| Library / Tipiṭaka / ติปิฎก • Tipiṭaka / ปริวาร-อฎฺฐกถา • Parivāra-aṭṭhakathā |
ทุกวารวณฺณนา
Dukavāravaṇṇanā
๓๒๒. ทุเกสุ สจิตฺตกา อาปตฺติ สญฺญาวิโมกฺขา, อจิตฺตกา โนสญฺญาวิโมกฺขาฯ ลทฺธสมาปตฺติกสฺส อาปตฺติ นาม ภูตาโรจนาปตฺติ, อลทฺธสมาปตฺติกสฺส อาปตฺติ นาม อภูตาโรจนาปตฺติฯ สทฺธมฺมปฎิสญฺญุตฺตา นาม ปทโสธมฺมาทิกา, อสทฺธมฺมปฎิสญฺญุตฺตา นาม ทุฎฺฐุลฺลวาจาปตฺติฯ สปริกฺขารปฎิสญฺญุตฺตา นาม นิสฺสคฺคิยวตฺถุโน อนิสฺสชฺชิตฺวา ปริโภเค, ปตฺตจีวรานํ นิทหเน, กิลิฎฺฐจีวรานํ อโธวเน, มลคฺคหิตปตฺตสฺส อปจเนติ เอวํ อยุตฺตปริโภเค อาปตฺติฯ ปรปริกฺขารปฎิสญฺญุตฺตา นาม สงฺฆิกมญฺจปีฐาทีนํ อโชฺฌกาเส สนฺถรณอนาปุจฺฉาคมนาทีสุ อาปชฺชิตพฺพา อาปตฺติฯ สปุคฺคลปฎิสญฺญุตฺตา นาม ‘‘มุทุปิฎฺฐิกสฺส ลมฺพิสฺส อูรุนา องฺคชาตํ ปีเฬนฺตสฺสา’’ติอาทินา นเยน วุตฺตาปตฺติฯ ปรปุคฺคลปฎิสญฺญุตฺตา นาม เมถุนธมฺมกายสํสคฺคปหารทานาทีสุ วุตฺตาปตฺติ, ‘‘สิขรณีสี’’ติ สจฺจํ ภณโนฺต ครุกํ อาปชฺชติ, ‘‘สมฺปชานมุสาวาเท ปาจิตฺติย’’นฺติ มุสา ภณโนฺต ลหุกํฯ อภูตาโรจเน มุสา ภณโนฺต ครุกํฯ ภูตาโรจเน สจฺจํ ภณโนฺต ลหุกํฯ
322. Dukesu sacittakā āpatti saññāvimokkhā, acittakā nosaññāvimokkhā. Laddhasamāpattikassa āpatti nāma bhūtārocanāpatti, aladdhasamāpattikassa āpatti nāma abhūtārocanāpatti. Saddhammapaṭisaññuttā nāma padasodhammādikā, asaddhammapaṭisaññuttā nāma duṭṭhullavācāpatti. Saparikkhārapaṭisaññuttā nāma nissaggiyavatthuno anissajjitvā paribhoge, pattacīvarānaṃ nidahane, kiliṭṭhacīvarānaṃ adhovane, malaggahitapattassa apacaneti evaṃ ayuttaparibhoge āpatti. Paraparikkhārapaṭisaññuttā nāma saṅghikamañcapīṭhādīnaṃ ajjhokāse santharaṇaanāpucchāgamanādīsu āpajjitabbā āpatti. Sapuggalapaṭisaññuttā nāma ‘‘mudupiṭṭhikassa lambissa ūrunā aṅgajātaṃ pīḷentassā’’tiādinā nayena vuttāpatti. Parapuggalapaṭisaññuttā nāma methunadhammakāyasaṃsaggapahāradānādīsu vuttāpatti, ‘‘sikharaṇīsī’’ti saccaṃ bhaṇanto garukaṃ āpajjati, ‘‘sampajānamusāvāde pācittiya’’nti musā bhaṇanto lahukaṃ. Abhūtārocane musā bhaṇanto garukaṃ. Bhūtārocane saccaṃ bhaṇanto lahukaṃ.
‘‘สงฺฆกมฺมํ วคฺคํ กริสฺสามี’’ติ อโนฺตสีมาย เอกมเนฺต นิสีทโนฺต ภูมิคโต อาปชฺชติ นามฯ สเจ ปน องฺคุลิมตฺตมฺปิ อากาเส ติเฎฺฐยฺย, น อาปเชฺชยฺย, เตน วุตฺตํ ‘‘โน เวหาสคโต’’ติฯ เวหาสกุฎิยา อาหจฺจปาทกํ มญฺจํ วา ปีฐํ วา อภินิสีทโนฺต เวหาสคโต อาปชฺชติ นามฯ สเจ ปน ตํ ภูมิยํ ปญฺญาเปตฺวา นิปเชฺชยฺย น อาปเชฺชยฺย, เตน วุตฺตํ – ‘‘โน ภูมิคโต’’ติฯ คมิโย คมิยวตฺตํ อปูเรตฺวา คจฺฉโนฺต นิกฺขมโนฺต อาปชฺชติ นาม, โน ปวิสโนฺตฯ อาคนฺตุโก อาคนฺตุกวตฺตํ อปูเรตฺวา สฉตฺตุปาหโน ปวิสโนฺต ปวิสโนฺต อาปชฺชติ นาม, โน นิกฺขมโนฺตฯ
‘‘Saṅghakammaṃ vaggaṃ karissāmī’’ti antosīmāya ekamante nisīdanto bhūmigato āpajjati nāma. Sace pana aṅgulimattampi ākāse tiṭṭheyya, na āpajjeyya, tena vuttaṃ ‘‘no vehāsagato’’ti. Vehāsakuṭiyā āhaccapādakaṃ mañcaṃ vā pīṭhaṃ vā abhinisīdanto vehāsagatoāpajjati nāma. Sace pana taṃ bhūmiyaṃ paññāpetvā nipajjeyya na āpajjeyya, tena vuttaṃ – ‘‘no bhūmigato’’ti. Gamiyo gamiyavattaṃ apūretvā gacchanto nikkhamanto āpajjati nāma, no pavisanto. Āgantuko āgantukavattaṃ apūretvā sachattupāhano pavisanto pavisanto āpajjati nāma, no nikkhamanto.
อาทิยโนฺต อาปชฺชติ นาม ภิกฺขุนี อติคมฺภีรํ อุทกสุทฺธิกํ อาทิยมานา; ทุพฺพณฺณกรณํ อนาทิยิตฺวา จีวรํ ปริภุญฺชโนฺต ปน อนาทิยโนฺต อาปชฺชติ นามฯ มูคพฺพตาทีนิ ติตฺถิยวตฺตานิ สมาทิยโนฺต สมาทิยโนฺต อาปชฺชติ นามฯ ปาริวาสิกาทโย ปน ตชฺชนียาทิกมฺมกตา วา อตฺตโน วตฺตํ อสมาทิยนฺตา อาปชฺชนฺติ, เต สนฺธาย วุตฺตํ ‘‘อตฺถาปตฺติ น สมาทิยโนฺต อาปชฺชตี’’ติฯ อญฺญาติกาย ภิกฺขุนิยา จีวรํ สิพฺพโนฺต เวชฺชกมฺมภณฺฑาคาริกกมฺมจิตฺตกมฺมาทีนิ วา กโรโนฺต กโรโนฺต อาปชฺชติ นามฯ อุปชฺฌายวตฺตาทีนิ อกโรโนฺต อกโรโนฺต อาปชฺชติ นามฯ อญฺญาติกาย ภิกฺขุนิยา จีวรํ ททมาโน เทโนฺต อาปชฺชติ นามฯ สทฺธิวิหาริกอเนฺตวาสิกานํ จีวราทีนิ อเทโนฺต อเทโนฺต อาปชฺชติ นามฯ อญฺญาติกาย ภิกฺขุนิยา จีวรํ คณฺหโนฺต ปฎิคฺคณฺหโนฺต อาปชฺชติ นามฯ ‘‘น ภิกฺขเว โอวาโท น คเหตโพฺพ’’ติ วจนโต โอวาทํ อคณฺหโนฺต น ปฎิคฺคณฺหโนฺต อาปชฺชติ นามฯ
Ādiyantoāpajjati nāma bhikkhunī atigambhīraṃ udakasuddhikaṃ ādiyamānā; dubbaṇṇakaraṇaṃ anādiyitvā cīvaraṃ paribhuñjanto pana anādiyanto āpajjati nāma. Mūgabbatādīni titthiyavattāni samādiyanto samādiyanto āpajjati nāma. Pārivāsikādayo pana tajjanīyādikammakatā vā attano vattaṃ asamādiyantā āpajjanti, te sandhāya vuttaṃ ‘‘atthāpatti na samādiyanto āpajjatī’’ti. Aññātikāya bhikkhuniyā cīvaraṃ sibbanto vejjakammabhaṇḍāgārikakammacittakammādīni vā karonto karonto āpajjati nāma. Upajjhāyavattādīni akaronto akaronto āpajjati nāma. Aññātikāya bhikkhuniyā cīvaraṃ dadamāno dento āpajjati nāma. Saddhivihārikaantevāsikānaṃ cīvarādīni adento adento āpajjati nāma. Aññātikāya bhikkhuniyā cīvaraṃ gaṇhanto paṭiggaṇhanto āpajjati nāma. ‘‘Na bhikkhave ovādo na gahetabbo’’ti vacanato ovādaṃ agaṇhanto na paṭiggaṇhanto āpajjati nāma.
นิสฺสคฺคิยวตฺถุํ อนิสฺสชฺชิตฺวา ปริภุญฺชโนฺต ปริโภเคน อาปชฺชติ นามฯ ปญฺจาหิกํ สงฺฆาฎิจารํ อติกฺกามยมานา อปริโภเคน อาปชฺชติ นามฯ สหคารเสยฺยํ รตฺติํ อาปชฺชติ นาม, โน ทิวา, ทฺวารํ อสํวริตฺวา ปฎิสลฺลียโนฺต ทิวา อาปชฺชติ, โน รตฺติํฯ เอกรตฺตฉารตฺตสตฺตาหทสาหมาสาติกฺกเมสุ วุตฺตอาปตฺติํ อาปชฺชโนฺต อรุณุเคฺค อาปชฺชติ นาม, ปวาเรตฺวา ภุญฺชโนฺต น อรุณุเคฺค อาปชฺชติ นามฯ
Nissaggiyavatthuṃ anissajjitvā paribhuñjanto paribhogena āpajjati nāma. Pañcāhikaṃ saṅghāṭicāraṃ atikkāmayamānā aparibhogena āpajjati nāma. Sahagāraseyyaṃ rattiṃ āpajjati nāma, no divā, dvāraṃ asaṃvaritvā paṭisallīyanto divā āpajjati, no rattiṃ. Ekarattachārattasattāhadasāhamāsātikkamesu vuttaāpattiṃ āpajjanto aruṇugge āpajjati nāma, pavāretvā bhuñjanto na aruṇugge āpajjati nāma.
ภูตคามเญฺจว องฺคชาตญฺจ ฉินฺทโนฺต ฉินฺทโนฺต อาปชฺชติ นาม, เกเส วา นเข วา น ฉินฺทโนฺต น ฉินฺทโนฺต อาปชฺชติ นามฯ อาปตฺติํ ฉาเทโนฺต ฉาเทโนฺต อาปชฺชติ นาม, ‘‘ติเณน วา ปเณฺณน วา ปฎิจฺฉาเทตฺวา อาคนฺตพฺพํ, นเตฺวว นเคฺคน อาคนฺตพฺพํ, โย อาคเจฺฉยฺย อาปตฺติ ทุกฺกฎสฺสา’’ติ อิมํ ปน อาปตฺติํ น ฉาเทโนฺต อาปชฺชติ นามฯ กุสจีราทีนิ ธาเรโนฺต ธาเรโนฺต อาปชฺชติ นาม, ‘‘อยํ เต ภิกฺขุ ปโตฺต ยาว เภทนาย ธาเรตโพฺพ’’ติ อิมํ อาปตฺติํ น ธาเรโนฺต อาปชฺชติ นามฯ
Bhūtagāmañceva aṅgajātañca chindanto chindanto āpajjati nāma, kese vā nakhe vā na chindanto na chindanto āpajjati nāma. Āpattiṃ chādento chādento āpajjati nāma, ‘‘tiṇena vā paṇṇena vā paṭicchādetvā āgantabbaṃ, natveva naggena āgantabbaṃ, yo āgaccheyya āpatti dukkaṭassā’’ti imaṃ pana āpattiṃ na chādento āpajjati nāma. Kusacīrādīni dhārento dhārento āpajjati nāma, ‘‘ayaṃ te bhikkhu patto yāva bhedanāya dhāretabbo’’ti imaṃ āpattiṃ na dhārento āpajjati nāma.
‘‘อตฺตนา วา อตฺตานํ นานาสํวาสกํ กโรตี’’ติ เอกสีมายํ ทฺวีสุ สเงฺฆสุ นิสิเนฺนสุ เอกสฺมิํ ปเกฺข นิสีทิตฺวา ปรปกฺขสฺส ลทฺธิํ คณฺหโนฺต ยสฺมิํ ปเกฺข นิสิโนฺน เตสํ อตฺตนาว อตฺตานํ นานาสํวาสกํ กโรติ นามฯ เยสํ สนฺติเก นิสิโนฺน เตสํ คณปูรโก หุตฺวา กมฺมํ โกเปติ, อิตเรสํ หตฺถปาสํ อนาคตตฺตาฯ สมานสํวาสเกปิ เอเสว นโยฯ เยสญฺหิ โส ลทฺธิํ โรเจติ, เตสํ สมานสํวาสโก โหติ, อิตเรสํ นานาสํวาสโกฯ สตฺต อาปตฺติโย สตฺต อาปตฺติกฺขนฺธาติ อาปชฺชิตพฺพโต อาปตฺติโย, ราสเฎฺฐน ขนฺธาติ เอวํ เทฺวเยว นามานิ โหนฺตีติ นามวเสน ทุกํ ทสฺสิตํฯ กเมฺมน วา สลากคฺคาเหน วาติ เอตฺถ อุเทฺทโส เจว กมฺมญฺจ เอกํ, โวหาโร เจว อนุสฺสาวนา จ สลากคฺคาโห จ เอกํ, โวหารานุสฺสาวนสลากคฺคาหา ปุพฺพภาคา, กมฺมเญฺจว อุเทฺทโส จ ปมาณํฯ
‘‘Attanā vā attānaṃ nānāsaṃvāsakaṃ karotī’’ti ekasīmāyaṃ dvīsu saṅghesu nisinnesu ekasmiṃ pakkhe nisīditvā parapakkhassa laddhiṃ gaṇhanto yasmiṃ pakkhe nisinno tesaṃ attanāva attānaṃ nānāsaṃvāsakaṃ karoti nāma. Yesaṃ santike nisinno tesaṃ gaṇapūrako hutvā kammaṃ kopeti, itaresaṃ hatthapāsaṃ anāgatattā. Samānasaṃvāsakepi eseva nayo. Yesañhi so laddhiṃ roceti, tesaṃ samānasaṃvāsako hoti, itaresaṃ nānāsaṃvāsako. Satta āpattiyo satta āpattikkhandhāti āpajjitabbato āpattiyo, rāsaṭṭhena khandhāti evaṃ dveyeva nāmāni hontīti nāmavasena dukaṃ dassitaṃ. Kammena vā salākaggāhena vāti ettha uddeso ceva kammañca ekaṃ, vohāro ceva anussāvanā ca salākaggāho ca ekaṃ, vohārānussāvanasalākaggāhā pubbabhāgā, kammañceva uddeso ca pamāṇaṃ.
อทฺธานหีโน นาม อูนวีสติวโสฺสฯ องฺคหีโน นาม หตฺถจฺฉินฺนาทิเภโทฯ วตฺถุวิปโนฺน นาม ปณฺฑโก ติรจฺฉานคโต อุภโตพฺยญฺชนโก จฯ อวเสสา เถยฺยสํวาสกาทโย อฎฺฐ อภพฺพปุคฺคลา กรณทุกฺกฎกา นามฯ ทุกฺกฎกิริยา ทุกฺกฎกมฺมา, อิมสฺมิํเยว อตฺตภาเว กเตน อตฺตโน กเมฺมน อภพฺพฎฺฐานํ ปตฺตาติ อโตฺถฯ อปริปูโร นาม อปริปุณฺณปตฺตจีวโรฯ โน จ ยาจติ นาม อุปสมฺปทํ น ยาจติฯ อลชฺชิสฺส จ พาลสฺส จาติ อลชฺชี สเจปิ เตปิฎโก โหติ, พาโล จ สเจปิ สฎฺฐิวโสฺส โหติ, อุโภปิ นิสฺสาย น วตฺถพฺพํฯ พาลสฺส จ ลชฺชิสฺส จาติ เอตฺถ พาลสฺส ‘‘ตฺวํ นิสฺสยํ คณฺหา’’ติ อาณายปิ นิสฺสโย ทาตโพฺพ, ลชฺชิสฺส ปน ยาจนฺตเสฺสวฯ สาติสารนฺติ สโทสํ; ยํ อชฺฌาจรโนฺต อาปตฺติํ อาปชฺชติฯ
Addhānahīno nāma ūnavīsativasso. Aṅgahīno nāma hatthacchinnādibhedo. Vatthuvipanno nāma paṇḍako tiracchānagato ubhatobyañjanako ca. Avasesā theyyasaṃvāsakādayo aṭṭha abhabbapuggalā karaṇadukkaṭakā nāma. Dukkaṭakiriyā dukkaṭakammā, imasmiṃyeva attabhāve katena attano kammena abhabbaṭṭhānaṃ pattāti attho. Aparipūro nāma aparipuṇṇapattacīvaro. No ca yācati nāma upasampadaṃ na yācati. Alajjissa ca bālassa cāti alajjī sacepi tepiṭako hoti, bālo ca sacepi saṭṭhivasso hoti, ubhopi nissāya na vatthabbaṃ. Bālassa ca lajjissa cāti ettha bālassa ‘‘tvaṃ nissayaṃ gaṇhā’’ti āṇāyapi nissayo dātabbo, lajjissa pana yācantasseva. Sātisāranti sadosaṃ; yaṃ ajjhācaranto āpattiṃ āpajjati.
กาเยน ปฎิโกฺกสนา นาม หตฺถวิการาทีหิ ปฎิโกฺกสนาฯ กาเยน ปฎิชานาตีติ หตฺถวิการาทีหิ ปฎิชานาติฯ อุปฆาติกา นาม อุปฆาตาฯ สิกฺขูปฆาติกา นาม สิกฺขูปฆาโตฯ โภคูปฆาติกา นาม ปริโภคูปฆาโต, ตตฺถ ติโสฺส สิกฺขา อสิกฺขโต สิกฺขูปฆาติกาติ เวทิตพฺพาฯ สงฺฆิกํ วา ปุคฺคลิกํ วา ทุปฺปริโภคํ ภุญฺชโต โภคูปฆาติกาติ เวทิตพฺพาฯ เทฺว เวนยิกาติ เทฺว อตฺถา วินยสิทฺธาฯ ปญฺญตฺตํ นาม สกเล วินยปิฎเก กปฺปิยากปฺปิยวเสน ปญฺญตฺตํฯ ปญฺญตฺตานุโลมํ นาม จตูสุ มหาปเทเสสุ ทฎฺฐพฺพํฯ เสตุฆาโตติ ปจฺจยฆาโต; เยน จิเตฺตน อกปฺปิยํ กเรยฺย, ตสฺส จิตฺตสฺสาปิ อนุปฺปาทนนฺติ อโตฺถฯ มตฺตการิตาติ มตฺตาย ปมาเณน กรณํ; ปมาเณ ฐานนฺติ อโตฺถฯ กาเยน อาปชฺชตีติ กายทฺวาริกํ กาเยน อาปชฺชติ; วจีทฺวาริกํ วาจายฯ กาเยน วุฎฺฐาตีติ ติณวตฺถารกสมเถ วินาปิ เทสนาย กาเยเนว วุฎฺฐาติ; เทเสตฺวา วุฎฺฐหโนฺต ปน วาจาย วุฎฺฐาติฯ อพฺภนฺตรปริโภโค นาม อโชฺฌหรณปริโภโคฯ พาหิรปริโภโค นาม สีสมกฺขนาทิฯ
Kāyena paṭikkosanā nāma hatthavikārādīhi paṭikkosanā. Kāyena paṭijānātīti hatthavikārādīhi paṭijānāti. Upaghātikā nāma upaghātā. Sikkhūpaghātikā nāma sikkhūpaghāto. Bhogūpaghātikā nāma paribhogūpaghāto, tattha tisso sikkhā asikkhato sikkhūpaghātikāti veditabbā. Saṅghikaṃ vā puggalikaṃ vā dupparibhogaṃ bhuñjato bhogūpaghātikāti veditabbā. Dve venayikāti dve atthā vinayasiddhā. Paññattaṃ nāma sakale vinayapiṭake kappiyākappiyavasena paññattaṃ. Paññattānulomaṃ nāma catūsu mahāpadesesu daṭṭhabbaṃ. Setughātoti paccayaghāto; yena cittena akappiyaṃ kareyya, tassa cittassāpi anuppādananti attho. Mattakāritāti mattāya pamāṇena karaṇaṃ; pamāṇe ṭhānanti attho. Kāyena āpajjatīti kāyadvārikaṃ kāyena āpajjati; vacīdvārikaṃ vācāya. Kāyena vuṭṭhātīti tiṇavatthārakasamathe vināpi desanāya kāyeneva vuṭṭhāti; desetvā vuṭṭhahanto pana vācāya vuṭṭhāti. Abbhantaraparibhogo nāma ajjhoharaṇaparibhogo. Bāhiraparibhogo nāma sīsamakkhanādi.
อนาคตํ ภารํ วหตีติ อเถโรว สมาโน เถเรหิ วหิตพฺพํ พีชนคาหธมฺมเชฺฌสนาทิภารํ วหติ; ตํ นิตฺถริตุํ วีริยํ อารภติฯ อาคตํ ภารํ น วหตีติ เถโร เถรกิจฺจํ น กโรติ, ‘‘อนุชานามิ ภิกฺขเว เถเรน ภิกฺขุนา สามํ วา ธมฺมํ ภาสิตุํ, ปรํ วา อเชฺฌสิตุํ, อนุชานามิ ภิกฺขเว เถราเธยฺยํ ปาติโมกฺข’’นฺติ เอวมาทิ สพฺพํ ปริหาเปตีติ อโตฺถฯ น กุกฺกุจฺจายิตพฺพํ กุกฺกุจฺจายตีติ น กุกฺกุจฺจายิตพฺพํ กุกฺกุจฺจายิตฺวา กโรติฯ กุกฺกุจฺจายิตพฺพํ น กุกฺกุจฺจายตีติ กุกฺกุจฺจายิตพฺพํ น กุกฺกุจฺจายิตฺวา กโรติฯ เอเตสํ ทฺวินฺนํ ทิวา จ รโตฺต จ อาสวา วฑฺฒนฺตีติ อโตฺถฯ อนนฺตรทุเกปิ วุตฺตปฎิปกฺขวเสน อโตฺถ เวทิตโพฺพฯ เสสํ ตตฺถ ตตฺถ วุตฺตนยตฺตา อุตฺตานเมวาติฯ
Anāgataṃ bhāraṃ vahatīti atherova samāno therehi vahitabbaṃ bījanagāhadhammajjhesanādibhāraṃ vahati; taṃ nittharituṃ vīriyaṃ ārabhati. Āgataṃ bhāraṃ na vahatīti thero therakiccaṃ na karoti, ‘‘anujānāmi bhikkhave therena bhikkhunā sāmaṃ vā dhammaṃ bhāsituṃ, paraṃ vā ajjhesituṃ, anujānāmi bhikkhave therādheyyaṃ pātimokkha’’nti evamādi sabbaṃ parihāpetīti attho. Na kukkuccāyitabbaṃ kukkuccāyatīti na kukkuccāyitabbaṃ kukkuccāyitvā karoti. Kukkuccāyitabbaṃ na kukkuccāyatīti kukkuccāyitabbaṃ na kukkuccāyitvā karoti. Etesaṃ dvinnaṃ divā ca ratto ca āsavā vaḍḍhantīti attho. Anantaradukepi vuttapaṭipakkhavasena attho veditabbo. Sesaṃ tattha tattha vuttanayattā uttānamevāti.
ทุกวารวณฺณนา นิฎฺฐิตาฯ
Dukavāravaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ปริวารปาฬิ • Parivārapāḷi / ๒. ทุกวาโร • 2. Dukavāro
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ทุกวารวณฺณนา • Dukavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ทุกวารวณฺณนา • Dukavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ทุกวารวณฺณนา • Dukavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / เอกุตฺตริกนโย ทุกวารวณฺณนา • Ekuttarikanayo dukavāravaṇṇanā
