| Library / Tipiṭaka / တိပိဋက • Tipiṭaka / ပရိဝာရပာဠိ • Parivārapāḷi |
၂. ဒုကဝာရော
2. Dukavāro
၃၂၂. အတ္ထာပတ္တိ သညာ ဝိမောက္ခာ, အတ္ထာပတ္တိ နော သညာဝိမောက္ခာ။ အတ္ထာပတ္တိ လဒ္ဓသမာပတ္တိကသ္သ, အတ္ထာပတ္တိ န လဒ္ဓသမာပတ္တိကသ္သ။ အတ္ထာပတ္တိ သဒ္ဓမ္မပဋိသညုတ္တာ, အတ္ထာပတ္တိ အသဒ္ဓမ္မပဋိသညုတ္တာ။ အတ္ထာပတ္တိ သပရိက္ခာရပဋိသညုတ္တာ, အတ္ထာပတ္တိ ပရပရိက္ခာရပဋိသညုတ္တာ။ အတ္ထာပတ္တိ သပုဂ္ဂလပဋိသညုတ္တာ, အတ္ထာပတ္တိ ပရပုဂ္ဂလပဋိသညုတ္တာ။ အတ္ထိ သစ္စံ ဘဏန္တော ဂရုကံ အာပတ္တိံ အာပဇ္ဇတိ, မုသာ ဘဏန္တော လဟုကံ။ အတ္ထိ မုသာ ဘဏန္တော ဂရုကံ အာပတ္တိံ အာပဇ္ဇတိ, သစ္စံ ဘဏန္တော လဟုကံ။ အတ္ထာပတ္တိ ဘူမိဂတော အာပဇ္ဇတိ, နော ဝေဟာသဂတော။ အတ္ထာပတ္တိ ဝေဟာသဂတော အာပဇ္ဇတိ, နော ဘူမိဂတော။ အတ္ထာပတ္တိ နိက္ခမန္တော အာပဇ္ဇတိ, နော ပဝိသန္တော။ အတ္ထာပတ္တိ ပဝိသန္တော အာပဇ္ဇတိ, နော နိက္ခမန္တော။ အတ္ထာပတ္တိ အာဒိယန္တော အာပဇ္ဇတိ, အတ္ထာပတ္တိ အနာဒိယန္တော အာပဇ္ဇတိ။ အတ္ထာပတ္တိ သမာဒိယန္တော အာပဇ္ဇတိ , အတ္ထာပတ္တိ န သမာဒိယန္တော အာပဇ္ဇတိ။ အတ္ထာပတ္တိ ကရောန္တော အာပဇ္ဇတိ, အတ္ထာပတ္တိ န ကရောန္တော အာပဇ္ဇတိ။ အတ္ထာပတ္တိ ဒေန္တော အာပဇ္ဇတိ, အတ္ထာပတ္တိ န ဒေန္တော အာပဇ္ဇတိ။ (အတ္ထာပတ္တိ ဒေသေန္တော အာပဇ္ဇတိ, အတ္ထာပတ္တိ န ဒေသေန္တော အာပဇ္ဇတိ။) 1 အတ္ထာပတ္တိ ပဋိဂ္ဂဏ္ဟန္တော အာပဇ္ဇတိ, အတ္ထာပတ္တိ န ပဋိဂ္ဂဏ္ဟန္တော အာပဇ္ဇတိ။ အတ္ထာပတ္တိ ပရိဘောဂေန အာပဇ္ဇတိ, အတ္ထာပတ္တိ န ပရိဘောဂေန အာပဇ္ဇတိ။ အတ္ထာပတ္တိ ရတ္တိံ အာပဇ္ဇတိ, နော ဒိဝာ။ အတ္ထာပတ္တိ ဒိဝာ အာပဇ္ဇတိ, နော ရတ္တိံ။ အတ္ထာပတ္တိ အရုဏုဂ္ဂေ အာပဇ္ဇတိ, အတ္ထာပတ္တိ န အရုဏုဂ္ဂေ အာပဇ္ဇတိ။ အတ္ထာပတ္တိ ဆိန္ဒန္တော အာပဇ္ဇတိ, အတ္ထာပတ္တိ န ဆိန္ဒန္တော အာပဇ္ဇတိ။ အတ္ထာပတ္တိ ဆာဒေန္တော အာပဇ္ဇတိ, အတ္ထာပတ္တိ န ဆာဒေန္တော အာပဇ္ဇတိ။ အတ္ထာပတ္တိ ဓာရေန္တော အာပဇ္ဇတိ, အတ္ထာပတ္တိ န ဓာရေန္တော အာပဇ္ဇတိ။
322. Atthāpatti saññā vimokkhā, atthāpatti no saññāvimokkhā. Atthāpatti laddhasamāpattikassa, atthāpatti na laddhasamāpattikassa. Atthāpatti saddhammapaṭisaññuttā, atthāpatti asaddhammapaṭisaññuttā. Atthāpatti saparikkhārapaṭisaññuttā, atthāpatti paraparikkhārapaṭisaññuttā. Atthāpatti sapuggalapaṭisaññuttā, atthāpatti parapuggalapaṭisaññuttā. Atthi saccaṃ bhaṇanto garukaṃ āpattiṃ āpajjati, musā bhaṇanto lahukaṃ. Atthi musā bhaṇanto garukaṃ āpattiṃ āpajjati, saccaṃ bhaṇanto lahukaṃ. Atthāpatti bhūmigato āpajjati, no vehāsagato. Atthāpatti vehāsagato āpajjati, no bhūmigato. Atthāpatti nikkhamanto āpajjati, no pavisanto. Atthāpatti pavisanto āpajjati, no nikkhamanto. Atthāpatti ādiyanto āpajjati, atthāpatti anādiyanto āpajjati. Atthāpatti samādiyanto āpajjati , atthāpatti na samādiyanto āpajjati. Atthāpatti karonto āpajjati, atthāpatti na karonto āpajjati. Atthāpatti dento āpajjati, atthāpatti na dento āpajjati. (Atthāpatti desento āpajjati, atthāpatti na desento āpajjati.) 2 Atthāpatti paṭiggaṇhanto āpajjati, atthāpatti na paṭiggaṇhanto āpajjati. Atthāpatti paribhogena āpajjati, atthāpatti na paribhogena āpajjati. Atthāpatti rattiṃ āpajjati, no divā. Atthāpatti divā āpajjati, no rattiṃ. Atthāpatti aruṇugge āpajjati, atthāpatti na aruṇugge āpajjati. Atthāpatti chindanto āpajjati, atthāpatti na chindanto āpajjati. Atthāpatti chādento āpajjati, atthāpatti na chādento āpajjati. Atthāpatti dhārento āpajjati, atthāpatti na dhārento āpajjati.
ဒ္ဝေ ဥပောသထာ – စာတုဒ္ဒသိကော စ ပန္နရသိကော စ။ ဒ္ဝေ ပဝာရဏာ – စာတုဒ္ဒသိကာ စ ပန္နရသိကာ စ။ ဒ္ဝေ ကမ္မာနိ – အပလောကနကမ္မံ, ဉတ္တိကမ္မံ။ အပရာနိပိ ဒ္ဝေ ကမ္မာနိ – ဉတ္တိဒုတိယကမ္မံ, ဉတ္တိစတုတ္ထကမ္မံ။ ဒ္ဝေ ကမ္မဝတ္ထူနိ – အပလောကနကမ္မသ္သ ဝတ္ထု, ဉတ္တိကမ္မသ္သ ဝတ္ထု။ အပရာနိပိ ဒ္ဝေ ကမ္မဝတ္ထူနိ – ဉတ္တိဒုတိယကမ္မသ္သ ဝတ္ထု, ဉတ္တိစတုတ္ထကမ္မသ္သ ဝတ္ထု။ ဒ္ဝေ ကမ္မဒောသာ – အပလောကနကမ္မသ္သ ဒောသော, ဉတ္တိကမ္မသ္သ ဒောသော။ အပရေပိ ဒ္ဝေ ကမ္မဒောသာ – ဉတ္တိဒုတိယကမ္မသ္သ ဒောသော, ဉတ္တိစတုတ္ထကမ္မသ္သ ဒောသော။ ဒ္ဝေ ကမ္မသမ္ပတ္တိယော – အပလောကနကမ္မသ္သ သမ္ပတ္တိ, ဉတ္တိကမ္မသ္သ သမ္ပတ္တိ။ အပရာပိ ဒ္ဝေ ကမ္မသမ္ပတ္တိယော – ဉတ္တိဒုတိယကမ္မသ္သ သမ္ပတ္တိ, ဉတ္တိစတုတ္ထကမ္မသ္သ သမ္ပတ္တိ။ ဒ္ဝေ နာနာသံဝာသကဘူမိယော – အတ္တနာ ဝာ အတ္တာနံ နာနာသံဝာသကံ ကရောတိ, သမဂ္ဂော ဝာ နံ သင္ဃော ဥက္ခိပတိ အဒသ္သနေ ဝာ အပ္ပဋိကမ္မေ ဝာ အပ္ပဋိနိသ္သဂ္ဂေ ဝာ။ ဒ္ဝေ သမာနသံဝာသကဘူမိယော – အတ္တနာ ဝာ အတ္တာနံ သမာနသံဝာသကံ ကရောတိ, သမဂ္ဂော ဝာ နံ သင္ဃော ဥက္ခိတ္တံ ဩသာရေတိ ဒသ္သနေ ဝာ ပဋိကမ္မေ ဝာ ပဋိနိသ္သဂ္ဂေ ဝာ။ ဒ္ဝေ ပာရာဇိကာ – ဘိက္ခူနဉ္စ ဘိက္ခုနီနဉ္စ။ ဒ္ဝေ သင္ဃာဒိသေသာ, ဒ္ဝေ ထုလ္လစ္စယာ, ဒ္ဝေ ပာစိတ္တိယာ, ဒ္ဝေ ပာဋိဒေသနီယာ, ဒ္ဝေ ဒုက္ကဋာ, ဒ္ဝေ ဒုဗ္ဘာသိတာ – ဘိက္ခူနဉ္စ ဘိက္ခုနီနဉ္စ။ သတ္တ အာပတ္တိယော, သတ္တ အာပတ္တိက္ခန္ဓာ။ ဒ္ဝီဟာကာရေဟိ သင္ဃော ဘိဇ္ဇတိ – ကမ္မေန ဝာ သလာကဂ္ဂာဟေန ဝာ။
Dve uposathā – cātuddasiko ca pannarasiko ca. Dve pavāraṇā – cātuddasikā ca pannarasikā ca. Dve kammāni – apalokanakammaṃ, ñattikammaṃ. Aparānipi dve kammāni – ñattidutiyakammaṃ, ñatticatutthakammaṃ. Dve kammavatthūni – apalokanakammassa vatthu, ñattikammassa vatthu. Aparānipi dve kammavatthūni – ñattidutiyakammassa vatthu, ñatticatutthakammassa vatthu. Dve kammadosā – apalokanakammassa doso, ñattikammassa doso. Aparepi dve kammadosā – ñattidutiyakammassa doso, ñatticatutthakammassa doso. Dve kammasampattiyo – apalokanakammassa sampatti, ñattikammassa sampatti. Aparāpi dve kammasampattiyo – ñattidutiyakammassa sampatti, ñatticatutthakammassa sampatti. Dve nānāsaṃvāsakabhūmiyo – attanā vā attānaṃ nānāsaṃvāsakaṃ karoti, samaggo vā naṃ saṅgho ukkhipati adassane vā appaṭikamme vā appaṭinissagge vā. Dve samānasaṃvāsakabhūmiyo – attanā vā attānaṃ samānasaṃvāsakaṃ karoti, samaggo vā naṃ saṅgho ukkhittaṃ osāreti dassane vā paṭikamme vā paṭinissagge vā. Dve pārājikā – bhikkhūnañca bhikkhunīnañca. Dve saṅghādisesā, dve thullaccayā, dve pācittiyā, dve pāṭidesanīyā, dve dukkaṭā, dve dubbhāsitā – bhikkhūnañca bhikkhunīnañca. Satta āpattiyo, satta āpattikkhandhā. Dvīhākārehi saṅgho bhijjati – kammena vā salākaggāhena vā.
ဒ္ဝေ ပုဂ္ဂလာ န ဥပသမ္ပာဒေတဗ္ဗာ – အဒ္ဓာနဟီနော, အင္ဂဟီနော။ အပရေပိ ဒ္ဝေ ပုဂ္ဂလာ န ဥပသမ္ပာဒေတဗ္ဗာ – ဝတ္ထုဝိပန္နော, ကရဏဒုက္ကဋကော။ အပရေပိ ဒ္ဝေ ပုဂ္ဂလာ န ဥပသမ္ပာဒေတဗ္ဗာ – အပရိပူရော ပရိပူရော နော စ ယာစတိ။ ဒ္ဝိန္နံ ပုဂ္ဂလာနံ နိသ္သာယ န ဝတ္ထဗ္ဗံ – အလဇ္ဇိသ္သ စ ဗာလသ္သ စ။ ဒ္ဝိန္နံ ပုဂ္ဂလာနံ နိသ္သယော န ဒာတဗ္ဗော – အလဇ္ဇိသ္သ စ လဇ္ဇိနော စ န ယာစတိ။ ဒ္ဝိန္နံ ပုဂ္ဂလာနံ နိသ္သယော ဒာတဗ္ဗော – ဗာလသ္သ စ လဇ္ဇိသ္သ စ ယာစတိ။ ဒ္ဝေ ပုဂ္ဂလာ အဘဗ္ဗာ အာပတ္တိံ အာပဇ္ဇိတုံ – ဗုဒ္ဓာ စ ပစ္စေကဗုဒ္ဓာ စ။ ဒ္ဝေ ပုဂ္ဂလာ ဘဗ္ဗာ, အာပတ္တိံ အာပဇ္ဇိတုံ – ဘိက္ခူ စ ဘိက္ခုနိယော စ။ ဒ္ဝေ ပုဂ္ဂလာ အဘဗ္ဗာ သဉ္စိစ္စ အာပတ္တိံ အာပဇ္ဇိတုံ – ဘိက္ခူ စ ဘိက္ခုနိယော စ အရိယပုဂ္ဂလာ။ ဒ္ဝေ ပုဂ္ဂလာ ဘဗ္ဗာ သဉ္စိစ္စ အာပတ္တိံ အာပဇ္ဇိတုံ – ဘိက္ခူ စ ဘိက္ခုနိယော စ ပုထုဇ္ဇနာ။ ဒ္ဝေ ပုဂ္ဂလာ အဘဗ္ဗာ သဉ္စိစ္စ သာတိသာရံ ဝတ္ထုံ အဇ္ဈာစရိတုံ – ဘိက္ခူ စ ဘိက္ခုနိယော စ အရိယပုဂ္ဂလာ။ ဒ္ဝေ ပုဂ္ဂလာ ဘဗ္ဗာ သဉ္စိစ္စ သာတိသာရံ ဝတ္ထုံ အဇ္ဈာစရိတုံ – ဘိက္ခူ စ ဘိက္ခုနိယော စ ပုထုဇ္ဇနာ။
Dve puggalā na upasampādetabbā – addhānahīno, aṅgahīno. Aparepi dve puggalā na upasampādetabbā – vatthuvipanno, karaṇadukkaṭako. Aparepi dve puggalā na upasampādetabbā – aparipūro paripūro no ca yācati. Dvinnaṃ puggalānaṃ nissāya na vatthabbaṃ – alajjissa ca bālassa ca. Dvinnaṃ puggalānaṃ nissayo na dātabbo – alajjissa ca lajjino ca na yācati. Dvinnaṃ puggalānaṃ nissayo dātabbo – bālassa ca lajjissa ca yācati. Dve puggalā abhabbā āpattiṃ āpajjituṃ – buddhā ca paccekabuddhā ca. Dve puggalā bhabbā, āpattiṃ āpajjituṃ – bhikkhū ca bhikkhuniyo ca. Dve puggalā abhabbā sañcicca āpattiṃ āpajjituṃ – bhikkhū ca bhikkhuniyo ca ariyapuggalā. Dve puggalā bhabbā sañcicca āpattiṃ āpajjituṃ – bhikkhū ca bhikkhuniyo ca puthujjanā. Dve puggalā abhabbā sañcicca sātisāraṃ vatthuṃ ajjhācarituṃ – bhikkhū ca bhikkhuniyo ca ariyapuggalā. Dve puggalā bhabbā sañcicca sātisāraṃ vatthuṃ ajjhācarituṃ – bhikkhū ca bhikkhuniyo ca puthujjanā.
ဒ္ဝေ ပဋိက္ကောသာ – ကာယေန ဝာ ပဋိက္ကောသတိ ဝာစာယ ဝာ ပဋိက္ကောသတိ။ ဒ္ဝေ နိသ္သာရဏာ – အတ္ထိ ပုဂ္ဂလော အပ္ပတ္တော နိသ္သာရဏံ တံ စေ သင္ဃော နိသ္သာရေတိ ဧကစ္စော သုနိသ္သာရိတော, ဧကစ္စော ဒုန္နိသ္သာရိတော။ ဒ္ဝေ ဩသာရဏာ – အတ္ထိ ပုဂ္ဂလော အပ္ပတ္တော ဩသာရဏံ တံ စေ သင္ဃော ဩသာရေတိ ဧကစ္စော သောသာရိတော, ဧကစ္စော ဒောသာရိတော။ ဒ္ဝေ ပဋိညာ – ကာယေန ဝာ ပဋိဇာနာတိ ဝာစာယ ဝာ ပဋိဇာနာတိ။ ဒ္ဝေ ပဋိဂ္ဂဟာ – ကာယေန ဝာ ပဋိဂ္ဂဏ္ဟာတိ ကာယပဋိဗဒ္ဓေန ဝာ ပဋိဂ္ဂဏ္ဟာတိ။ ဒ္ဝေ ပဋိက္ခေပာ – ကာယေန ဝာ ပဋိက္ခိပတိ ဝာစာယ ဝာ ပဋိက္ခိပတိ။ ဒ္ဝေ ဥပဃာတိကာ – သိက္ခူပဃာတိကာ စ ဘောဂူပဃာတိကာ စ။ ဒ္ဝေ စောဒနာ – ကာယေန ဝာ စောဒေတိ ဝာစာယ ဝာ စောဒေတိ။ ဒ္ဝေ ကထိနသ္သ ပလိဗောဓာ – အာဝာသပလိဗောဓော စ စီဝရပလိဗောဓော စ။ ဒ္ဝေ ကထိနသ္သ အပလိဗောဓာ – အာဝာသအပလိဗောဓော စ စီဝရအပလိဗောဓော စ။ ဒ္ဝေ စီဝရာနိ – ဂဟပတိကဉ္စ ပံသုကူလဉ္စ။ ဒ္ဝေ ပတ္တာ – အယောပတ္တော မတ္တိကာပတ္တော။ ဒ္ဝေ မဏ္ဍလာနိ – တိပုမယံ, သီသမယံ။ ဒ္ဝေ ပတ္တသ္သ အဓိဋ္ဌာနာ – ကာယေန ဝာ အဓိဋ္ဌေတိ ဝာစာယ ဝာ အဓိဋ္ဌေတိ။ ဒ္ဝေ စီဝရသ္သ အဓိဋ္ဌာနာ – ကာယေန ဝာ အဓိဋ္ဌေတိ ဝာစာယ ဝာ အဓိဋ္ဌေတိ။ ဒ္ဝေ ဝိကပ္ပနာ – သမ္မုခာဝိကပ္ပနာ စ ပရမ္မုခာဝိကပ္ပနာ စ။ ဒ္ဝေ ဝိနယာ – ဘိက္ခူနဉ္စ ဘိက္ခုနီနဉ္စ။ ဒ္ဝေ ဝေနယိကာ – ပညတ္တဉ္စ ပညတ္တာနုလောမဉ္စ။ ဒ္ဝေ ဝိနယသ္သ သလ္လေခာ – အကပ္ပိယေ သေတုဃာတော, ကပ္ပိယေ မတ္တကာရိတာ။ ဒ္ဝီဟာကာရေဟိ အာပတ္တိံ အာပဇ္ဇတိ – ကာယေန ဝာ အာပဇ္ဇတိ ဝာစာယ ဝာ အာပဇ္ဇတိ။ ဒ္ဝီဟာကာရေဟိ အာပတ္တိယာ ဝုဋ္ဌာတိ – ကာယေန ဝာ ဝုဋ္ဌာတိ ဝာစာယ ဝာ ဝုဋ္ဌာတိ။ ဒ္ဝေ ပရိဝာသာ – ပဋိစ္ဆန္နပရိဝာသော, အပ္ပဋိစ္ဆန္နပရိဝာသော။ အပရေပိ ဒ္ဝေ ပရိဝာသာ – သုဒ္ဓန္တပရိဝာသော သမောဓာနပရိဝာသော။ ဒ္ဝေ မာနတ္တာ – ပဋိစ္ဆန္နမာနတ္တံ, အပ္ပဋိစ္ဆန္နမာနတ္တံ။ အပရေပိ ဒ္ဝေ မာနတ္တာ – ပက္ခမာနတ္တံ, သမောဓာနမာနတ္တံ။ ဒ္ဝိန္နံ ပုဂ္ဂလာနံ ရတ္တိစ္ဆေဒော – ပာရိဝာသိကသ္သ စ မာနတ္တစာရိကသ္သ စ။ ဒ္ဝေ အနာဒရိယာနိ – ပုဂ္ဂလာနာဒရိယဉ္စ ဓမ္မာနာဒရိယဉ္စ။ ဒ္ဝေ လောဏာနိ – ဇာတိမဉ္စ ကာရိမဉ္စ 3။ အပရာနိပိ ဒ္ဝေ လောဏာနိ – သာမုဒ္ဒံ ကာဠလောဏံ။ အပရာနိပိ ဒ္ဝေ လောဏာနိ – သိန္ဓဝံ, ဥဗ္ဘိဒံ 4။ အပရာနိပိ ဒ္ဝေ လောဏာနိ – ရောမကံ, ပက္ကာလကံ။ ဒ္ဝေ ပရိဘောဂာ – အဗ္ဘန္တရပရိဘောဂော စ ဗာဟိရပရိဘောဂော စ။ ဒ္ဝေ အက္ကောသာ – ဟီနော စ အက္ကောသော ဥက္ကဋ္ဌော စ အက္ကောသော။ ဒ္ဝီဟာကာရေဟိ ပေသုညံ ဟောတိ – ပိယကမ္ယသ္သ ဝာ ဘေဒာဓိပ္ပာယသ္သ ဝာ။ ဒ္ဝီဟာကာရေဟိ ဂဏဘောဇနံ ပသဝတိ – နိမန္တနတော ဝာ ဝိညတ္တိတော ဝာ။ ဒ္ဝေ ဝသ္သူပနာယိကာ – ပုရိမိကာ, ပစ္ဆိမိကာ။ ဒ္ဝေ အဓမ္မိကာနိ ပာတိမောက္ခဋ္ဌပနာနိ။ ဒ္ဝေ ဓမ္မိကာနိ ပာတိမောက္ခဋ္ဌပနာနိ။
Dve paṭikkosā – kāyena vā paṭikkosati vācāya vā paṭikkosati. Dve nissāraṇā – atthi puggalo appatto nissāraṇaṃ taṃ ce saṅgho nissāreti ekacco sunissārito, ekacco dunnissārito. Dve osāraṇā – atthi puggalo appatto osāraṇaṃ taṃ ce saṅgho osāreti ekacco sosārito, ekacco dosārito. Dve paṭiññā – kāyena vā paṭijānāti vācāya vā paṭijānāti. Dve paṭiggahā – kāyena vā paṭiggaṇhāti kāyapaṭibaddhena vā paṭiggaṇhāti. Dve paṭikkhepā – kāyena vā paṭikkhipati vācāya vā paṭikkhipati. Dve upaghātikā – sikkhūpaghātikā ca bhogūpaghātikā ca. Dve codanā – kāyena vā codeti vācāya vā codeti. Dve kathinassa palibodhā – āvāsapalibodho ca cīvarapalibodho ca. Dve kathinassa apalibodhā – āvāsaapalibodho ca cīvaraapalibodho ca. Dve cīvarāni – gahapatikañca paṃsukūlañca. Dve pattā – ayopatto mattikāpatto. Dve maṇḍalāni – tipumayaṃ, sīsamayaṃ. Dve pattassa adhiṭṭhānā – kāyena vā adhiṭṭheti vācāya vā adhiṭṭheti. Dve cīvarassa adhiṭṭhānā – kāyena vā adhiṭṭheti vācāya vā adhiṭṭheti. Dve vikappanā – sammukhāvikappanā ca parammukhāvikappanā ca. Dve vinayā – bhikkhūnañca bhikkhunīnañca. Dve venayikā – paññattañca paññattānulomañca. Dve vinayassa sallekhā – akappiye setughāto, kappiye mattakāritā. Dvīhākārehi āpattiṃ āpajjati – kāyena vā āpajjati vācāya vā āpajjati. Dvīhākārehi āpattiyā vuṭṭhāti – kāyena vā vuṭṭhāti vācāya vā vuṭṭhāti. Dve parivāsā – paṭicchannaparivāso, appaṭicchannaparivāso. Aparepi dve parivāsā – suddhantaparivāso samodhānaparivāso. Dve mānattā – paṭicchannamānattaṃ, appaṭicchannamānattaṃ. Aparepi dve mānattā – pakkhamānattaṃ, samodhānamānattaṃ. Dvinnaṃ puggalānaṃ ratticchedo – pārivāsikassa ca mānattacārikassa ca. Dve anādariyāni – puggalānādariyañca dhammānādariyañca. Dve loṇāni – jātimañca kārimañca 5. Aparānipi dve loṇāni – sāmuddaṃ kāḷaloṇaṃ. Aparānipi dve loṇāni – sindhavaṃ, ubbhidaṃ 6. Aparānipi dve loṇāni – romakaṃ, pakkālakaṃ. Dve paribhogā – abbhantaraparibhogo ca bāhiraparibhogo ca. Dve akkosā – hīno ca akkoso ukkaṭṭho ca akkoso. Dvīhākārehi pesuññaṃ hoti – piyakamyassa vā bhedādhippāyassa vā. Dvīhākārehi gaṇabhojanaṃ pasavati – nimantanato vā viññattito vā. Dve vassūpanāyikā – purimikā, pacchimikā. Dve adhammikāni pātimokkhaṭṭhapanāni. Dve dhammikāni pātimokkhaṭṭhapanāni.
7 ဒ္ဝေ ပုဂ္ဂလာ ဗာလာ – ယော စ အနာဂတံ ဘာရံ ဝဟတိ, ယော စ အာဂတံ ဘာရံ န ဝဟတိ။ ဒ္ဝေ ပုဂ္ဂလာ ပဏ္ဍိတာ – ယော စ အနာဂတံ ဘာရံ န ဝဟတိ, ယော စ အာဂတံ ဘာရံ ဝဟတိ။ အပရေပိ ဒ္ဝေ ပုဂ္ဂလာ ဗာလာ – ယော စ အကပ္ပိယေ ကပ္ပိယသညီ, ယော စ ကပ္ပိယေ အကပ္ပိယသညီ။ ဒ္ဝေ ပုဂ္ဂလာ ပဏ္ဍိတာ – ယော စ အကပ္ပိယေ အကပ္ပိယသညီ, ယော စ ကပ္ပိယေ ကပ္ပိယသညီ။ အပရေပိ ဒ္ဝေ ပုဂ္ဂလာ ဗာလာ – ယော စ အနာပတ္တိယာ အာပတ္တိသညီ, ယော စ အာပတ္တိယာ အနာပတ္တိသညီ။ ဒ္ဝေ ပုဂ္ဂလာ ပဏ္ဍိတာ – ယော စ အာပတ္တိယာ အာပတ္တိသညီ, ယော စ အနာပတ္တိယာ အနာပတ္တိသညီ။ အပရေပိ ဒ္ဝေ ပုဂ္ဂလာ ဗာလာ – ယော စ အဓမ္မေ ဓမ္မသညီ, ယော စ ဓမ္မေ အဓမ္မသညီ။ ဒ္ဝေ ပုဂ္ဂလာ ပဏ္ဍိတာ – ယော စ အဓမ္မေ အဓမ္မသညီ, ယော စ ဓမ္မေ ဓမ္မသညီ။ အပရေပိ ဒ္ဝေ ပုဂ္ဂလာ ဗာလာ – ယော စ အဝိနယေ ဝိနယသညီ, ယော စ ဝိနယေ အဝိနယသညီ။ ဒ္ဝေ ပုဂ္ဂလာ ပဏ္ဍိတာ – ယော စ အဝိနယေ အဝိနယသညီ, ယော စ ဝိနယေ ဝိနယသညီ။
8 Dve puggalā bālā – yo ca anāgataṃ bhāraṃ vahati, yo ca āgataṃ bhāraṃ na vahati. Dve puggalā paṇḍitā – yo ca anāgataṃ bhāraṃ na vahati, yo ca āgataṃ bhāraṃ vahati. Aparepi dve puggalā bālā – yo ca akappiye kappiyasaññī, yo ca kappiye akappiyasaññī. Dve puggalā paṇḍitā – yo ca akappiye akappiyasaññī, yo ca kappiye kappiyasaññī. Aparepi dve puggalā bālā – yo ca anāpattiyā āpattisaññī, yo ca āpattiyā anāpattisaññī. Dve puggalā paṇḍitā – yo ca āpattiyā āpattisaññī, yo ca anāpattiyā anāpattisaññī. Aparepi dve puggalā bālā – yo ca adhamme dhammasaññī, yo ca dhamme adhammasaññī. Dve puggalā paṇḍitā – yo ca adhamme adhammasaññī, yo ca dhamme dhammasaññī. Aparepi dve puggalā bālā – yo ca avinaye vinayasaññī, yo ca vinaye avinayasaññī. Dve puggalā paṇḍitā – yo ca avinaye avinayasaññī, yo ca vinaye vinayasaññī.
9 ဒ္ဝိန္နံ ပုဂ္ဂလာနံ အာသဝာ ဝဍ္ဎန္တိ – ယော စ န ကုက္ကုစ္စာယိတဗ္ဗံ ကုက္ကုစ္စာယတိ, ယော စ ကုက္ကုစ္စာယိတဗ္ဗံ ကုက္ကုစ္စာယတိ။ ဒ္ဝိန္နံ ပုဂ္ဂလာနံ အာသဝာ န ဝဍ္ဎန္တိ – ယော စ ကုက္ကုစ္စာယိတဗ္ဗံ န ကုက္ကုစ္စာယတိ, ယော စ ကုက္ကုစ္စာယိတဗ္ဗံ ကုက္ကုစ္စာယတိ။ အပရေသမ္ပိ ဒ္ဝိန္နံ ပုဂ္ဂလာနံ အာသဝာ ဝဍ္ဎန္တိ – ယော စ အကပ္ပိယေ ကပ္ပိယသညီ, ယော စ ကပ္ပိယေ အကပ္ပိယသညီ။ ဒ္ဝိန္နံ ပုဂ္ဂလာနံ အာသဝာ န ဝဍ္ဎန္တိ – ယော စ အကပ္ပိယေ အကပ္ပိယသညီ, ယော စ ကပ္ပိယေ ကပ္ပိယသညီ။ အပရေသမ္ပိ ဒ္ဝိန္နံ ပုဂ္ဂလာနံ အာသဝာ ဝဍ္ဎန္တိ – ယော စ အနာပတ္တိယာ အာပတ္တိသညီ, ယော စ အာပတ္တိယာ အနာပတ္တိသညီ။ ဒ္ဝိန္နံ ပုဂ္ဂလာနံ အာသဝာ န ဝဍ္ဎန္တိ – ယော စ အနာပတ္တိယာ အနာပတ္တိသညီ, ယော စ အာပတ္တိယာ အာပတ္တိသညီ။ အပရေသမ္ပိ ဒ္ဝိန္နံ ပုဂ္ဂလာနံ အာသဝာ ဝဍ္ဎန္တိ – ယော စ အဓမ္မေ ဓမ္မသညီ, ယော စ ဓမ္မေ အဓမ္မသညီ။ ဒ္ဝိန္နံ ပုဂ္ဂလာနံ အာသဝာ န ဝဍ္ဎန္တိ – ယော စ အဓမ္မေ အဓမ္မသညီ, ယော စ ဓမ္မေ ဓမ္မသညီ။ အပရေသမ္ပိ ဒ္ဝိန္နံ ပုဂ္ဂလာနံ အာသဝာ ဝဍ္ဎန္တိ – ယော စ အဝိနယေ ဝိနယသညီ, ယော စ ဝိနယေ အဝိနယသညီ။ ဒ္ဝိန္နံ ပုဂ္ဂလာနံ အာသဝာ န ဝဍ္ဎန္တိ – ယော စ အဝိနယေ အဝိနယသညီ, ယော စ ဝိနယေ ဝိနယသညီ။
10 Dvinnaṃ puggalānaṃ āsavā vaḍḍhanti – yo ca na kukkuccāyitabbaṃ kukkuccāyati, yo ca kukkuccāyitabbaṃ kukkuccāyati. Dvinnaṃ puggalānaṃ āsavā na vaḍḍhanti – yo ca kukkuccāyitabbaṃ na kukkuccāyati, yo ca kukkuccāyitabbaṃ kukkuccāyati. Aparesampi dvinnaṃ puggalānaṃ āsavā vaḍḍhanti – yo ca akappiye kappiyasaññī, yo ca kappiye akappiyasaññī. Dvinnaṃ puggalānaṃ āsavā na vaḍḍhanti – yo ca akappiye akappiyasaññī, yo ca kappiye kappiyasaññī. Aparesampi dvinnaṃ puggalānaṃ āsavā vaḍḍhanti – yo ca anāpattiyā āpattisaññī, yo ca āpattiyā anāpattisaññī. Dvinnaṃ puggalānaṃ āsavā na vaḍḍhanti – yo ca anāpattiyā anāpattisaññī, yo ca āpattiyā āpattisaññī. Aparesampi dvinnaṃ puggalānaṃ āsavā vaḍḍhanti – yo ca adhamme dhammasaññī, yo ca dhamme adhammasaññī. Dvinnaṃ puggalānaṃ āsavā na vaḍḍhanti – yo ca adhamme adhammasaññī, yo ca dhamme dhammasaññī. Aparesampi dvinnaṃ puggalānaṃ āsavā vaḍḍhanti – yo ca avinaye vinayasaññī, yo ca vinaye avinayasaññī. Dvinnaṃ puggalānaṃ āsavā na vaḍḍhanti – yo ca avinaye avinayasaññī, yo ca vinaye vinayasaññī.
ဒုကာ နိဋ္ဌိတာ။
Dukā niṭṭhitā.
တသ္သုဒ္ဒာနံ –
Tassuddānaṃ –
သညာ လဒ္ဓာ စ သဒ္ဓမ္မာ၊ ပရိက္ခာရာ စ ပုဂ္ဂလာ။
Saññā laddhā ca saddhammā, parikkhārā ca puggalā;
သစ္စံ ဘူမိ နိက္ခမန္တော၊ အာဒိယန္တော သမာဒိယံ။
Saccaṃ bhūmi nikkhamanto, ādiyanto samādiyaṃ.
ကရောန္တော ဒေန္တော ဂဏ္ဟန္တော၊ ပရိဘောဂေန ရတ္တိ စ။
Karonto dento gaṇhanto, paribhogena ratti ca;
အရုဏာဆိန္ဒံ ဆာဒေန္တော၊ ဓာရေန္တော စ ဥပောသထာ။
Aruṇāchindaṃ chādento, dhārento ca uposathā.
ပဝာရဏာ ကမ္မာပရာ၊ ဝတ္ထု အပရာ ဒောသာ စ။
Pavāraṇā kammāparā, vatthu aparā dosā ca;
အပရာ ဒ္ဝေ စ သမ္ပတ္တိ၊ နာနာ သမာနမေဝ စ။
Aparā dve ca sampatti, nānā samānameva ca.
ပာရာဇိသင္ဃထုလ္လစ္စယ၊ ပာစိတ္တိ ပာဋိဒေသနာ။
Pārājisaṅghathullaccaya, pācitti pāṭidesanā;
ဒုက္ကဋာ ဒုဗ္ဘာသိတာ စေဝ၊ သတ္တ အာပတ္တိက္ခန္ဓာ စ။
Dukkaṭā dubbhāsitā ceva, satta āpattikkhandhā ca.
ဘိဇ္ဇတိ ဥပသမ္ပဒာ၊ တထေဝ အပရေ ဒုဝေ။
Bhijjati upasampadā, tatheva apare duve;
န ဝတ္ထဗ္ဗံ န ဒာတဗ္ဗံ၊ အဘဗ္ဗာဘဗ္ဗမေဝ စ။
Na vatthabbaṃ na dātabbaṃ, abhabbābhabbameva ca.
သဉ္စိစ္စ သာတိသာရာ စ၊ ပဋိက္ကောသာ နိသ္သာရဏာ။
Sañcicca sātisārā ca, paṭikkosā nissāraṇā;
ဩသာရဏာ ပဋိညာ စ၊ ပဋိဂ္ဂဟာ ပဋိက္ခိပာ။
Osāraṇā paṭiññā ca, paṭiggahā paṭikkhipā.
ဥပဃာတိ စောဒနာ စ၊ ကထိနာ စ ဒုဝေ တထာ။
Upaghāti codanā ca, kathinā ca duve tathā;
စီဝရာ ပတ္တမဏ္ဍလာ၊ အဓိဋ္ဌာနာ တထေဝ ဒ္ဝေ။
Cīvarā pattamaṇḍalā, adhiṭṭhānā tatheva dve.
ဝိကပ္ပနာ စ ဝိနယာ၊ ဝေနယိကာ စ သလ္လေခာ။
Vikappanā ca vinayā, venayikā ca sallekhā;
အာပဇ္ဇတိ စ ဝုဋ္ဌာတိ၊ ပရိဝာသာပရေ ဒုဝေ။
Āpajjati ca vuṭṭhāti, parivāsāpare duve.
ဒ္ဝေ မာနတ္တာ အပရေ စ၊ ရတ္တိစ္ဆေဒော အနာဒရိ။
Dve mānattā apare ca, ratticchedo anādari;
ဒ္ဝေ လောဏာ တယော အပရေ၊ ပရိဘောဂက္ကောသေန စ။
Dve loṇā tayo apare, paribhogakkosena ca.
ပေသုညော စ ဂဏာဝသ္သ၊ ဌပနာ ဘာရကပ္ပိယံ။
Pesuñño ca gaṇāvassa, ṭhapanā bhārakappiyaṃ;
အနာပတ္တိ အဓမ္မဓမ္မာ၊ ဝိနယေ အာသဝေ တထာတိ။
Anāpatti adhammadhammā, vinaye āsave tathāti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / ပရိဝာရ-အဋ္ဌကထာ • Parivāra-aṭṭhakathā / ဒုကဝာရဝဏ္ဏနာ • Dukavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဒုကဝာရဝဏ္ဏနာ • Dukavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဒုကဝာရဝဏ္ဏနာ • Dukavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဒုကဝာရဝဏ္ဏနာ • Dukavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဧကုတ္တရိကနယော ဒုကဝာရဝဏ္ဏနာ • Ekuttarikanayo dukavāravaṇṇanā
