| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. து³க்க²த⁴ம்மஸுத்தவண்ணனா
7. Dukkhadhammasuttavaṇṇanā
244. ஸத்தமே து³க்க²த⁴ம்மானந்தி து³க்க²ஸம்ப⁴வத⁴ம்மானங். பஞ்சஸு ஹி க²ந்தே⁴ஸு ஸதி சே²த³னவத⁴ப³ந்த⁴னாதி³பே⁴த³ங் து³க்க²ங் ஸம்ப⁴வதி, தஸ்மா தே து³க்க²ஸம்ப⁴வத⁴ம்மத்தா து³க்க²த⁴ம்மாதி வுச்சந்தி. ததா² கோ² பனஸ்ஸாதி தேனாகாரேனஸ்ஸ. யதா²ஸ்ஸ காமே பஸ்ஸதோதி யேனாகாரேனஸ்ஸ காமே பஸ்ஸந்தஸ்ஸ. யதா² சரந்தந்தி யேனாகாரேன சாரஞ்ச விஹாரஞ்ச அனுப³ந்தி⁴த்வா சரந்தங். அங்கா³ரகாஸூபமா காமா தி³ட்டா² ஹொந்தீதி பரியெட்டி²மூலகஸ்ஸ சேவ படிஸந்தி⁴மூலகஸ்ஸ ச து³க்க²ஸ்ஸ வஸேன அங்கா³ரகாஸு விய மஹாபரிளாஹாதி தி³ட்டா² ஹொந்தி. காமே பரியேஸந்தானஞ்ஹி நாவாய மஹாஸமுத்³தோ³கா³ஹனஅஜபத²ஸங்குபத²படிபஜ்ஜனஉப⁴தொப்³யூள்ஹஸங்கா³மபக்க²ந்த³னாதி³வஸேன பரியெட்டி²மூலகம்பி, காமே பரிபு⁴ஞ்ஜந்தானங் காமபரிபோ⁴க³சேதனாய சதூஸு அபாயேஸு தி³ன்னபடிஸந்தி⁴மூலகம்பி மஹாபரிளாஹது³க்க²ங் உப்பஜ்ஜதி. ஏவமேதஸ்ஸ து³வித⁴ஸ்ஸாபி து³க்க²ஸ்ஸ வஸேன அங்கா³ரகாஸு விய மஹாபரிளாஹாதி தி³ட்டா² ஹொந்தி.
244. Sattame dukkhadhammānanti dukkhasambhavadhammānaṃ. Pañcasu hi khandhesu sati chedanavadhabandhanādibhedaṃ dukkhaṃ sambhavati, tasmā te dukkhasambhavadhammattā dukkhadhammāti vuccanti. Tathā kho panassāti tenākārenassa. Yathāssa kāme passatoti yenākārenassa kāme passantassa. Yathā carantanti yenākārena cārañca vihārañca anubandhitvā carantaṃ. Aṅgārakāsūpamākāmā diṭṭhā hontīti pariyeṭṭhimūlakassa ceva paṭisandhimūlakassa ca dukkhassa vasena aṅgārakāsu viya mahāpariḷāhāti diṭṭhā honti. Kāme pariyesantānañhi nāvāya mahāsamuddogāhanaajapathasaṅkupathapaṭipajjanaubhatobyūḷhasaṅgāmapakkhandanādivasena pariyeṭṭhimūlakampi, kāme paribhuñjantānaṃ kāmaparibhogacetanāya catūsu apāyesu dinnapaṭisandhimūlakampi mahāpariḷāhadukkhaṃ uppajjati. Evametassa duvidhassāpi dukkhassa vasena aṅgārakāsu viya mahāpariḷāhāti diṭṭhā honti.
தா³யந்தி அடவிங். புரதோபி கண்டகோதி புரிமபஸ்ஸே விஜ்ஜி²துகாமோ விய ஆஸன்னட்டா²னேயேவ டி²தகண்டகோ. பச்ச²தோதிஆதீ³ஸுபி ஏஸேவ நயோ. ஹெட்டா² பன பாதே³ஹி அக்கந்தட்டா²னஸ்ஸ ஸந்திகே, ந அக்கந்தட்டா²னேயேவ. ஏவங் ஸோ கண்டகக³ப்³ப⁴ங் பவிட்டோ² விய ப⁴வெய்ய. மா மங் கண்டகோதி மா மங் கண்டகோ விஜ்ஜீ²தி கண்டகவேத⁴ங் ரக்க²மானோ.
Dāyanti aṭaviṃ. Puratopi kaṇṭakoti purimapasse vijjhitukāmo viya āsannaṭṭhāneyeva ṭhitakaṇṭako. Pacchatotiādīsupi eseva nayo. Heṭṭhā pana pādehi akkantaṭṭhānassa santike, na akkantaṭṭhāneyeva. Evaṃ so kaṇṭakagabbhaṃ paviṭṭho viya bhaveyya. Mā maṃ kaṇṭakoti mā maṃ kaṇṭako vijjhīti kaṇṭakavedhaṃ rakkhamāno.
த³ந்தோ⁴, பி⁴க்க²வே, ஸதுப்பாதோ³தி ஸதியா உப்பாதோ³யேவ த³ந்தோ⁴, உப்பன்னமத்தாய பன தாய காசி கிலேஸா நிக்³க³ஹிதாவ ஹொந்தி, ந ஸண்டா²துங் ஸக்கொந்தி. சக்கு²த்³வாரஸ்மிஞ்ஹி ராகா³தீ³ஸு உப்பன்னேஸு து³தியஜவனவாரேன ‘‘கிலேஸா மே உப்பன்னா’’தி ஞத்வா ததியே ஜவனவாரே ஸங்வரஜவனங்யேவ ஜவதி. அனச்ச²ரியஞ்சேதங், யங் விபஸ்ஸகோ ததியஜவனவாரே கிலேஸே நிக்³க³ண்ஹெய்ய. சக்கு²த்³வாரே பன இட்டா²ரம்மணே ஆபாத²க³தே ப⁴வங்க³ங் ஆவட்டெத்வா ஆவஜ்ஜனாதீ³ஸு உப்பன்னேஸு வொட்ட²ப்³ப³னானந்தரங் ஸம்பத்தகிலேஸஜவனவாரங் நிவத்தெத்வா குஸலமேவ உப்பாதே³தி. ஆரத்³த⁴விபஸ்ஸகானஞ்ஹி அயமானிஸங்ஸோ பா⁴வனாபடிஸங்கா²னே பதிட்டி²தபா⁴வஸ்ஸ.
Dandho, bhikkhave, satuppādoti satiyā uppādoyeva dandho, uppannamattāya pana tāya kāci kilesā niggahitāva honti, na saṇṭhātuṃ sakkonti. Cakkhudvārasmiñhi rāgādīsu uppannesu dutiyajavanavārena ‘‘kilesā me uppannā’’ti ñatvā tatiye javanavāre saṃvarajavanaṃyeva javati. Anacchariyañcetaṃ, yaṃ vipassako tatiyajavanavāre kilese niggaṇheyya. Cakkhudvāre pana iṭṭhārammaṇe āpāthagate bhavaṅgaṃ āvaṭṭetvā āvajjanādīsu uppannesu voṭṭhabbanānantaraṃ sampattakilesajavanavāraṃ nivattetvā kusalameva uppādeti. Āraddhavipassakānañhi ayamānisaṃso bhāvanāpaṭisaṅkhāne patiṭṭhitabhāvassa.
அபி⁴ஹட்டு²ங் பவாரெய்யுந்தி ஸுதி³ன்னத்தே²ரஸ்ஸ விய ரட்ட²பாலகுலபுத்தஸ்ஸ விய ச காயேன வா ஸத்த ரதனானி அபி⁴ஹரித்வா வாசாய வா ‘‘அம்ஹாகங் த⁴னதோ யத்தகங் இச்ச²ஸி, தத்தகங் க³ண்ஹா’’தி வத³ந்தா பவாரெய்யுங். அனுத³ஹந்தீதி ஸரீரே பலிவேடி²தத்தா உண்ஹபரிளாஹங் ஜனெத்வா அனுத³ஹந்தி. ஸஞ்ஜாதஸேதே³ வா ஸரீரே லக்³க³ந்தா அனுஸெந்தீதிபி அத்தோ². யஞ்ஹி தங், பி⁴க்க²வே, சித்தந்தி இத³ங் யஸ்மா சித்தே அனாவட்டந்தே புக்³க³லஸ்ஸ ஆவட்டனங் நாம நத்தி². ஏவரூபஞ்ஹி சித்தங் அனாவட்டந்தி, தஸ்மா வுத்தங். இதி இமஸ்மிங் ஸுத்தே விபஸ்ஸனாப³லமேவ தீ³பிதங்.
Abhihaṭṭhuṃpavāreyyunti sudinnattherassa viya raṭṭhapālakulaputtassa viya ca kāyena vā satta ratanāni abhiharitvā vācāya vā ‘‘amhākaṃ dhanato yattakaṃ icchasi, tattakaṃ gaṇhā’’ti vadantā pavāreyyuṃ. Anudahantīti sarīre paliveṭhitattā uṇhapariḷāhaṃ janetvā anudahanti. Sañjātasede vā sarīre laggantā anusentītipi attho. Yañhi taṃ, bhikkhave, cittanti idaṃ yasmā citte anāvaṭṭante puggalassa āvaṭṭanaṃ nāma natthi. Evarūpañhi cittaṃ anāvaṭṭanti, tasmā vuttaṃ. Iti imasmiṃ sutte vipassanābalameva dīpitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. து³க்க²த⁴ம்மஸுத்தங் • 7. Dukkhadhammasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. து³க்க²த⁴ம்மஸுத்தவண்ணனா • 7. Dukkhadhammasuttavaṇṇanā
