| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၇. ဒုက္ခဓမ္မသုတ္တဝဏ္ဏနာ
7. Dukkhadhammasuttavaṇṇanā
၂၄၄. သတ္တမေ ဒုက္ခဓမ္မာနန္တိ ဒုက္ခသမ္ဘဝဓမ္မာနံ။ ပဉ္စသု ဟိ ခန္ဓေသု သတိ ဆေဒနဝဓဗန္ဓနာဒိဘေဒံ ဒုက္ခံ သမ္ဘဝတိ, တသ္မာ တေ ဒုက္ခသမ္ဘဝဓမ္မတ္တာ ဒုက္ခဓမ္မာတိ ဝုစ္စန္တိ။ တထာ ခော ပနသ္သာတိ တေနာကာရေနသ္သ။ ယထာသ္သ ကာမေ ပသ္သတောတိ ယေနာကာရေနသ္သ ကာမေ ပသ္သန္တသ္သ။ ယထာ စရန္တန္တိ ယေနာကာရေန စာရဉ္စ ဝိဟာရဉ္စ အနုဗန္ဓိတ္ဝာ စရန္တံ။ အင္ဂာရကာသူပမာ ကာမာ ဒိဋ္ဌာ ဟောန္တီတိ ပရိယေဋ္ဌိမူလကသ္သ စေဝ ပဋိသန္ဓိမူလကသ္သ စ ဒုက္ခသ္သ ဝသေန အင္ဂာရကာသု ဝိယ မဟာပရိဠာဟာတိ ဒိဋ္ဌာ ဟောန္တိ။ ကာမေ ပရိယေသန္တာနဉ္ဟိ နာဝာယ မဟာသမုဒ္ဒောဂာဟနအဇပထသင္ကုပထပဋိပဇ္ဇနဥဘတောဗ္ယူဠ္ဟသင္ဂာမပက္ခန္ဒနာဒိဝသေန ပရိယေဋ္ဌိမူလကမ္ပိ, ကာမေ ပရိဘုဉ္ဇန္တာနံ ကာမပရိဘောဂစေတနာယ စတူသု အပာယေသု ဒိန္နပဋိသန္ဓိမူလကမ္ပိ မဟာပရိဠာဟဒုက္ခံ ဥပ္ပဇ္ဇတိ။ ဧဝမေတသ္သ ဒုဝိဓသ္သာပိ ဒုက္ခသ္သ ဝသေန အင္ဂာရကာသု ဝိယ မဟာပရိဠာဟာတိ ဒိဋ္ဌာ ဟောန္တိ။
244. Sattame dukkhadhammānanti dukkhasambhavadhammānaṃ. Pañcasu hi khandhesu sati chedanavadhabandhanādibhedaṃ dukkhaṃ sambhavati, tasmā te dukkhasambhavadhammattā dukkhadhammāti vuccanti. Tathā kho panassāti tenākārenassa. Yathāssa kāme passatoti yenākārenassa kāme passantassa. Yathā carantanti yenākārena cārañca vihārañca anubandhitvā carantaṃ. Aṅgārakāsūpamākāmā diṭṭhā hontīti pariyeṭṭhimūlakassa ceva paṭisandhimūlakassa ca dukkhassa vasena aṅgārakāsu viya mahāpariḷāhāti diṭṭhā honti. Kāme pariyesantānañhi nāvāya mahāsamuddogāhanaajapathasaṅkupathapaṭipajjanaubhatobyūḷhasaṅgāmapakkhandanādivasena pariyeṭṭhimūlakampi, kāme paribhuñjantānaṃ kāmaparibhogacetanāya catūsu apāyesu dinnapaṭisandhimūlakampi mahāpariḷāhadukkhaṃ uppajjati. Evametassa duvidhassāpi dukkhassa vasena aṅgārakāsu viya mahāpariḷāhāti diṭṭhā honti.
ဒာယန္တိ အဋဝိံ။ ပုရတောပိ ကဏ္ဋကောတိ ပုရိမပသ္သေ ဝိဇ္ဈိတုကာမော ဝိယ အာသန္နဋ္ဌာနေယေဝ ဌိတကဏ္ဋကော။ ပစ္ဆတောတိအာဒီသုပိ ဧသေဝ နယော။ ဟေဋ္ဌာ ပန ပာဒေဟိ အက္ကန္တဋ္ဌာနသ္သ သန္တိကေ, န အက္ကန္တဋ္ဌာနေယေဝ။ ဧဝံ သော ကဏ္ဋကဂဗ္ဘံ ပဝိဋ္ဌော ဝိယ ဘဝေယ္ယ။ မာ မံ ကဏ္ဋကောတိ မာ မံ ကဏ္ဋကော ဝိဇ္ဈီတိ ကဏ္ဋကဝေဓံ ရက္ခမာနော။
Dāyanti aṭaviṃ. Puratopi kaṇṭakoti purimapasse vijjhitukāmo viya āsannaṭṭhāneyeva ṭhitakaṇṭako. Pacchatotiādīsupi eseva nayo. Heṭṭhā pana pādehi akkantaṭṭhānassa santike, na akkantaṭṭhāneyeva. Evaṃ so kaṇṭakagabbhaṃ paviṭṭho viya bhaveyya. Mā maṃ kaṇṭakoti mā maṃ kaṇṭako vijjhīti kaṇṭakavedhaṃ rakkhamāno.
ဒန္ဓော, ဘိက္ခဝေ, သတုပ္ပာဒောတိ သတိယာ ဥပ္ပာဒောယေဝ ဒန္ဓော, ဥပ္ပန္နမတ္တာယ ပန တာယ ကာစိ ကိလေသာ နိဂ္ဂဟိတာဝ ဟောန္တိ, န သဏ္ဌာတုံ သက္ကောန္တိ။ စက္ခုဒ္ဝာရသ္မိဉ္ဟိ ရာဂာဒီသု ဥပ္ပန္နေသု ဒုတိယဇဝနဝာရေန ‘‘ကိလေသာ မေ ဥပ္ပန္နာ’’တိ ဉတ္ဝာ တတိယေ ဇဝနဝာရေ သံဝရဇဝနံယေဝ ဇဝတိ။ အနစ္ဆရိယဉ္စေတံ, ယံ ဝိပသ္သကော တတိယဇဝနဝာရေ ကိလေသေ နိဂ္ဂဏ္ဟေယ္ယ။ စက္ခုဒ္ဝာရေ ပန ဣဋ္ဌာရမ္မဏေ အာပာထဂတေ ဘဝင္ဂံ အာဝဋ္ဋေတ္ဝာ အာဝဇ္ဇနာဒီသု ဥပ္ပန္နေသု ဝောဋ္ဌဗ္ဗနာနန္တရံ သမ္ပတ္တကိလေသဇဝနဝာရံ နိဝတ္တေတ္ဝာ ကုသလမေဝ ဥပ္ပာဒေတိ။ အာရဒ္ဓဝိပသ္သကာနဉ္ဟိ အယမာနိသံသော ဘာဝနာပဋိသင္ခာနေ ပတိဋ္ဌိတဘာဝသ္သ။
Dandho, bhikkhave, satuppādoti satiyā uppādoyeva dandho, uppannamattāya pana tāya kāci kilesā niggahitāva honti, na saṇṭhātuṃ sakkonti. Cakkhudvārasmiñhi rāgādīsu uppannesu dutiyajavanavārena ‘‘kilesā me uppannā’’ti ñatvā tatiye javanavāre saṃvarajavanaṃyeva javati. Anacchariyañcetaṃ, yaṃ vipassako tatiyajavanavāre kilese niggaṇheyya. Cakkhudvāre pana iṭṭhārammaṇe āpāthagate bhavaṅgaṃ āvaṭṭetvā āvajjanādīsu uppannesu voṭṭhabbanānantaraṃ sampattakilesajavanavāraṃ nivattetvā kusalameva uppādeti. Āraddhavipassakānañhi ayamānisaṃso bhāvanāpaṭisaṅkhāne patiṭṭhitabhāvassa.
အဘိဟဋ္ဌုံ ပဝာရေယ္ယုန္တိ သုဒိန္နတ္ထေရသ္သ ဝိယ ရဋ္ဌပာလကုလပုတ္တသ္သ ဝိယ စ ကာယေန ဝာ သတ္တ ရတနာနိ အဘိဟရိတ္ဝာ ဝာစာယ ဝာ ‘‘အမ္ဟာကံ ဓနတော ယတ္တကံ ဣစ္ဆသိ, တတ္တကံ ဂဏ္ဟာ’’တိ ဝဒန္တာ ပဝာရေယ္ယုံ။ အနုဒဟန္တီတိ သရီရေ ပလိဝေဌိတတ္တာ ဥဏ္ဟပရိဠာဟံ ဇနေတ္ဝာ အနုဒဟန္တိ။ သဉ္ဇာတသေဒေ ဝာ သရီရေ လဂ္ဂန္တာ အနုသေန္တီတိပိ အတ္ထော။ ယဉ္ဟိ တံ, ဘိက္ခဝေ, စိတ္တန္တိ ဣဒံ ယသ္မာ စိတ္တေ အနာဝဋ္ဋန္တေ ပုဂ္ဂလသ္သ အာဝဋ္ဋနံ နာမ နတ္ထိ။ ဧဝရူပဉ္ဟိ စိတ္တံ အနာဝဋ္ဋန္တိ, တသ္မာ ဝုတ္တံ။ ဣတိ ဣမသ္မိံ သုတ္တေ ဝိပသ္သနာဗလမေဝ ဒီပိတံ။
Abhihaṭṭhuṃpavāreyyunti sudinnattherassa viya raṭṭhapālakulaputtassa viya ca kāyena vā satta ratanāni abhiharitvā vācāya vā ‘‘amhākaṃ dhanato yattakaṃ icchasi, tattakaṃ gaṇhā’’ti vadantā pavāreyyuṃ. Anudahantīti sarīre paliveṭhitattā uṇhapariḷāhaṃ janetvā anudahanti. Sañjātasede vā sarīre laggantā anusentītipi attho. Yañhi taṃ, bhikkhave, cittanti idaṃ yasmā citte anāvaṭṭante puggalassa āvaṭṭanaṃ nāma natthi. Evarūpañhi cittaṃ anāvaṭṭanti, tasmā vuttaṃ. Iti imasmiṃ sutte vipassanābalameva dīpitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. ဒုက္ခဓမ္မသုတ္တံ • 7. Dukkhadhammasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၇. ဒုက္ခဓမ္မသုတ္တဝဏ္ဏနာ • 7. Dukkhadhammasuttavaṇṇanā
