| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
দুকৰারৰণ্ণনা
Dukavāravaṇṇanā
৩২২. দুকেসু সযমেৰ সপুগ্গলোতি আহ ‘‘মুদুপিট্ঠিকস্সা’’তিআদি। আদি-সদ্দেন অঙ্গজাতচ্ছেদঅত্তঘাতাদিআপত্তিযো সঙ্গহিতা।
322. Dukesu sayameva sapuggaloti āha ‘‘mudupiṭṭhikassā’’tiādi. Ādi-saddena aṅgajātacchedaattaghātādiāpattiyo saṅgahitā.
ভণ্ডাগারিকচিত্তকম্মানি ৰাতি গহট্ঠানং ভণ্ডপটিসামনং, ইত্থিপুরিসাদিপটিভানচিত্তকম্মানি ৰা। ‘‘চীৰরাদীনি অদেন্তো আপজ্জতী’’তি ইদং ‘‘উপজ্ঝাযেন, ভিক্খৰে, সদ্ধিৰিহারিকো সঙ্গহেতব্বো অনুগ্গহেতব্বো…পে॰… পত্তো দাতব্বো’’তিআদি (মহাৰ॰ ৬৭) ৰচনতো অনাদরিযেন আমিসসঙ্গহং অকরোন্তস্স দুক্কটং, ভিক্খুনিযা পাচিত্তিযঞ্চ সন্ধায ৰুত্তং। নিস্সট্ঠচীৰরাদীনং অদানআপত্তিপি এত্থেৰ সঙ্গহিতা।
Bhaṇḍāgārikacittakammāni vāti gahaṭṭhānaṃ bhaṇḍapaṭisāmanaṃ, itthipurisādipaṭibhānacittakammāni vā. ‘‘Cīvarādīni adento āpajjatī’’ti idaṃ ‘‘upajjhāyena, bhikkhave, saddhivihāriko saṅgahetabbo anuggahetabbo…pe… patto dātabbo’’tiādi (mahāva. 67) vacanato anādariyena āmisasaṅgahaṃ akarontassa dukkaṭaṃ, bhikkhuniyā pācittiyañca sandhāya vuttaṃ. Nissaṭṭhacīvarādīnaṃ adānaāpattipi ettheva saṅgahitā.
পাল়িযং দেসেন্তোতি সভাগাপত্তিং, অদেসনাগামিনিআদিঞ্চ দেসেন্তো। নিদানুদ্দেসে আপত্তিং অনাৰিকরোন্তো, ন দেসেন্তো চ আপজ্জতি নাম। ওৰাদং অগণ্হন্তোতি ভিক্খূহি ভিক্খুনিওৰাদত্থায ৰুত্তং ৰচনং অগণ্হন্তো বালগিলানগমিযৰিৰজ্জিতো। অত্তনো পরিভোগত্থং দিন্নং অঞ্ঞস্স দানে, সঙ্ঘাটিং অপারুপিত্ৰা সন্তরুত্তরেন গামপ্পৰেসনাদীসু চ আপত্তিযোপি অপরিভোগেন আপজ্জিতব্বাপত্তিযোৰ। পমাণন্তি সঙ্ঘভেদানন্তরিযনিপ্ফত্তিযা লক্খণং। বালস্সাতি নিস্সযগ্গহণৰিধিং অজানন্তস্স লজ্জিবালস্সেৰ। লজ্জিস্সাতি ব্যত্তস্স নিস্সযদাযকসভাগতং পরিৰীমংসন্তস্স। ৰিনযে আগতা অত্থা ৰেনযিকাতি আহ ‘‘দ্ৰে অত্থা ৰিনযসিদ্ধা’’তি।
Pāḷiyaṃ desentoti sabhāgāpattiṃ, adesanāgāminiādiñca desento. Nidānuddese āpattiṃ anāvikaronto, na desento ca āpajjati nāma. Ovādaṃ agaṇhantoti bhikkhūhi bhikkhuniovādatthāya vuttaṃ vacanaṃ agaṇhanto bālagilānagamiyavivajjito. Attano paribhogatthaṃ dinnaṃ aññassa dāne, saṅghāṭiṃ apārupitvā santaruttarena gāmappavesanādīsu ca āpattiyopi aparibhogena āpajjitabbāpattiyova. Pamāṇanti saṅghabhedānantariyanipphattiyā lakkhaṇaṃ. Bālassāti nissayaggahaṇavidhiṃ ajānantassa lajjibālasseva. Lajjissāti byattassa nissayadāyakasabhāgataṃ parivīmaṃsantassa. Vinaye āgatā atthā venayikāti āha ‘‘dve atthā vinayasiddhā’’ti.
পাল়িযং অপ্পত্তো নিস্সারণন্তি এত্থ পব্বাজনীযকম্মং ৰিহারতো নিস্সারণত্তা নিস্সারণন্তি অধিপ্পেতং, তঞ্চ যস্মা কুলদূসকং অকরোন্তো পুগ্গলো আপত্তিবহুলোপি আৰেণিকলক্খণেন অপ্পত্তো নাম হোতি, তস্মা অপ্পত্তো নিস্সারণং। যস্মা পন আপত্তাদিবহুলস্সাপি ‘‘আকঙ্খমানো সঙ্ঘো পব্বাজনীযকম্মং করেয্যা’’তি (চূল়ৰ॰ ২৭) ৰুত্তং, তস্মা সুনিস্সারিতো, সব্বথা পন সুদ্ধো নিরাপত্তিকো দুন্নিস্সারিতোতি দট্ঠব্বো।
Pāḷiyaṃ appatto nissāraṇanti ettha pabbājanīyakammaṃ vihārato nissāraṇattā nissāraṇanti adhippetaṃ, tañca yasmā kuladūsakaṃ akaronto puggalo āpattibahulopi āveṇikalakkhaṇena appatto nāma hoti, tasmā appatto nissāraṇaṃ. Yasmā pana āpattādibahulassāpi ‘‘ākaṅkhamāno saṅgho pabbājanīyakammaṃ kareyyā’’ti (cūḷava. 27) vuttaṃ, tasmā sunissārito, sabbathā pana suddho nirāpattiko dunnissāritoti daṭṭhabbo.
অপ্পত্তো ওসারণন্তিআদীসু উপসম্পদাকম্মং এত্থ ওসারণং অধিপ্পেতং, তঞ্চ হত্থচ্ছিন্নাদিকো একচ্চো পটিক্খিত্তত্তা অপ্পত্তোপি সোসারিতো, পণ্ডকাদিকো দোসারিতোতি অত্থো।
Appatto osāraṇantiādīsu upasampadākammaṃ ettha osāraṇaṃ adhippetaṃ, tañca hatthacchinnādiko ekacco paṭikkhittattā appattopi sosārito, paṇḍakādiko dosāritoti attho.
দুকৰারৰণ্ণনা নিট্ঠিতা।
Dukavāravaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ২. দুকৰারো • 2. Dukavāro
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / দুকৰারৰণ্ণনা • Dukavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / দুকৰারৰণ্ণনা • Dukavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / দুকৰারৰণ্ণনা • Dukavāravaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / একুত্তরিকনযো দুকৰারৰণ্ণনা • Ekuttarikanayo dukavāravaṇṇanā
