| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. து³கபட்டா²னவண்ணனா
2. Dukapaṭṭhānavaṇṇanā
து³கபட்டா²னேபி ஸப்³ப³து³கேஸு பஞ்ஹாவிஸ்ஸஜ்ஜனானி சேவ க³ணனா ச பாளியங் ஆக³தனயேனேவ வேதி³தப்³பா³. அபிசெத்த² ஸஹேதுகஹேதுஸம்பயுத்தது³கானங் விஸ்ஸஜ்ஜனங் ஹேதுது³கவிஸ்ஸஜ்ஜனஸதி³ஸங்; ததா² ஹேதூசேவஸஹேதுகஹேதூசேவஹேதுஸம்பயுத்தது³கானங், ததா² ஸப்பச்சயஸங்க²தது³கானங். இத³ங் து³கங் யதா² ஸப்பச்சயது³கங், ஏவங் காதப்³ப³ந்தி இத³ங் யஸ்மா ஸப்பச்சயோ விய அப்பச்சயேன ஸங்க²தோபி, அஸங்க²தேன ஸத்³தி⁴ங் யோஜனங் ந லப்³ப⁴தி, தஸ்மா வுத்தங். ஸாரம்மணசித்தஸம்பயுத்தஸங்ஸட்ட²து³காபி ஸதி³ஸவிஸ்ஸஜ்ஜனாயேவ; ததா² ஆஸவஓக⁴யோக³கொ³ச்ச²கா. ஏதே ஹி தயோ அஞ்ஞமஞ்ஞங் ஸதி³ஸவிஸ்ஸஜ்ஜனாயேவ. அபிச லோகியஸாஸவஸங்யோஜனியக³ந்த²னியனீவரணியபராமட்ட²ஸங்கிலேஸிகது³கா ஆஸவவிப்பயுத்தஸாஸவஸங்யோஜனவிப்பயுத்தஸங்யோஜனியக³ந்த²விப்பயுத்தக³ந்த²னியனீவரணவிப்பயுத்தனீவரணியபராமாஸவிப்பயுத்தபராமட்ட²கிலேஸவிப்பயுத்தஸங்கிலேஸிகபரியாபன்னஸஉத்தரது³காத இமேபி து³கா ஸமானா.
Dukapaṭṭhānepi sabbadukesu pañhāvissajjanāni ceva gaṇanā ca pāḷiyaṃ āgatanayeneva veditabbā. Apicettha sahetukahetusampayuttadukānaṃ vissajjanaṃ hetudukavissajjanasadisaṃ; tathā hetūcevasahetukahetūcevahetusampayuttadukānaṃ, tathā sappaccayasaṅkhatadukānaṃ. Idaṃ dukaṃ yathā sappaccayadukaṃ, evaṃ kātabbanti idaṃ yasmā sappaccayo viya appaccayena saṅkhatopi, asaṅkhatena saddhiṃ yojanaṃ na labbhati, tasmā vuttaṃ. Sārammaṇacittasampayuttasaṃsaṭṭhadukāpi sadisavissajjanāyeva; tathā āsavaoghayogagocchakā. Ete hi tayo aññamaññaṃ sadisavissajjanāyeva. Apica lokiyasāsavasaṃyojaniyaganthaniyanīvaraṇiyaparāmaṭṭhasaṅkilesikadukā āsavavippayuttasāsavasaṃyojanavippayuttasaṃyojaniyaganthavippayuttaganthaniyanīvaraṇavippayuttanīvaraṇiyaparāmāsavippayuttaparāmaṭṭhakilesavippayuttasaṅkilesikapariyāpannasauttaradukāta imepi dukā samānā.
கிலேஸது³கங் ஸங்யோஜனது³கஸதி³ஸங். ஸங்கிலிட்ட²கிலேஸஸம்பயுத்தனீவரணஸம்பயுத்தத³ஸ்ஸனேனபஹாதப்³ப³ஸரணது³காபி ஸமானா. ததா²கிலேஸா சேவ ஸங்கிலிட்ட²னீவரணா சேவ நீவரணஸம்பயுத்தகிலேஸா சேவ கிலேஸஸம்பயுத்தது³கா. இமினா நயேன ஸப்³பே³ஸங் அத்த²தோ ஸதி³ஸானங் து³கானங் விஸ்ஸஜ்ஜனானி ஸதி³ஸானேவ ஹொந்தீதி வேதி³தப்³பா³னி. ஸப்³ப³ஸ்மிம்பி பன பட்டா²னே கேனசிவிஞ்ஞெய்யது³கங் ந லப்³ப⁴தி. ஆஸவா சேவ ஆஸவஸம்பயுத்தா ச, ஸங்யோஜனா சேவ ஸங்யோஜனஸம்பயுத்தா ச, க³ந்தா² சேவ க³ந்த²ஸம்பயுத்தா ச, நீவரணா சேவ நீவரணஸம்பயுத்தா ச, கிலேஸா சேவ ஸங்கிலிட்டா² சாதி ஏவரூபேஸு து³கேஸு விபாகபச்சயோ சேவ நானாக்க²ணிககம்மபச்சயோ ச ந லப்³ப⁴தி. நஹேதுஸஹேதுகனஹேதுஅஹேதுகேஸு ஹேதுபச்சயோ நத்தி². ஹேதூ சேவ ஹேதுஸம்பயுத்தா ச, ஆஸவா சேவ ஆஸவஸம்பயுத்தா ச, க³ந்தா² சேவ க³ந்த²ஸம்பயுத்தா சாதி இமேஸு து³கேஸு நஹேதுனஜா²னநமக்³கா³ ந லப்³ப⁴ந்தி. ஸங்யோஜனா சேவ ஸங்யோஜனஸம்பயுத்தா ச, நீவரணா சேவ நீவரணஸம்பயுத்தா ச, கிலேஸா சேவ கிலேஸஸம்பயுத்தா ச, கிலேஸா சேவ ஸங்கிலிட்டா² சாதி இமேஸு பன விசிகிச்சு²த்³த⁴ச்சஸஹக³தஸ்ஸ மோஹஸ்ஸ வஸேன நஹேதுபச்சயோ லப்³ப⁴தி; நஜா²னநமக்³க³பச்சயா ந லப்³ப⁴ந்தீதி ஏவங் ஸப்³ப³து³கேஸு லப்³ப⁴மானாலப்³ப⁴மானங் உபபரிக்கி²த்வா பாளிவஸேனேவ வாரக³ணனா வேதி³தப்³பா³தி.
Kilesadukaṃ saṃyojanadukasadisaṃ. Saṅkiliṭṭhakilesasampayuttanīvaraṇasampayuttadassanenapahātabbasaraṇadukāpi samānā. Tathākilesā ceva saṅkiliṭṭhanīvaraṇā ceva nīvaraṇasampayuttakilesā ceva kilesasampayuttadukā. Iminā nayena sabbesaṃ atthato sadisānaṃ dukānaṃ vissajjanāni sadisāneva hontīti veditabbāni. Sabbasmimpi pana paṭṭhāne kenaciviññeyyadukaṃ na labbhati. Āsavā ceva āsavasampayuttā ca, saṃyojanā ceva saṃyojanasampayuttā ca, ganthā ceva ganthasampayuttā ca, nīvaraṇā ceva nīvaraṇasampayuttā ca, kilesā ceva saṅkiliṭṭhā cāti evarūpesu dukesu vipākapaccayo ceva nānākkhaṇikakammapaccayo ca na labbhati. Nahetusahetukanahetuahetukesu hetupaccayo natthi. Hetū ceva hetusampayuttā ca, āsavā ceva āsavasampayuttā ca, ganthā ceva ganthasampayuttā cāti imesu dukesu nahetunajhānanamaggā na labbhanti. Saṃyojanā ceva saṃyojanasampayuttā ca, nīvaraṇā ceva nīvaraṇasampayuttā ca, kilesā ceva kilesasampayuttā ca, kilesā ceva saṅkiliṭṭhā cāti imesu pana vicikicchuddhaccasahagatassa mohassa vasena nahetupaccayo labbhati; najhānanamaggapaccayā na labbhantīti evaṃ sabbadukesu labbhamānālabbhamānaṃ upaparikkhitvā pāḷivaseneva vāragaṇanā veditabbāti.
து³கபட்டா²னவண்ணனா.
Dukapaṭṭhānavaṇṇanā.
