරියතො ඡ, රූපාවචරං චතුත්‌ථං ඣානං කුසලතො ච විපාකතො ච කිරියතො ච, චත්‌තාරො ආරුප්‌පා කුසලතො ච විපාකතො ච කිරියතො ච ලොකුත්‌තරං චතුත්‌ථං ඣානං කුසලතො ච විපාකතො ච, සුඛඤ්‌ච, රූපඤ්‌ච, නිබ්‌බානඤ්‌ච – ඉමෙ ධම්‌මා න සුඛසහගතා.
1598. Katame dhammā na sukhasahagatā? Kāmāvacarakusalato cattāro upekkhāsahagatacittuppādā, akusalato aṭṭha, kāmāvacarakusalassa vipākato dasa, akusalassa vipākato satta, kiriyato cha, rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca lokuttaraṃ catutthaṃ jhānaṃ kusalato ca vipākato ca, sukhañca, rūpañca, nibbānañca – ime dhammā na sukhasahagatā.
1599. කතමෙ ධම්‌මා උපෙක්‌ඛාසහගතා? කාමාවචරකුසලතො චත්‌තාරො උපෙක්‌ඛාසහගතචිත්‌තුප්‌පාදා, අකුසලතො ඡ, කාමාවචරකුසලස්‌ස විපාකතො දස, අකුසලස්‌ස විපාකතො ඡ, කිරියතො ඡ , රූපාවචරං චතුත්‌ථං ඣානං කුසලතො ච විපාකතො ච කිරියතො ච, චත්‌තාරො ආරුප්‌පා කුසලතො ච විපාකතො ච කිරියතො ච, ලොකුත්‌තරං චතුත්‌ථං ඣානං කුසලතො ච විපාකතො ච, එත්‌ථුප්‌පන්‌නං උපෙක්‌ඛං ඨපෙත්‌වා – ඉමෙ ධම්‌මා උපෙක්‌ඛාසහගතා.
1599. Katame dhammā upekkhāsahagatā? Kāmāvacarakusalato cattāro upekkhāsahagatacittuppādā, akusalato cha, kāmāvacarakusalassa vipākato dasa, akusalassa vipākato cha, kiriyato cha , rūpāvacaraṃ catutthaṃ jhānaṃ kusalato ca vipākato ca kiriyato ca, cattāro āruppā kusalato ca vipākato ca kiriyato ca, lokuttaraṃ catutthaṃ jhānaṃ kusalato ca vipākato ca, etthuppannaṃ upekkhaṃ ṭhapetvā – ime dhammā upekkhāsahagatā.
1600. කතමෙ ධම්‌මා න උපෙක්‌ඛාසහගතා? කාමාවචරකුසලතො චත්‌තාරො සොමනස්‌සසහගතචිත්‌තුප්‌පාදා, අකුසලතො ඡ, කාමාවචරකුසලස්‌ස විපාකතො ඡ, අකුසලස්‌ස විපාකතො එකො, කිරියතො පඤ්‌ච, රූපාවචරතිකචතුක්‌කජ්‌ඣානා කුසලතො ච විපාකතො ච කිරියතො ච, ලොකුත්‌තරතිකචතුක්‌කජ්‌ඣානා කුසලතො ච විපාකතො ච, උපෙක්‌ඛා ච, රූපඤ්‌ච, නිබ්‌බානඤ්‌ච – ඉමෙ ධම්‌මා න උපෙක්‌ඛාසහගතා.
1600. Katame dhammā na upekkhāsahagatā? Kāmāvacarakusalato cattāro somanassasahagatacittuppādā, akusalato cha, kāmāvacarakusalassa vipākato cha, akusalassa vipākato eko, kiriyato pañca, rūpāvacaratikacatukkajjhānā kusalato ca vipākato ca kiriyato ca, lokuttaratikacatukkajjhānā kusalato ca vipākato ca, upekkhā ca, rūpañca, nibbānañca – ime dhammā na upekkhāsahagatā.
1601. කතමෙ ධම්‌මා කාමාවචරා? කාමාවචරකුසලං, අකුසලං, සබ්‌බො කාමාවචරස්‌ස විපාකො, කාමාවචරකිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා කාමාවචරා.
1601. Katame dhammā kāmāvacarā? Kāmāvacarakusalaṃ, akusalaṃ, sabbo kāmāvacarassa vipāko, kāmāvacarakiriyābyākataṃ, sabbañca rūpaṃ – ime dhammā kāmāvacarā.
1602. කතමෙ ධම්‌මා න කාමාවචරා? රූපාවචරා , අරූපාවචරා, අපරියාපන්‌නා – ඉමෙ ධම්‌මා න කාමාවචරා.
1602. Katame dhammā na kāmāvacarā? Rūpāvacarā , arūpāvacarā, apariyāpannā – ime dhammā na kāmāvacarā.
1603. කතමෙ ධම්‌මා රූපාවචරා? රූපාවචරචතුක්‌කපඤ්‌චකජ්‌ඣානා කුසලතො ච විපාකතො ච කිරියතො ච – ඉමෙ ධම්‌මා රූපාවචරා.
1603. Katame dhammā rūpāvacarā? Rūpāvacaracatukkapañcakajjhānā kusalato ca vipākato ca kiriyato ca – ime dhammā rūpāvacarā.
1604. කතමෙ ධම්‌මා න රූපාවචරා? කාමාවචරා, අරූපාවචරා, අපරියාපන්‌නා – ඉමෙ ධම්‌මා න රූපාවචරා.
1604. Katame dhammā na rūpāvacarā? Kāmāvacarā, arūpāvacarā, apariyāpannā – ime dhammā na rūpāvacarā.
1605. කතමෙ ධම්‌මා අරූපාවචරා? චත්‌තාරො ආරුප්‌පා කුසලතො ච විපාකතො ච කිරියතො ච – ඉමෙ ධම්‌මා අරූපාවචරා.
1605. Katame dhammā arūpāvacarā? Cattāro āruppā kusalato ca vipākato ca kiriyato ca – ime dhammā arūpāvacarā.
1606. කතමෙ ධම්‌මා න අරූපාවචරා? කාමාවචරා, රූපාවචරා, අපරියාපන්‌නා – ඉමෙ ධම්‌මා න අරූපාවචරා.
1606. Katame dhammā na arūpāvacarā? Kāmāvacarā, rūpāvacarā, apariyāpannā – ime dhammā na arūpāvacarā.
1607. කතමෙ ධම්‌මා පරියාපන්‌නා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා පරියාපන්‌නා.
1607. Katame dhammā pariyāpannā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā pariyāpannā.
1608. කතමෙ ධම්‌මා අපරියාපන්‌නා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අපරියාපන්‌නා.
1608. Katame dhammā apariyāpannā? Cattāro maggā apariyāpannā, cattāri ca sāmaññaphalāni, nibbānañca – ime dhammā apariyāpannā.
1609. කතමෙ ධම්‌මා නිය්‍යානිකා? චත්‌තාරො මග්‌ගා අපරියාපන්‌නා – ඉමෙ ධම්‌මා නිය්‍යානිකා.
1609. Katame dhammā niyyānikā? Cattāro maggā apariyāpannā – ime dhammā niyyānikā.
1610. කතමෙ ධම්‌මා අනිය්‍යානිකා? තීසු භූමීසු කුසලං, අකුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා අනිය්‍යානිකා.
1610. Katame dhammā aniyyānikā? Tīsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyyānikā.
1611. කතමෙ ධම්‌මා නියතා? චත්‌තාරො දිට්‌ඨිගතසම්‌පයුත්‌තචිත්‌තුප්‌පාදා, ද්‌වෙ දොමනස්‌සසහගතචිත්‌තුප්‌පාදා – ඉමෙ ධම්‌මා සියා නියතා සියා අනියතා. චත්‌තාරො මග්‌ගා අපරියාපන්‌නා – ඉමෙ ධම්‌මා නියතා.
1611. Katame dhammā niyatā? Cattāro diṭṭhigatasampayuttacittuppādā, dve domanassasahagatacittuppādā – ime dhammā siyā niyatā siyā aniyatā. Cattāro maggā apariyāpannā – ime dhammā niyatā.
1612. කතමෙ ධම්‌මා අනියතා? චත්‌තාරො දිට්‌ඨිගතවිප්‌පයුත්‌තලොභසහගතචිත්‌තුප්‌පාදා, විචිකිච්‌ඡාසහගතො චිත්‌තුප්‌පාදො, උද්‌ධච්‌චසහගතො චිත්‌තුප්‌පාදො, තීසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා අනියතා.
1612. Katame dhammā aniyatā? Cattāro diṭṭhigatavippayuttalobhasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā aniyatā.
1613. කතමෙ ධම්‌මා සඋත්‌තරා? තීසු භූමීසු කුසලං, අකුසලං, තීසු භූමීසු විපාකො, තීසු භූමීසු කිරියාබ්‍යාකතං, සබ්‌බඤ්‌ච රූපං – ඉමෙ ධම්‌මා සඋත්‌තරා.
1613. Katame dhammā sauttarā? Tīsu bhūmīsu kusalaṃ, akusalaṃ, tīsu bhūmīsu vipāko, tīsu bhūmīsu kiriyābyākataṃ, sabbañca rūpaṃ – ime dhammā sauttarā.
1614. කතමෙ ධම්‌මා අනුත්‌තරා? චත්‌තාරො මග්‌ගා අපරියාපන්‌නා, චත්‌තාරි ච සාමඤ්‌ඤඵලානි, නිබ්‌බානඤ්‌ච – ඉමෙ ධම්‌මා අනුත්‌තරා.
1614. Katame dhammā anuttarā? Cattāro maggā apariyāpannā, cattāri ca sāmaññaphalāni, nibbānañca – ime dhammā anuttarā.
1615. කතමෙ ධම්‌මා සරණා? ද්‌වාදස අකුසලචිත්‌තුප්‌පාදා – ඉමෙ ධම්‌මා සරණා.
1615. Katame dhammā saraṇā? Dvādasa akusalacittuppādā – ime dhammā saraṇā.
1616. කතමෙ ධම්‌මා අරණා? චතූසු භූමීසු කුසලං, චතූසු භූමීසු විපාකො, තීසු භූමීසු කිරියාබ්‍යාකතං, රූපඤ්‌ච, නිබ්‌බානඤ්‌ච – ඉමෙ ධම්‌මා අරණා.
1616. Katame dhammā araṇā? Catūsu bhūmīsu kusalaṃ, catūsu bhūmīsu vipāko, tīsu bhūmīsu kiriyābyākataṃ, rūpañca, nibbānañca – ime dhammā araṇā.
අත්‌ථුද්‌ධාරො නිට්‌ඨිතො.
Atthuddhāro niṭṭhito.
ධම්‌මසඞ්‌ගණීපකරණං නිට්‌ඨිතං.
Dhammasaṅgaṇīpakaraṇaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / ධම්‌මසඞ්‌ගණි-අට්‌ඨකථා • Dhammasaṅgaṇi-aṭṭhakathā / දුකඅත්‌ථුද්‌ධාරවණ්‌ණනා • Dukaatthuddhāravaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / ධම්‌මසඞ්‌ගණී-මූලටීකා • Dhammasaṅgaṇī-mūlaṭīkā / දුකඅත්‌ථුද්‌ධාරවණ්‌ණනා • Dukaatthuddhāravaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / ධම්‌මසඞ්‌ගණී-අනුටීකා • Dhammasaṅgaṇī-anuṭīkā / දුකඅත්‌ථුද්‌ධාරවණ්‌ණනා • Dukaatthuddhāravaṇṇanā
