| Library / Tipiṭaka / திபிடக • Tipiṭaka / பரிவார-அட்ட²கதா² • Parivāra-aṭṭhakathā |
து³கவாரவண்ணனா
Dukavāravaṇṇanā
322. து³கேஸு ஸசித்தகா ஆபத்தி ஸஞ்ஞாவிமொக்கா², அசித்தகா நோஸஞ்ஞாவிமொக்கா². லத்³த⁴ஸமாபத்திகஸ்ஸ ஆபத்தி நாம பூ⁴தாரோசனாபத்தி, அலத்³த⁴ஸமாபத்திகஸ்ஸ ஆபத்தி நாம அபூ⁴தாரோசனாபத்தி. ஸத்³த⁴ம்மபடிஸஞ்ஞுத்தா நாம பத³ஸோத⁴ம்மாதி³கா, அஸத்³த⁴ம்மபடிஸஞ்ஞுத்தா நாம து³ட்டு²ல்லவாசாபத்தி. ஸபரிக்கா²ரபடிஸஞ்ஞுத்தா நாம நிஸ்ஸக்³கி³யவத்து²னோ அனிஸ்ஸஜ்ஜித்வா பரிபோ⁴கே³, பத்தசீவரானங் நித³ஹனே, கிலிட்ட²சீவரானங் அதோ⁴வனே, மலக்³க³ஹிதபத்தஸ்ஸ அபசனேதி ஏவங் அயுத்தபரிபோ⁴கே³ ஆபத்தி. பரபரிக்கா²ரபடிஸஞ்ஞுத்தா நாம ஸங்கி⁴கமஞ்சபீடா²தீ³னங் அஜ்ஜோ²காஸே ஸந்த²ரணஅனாபுச்சா²க³மனாதீ³ஸு ஆபஜ்ஜிதப்³பா³ ஆபத்தி. ஸபுக்³க³லபடிஸஞ்ஞுத்தா நாம ‘‘முது³பிட்டி²கஸ்ஸ லம்பி³ஸ்ஸ ஊருனா அங்க³ஜாதங் பீளெந்தஸ்ஸா’’திஆதி³னா நயேன வுத்தாபத்தி. பரபுக்³க³லபடிஸஞ்ஞுத்தா நாம மேது²னத⁴ம்மகாயஸங்ஸக்³க³பஹாரதா³னாதீ³ஸு வுத்தாபத்தி, ‘‘ஸிக²ரணீஸீ’’தி ஸச்சங் ப⁴ணந்தோ க³ருகங் ஆபஜ்ஜதி, ‘‘ஸம்பஜானமுஸாவாதே³ பாசித்திய’’ந்தி முஸா ப⁴ணந்தோ லஹுகங். அபூ⁴தாரோசனே முஸா ப⁴ணந்தோ க³ருகங். பூ⁴தாரோசனே ஸச்சங் ப⁴ணந்தோ லஹுகங்.
322. Dukesu sacittakā āpatti saññāvimokkhā, acittakā nosaññāvimokkhā. Laddhasamāpattikassa āpatti nāma bhūtārocanāpatti, aladdhasamāpattikassa āpatti nāma abhūtārocanāpatti. Saddhammapaṭisaññuttā nāma padasodhammādikā, asaddhammapaṭisaññuttā nāma duṭṭhullavācāpatti. Saparikkhārapaṭisaññuttā nāma nissaggiyavatthuno anissajjitvā paribhoge, pattacīvarānaṃ nidahane, kiliṭṭhacīvarānaṃ adhovane, malaggahitapattassa apacaneti evaṃ ayuttaparibhoge āpatti. Paraparikkhārapaṭisaññuttā nāma saṅghikamañcapīṭhādīnaṃ ajjhokāse santharaṇaanāpucchāgamanādīsu āpajjitabbā āpatti. Sapuggalapaṭisaññuttā nāma ‘‘mudupiṭṭhikassa lambissa ūrunā aṅgajātaṃ pīḷentassā’’tiādinā nayena vuttāpatti. Parapuggalapaṭisaññuttā nāma methunadhammakāyasaṃsaggapahāradānādīsu vuttāpatti, ‘‘sikharaṇīsī’’ti saccaṃ bhaṇanto garukaṃ āpajjati, ‘‘sampajānamusāvāde pācittiya’’nti musā bhaṇanto lahukaṃ. Abhūtārocane musā bhaṇanto garukaṃ. Bhūtārocane saccaṃ bhaṇanto lahukaṃ.
‘‘ஸங்க⁴கம்மங் வக்³க³ங் கரிஸ்ஸாமீ’’தி அந்தோஸீமாய ஏகமந்தே நிஸீத³ந்தோ பூ⁴மிக³தோ ஆபஜ்ஜதி நாம. ஸசே பன அங்கு³லிமத்தம்பி ஆகாஸே திட்டெ²ய்ய, ந ஆபஜ்ஜெய்ய, தேன வுத்தங் ‘‘நோ வேஹாஸக³தோ’’தி. வேஹாஸகுடியா ஆஹச்சபாத³கங் மஞ்சங் வா பீட²ங் வா அபி⁴னிஸீத³ந்தோ வேஹாஸக³தோ ஆபஜ்ஜதி நாம. ஸசே பன தங் பூ⁴மியங் பஞ்ஞாபெத்வா நிபஜ்ஜெய்ய ந ஆபஜ்ஜெய்ய, தேன வுத்தங் – ‘‘நோ பூ⁴மிக³தோ’’தி. க³மியோ க³மியவத்தங் அபூரெத்வா க³ச்ச²ந்தோ நிக்க²மந்தோ ஆபஜ்ஜதி நாம, நோ பவிஸந்தோ. ஆக³ந்துகோ ஆக³ந்துகவத்தங் அபூரெத்வா ஸச²த்துபாஹனோ பவிஸந்தோ பவிஸந்தோ ஆபஜ்ஜதி நாம, நோ நிக்க²மந்தோ.
‘‘Saṅghakammaṃ vaggaṃ karissāmī’’ti antosīmāya ekamante nisīdanto bhūmigato āpajjati nāma. Sace pana aṅgulimattampi ākāse tiṭṭheyya, na āpajjeyya, tena vuttaṃ ‘‘no vehāsagato’’ti. Vehāsakuṭiyā āhaccapādakaṃ mañcaṃ vā pīṭhaṃ vā abhinisīdanto vehāsagatoāpajjati nāma. Sace pana taṃ bhūmiyaṃ paññāpetvā nipajjeyya na āpajjeyya, tena vuttaṃ – ‘‘no bhūmigato’’ti. Gamiyo gamiyavattaṃ apūretvā gacchanto nikkhamanto āpajjati nāma, no pavisanto. Āgantuko āgantukavattaṃ apūretvā sachattupāhano pavisanto pavisanto āpajjati nāma, no nikkhamanto.
ஆதி³யந்தோ ஆபஜ்ஜதி நாம பி⁴க்கு²னீ அதிக³ம்பீ⁴ரங் உத³கஸுத்³தி⁴கங் ஆதி³யமானா; து³ப்³ப³ண்ணகரணங் அனாதி³யித்வா சீவரங் பரிபு⁴ஞ்ஜந்தோ பன அனாதி³யந்தோ ஆபஜ்ஜதி நாம. மூக³ப்³ப³தாதீ³னி தித்தி²யவத்தானி ஸமாதி³யந்தோ ஸமாதி³யந்தோ ஆபஜ்ஜதி நாம. பாரிவாஸிகாத³யோ பன தஜ்ஜனீயாதி³கம்மகதா வா அத்தனோ வத்தங் அஸமாதி³யந்தா ஆபஜ்ஜந்தி, தே ஸந்தா⁴ய வுத்தங் ‘‘அத்தா²பத்தி ந ஸமாதி³யந்தோ ஆபஜ்ஜதீ’’தி. அஞ்ஞாதிகாய பி⁴க்கு²னியா சீவரங் ஸிப்³ப³ந்தோ வேஜ்ஜகம்மப⁴ண்டா³கா³ரிககம்மசித்தகம்மாதீ³னி வா கரொந்தோ கரொந்தோ ஆபஜ்ஜதி நாம. உபஜ்ஜா²யவத்தாதீ³னி அகரொந்தோ அகரொந்தோ ஆபஜ்ஜதி நாம. அஞ்ஞாதிகாய பி⁴க்கு²னியா சீவரங் த³த³மானோ தெ³ந்தோ ஆபஜ்ஜதி நாம. ஸத்³தி⁴விஹாரிகஅந்தேவாஸிகானங் சீவராதீ³னி அதெ³ந்தோ அதெ³ந்தோ ஆபஜ்ஜதி நாம. அஞ்ஞாதிகாய பி⁴க்கு²னியா சீவரங் க³ண்ஹந்தோ படிக்³க³ண்ஹந்தோ ஆபஜ்ஜதி நாம. ‘‘ந பி⁴க்க²வே ஓவாதோ³ ந க³ஹேதப்³போ³’’தி வசனதோ ஓவாத³ங் அக³ண்ஹந்தோ ந படிக்³க³ண்ஹந்தோ ஆபஜ்ஜதி நாம.
Ādiyantoāpajjati nāma bhikkhunī atigambhīraṃ udakasuddhikaṃ ādiyamānā; dubbaṇṇakaraṇaṃ anādiyitvā cīvaraṃ paribhuñjanto pana anādiyanto āpajjati nāma. Mūgabbatādīni titthiyavattāni samādiyanto samādiyanto āpajjati nāma. Pārivāsikādayo pana tajjanīyādikammakatā vā attano vattaṃ asamādiyantā āpajjanti, te sandhāya vuttaṃ ‘‘atthāpatti na samādiyanto āpajjatī’’ti. Aññātikāya bhikkhuniyā cīvaraṃ sibbanto vejjakammabhaṇḍāgārikakammacittakammādīni vā karonto karonto āpajjati nāma. Upajjhāyavattādīni akaronto akaronto āpajjati nāma. Aññātikāya bhikkhuniyā cīvaraṃ dadamāno dento āpajjati nāma. Saddhivihārikaantevāsikānaṃ cīvarādīni adento adento āpajjati nāma. Aññātikāya bhikkhuniyā cīvaraṃ gaṇhanto paṭiggaṇhanto āpajjati nāma. ‘‘Na bhikkhave ovādo na gahetabbo’’ti vacanato ovādaṃ agaṇhanto na paṭiggaṇhanto āpajjati nāma.
நிஸ்ஸக்³கி³யவத்து²ங் அனிஸ்ஸஜ்ஜித்வா பரிபு⁴ஞ்ஜந்தோ பரிபோ⁴கே³ன ஆபஜ்ஜதி நாம. பஞ்சாஹிகங் ஸங்கா⁴டிசாரங் அதிக்காமயமானா அபரிபோ⁴கே³ன ஆபஜ்ஜதி நாம. ஸஹகா³ரஸெய்யங் ரத்திங் ஆபஜ்ஜதி நாம, நோ தி³வா, த்³வாரங் அஸங்வரித்வா படிஸல்லீயந்தோ தி³வா ஆபஜ்ஜதி, நோ ரத்திங். ஏகரத்தசா²ரத்தஸத்தாஹத³ஸாஹமாஸாதிக்கமேஸு வுத்தஆபத்திங் ஆபஜ்ஜந்தோ அருணுக்³கே³ ஆபஜ்ஜதி நாம, பவாரெத்வா பு⁴ஞ்ஜந்தோ ந அருணுக்³கே³ ஆபஜ்ஜதி நாம.
Nissaggiyavatthuṃ anissajjitvā paribhuñjanto paribhogena āpajjati nāma. Pañcāhikaṃ saṅghāṭicāraṃ atikkāmayamānā aparibhogena āpajjati nāma. Sahagāraseyyaṃ rattiṃ āpajjati nāma, no divā, dvāraṃ asaṃvaritvā paṭisallīyanto divā āpajjati, no rattiṃ. Ekarattachārattasattāhadasāhamāsātikkamesu vuttaāpattiṃ āpajjanto aruṇugge āpajjati nāma, pavāretvā bhuñjanto na aruṇugge āpajjati nāma.
பூ⁴தகா³மஞ்சேவ அங்க³ஜாதஞ்ச சி²ந்த³ந்தோ சி²ந்த³ந்தோ ஆபஜ்ஜதி நாம, கேஸே வா நகே² வா ந சி²ந்த³ந்தோ ந சி²ந்த³ந்தோ ஆபஜ்ஜதி நாம. ஆபத்திங் சா²தெ³ந்தோ சா²தெ³ந்தோ ஆபஜ்ஜதி நாம, ‘‘திணேன வா பண்ணேன வா படிச்சா²தெ³த்வா ஆக³ந்தப்³ப³ங், நத்வேவ நக்³கே³ன ஆக³ந்தப்³ப³ங், யோ ஆக³ச்செ²ய்ய ஆபத்தி து³க்கடஸ்ஸா’’தி இமங் பன ஆபத்திங் ந சா²தெ³ந்தோ ஆபஜ்ஜதி நாம. குஸசீராதீ³னி தா⁴ரெந்தோ தா⁴ரெந்தோ ஆபஜ்ஜதி நாம, ‘‘அயங் தே பி⁴க்கு² பத்தோ யாவ பே⁴த³னாய தா⁴ரேதப்³போ³’’தி இமங் ஆபத்திங் ந தா⁴ரெந்தோ ஆபஜ்ஜதி நாம.
Bhūtagāmañceva aṅgajātañca chindanto chindanto āpajjati nāma, kese vā nakhe vā na chindanto na chindanto āpajjati nāma. Āpattiṃ chādento chādento āpajjati nāma, ‘‘tiṇena vā paṇṇena vā paṭicchādetvā āgantabbaṃ, natveva naggena āgantabbaṃ, yo āgaccheyya āpatti dukkaṭassā’’ti imaṃ pana āpattiṃ na chādento āpajjati nāma. Kusacīrādīni dhārento dhārento āpajjati nāma, ‘‘ayaṃ te bhikkhu patto yāva bhedanāya dhāretabbo’’ti imaṃ āpattiṃ na dhārento āpajjati nāma.
‘‘அத்தனா வா அத்தானங் நானாஸங்வாஸகங் கரோதீ’’தி ஏகஸீமாயங் த்³வீஸு ஸங்கே⁴ஸு நிஸின்னேஸு ஏகஸ்மிங் பக்கே² நிஸீதி³த்வா பரபக்க²ஸ்ஸ லத்³தி⁴ங் க³ண்ஹந்தோ யஸ்மிங் பக்கே² நிஸின்னோ தேஸங் அத்தனாவ அத்தானங் நானாஸங்வாஸகங் கரோதி நாம. யேஸங் ஸந்திகே நிஸின்னோ தேஸங் க³ணபூரகோ ஹுத்வா கம்மங் கோபேதி, இதரேஸங் ஹத்த²பாஸங் அனாக³தத்தா. ஸமானஸங்வாஸகேபி ஏஸேவ நயோ. யேஸஞ்ஹி ஸோ லத்³தி⁴ங் ரோசேதி, தேஸங் ஸமானஸங்வாஸகோ ஹோதி, இதரேஸங் நானாஸங்வாஸகோ. ஸத்த ஆபத்தியோ ஸத்த ஆபத்திக்க²ந்தா⁴தி ஆபஜ்ஜிதப்³ப³தோ ஆபத்தியோ, ராஸட்டே²ன க²ந்தா⁴தி ஏவங் த்³வேயேவ நாமானி ஹொந்தீதி நாமவஸேன து³கங் த³ஸ்ஸிதங். கம்மேன வா ஸலாகக்³கா³ஹேன வாதி எத்த² உத்³தே³ஸோ சேவ கம்மஞ்ச ஏகங், வோஹாரோ சேவ அனுஸ்ஸாவனா ச ஸலாகக்³கா³ஹோ ச ஏகங், வோஹாரானுஸ்ஸாவனஸலாகக்³கா³ஹா புப்³ப³பா⁴கா³, கம்மஞ்சேவ உத்³தே³ஸோ ச பமாணங்.
‘‘Attanā vā attānaṃ nānāsaṃvāsakaṃ karotī’’ti ekasīmāyaṃ dvīsu saṅghesu nisinnesu ekasmiṃ pakkhe nisīditvā parapakkhassa laddhiṃ gaṇhanto yasmiṃ pakkhe nisinno tesaṃ attanāva attānaṃ nānāsaṃvāsakaṃ karoti nāma. Yesaṃ santike nisinno tesaṃ gaṇapūrako hutvā kammaṃ kopeti, itaresaṃ hatthapāsaṃ anāgatattā. Samānasaṃvāsakepi eseva nayo. Yesañhi so laddhiṃ roceti, tesaṃ samānasaṃvāsako hoti, itaresaṃ nānāsaṃvāsako. Satta āpattiyo satta āpattikkhandhāti āpajjitabbato āpattiyo, rāsaṭṭhena khandhāti evaṃ dveyeva nāmāni hontīti nāmavasena dukaṃ dassitaṃ. Kammena vā salākaggāhena vāti ettha uddeso ceva kammañca ekaṃ, vohāro ceva anussāvanā ca salākaggāho ca ekaṃ, vohārānussāvanasalākaggāhā pubbabhāgā, kammañceva uddeso ca pamāṇaṃ.
அத்³தா⁴னஹீனோ நாம ஊனவீஸதிவஸ்ஸோ. அங்க³ஹீனோ நாம ஹத்த²ச்சி²ன்னாதி³பே⁴தோ³. வத்து²விபன்னோ நாம பண்ட³கோ திரச்சா²னக³தோ உப⁴தொப்³யஞ்ஜனகோ ச. அவஸேஸா தெ²ய்யஸங்வாஸகாத³யோ அட்ட² அப⁴ப்³ப³புக்³க³லா கரணது³க்கடகா நாம. து³க்கடகிரியா து³க்கடகம்மா, இமஸ்மிங்யேவ அத்தபா⁴வே கதேன அத்தனோ கம்மேன அப⁴ப்³ப³ட்டா²னங் பத்தாதி அத்தோ². அபரிபூரோ நாம அபரிபுண்ணபத்தசீவரோ. நோ ச யாசதி நாம உபஸம்பத³ங் ந யாசதி. அலஜ்ஜிஸ்ஸ ச பா³லஸ்ஸ சாதி அலஜ்ஜீ ஸசேபி தேபிடகோ ஹோதி, பா³லோ ச ஸசேபி ஸட்டி²வஸ்ஸோ ஹோதி, உபோ⁴பி நிஸ்ஸாய ந வத்த²ப்³ப³ங். பா³லஸ்ஸ ச லஜ்ஜிஸ்ஸ சாதி எத்த² பா³லஸ்ஸ ‘‘த்வங் நிஸ்ஸயங் க³ண்ஹா’’தி ஆணாயபி நிஸ்ஸயோ தா³தப்³போ³, லஜ்ஜிஸ்ஸ பன யாசந்தஸ்ஸேவ. ஸாதிஸாரந்தி ஸதோ³ஸங்; யங் அஜ்ஜா²சரந்தோ ஆபத்திங் ஆபஜ்ஜதி.
Addhānahīno nāma ūnavīsativasso. Aṅgahīno nāma hatthacchinnādibhedo. Vatthuvipanno nāma paṇḍako tiracchānagato ubhatobyañjanako ca. Avasesā theyyasaṃvāsakādayo aṭṭha abhabbapuggalā karaṇadukkaṭakā nāma. Dukkaṭakiriyā dukkaṭakammā, imasmiṃyeva attabhāve katena attano kammena abhabbaṭṭhānaṃ pattāti attho. Aparipūro nāma aparipuṇṇapattacīvaro. No ca yācati nāma upasampadaṃ na yācati. Alajjissa ca bālassa cāti alajjī sacepi tepiṭako hoti, bālo ca sacepi saṭṭhivasso hoti, ubhopi nissāya na vatthabbaṃ. Bālassa ca lajjissa cāti ettha bālassa ‘‘tvaṃ nissayaṃ gaṇhā’’ti āṇāyapi nissayo dātabbo, lajjissa pana yācantasseva. Sātisāranti sadosaṃ; yaṃ ajjhācaranto āpattiṃ āpajjati.
காயேன படிக்கோஸனா நாம ஹத்த²விகாராதீ³ஹி படிக்கோஸனா. காயேன படிஜானாதீதி ஹத்த²விகாராதீ³ஹி படிஜானாதி. உபகா⁴திகா நாம உபகா⁴தா. ஸிக்கூ²பகா⁴திகா நாம ஸிக்கூ²பகா⁴தோ. போ⁴கூ³பகா⁴திகா நாம பரிபோ⁴கூ³பகா⁴தோ, தத்த² திஸ்ஸோ ஸிக்கா² அஸிக்க²தோ ஸிக்கூ²பகா⁴திகாதி வேதி³தப்³பா³. ஸங்கி⁴கங் வா புக்³க³லிகங் வா து³ப்பரிபோ⁴க³ங் பு⁴ஞ்ஜதோ போ⁴கூ³பகா⁴திகாதி வேதி³தப்³பா³. த்³வே வேனயிகாதி த்³வே அத்தா² வினயஸித்³தா⁴. பஞ்ஞத்தங் நாம ஸகலே வினயபிடகே கப்பியாகப்பியவஸேன பஞ்ஞத்தங். பஞ்ஞத்தானுலோமங் நாம சதூஸு மஹாபதே³ஸேஸு த³ட்ட²ப்³ப³ங். ஸேதுகா⁴தோதி பச்சயகா⁴தோ; யேன சித்தேன அகப்பியங் கரெய்ய, தஸ்ஸ சித்தஸ்ஸாபி அனுப்பாத³னந்தி அத்தோ². மத்தகாரிதாதி மத்தாய பமாணேன கரணங்; பமாணே டா²னந்தி அத்தோ². காயேன ஆபஜ்ஜதீதி காயத்³வாரிகங் காயேன ஆபஜ்ஜதி; வசீத்³வாரிகங் வாசாய. காயேன வுட்டா²தீதி திணவத்தா²ரகஸமதே² வினாபி தே³ஸனாய காயேனேவ வுட்டா²தி; தே³ஸெத்வா வுட்ட²ஹந்தோ பன வாசாய வுட்டா²தி. அப்³ப⁴ந்தரபரிபோ⁴கோ³ நாம அஜ்ஜோ²ஹரணபரிபோ⁴கோ³. பா³ஹிரபரிபோ⁴கோ³ நாம ஸீஸமக்க²னாதி³.
Kāyena paṭikkosanā nāma hatthavikārādīhi paṭikkosanā. Kāyena paṭijānātīti hatthavikārādīhi paṭijānāti. Upaghātikā nāma upaghātā. Sikkhūpaghātikā nāma sikkhūpaghāto. Bhogūpaghātikā nāma paribhogūpaghāto, tattha tisso sikkhā asikkhato sikkhūpaghātikāti veditabbā. Saṅghikaṃ vā puggalikaṃ vā dupparibhogaṃ bhuñjato bhogūpaghātikāti veditabbā. Dve venayikāti dve atthā vinayasiddhā. Paññattaṃ nāma sakale vinayapiṭake kappiyākappiyavasena paññattaṃ. Paññattānulomaṃ nāma catūsu mahāpadesesu daṭṭhabbaṃ. Setughātoti paccayaghāto; yena cittena akappiyaṃ kareyya, tassa cittassāpi anuppādananti attho. Mattakāritāti mattāya pamāṇena karaṇaṃ; pamāṇe ṭhānanti attho. Kāyena āpajjatīti kāyadvārikaṃ kāyena āpajjati; vacīdvārikaṃ vācāya. Kāyena vuṭṭhātīti tiṇavatthārakasamathe vināpi desanāya kāyeneva vuṭṭhāti; desetvā vuṭṭhahanto pana vācāya vuṭṭhāti. Abbhantaraparibhogo nāma ajjhoharaṇaparibhogo. Bāhiraparibhogo nāma sīsamakkhanādi.
அனாக³தங் பா⁴ரங் வஹதீதி அதே²ரோவ ஸமானோ தே²ரேஹி வஹிதப்³ப³ங் பீ³ஜனகா³ஹத⁴ம்மஜ்ஜே²ஸனாதி³பா⁴ரங் வஹதி; தங் நித்த²ரிதுங் வீரியங் ஆரப⁴தி. ஆக³தங் பா⁴ரங் ந வஹதீதி தே²ரோ தே²ரகிச்சங் ந கரோதி, ‘‘அனுஜானாமி பி⁴க்க²வே தே²ரேன பி⁴க்கு²னா ஸாமங் வா த⁴ம்மங் பா⁴ஸிதுங், பரங் வா அஜ்ஜே²ஸிதுங், அனுஜானாமி பி⁴க்க²வே தே²ராதெ⁴ய்யங் பாதிமொக்க²’’ந்தி ஏவமாதி³ ஸப்³ப³ங் பரிஹாபேதீதி அத்தோ². ந குக்குச்சாயிதப்³ப³ங் குக்குச்சாயதீதி ந குக்குச்சாயிதப்³ப³ங் குக்குச்சாயித்வா கரோதி. குக்குச்சாயிதப்³ப³ங் ந குக்குச்சாயதீதி குக்குச்சாயிதப்³ப³ங் ந குக்குச்சாயித்வா கரோதி. ஏதேஸங் த்³வின்னங் தி³வா ச ரத்தோ ச ஆஸவா வட்³ட⁴ந்தீதி அத்தோ². அனந்தரது³கேபி வுத்தபடிபக்க²வஸேன அத்தோ² வேதி³தப்³போ³. ஸேஸங் தத்த² தத்த² வுத்தனயத்தா உத்தானமேவாதி.
Anāgataṃ bhāraṃ vahatīti atherova samāno therehi vahitabbaṃ bījanagāhadhammajjhesanādibhāraṃ vahati; taṃ nittharituṃ vīriyaṃ ārabhati. Āgataṃ bhāraṃ na vahatīti thero therakiccaṃ na karoti, ‘‘anujānāmi bhikkhave therena bhikkhunā sāmaṃ vā dhammaṃ bhāsituṃ, paraṃ vā ajjhesituṃ, anujānāmi bhikkhave therādheyyaṃ pātimokkha’’nti evamādi sabbaṃ parihāpetīti attho. Na kukkuccāyitabbaṃ kukkuccāyatīti na kukkuccāyitabbaṃ kukkuccāyitvā karoti. Kukkuccāyitabbaṃ na kukkuccāyatīti kukkuccāyitabbaṃ na kukkuccāyitvā karoti. Etesaṃ dvinnaṃ divā ca ratto ca āsavā vaḍḍhantīti attho. Anantaradukepi vuttapaṭipakkhavasena attho veditabbo. Sesaṃ tattha tattha vuttanayattā uttānamevāti.
து³கவாரவண்ணனா நிட்டி²தா.
Dukavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பரிவாரபாளி • Parivārapāḷi / 2. து³கவாரோ • 2. Dukavāro
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / து³கவாரவண்ணனா • Dukavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / து³கவாரவண்ணனா • Dukavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / து³கவாரவண்ணனா • Dukavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ து³கவாரவண்ணனா • Ekuttarikanayo dukavāravaṇṇanā
