| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
16. දුක්‌කරපඤ්‌හාසුත්‌තං
16. Dukkarapañhāsuttaṃ
329. ‘‘කිං නු ඛො, ආවුසො සාරිපුත්‌ත, ඉමස්‌මිං ධම්‌මවිනයෙ දුක්‌කර’’න්‌ති? ‘‘පබ්‌බජ්‌ජා ඛො, ආවුසො, ඉමස්‌මිං ධම්‌මවිනයෙ දුක්‌කරා’’ති. ‘‘පබ්‌බජිතෙන පනාවුසො, කිං දුක්‌කර’’න්‌ති? ‘‘පබ්‌බජිතෙන ඛො, ආවුසො, අභිරති දුක්‌කරා’’ති. ‘‘අභිරතෙන පනාවුසො, කිං දුක්‌කර’’න්‌ති? ‘‘අභිරතෙන ඛො, ආවුසො, ධම්‌මානුධම්‌මප්‌පටිපත්‌ති දුක්‌කරා’’ති. ‘‘කීවචිරං පනාවුසො, ධම්‌මානුධම්‌මප්‌පටිපන්‌නො භික්‌ඛු අරහං අස්‌සා’’ති? ‘‘නචිරං, ආවුසො’’ති. සොළසමං.
329. ‘‘Kiṃ nu kho, āvuso sāriputta, imasmiṃ dhammavinaye dukkara’’nti? ‘‘Pabbajjā kho, āvuso, imasmiṃ dhammavinaye dukkarā’’ti. ‘‘Pabbajitena panāvuso, kiṃ dukkara’’nti? ‘‘Pabbajitena kho, āvuso, abhirati dukkarā’’ti. ‘‘Abhiratena panāvuso, kiṃ dukkara’’nti? ‘‘Abhiratena kho, āvuso, dhammānudhammappaṭipatti dukkarā’’ti. ‘‘Kīvaciraṃ panāvuso, dhammānudhammappaṭipanno bhikkhu arahaṃ assā’’ti? ‘‘Naciraṃ, āvuso’’ti. Soḷasamaṃ.
ජම්‌බුඛාදකසංයුත්‌තං සමත්‌තං.
Jambukhādakasaṃyuttaṃ samattaṃ.
තස්‌සුද්‌දානං –
Tassuddānaṃ –
නිබ්‌බානං අරහත්‌තඤ්‌ච, ධම්‌මවාදී කිමත්‌ථියං;
Nibbānaṃ arahattañca, dhammavādī kimatthiyaṃ;
අස්‌සාසො පරමස්‌සාසො, වෙදනා ආසවාවිජ්‌ජා;
Assāso paramassāso, vedanā āsavāvijjā;
තණ්‌හා ඔඝා උපාදානං, භවො දුක්‌ඛඤ්‌ච සක්‌කායො.
Taṇhā oghā upādānaṃ, bhavo dukkhañca sakkāyo.
ඉමස්‌මිං ධම්‌මවිනයෙ දුක්‌කරන්‌ති.
Imasmiṃ dhammavinaye dukkaranti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 16. දුක්‌කරපඤ්‌හාසුත්‌තවණ්‌ණනා • 16. Dukkarapañhāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 16. දුක්‌කරපඤ්‌හසුත්‌තවණ්‌ණනා • 16. Dukkarapañhasuttavaṇṇanā
