| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१६. दुक्करपञ्हासुत्तं
16. Dukkarapañhāsuttaṃ
३२९. ‘‘किं नु खो, आवुसो सारिपुत्त, इमस्मिं धम्मविनये दुक्कर’’न्ति? ‘‘पब्बज्जा खो, आवुसो, इमस्मिं धम्मविनये दुक्करा’’ति। ‘‘पब्बजितेन पनावुसो, किं दुक्कर’’न्ति? ‘‘पब्बजितेन खो, आवुसो, अभिरति दुक्करा’’ति। ‘‘अभिरतेन पनावुसो, किं दुक्कर’’न्ति? ‘‘अभिरतेन खो, आवुसो, धम्मानुधम्मप्पटिपत्ति दुक्करा’’ति। ‘‘कीवचिरं पनावुसो, धम्मानुधम्मप्पटिपन्नो भिक्खु अरहं अस्सा’’ति? ‘‘नचिरं, आवुसो’’ति। सोळसमं।
329. ‘‘Kiṃ nu kho, āvuso sāriputta, imasmiṃ dhammavinaye dukkara’’nti? ‘‘Pabbajjā kho, āvuso, imasmiṃ dhammavinaye dukkarā’’ti. ‘‘Pabbajitena panāvuso, kiṃ dukkara’’nti? ‘‘Pabbajitena kho, āvuso, abhirati dukkarā’’ti. ‘‘Abhiratena panāvuso, kiṃ dukkara’’nti? ‘‘Abhiratena kho, āvuso, dhammānudhammappaṭipatti dukkarā’’ti. ‘‘Kīvaciraṃ panāvuso, dhammānudhammappaṭipanno bhikkhu arahaṃ assā’’ti? ‘‘Naciraṃ, āvuso’’ti. Soḷasamaṃ.
जम्बुखादकसंयुत्तं समत्तं।
Jambukhādakasaṃyuttaṃ samattaṃ.
तस्सुद्दानं –
Tassuddānaṃ –
निब्बानं अरहत्तञ्च, धम्मवादी किमत्थियं।
Nibbānaṃ arahattañca, dhammavādī kimatthiyaṃ;
अस्सासो परमस्सासो, वेदना आसवाविज्जा।
Assāso paramassāso, vedanā āsavāvijjā;
तण्हा ओघा उपादानं, भवो दुक्खञ्च सक्कायो॥
Taṇhā oghā upādānaṃ, bhavo dukkhañca sakkāyo.
इमस्मिं धम्मविनये दुक्करन्ति॥
Imasmiṃ dhammavinaye dukkaranti.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १६. दुक्करपञ्हासुत्तवण्णना • 16. Dukkarapañhāsuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १६. दुक्करपञ्हसुत्तवण्णना • 16. Dukkarapañhasuttavaṇṇanā
