| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
දුකවාරවණ්‌ණනා
Dukavāravaṇṇanā
322. දුකෙසු සයමෙව සපුග්‌ගලොති ආහ ‘‘මුදුපිට්‌ඨිකස්‌සා’’තිආදි. ආදි-සද්‌දෙන අඞ්‌ගජාතච්‌ඡෙදඅත්‌තඝාතාදිආපත්‌තියො සඞ්‌ගහිතා.
322. Dukesu sayameva sapuggaloti āha ‘‘mudupiṭṭhikassā’’tiādi. Ādi-saddena aṅgajātacchedaattaghātādiāpattiyo saṅgahitā.
භණ්‌ඩාගාරිකචිත්‌තකම්‌මානි වාති ගහට්‌ඨානං භණ්‌ඩපටිසාමනං, ඉත්‌ථිපුරිසාදිපටිභානචිත්‌තකම්‌මානි වා. ‘‘චීවරාදීනි අදෙන්‌තො ආපජ්‌ජතී’’ති ඉදං ‘‘උපජ්‌ඣායෙන, භික්‌ඛවෙ, සද්‌ධිවිහාරිකො සඞ්‌ගහෙතබ්‌බො අනුග්‌ගහෙතබ්‌බො…පෙ.… පත්‌තො දාතබ්‌බො’’තිආදි (මහාව. 67) වචනතො අනාදරියෙන ආමිසසඞ්‌ගහං අකරොන්‌තස්‌ස දුක්‌කටං, භික්‌ඛුනියා පාචිත්‌තියඤ්‌ච සන්‌ධාය වුත්‌තං. නිස්‌සට්‌ඨචීවරාදීනං අදානආපත්‌තිපි එත්‌ථෙව සඞ්‌ගහිතා.
Bhaṇḍāgārikacittakammāni vāti gahaṭṭhānaṃ bhaṇḍapaṭisāmanaṃ, itthipurisādipaṭibhānacittakammāni vā. ‘‘Cīvarādīni adento āpajjatī’’ti idaṃ ‘‘upajjhāyena, bhikkhave, saddhivihāriko saṅgahetabbo anuggahetabbo…pe… patto dātabbo’’tiādi (mahāva. 67) vacanato anādariyena āmisasaṅgahaṃ akarontassa dukkaṭaṃ, bhikkhuniyā pācittiyañca sandhāya vuttaṃ. Nissaṭṭhacīvarādīnaṃ adānaāpattipi ettheva saṅgahitā.
පාළියං දෙසෙන්‌තොති සභාගාපත්‌තිං, අදෙසනාගාමිනිආදිඤ්‌ච දෙසෙන්‌තො. නිදානුද්‌දෙසෙ ආපත්‌තිං අනාවිකරොන්‌තො, න දෙසෙන්‌තො ච ආපජ්‌ජති නාම. ඔවාදං අගණ්‌හන්‌තොති භික්‌ඛූහි භික්‌ඛුනිඔවාදත්‌ථාය වුත්‌තං වචනං අගණ්‌හන්‌තො බාලගිලානගමියවිවජ්‌ජිතො. අත්‌තනො පරිභොගත්‌ථං දින්‌නං අඤ්‌ඤස්‌ස දානෙ, සඞ්‌ඝාටිං අපාරුපිත්‌වා සන්‌තරුත්‌තරෙන ගාමප්‌පවෙසනාදීසු ච ආපත්‌තියොපි අපරිභොගෙන ආපජ්‌ජිතබ්‌බාපත්‌තියොව. පමාණන්‌ති සඞ්‌ඝභෙදානන්‌තරියනිප්‌ඵත්‌තියා ලක්‌ඛණං. බාලස්‌සාති නිස්‌සයග්‌ගහණවිධිං අජානන්‌තස්‌ස ලජ්‌ජිබාලස්‌සෙව. ලජ්‌ජිස්‌සාති බ්‍යත්‌තස්‌ස නිස්‌සයදායකසභාගතං පරිවීමංසන්‌තස්‌ස. විනයෙ ආගතා අත්‌ථා වෙනයිකාති ආහ ‘‘ද්‌වෙ අත්‌ථා විනයසිද්‌ධා’’ති.
Pāḷiyaṃ desentoti sabhāgāpattiṃ, adesanāgāminiādiñca desento. Nidānuddese āpattiṃ anāvikaronto, na desento ca āpajjati nāma. Ovādaṃ agaṇhantoti bhikkhūhi bhikkhuniovādatthāya vuttaṃ vacanaṃ agaṇhanto bālagilānagamiyavivajjito. Attano paribhogatthaṃ dinnaṃ aññassa dāne, saṅghāṭiṃ apārupitvā santaruttarena gāmappavesanādīsu ca āpattiyopi aparibhogena āpajjitabbāpattiyova. Pamāṇanti saṅghabhedānantariyanipphattiyā lakkhaṇaṃ. Bālassāti nissayaggahaṇavidhiṃ ajānantassa lajjibālasseva. Lajjissāti byattassa nissayadāyakasabhāgataṃ parivīmaṃsantassa. Vinaye āgatā atthā venayikāti āha ‘‘dve atthā vinayasiddhā’’ti.
පාළියං අප්‌පත්‌තො නිස්‌සාරණන්‌ති එත්‌ථ පබ්‌බාජනීයකම්‌මං විහාරතො නිස්‌සාරණත්‌තා නිස්‌සාරණන්‌ති අධිප්‌පෙතං, තඤ්‌ච යස්‌මා කුලදූසකං අකරොන්‌තො පුග්‌ගලො ආපත්‌තිබහුලොපි ආවෙණිකලක්‌ඛණෙන අප්‌පත්‌තො නාම හොති, තස්‌මා අප්‌පත්‌තො නිස්‌සාරණං. යස්‌මා පන ආපත්‌තාදිබහුලස්‌සාපි ‘‘ආකඞ්‌ඛමානො සඞ්‌ඝො පබ්‌බාජනීයකම්‌මං කරෙය්‍යා’’ති (චූළව. 27) වුත්‌තං, තස්‌මා සුනිස්‌සාරිතො, සබ්‌බථා පන සුද්‌ධො නිරාපත්‌තිකො දුන්‌නිස්‌සාරිතොති දට්‌ඨබ්‌බො.
Pāḷiyaṃ appatto nissāraṇanti ettha pabbājanīyakammaṃ vihārato nissāraṇattā nissāraṇanti adhippetaṃ, tañca yasmā kuladūsakaṃ akaronto puggalo āpattibahulopi āveṇikalakkhaṇena appatto nāma hoti, tasmā appatto nissāraṇaṃ. Yasmā pana āpattādibahulassāpi ‘‘ākaṅkhamāno saṅgho pabbājanīyakammaṃ kareyyā’’ti (cūḷava. 27) vuttaṃ, tasmā sunissārito, sabbathā pana suddho nirāpattiko dunnissāritoti daṭṭhabbo.
අප්‌පත්‌තො ඔසාරණන්‌තිආදීසු උපසම්‌පදාකම්‌මං එත්‌ථ ඔසාරණං අධිප්‌පෙතං, තඤ්‌ච හත්‌ථච්‌ඡින්‌නාදිකො එකච්‌චො පටික්‌ඛිත්‌තත්‌තා අප්‌පත්‌තොපි සොසාරිතො, පණ්‌ඩකාදිකො දොසාරිතොති අත්‌ථො.
Appatto osāraṇantiādīsu upasampadākammaṃ ettha osāraṇaṃ adhippetaṃ, tañca hatthacchinnādiko ekacco paṭikkhittattā appattopi sosārito, paṇḍakādiko dosāritoti attho.
දුකවාරවණ්‌ණනා නිට්‌ඨිතා.
Dukavāravaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi / 2. දුකවාරො • 2. Dukavāro
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / දුකවාරවණ්‌ණනා • Dukavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / දුකවාරවණ්‌ණනා • Dukavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / දුකවාරවණ්‌ණනා • Dukavāravaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / එකුත්‌තරිකනයො දුකවාරවණ්‌ණනා • Ekuttarikanayo dukavāravaṇṇanā
