| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๒. ทุกวาโร
2. Dukavāro
๓๒๒. อตฺถาปตฺติ สญฺญา วิโมกฺขา, อตฺถาปตฺติ โน สญฺญาวิโมกฺขาฯ อตฺถาปตฺติ ลทฺธสมาปตฺติกสฺส, อตฺถาปตฺติ น ลทฺธสมาปตฺติกสฺสฯ อตฺถาปตฺติ สทฺธมฺมปฎิสญฺญุตฺตา, อตฺถาปตฺติ อสทฺธมฺมปฎิสญฺญุตฺตาฯ อตฺถาปตฺติ สปริกฺขารปฎิสญฺญุตฺตา, อตฺถาปตฺติ ปรปริกฺขารปฎิสญฺญุตฺตาฯ อตฺถาปตฺติ สปุคฺคลปฎิสญฺญุตฺตา, อตฺถาปตฺติ ปรปุคฺคลปฎิสญฺญุตฺตาฯ อตฺถิ สจฺจํ ภณโนฺต ครุกํ อาปตฺติํ อาปชฺชติ, มุสา ภณโนฺต ลหุกํฯ อตฺถิ มุสา ภณโนฺต ครุกํ อาปตฺติํ อาปชฺชติ, สจฺจํ ภณโนฺต ลหุกํฯ อตฺถาปตฺติ ภูมิคโต อาปชฺชติ, โน เวหาสคโตฯ อตฺถาปตฺติ เวหาสคโต อาปชฺชติ, โน ภูมิคโตฯ อตฺถาปตฺติ นิกฺขมโนฺต อาปชฺชติ, โน ปวิสโนฺตฯ อตฺถาปตฺติ ปวิสโนฺต อาปชฺชติ, โน นิกฺขมโนฺตฯ อตฺถาปตฺติ อาทิยโนฺต อาปชฺชติ, อตฺถาปตฺติ อนาทิยโนฺต อาปชฺชติฯ อตฺถาปตฺติ สมาทิยโนฺต อาปชฺชติ , อตฺถาปตฺติ น สมาทิยโนฺต อาปชฺชติฯ อตฺถาปตฺติ กโรโนฺต อาปชฺชติ, อตฺถาปตฺติ น กโรโนฺต อาปชฺชติฯ อตฺถาปตฺติ เทโนฺต อาปชฺชติ, อตฺถาปตฺติ น เทโนฺต อาปชฺชติฯ (อตฺถาปตฺติ เทเสโนฺต อาปชฺชติ, อตฺถาปตฺติ น เทเสโนฺต อาปชฺชติฯ) 1 อตฺถาปตฺติ ปฎิคฺคณฺหโนฺต อาปชฺชติ, อตฺถาปตฺติ น ปฎิคฺคณฺหโนฺต อาปชฺชติฯ อตฺถาปตฺติ ปริโภเคน อาปชฺชติ, อตฺถาปตฺติ น ปริโภเคน อาปชฺชติฯ อตฺถาปตฺติ รตฺติํ อาปชฺชติ, โน ทิวาฯ อตฺถาปตฺติ ทิวา อาปชฺชติ, โน รตฺติํฯ อตฺถาปตฺติ อรุณุเคฺค อาปชฺชติ, อตฺถาปตฺติ น อรุณุเคฺค อาปชฺชติฯ อตฺถาปตฺติ ฉินฺทโนฺต อาปชฺชติ, อตฺถาปตฺติ น ฉินฺทโนฺต อาปชฺชติฯ อตฺถาปตฺติ ฉาเทโนฺต อาปชฺชติ, อตฺถาปตฺติ น ฉาเทโนฺต อาปชฺชติฯ อตฺถาปตฺติ ธาเรโนฺต อาปชฺชติ, อตฺถาปตฺติ น ธาเรโนฺต อาปชฺชติฯ
322. Atthāpatti saññā vimokkhā, atthāpatti no saññāvimokkhā. Atthāpatti laddhasamāpattikassa, atthāpatti na laddhasamāpattikassa. Atthāpatti saddhammapaṭisaññuttā, atthāpatti asaddhammapaṭisaññuttā. Atthāpatti saparikkhārapaṭisaññuttā, atthāpatti paraparikkhārapaṭisaññuttā. Atthāpatti sapuggalapaṭisaññuttā, atthāpatti parapuggalapaṭisaññuttā. Atthi saccaṃ bhaṇanto garukaṃ āpattiṃ āpajjati, musā bhaṇanto lahukaṃ. Atthi musā bhaṇanto garukaṃ āpattiṃ āpajjati, saccaṃ bhaṇanto lahukaṃ. Atthāpatti bhūmigato āpajjati, no vehāsagato. Atthāpatti vehāsagato āpajjati, no bhūmigato. Atthāpatti nikkhamanto āpajjati, no pavisanto. Atthāpatti pavisanto āpajjati, no nikkhamanto. Atthāpatti ādiyanto āpajjati, atthāpatti anādiyanto āpajjati. Atthāpatti samādiyanto āpajjati , atthāpatti na samādiyanto āpajjati. Atthāpatti karonto āpajjati, atthāpatti na karonto āpajjati. Atthāpatti dento āpajjati, atthāpatti na dento āpajjati. (Atthāpatti desento āpajjati, atthāpatti na desento āpajjati.) 2 Atthāpatti paṭiggaṇhanto āpajjati, atthāpatti na paṭiggaṇhanto āpajjati. Atthāpatti paribhogena āpajjati, atthāpatti na paribhogena āpajjati. Atthāpatti rattiṃ āpajjati, no divā. Atthāpatti divā āpajjati, no rattiṃ. Atthāpatti aruṇugge āpajjati, atthāpatti na aruṇugge āpajjati. Atthāpatti chindanto āpajjati, atthāpatti na chindanto āpajjati. Atthāpatti chādento āpajjati, atthāpatti na chādento āpajjati. Atthāpatti dhārento āpajjati, atthāpatti na dhārento āpajjati.
เทฺว อุโปสถา – จาตุทฺทสิโก จ ปนฺนรสิโก จฯ เทฺว ปวารณา – จาตุทฺทสิกา จ ปนฺนรสิกา จฯ เทฺว กมฺมานิ – อปโลกนกมฺมํ, ญตฺติกมฺมํฯ อปรานิปิ เทฺว กมฺมานิ – ญตฺติทุติยกมฺมํ, ญตฺติจตุตฺถกมฺมํฯ เทฺว กมฺมวตฺถูนิ – อปโลกนกมฺมสฺส วตฺถุ, ญตฺติกมฺมสฺส วตฺถุฯ อปรานิปิ เทฺว กมฺมวตฺถูนิ – ญตฺติทุติยกมฺมสฺส วตฺถุ, ญตฺติจตุตฺถกมฺมสฺส วตฺถุฯ เทฺว กมฺมโทสา – อปโลกนกมฺมสฺส โทโส, ญตฺติกมฺมสฺส โทโสฯ อปเรปิ เทฺว กมฺมโทสา – ญตฺติทุติยกมฺมสฺส โทโส, ญตฺติจตุตฺถกมฺมสฺส โทโสฯ เทฺว กมฺมสมฺปตฺติโย – อปโลกนกมฺมสฺส สมฺปตฺติ, ญตฺติกมฺมสฺส สมฺปตฺติฯ อปราปิ เทฺว กมฺมสมฺปตฺติโย – ญตฺติทุติยกมฺมสฺส สมฺปตฺติ, ญตฺติจตุตฺถกมฺมสฺส สมฺปตฺติฯ เทฺว นานาสํวาสกภูมิโย – อตฺตนา วา อตฺตานํ นานาสํวาสกํ กโรติ, สมโคฺค วา นํ สโงฺฆ อุกฺขิปติ อทสฺสเน วา อปฺปฎิกเมฺม วา อปฺปฎินิสฺสเคฺค วาฯ เทฺว สมานสํวาสกภูมิโย – อตฺตนา วา อตฺตานํ สมานสํวาสกํ กโรติ, สมโคฺค วา นํ สโงฺฆ อุกฺขิตฺตํ โอสาเรติ ทสฺสเน วา ปฎิกเมฺม วา ปฎินิสฺสเคฺค วาฯ เทฺว ปาราชิกา – ภิกฺขูนญฺจ ภิกฺขุนีนญฺจฯ เทฺว สงฺฆาทิเสสา, เทฺว ถุลฺลจฺจยา, เทฺว ปาจิตฺติยา, เทฺว ปาฎิเทสนียา, เทฺว ทุกฺกฎา, เทฺว ทุพฺภาสิตา – ภิกฺขูนญฺจ ภิกฺขุนีนญฺจฯ สตฺต อาปตฺติโย, สตฺต อาปตฺติกฺขนฺธาฯ ทฺวีหากาเรหิ สโงฺฆ ภิชฺชติ – กเมฺมน วา สลากคฺคาเหน วาฯ
Dve uposathā – cātuddasiko ca pannarasiko ca. Dve pavāraṇā – cātuddasikā ca pannarasikā ca. Dve kammāni – apalokanakammaṃ, ñattikammaṃ. Aparānipi dve kammāni – ñattidutiyakammaṃ, ñatticatutthakammaṃ. Dve kammavatthūni – apalokanakammassa vatthu, ñattikammassa vatthu. Aparānipi dve kammavatthūni – ñattidutiyakammassa vatthu, ñatticatutthakammassa vatthu. Dve kammadosā – apalokanakammassa doso, ñattikammassa doso. Aparepi dve kammadosā – ñattidutiyakammassa doso, ñatticatutthakammassa doso. Dve kammasampattiyo – apalokanakammassa sampatti, ñattikammassa sampatti. Aparāpi dve kammasampattiyo – ñattidutiyakammassa sampatti, ñatticatutthakammassa sampatti. Dve nānāsaṃvāsakabhūmiyo – attanā vā attānaṃ nānāsaṃvāsakaṃ karoti, samaggo vā naṃ saṅgho ukkhipati adassane vā appaṭikamme vā appaṭinissagge vā. Dve samānasaṃvāsakabhūmiyo – attanā vā attānaṃ samānasaṃvāsakaṃ karoti, samaggo vā naṃ saṅgho ukkhittaṃ osāreti dassane vā paṭikamme vā paṭinissagge vā. Dve pārājikā – bhikkhūnañca bhikkhunīnañca. Dve saṅghādisesā, dve thullaccayā, dve pācittiyā, dve pāṭidesanīyā, dve dukkaṭā, dve dubbhāsitā – bhikkhūnañca bhikkhunīnañca. Satta āpattiyo, satta āpattikkhandhā. Dvīhākārehi saṅgho bhijjati – kammena vā salākaggāhena vā.
เทฺว ปุคฺคลา น อุปสมฺปาเทตพฺพา – อทฺธานหีโน, องฺคหีโนฯ อปเรปิ เทฺว ปุคฺคลา น อุปสมฺปาเทตพฺพา – วตฺถุวิปโนฺน, กรณทุกฺกฎโกฯ อปเรปิ เทฺว ปุคฺคลา น อุปสมฺปาเทตพฺพา – อปริปูโร ปริปูโร โน จ ยาจติฯ ทฺวินฺนํ ปุคฺคลานํ นิสฺสาย น วตฺถพฺพํ – อลชฺชิสฺส จ พาลสฺส จฯ ทฺวินฺนํ ปุคฺคลานํ นิสฺสโย น ทาตโพฺพ – อลชฺชิสฺส จ ลชฺชิโน จ น ยาจติฯ ทฺวินฺนํ ปุคฺคลานํ นิสฺสโย ทาตโพฺพ – พาลสฺส จ ลชฺชิสฺส จ ยาจติฯ เทฺว ปุคฺคลา อภพฺพา อาปตฺติํ อาปชฺชิตุํ – พุทฺธา จ ปเจฺจกพุทฺธา จฯ เทฺว ปุคฺคลา ภพฺพา, อาปตฺติํ อาปชฺชิตุํ – ภิกฺขู จ ภิกฺขุนิโย จฯ เทฺว ปุคฺคลา อภพฺพา สญฺจิจฺจ อาปตฺติํ อาปชฺชิตุํ – ภิกฺขู จ ภิกฺขุนิโย จ อริยปุคฺคลาฯ เทฺว ปุคฺคลา ภพฺพา สญฺจิจฺจ อาปตฺติํ อาปชฺชิตุํ – ภิกฺขู จ ภิกฺขุนิโย จ ปุถุชฺชนาฯ เทฺว ปุคฺคลา อภพฺพา สญฺจิจฺจ สาติสารํ วตฺถุํ อชฺฌาจริตุํ – ภิกฺขู จ ภิกฺขุนิโย จ อริยปุคฺคลาฯ เทฺว ปุคฺคลา ภพฺพา สญฺจิจฺจ สาติสารํ วตฺถุํ อชฺฌาจริตุํ – ภิกฺขู จ ภิกฺขุนิโย จ ปุถุชฺชนาฯ
Dve puggalā na upasampādetabbā – addhānahīno, aṅgahīno. Aparepi dve puggalā na upasampādetabbā – vatthuvipanno, karaṇadukkaṭako. Aparepi dve puggalā na upasampādetabbā – aparipūro paripūro no ca yācati. Dvinnaṃ puggalānaṃ nissāya na vatthabbaṃ – alajjissa ca bālassa ca. Dvinnaṃ puggalānaṃ nissayo na dātabbo – alajjissa ca lajjino ca na yācati. Dvinnaṃ puggalānaṃ nissayo dātabbo – bālassa ca lajjissa ca yācati. Dve puggalā abhabbā āpattiṃ āpajjituṃ – buddhā ca paccekabuddhā ca. Dve puggalā bhabbā, āpattiṃ āpajjituṃ – bhikkhū ca bhikkhuniyo ca. Dve puggalā abhabbā sañcicca āpattiṃ āpajjituṃ – bhikkhū ca bhikkhuniyo ca ariyapuggalā. Dve puggalā bhabbā sañcicca āpattiṃ āpajjituṃ – bhikkhū ca bhikkhuniyo ca puthujjanā. Dve puggalā abhabbā sañcicca sātisāraṃ vatthuṃ ajjhācarituṃ – bhikkhū ca bhikkhuniyo ca ariyapuggalā. Dve puggalā bhabbā sañcicca sātisāraṃ vatthuṃ ajjhācarituṃ – bhikkhū ca bhikkhuniyo ca puthujjanā.
เทฺว ปฎิโกฺกสา – กาเยน วา ปฎิโกฺกสติ วาจาย วา ปฎิโกฺกสติฯ เทฺว นิสฺสารณา – อตฺถิ ปุคฺคโล อปฺปโตฺต นิสฺสารณํ ตํ เจ สโงฺฆ นิสฺสาเรติ เอกโจฺจ สุนิสฺสาริโต, เอกโจฺจ ทุนฺนิสฺสาริโตฯ เทฺว โอสารณา – อตฺถิ ปุคฺคโล อปฺปโตฺต โอสารณํ ตํ เจ สโงฺฆ โอสาเรติ เอกโจฺจ โสสาริโต, เอกโจฺจ โทสาริโตฯ เทฺว ปฎิญฺญา – กาเยน วา ปฎิชานาติ วาจาย วา ปฎิชานาติฯ เทฺว ปฎิคฺคหา – กาเยน วา ปฎิคฺคณฺหาติ กายปฎิพเทฺธน วา ปฎิคฺคณฺหาติฯ เทฺว ปฎิเกฺขปา – กาเยน วา ปฎิกฺขิปติ วาจาย วา ปฎิกฺขิปติฯ เทฺว อุปฆาติกา – สิกฺขูปฆาติกา จ โภคูปฆาติกา จฯ เทฺว โจทนา – กาเยน วา โจเทติ วาจาย วา โจเทติฯ เทฺว กถินสฺส ปลิโพธา – อาวาสปลิโพโธ จ จีวรปลิโพโธ จฯ เทฺว กถินสฺส อปลิโพธา – อาวาสอปลิโพโธ จ จีวรอปลิโพโธ จฯ เทฺว จีวรานิ – คหปติกญฺจ ปํสุกูลญฺจฯ เทฺว ปตฺตา – อโยปโตฺต มตฺติกาปโตฺตฯ เทฺว มณฺฑลานิ – ติปุมยํ, สีสมยํฯ เทฺว ปตฺตสฺส อธิฎฺฐานา – กาเยน วา อธิเฎฺฐติ วาจาย วา อธิเฎฺฐติฯ เทฺว จีวรสฺส อธิฎฺฐานา – กาเยน วา อธิเฎฺฐติ วาจาย วา อธิเฎฺฐติฯ เทฺว วิกปฺปนา – สมฺมุขาวิกปฺปนา จ ปรมฺมุขาวิกปฺปนา จฯ เทฺว วินยา – ภิกฺขูนญฺจ ภิกฺขุนีนญฺจฯ เทฺว เวนยิกา – ปญฺญตฺตญฺจ ปญฺญตฺตานุโลมญฺจฯ เทฺว วินยสฺส สเลฺลขา – อกปฺปิเย เสตุฆาโต, กปฺปิเย มตฺตการิตาฯ ทฺวีหากาเรหิ อาปตฺติํ อาปชฺชติ – กาเยน วา อาปชฺชติ วาจาย วา อาปชฺชติฯ ทฺวีหากาเรหิ อาปตฺติยา วุฎฺฐาติ – กาเยน วา วุฎฺฐาติ วาจาย วา วุฎฺฐาติฯ เทฺว ปริวาสา – ปฎิจฺฉนฺนปริวาโส, อปฺปฎิจฺฉนฺนปริวาโสฯ อปเรปิ เทฺว ปริวาสา – สุทฺธนฺตปริวาโส สโมธานปริวาโสฯ เทฺว มานตฺตา – ปฎิจฺฉนฺนมานตฺตํ, อปฺปฎิจฺฉนฺนมานตฺตํฯ อปเรปิ เทฺว มานตฺตา – ปกฺขมานตฺตํ, สโมธานมานตฺตํฯ ทฺวินฺนํ ปุคฺคลานํ รตฺติเจฺฉโท – ปาริวาสิกสฺส จ มานตฺตจาริกสฺส จฯ เทฺว อนาทริยานิ – ปุคฺคลานาทริยญฺจ ธมฺมานาทริยญฺจฯ เทฺว โลณานิ – ชาติมญฺจ การิมญฺจ 3ฯ อปรานิปิ เทฺว โลณานิ – สามุทฺทํ กาฬโลณํฯ อปรานิปิ เทฺว โลณานิ – สินฺธวํ, อุพฺภิทํ 4ฯ อปรานิปิ เทฺว โลณานิ – โรมกํ, ปกฺกาลกํฯ เทฺว ปริโภคา – อพฺภนฺตรปริโภโค จ พาหิรปริโภโค จฯ เทฺว อโกฺกสา – หีโน จ อโกฺกโส อุกฺกโฎฺฐ จ อโกฺกโสฯ ทฺวีหากาเรหิ เปสุญฺญํ โหติ – ปิยกมฺยสฺส วา เภทาธิปฺปายสฺส วาฯ ทฺวีหากาเรหิ คณโภชนํ ปสวติ – นิมนฺตนโต วา วิญฺญตฺติโต วาฯ เทฺว วสฺสูปนายิกา – ปุริมิกา, ปจฺฉิมิกาฯ เทฺว อธมฺมิกานิ ปาติโมกฺขฎฺฐปนานิฯ เทฺว ธมฺมิกานิ ปาติโมกฺขฎฺฐปนานิฯ
Dve paṭikkosā – kāyena vā paṭikkosati vācāya vā paṭikkosati. Dve nissāraṇā – atthi puggalo appatto nissāraṇaṃ taṃ ce saṅgho nissāreti ekacco sunissārito, ekacco dunnissārito. Dve osāraṇā – atthi puggalo appatto osāraṇaṃ taṃ ce saṅgho osāreti ekacco sosārito, ekacco dosārito. Dve paṭiññā – kāyena vā paṭijānāti vācāya vā paṭijānāti. Dve paṭiggahā – kāyena vā paṭiggaṇhāti kāyapaṭibaddhena vā paṭiggaṇhāti. Dve paṭikkhepā – kāyena vā paṭikkhipati vācāya vā paṭikkhipati. Dve upaghātikā – sikkhūpaghātikā ca bhogūpaghātikā ca. Dve codanā – kāyena vā codeti vācāya vā codeti. Dve kathinassa palibodhā – āvāsapalibodho ca cīvarapalibodho ca. Dve kathinassa apalibodhā – āvāsaapalibodho ca cīvaraapalibodho ca. Dve cīvarāni – gahapatikañca paṃsukūlañca. Dve pattā – ayopatto mattikāpatto. Dve maṇḍalāni – tipumayaṃ, sīsamayaṃ. Dve pattassa adhiṭṭhānā – kāyena vā adhiṭṭheti vācāya vā adhiṭṭheti. Dve cīvarassa adhiṭṭhānā – kāyena vā adhiṭṭheti vācāya vā adhiṭṭheti. Dve vikappanā – sammukhāvikappanā ca parammukhāvikappanā ca. Dve vinayā – bhikkhūnañca bhikkhunīnañca. Dve venayikā – paññattañca paññattānulomañca. Dve vinayassa sallekhā – akappiye setughāto, kappiye mattakāritā. Dvīhākārehi āpattiṃ āpajjati – kāyena vā āpajjati vācāya vā āpajjati. Dvīhākārehi āpattiyā vuṭṭhāti – kāyena vā vuṭṭhāti vācāya vā vuṭṭhāti. Dve parivāsā – paṭicchannaparivāso, appaṭicchannaparivāso. Aparepi dve parivāsā – suddhantaparivāso samodhānaparivāso. Dve mānattā – paṭicchannamānattaṃ, appaṭicchannamānattaṃ. Aparepi dve mānattā – pakkhamānattaṃ, samodhānamānattaṃ. Dvinnaṃ puggalānaṃ ratticchedo – pārivāsikassa ca mānattacārikassa ca. Dve anādariyāni – puggalānādariyañca dhammānādariyañca. Dve loṇāni – jātimañca kārimañca 5. Aparānipi dve loṇāni – sāmuddaṃ kāḷaloṇaṃ. Aparānipi dve loṇāni – sindhavaṃ, ubbhidaṃ 6. Aparānipi dve loṇāni – romakaṃ, pakkālakaṃ. Dve paribhogā – abbhantaraparibhogo ca bāhiraparibhogo ca. Dve akkosā – hīno ca akkoso ukkaṭṭho ca akkoso. Dvīhākārehi pesuññaṃ hoti – piyakamyassa vā bhedādhippāyassa vā. Dvīhākārehi gaṇabhojanaṃ pasavati – nimantanato vā viññattito vā. Dve vassūpanāyikā – purimikā, pacchimikā. Dve adhammikāni pātimokkhaṭṭhapanāni. Dve dhammikāni pātimokkhaṭṭhapanāni.
7 เทฺว ปุคฺคลา พาลา – โย จ อนาคตํ ภารํ วหติ, โย จ อาคตํ ภารํ น วหติฯ เทฺว ปุคฺคลา ปณฺฑิตา – โย จ อนาคตํ ภารํ น วหติ, โย จ อาคตํ ภารํ วหติฯ อปเรปิ เทฺว ปุคฺคลา พาลา – โย จ อกปฺปิเย กปฺปิยสญฺญี, โย จ กปฺปิเย อกปฺปิยสญฺญีฯ เทฺว ปุคฺคลา ปณฺฑิตา – โย จ อกปฺปิเย อกปฺปิยสญฺญี, โย จ กปฺปิเย กปฺปิยสญฺญีฯ อปเรปิ เทฺว ปุคฺคลา พาลา – โย จ อนาปตฺติยา อาปตฺติสญฺญี, โย จ อาปตฺติยา อนาปตฺติสญฺญีฯ เทฺว ปุคฺคลา ปณฺฑิตา – โย จ อาปตฺติยา อาปตฺติสญฺญี, โย จ อนาปตฺติยา อนาปตฺติสญฺญีฯ อปเรปิ เทฺว ปุคฺคลา พาลา – โย จ อธเมฺม ธมฺมสญฺญี, โย จ ธเมฺม อธมฺมสญฺญีฯ เทฺว ปุคฺคลา ปณฺฑิตา – โย จ อธเมฺม อธมฺมสญฺญี, โย จ ธเมฺม ธมฺมสญฺญีฯ อปเรปิ เทฺว ปุคฺคลา พาลา – โย จ อวินเย วินยสญฺญี, โย จ วินเย อวินยสญฺญีฯ เทฺว ปุคฺคลา ปณฺฑิตา – โย จ อวินเย อวินยสญฺญี, โย จ วินเย วินยสญฺญีฯ
8 Dve puggalā bālā – yo ca anāgataṃ bhāraṃ vahati, yo ca āgataṃ bhāraṃ na vahati. Dve puggalā paṇḍitā – yo ca anāgataṃ bhāraṃ na vahati, yo ca āgataṃ bhāraṃ vahati. Aparepi dve puggalā bālā – yo ca akappiye kappiyasaññī, yo ca kappiye akappiyasaññī. Dve puggalā paṇḍitā – yo ca akappiye akappiyasaññī, yo ca kappiye kappiyasaññī. Aparepi dve puggalā bālā – yo ca anāpattiyā āpattisaññī, yo ca āpattiyā anāpattisaññī. Dve puggalā paṇḍitā – yo ca āpattiyā āpattisaññī, yo ca anāpattiyā anāpattisaññī. Aparepi dve puggalā bālā – yo ca adhamme dhammasaññī, yo ca dhamme adhammasaññī. Dve puggalā paṇḍitā – yo ca adhamme adhammasaññī, yo ca dhamme dhammasaññī. Aparepi dve puggalā bālā – yo ca avinaye vinayasaññī, yo ca vinaye avinayasaññī. Dve puggalā paṇḍitā – yo ca avinaye avinayasaññī, yo ca vinaye vinayasaññī.
9 ทฺวินฺนํ ปุคฺคลานํ อาสวา วฑฺฒนฺติ – โย จ น กุกฺกุจฺจายิตพฺพํ กุกฺกุจฺจายติ, โย จ กุกฺกุจฺจายิตพฺพํ กุกฺกุจฺจายติฯ ทฺวินฺนํ ปุคฺคลานํ อาสวา น วฑฺฒนฺติ – โย จ กุกฺกุจฺจายิตพฺพํ น กุกฺกุจฺจายติ, โย จ กุกฺกุจฺจายิตพฺพํ กุกฺกุจฺจายติฯ อปเรสมฺปิ ทฺวินฺนํ ปุคฺคลานํ อาสวา วฑฺฒนฺติ – โย จ อกปฺปิเย กปฺปิยสญฺญี, โย จ กปฺปิเย อกปฺปิยสญฺญีฯ ทฺวินฺนํ ปุคฺคลานํ อาสวา น วฑฺฒนฺติ – โย จ อกปฺปิเย อกปฺปิยสญฺญี, โย จ กปฺปิเย กปฺปิยสญฺญีฯ อปเรสมฺปิ ทฺวินฺนํ ปุคฺคลานํ อาสวา วฑฺฒนฺติ – โย จ อนาปตฺติยา อาปตฺติสญฺญี, โย จ อาปตฺติยา อนาปตฺติสญฺญีฯ ทฺวินฺนํ ปุคฺคลานํ อาสวา น วฑฺฒนฺติ – โย จ อนาปตฺติยา อนาปตฺติสญฺญี, โย จ อาปตฺติยา อาปตฺติสญฺญีฯ อปเรสมฺปิ ทฺวินฺนํ ปุคฺคลานํ อาสวา วฑฺฒนฺติ – โย จ อธเมฺม ธมฺมสญฺญี, โย จ ธเมฺม อธมฺมสญฺญีฯ ทฺวินฺนํ ปุคฺคลานํ อาสวา น วฑฺฒนฺติ – โย จ อธเมฺม อธมฺมสญฺญี, โย จ ธเมฺม ธมฺมสญฺญีฯ อปเรสมฺปิ ทฺวินฺนํ ปุคฺคลานํ อาสวา วฑฺฒนฺติ – โย จ อวินเย วินยสญฺญี, โย จ วินเย อวินยสญฺญีฯ ทฺวินฺนํ ปุคฺคลานํ อาสวา น วฑฺฒนฺติ – โย จ อวินเย อวินยสญฺญี, โย จ วินเย วินยสญฺญีฯ
10 Dvinnaṃ puggalānaṃ āsavā vaḍḍhanti – yo ca na kukkuccāyitabbaṃ kukkuccāyati, yo ca kukkuccāyitabbaṃ kukkuccāyati. Dvinnaṃ puggalānaṃ āsavā na vaḍḍhanti – yo ca kukkuccāyitabbaṃ na kukkuccāyati, yo ca kukkuccāyitabbaṃ kukkuccāyati. Aparesampi dvinnaṃ puggalānaṃ āsavā vaḍḍhanti – yo ca akappiye kappiyasaññī, yo ca kappiye akappiyasaññī. Dvinnaṃ puggalānaṃ āsavā na vaḍḍhanti – yo ca akappiye akappiyasaññī, yo ca kappiye kappiyasaññī. Aparesampi dvinnaṃ puggalānaṃ āsavā vaḍḍhanti – yo ca anāpattiyā āpattisaññī, yo ca āpattiyā anāpattisaññī. Dvinnaṃ puggalānaṃ āsavā na vaḍḍhanti – yo ca anāpattiyā anāpattisaññī, yo ca āpattiyā āpattisaññī. Aparesampi dvinnaṃ puggalānaṃ āsavā vaḍḍhanti – yo ca adhamme dhammasaññī, yo ca dhamme adhammasaññī. Dvinnaṃ puggalānaṃ āsavā na vaḍḍhanti – yo ca adhamme adhammasaññī, yo ca dhamme dhammasaññī. Aparesampi dvinnaṃ puggalānaṃ āsavā vaḍḍhanti – yo ca avinaye vinayasaññī, yo ca vinaye avinayasaññī. Dvinnaṃ puggalānaṃ āsavā na vaḍḍhanti – yo ca avinaye avinayasaññī, yo ca vinaye vinayasaññī.
ทุกา นิฎฺฐิตาฯ
Dukā niṭṭhitā.
ตสฺสุทฺทานํ –
Tassuddānaṃ –
สญฺญา ลทฺธา จ สทฺธมฺมา, ปริกฺขารา จ ปุคฺคลา;
Saññā laddhā ca saddhammā, parikkhārā ca puggalā;
สจฺจํ ภูมิ นิกฺขมโนฺต, อาทิยโนฺต สมาทิยํฯ
Saccaṃ bhūmi nikkhamanto, ādiyanto samādiyaṃ.
กโรโนฺต เทโนฺต คณฺหโนฺต, ปริโภเคน รตฺติ จ;
Karonto dento gaṇhanto, paribhogena ratti ca;
อรุณาฉินฺทํ ฉาเทโนฺต, ธาเรโนฺต จ อุโปสถาฯ
Aruṇāchindaṃ chādento, dhārento ca uposathā.
ปวารณา กมฺมาปรา, วตฺถุ อปรา โทสา จ;
Pavāraṇā kammāparā, vatthu aparā dosā ca;
อปรา เทฺว จ สมฺปตฺติ, นานา สมานเมว จฯ
Aparā dve ca sampatti, nānā samānameva ca.
ปาราชิสงฺฆถุลฺลจฺจย, ปาจิตฺติ ปาฎิเทสนา;
Pārājisaṅghathullaccaya, pācitti pāṭidesanā;
ทุกฺกฎา ทุพฺภาสิตา เจว, สตฺต อาปตฺติกฺขนฺธา จฯ
Dukkaṭā dubbhāsitā ceva, satta āpattikkhandhā ca.
ภิชฺชติ อุปสมฺปทา, ตเถว อปเร ทุเว;
Bhijjati upasampadā, tatheva apare duve;
น วตฺถพฺพํ น ทาตพฺพํ, อภพฺพาภพฺพเมว จฯ
Na vatthabbaṃ na dātabbaṃ, abhabbābhabbameva ca.
สญฺจิจฺจ สาติสารา จ, ปฎิโกฺกสา นิสฺสารณา;
Sañcicca sātisārā ca, paṭikkosā nissāraṇā;
โอสารณา ปฎิญฺญา จ, ปฎิคฺคหา ปฎิกฺขิปาฯ
Osāraṇā paṭiññā ca, paṭiggahā paṭikkhipā.
อุปฆาติ โจทนา จ, กถินา จ ทุเว ตถา;
Upaghāti codanā ca, kathinā ca duve tathā;
จีวรา ปตฺตมณฺฑลา, อธิฎฺฐานา ตเถว เทฺวฯ
Cīvarā pattamaṇḍalā, adhiṭṭhānā tatheva dve.
วิกปฺปนา จ วินยา, เวนยิกา จ สเลฺลขา;
Vikappanā ca vinayā, venayikā ca sallekhā;
อาปชฺชติ จ วุฎฺฐาติ, ปริวาสาปเร ทุเวฯ
Āpajjati ca vuṭṭhāti, parivāsāpare duve.
เทฺว มานตฺตา อปเร จ, รตฺติเจฺฉโท อนาทริ;
Dve mānattā apare ca, ratticchedo anādari;
เทฺว โลณา ตโย อปเร, ปริโภคโกฺกเสน จฯ
Dve loṇā tayo apare, paribhogakkosena ca.
เปสุโญฺญ จ คณาวสฺส, ฐปนา ภารกปฺปิยํ;
Pesuñño ca gaṇāvassa, ṭhapanā bhārakappiyaṃ;
อนาปตฺติ อธมฺมธมฺมา, วินเย อาสเว ตถาติฯ
Anāpatti adhammadhammā, vinaye āsave tathāti.
Footnotes:
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / ทุกวารวณฺณนา • Dukavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ทุกวารวณฺณนา • Dukavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ทุกวารวณฺณนา • Dukavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ทุกวารวณฺณนา • Dukavāravaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / เอกุตฺตริกนโย ทุกวารวณฺณนา • Ekuttarikanayo dukavāravaṇṇanā
