| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
ទុកវារវណ្ណនា
Dukavāravaṇṇanā
៣២២. ទុកេសុ សយមេវ សបុគ្គលោតិ អាហ ‘‘មុទុបិដ្ឋិកស្សា’’តិអាទិ។ អាទិ-សទ្ទេន អង្គជាតច្ឆេទអត្តឃាតាទិអាបត្តិយោ សង្គហិតា។
322. Dukesu sayameva sapuggaloti āha ‘‘mudupiṭṭhikassā’’tiādi. Ādi-saddena aṅgajātacchedaattaghātādiāpattiyo saṅgahitā.
ភណ្ឌាគារិកចិត្តកម្មានិ វាតិ គហដ្ឋានំ ភណ្ឌបដិសាមនំ, ឥត្ថិបុរិសាទិបដិភានចិត្តកម្មានិ វា។ ‘‘ចីវរាទីនិ អទេន្តោ អាបជ្ជតី’’តិ ឥទំ ‘‘ឧបជ្ឈាយេន, ភិក្ខវេ, សទ្ធិវិហារិកោ សង្គហេតព្ពោ អនុគ្គហេតព្ពោ…បេ.… បត្តោ ទាតព្ពោ’’តិអាទិ (មហាវ. ៦៧) វចនតោ អនាទរិយេន អាមិសសង្គហំ អករោន្តស្ស ទុក្កដំ, ភិក្ខុនិយា បាចិត្តិយញ្ច សន្ធាយ វុត្តំ។ និស្សដ្ឋចីវរាទីនំ អទានអាបត្តិបិ ឯត្ថេវ សង្គហិតា។
Bhaṇḍāgārikacittakammāni vāti gahaṭṭhānaṃ bhaṇḍapaṭisāmanaṃ, itthipurisādipaṭibhānacittakammāni vā. ‘‘Cīvarādīni adento āpajjatī’’ti idaṃ ‘‘upajjhāyena, bhikkhave, saddhivihāriko saṅgahetabbo anuggahetabbo…pe… patto dātabbo’’tiādi (mahāva. 67) vacanato anādariyena āmisasaṅgahaṃ akarontassa dukkaṭaṃ, bhikkhuniyā pācittiyañca sandhāya vuttaṃ. Nissaṭṭhacīvarādīnaṃ adānaāpattipi ettheva saṅgahitā.
បាឡិយំ ទេសេន្តោតិ សភាគាបត្តិំ, អទេសនាគាមិនិអាទិញ្ច ទេសេន្តោ។ និទានុទ្ទេសេ អាបត្តិំ អនាវិករោន្តោ, ន ទេសេន្តោ ច អាបជ្ជតិ នាម។ ឱវាទំ អគណ្ហន្តោតិ ភិក្ខូហិ ភិក្ខុនិឱវាទត្ថាយ វុត្តំ វចនំ អគណ្ហន្តោ ពាលគិលានគមិយវិវជ្ជិតោ។ អត្តនោ បរិភោគត្ថំ ទិន្នំ អញ្ញស្ស ទានេ, សង្ឃាដិំ អបារុបិត្វា សន្តរុត្តរេន គាមប្បវេសនាទីសុ ច អាបត្តិយោបិ អបរិភោគេន អាបជ្ជិតព្ពាបត្តិយោវ។ បមាណន្តិ សង្ឃភេទានន្តរិយនិប្ផត្តិយា លក្ខណំ។ ពាលស្សាតិ និស្សយគ្គហណវិធិំ អជានន្តស្ស លជ្ជិពាលស្សេវ។ លជ្ជិស្សាតិ ព្យត្តស្ស និស្សយទាយកសភាគតំ បរិវីមំសន្តស្ស។ វិនយេ អាគតា អត្ថា វេនយិកាតិ អាហ ‘‘ទ្វេ អត្ថា វិនយសិទ្ធា’’តិ។
Pāḷiyaṃ desentoti sabhāgāpattiṃ, adesanāgāminiādiñca desento. Nidānuddese āpattiṃ anāvikaronto, na desento ca āpajjati nāma. Ovādaṃ agaṇhantoti bhikkhūhi bhikkhuniovādatthāya vuttaṃ vacanaṃ agaṇhanto bālagilānagamiyavivajjito. Attano paribhogatthaṃ dinnaṃ aññassa dāne, saṅghāṭiṃ apārupitvā santaruttarena gāmappavesanādīsu ca āpattiyopi aparibhogena āpajjitabbāpattiyova. Pamāṇanti saṅghabhedānantariyanipphattiyā lakkhaṇaṃ. Bālassāti nissayaggahaṇavidhiṃ ajānantassa lajjibālasseva. Lajjissāti byattassa nissayadāyakasabhāgataṃ parivīmaṃsantassa. Vinaye āgatā atthā venayikāti āha ‘‘dve atthā vinayasiddhā’’ti.
បាឡិយំ អប្បត្តោ និស្សារណន្តិ ឯត្ថ បព្ពាជនីយកម្មំ វិហារតោ និស្សារណត្តា និស្សារណន្តិ អធិប្បេតំ, តញ្ច យស្មា កុលទូសកំ អករោន្តោ បុគ្គលោ អាបត្តិពហុលោបិ អាវេណិកលក្ខណេន អប្បត្តោ នាម ហោតិ, តស្មា អប្បត្តោ និស្សារណំ។ យស្មា បន អាបត្តាទិពហុលស្សាបិ ‘‘អាកង្ខមានោ សង្ឃោ បព្ពាជនីយកម្មំ ករេយ្យា’’តិ (ចូឡវ. ២៧) វុត្តំ, តស្មា សុនិស្សារិតោ, សព្ពថា បន សុទ្ធោ និរាបត្តិកោ ទុន្និស្សារិតោតិ ទដ្ឋព្ពោ។
Pāḷiyaṃ appatto nissāraṇanti ettha pabbājanīyakammaṃ vihārato nissāraṇattā nissāraṇanti adhippetaṃ, tañca yasmā kuladūsakaṃ akaronto puggalo āpattibahulopi āveṇikalakkhaṇena appatto nāma hoti, tasmā appatto nissāraṇaṃ. Yasmā pana āpattādibahulassāpi ‘‘ākaṅkhamāno saṅgho pabbājanīyakammaṃ kareyyā’’ti (cūḷava. 27) vuttaṃ, tasmā sunissārito, sabbathā pana suddho nirāpattiko dunnissāritoti daṭṭhabbo.
អប្បត្តោ ឱសារណន្តិអាទីសុ ឧបសម្បទាកម្មំ ឯត្ថ ឱសារណំ អធិប្បេតំ, តញ្ច ហត្ថច្ឆិន្នាទិកោ ឯកច្ចោ បដិក្ខិត្តត្តា អប្បត្តោបិ សោសារិតោ, បណ្ឌកាទិកោ ទោសារិតោតិ អត្ថោ។
Appatto osāraṇantiādīsu upasampadākammaṃ ettha osāraṇaṃ adhippetaṃ, tañca hatthacchinnādiko ekacco paṭikkhittattā appattopi sosārito, paṇḍakādiko dosāritoti attho.
ទុកវារវណ្ណនា និដ្ឋិតា។
Dukavāravaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ២. ទុកវារោ • 2. Dukavāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / ទុកវារវណ្ណនា • Dukavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ទុកវារវណ្ណនា • Dukavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ទុកវារវណ្ណនា • Dukavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ឯកុត្តរិកនយោ ទុកវារវណ្ណនា • Ekuttarikanayo dukavāravaṇṇanā
