| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༢. དུཀཔཊྛཱནཝཎྞནཱ
2. Dukapaṭṭhānavaṇṇanā
དུཀཔཊྛཱནེཔི སབྦདུཀེསུ པཉྷཱཝིསྶཛྫནཱནི ཙེཝ གཎནཱ ཙ པཱལི༹ཡཾ ཨཱགཏནཡེནེཝ ཝེདིཏབྦཱ། ཨཔིཙེཏྠ སཧེཏུཀཧེཏུསམྤཡུཏྟདུཀཱནཾ ཝིསྶཛྫནཾ ཧེཏུདུཀཝིསྶཛྫནསདིསཾ; ཏཐཱ ཧེཏཱུཙེཝསཧེཏུཀཧེཏཱུཙེཝཧེཏུསམྤཡུཏྟདུཀཱནཾ, ཏཐཱ སཔྤཙྩཡསངྑཏདུཀཱནཾ། ཨིདཾ དུཀཾ ཡཐཱ སཔྤཙྩཡདུཀཾ, ཨེཝཾ ཀཱཏབྦནྟི ཨིདཾ ཡསྨཱ སཔྤཙྩཡོ ཝིཡ ཨཔྤཙྩཡེན སངྑཏོཔི, ཨསངྑཏེན སདྡྷིཾ ཡོཛནཾ ན ལབྦྷཏི, ཏསྨཱ ཝུཏྟཾ། སཱརམྨཎཙིཏྟསམྤཡུཏྟསཾསཊྛདུཀཱཔི སདིསཝིསྶཛྫནཱཡེཝ; ཏཐཱ ཨཱསཝཨོགྷཡོགགོཙྪཀཱ། ཨེཏེ ཧི ཏཡོ ཨཉྙམཉྙཾ སདིསཝིསྶཛྫནཱཡེཝ། ཨཔིཙ ལོཀིཡསཱསཝསཾཡོཛནིཡགནྠནིཡནཱིཝརཎིཡཔརཱམཊྛསངྐིལེསིཀདུཀཱ ཨཱསཝཝིཔྤཡུཏྟསཱསཝསཾཡོཛནཝིཔྤཡུཏྟསཾཡོཛནིཡགནྠཝིཔྤཡུཏྟགནྠནིཡནཱིཝརཎཝིཔྤཡུཏྟནཱིཝརཎིཡཔརཱམཱསཝིཔྤཡུཏྟཔརཱམཊྛཀིལེསཝིཔྤཡུཏྟསངྐིལེསིཀཔརིཡཱཔནྣསཨུཏྟརདུཀཱཏ ཨིམེཔི དུཀཱ སམཱནཱ།
Dukapaṭṭhānepi sabbadukesu pañhāvissajjanāni ceva gaṇanā ca pāḷiyaṃ āgatanayeneva veditabbā. Apicettha sahetukahetusampayuttadukānaṃ vissajjanaṃ hetudukavissajjanasadisaṃ; tathā hetūcevasahetukahetūcevahetusampayuttadukānaṃ, tathā sappaccayasaṅkhatadukānaṃ. Idaṃ dukaṃ yathā sappaccayadukaṃ, evaṃ kātabbanti idaṃ yasmā sappaccayo viya appaccayena saṅkhatopi, asaṅkhatena saddhiṃ yojanaṃ na labbhati, tasmā vuttaṃ. Sārammaṇacittasampayuttasaṃsaṭṭhadukāpi sadisavissajjanāyeva; tathā āsavaoghayogagocchakā. Ete hi tayo aññamaññaṃ sadisavissajjanāyeva. Apica lokiyasāsavasaṃyojaniyaganthaniyanīvaraṇiyaparāmaṭṭhasaṅkilesikadukā āsavavippayuttasāsavasaṃyojanavippayuttasaṃyojaniyaganthavippayuttaganthaniyanīvaraṇavippayuttanīvaraṇiyaparāmāsavippayuttaparāmaṭṭhakilesavippayuttasaṅkilesikapariyāpannasauttaradukāta imepi dukā samānā.
ཀིལེསདུཀཾ སཾཡོཛནདུཀསདིསཾ། སངྐིལིཊྛཀིལེསསམྤཡུཏྟནཱིཝརཎསམྤཡུཏྟདསྶནེནཔཧཱཏབྦསརཎདུཀཱཔི སམཱནཱ། ཏཐཱཀིལེསཱ ཙེཝ སངྐིལིཊྛནཱིཝརཎཱ ཙེཝ ནཱིཝརཎསམྤཡུཏྟཀིལེསཱ ཙེཝ ཀིལེསསམྤཡུཏྟདུཀཱ། ཨིམིནཱ ནཡེན སབྦེསཾ ཨཏྠཏོ སདིསཱནཾ དུཀཱནཾ ཝིསྶཛྫནཱནི སདིསཱནེཝ ཧོནྟཱིཏི ཝེདིཏབྦཱནི། སབྦསྨིམྤི པན པཊྛཱནེ ཀེནཙིཝིཉྙེཡྻདུཀཾ ན ལབྦྷཏི། ཨཱསཝཱ ཙེཝ ཨཱསཝསམྤཡུཏྟཱ ཙ, སཾཡོཛནཱ ཙེཝ སཾཡོཛནསམྤཡུཏྟཱ ཙ, གནྠཱ ཙེཝ གནྠསམྤཡུཏྟཱ ཙ, ནཱིཝརཎཱ ཙེཝ ནཱིཝརཎསམྤཡུཏྟཱ ཙ, ཀིལེསཱ ཙེཝ སངྐིལིཊྛཱ ཙཱཏི ཨེཝརཱུཔེསུ དུཀེསུ ཝིཔཱཀཔཙྩཡོ ཙེཝ ནཱནཱཀྑཎིཀཀམྨཔཙྩཡོ ཙ ན ལབྦྷཏི། ནཧེཏུསཧེཏུཀནཧེཏུཨཧེཏུཀེསུ ཧེཏུཔཙྩཡོ ནཏྠི། ཧེཏཱུ ཙེཝ ཧེཏུསམྤཡུཏྟཱ ཙ, ཨཱསཝཱ ཙེཝ ཨཱསཝསམྤཡུཏྟཱ ཙ, གནྠཱ ཙེཝ གནྠསམྤཡུཏྟཱ ཙཱཏི ཨིམེསུ དུཀེསུ ནཧེཏུནཛྷཱནནམགྒཱ ན ལབྦྷནྟི། སཾཡོཛནཱ ཙེཝ སཾཡོཛནསམྤཡུཏྟཱ ཙ, ནཱིཝརཎཱ ཙེཝ ནཱིཝརཎསམྤཡུཏྟཱ ཙ, ཀིལེསཱ ཙེཝ ཀིལེསསམྤཡུཏྟཱ ཙ, ཀིལེསཱ ཙེཝ སངྐིལིཊྛཱ ཙཱཏི ཨིམེསུ པན ཝིཙིཀིཙྪུདྡྷཙྩསཧགཏསྶ མོཧསྶ ཝསེན ནཧེཏུཔཙྩཡོ ལབྦྷཏི; ནཛྷཱནནམགྒཔཙྩཡཱ ན ལབྦྷནྟཱིཏི ཨེཝཾ སབྦདུཀེསུ ལབྦྷམཱནཱལབྦྷམཱནཾ ཨུཔཔརིཀྑིཏྭཱ པཱལི༹ཝསེནེཝ ཝཱརགཎནཱ ཝེདིཏབྦཱཏི།
Kilesadukaṃ saṃyojanadukasadisaṃ. Saṅkiliṭṭhakilesasampayuttanīvaraṇasampayuttadassanenapahātabbasaraṇadukāpi samānā. Tathākilesā ceva saṅkiliṭṭhanīvaraṇā ceva nīvaraṇasampayuttakilesā ceva kilesasampayuttadukā. Iminā nayena sabbesaṃ atthato sadisānaṃ dukānaṃ vissajjanāni sadisāneva hontīti veditabbāni. Sabbasmimpi pana paṭṭhāne kenaciviññeyyadukaṃ na labbhati. Āsavā ceva āsavasampayuttā ca, saṃyojanā ceva saṃyojanasampayuttā ca, ganthā ceva ganthasampayuttā ca, nīvaraṇā ceva nīvaraṇasampayuttā ca, kilesā ceva saṅkiliṭṭhā cāti evarūpesu dukesu vipākapaccayo ceva nānākkhaṇikakammapaccayo ca na labbhati. Nahetusahetukanahetuahetukesu hetupaccayo natthi. Hetū ceva hetusampayuttā ca, āsavā ceva āsavasampayuttā ca, ganthā ceva ganthasampayuttā cāti imesu dukesu nahetunajhānanamaggā na labbhanti. Saṃyojanā ceva saṃyojanasampayuttā ca, nīvaraṇā ceva nīvaraṇasampayuttā ca, kilesā ceva kilesasampayuttā ca, kilesā ceva saṅkiliṭṭhā cāti imesu pana vicikicchuddhaccasahagatassa mohassa vasena nahetupaccayo labbhati; najhānanamaggapaccayā na labbhantīti evaṃ sabbadukesu labbhamānālabbhamānaṃ upaparikkhitvā pāḷivaseneva vāragaṇanā veditabbāti.
དུཀཔཊྛཱནཝཎྞནཱ།
Dukapaṭṭhānavaṇṇanā.
