| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. து³க்கரஸுத்தவண்ணனா
7. Dukkarasuttavaṇṇanā
17. ஸத்தமே து³த்திதிக்க²ந்தி து³க்க²மங் து³அதி⁴வாஸியங். அப்³யத்தேனாதி பா³லேன. ஸாமஞ்ஞந்தி ஸமணத⁴ம்மோ. இமினா தே³வதா இத³ங் த³ஸ்ஸேதி – யங் பண்டி³தா குலபுத்தா த³ஸபி வஸ்ஸானி வீஸதிபி ஸட்டி²பி வஸ்ஸானி த³ந்தே அபி⁴த³ந்தமாதா⁴ய ஜிவ்ஹாய தாலுங் ஆஹச்சபி சேதஸா சித்தங் அபி⁴னிக்³க³ண்ஹித்வாபி ஏகாஸனங் ஏகப⁴த்தங் படிஸேவமானா ஆபாணகோடிகங் ப்³ரஹ்மசரியங் சரந்தா ஸாமஞ்ஞங் கரொந்தி. தங் ப⁴க³வா பா³லோ அப்³யத்தோ காதுங் ந ஸக்கோதீதி. ப³ஹூ ஹி தத்த² ஸம்பா³தா⁴தி தஸ்மிங் ஸாமஞ்ஞஸங்கா²தே அரியமக்³கே³ ப³ஹூ ஸம்பா³தா⁴ மக்³கா³தி⁴க³மாய படிபன்னஸ்ஸ புப்³ப³பா⁴கே³ ப³ஹூ பரிஸ்ஸயாதி த³ஸ்ஸேதி.
17. Sattame duttitikkhanti dukkhamaṃ duadhivāsiyaṃ. Abyattenāti bālena. Sāmaññanti samaṇadhammo. Iminā devatā idaṃ dasseti – yaṃ paṇḍitā kulaputtā dasapi vassāni vīsatipi saṭṭhipi vassāni dante abhidantamādhāya jivhāya tāluṃ āhaccapi cetasā cittaṃ abhiniggaṇhitvāpi ekāsanaṃ ekabhattaṃ paṭisevamānā āpāṇakoṭikaṃ brahmacariyaṃ carantā sāmaññaṃ karonti. Taṃ bhagavā bālo abyatto kātuṃ na sakkotīti. Bahū hi tattha sambādhāti tasmiṃ sāmaññasaṅkhāte ariyamagge bahū sambādhā maggādhigamāya paṭipannassa pubbabhāge bahū parissayāti dasseti.
சித்தஞ்சே ந நிவாரயேதி யதி³ அயோனிஸோ உப்பன்னங் சித்தங் ந நிவாரெய்ய, கதி அஹானி ஸாமஞ்ஞங் சரெய்ய? ஏகதி³வஸம்பி ந சரெய்ய. சித்தவஸிகோ ஹி ஸமணத⁴ம்மங் காதுங் ந ஸக்கோதி. பதே³ பதே³தி ஆரம்மணே ஆரம்மணே. ஆரம்மணஞ்ஹி இத⁴ பத³ந்தி அதி⁴ப்பேதங். யஸ்மிங் யஸ்மிங் ஹி ஆரம்மணே கிலேஸோ உப்பஜ்ஜதி, தத்த² தத்த² பா³லோ விஸீத³தி நாம. இரியாபத²பத³ம்பி வட்டதி. க³மனாதீ³ஸு ஹி யத்த² யத்த² கிலேஸோ உப்பஜ்ஜதி, தத்த² தத்தே²வ விஸீத³தி நாம. ஸங்கப்பானந்தி காமஸங்கப்பாதீ³னங்.
Cittañce na nivārayeti yadi ayoniso uppannaṃ cittaṃ na nivāreyya, kati ahāni sāmaññaṃ careyya? Ekadivasampi na careyya. Cittavasiko hi samaṇadhammaṃ kātuṃ na sakkoti. Pade padeti ārammaṇe ārammaṇe. Ārammaṇañhi idha padanti adhippetaṃ. Yasmiṃ yasmiṃ hi ārammaṇe kileso uppajjati, tattha tattha bālo visīdati nāma. Iriyāpathapadampi vaṭṭati. Gamanādīsu hi yattha yattha kileso uppajjati, tattha tattheva visīdati nāma. Saṅkappānanti kāmasaṅkappādīnaṃ.
கும்மோ வாதி கச்ச²போ விய. அங்கா³னீதி கீ³வபஞ்சமானி அங்கா³னி. ஸமோத³ஹந்தி ஸமோத³ஹந்தோ, ஸமோத³ஹித்வா வா. மனோவிதக்கேதி மனம்ஹி உப்பன்னவிதக்கே. எத்தாவதா இத³ங் த³ஸ்ஸேதி – யதா² கும்மோ ஸொண்டி³பஞ்சமானி அங்கா³னி ஸகே கபாலே ஸமோத³ஹந்தோ ஸிங்கா³லஸ்ஸ ஓதாரங் ந தே³தி, ஸமோத³ஹித்வா சஸ்ஸ அப்பஸய்ஹதங் ஆபஜ்ஜதி, ஏவமேவங் பி⁴க்கு² மனம்ஹி உப்பன்னவிதக்கே ஸகே ஆரம்மணகபாலே ஸமோத³ஹங் மாரஸ்ஸ ஓதாரங் ந தே³தி, ஸமோத³ஹித்வா சஸ்ஸ அப்பஸய்ஹதங் ஆபஜ்ஜதீதி. அனிஸ்ஸிதோதி தண்ஹாதி³ட்டி²னிஸ்ஸயேஹி அனிஸ்ஸிதோ ஹுத்வா. அஹேட²யானோதி அவிஹிங்ஸமானோ. பரினிப்³பு³தோதி கிலேஸனிப்³பா³னேன பரினிப்³பு³தோ. நூபவதெ³ய்ய கஞ்சீதி யங்கிஞ்சி புக்³க³லங் ஆசாரவிபத்திஆதீ³ஸு யாய காயசி மங்குங் காதுகாமோ ஹுத்வா ந வதெ³ய்ய, ‘‘காலேன வக்கா²மி நோ அகாலேனா’’திஆத³யோ பன பஞ்ச த⁴ம்மே அஜ்ஜ²த்தங் உபட்ட²பெத்வா உல்லும்பனஸபா⁴வஸண்டி²தேன சித்தேன காருஞ்ஞதங் படிச்ச வதெ³ய்யாதி.
Kummo vāti kacchapo viya. Aṅgānīti gīvapañcamāni aṅgāni. Samodahanti samodahanto, samodahitvā vā. Manovitakketi manamhi uppannavitakke. Ettāvatā idaṃ dasseti – yathā kummo soṇḍipañcamāni aṅgāni sake kapāle samodahanto siṅgālassa otāraṃ na deti, samodahitvā cassa appasayhataṃ āpajjati, evamevaṃ bhikkhu manamhi uppannavitakke sake ārammaṇakapāle samodahaṃ mārassa otāraṃ na deti, samodahitvā cassa appasayhataṃ āpajjatīti. Anissitoti taṇhādiṭṭhinissayehi anissito hutvā. Aheṭhayānoti avihiṃsamāno. Parinibbutoti kilesanibbānena parinibbuto. Nūpavadeyya kañcīti yaṃkiñci puggalaṃ ācāravipattiādīsu yāya kāyaci maṅkuṃ kātukāmo hutvā na vadeyya, ‘‘kālena vakkhāmi no akālenā’’tiādayo pana pañca dhamme ajjhattaṃ upaṭṭhapetvā ullumpanasabhāvasaṇṭhitena cittena kāruññataṃ paṭicca vadeyyāti.
து³க்கரஸுத்தவண்ணனா நிட்டி²தா.
Dukkarasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. து³க்கரஸுத்தங் • 7. Dukkarasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. து³க்கரஸுத்தவண்ணனா • 7. Dukkarasuttavaṇṇanā
