| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੭. ਦੁਕ੍ਕਰਸੁਤ੍ਤવਣ੍ਣਨਾ
7. Dukkarasuttavaṇṇanā
੧੭. ਸਤ੍ਤਮੇ ਦੁਤ੍ਤਿਤਿਕ੍ਖਨ੍ਤਿ ਦੁਕ੍ਖਮਂ ਦੁਅਧਿવਾਸਿਯਂ। ਅਬ੍ਯਤ੍ਤੇਨਾਤਿ ਬਾਲੇਨ। ਸਾਮਞ੍ਞਨ੍ਤਿ ਸਮਣਧਮ੍ਮੋ। ਇਮਿਨਾ ਦੇવਤਾ ਇਦਂ ਦਸ੍ਸੇਤਿ – ਯਂ ਪਣ੍ਡਿਤਾ ਕੁਲਪੁਤ੍ਤਾ ਦਸਪਿ વਸ੍ਸਾਨਿ વੀਸਤਿਪਿ ਸਟ੍ਠਿਪਿ વਸ੍ਸਾਨਿ ਦਨ੍ਤੇ ਅਭਿਦਨ੍ਤਮਾਧਾਯ ਜਿવ੍ਹਾਯ ਤਾਲੁਂ ਆਹਚ੍ਚਪਿ ਚੇਤਸਾ ਚਿਤ੍ਤਂ ਅਭਿਨਿਗ੍ਗਣ੍ਹਿਤ੍વਾਪਿ ਏਕਾਸਨਂ ਏਕਭਤ੍ਤਂ ਪਟਿਸੇવਮਾਨਾ ਆਪਾਣਕੋਟਿਕਂ ਬ੍ਰਹ੍ਮਚਰਿਯਂ ਚਰਨ੍ਤਾ ਸਾਮਞ੍ਞਂ ਕਰੋਨ੍ਤਿ। ਤਂ ਭਗવਾ ਬਾਲੋ ਅਬ੍ਯਤ੍ਤੋ ਕਾਤੁਂ ਨ ਸਕ੍ਕੋਤੀਤਿ। ਬਹੂ ਹਿ ਤਤ੍ਥ ਸਮ੍ਬਾਧਾਤਿ ਤਸ੍ਮਿਂ ਸਾਮਞ੍ਞਸਙ੍ਖਾਤੇ ਅਰਿਯਮਗ੍ਗੇ ਬਹੂ ਸਮ੍ਬਾਧਾ ਮਗ੍ਗਾਧਿਗਮਾਯ ਪਟਿਪਨ੍ਨਸ੍ਸ ਪੁਬ੍ਬਭਾਗੇ ਬਹੂ ਪਰਿਸ੍ਸਯਾਤਿ ਦਸ੍ਸੇਤਿ।
17. Sattame duttitikkhanti dukkhamaṃ duadhivāsiyaṃ. Abyattenāti bālena. Sāmaññanti samaṇadhammo. Iminā devatā idaṃ dasseti – yaṃ paṇḍitā kulaputtā dasapi vassāni vīsatipi saṭṭhipi vassāni dante abhidantamādhāya jivhāya tāluṃ āhaccapi cetasā cittaṃ abhiniggaṇhitvāpi ekāsanaṃ ekabhattaṃ paṭisevamānā āpāṇakoṭikaṃ brahmacariyaṃ carantā sāmaññaṃ karonti. Taṃ bhagavā bālo abyatto kātuṃ na sakkotīti. Bahū hi tattha sambādhāti tasmiṃ sāmaññasaṅkhāte ariyamagge bahū sambādhā maggādhigamāya paṭipannassa pubbabhāge bahū parissayāti dasseti.
ਚਿਤ੍ਤਞ੍ਚੇ ਨ ਨਿવਾਰਯੇਤਿ ਯਦਿ ਅਯੋਨਿਸੋ ਉਪ੍ਪਨ੍ਨਂ ਚਿਤ੍ਤਂ ਨ ਨਿવਾਰੇਯ੍ਯ, ਕਤਿ ਅਹਾਨਿ ਸਾਮਞ੍ਞਂ ਚਰੇਯ੍ਯ? ਏਕਦਿવਸਮ੍ਪਿ ਨ ਚਰੇਯ੍ਯ। ਚਿਤ੍ਤવਸਿਕੋ ਹਿ ਸਮਣਧਮ੍ਮਂ ਕਾਤੁਂ ਨ ਸਕ੍ਕੋਤਿ। ਪਦੇ ਪਦੇਤਿ ਆਰਮ੍ਮਣੇ ਆਰਮ੍ਮਣੇ। ਆਰਮ੍ਮਣਞ੍ਹਿ ਇਧ ਪਦਨ੍ਤਿ ਅਧਿਪ੍ਪੇਤਂ। ਯਸ੍ਮਿਂ ਯਸ੍ਮਿਂ ਹਿ ਆਰਮ੍ਮਣੇ ਕਿਲੇਸੋ ਉਪ੍ਪਜ੍ਜਤਿ, ਤਤ੍ਥ ਤਤ੍ਥ ਬਾਲੋ વਿਸੀਦਤਿ ਨਾਮ। ਇਰਿਯਾਪਥਪਦਮ੍ਪਿ વਟ੍ਟਤਿ। ਗਮਨਾਦੀਸੁ ਹਿ ਯਤ੍ਥ ਯਤ੍ਥ ਕਿਲੇਸੋ ਉਪ੍ਪਜ੍ਜਤਿ, ਤਤ੍ਥ ਤਤ੍ਥੇવ વਿਸੀਦਤਿ ਨਾਮ। ਸਙ੍ਕਪ੍ਪਾਨਨ੍ਤਿ ਕਾਮਸਙ੍ਕਪ੍ਪਾਦੀਨਂ।
Cittañce na nivārayeti yadi ayoniso uppannaṃ cittaṃ na nivāreyya, kati ahāni sāmaññaṃ careyya? Ekadivasampi na careyya. Cittavasiko hi samaṇadhammaṃ kātuṃ na sakkoti. Pade padeti ārammaṇe ārammaṇe. Ārammaṇañhi idha padanti adhippetaṃ. Yasmiṃ yasmiṃ hi ārammaṇe kileso uppajjati, tattha tattha bālo visīdati nāma. Iriyāpathapadampi vaṭṭati. Gamanādīsu hi yattha yattha kileso uppajjati, tattha tattheva visīdati nāma. Saṅkappānanti kāmasaṅkappādīnaṃ.
ਕੁਮ੍ਮੋ વਾਤਿ ਕਚ੍ਛਪੋ વਿਯ। ਅਙ੍ਗਾਨੀਤਿ ਗੀવਪਞ੍ਚਮਾਨਿ ਅਙ੍ਗਾਨਿ। ਸਮੋਦਹਨ੍ਤਿ ਸਮੋਦਹਨ੍ਤੋ, ਸਮੋਦਹਿਤ੍વਾ વਾ। ਮਨੋવਿਤਕ੍ਕੇਤਿ ਮਨਮ੍ਹਿ ਉਪ੍ਪਨ੍ਨવਿਤਕ੍ਕੇ। ਏਤ੍ਤਾવਤਾ ਇਦਂ ਦਸ੍ਸੇਤਿ – ਯਥਾ ਕੁਮ੍ਮੋ ਸੋਣ੍ਡਿਪਞ੍ਚਮਾਨਿ ਅਙ੍ਗਾਨਿ ਸਕੇ ਕਪਾਲੇ ਸਮੋਦਹਨ੍ਤੋ ਸਿਙ੍ਗਾਲਸ੍ਸ ਓਤਾਰਂ ਨ ਦੇਤਿ, ਸਮੋਦਹਿਤ੍વਾ ਚਸ੍ਸ ਅਪ੍ਪਸਯ੍ਹਤਂ ਆਪਜ੍ਜਤਿ, ਏવਮੇવਂ ਭਿਕ੍ਖੁ ਮਨਮ੍ਹਿ ਉਪ੍ਪਨ੍ਨવਿਤਕ੍ਕੇ ਸਕੇ ਆਰਮ੍ਮਣਕਪਾਲੇ ਸਮੋਦਹਂ ਮਾਰਸ੍ਸ ਓਤਾਰਂ ਨ ਦੇਤਿ, ਸਮੋਦਹਿਤ੍વਾ ਚਸ੍ਸ ਅਪ੍ਪਸਯ੍ਹਤਂ ਆਪਜ੍ਜਤੀਤਿ। ਅਨਿਸ੍ਸਿਤੋਤਿ ਤਣ੍ਹਾਦਿਟ੍ਠਿਨਿਸ੍ਸਯੇਹਿ ਅਨਿਸ੍ਸਿਤੋ ਹੁਤ੍વਾ। ਅਹੇਠਯਾਨੋਤਿ ਅવਿਹਿਂਸਮਾਨੋ। ਪਰਿਨਿਬ੍ਬੁਤੋਤਿ ਕਿਲੇਸਨਿਬ੍ਬਾਨੇਨ ਪਰਿਨਿਬ੍ਬੁਤੋ। ਨੂਪવਦੇਯ੍ਯ ਕਞ੍ਚੀਤਿ ਯਂਕਿਞ੍ਚਿ ਪੁਗ੍ਗਲਂ ਆਚਾਰવਿਪਤ੍ਤਿਆਦੀਸੁ ਯਾਯ ਕਾਯਚਿ ਮਙ੍ਕੁਂ ਕਾਤੁਕਾਮੋ ਹੁਤ੍વਾ ਨ વਦੇਯ੍ਯ, ‘‘ਕਾਲੇਨ વਕ੍ਖਾਮਿ ਨੋ ਅਕਾਲੇਨਾ’’ਤਿਆਦਯੋ ਪਨ ਪਞ੍ਚ ਧਮ੍ਮੇ ਅਜ੍ਝਤ੍ਤਂ ਉਪਟ੍ਠਪੇਤ੍વਾ ਉਲ੍ਲੁਮ੍ਪਨਸਭਾવਸਣ੍ਠਿਤੇਨ ਚਿਤ੍ਤੇਨ ਕਾਰੁਞ੍ਞਤਂ ਪਟਿਚ੍ਚ વਦੇਯ੍ਯਾਤਿ।
Kummo vāti kacchapo viya. Aṅgānīti gīvapañcamāni aṅgāni. Samodahanti samodahanto, samodahitvā vā. Manovitakketi manamhi uppannavitakke. Ettāvatā idaṃ dasseti – yathā kummo soṇḍipañcamāni aṅgāni sake kapāle samodahanto siṅgālassa otāraṃ na deti, samodahitvā cassa appasayhataṃ āpajjati, evamevaṃ bhikkhu manamhi uppannavitakke sake ārammaṇakapāle samodahaṃ mārassa otāraṃ na deti, samodahitvā cassa appasayhataṃ āpajjatīti. Anissitoti taṇhādiṭṭhinissayehi anissito hutvā. Aheṭhayānoti avihiṃsamāno. Parinibbutoti kilesanibbānena parinibbuto. Nūpavadeyya kañcīti yaṃkiñci puggalaṃ ācāravipattiādīsu yāya kāyaci maṅkuṃ kātukāmo hutvā na vadeyya, ‘‘kālena vakkhāmi no akālenā’’tiādayo pana pañca dhamme ajjhattaṃ upaṭṭhapetvā ullumpanasabhāvasaṇṭhitena cittena kāruññataṃ paṭicca vadeyyāti.
ਦੁਕ੍ਕਰਸੁਤ੍ਤવਣ੍ਣਨਾ ਨਿਟ੍ਠਿਤਾ।
Dukkarasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੭. ਦੁਕ੍ਕਰਸੁਤ੍ਤਂ • 7. Dukkarasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੭. ਦੁਕ੍ਕਰਸੁਤ੍ਤવਣ੍ਣਨਾ • 7. Dukkarasuttavaṇṇanā
