| Library / Tipiṭaka / തിപിടക • Tipiṭaka / പഞ്ചപകരണ-അട്ഠകഥാ • Pañcapakaraṇa-aṭṭhakathā |
൨. ദുകപട്ഠാനവണ്ണനാ
2. Dukapaṭṭhānavaṇṇanā
ദുകപട്ഠാനേപി സബ്ബദുകേസു പഞ്ഹാവിസ്സജ്ജനാനി ചേവ ഗണനാ ച പാളിയം ആഗതനയേനേവ വേദിതബ്ബാ. അപിചേത്ഥ സഹേതുകഹേതുസമ്പയുത്തദുകാനം വിസ്സജ്ജനം ഹേതുദുകവിസ്സജ്ജനസദിസം; തഥാ ഹേതൂചേവസഹേതുകഹേതൂചേവഹേതുസമ്പയുത്തദുകാനം, തഥാ സപ്പച്ചയസങ്ഖതദുകാനം. ഇദം ദുകം യഥാ സപ്പച്ചയദുകം, ഏവം കാതബ്ബന്തി ഇദം യസ്മാ സപ്പച്ചയോ വിയ അപ്പച്ചയേന സങ്ഖതോപി, അസങ്ഖതേന സദ്ധിം യോജനം ന ലബ്ഭതി, തസ്മാ വുത്തം. സാരമ്മണചിത്തസമ്പയുത്തസംസട്ഠദുകാപി സദിസവിസ്സജ്ജനായേവ; തഥാ ആസവഓഘയോഗഗോച്ഛകാ. ഏതേ ഹി തയോ അഞ്ഞമഞ്ഞം സദിസവിസ്സജ്ജനായേവ. അപിച ലോകിയസാസവസംയോജനിയഗന്ഥനിയനീവരണിയപരാമട്ഠസങ്കിലേസികദുകാ ആസവവിപ്പയുത്തസാസവസംയോജനവിപ്പയുത്തസംയോജനിയഗന്ഥവിപ്പയുത്തഗന്ഥനിയനീവരണവിപ്പയുത്തനീവരണിയപരാമാസവിപ്പയുത്തപരാമട്ഠകിലേസവിപ്പയുത്തസങ്കിലേസികപരിയാപന്നസഉത്തരദുകാത ഇമേപി ദുകാ സമാനാ.
Dukapaṭṭhānepi sabbadukesu pañhāvissajjanāni ceva gaṇanā ca pāḷiyaṃ āgatanayeneva veditabbā. Apicettha sahetukahetusampayuttadukānaṃ vissajjanaṃ hetudukavissajjanasadisaṃ; tathā hetūcevasahetukahetūcevahetusampayuttadukānaṃ, tathā sappaccayasaṅkhatadukānaṃ. Idaṃ dukaṃ yathā sappaccayadukaṃ, evaṃ kātabbanti idaṃ yasmā sappaccayo viya appaccayena saṅkhatopi, asaṅkhatena saddhiṃ yojanaṃ na labbhati, tasmā vuttaṃ. Sārammaṇacittasampayuttasaṃsaṭṭhadukāpi sadisavissajjanāyeva; tathā āsavaoghayogagocchakā. Ete hi tayo aññamaññaṃ sadisavissajjanāyeva. Apica lokiyasāsavasaṃyojaniyaganthaniyanīvaraṇiyaparāmaṭṭhasaṅkilesikadukā āsavavippayuttasāsavasaṃyojanavippayuttasaṃyojaniyaganthavippayuttaganthaniyanīvaraṇavippayuttanīvaraṇiyaparāmāsavippayuttaparāmaṭṭhakilesavippayuttasaṅkilesikapariyāpannasauttaradukāta imepi dukā samānā.
കിലേസദുകം സംയോജനദുകസദിസം. സങ്കിലിട്ഠകിലേസസമ്പയുത്തനീവരണസമ്പയുത്തദസ്സനേനപഹാതബ്ബസരണദുകാപി സമാനാ. തഥാകിലേസാ ചേവ സങ്കിലിട്ഠനീവരണാ ചേവ നീവരണസമ്പയുത്തകിലേസാ ചേവ കിലേസസമ്പയുത്തദുകാ. ഇമിനാ നയേന സബ്ബേസം അത്ഥതോ സദിസാനം ദുകാനം വിസ്സജ്ജനാനി സദിസാനേവ ഹോന്തീതി വേദിതബ്ബാനി. സബ്ബസ്മിമ്പി പന പട്ഠാനേ കേനചിവിഞ്ഞേയ്യദുകം ന ലബ്ഭതി. ആസവാ ചേവ ആസവസമ്പയുത്താ ച, സംയോജനാ ചേവ സംയോജനസമ്പയുത്താ ച, ഗന്ഥാ ചേവ ഗന്ഥസമ്പയുത്താ ച, നീവരണാ ചേവ നീവരണസമ്പയുത്താ ച, കിലേസാ ചേവ സങ്കിലിട്ഠാ ചാതി ഏവരൂപേസു ദുകേസു വിപാകപച്ചയോ ചേവ നാനാക്ഖണികകമ്മപച്ചയോ ച ന ലബ്ഭതി. നഹേതുസഹേതുകനഹേതുഅഹേതുകേസു ഹേതുപച്ചയോ നത്ഥി. ഹേതൂ ചേവ ഹേതുസമ്പയുത്താ ച, ആസവാ ചേവ ആസവസമ്പയുത്താ ച, ഗന്ഥാ ചേവ ഗന്ഥസമ്പയുത്താ ചാതി ഇമേസു ദുകേസു നഹേതുനഝാനനമഗ്ഗാ ന ലബ്ഭന്തി. സംയോജനാ ചേവ സംയോജനസമ്പയുത്താ ച, നീവരണാ ചേവ നീവരണസമ്പയുത്താ ച, കിലേസാ ചേവ കിലേസസമ്പയുത്താ ച, കിലേസാ ചേവ സങ്കിലിട്ഠാ ചാതി ഇമേസു പന വിചികിച്ഛുദ്ധച്ചസഹഗതസ്സ മോഹസ്സ വസേന നഹേതുപച്ചയോ ലബ്ഭതി; നഝാനനമഗ്ഗപച്ചയാ ന ലബ്ഭന്തീതി ഏവം സബ്ബദുകേസു ലബ്ഭമാനാലബ്ഭമാനം ഉപപരിക്ഖിത്വാ പാളിവസേനേവ വാരഗണനാ വേദിതബ്ബാതി.
Kilesadukaṃ saṃyojanadukasadisaṃ. Saṅkiliṭṭhakilesasampayuttanīvaraṇasampayuttadassanenapahātabbasaraṇadukāpi samānā. Tathākilesā ceva saṅkiliṭṭhanīvaraṇā ceva nīvaraṇasampayuttakilesā ceva kilesasampayuttadukā. Iminā nayena sabbesaṃ atthato sadisānaṃ dukānaṃ vissajjanāni sadisāneva hontīti veditabbāni. Sabbasmimpi pana paṭṭhāne kenaciviññeyyadukaṃ na labbhati. Āsavā ceva āsavasampayuttā ca, saṃyojanā ceva saṃyojanasampayuttā ca, ganthā ceva ganthasampayuttā ca, nīvaraṇā ceva nīvaraṇasampayuttā ca, kilesā ceva saṅkiliṭṭhā cāti evarūpesu dukesu vipākapaccayo ceva nānākkhaṇikakammapaccayo ca na labbhati. Nahetusahetukanahetuahetukesu hetupaccayo natthi. Hetū ceva hetusampayuttā ca, āsavā ceva āsavasampayuttā ca, ganthā ceva ganthasampayuttā cāti imesu dukesu nahetunajhānanamaggā na labbhanti. Saṃyojanā ceva saṃyojanasampayuttā ca, nīvaraṇā ceva nīvaraṇasampayuttā ca, kilesā ceva kilesasampayuttā ca, kilesā ceva saṅkiliṭṭhā cāti imesu pana vicikicchuddhaccasahagatassa mohassa vasena nahetupaccayo labbhati; najhānanamaggapaccayā na labbhantīti evaṃ sabbadukesu labbhamānālabbhamānaṃ upaparikkhitvā pāḷivaseneva vāragaṇanā veditabbāti.
ദുകപട്ഠാനവണ്ണനാ.
Dukapaṭṭhānavaṇṇanā.
