| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
3. து³க்க²ப்பஹானவாயமபஞ்ஹோ
3. Dukkhappahānavāyamapañho
3. ராஜா ஆஹ ‘‘ப⁴ந்தே நாக³ஸேன, கிங் தும்ஹே அதீதஸ்ஸ து³க்க²ஸ்ஸ பஹானாய வாயமதா²’’தி? ‘‘ந ஹி, மஹாராஜா’’தி. ‘‘கிங் பன, ப⁴ந்தே, அனாக³தஸ்ஸ து³க்க²ஸ்ஸ பஹானாய வாயமதா²’’தி? ‘‘ந ஹி, மஹாராஜா’’தி. ‘‘கிங் பன பச்சுப்பன்னஸ்ஸ து³க்க²ஸ்ஸ பஹானாய வாயமதா²’’தி? ‘‘ந ஹி, மஹாராஜா’’தி. ‘‘யதி³ தும்ஹே ந அதீதஸ்ஸ து³க்க²ஸ்ஸ பஹானாய வாயமத², ந அனாக³தஸ்ஸ து³க்க²ஸ்ஸ பஹானாய வாயமத², ந பச்சுப்பன்னஸ்ஸ து³க்க²ஸ்ஸ பஹானாய வாயமத², அத² கிமத்தா²ய வாயமதா²’’தி. தே²ரோ ஆஹ ‘கிந்தி, மஹாராஜ, இத³ஞ்ச து³க்க²ங் நிருஜ்ஜெ²ய்ய, அஞ்ஞஞ்ச து³க்க²ங் நுப்பஜ்ஜெய்யா’தி ஏதத³த்தா²ய வாயமாமா’’தி.
3. Rājā āha ‘‘bhante nāgasena, kiṃ tumhe atītassa dukkhassa pahānāya vāyamathā’’ti? ‘‘Na hi, mahārājā’’ti. ‘‘Kiṃ pana, bhante, anāgatassa dukkhassa pahānāya vāyamathā’’ti? ‘‘Na hi, mahārājā’’ti. ‘‘Kiṃ pana paccuppannassa dukkhassa pahānāya vāyamathā’’ti? ‘‘Na hi, mahārājā’’ti. ‘‘Yadi tumhe na atītassa dukkhassa pahānāya vāyamatha, na anāgatassa dukkhassa pahānāya vāyamatha, na paccuppannassa dukkhassa pahānāya vāyamatha, atha kimatthāya vāyamathā’’ti. Thero āha ‘kinti, mahārāja, idañca dukkhaṃ nirujjheyya, aññañca dukkhaṃ nuppajjeyyā’ti etadatthāya vāyamāmā’’ti.
‘‘அத்தி² பன தே, ப⁴ந்தே நாக³ஸேன, அனாக³தங் து³க்க²’’ந்தி? ‘‘நத்தி² 1, மஹாராஜா’’தி ‘‘தும்ஹே கோ², ப⁴ந்தே நாக³ஸேன, அதிபண்டி³தா, யே தும்ஹே அஸந்தானங் அனாக³தானங் து³க்கா²னங் பஹானாய வாயமதா²’’தி? ‘‘அத்தி² பன தே, மஹாராஜ, கேசி படிராஜானோ பச்சத்தி²கா பச்சாமித்தா பச்சுபட்டி²தா ஹொந்தீ’’தி? ‘‘ஆம, ப⁴ந்தே, அத்தீ²’’தி. ‘‘கிங்னு கோ², மஹாராஜ, ததா³ தும்ஹே பரிக²ங் க²ணாபெய்யாத², பாகாரங் சினாபெய்யாத² கோ³புரங் காராபெய்யாத², அட்டாலகங் காராபெய்யாத², த⁴ஞ்ஞங் அதிஹராபெய்யாதா²’’தி? ‘‘ந ஹி, ப⁴ந்தே, படிகச்சேவ தங் படியத்தங் ஹோதீ’’தி. ‘‘கிங் தும்ஹே, மஹாராஜ, ததா³ ஹத்தி²ஸ்மிங் ஸிக்கெ²ய்யாத², அஸ்ஸஸ்மிங் ஸிக்கெ²ய்யாத², ரத²ஸ்மிங் ஸிக்கெ²ய்யாத², த⁴னுஸ்மிங் ஸிக்கெ²ய்யாத², த²ருஸ்மிங் ஸிக்கெ²ய்யாதா²’’தி? ‘‘ந ஹி, ப⁴ந்தே, படிகச்சேவ தங் ஸிக்கி²தங் ஹோதீ’’தி. ‘‘கிஸ்ஸத்தா²யா’’தி? ‘‘அனாக³தானங், ப⁴ந்தே, ப⁴யானங் படிபா³ஹனத்தா²யா’’தி. ‘‘கிங் நு கோ², மஹாராஜ, அத்தி² அனாக³தங் ப⁴ய’’ந்தி? ‘‘நத்தி², ப⁴ந்தே’’தி . ‘‘தும்ஹே ச கோ², மஹாராஜ, அதிபண்டி³தா, யே தும்ஹே அஸந்தானங் அனாக³தானங் ப⁴யானங் படிபா³ஹனத்தா²ய படியாதே³தா²’’தி.
‘‘Atthi pana te, bhante nāgasena, anāgataṃ dukkha’’nti? ‘‘Natthi 2, mahārājā’’ti ‘‘tumhe kho, bhante nāgasena, atipaṇḍitā, ye tumhe asantānaṃ anāgatānaṃ dukkhānaṃ pahānāya vāyamathā’’ti? ‘‘Atthi pana te, mahārāja, keci paṭirājāno paccatthikā paccāmittā paccupaṭṭhitā hontī’’ti? ‘‘Āma, bhante, atthī’’ti. ‘‘Kiṃnu kho, mahārāja, tadā tumhe parikhaṃ khaṇāpeyyātha, pākāraṃ cināpeyyātha gopuraṃ kārāpeyyātha, aṭṭālakaṃ kārāpeyyātha, dhaññaṃ atiharāpeyyāthā’’ti? ‘‘Na hi, bhante, paṭikacceva taṃ paṭiyattaṃ hotī’’ti. ‘‘Kiṃ tumhe, mahārāja, tadā hatthismiṃ sikkheyyātha, assasmiṃ sikkheyyātha, rathasmiṃ sikkheyyātha, dhanusmiṃ sikkheyyātha, tharusmiṃ sikkheyyāthā’’ti? ‘‘Na hi, bhante, paṭikacceva taṃ sikkhitaṃ hotī’’ti. ‘‘Kissatthāyā’’ti? ‘‘Anāgatānaṃ, bhante, bhayānaṃ paṭibāhanatthāyā’’ti. ‘‘Kiṃ nu kho, mahārāja, atthi anāgataṃ bhaya’’nti? ‘‘Natthi, bhante’’ti . ‘‘Tumhe ca kho, mahārāja, atipaṇḍitā, ye tumhe asantānaṃ anāgatānaṃ bhayānaṃ paṭibāhanatthāya paṭiyādethā’’ti.
‘‘பி⁴ய்யோ ஓபம்மங் கரோஹீதி. ‘‘தங் கிங் மஞ்ஞஸி, மஹாராஜ, யதா³ த்வங் பிபாஸிதோ ப⁴வெய்யாஸி, ததா³ த்வங் உத³பானங் க²ணாபெய்யாஸி, பொக்க²ரணிங் க²ணாபெய்யாஸி, தளாகங் க²ணாபெய்யாஸி ‘பானீயங் பிவிஸ்ஸாமீ’’’தி? ‘‘ந ஹி, ப⁴ந்தே, படிகச்சேவ தங் படியத்தங் ஹோதீ’’தி. ‘‘கிஸ்ஸத்தா²யா’’தி? ‘‘அனாக³தானங், ப⁴ந்தே, பிபாஸானங் படிபா³ஹனத்தா²ய படியத்தங் ஹோதீ’’தி. ‘‘அத்தி² பன, மஹாராஜ, அனாக³தா பிபாஸா’’தி? ‘‘நத்தி², ப⁴ந்தே’’தி. ‘‘தும்ஹே கோ², மஹாராஜ, அதிபண்டி³தா , யே தும்ஹே அஸந்தானங் அனாக³தானங் பிபாஸானங் படிபா³ஹனத்தா²ய தங் படியாதே³தா²’’தி.
‘‘Bhiyyo opammaṃ karohīti. ‘‘Taṃ kiṃ maññasi, mahārāja, yadā tvaṃ pipāsito bhaveyyāsi, tadā tvaṃ udapānaṃ khaṇāpeyyāsi, pokkharaṇiṃ khaṇāpeyyāsi, taḷākaṃ khaṇāpeyyāsi ‘pānīyaṃ pivissāmī’’’ti? ‘‘Na hi, bhante, paṭikacceva taṃ paṭiyattaṃ hotī’’ti. ‘‘Kissatthāyā’’ti? ‘‘Anāgatānaṃ, bhante, pipāsānaṃ paṭibāhanatthāya paṭiyattaṃ hotī’’ti. ‘‘Atthi pana, mahārāja, anāgatā pipāsā’’ti? ‘‘Natthi, bhante’’ti. ‘‘Tumhe kho, mahārāja, atipaṇḍitā , ye tumhe asantānaṃ anāgatānaṃ pipāsānaṃ paṭibāhanatthāya taṃ paṭiyādethā’’ti.
‘‘பி⁴ய்யோ ஓபம்மங் கரோஹீ’’தி. ‘‘தங் கிங் மஞ்ஞஸி, மஹாராஜ, யதா³ த்வங் பு³பு⁴க்கி²தோ ப⁴வெய்யாஸி, ததா³ த்வங் கெ²த்தங் கஸாபெய்யாஸி, ஸாலிங் வபாபெய்யாஸி ‘ப⁴த்தங் பு⁴ஞ்ஜிஸ்ஸாமீ’’’தி? ‘‘ந ஹி, ப⁴ந்தே, படிகச்சேவ தங் படியத்தங் ஹோதீ’’தி. ‘‘கிஸ்ஸத்தா²யா’’தி. ‘‘அனாக³தானங், ப⁴ந்தே, பு³பு⁴க்கா²னங் படிபா³ஹனத்தா²யா’’தி. ‘‘அத்தி² பன, மஹாராஜ, அனாக³தா பு³பு⁴க்கா²’’தி? ‘‘நத்தி², ப⁴ந்தே’’தி. ‘‘தும்ஹே கோ², மஹாராஜ, அதிபண்டி³தா, யே தும்ஹே அஸந்தானங் அனாக³தானங் பு³பு⁴க்கா²னங் படிபா³ஹனத்தா²ய படியாதே³தா²’’தி.
‘‘Bhiyyo opammaṃ karohī’’ti. ‘‘Taṃ kiṃ maññasi, mahārāja, yadā tvaṃ bubhukkhito bhaveyyāsi, tadā tvaṃ khettaṃ kasāpeyyāsi, sāliṃ vapāpeyyāsi ‘bhattaṃ bhuñjissāmī’’’ti? ‘‘Na hi, bhante, paṭikacceva taṃ paṭiyattaṃ hotī’’ti. ‘‘Kissatthāyā’’ti. ‘‘Anāgatānaṃ, bhante, bubhukkhānaṃ paṭibāhanatthāyā’’ti. ‘‘Atthi pana, mahārāja, anāgatā bubhukkhā’’ti? ‘‘Natthi, bhante’’ti. ‘‘Tumhe kho, mahārāja, atipaṇḍitā, ye tumhe asantānaṃ anāgatānaṃ bubhukkhānaṃ paṭibāhanatthāya paṭiyādethā’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
து³க்க²ப்பஹானவாயமபஞ்ஹோ ததியோ.
Dukkhappahānavāyamapañho tatiyo.
Footnotes:
