| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༣. དུཀཏིཀཔཊྛཱནཝཎྞནཱ
3. Dukatikapaṭṭhānavaṇṇanā
དུཀཏིཀཔཊྛཱནེ ཧེཏུཾ ཀུསལཾ དྷམྨཾ པཊིཙྩ ཧེཏུ ཀུསལོ དྷམྨོ ཨུཔྤཛྫཏི ཧེཏུཔཙྩཡཱཏི ཨེཝཾ པཉྷཱམཏྟུདྡྷཱརཝསེནེཝ སངྑེཔཏོ དེསནཱ ཀཏཱ། ‘‘ཀུསལཾ ཨལོབྷཾ པཊིཙྩ ཨདོསོ ཨམོཧོ’’ཏིཨཱདིནཱ པན ནཡེན ཝིཏྠཱརོ ཝཏྟབྦོ སིཡཱ, སོ ཧེཊྛཱ དསྶིཏནཡེན སཀྐཱ ཨཝུཏྟོཔི ཛཱནིཏུནྟི ཨེཀཔདེཔི ཨེཀཔཙྩཡོ ཝཱ ན ཝུཏྟོ། ཡཱ པནེསཱ སངྑེཔཏོ དེསནཱ ཀཏཱ, སཱ ཨེཝཾ ཀཏཱཏི ཝེདིཏབྦཱ། ཧེཏུདུཀེན ཧི སདྡྷིཾ ཀུསལཔདཾ ཡོཛེཏྭཱ པཊིཙྩཝཱརེ ཨནུལོམསྶ ཙེཝ པཙྩནཱིཡསྶ ཙ ཝསེན སབྦེ ལབྦྷམཱནཀཔཙྩཡཱ དསྶིཏཱ, ཨནུལོམཔཙྩནཱིཡཔཙྩནཱིཡཱནུལོམནཡཱ ཙེཝ སཧཛཱཏཝཱརཱདཡོ ཙ ན དསྶིཏཱ, ཀེཝལཾ ‘‘པཊིཙྩཝཱརསདིསཾཡེཝ ཝིཏྠཱརེཏབྦ’’ནྟི ཝུཏྟཾ། པཉྷཱཝཱརེ པཉྷམྤི ཨཝིསྶཛྫེཏྭཱ ཀེཝལཾ པཉྷུདྡྷཱརམཏྟཾ ཀཏྭཱ ཨནུལོམཔཙྩནཱིཡཝསེནེཝ ལབྦྷམཱནཔཙྩཡཱ དསྶིཏཱ། ཡཐཱ ཙ ཀུསལཔདཾ, ཨེཝཾ ཨཀུསལཨབྱཱཀཏཔདཱནིཔི ཧེཏུདུཀེན སདྡྷིཾ ཡོཛེཏྭཱ ཧེཏུཀུསལདུཀཏིཀཾ ནིདྡིསིཏབྦནྟི ཝུཏྟཾ།
Dukatikapaṭṭhāne hetuṃ kusalaṃ dhammaṃ paṭicca hetu kusalo dhammo uppajjati hetupaccayāti evaṃ pañhāmattuddhāravaseneva saṅkhepato desanā katā. ‘‘Kusalaṃ alobhaṃ paṭicca adoso amoho’’tiādinā pana nayena vitthāro vattabbo siyā, so heṭṭhā dassitanayena sakkā avuttopi jānitunti ekapadepi ekapaccayo vā na vutto. Yā panesā saṅkhepato desanā katā, sā evaṃ katāti veditabbā. Hetudukena hi saddhiṃ kusalapadaṃ yojetvā paṭiccavāre anulomassa ceva paccanīyassa ca vasena sabbe labbhamānakapaccayā dassitā, anulomapaccanīyapaccanīyānulomanayā ceva sahajātavārādayo ca na dassitā, kevalaṃ ‘‘paṭiccavārasadisaṃyeva vitthāretabba’’nti vuttaṃ. Pañhāvāre pañhampi avissajjetvā kevalaṃ pañhuddhāramattaṃ katvā anulomapaccanīyavaseneva labbhamānapaccayā dassitā. Yathā ca kusalapadaṃ, evaṃ akusalaabyākatapadānipi hetudukena saddhiṃ yojetvā hetukusaladukatikaṃ niddisitabbanti vuttaṃ.
ཏཏོ པརཾ ཧེཏུཾ སུཁཱཡ ཝེདནཱཡ སམྤཡུཏྟཾ དྷམྨནྟིཨཱདིནཱ ནཡེན ཧེཏུཝེདནཱདུཀཏིཀཱདཱིནི ཨེཀཝཱིསཏི དུཀཏིཀཱནི དསྶིཏཱནི། ཡསྨཱ པན ཧེཏུ ནཱམ སནིདསྶནསཔྤཊིགྷོ ཨནིདསྶནསཔྤཊིགྷོ ཝཱ ནཏྠི, ཏསྨཱ ཧེཏུཔདེན སདྡྷིཾ སནིདསྶནསཔྤཊིགྷཨནིདསྶནསཔྤཊིགྷཔདཱནི ན ཡོཛིཏཱནི། ཨེཝཾ ཧེཏུདུཀེན སདྡྷིཾ ལབྦྷམཱནཀཝསེན དྭཱཝཱིསཏི ཏིཀེ ཡོཛེཏྭཱ པུན ཏེ སཧེཏུཀདུཀཱདཱིཧི སརཎདུཀཔརིཡོསཱནེཧི སབྦདུཀེཧི སདྡྷིཾ ཡོཛིཏཱ། ཏཏྠ ཡཾ ཡཾ པདཾ ཡེན ཡེན པདེན སདྡྷིཾ ཡོཛནཾ ན གཙྪཏི, ཏཾ ཏཾ པཱལི༹ཡཾཡེཝ ན ལབྦྷཏཱིཏི ཝུཏྟཾ། ཨེཝམེཏྠ ཨེཀེན དུཀེན སདྡྷིཾ བཱཝཱིསཏི ཏིཀེ ཡོཛེཏྭཱ པུན ཨཔརེན བཱཝཱིསཏི, ཨཔརེན བཱཝཱིསཏཱིཏི པཊིཔཱཊིཡཱ དུཀསཏེ ལབྦྷམཱནདུཀཔདེཧི སདྡྷིཾ དྭཱཝཱིསཏི ཏིཀཱ ཡོཛིཏཱཏི དྭཱཝཱིསཏི ཏིཀེ གཧེཏྭཱ དུཀསཏེ པཀྑིཔིཏྭཱ དུཀཏིཀཔཊྛཱནཾ ནཱམ དེསིཏཾ། ཏཏྠ ཡེསུ ཡེསུ ཋཱནེསུ ནཡཾ དསྶེཏྭཱ པཱལི༹ཡཱ སངྑེཔོ ཀཏོ, ཏེསུ ཏེསུ ཋཱནེསུ དསྶིཏནཡཱནུརཱུཔེན ཏསྶཱ ཝིཏྠཱརོ ཝེདིཏབྦོཏི།
Tato paraṃ hetuṃ sukhāya vedanāya sampayuttaṃ dhammantiādinā nayena hetuvedanādukatikādīni ekavīsati dukatikāni dassitāni. Yasmā pana hetu nāma sanidassanasappaṭigho anidassanasappaṭigho vā natthi, tasmā hetupadena saddhiṃ sanidassanasappaṭighaanidassanasappaṭighapadāni na yojitāni. Evaṃ hetudukena saddhiṃ labbhamānakavasena dvāvīsati tike yojetvā puna te sahetukadukādīhi saraṇadukapariyosānehi sabbadukehi saddhiṃ yojitā. Tattha yaṃ yaṃ padaṃ yena yena padena saddhiṃ yojanaṃ na gacchati, taṃ taṃ pāḷiyaṃyeva na labbhatīti vuttaṃ. Evamettha ekena dukena saddhiṃ bāvīsati tike yojetvā puna aparena bāvīsati, aparena bāvīsatīti paṭipāṭiyā dukasate labbhamānadukapadehi saddhiṃ dvāvīsati tikā yojitāti dvāvīsati tike gahetvā dukasate pakkhipitvā dukatikapaṭṭhānaṃ nāma desitaṃ. Tattha yesu yesu ṭhānesu nayaṃ dassetvā pāḷiyā saṅkhepo kato, tesu tesu ṭhānesu dassitanayānurūpena tassā vitthāro veditabboti.
དུཀཏིཀཔཊྛཱནཝཎྞནཱ།
Dukatikapaṭṭhānavaṇṇanā.
