| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
২. দুকপট্ঠানৰণ্ণনা
2. Dukapaṭṭhānavaṇṇanā
দুকপট্ঠানেপি সব্বদুকেসু পঞ্হাৰিস্সজ্জনানি চেৰ গণনা চ পাল়িযং আগতনযেনেৰ ৰেদিতব্বা। অপিচেত্থ সহেতুকহেতুসম্পযুত্তদুকানং ৰিস্সজ্জনং হেতুদুকৰিস্সজ্জনসদিসং; তথা হেতূচেৰসহেতুকহেতূচেৰহেতুসম্পযুত্তদুকানং, তথা সপ্পচ্চযসঙ্খতদুকানং। ইদং দুকং যথা সপ্পচ্চযদুকং, এৰং কাতব্বন্তি ইদং যস্মা সপ্পচ্চযো ৰিয অপ্পচ্চযেন সঙ্খতোপি, অসঙ্খতেন সদ্ধিং যোজনং ন লব্ভতি, তস্মা ৰুত্তং। সারম্মণচিত্তসম্পযুত্তসংসট্ঠদুকাপি সদিসৰিস্সজ্জনাযেৰ; তথা আসৰওঘযোগগোচ্ছকা। এতে হি তযো অঞ্ঞমঞ্ঞং সদিসৰিস্সজ্জনাযেৰ। অপিচ লোকিযসাসৰসংযোজনিযগন্থনিযনীৰরণিযপরামট্ঠসঙ্কিলেসিকদুকা আসৰৰিপ্পযুত্তসাসৰসংযোজনৰিপ্পযুত্তসংযোজনিযগন্থৰিপ্পযুত্তগন্থনিযনীৰরণৰিপ্পযুত্তনীৰরণিযপরামাসৰিপ্পযুত্তপরামট্ঠকিলেসৰিপ্পযুত্তসঙ্কিলেসিকপরিযাপন্নসউত্তরদুকাত ইমেপি দুকা সমানা।
Dukapaṭṭhānepi sabbadukesu pañhāvissajjanāni ceva gaṇanā ca pāḷiyaṃ āgatanayeneva veditabbā. Apicettha sahetukahetusampayuttadukānaṃ vissajjanaṃ hetudukavissajjanasadisaṃ; tathā hetūcevasahetukahetūcevahetusampayuttadukānaṃ, tathā sappaccayasaṅkhatadukānaṃ. Idaṃ dukaṃ yathā sappaccayadukaṃ, evaṃ kātabbanti idaṃ yasmā sappaccayo viya appaccayena saṅkhatopi, asaṅkhatena saddhiṃ yojanaṃ na labbhati, tasmā vuttaṃ. Sārammaṇacittasampayuttasaṃsaṭṭhadukāpi sadisavissajjanāyeva; tathā āsavaoghayogagocchakā. Ete hi tayo aññamaññaṃ sadisavissajjanāyeva. Apica lokiyasāsavasaṃyojaniyaganthaniyanīvaraṇiyaparāmaṭṭhasaṅkilesikadukā āsavavippayuttasāsavasaṃyojanavippayuttasaṃyojaniyaganthavippayuttaganthaniyanīvaraṇavippayuttanīvaraṇiyaparāmāsavippayuttaparāmaṭṭhakilesavippayuttasaṅkilesikapariyāpannasauttaradukāta imepi dukā samānā.
কিলেসদুকং সংযোজনদুকসদিসং। সঙ্কিলিট্ঠকিলেসসম্পযুত্তনীৰরণসম্পযুত্তদস্সনেনপহাতব্বসরণদুকাপি সমানা। তথাকিলেসা চেৰ সঙ্কিলিট্ঠনীৰরণা চেৰ নীৰরণসম্পযুত্তকিলেসা চেৰ কিলেসসম্পযুত্তদুকা। ইমিনা নযেন সব্বেসং অত্থতো সদিসানং দুকানং ৰিস্সজ্জনানি সদিসানেৰ হোন্তীতি ৰেদিতব্বানি। সব্বস্মিম্পি পন পট্ঠানে কেনচিৰিঞ্ঞেয্যদুকং ন লব্ভতি। আসৰা চেৰ আসৰসম্পযুত্তা চ, সংযোজনা চেৰ সংযোজনসম্পযুত্তা চ, গন্থা চেৰ গন্থসম্পযুত্তা চ, নীৰরণা চেৰ নীৰরণসম্পযুত্তা চ, কিলেসা চেৰ সঙ্কিলিট্ঠা চাতি এৰরূপেসু দুকেসু ৰিপাকপচ্চযো চেৰ নানাক্খণিককম্মপচ্চযো চ ন লব্ভতি। নহেতুসহেতুকনহেতুঅহেতুকেসু হেতুপচ্চযো নত্থি। হেতূ চেৰ হেতুসম্পযুত্তা চ, আসৰা চেৰ আসৰসম্পযুত্তা চ, গন্থা চেৰ গন্থসম্পযুত্তা চাতি ইমেসু দুকেসু নহেতুনঝাননমগ্গা ন লব্ভন্তি। সংযোজনা চেৰ সংযোজনসম্পযুত্তা চ, নীৰরণা চেৰ নীৰরণসম্পযুত্তা চ, কিলেসা চেৰ কিলেসসম্পযুত্তা চ, কিলেসা চেৰ সঙ্কিলিট্ঠা চাতি ইমেসু পন ৰিচিকিচ্ছুদ্ধচ্চসহগতস্স মোহস্স ৰসেন নহেতুপচ্চযো লব্ভতি; নঝাননমগ্গপচ্চযা ন লব্ভন্তীতি এৰং সব্বদুকেসু লব্ভমানালব্ভমানং উপপরিক্খিত্ৰা পাল়িৰসেনেৰ ৰারগণনা ৰেদিতব্বাতি।
Kilesadukaṃ saṃyojanadukasadisaṃ. Saṅkiliṭṭhakilesasampayuttanīvaraṇasampayuttadassanenapahātabbasaraṇadukāpi samānā. Tathākilesā ceva saṅkiliṭṭhanīvaraṇā ceva nīvaraṇasampayuttakilesā ceva kilesasampayuttadukā. Iminā nayena sabbesaṃ atthato sadisānaṃ dukānaṃ vissajjanāni sadisāneva hontīti veditabbāni. Sabbasmimpi pana paṭṭhāne kenaciviññeyyadukaṃ na labbhati. Āsavā ceva āsavasampayuttā ca, saṃyojanā ceva saṃyojanasampayuttā ca, ganthā ceva ganthasampayuttā ca, nīvaraṇā ceva nīvaraṇasampayuttā ca, kilesā ceva saṅkiliṭṭhā cāti evarūpesu dukesu vipākapaccayo ceva nānākkhaṇikakammapaccayo ca na labbhati. Nahetusahetukanahetuahetukesu hetupaccayo natthi. Hetū ceva hetusampayuttā ca, āsavā ceva āsavasampayuttā ca, ganthā ceva ganthasampayuttā cāti imesu dukesu nahetunajhānanamaggā na labbhanti. Saṃyojanā ceva saṃyojanasampayuttā ca, nīvaraṇā ceva nīvaraṇasampayuttā ca, kilesā ceva kilesasampayuttā ca, kilesā ceva saṅkiliṭṭhā cāti imesu pana vicikicchuddhaccasahagatassa mohassa vasena nahetupaccayo labbhati; najhānanamaggapaccayā na labbhantīti evaṃ sabbadukesu labbhamānālabbhamānaṃ upaparikkhitvā pāḷivaseneva vāragaṇanā veditabbāti.
দুকপট্ঠানৰণ্ণনা।
Dukapaṭṭhānavaṇṇanā.
