| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
2. து³கவாரோ
2. Dukavāro
322. அத்தா²பத்தி ஸஞ்ஞா விமொக்கா², அத்தா²பத்தி நோ ஸஞ்ஞாவிமொக்கா². அத்தா²பத்தி லத்³த⁴ஸமாபத்திகஸ்ஸ, அத்தா²பத்தி ந லத்³த⁴ஸமாபத்திகஸ்ஸ. அத்தா²பத்தி ஸத்³த⁴ம்மபடிஸஞ்ஞுத்தா, அத்தா²பத்தி அஸத்³த⁴ம்மபடிஸஞ்ஞுத்தா. அத்தா²பத்தி ஸபரிக்கா²ரபடிஸஞ்ஞுத்தா, அத்தா²பத்தி பரபரிக்கா²ரபடிஸஞ்ஞுத்தா. அத்தா²பத்தி ஸபுக்³க³லபடிஸஞ்ஞுத்தா, அத்தா²பத்தி பரபுக்³க³லபடிஸஞ்ஞுத்தா. அத்தி² ஸச்சங் ப⁴ணந்தோ க³ருகங் ஆபத்திங் ஆபஜ்ஜதி, முஸா ப⁴ணந்தோ லஹுகங். அத்தி² முஸா ப⁴ணந்தோ க³ருகங் ஆபத்திங் ஆபஜ்ஜதி, ஸச்சங் ப⁴ணந்தோ லஹுகங். அத்தா²பத்தி பூ⁴மிக³தோ ஆபஜ்ஜதி, நோ வேஹாஸக³தோ. அத்தா²பத்தி வேஹாஸக³தோ ஆபஜ்ஜதி, நோ பூ⁴மிக³தோ. அத்தா²பத்தி நிக்க²மந்தோ ஆபஜ்ஜதி, நோ பவிஸந்தோ. அத்தா²பத்தி பவிஸந்தோ ஆபஜ்ஜதி, நோ நிக்க²மந்தோ. அத்தா²பத்தி ஆதி³யந்தோ ஆபஜ்ஜதி, அத்தா²பத்தி அனாதி³யந்தோ ஆபஜ்ஜதி. அத்தா²பத்தி ஸமாதி³யந்தோ ஆபஜ்ஜதி , அத்தா²பத்தி ந ஸமாதி³யந்தோ ஆபஜ்ஜதி. அத்தா²பத்தி கரொந்தோ ஆபஜ்ஜதி, அத்தா²பத்தி ந கரொந்தோ ஆபஜ்ஜதி. அத்தா²பத்தி தெ³ந்தோ ஆபஜ்ஜதி, அத்தா²பத்தி ந தெ³ந்தோ ஆபஜ்ஜதி. (அத்தா²பத்தி தே³ஸெந்தோ ஆபஜ்ஜதி, அத்தா²பத்தி ந தே³ஸெந்தோ ஆபஜ்ஜதி.) 1 அத்தா²பத்தி படிக்³க³ண்ஹந்தோ ஆபஜ்ஜதி, அத்தா²பத்தி ந படிக்³க³ண்ஹந்தோ ஆபஜ்ஜதி. அத்தா²பத்தி பரிபோ⁴கே³ன ஆபஜ்ஜதி, அத்தா²பத்தி ந பரிபோ⁴கே³ன ஆபஜ்ஜதி. அத்தா²பத்தி ரத்திங் ஆபஜ்ஜதி, நோ தி³வா. அத்தா²பத்தி தி³வா ஆபஜ்ஜதி, நோ ரத்திங். அத்தா²பத்தி அருணுக்³கே³ ஆபஜ்ஜதி, அத்தா²பத்தி ந அருணுக்³கே³ ஆபஜ்ஜதி. அத்தா²பத்தி சி²ந்த³ந்தோ ஆபஜ்ஜதி, அத்தா²பத்தி ந சி²ந்த³ந்தோ ஆபஜ்ஜதி. அத்தா²பத்தி சா²தெ³ந்தோ ஆபஜ்ஜதி, அத்தா²பத்தி ந சா²தெ³ந்தோ ஆபஜ்ஜதி. அத்தா²பத்தி தா⁴ரெந்தோ ஆபஜ்ஜதி, அத்தா²பத்தி ந தா⁴ரெந்தோ ஆபஜ்ஜதி.
322. Atthāpatti saññā vimokkhā, atthāpatti no saññāvimokkhā. Atthāpatti laddhasamāpattikassa, atthāpatti na laddhasamāpattikassa. Atthāpatti saddhammapaṭisaññuttā, atthāpatti asaddhammapaṭisaññuttā. Atthāpatti saparikkhārapaṭisaññuttā, atthāpatti paraparikkhārapaṭisaññuttā. Atthāpatti sapuggalapaṭisaññuttā, atthāpatti parapuggalapaṭisaññuttā. Atthi saccaṃ bhaṇanto garukaṃ āpattiṃ āpajjati, musā bhaṇanto lahukaṃ. Atthi musā bhaṇanto garukaṃ āpattiṃ āpajjati, saccaṃ bhaṇanto lahukaṃ. Atthāpatti bhūmigato āpajjati, no vehāsagato. Atthāpatti vehāsagato āpajjati, no bhūmigato. Atthāpatti nikkhamanto āpajjati, no pavisanto. Atthāpatti pavisanto āpajjati, no nikkhamanto. Atthāpatti ādiyanto āpajjati, atthāpatti anādiyanto āpajjati. Atthāpatti samādiyanto āpajjati , atthāpatti na samādiyanto āpajjati. Atthāpatti karonto āpajjati, atthāpatti na karonto āpajjati. Atthāpatti dento āpajjati, atthāpatti na dento āpajjati. (Atthāpatti desento āpajjati, atthāpatti na desento āpajjati.) 2 Atthāpatti paṭiggaṇhanto āpajjati, atthāpatti na paṭiggaṇhanto āpajjati. Atthāpatti paribhogena āpajjati, atthāpatti na paribhogena āpajjati. Atthāpatti rattiṃ āpajjati, no divā. Atthāpatti divā āpajjati, no rattiṃ. Atthāpatti aruṇugge āpajjati, atthāpatti na aruṇugge āpajjati. Atthāpatti chindanto āpajjati, atthāpatti na chindanto āpajjati. Atthāpatti chādento āpajjati, atthāpatti na chādento āpajjati. Atthāpatti dhārento āpajjati, atthāpatti na dhārento āpajjati.
த்³வே உபோஸதா² – சாதுத்³த³ஸிகோ ச பன்னரஸிகோ ச. த்³வே பவாரணா – சாதுத்³த³ஸிகா ச பன்னரஸிகா ச. த்³வே கம்மானி – அபலோகனகம்மங், ஞத்திகம்மங். அபரானிபி த்³வே கம்மானி – ஞத்திது³தியகம்மங், ஞத்திசதுத்த²கம்மங். த்³வே கம்மவத்தூ²னி – அபலோகனகம்மஸ்ஸ வத்து², ஞத்திகம்மஸ்ஸ வத்து². அபரானிபி த்³வே கம்மவத்தூ²னி – ஞத்திது³தியகம்மஸ்ஸ வத்து², ஞத்திசதுத்த²கம்மஸ்ஸ வத்து². த்³வே கம்மதோ³ஸா – அபலோகனகம்மஸ்ஸ தோ³ஸோ, ஞத்திகம்மஸ்ஸ தோ³ஸோ. அபரேபி த்³வே கம்மதோ³ஸா – ஞத்திது³தியகம்மஸ்ஸ தோ³ஸோ, ஞத்திசதுத்த²கம்மஸ்ஸ தோ³ஸோ. த்³வே கம்மஸம்பத்தியோ – அபலோகனகம்மஸ்ஸ ஸம்பத்தி, ஞத்திகம்மஸ்ஸ ஸம்பத்தி. அபராபி த்³வே கம்மஸம்பத்தியோ – ஞத்திது³தியகம்மஸ்ஸ ஸம்பத்தி, ஞத்திசதுத்த²கம்மஸ்ஸ ஸம்பத்தி. த்³வே நானாஸங்வாஸகபூ⁴மியோ – அத்தனா வா அத்தானங் நானாஸங்வாஸகங் கரோதி, ஸமக்³கோ³ வா நங் ஸங்கோ⁴ உக்கி²பதி அத³ஸ்ஸனே வா அப்படிகம்மே வா அப்படினிஸ்ஸக்³கே³ வா. த்³வே ஸமானஸங்வாஸகபூ⁴மியோ – அத்தனா வா அத்தானங் ஸமானஸங்வாஸகங் கரோதி, ஸமக்³கோ³ வா நங் ஸங்கோ⁴ உக்கி²த்தங் ஓஸாரேதி த³ஸ்ஸனே வா படிகம்மே வா படினிஸ்ஸக்³கே³ வா. த்³வே பாராஜிகா – பி⁴க்கூ²னஞ்ச பி⁴க்கு²னீனஞ்ச. த்³வே ஸங்கா⁴தி³ஸேஸா, த்³வே து²ல்லச்சயா, த்³வே பாசித்தியா, த்³வே பாடிதே³ஸனீயா, த்³வே து³க்கடா, த்³வே து³ப்³பா⁴ஸிதா – பி⁴க்கூ²னஞ்ச பி⁴க்கு²னீனஞ்ச. ஸத்த ஆபத்தியோ, ஸத்த ஆபத்திக்க²ந்தா⁴. த்³வீஹாகாரேஹி ஸங்கோ⁴ பி⁴ஜ்ஜதி – கம்மேன வா ஸலாகக்³கா³ஹேன வா.
Dve uposathā – cātuddasiko ca pannarasiko ca. Dve pavāraṇā – cātuddasikā ca pannarasikā ca. Dve kammāni – apalokanakammaṃ, ñattikammaṃ. Aparānipi dve kammāni – ñattidutiyakammaṃ, ñatticatutthakammaṃ. Dve kammavatthūni – apalokanakammassa vatthu, ñattikammassa vatthu. Aparānipi dve kammavatthūni – ñattidutiyakammassa vatthu, ñatticatutthakammassa vatthu. Dve kammadosā – apalokanakammassa doso, ñattikammassa doso. Aparepi dve kammadosā – ñattidutiyakammassa doso, ñatticatutthakammassa doso. Dve kammasampattiyo – apalokanakammassa sampatti, ñattikammassa sampatti. Aparāpi dve kammasampattiyo – ñattidutiyakammassa sampatti, ñatticatutthakammassa sampatti. Dve nānāsaṃvāsakabhūmiyo – attanā vā attānaṃ nānāsaṃvāsakaṃ karoti, samaggo vā naṃ saṅgho ukkhipati adassane vā appaṭikamme vā appaṭinissagge vā. Dve samānasaṃvāsakabhūmiyo – attanā vā attānaṃ samānasaṃvāsakaṃ karoti, samaggo vā naṃ saṅgho ukkhittaṃ osāreti dassane vā paṭikamme vā paṭinissagge vā. Dve pārājikā – bhikkhūnañca bhikkhunīnañca. Dve saṅghādisesā, dve thullaccayā, dve pācittiyā, dve pāṭidesanīyā, dve dukkaṭā, dve dubbhāsitā – bhikkhūnañca bhikkhunīnañca. Satta āpattiyo, satta āpattikkhandhā. Dvīhākārehi saṅgho bhijjati – kammena vā salākaggāhena vā.
த்³வே புக்³க³லா ந உபஸம்பாதே³தப்³பா³ – அத்³தா⁴னஹீனோ, அங்க³ஹீனோ. அபரேபி த்³வே புக்³க³லா ந உபஸம்பாதே³தப்³பா³ – வத்து²விபன்னோ, கரணது³க்கடகோ. அபரேபி த்³வே புக்³க³லா ந உபஸம்பாதே³தப்³பா³ – அபரிபூரோ பரிபூரோ நோ ச யாசதி. த்³வின்னங் புக்³க³லானங் நிஸ்ஸாய ந வத்த²ப்³ப³ங் – அலஜ்ஜிஸ்ஸ ச பா³லஸ்ஸ ச. த்³வின்னங் புக்³க³லானங் நிஸ்ஸயோ ந தா³தப்³போ³ – அலஜ்ஜிஸ்ஸ ச லஜ்ஜினோ ச ந யாசதி. த்³வின்னங் புக்³க³லானங் நிஸ்ஸயோ தா³தப்³போ³ – பா³லஸ்ஸ ச லஜ்ஜிஸ்ஸ ச யாசதி. த்³வே புக்³க³லா அப⁴ப்³பா³ ஆபத்திங் ஆபஜ்ஜிதுங் – பு³த்³தா⁴ ச பச்சேகபு³த்³தா⁴ ச. த்³வே புக்³க³லா ப⁴ப்³பா³, ஆபத்திங் ஆபஜ்ஜிதுங் – பி⁴க்கூ² ச பி⁴க்கு²னியோ ச. த்³வே புக்³க³லா அப⁴ப்³பா³ ஸஞ்சிச்ச ஆபத்திங் ஆபஜ்ஜிதுங் – பி⁴க்கூ² ச பி⁴க்கு²னியோ ச அரியபுக்³க³லா. த்³வே புக்³க³லா ப⁴ப்³பா³ ஸஞ்சிச்ச ஆபத்திங் ஆபஜ்ஜிதுங் – பி⁴க்கூ² ச பி⁴க்கு²னியோ ச புது²ஜ்ஜனா. த்³வே புக்³க³லா அப⁴ப்³பா³ ஸஞ்சிச்ச ஸாதிஸாரங் வத்து²ங் அஜ்ஜா²சரிதுங் – பி⁴க்கூ² ச பி⁴க்கு²னியோ ச அரியபுக்³க³லா. த்³வே புக்³க³லா ப⁴ப்³பா³ ஸஞ்சிச்ச ஸாதிஸாரங் வத்து²ங் அஜ்ஜா²சரிதுங் – பி⁴க்கூ² ச பி⁴க்கு²னியோ ச புது²ஜ்ஜனா.
Dve puggalā na upasampādetabbā – addhānahīno, aṅgahīno. Aparepi dve puggalā na upasampādetabbā – vatthuvipanno, karaṇadukkaṭako. Aparepi dve puggalā na upasampādetabbā – aparipūro paripūro no ca yācati. Dvinnaṃ puggalānaṃ nissāya na vatthabbaṃ – alajjissa ca bālassa ca. Dvinnaṃ puggalānaṃ nissayo na dātabbo – alajjissa ca lajjino ca na yācati. Dvinnaṃ puggalānaṃ nissayo dātabbo – bālassa ca lajjissa ca yācati. Dve puggalā abhabbā āpattiṃ āpajjituṃ – buddhā ca paccekabuddhā ca. Dve puggalā bhabbā, āpattiṃ āpajjituṃ – bhikkhū ca bhikkhuniyo ca. Dve puggalā abhabbā sañcicca āpattiṃ āpajjituṃ – bhikkhū ca bhikkhuniyo ca ariyapuggalā. Dve puggalā bhabbā sañcicca āpattiṃ āpajjituṃ – bhikkhū ca bhikkhuniyo ca puthujjanā. Dve puggalā abhabbā sañcicca sātisāraṃ vatthuṃ ajjhācarituṃ – bhikkhū ca bhikkhuniyo ca ariyapuggalā. Dve puggalā bhabbā sañcicca sātisāraṃ vatthuṃ ajjhācarituṃ – bhikkhū ca bhikkhuniyo ca puthujjanā.
த்³வே படிக்கோஸா – காயேன வா படிக்கோஸதி வாசாய வா படிக்கோஸதி. த்³வே நிஸ்ஸாரணா – அத்தி² புக்³க³லோ அப்பத்தோ நிஸ்ஸாரணங் தங் சே ஸங்கோ⁴ நிஸ்ஸாரேதி ஏகச்சோ ஸுனிஸ்ஸாரிதோ, ஏகச்சோ து³ன்னிஸ்ஸாரிதோ. த்³வே ஓஸாரணா – அத்தி² புக்³க³லோ அப்பத்தோ ஓஸாரணங் தங் சே ஸங்கோ⁴ ஓஸாரேதி ஏகச்சோ ஸோஸாரிதோ, ஏகச்சோ தோ³ஸாரிதோ. த்³வே படிஞ்ஞா – காயேன வா படிஜானாதி வாசாய வா படிஜானாதி. த்³வே படிக்³க³ஹா – காயேன வா படிக்³க³ண்ஹாதி காயபடிப³த்³தே⁴ன வா படிக்³க³ண்ஹாதி. த்³வே படிக்கே²பா – காயேன வா படிக்கி²பதி வாசாய வா படிக்கி²பதி. த்³வே உபகா⁴திகா – ஸிக்கூ²பகா⁴திகா ச போ⁴கூ³பகா⁴திகா ச. த்³வே சோத³னா – காயேன வா சோதே³தி வாசாய வா சோதே³தி. த்³வே கதி²னஸ்ஸ பலிபோ³தா⁴ – ஆவாஸபலிபோ³தோ⁴ ச சீவரபலிபோ³தோ⁴ ச. த்³வே கதி²னஸ்ஸ அபலிபோ³தா⁴ – ஆவாஸஅபலிபோ³தோ⁴ ச சீவரஅபலிபோ³தோ⁴ ச. த்³வே சீவரானி – க³ஹபதிகஞ்ச பங்ஸுகூலஞ்ச. த்³வே பத்தா – அயோபத்தோ மத்திகாபத்தோ. த்³வே மண்ட³லானி – திபுமயங், ஸீஸமயங். த்³வே பத்தஸ்ஸ அதி⁴ட்டா²னா – காயேன வா அதி⁴ட்டே²தி வாசாய வா அதி⁴ட்டே²தி. த்³வே சீவரஸ்ஸ அதி⁴ட்டா²னா – காயேன வா அதி⁴ட்டே²தி வாசாய வா அதி⁴ட்டே²தி. த்³வே விகப்பனா – ஸம்முகா²விகப்பனா ச பரம்முகா²விகப்பனா ச. த்³வே வினயா – பி⁴க்கூ²னஞ்ச பி⁴க்கு²னீனஞ்ச. த்³வே வேனயிகா – பஞ்ஞத்தஞ்ச பஞ்ஞத்தானுலோமஞ்ச. த்³வே வினயஸ்ஸ ஸல்லேகா² – அகப்பியே ஸேதுகா⁴தோ, கப்பியே மத்தகாரிதா. த்³வீஹாகாரேஹி ஆபத்திங் ஆபஜ்ஜதி – காயேன வா ஆபஜ்ஜதி வாசாய வா ஆபஜ்ஜதி. த்³வீஹாகாரேஹி ஆபத்தியா வுட்டா²தி – காயேன வா வுட்டா²தி வாசாய வா வுட்டா²தி. த்³வே பரிவாஸா – படிச்ச²ன்னபரிவாஸோ, அப்படிச்ச²ன்னபரிவாஸோ. அபரேபி த்³வே பரிவாஸா – ஸுத்³த⁴ந்தபரிவாஸோ ஸமோதா⁴னபரிவாஸோ. த்³வே மானத்தா – படிச்ச²ன்னமானத்தங், அப்படிச்ச²ன்னமானத்தங். அபரேபி த்³வே மானத்தா – பக்க²மானத்தங், ஸமோதா⁴னமானத்தங். த்³வின்னங் புக்³க³லானங் ரத்திச்சே²தோ³ – பாரிவாஸிகஸ்ஸ ச மானத்தசாரிகஸ்ஸ ச. த்³வே அனாத³ரியானி – புக்³க³லானாத³ரியஞ்ச த⁴ம்மானாத³ரியஞ்ச. த்³வே லோணானி – ஜாதிமஞ்ச காரிமஞ்ச 3. அபரானிபி த்³வே லோணானி – ஸாமுத்³த³ங் காளலோணங். அபரானிபி த்³வே லோணானி – ஸிந்த⁴வங், உப்³பி⁴த³ங் 4. அபரானிபி த்³வே லோணானி – ரோமகங், பக்காலகங். த்³வே பரிபோ⁴கா³ – அப்³ப⁴ந்தரபரிபோ⁴கோ³ ச பா³ஹிரபரிபோ⁴கோ³ ச. த்³வே அக்கோஸா – ஹீனோ ச அக்கோஸோ உக்கட்டோ² ச அக்கோஸோ. த்³வீஹாகாரேஹி பேஸுஞ்ஞங் ஹோதி – பியகம்யஸ்ஸ வா பே⁴தா³தி⁴ப்பாயஸ்ஸ வா. த்³வீஹாகாரேஹி க³ணபோ⁴ஜனங் பஸவதி – நிமந்தனதோ வா விஞ்ஞத்திதோ வா. த்³வே வஸ்ஸூபனாயிகா – புரிமிகா, பச்சி²மிகா. த்³வே அத⁴ம்மிகானி பாதிமொக்க²ட்ட²பனானி. த்³வே த⁴ம்மிகானி பாதிமொக்க²ட்ட²பனானி.
Dve paṭikkosā – kāyena vā paṭikkosati vācāya vā paṭikkosati. Dve nissāraṇā – atthi puggalo appatto nissāraṇaṃ taṃ ce saṅgho nissāreti ekacco sunissārito, ekacco dunnissārito. Dve osāraṇā – atthi puggalo appatto osāraṇaṃ taṃ ce saṅgho osāreti ekacco sosārito, ekacco dosārito. Dve paṭiññā – kāyena vā paṭijānāti vācāya vā paṭijānāti. Dve paṭiggahā – kāyena vā paṭiggaṇhāti kāyapaṭibaddhena vā paṭiggaṇhāti. Dve paṭikkhepā – kāyena vā paṭikkhipati vācāya vā paṭikkhipati. Dve upaghātikā – sikkhūpaghātikā ca bhogūpaghātikā ca. Dve codanā – kāyena vā codeti vācāya vā codeti. Dve kathinassa palibodhā – āvāsapalibodho ca cīvarapalibodho ca. Dve kathinassa apalibodhā – āvāsaapalibodho ca cīvaraapalibodho ca. Dve cīvarāni – gahapatikañca paṃsukūlañca. Dve pattā – ayopatto mattikāpatto. Dve maṇḍalāni – tipumayaṃ, sīsamayaṃ. Dve pattassa adhiṭṭhānā – kāyena vā adhiṭṭheti vācāya vā adhiṭṭheti. Dve cīvarassa adhiṭṭhānā – kāyena vā adhiṭṭheti vācāya vā adhiṭṭheti. Dve vikappanā – sammukhāvikappanā ca parammukhāvikappanā ca. Dve vinayā – bhikkhūnañca bhikkhunīnañca. Dve venayikā – paññattañca paññattānulomañca. Dve vinayassa sallekhā – akappiye setughāto, kappiye mattakāritā. Dvīhākārehi āpattiṃ āpajjati – kāyena vā āpajjati vācāya vā āpajjati. Dvīhākārehi āpattiyā vuṭṭhāti – kāyena vā vuṭṭhāti vācāya vā vuṭṭhāti. Dve parivāsā – paṭicchannaparivāso, appaṭicchannaparivāso. Aparepi dve parivāsā – suddhantaparivāso samodhānaparivāso. Dve mānattā – paṭicchannamānattaṃ, appaṭicchannamānattaṃ. Aparepi dve mānattā – pakkhamānattaṃ, samodhānamānattaṃ. Dvinnaṃ puggalānaṃ ratticchedo – pārivāsikassa ca mānattacārikassa ca. Dve anādariyāni – puggalānādariyañca dhammānādariyañca. Dve loṇāni – jātimañca kārimañca 5. Aparānipi dve loṇāni – sāmuddaṃ kāḷaloṇaṃ. Aparānipi dve loṇāni – sindhavaṃ, ubbhidaṃ 6. Aparānipi dve loṇāni – romakaṃ, pakkālakaṃ. Dve paribhogā – abbhantaraparibhogo ca bāhiraparibhogo ca. Dve akkosā – hīno ca akkoso ukkaṭṭho ca akkoso. Dvīhākārehi pesuññaṃ hoti – piyakamyassa vā bhedādhippāyassa vā. Dvīhākārehi gaṇabhojanaṃ pasavati – nimantanato vā viññattito vā. Dve vassūpanāyikā – purimikā, pacchimikā. Dve adhammikāni pātimokkhaṭṭhapanāni. Dve dhammikāni pātimokkhaṭṭhapanāni.
7 த்³வே புக்³க³லா பா³லா – யோ ச அனாக³தங் பா⁴ரங் வஹதி, யோ ச ஆக³தங் பா⁴ரங் ந வஹதி. த்³வே புக்³க³லா பண்டி³தா – யோ ச அனாக³தங் பா⁴ரங் ந வஹதி, யோ ச ஆக³தங் பா⁴ரங் வஹதி. அபரேபி த்³வே புக்³க³லா பா³லா – யோ ச அகப்பியே கப்பியஸஞ்ஞீ, யோ ச கப்பியே அகப்பியஸஞ்ஞீ. த்³வே புக்³க³லா பண்டி³தா – யோ ச அகப்பியே அகப்பியஸஞ்ஞீ, யோ ச கப்பியே கப்பியஸஞ்ஞீ. அபரேபி த்³வே புக்³க³லா பா³லா – யோ ச அனாபத்தியா ஆபத்திஸஞ்ஞீ, யோ ச ஆபத்தியா அனாபத்திஸஞ்ஞீ. த்³வே புக்³க³லா பண்டி³தா – யோ ச ஆபத்தியா ஆபத்திஸஞ்ஞீ, யோ ச அனாபத்தியா அனாபத்திஸஞ்ஞீ. அபரேபி த்³வே புக்³க³லா பா³லா – யோ ச அத⁴ம்மே த⁴ம்மஸஞ்ஞீ, யோ ச த⁴ம்மே அத⁴ம்மஸஞ்ஞீ. த்³வே புக்³க³லா பண்டி³தா – யோ ச அத⁴ம்மே அத⁴ம்மஸஞ்ஞீ, யோ ச த⁴ம்மே த⁴ம்மஸஞ்ஞீ. அபரேபி த்³வே புக்³க³லா பா³லா – யோ ச அவினயே வினயஸஞ்ஞீ, யோ ச வினயே அவினயஸஞ்ஞீ. த்³வே புக்³க³லா பண்டி³தா – யோ ச அவினயே அவினயஸஞ்ஞீ, யோ ச வினயே வினயஸஞ்ஞீ.
8 Dve puggalā bālā – yo ca anāgataṃ bhāraṃ vahati, yo ca āgataṃ bhāraṃ na vahati. Dve puggalā paṇḍitā – yo ca anāgataṃ bhāraṃ na vahati, yo ca āgataṃ bhāraṃ vahati. Aparepi dve puggalā bālā – yo ca akappiye kappiyasaññī, yo ca kappiye akappiyasaññī. Dve puggalā paṇḍitā – yo ca akappiye akappiyasaññī, yo ca kappiye kappiyasaññī. Aparepi dve puggalā bālā – yo ca anāpattiyā āpattisaññī, yo ca āpattiyā anāpattisaññī. Dve puggalā paṇḍitā – yo ca āpattiyā āpattisaññī, yo ca anāpattiyā anāpattisaññī. Aparepi dve puggalā bālā – yo ca adhamme dhammasaññī, yo ca dhamme adhammasaññī. Dve puggalā paṇḍitā – yo ca adhamme adhammasaññī, yo ca dhamme dhammasaññī. Aparepi dve puggalā bālā – yo ca avinaye vinayasaññī, yo ca vinaye avinayasaññī. Dve puggalā paṇḍitā – yo ca avinaye avinayasaññī, yo ca vinaye vinayasaññī.
9 த்³வின்னங் புக்³க³லானங் ஆஸவா வட்³ட⁴ந்தி – யோ ச ந குக்குச்சாயிதப்³ப³ங் குக்குச்சாயதி, யோ ச குக்குச்சாயிதப்³ப³ங் குக்குச்சாயதி. த்³வின்னங் புக்³க³லானங் ஆஸவா ந வட்³ட⁴ந்தி – யோ ச குக்குச்சாயிதப்³ப³ங் ந குக்குச்சாயதி, யோ ச குக்குச்சாயிதப்³ப³ங் குக்குச்சாயதி. அபரேஸம்பி த்³வின்னங் புக்³க³லானங் ஆஸவா வட்³ட⁴ந்தி – யோ ச அகப்பியே கப்பியஸஞ்ஞீ, யோ ச கப்பியே அகப்பியஸஞ்ஞீ. த்³வின்னங் புக்³க³லானங் ஆஸவா ந வட்³ட⁴ந்தி – யோ ச அகப்பியே அகப்பியஸஞ்ஞீ, யோ ச கப்பியே கப்பியஸஞ்ஞீ. அபரேஸம்பி த்³வின்னங் புக்³க³லானங் ஆஸவா வட்³ட⁴ந்தி – யோ ச அனாபத்தியா ஆபத்திஸஞ்ஞீ, யோ ச ஆபத்தியா அனாபத்திஸஞ்ஞீ. த்³வின்னங் புக்³க³லானங் ஆஸவா ந வட்³ட⁴ந்தி – யோ ச அனாபத்தியா அனாபத்திஸஞ்ஞீ, யோ ச ஆபத்தியா ஆபத்திஸஞ்ஞீ. அபரேஸம்பி த்³வின்னங் புக்³க³லானங் ஆஸவா வட்³ட⁴ந்தி – யோ ச அத⁴ம்மே த⁴ம்மஸஞ்ஞீ, யோ ச த⁴ம்மே அத⁴ம்மஸஞ்ஞீ. த்³வின்னங் புக்³க³லானங் ஆஸவா ந வட்³ட⁴ந்தி – யோ ச அத⁴ம்மே அத⁴ம்மஸஞ்ஞீ, யோ ச த⁴ம்மே த⁴ம்மஸஞ்ஞீ. அபரேஸம்பி த்³வின்னங் புக்³க³லானங் ஆஸவா வட்³ட⁴ந்தி – யோ ச அவினயே வினயஸஞ்ஞீ, யோ ச வினயே அவினயஸஞ்ஞீ. த்³வின்னங் புக்³க³லானங் ஆஸவா ந வட்³ட⁴ந்தி – யோ ச அவினயே அவினயஸஞ்ஞீ, யோ ச வினயே வினயஸஞ்ஞீ.
10 Dvinnaṃ puggalānaṃ āsavā vaḍḍhanti – yo ca na kukkuccāyitabbaṃ kukkuccāyati, yo ca kukkuccāyitabbaṃ kukkuccāyati. Dvinnaṃ puggalānaṃ āsavā na vaḍḍhanti – yo ca kukkuccāyitabbaṃ na kukkuccāyati, yo ca kukkuccāyitabbaṃ kukkuccāyati. Aparesampi dvinnaṃ puggalānaṃ āsavā vaḍḍhanti – yo ca akappiye kappiyasaññī, yo ca kappiye akappiyasaññī. Dvinnaṃ puggalānaṃ āsavā na vaḍḍhanti – yo ca akappiye akappiyasaññī, yo ca kappiye kappiyasaññī. Aparesampi dvinnaṃ puggalānaṃ āsavā vaḍḍhanti – yo ca anāpattiyā āpattisaññī, yo ca āpattiyā anāpattisaññī. Dvinnaṃ puggalānaṃ āsavā na vaḍḍhanti – yo ca anāpattiyā anāpattisaññī, yo ca āpattiyā āpattisaññī. Aparesampi dvinnaṃ puggalānaṃ āsavā vaḍḍhanti – yo ca adhamme dhammasaññī, yo ca dhamme adhammasaññī. Dvinnaṃ puggalānaṃ āsavā na vaḍḍhanti – yo ca adhamme adhammasaññī, yo ca dhamme dhammasaññī. Aparesampi dvinnaṃ puggalānaṃ āsavā vaḍḍhanti – yo ca avinaye vinayasaññī, yo ca vinaye avinayasaññī. Dvinnaṃ puggalānaṃ āsavā na vaḍḍhanti – yo ca avinaye avinayasaññī, yo ca vinaye vinayasaññī.
து³கா நிட்டி²தா.
Dukā niṭṭhitā.
தஸ்ஸுத்³தா³னங் –
Tassuddānaṃ –
ஸஞ்ஞா லத்³தா⁴ ச ஸத்³த⁴ம்மா, பரிக்கா²ரா ச புக்³க³லா;
Saññā laddhā ca saddhammā, parikkhārā ca puggalā;
ஸச்சங் பூ⁴மி நிக்க²மந்தோ, ஆதி³யந்தோ ஸமாதி³யங்.
Saccaṃ bhūmi nikkhamanto, ādiyanto samādiyaṃ.
கரொந்தோ தெ³ந்தோ க³ண்ஹந்தோ, பரிபோ⁴கே³ன ரத்தி ச;
Karonto dento gaṇhanto, paribhogena ratti ca;
அருணாசி²ந்த³ங் சா²தெ³ந்தோ, தா⁴ரெந்தோ ச உபோஸதா².
Aruṇāchindaṃ chādento, dhārento ca uposathā.
பவாரணா கம்மாபரா, வத்து² அபரா தோ³ஸா ச;
Pavāraṇā kammāparā, vatthu aparā dosā ca;
அபரா த்³வே ச ஸம்பத்தி, நானா ஸமானமேவ ச.
Aparā dve ca sampatti, nānā samānameva ca.
பாராஜிஸங்க⁴து²ல்லச்சய, பாசித்தி பாடிதே³ஸனா;
Pārājisaṅghathullaccaya, pācitti pāṭidesanā;
து³க்கடா து³ப்³பா⁴ஸிதா சேவ, ஸத்த ஆபத்திக்க²ந்தா⁴ ச.
Dukkaṭā dubbhāsitā ceva, satta āpattikkhandhā ca.
பி⁴ஜ்ஜதி உபஸம்பதா³, ததே²வ அபரே து³வே;
Bhijjati upasampadā, tatheva apare duve;
ந வத்த²ப்³ப³ங் ந தா³தப்³ப³ங், அப⁴ப்³பா³ப⁴ப்³ப³மேவ ச.
Na vatthabbaṃ na dātabbaṃ, abhabbābhabbameva ca.
ஸஞ்சிச்ச ஸாதிஸாரா ச, படிக்கோஸா நிஸ்ஸாரணா;
Sañcicca sātisārā ca, paṭikkosā nissāraṇā;
ஓஸாரணா படிஞ்ஞா ச, படிக்³க³ஹா படிக்கி²பா.
Osāraṇā paṭiññā ca, paṭiggahā paṭikkhipā.
உபகா⁴தி சோத³னா ச, கதி²னா ச து³வே ததா²;
Upaghāti codanā ca, kathinā ca duve tathā;
சீவரா பத்தமண்ட³லா, அதி⁴ட்டா²னா ததே²வ த்³வே.
Cīvarā pattamaṇḍalā, adhiṭṭhānā tatheva dve.
விகப்பனா ச வினயா, வேனயிகா ச ஸல்லேகா²;
Vikappanā ca vinayā, venayikā ca sallekhā;
ஆபஜ்ஜதி ச வுட்டா²தி, பரிவாஸாபரே து³வே.
Āpajjati ca vuṭṭhāti, parivāsāpare duve.
த்³வே மானத்தா அபரே ச, ரத்திச்சே²தோ³ அனாத³ரி;
Dve mānattā apare ca, ratticchedo anādari;
த்³வே லோணா தயோ அபரே, பரிபோ⁴க³க்கோஸேன ச.
Dve loṇā tayo apare, paribhogakkosena ca.
பேஸுஞ்ஞோ ச க³ணாவஸ்ஸ, ட²பனா பா⁴ரகப்பியங்;
Pesuñño ca gaṇāvassa, ṭhapanā bhārakappiyaṃ;
அனாபத்தி அத⁴ம்மத⁴ம்மா, வினயே ஆஸவே ததா²தி.
Anāpatti adhammadhammā, vinaye āsave tathāti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பரிவார-அட்ட²கதா² • Parivāra-aṭṭhakathā / து³கவாரவண்ணனா • Dukavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / து³கவாரவண்ணனா • Dukavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / து³கவாரவண்ணனா • Dukavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / து³கவாரவண்ணனா • Dukavāravaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / ஏகுத்தரிகனயோ து³கவாரவண்ணனா • Ekuttarikanayo dukavāravaṇṇanā
