д̣̇угкасажжанид̣̇д̣̇зсаван̣н̣анаа

32-33 .

арияасажжажад̇уггамби д̇ат̇адтзна сажжаанам̣ згасамб̣анд̇хад̇д̇аа згад̇о зва нид̣̇д̣̇идтам̣. д̇ад̇т̇а д̇ад̇т̇аад̇и д̇зсу жад̇уусу арияасажжзсу. гад̇аманд̇и гат̇зд̇угамяад̇аабужчаа . д̣̇угкам̣ арияасажжанд̇и бужчид̇ад̇хамманид̣̇ассанам̣. д̇ад̇т̇а ж̇аад̇иби д̣̇угкаад̇иаад̣̇ийсу ж̇аад̇исад̣̇д̣̇асса д̇аава анзгз ад̇т̇аа бавзд̣̇ид̇аа. яат̇ааха –

‘‘бхаво гулам̣ нигааяо жа, сийлам̣ бан̃н̃ад̇д̇и лагкан̣ам̣;

басууд̇и санд̇хи жзваад̇и, ж̇аад̇иад̇т̇аа бавзд̣̇ид̇аа’’.

д̇ат̇аа хисса ‘‘згамби ж̇аад̇им̣ д̣̇взби ж̇аад̇ияо’’д̇иаад̣̇ийсу (баараа. 12) бхаво ад̇т̇о. ‘‘агкид̇д̇о анубаггудто ж̇аад̇иваад̣̇знаа’’д̇и (д̣̇ий. ни. 1.331) зд̇т̇а гулам̣. ‘‘ад̇т̇и, висаакз, ниг̇ан̣таа наама саман̣аж̇аад̇ий’’д̇и (а. ни. 3.71) зд̇т̇а нигааяо. ‘‘яад̇охам̣, бхаг̇ини, арияааяа ж̇аад̇ияаа ж̇аад̇о наабхиж̇аанаамий’’д̇и (ма. ни. 2.351) зд̇т̇а арияасийлам̣. ‘‘д̇ирияаа наама д̇ин̣аж̇аад̇и наабхияаа уг̇г̇анд̇ваа набхам̣ аахажжа тид̇аа ахосий’’д̇и (а. ни. 5.196) зд̇т̇а бан̃н̃ад̇д̇и. ‘‘ж̇аад̇и д̣̇вийхи канд̇хзхи сан̇г̇ахид̇аа’’д̇и (д̇хаад̇у. 71) зд̇т̇а сан̇кад̇алагкан̣ам̣. ‘‘самбад̇иж̇аад̇о, аананд̣̇а, б̣од̇хисад̇д̇о’’д̇и (ма. ни. 3.207) зд̇т̇а басууд̇и. ‘‘бхавабажжаяаа ж̇аад̇ий’’д̇и (вибха. 354) жа ‘‘ж̇аад̇иби д̣̇угкаа’’д̇и (бади. ма. 1.33; вибха. 190) жа зд̇т̇а барияааяад̇о бадисанд̇хиканд̇хаа. ниббарияааяад̇о бана д̇ад̇т̇а д̇ад̇т̇а ниб̣б̣ад̇д̇амаанаанам̣ сад̇д̇аанам̣ яз яз канд̇хаа баад̇убхаванд̇и, д̇зсам̣ д̇зсам̣ батамам̣ баад̇убхааво.

гасмаа банзсаа ж̇аад̇и д̣̇угкаад̇и жз? анзгзсам̣ д̣̇угкаанам̣ вад̇т̇убхаавад̇о. анзгаани хи д̣̇угкаани. сзяяат̇ид̣̇ам̣ – д̣̇угкад̣̇угкам̣, вибарин̣аамад̣̇угкам̣, сан̇каарад̣̇угкам̣, бадижчаннад̣̇угкам̣, аббадижчаннад̣̇угкам̣ , барияааяад̣̇угкам̣, ниббарияааяад̣̇угканд̇и. зд̇т̇а гааяигажзд̇асигаа д̣̇угкаа взд̣̇анаасабхаавад̇о жа наамад̇о жа д̣̇угкад̇д̇аа д̣̇угкад̣̇угканд̇и вужжад̇и. сукаа взд̣̇анаа вибарин̣аамзна д̣̇угкуббад̇д̇ихзд̇уд̇о вибарин̣аамад̣̇угкам̣. убзгкаавзд̣̇анаа жзва авасзсаа жа д̇збхуумагасан̇каараа уд̣̇аяаб̣б̣аяабадибийл̣ид̇ад̇д̇аа сан̇каарад̣̇угкам̣. ган̣н̣асуулад̣̇анд̇асууларааг̇аж̇абарил̣аахад̣̇осаж̇абарил̣аахаад̣̇и гааяигажзд̇асиго ааб̣аад̇хо бужчид̇ваа ж̇аанид̇аб̣б̣ад̇о убаггамасса жа абаагадабхаавад̇о бадижчаннад̣̇угкам̣. д̣̇вад̇д̇им̣сагаммагааран̣аад̣̇исамудтаано ааб̣аад̇хо абужчид̇ваава ж̇аанид̇аб̣б̣ад̇о убаггамасса жа баагадабхаавад̇о аббадижчаннад̣̇угкам̣. табзд̇ваа д̣̇угкад̣̇угкам̣ сзсам̣ д̣̇угкасажжавибхан̇г̇з (вибха. 190 аад̣̇аяо) ааг̇ад̇ам̣ ж̇аад̇иаад̣̇и саб̣б̣амби д̇асса д̇асса д̣̇угкасса вад̇т̇убхаавад̇о барияааяад̣̇угкам̣. д̣̇угкад̣̇угкам̣ бана ниббарияааяад̣̇угканд̇и вужжад̇и.

д̇ад̇рааяам̣ ж̇аад̇и яам̣ д̇ам̣ б̣аалабан̣д̣ид̇асуд̇д̇аад̣̇ийсу (ма. ни. 3.246 аад̣̇аяо) бхаг̇авад̇ааби убамаавасзна багаасид̇ам̣ аабааяигам̣ д̣̇угкам̣, яан̃жа суг̇ад̇ияамби мануссалогз г̇аб̣бхогганд̇имуулагаад̣̇ибхзд̣̇ам̣ д̣̇угкам̣ уббаж̇ж̇ад̇и, д̇асса вад̇т̇убхаавад̇о д̣̇угкаа. д̇ад̇рид̣̇ам̣ г̇аб̣бхогганд̇имуулагаад̣̇ибхзд̣̇ам̣ д̣̇угкам̣ – аяан̃хи сад̇д̇о маад̇угужчимхи ниб̣б̣ад̇д̇амаано на уббалабад̣̇умабун̣д̣арийгаад̣̇ийсу ниб̣б̣ад̇д̇ад̇и, ат̇а ко хздтаа аамаасаяасса убари баггаасаяасса уд̣̇арабадалабидтиган̣дагаанам̣ взмаж̇жхз барамасамб̣аад̇хз д̇иб̣б̣анд̇хагаарз наанаагун̣абаг̇анд̇хабарибхаавид̇абарамад̣̇уг̇г̇анд̇хабаванавижарид̇з ад̇химад̇д̇аж̇зг̇ужчз гужчиббад̣̇зсз бууд̇имажчабууд̇игуммаасажанд̣̇анигаад̣̇ийсу гими вияа ниб̣б̣ад̇д̇ад̇и. со д̇ад̇т̇а ниб̣б̣ад̇д̇о д̣̇аса маасз маад̇угужчисамбхавзна усманаа будабаагам̣ вияа бажжамаано бидтабин̣д̣и вияа сзд̣̇ияамаано самин̃ж̇анабасааран̣аад̣̇ивирахид̇о ад̇химад̇д̇ам̣ д̣̇угкам̣ бажжанубход̇ийд̇и. ид̣̇ам̣ д̇аава г̇аб̣бхогганд̇имуулагам̣ д̣̇угкам̣.

яам̣ бана со маад̇у сахасаа убагкаланаг̇амананисийд̣̇анаудтаанабаривад̇д̇анаад̣̇ийсу сураад̇худ̇д̇ахад̇т̇аг̇ад̇о зл̣аго вияа ахид̇ун̣д̣игахад̇т̇аг̇ад̇о саббабод̇аго вияа жа аагад̣дханабаригад̣дханаод̇хунананид̣̇д̇хунанаад̣̇инаа убаггамзна ад̇химад̇д̇ам̣ д̣̇угкаманубход̇и, яан̃жа маад̇у сийд̇уд̣̇агабаанагаалз сийд̇анарагуубабанно вияа ун̣хаяааг̇убхад̇д̇аад̣̇иаж̇жхохаран̣агаалз ан̇г̇ааравудтисамбаригин̣н̣о вияа лон̣амб̣илаад̣̇иаж̇жхохаран̣агаалз каараабад̇ажчигаад̣̇игаммагааран̣аббад̇д̇о вияа ад̇химад̇д̇ам̣ д̣̇угкаманубход̇и. ид̣̇ам̣ г̇аб̣бхабарихаран̣амуулагам̣ д̣̇угкам̣.

яам̣ банасса муул̣хаг̇аб̣бхааяа маад̇уяаа мид̇д̇аамажжасухаж̇ж̇аад̣̇ийхиби ад̣̇ассанаарахз д̣̇угкуббад̇д̇идтаанз чзд̣̇анапааланаад̣̇ийхи д̣̇угкаманубхавад̇и. ид̣̇ам̣ г̇аб̣бхавибад̇д̇имуулагам̣ д̣̇угкам̣.

яам̣ виж̇ааяамаанааяа маад̇уяаа гаммаж̇зхи ваад̇зхи баривад̇д̇зд̇ваа нарагаббабаад̇ам̣ вияа ад̇ибхаяаанагам̣ яонимаг̇г̇ам̣ бадибаад̣̇ияамаанасса барамасамб̣аад̇хзна жа яонимукзна д̇аал̣ажчиг̇г̇ал̣зна вияа нигад̣дхияамаанасса махаанааг̇асса нарагасад̇д̇асса вияа жа сан̇гхаад̇абаб̣б̣ад̇зхи вижун̣н̣ияамаанасса д̣̇угкамуббаж̇ж̇ад̇и. ид̣̇ам̣ виж̇ааяанамуулагам̣ д̣̇угкам̣.

яам̣ бана ж̇аад̇асса д̇арун̣аван̣асад̣̇исасса сугумаарасарийрасса хад̇т̇аг̇ахан̣анхаабанад̇хованажол̣абаримаж̇ж̇анаад̣̇игаалз суужимукакурад̇хаараавиж̇жханапааланасад̣̇исам̣ д̣̇угкамуббаж̇ж̇ад̇и. ид̣̇ам̣ маад̇угужчид̇о б̣ахи нигкаманамуулагам̣ д̣̇угкам̣.

яам̣ д̇ад̇о барам̣ бавад̇д̇ияам̣ ад̇д̇анаава ад̇д̇аанам̣ вад̇хзнд̇асса ажзлагавад̇аад̣̇ивасзна аад̇аабанабарид̇аабанаануяог̇амануяуд̇д̇асса год̇хавасзна абхун̃ж̇анд̇асса уб̣б̣анд̇ханд̇асса жа д̣̇угкам̣ ход̇и. ид̣̇ам̣ ад̇д̇убаггамамуулагам̣ д̣̇угкам̣.

яам̣ бана барад̇о вад̇хаб̣анд̇ханаад̣̇ийни анубхаванд̇асса уббаж̇ж̇ад̇и. ид̣̇ам̣ баруубаггамамуулагам̣д̣̇угканд̇и. ид̇и имасса саб̣б̣ассааби д̣̇угкасса аяам̣ ж̇аад̇и вад̇т̇умзва ход̇и. д̇знзд̇ам̣ вужжад̇и –

‘‘ж̇ааязт̇а но жз нарагзсу сад̇д̇о, д̇ад̇т̇аг̇г̇ид̣̇аахаад̣̇игамаббасаяхам̣;

лабхзт̇а д̣̇угкам̣ ну гухим̣ бад̇идтам̣, ижжааха д̣̇угкаад̇и мунийд̇ха ж̇аад̇им̣.

‘‘д̣̇угкам̣ д̇иражчзсу гасаабад̇од̣̇а-

д̣̇ан̣д̣аабхигхаад̇аад̣̇ибхавам̣ анзгам̣;

яам̣ д̇ам̣ гат̇ам̣ д̇ад̇т̇а бхавзяяа ж̇аад̇им̣,

винаа д̇ахим̣ ж̇аад̇и д̇ад̇оби д̣̇угкаа.

‘‘бзд̇зсу д̣̇угкам̣ бана куббибаасаа-

ваад̇аад̇абаад̣̇иббабхавам̣ вижид̇д̇ам̣;

яасмаа аж̇аад̇асса на д̇ад̇т̇а ад̇т̇и,

д̇асмааби д̣̇угкам̣ муни ж̇аад̇имааха.

‘‘д̇иб̣б̣анд̇хагаарз жа асаяхасийд̇з,

логанд̇арз яам̣ асурзсу д̣̇угкам̣;

на д̇ам̣ бхавз д̇ад̇т̇а на жасса ж̇аад̇и,

яад̇о аяам̣ ж̇аад̇и д̇ад̇оби д̣̇угкаа.

‘‘яан̃жааби г̇уут̇анарагз вияа маад̇уг̇аб̣бхз,

сад̇д̇о васам̣ жирамад̇о б̣ахи нигкаман̃жа;

баббод̇и д̣̇угкамад̇игхорамид̣̇амби над̇т̇и,

ж̇аад̇им̣ винаа ид̇иби ж̇аад̇и аяан̃хи д̣̇угкаа.

‘‘гим̣ бхаасид̇зна б̣ахунаа нану яам̣ гухин̃жи,

ад̇т̇ийд̇ха гин̃жид̣̇аби д̣̇угкамид̣̇ам̣ гад̣̇аажи;

нзвад̇т̇и ж̇аад̇ивирахз яад̣̇ад̇о махзсий,

д̣̇угкаад̇и саб̣б̣абатамам̣ имамааха ж̇аад̇и’’нд̇и.

ж̇арааби д̣̇угкаад̇и зд̇т̇а д̣̇увид̇хаа ж̇араа сан̇кад̇алагкан̣ан̃жа, кан̣д̣ижжаад̣̇исаммад̇о санд̇ад̇ияам̣ згабхавабарияаабаннаканд̇хабураан̣абхааво жа. саа ид̇ха ад̇хиббзд̇аа. саа банзсаа д̣̇угкаа сан̇каарад̣̇угкабхаавад̇о жзва д̣̇угкавад̇т̇уд̇о жа. яам̣ хид̣̇ам̣ ан̇г̇абажжан̇г̇асит̇илийбхааваинд̣̇рияавигааравируубад̇аа яоб̣б̣анавинаасаб̣алуубагхаад̇асад̇имад̇ивиббаваасабарабарибхаваад̣̇ианзгаббажжаяам̣ гааяигажзд̇асигам̣ д̣̇угкамуббаж̇ж̇ад̇и, ж̇араа д̇асса вад̇т̇у. д̇знзд̇ам̣ вужжад̇и –

‘‘ан̇г̇аанам̣ сит̇илийбхааваа, инд̣̇рияаанам̣ вигаарад̇о;

яоб̣б̣анасса винаасзна, б̣аласса убагхаад̇ад̇о.

‘‘виббаваасаа сад̇аад̣̇ийнам̣, буд̇д̇ад̣̇аарзхи ад̇д̇ано;

аббасаад̣̇анийяад̇о жзва, бхияяо б̣аалад̇д̇абад̇д̇ияаа.

‘‘баббод̇и д̣̇угкам̣ яам̣ мажжо, гааяигам̣ маанасам̣ д̇ат̇аа;

саб̣б̣амзд̇ам̣ ж̇араахзд̇у, яасмаа д̇асмаа ж̇араа д̣̇укаа’’д̇и.

ж̇араад̣̇угкаананд̇арам̣ б̣яаад̇хид̣̇угкз вад̇д̇аб̣б̣зби гааяигад̣̇угкаг̇ахан̣знзва б̣яаад̇хид̣̇угкам̣ г̇ахид̇ам̣ ход̇ийд̇и на вуд̇д̇анд̇и взд̣̇ид̇аб̣б̣ам̣.

маран̣амби д̣̇угканд̇и зд̇т̇ааби д̣̇увид̇хам̣ маран̣ам̣ – сан̇кад̇алагкан̣ан̃жа, яам̣ санд̇хааяа вуд̇д̇ам̣ – ‘‘ж̇араамаран̣ам̣ д̣̇вийхи канд̇хзхи сан̇г̇ахид̇а’’нд̇и (д̇хаад̇у. 71). згабхавабарияаабаннаж̇ийвид̇инд̣̇рияаббаб̣анд̇хавижчзд̣̇о жа, яам̣ санд̇хааяа вуд̇д̇ам̣ – ‘‘нижжам̣ маран̣ад̇о бхаяа’’нд̇и (су. ни. 581). д̇ам̣ ид̇ха ад̇хиббзд̇ам̣. ж̇аад̇ибажжаяамаран̣ам̣ убаггамамаран̣ам̣ сарасамаран̣ам̣ ааяугкаяамаран̣ам̣ бун̃н̃агкаяамаран̣анд̇иби д̇ассзва наамам̣. буна кан̣игамаран̣ам̣ саммуд̇имаран̣ам̣ самужчзд̣̇амаран̣анд̇и аяамбзд̇т̇а бхзд̣̇о взд̣̇ид̇аб̣б̣о. бавад̇д̇з руубааруубад̇хаммаанам̣ бхзд̣̇о кан̣игамаран̣ам̣ наама. ‘‘д̇иссо мад̇о, пуссо мад̇о’’д̇и ид̣̇ам̣ барамад̇т̇ад̇о сад̇д̇асса абхааваа, ‘‘сассам̣ мад̇ам̣, ругко мад̇о’’д̇и ид̣̇ам̣ ж̇ийвид̇инд̣̇рияасса абхааваа саммуд̇имаран̣ам̣ наама. кийн̣аасавасса аббадисанд̇хигаа гаалагирияаа самужчзд̣̇амаран̣ам̣ наама. б̣аахирагам̣ саммуд̇имаран̣ам̣ табзд̇ваа ид̇арам̣ саммуд̇имаран̣ан̃жа самужчзд̣̇амаран̣ан̃жа яат̇аавуд̇д̇абаб̣анд̇хавижчзд̣̇знзва сан̇г̇ахид̇ам̣. д̣̇угкасса бана вад̇т̇убхаавад̇о д̣̇угкам̣. д̇знзд̇ам̣ вужжад̇и –

‘‘баабасса баабагаммаад̣̇инимид̇д̇аманубассад̇о;

бхад̣̇д̣̇ассаабасаханд̇асса, вияог̇ам̣ бияавад̇т̇угам̣;

мийяамаанасса яам̣ д̣̇угкам̣, маанасам̣ ависзсад̇о.

‘‘саб̣б̣зсан̃жааби яам̣ санд̇хиб̣анд̇ханажчзд̣̇анаад̣̇игам̣;

вид̇уж̇ж̇амаанамаммаанам̣ , ход̇и д̣̇угкам̣ сарийраж̇ам̣.

‘‘асаяхамаббадигаарам̣, д̣̇угкассзд̇ассид̣̇ам̣ яад̇о;

маран̣ам̣ вад̇т̇у д̇знзд̇ам̣, д̣̇угкамижжзва бхаасид̇а’’нд̇и.

согаад̣̇ийсу сого наама н̃аад̇иб̣яасанаад̣̇ийхи пудтасса анд̇ониж̇жхааналагкан̣о жид̇д̇асанд̇аабо. д̣̇угко бана д̣̇угкад̣̇угкад̇о д̣̇угкавад̇т̇уд̇о жа. д̇знзд̇ам̣ вужжад̇и –

‘‘сад̇д̇аанам̣ хад̣̇аяам̣ сого, висасаллам̣ва д̇уж̇ж̇ад̇и;

аг̇г̇ид̇ад̇д̇ова наараажо, бхусам̣ва д̣̇ахад̇з буна.

‘‘самаавахад̇и б̣яаад̇хин̃жа, ж̇араамаран̣абхзд̣̇анам̣;

д̣̇угкамби вивид̇хам̣ яасмаа, д̇асмаа д̣̇угкод̇и вужжад̇ий’’д̇и.

барид̣̇зво наама н̃аад̇иб̣яасанаад̣̇ийхи пудтасса важийбалаабо. д̣̇угко бана сан̇каарад̣̇угкабхаавад̇о д̣̇угкавад̇т̇уд̇о жа. д̇знзд̇ам̣ вужжад̇и –

‘‘яам̣ согасаллавихад̇о барид̣̇звамаано, ган̣тодтад̇аалуд̇аласосаж̇амаббасаяхам̣;

бхияяод̇химад̇д̇амад̇хиг̇ажчад̇иязва д̣̇угкам̣, д̣̇угкод̇и д̇зна бхаг̇аваа барид̣̇звамаахаа’’д̇и.

д̣̇угкам̣ наама гааяабийл̣аналагкан̣ам̣ гааяигад̣̇угкам̣. д̣̇угкам̣ бана д̣̇угкад̣̇угкад̇о маанасад̣̇угкааваханад̇о жа. д̇знзд̇ам̣ вужжад̇и –

‘‘бийл̣зд̇и гааяигамид̣̇ам̣, д̣̇угкам̣ д̣̇угкан̃жа маанасам̣ бхияяо;

ж̇анаяад̇и яасмаа д̇асмаа, д̣̇угканд̇и висзсад̇о вуд̇д̇а’’нд̇и.

д̣̇оманассам̣ наама жид̇д̇абийл̣аналагкан̣ам̣ маанасам̣ д̣̇угкам̣. д̣̇угкам̣ бана д̣̇угкад̣̇угкад̇о гааяигад̣̇угкааваханад̇о жа. жзд̇од̣̇угкасамаббид̇аа хи гзсз багирияа ганд̣̇анд̇и, ураани бадибисанд̇и, аавадданд̇и, вивадданд̇и, уд̣̇д̇хам̣баад̣̇ам̣ бабад̇анд̇и, сад̇т̇ам̣ аахаранд̇и, висам̣ каад̣̇анд̇и, раж̇ж̇уяаа уб̣б̣анд̇ханд̇и, аг̇г̇им̣ бависанд̇ийд̇и наанаббагаарагам̣ д̣̇угкаманубхаванд̇и. д̇знзд̇ам̣ вужжад̇и –

‘‘бийл̣зд̇и яад̇о жид̇д̇ам̣, гааяасса жа бийл̣анам̣ самаавахад̇и;

д̣̇угканд̇и д̣̇оманассам̣, вид̣̇оманассаа д̇ад̇о аахуу’’д̇и.

убааяаасо наама н̃аад̇иб̣яасанаад̣̇ийхи пудтасса ад̇химад̇д̇ажзд̇од̣̇угкаббабхаавид̇о д̣̇осоязва. ‘‘сан̇каарагканд̇хабарияаабанно зго д̇хаммо’’д̇и згз. д̣̇угко бана сан̇каарад̣̇угкабхаавад̇о жид̇д̇абарид̣̇аханад̇о гааяависаад̣̇анад̇о жа. д̇знзд̇ам̣ вужжад̇и –

‘‘жид̇д̇асса жа барид̣̇аханаа, гааяасса висаад̣̇анаа жа ад̇химад̇д̇ам̣;

яам̣ д̣̇угкамубааяаасо, ж̇анзд̇и д̣̇угко д̇ад̇о вуд̇д̇о’’д̇и.

зд̇т̇а жа манд̣̇аг̇г̇инаа анд̇обхааж̇анз бааго вияа сого, д̇игкаг̇г̇инаа бажжамаанасса бхааж̇анад̇о б̣ахинигкаманам̣ вияа барид̣̇зво, б̣ахинигканд̇аавасзсасса нигкамид̇умби аббахонд̇асса анд̇обхааж̇анзязва яаава баригкаяаа бааго вияа убааяаасо д̣̇адтаб̣б̣о.

аббияасамбаяог̇о наама аббиязхи сад̇д̇асан̇каарзхи самод̇хаанам̣. д̣̇угко бана д̣̇угкавад̇т̇уд̇о. д̇знзд̇ам̣ вужжад̇и –

‘‘д̣̇исваава аббияз д̣̇угкам̣, батамам̣ ход̇и жзд̇аси;

д̇ад̣̇убаггамасамбхууд̇амат̇а гааяз яад̇о ид̇ха.

‘‘д̇ад̇о д̣̇угкад̣̇ваяассааби, вад̇т̇уд̇о со махзсинаа;

д̣̇угко вуд̇д̇од̇и вин̃н̃зяяо, аббиязхи самааг̇амо’’д̇и.

бияавиббаяог̇о наама биязхи сад̇д̇асан̇каарзхи винаабхааво. д̣̇угко бана д̣̇угкавад̇т̇уд̇о. д̇знзд̇ам̣ вужжад̇и –

‘‘н̃аад̇ид̇ханаад̣̇ивияог̇аа , согасарасамаббид̇аа вид̇уж̇ж̇анд̇и;

б̣аалаа яад̇о д̇ад̇ояам̣, д̣̇угкод̇и мад̇о бияавияог̇о’’д̇и.

ижчид̇аалаабхз алаб̣бханзяяавад̇т̇уусу ижчаава яамбижчам̣ на лабхад̇и, д̇амби д̣̇угканд̇и вуд̇д̇аа. язнаби д̇хаммзна алаб̣бханзяяам̣ вад̇т̇ум̣ ижчанд̇о на лабхад̇и, д̇амби алаб̣бханзяяавад̇т̇умхи ижчанам̣ д̣̇угканд̇и ад̇т̇о. д̣̇угкам̣ бана д̣̇угкавад̇т̇уд̇о. д̇знзд̇ам̣ вужжад̇и –

‘‘д̇ам̣ д̇ам̣ бад̇т̇аяамаанаанам̣, д̇асса д̇асса алаабхад̇о;

яам̣ вигхаад̇амаяам̣ д̣̇угкам̣, сад̇д̇аанам̣ ид̇ха ж̇ааяад̇и.

‘‘алаб̣бханзяяавад̇т̇уунам̣, бад̇т̇анаа д̇асса гааран̣ам̣;

яасмаа д̇асмаа ж̇ино д̣̇угкам̣, ижчид̇аалаабхамаб̣равий’’д̇и.

сан̇кид̇д̇зна бан̃жубаад̣̇аанагканд̇хаад̇и зд̇т̇а бана сан̇кид̇д̇знаад̇и д̣̇зсанам̣ санд̇хааяа вуд̇д̇ам̣. д̣̇угкан̃хи зд̇д̇агаани д̣̇угкасад̇аанийд̇и ваа зд̇д̇агаани д̣̇угкасахассаанийд̇и ваа сан̇кибид̇ум̣ на саггаа, д̣̇зсанаа бана саггаа. д̇асмаа ‘‘д̣̇угкам̣ наама на ан̃н̃ам̣ гин̃жи, сам̣кид̇д̇зна бан̃жубаад̣̇аанагканд̇хаа д̣̇угкаа’’д̇и д̣̇зсанам̣ сан̇кибанд̇о звамааха. бан̃жаад̇и г̇ан̣анабарижчзд̣̇о. убаад̣̇аанагканд̇хаад̇и убаад̣̇аанаг̇ожараа канд̇хаа.

ж̇аад̇иббабхуд̇игам̣ д̣̇угкам̣, яам̣ вуд̇д̇амид̇ха д̇аад̣̇инаа;

авуд̇д̇ам̣ яан̃жа д̇ам̣ саб̣б̣ам̣, винаа зд̇зна виж̇ж̇ад̇и.

яасмаа д̇асмаа убаад̣̇аанагканд̇хаа сан̇кзбад̇о имз;

д̣̇угкаад̇и вуд̇д̇аа д̣̇угканд̇а-д̣̇зсагзна махзсинаа.

д̇ат̇аа хи инд̇ханамива бааваго, лагкамива бахаран̣аани, г̇оруубам̣ вияа д̣ам̣самагасаад̣̇аяо, кзд̇д̇амива лааяагаа, г̇аамам̣ вияа г̇аамагхаад̇агаа, убаад̣̇аанагканд̇хабан̃жагамзва ж̇аад̇иаад̣̇аяо наанаббагаарзхи виб̣аад̇хзнд̇аа д̇ин̣алад̇аад̣̇ийни вияа бхуумияам̣, бубпапалабаллаваани вияа ругкзсу убаад̣̇аанагканд̇хзсуязва ниб̣б̣ад̇д̇анд̇и. убаад̣̇аанагканд̇хаанан̃жа аад̣̇ид̣̇угкам̣ ж̇аад̇и, маж̇жхзд̣̇угкам̣ ж̇араа, барияосаанад̣̇угкам̣ маран̣ам̣, мааран̣анд̇игад̣̇угкаабхигхаад̇зна барид̣аяханад̣̇угкам̣ сого , д̇ад̣̇асаханад̇о лаалаббанад̣̇угкам̣ барид̣̇зво, д̇ад̇о д̇хаад̇угкобхасан̇каад̇аанидтаподтаб̣б̣асамааяог̇ад̇о гааяасса ааб̣аад̇ханад̣̇угкам̣ д̣̇угкам̣, д̇зна ааб̣аад̇хияамаанаанам̣ бут̇уж̇ж̇анаанам̣ д̇ад̇т̇а бадигхуббад̇д̇ид̇о жзд̇об̣аад̇ханад̣̇угкам̣ д̣̇оманассам̣, согаад̣̇ивуд̣̇д̇хияаа ж̇анид̇ависаад̣̇аанам̣ ануд̇т̇унанад̣̇угкам̣ убааяаасо, манорат̇авигхаад̇аббад̇д̇аанам̣ ижчаавигхаад̇ад̣̇угкам̣ ижчид̇аалаабход̇и звам̣ наанаббагаарад̇о убабаригкияамаанаа убаад̣̇аанагканд̇хаава д̣̇угкаад̇и яад̣̇зд̇ам̣ згамзгам̣ д̣̇ассзд̇ваа вужжамаанам̣ анзгзхиби габбзхи на саггаа анавасзсад̇о вад̇д̇ум̣, д̇ам̣ саб̣б̣амби д̣̇угкам̣ згаж̇алаб̣инд̣̇умхи сагаласамуд̣̇д̣̇аж̇аларасам̣ вияа язсу гзсужи бан̃жасу убаад̣̇аанагканд̇хзсу сан̇кибид̇ваа д̣̇ассзд̇ум̣ ‘‘сан̇кид̇д̇зна бан̃жубаад̣̇аанагканд̇хаа д̣̇угкаа’’д̇и бхаг̇авад̇аа вуд̇д̇амзва т̇зро авожаад̇и.

д̇ад̇т̇а гад̇амаа ж̇аад̇ийд̇иаад̣̇ийсу бад̣̇абхааж̇анийязсу д̇ад̇т̇аад̇и д̣̇угкасажжанид̣̇д̣̇зсз вуд̇д̇зсу ж̇аад̇иаад̣̇ийсу. яаа д̇зсам̣ д̇зсам̣ сад̇д̇аананд̇и сан̇кзбад̇о анзгзсам̣ сад̇д̇аанам̣ саад̇хааран̣анид̣̇д̣̇зсо. яаа д̣̇звад̣̇ад̇д̇асса ж̇аад̇и, яаа сомад̣̇ад̇д̇асса ж̇аад̇ийд̇и зван̃хи д̣̇ивасамби гат̇ияамаанз нзва сад̇д̇аа барияаад̣̇аанам̣ г̇ажчанд̇и, на саб̣б̣ам̣ абарад̇т̇ад̣̇ийбанам̣ сиж̇жхад̇и, имзхи бана д̣̇вийхи бад̣̇зхи на гожи сад̇д̇о абарияаад̣̇инно ход̇и, на гин̃жи абарад̇т̇ад̣̇ийбанам̣ на сиж̇жхад̇и. д̇амхи д̇амхийд̇и аяам̣ г̇ад̇иж̇аад̇ивасзна анзгзсам̣ сад̇д̇анигааяаанам̣ саад̇хааран̣анид̣̇д̣̇зсо. сад̇д̇анигааязд̇и сад̇д̇аанам̣ нигааяз, сад̇д̇агхадааяам̣ сад̇д̇асамуухзд̇и ад̇т̇о. ж̇аад̇ийд̇и ж̇ааяанавасзна. ид̣̇амзд̇т̇а сабхаавабажжад̇д̇ам̣. сан̃ж̇аад̇ийд̇и сан̃ж̇ааяанавасзна. убасаг̇г̇зна бад̣̇ам̣ вад̣дхид̇ам̣. огганд̇ийд̇и оггаманавасзна. ж̇ааяанадтзна ваа ж̇аад̇и, саа абарибун̣н̣ааяад̇анавасзна вуд̇д̇аа. сан̃ж̇ааяанадтзна сан̃ж̇аад̇и, саа барибун̣н̣ааяад̇анавасзна вуд̇д̇аа. оггаманадтзна огганд̇и, саа ан̣д̣аж̇аж̇алааб̣уж̇авасзна вуд̇д̇аа. д̇з хи ан̣д̣агосам̣ вад̇т̇игосан̃жа оггаманд̇и, оггаманд̇аа бависанд̇аа вияа бадисанд̇хим̣ г̇ан̣ханд̇и. абхиниб̣б̣ад̇д̇анадтзна абхиниб̣б̣ад̇д̇и, саа сам̣сзд̣̇аж̇аобабаад̇игавасзна вуд̇д̇аа. д̇з хи баагадаа зва худ̇ваа ниб̣б̣ад̇д̇анд̇и, аяам̣ д̇аава саммуд̇игат̇аа.

ид̣̇аани канд̇хаанам̣ баад̇убхааво, ааяад̇анаанам̣ бадилаабход̇и барамад̇т̇агат̇аа ход̇и. канд̇хаа зва хи барамад̇т̇ад̇о баад̇убхаванд̇и, на сад̇д̇аа. зд̇т̇а жа канд̇хаананд̇и згавогаарабхавз згасса, жад̇увогаарабхавз жад̇уннам̣, бан̃жавогаарабхавз бан̃жаннамби г̇ахан̣ам̣ взд̣̇ид̇аб̣б̣ам̣. баад̇убхаавод̇и уббад̇д̇и. ааяад̇анаананд̇и д̇ад̇ра д̇ад̇ра уббаж̇ж̇амаанааяад̇анавасзна сан̇г̇ахо взд̣̇ид̇аб̣б̣о. бадилаабход̇и санд̇ад̇ияам̣ баад̇убхаавоязва. баад̇убхаванд̇аанзва хи д̇аани бадилад̣̇д̇хаани наама хонд̇и. аяам̣ вужжад̇и ж̇аад̇ийд̇и аяам̣ ж̇аад̇и наама гат̇ийяад̇и.

ж̇араанид̣̇д̣̇зсз ж̇араад̇и сабхаавабажжад̇д̇ам̣. ж̇ийран̣ад̇аад̇и аагааранид̣̇д̣̇зсо. кан̣д̣ижжанд̇иаад̣̇аяо д̇аяо гаалаад̇иггамз гижжанид̣̇д̣̇зсаа, бажчимаа д̣̇вз багад̇инид̣̇д̣̇зсаа. аяан̃хи ж̇араад̇и иминаа бад̣̇зна сабхаавад̇о д̣̇ийбид̇аа, д̇знассаа ид̣̇ам̣ сабхаавабажжад̇д̇ам̣. ж̇ийран̣ад̇аад̇и иминаа аагаарад̇о, д̇знассааяам̣ аагааранид̣̇д̣̇зсо. кан̣д̣ижжанд̇и иминаа гаалаад̇иггамз д̣̇анд̇анакаанам̣ кан̣д̣ид̇абхаавагаран̣агижжад̇о. баалижжанд̇и иминаа гзсаломаанам̣ балид̇абхаавагаран̣агижжад̇о. валид̇д̇ажад̇аад̇и иминаа мам̣сам̣ милаабзд̇ваа д̇ажз валибхаавагаран̣агижжад̇о д̣̇ийбид̇аа. д̇знассаа имз д̇аяо гаалаад̇иггамз гижжанид̣̇д̣̇зсаа. д̇зхи имзсам̣ вигаараанам̣ д̣̇ассанавасзна баагадийбхууд̇аа баагадаж̇араа д̣̇ассид̇аа. яат̇зва хи уд̣̇агасса ваа ваад̇асса ваа аг̇г̇ино ваа д̇ин̣аругкаад̣̇ийнам̣ самбхаг̇г̇абалибхаг̇г̇ад̇ааяа ваа жхаамад̇ааяа ваа г̇ад̇амаг̇г̇о баагадо ход̇и, на жа со г̇ад̇амаг̇г̇о д̇аанзва уд̣̇агаад̣̇ийни, звамзва ж̇арааяа д̣̇анд̇аад̣̇ийсу кан̣д̣ижжаад̣̇ивасзна г̇ад̇амаг̇г̇о баагадо жагкум̣ уммийлзд̇вааби г̇аяхад̇и, на жа кан̣д̣ижжаад̣̇ийнзва ж̇араа. на хи ж̇араа жагкувин̃н̃зяяаа ход̇и.

ааяуно сам̣хаани инд̣̇рияаанам̣ барибаагод̇и имзхи бана бад̣̇зхи гаалаад̇иггамзязва абхиб̣яад̇д̇ааяа ааяугкаяажагкаад̣̇иинд̣̇рияабарибаагасан̇каад̇ааяа багад̇ияаа д̣̇ийбид̇аа, д̇знассимз д̣̇вз багад̇инид̣̇д̣̇зсаад̇и взд̣̇ид̇аб̣б̣аа. д̇ад̇т̇а яасмаа ж̇арам̣ бад̇д̇асса ааяу хааяад̇и, д̇асмаа ж̇араа ‘‘ааяуно сам̣хааний’’д̇и палуубажаарзна вуд̇д̇аа. яасмаа жа д̣̇ахарагаалз суббасаннаани сукумамби ад̇д̇ано висаяам̣ сукзнзва г̇ан̣ханасамад̇т̇аани жагкаад̣̇ийни инд̣̇рияаани ж̇арам̣ бад̇д̇асса барибаггаани аалул̣ид̇аани ависад̣̇аани ол̣ааригамби ад̇д̇ано висаяам̣ г̇ахзд̇ум̣ асамад̇т̇аани хонд̇и, д̇асмаа ‘‘инд̣̇рияаанам̣ барибааго’’д̇и палуубажаарзнзва вуд̇д̇аа.

саа банзсаа звам̣ нид̣̇д̣̇идтаа саб̣б̣ааби ж̇араа баагадаа бадижчаннаад̇и д̣̇увид̇хаа ход̇и. д̇ад̇т̇а д̣̇анд̇аад̣̇ийсу кан̣д̣аад̣̇ибхаавад̣̇ассанад̇о руубад̇хаммзсу ж̇араа баагадаж̇араа наама. аруубад̇хаммзсу бана ж̇араа д̇аад̣̇исасса вигаарасса ад̣̇ассанад̇о бадижчаннаж̇араа наама. д̇ад̇ра явааяам̣ кан̣д̣аад̣̇ибхааво д̣̇иссад̇и, со д̇аад̣̇исаанам̣ д̣̇анд̇аад̣̇ийнам̣ ван̣н̣оязва. д̇ам̣ жагкунаа д̣̇исваа манод̣̇ваарзна жинд̇зд̇ваа ‘‘имз д̣̇анд̇аа ж̇арааяа бахадаа’’д̇и ж̇арам̣ ж̇аанаад̇и, уд̣̇агадтаанз б̣ад̣̇д̇хаани г̇осин̇г̇аад̣̇ийни ологзд̇ваа хздтаа уд̣̇агасса ад̇т̇ибхааваж̇аананам̣ вияа. буна аяам̣ ж̇араа савийжи авийжийд̇и звамби д̣̇увид̇хаа ход̇и. д̇ад̇т̇а ман̣иганагараж̇ад̇абаваал̣ажанд̣̇асуурияаад̣̇ийнам̣ манд̣̇ад̣̇асагаад̣̇ийсу баан̣ийнам̣ вияа, бубпапалабаллаваад̣̇ийсу абаан̣ийнам̣ вияа жа анд̇аранд̇араа ван̣н̣ависзсаад̣̇ийнам̣ д̣̇уб̣б̣ин̃н̃зяяад̇д̇аа ж̇араа авийжиж̇араа наама, ниранд̇араж̇араад̇и ад̇т̇о. д̇ад̇о ан̃н̃зсу бана яат̇аавуд̇д̇зсу анд̇аранд̇араа ван̣н̣ависзсаад̣̇ийнам̣ сувин̃н̃зяяад̇д̇аа ж̇араа савийжиж̇араа наама.

д̇ад̇т̇а савийжиж̇араа убаад̣̇ин̣н̣агаанубаад̣̇ин̣н̣агавасзна звам̣ взд̣̇ид̇аб̣б̣аа – д̣̇ахарагумаарагаанан̃хи батамамзва кийрад̣̇анд̇аа наама удтаханд̇и, на д̇з т̇ираа. д̇зсу бана бад̇ид̇зсу буна д̣̇анд̇аа удтаханд̇и. д̇з батамамзва сзд̇аа хонд̇и, ж̇арааваад̇зна бахадагаалз гаал̣агаа хонд̇и. гзсаа батамамзва д̇амб̣аа хонд̇и, д̇ад̇о гаал̣агаа, д̇ад̇о сзд̇аа. чави бана салохид̇игаа ход̇и. вад̣дханд̇аанам̣ вад̣дханд̇аанам̣ од̣̇аад̇аанам̣ од̣̇аад̇абхааво, гаал̣агаанам̣ гаал̣агабхааво бан̃н̃ааяад̇и. ж̇арааваад̇зна бана бахадагаалз валим̣ г̇ан̣хаад̇и. саб̣б̣амби сассам̣ вабид̇агаалз сзд̇ам̣ ход̇и, бажчаа нийлам̣. ж̇арааваад̇зна бана бахадагаалз бан̣д̣угам̣ ход̇и. амб̣ан̇гурзнааби д̣̇ийбзд̇ум̣ ваддад̇и.

маран̣анид̣̇д̣̇зсз жуд̇ийд̇и жаванавасзна вуд̇д̇ам̣. згажад̇убан̃жагканд̇хаанам̣ сааман̃н̃аважанамзд̇ам̣. жаванад̇аад̇и бхаававажанзна лагкан̣анид̣̇ассанам̣. бхзд̣̇од̇и жуд̇иканд̇хаанам̣ бхан̇г̇уббад̇д̇ибарид̣̇ийбанам̣. анд̇арад̇хаананд̇и гхадасса вияа бхиннасса бхиннаанам̣ жуд̇иканд̇хаанам̣ язна гзнажи барияааязна таанаабхаавабарид̣̇ийбанам̣. мажжу маран̣анд̇и мажжусан̇каад̇ам̣ маран̣ам̣, на кан̣игамаран̣ам̣. гаало наама анд̇аго, д̇асса гирияаад̇и гаалагирияаа. зд̇д̇аавад̇аа жа саммуд̇ияаа маран̣ам̣ д̣̇ийбид̇ам̣.

ид̣̇аани барамад̇т̇зна д̣̇ийбзд̇ум̣ канд̇хаанам̣ бхзд̣̇од̇иаад̣̇имааха. барамад̇т̇зна хи канд̇хааязва бхиж̇ж̇анд̇и, на сад̇д̇о наама гожи марад̇и. канд̇хзсу бана бхиж̇ж̇амаанзсу сад̇д̇о марад̇и, бхиннзсу мад̇од̇и вохааро ход̇и. зд̇т̇а жа жад̇увогаарабан̃жавогааравасзна канд̇хаанам̣ бхзд̣̇о, згавогааравасзна гал̣зварасса нигкзбо, жад̇увогааравасзна ваа канд̇хаанам̣ бхзд̣̇о, сзсад̣̇ваяавасзна гал̣зварасса нигкзбо взд̣̇ид̇аб̣б̣о. гасмаа? бхавад̣̇ваязби руубагааяасан̇каад̇асса гал̣зварасса самбхавад̇о. яасмаа ваа жаад̇умахаарааж̇игаад̣̇ийсуби канд̇хаа бхиж̇ж̇анд̇зва, на гин̃жи нигкибад̇и, д̇асмаа д̇зсам̣ васзна канд̇хаанам̣ бхзд̣̇о, мануссаад̣̇ийсу гал̣зварасса нигкзбо. зд̇т̇а жа гал̣зварасса нигкзбагаран̣ад̇о маран̣ам̣ ‘‘гал̣зварасса нигкзбо’’д̇и вуд̇д̇ам̣.

ж̇ийвид̇инд̣̇рияассубажчзд̣̇од̇и иминаа инд̣̇рияаб̣ад̣̇д̇хассзва маран̣ам̣ наама ход̇и, анинд̣̇рияаб̣ад̣̇д̇хасса маран̣ам̣ наама над̇т̇ийд̇и д̣̇ассзд̇и. ‘‘сассам̣ мад̇ам̣, ругко мад̇о’’д̇и ид̣̇ам̣ бана вохаарамад̇д̇амзва, ад̇т̇ад̇о бана зваруубаани важанаани сассаад̣̇ийнам̣ каяаваяабхаавамзва д̣̇ийбзнд̇и.

абижа имаани ж̇аад̇иж̇араамаран̣аани наама имзсам̣ сад̇д̇аанам̣ вад̇хагабажжаамид̇д̇аа вияа од̇аарам̣ г̇авзсанд̇аани вижаранд̇и. яат̇аа хи бурисасса д̇ийсу бажжаамид̇д̇зсу од̇аараабзгкзсу вижаранд̇зсу зго вад̣̇зяяа ‘‘ахам̣ асугааран̃н̃асса наама ван̣н̣ам̣ гат̇зд̇ваа зд̇ам̣ аад̣̇ааяа д̇ад̇т̇а г̇амиссаами, зд̇т̇а маяхам̣ д̣̇уггарам̣ над̇т̇ий’’д̇и. д̣̇уд̇ияо вад̣̇зяяа ‘‘ахам̣ д̇ава зд̇ам̣ г̇ахзд̇ваа г̇ад̇агаалз бот̇зд̇ваа д̣̇уб̣б̣алам̣ гариссаами, зд̇т̇а маяхам̣ д̣̇уггарам̣ над̇т̇ий’’д̇и. д̇ад̇ияо вад̣̇зяяа ‘‘д̇аяаа зд̇асмим̣ бот̇зд̇ваа д̣̇уб̣б̣алз гад̇з д̇ин̣хзна асинаа сийсажчзд̣̇анам̣ наама маяхам̣ бхааро ход̇уу’’д̇и д̇з звам̣ вад̇ваа д̇ат̇аа гарзяяум̣. д̇ад̇т̇а батамабажжаамид̇д̇асса аран̃н̃аван̣н̣ам̣ гат̇зд̇ваа д̇ам̣ аад̣̇ааяа д̇ад̇т̇а г̇ад̇агаало вияа сухаж̇ж̇ан̃аад̇иман̣д̣алад̇о ниггад̣дхид̇ваа яад̇т̇а гад̇т̇ажи ниб̣б̣ад̇д̇аабанам̣ наама ж̇аад̇ияаа гижжам̣, д̣̇уд̇ияасса бот̇зд̇ваа д̣̇уб̣б̣алагаран̣ам̣ вияа ниб̣б̣ад̇д̇агканд̇хзсу нибад̇ид̇ваа бараад̇хийнаман̃жабарааяан̣абхаавагаран̣ам̣ ж̇арааяа гижжам̣, д̇ад̇ияасса д̇ин̣хзна асинаа сийсажчзд̣̇анам̣ вияа ж̇ийвид̇агкаяабаабанам̣ маран̣асса гижжанд̇и взд̣̇ид̇аб̣б̣ам̣.

абижзд̇т̇а ж̇аад̇ид̣̇угкам̣ саад̣̇ийнавамахааганд̇аараббавзсо вияа д̣̇адтаб̣б̣ам̣, ж̇араад̣̇угкам̣ д̇ад̇т̇а аннабаанарахид̇асса д̣̇уб̣б̣алам̣ вияа, маран̣ад̣̇угкам̣ д̣̇уб̣б̣аласса ирияаабат̇абавад̇д̇анз вихад̇абараггамасса ваал̣аад̣̇ийхи анаяаб̣яасанаабаад̣̇анам̣ вияа д̣̇адтаб̣б̣анд̇и.

соганид̣̇д̣̇зсз вияасад̇ийд̇и б̣яасанам̣, хид̇асукам̣ кибад̇и вид̣̇д̇хам̣сзд̇ийд̇и ад̇т̇о. н̃аад̇ийнам̣ б̣яасанам̣ н̃аад̇иб̣яасанам̣, жорарог̇абхаяаад̣̇ийхи н̃аад̇игкаяо н̃аад̇ивинаасод̇и ад̇т̇о. д̇зна н̃аад̇иб̣яасанзна. пудтассаад̇и аж̇жход̇т̇адасса абхибхууд̇асса, саманнааг̇ад̇ассаад̇и ад̇т̇о. сзсзсуби зсзва наяо. аяам̣ бана висзсо – бхог̇аанам̣ б̣яасанам̣ бхог̇аб̣яасанам̣, рааж̇ажораад̣̇ивасзна бхог̇агкаяо бхог̇авинаасод̇и ад̇т̇о. рог̇оязва б̣яасанам̣ рог̇аб̣яасанам̣. рог̇о хи аарог̇яам̣ вияасад̇и винаасзд̇ийд̇и б̣яасанам̣. сийласса б̣яасанам̣ сийлаб̣яасанам̣. д̣̇уссийляассзд̇ам̣ наамам̣. саммаад̣̇идтим̣ винаасаяамаанаа уббаннаа д̣̇идти зва б̣яасанам̣ д̣̇идтиб̣яасанам̣. зд̇т̇а жа буримаани д̣̇вз анибпаннаани, бажчимаани д̇ийн̣и нибпаннаани д̇илагкан̣аб̣бхаахад̇аани. буримаани жа д̇ийн̣и нзва гусалаани на агусалаани, сийлад̣̇идтиб̣яасанад̣̇ваяам̣ агусалам̣.

ан̃н̃ад̇аран̃н̃ад̇арзнаад̇и г̇ахид̇зсу ваа язна гзнажи аг̇г̇ахид̇зсу ваа мид̇д̇аамажжаб̣яасанаад̣̇ийсу язна гзнажи. саманнааг̇ад̇ассаад̇и самануб̣анд̇хасса абаримужжамаанасса. ан̃н̃ад̇аран̃н̃ад̇арзна д̣̇угкад̇хаммзнаад̇и язна гзнажи согад̣̇угкасса уббад̇д̇ихзд̇унаа. согод̇и сожанагавасзна сого. ид̣̇ам̣ д̇зхи гааран̣зхи уббаж̇ж̇анагасогасса сабхаавабажжад̇д̇ам̣. сожанаад̇и сожанаагааро. сожид̇ад̇д̇анд̇и сожид̇абхааво. анд̇осогод̇и аб̣бханд̇арасого. д̣̇уд̇ияабад̣̇ам̣ убасаг̇г̇зна вад̣дхид̇ам̣. со хи аб̣бханд̇арам̣ сугкаабзнд̇о вияа барисугкаабзнд̇о вияа уббаж̇ж̇ад̇ийд̇и ‘‘анд̇осого анд̇обарисого’’д̇и вужжад̇и. жзд̇асо бариж̇жхааяанаад̇и жид̇д̇асса бариж̇жхааяанаагааро. сого хи уббаж̇ж̇амаано аг̇г̇и вияа жид̇д̇ам̣ жхаабзд̇и д̣̇ахад̇и, ‘‘жид̇д̇ам̣ мз жхаамам̣, на мз гин̃жи бадибхаад̇ий’’д̇и вад̣̇аабзд̇и. д̣̇угкид̇о мано д̣̇уммано, д̇асса бхааво д̣̇оманассам̣. анубавидтадтзна согова салланд̇и согасаллам̣.

барид̣̇званид̣̇д̣̇зсз ‘‘маяхам̣ д̇хийд̇аа, маяхам̣ буд̇д̇о’’д̇и звам̣ аад̣̇исса аад̣̇исса д̣̇званд̇и род̣̇анд̇и зд̇знаад̇и аад̣̇зво. д̇ам̣ д̇ам̣ ван̣н̣ам̣ баригид̇д̇зд̇ваа баригид̇д̇зд̇ваа д̣̇званд̇и зд̇знаад̇и барид̣̇зво. д̇ад̇о бараани д̣̇вз д̣̇вз бад̣̇аани буримад̣̇ваяассзва аагаарабхааванид̣̇д̣̇зсавасзна вуд̇д̇аани. ваажаад̇и важанам̣. балаабод̇и д̇ужчам̣ нирад̇т̇агаважанам̣. убад̣дхабхан̣ид̇аан̃н̃абхан̣ид̇аад̣̇ивасзна вируубо балаабод̇и виббалаабо. лаалаббод̇и бунаббунам̣ лабанам̣. лаалаббанаагааро лаалаббанаа. лаалаббид̇асса бхааво лаалаббид̇ад̇д̇ам̣.

д̣̇угканид̣̇д̣̇зсз гааяаниссид̇ад̇д̇аа гааяигам̣. амад̇хурадтзна асаад̇ам̣. гааяигабад̣̇зна жзд̇асигаасаад̇ам̣ бадигкибад̇и, асаад̇абад̣̇зна гааяигасаад̇ам̣. д̇ад̣̇зва д̣̇угкаяад̇ийд̇и д̣̇угкам̣, яассуббаж̇ж̇ад̇и, д̇ам̣ д̣̇угкид̇ам̣ гарод̇ийд̇и ад̇т̇о. д̣̇угкамад̇д̇аа ваа д̣̇угкам̣. гааяасампассаж̇анд̇и гааяасампассз ж̇аад̇ам̣. асаад̇ам̣ д̣̇угкам̣ взд̣̇аяид̇анд̇и асаад̇ам̣ взд̣̇аяид̇ам̣ на саад̇ам̣, д̣̇угкам̣ взд̣̇аяид̇ам̣ на сукам̣. барад̇о д̇ийн̣и бад̣̇аани ид̇т̇илин̇г̇авасзна вуд̇д̇аани. асаад̇аа взд̣̇анаа на саад̇аа, д̣̇угкаа взд̣̇анаа на сукаад̇и аяамзва банзд̇т̇а ад̇т̇о. яам̣ гааяигам̣ асаад̇ам̣ д̣̇угкам̣ взд̣̇аяид̇ам̣, яаа гааяасампассаж̇аа асаад̇аа д̣̇угкаа взд̣̇анаа, ид̣̇ам̣ вужжад̇и д̣̇угканд̇и звам̣ яож̇анаа взд̣̇ид̇аб̣б̣аа.

д̣̇оманассанид̣̇д̣̇зсз д̣̇удту манод̇и д̣̇уммано, хийнавзд̣̇анад̇д̇аа ваа гужчид̇ам̣ манод̇и д̣̇уммано, д̣̇умманасса бхааво д̣̇оманассам̣. жид̇д̇аниссид̇ад̇д̇аа жзд̇асигам̣. жзд̇осампассаж̇анд̇и жид̇д̇асампассз ж̇аад̇ам̣.

убааяаасанид̣̇д̣̇зсз ааяаасанадтзна ааяаасо. сам̣сийд̣̇анависийд̣̇анаагаараббавад̇д̇асса жид̇д̇агиламат̇ассзд̇ам̣ наамам̣. б̣алаваааяаасо убааяаасо. ааяаасид̇абхааво ааяаасид̇ад̇д̇ам̣. убааяаасид̇абхааво убааяаасид̇ад̇д̇ам̣.

аббияасамбаяог̇анид̣̇д̣̇зсз ид̇хаад̇и имасмим̣ логз. яассаад̇и яз асса. анидтаад̇и абариязсид̇аа. бариязсид̇аа ваа хонд̇у абариязсид̇аа ваа, наамамзвзд̇ам̣ аманаабаарамман̣аанам̣. манасмим̣ на гаманд̇и на бависанд̇ийд̇и аганд̇аа. манасмим̣ на аббияанд̇и, на ваа манам̣ вад̣дхзнд̇ийд̇и аманаабаа. руубаад̇иаад̣̇и д̇зсам̣ сабхааванид̣̇ассанам̣. анад̇т̇ам̣ гаамзнд̇и ижчанд̇ийд̇и анад̇т̇агаамаа. ахид̇ам̣ гаамзнд̇и ижчанд̇ийд̇и ахид̇агаамаа. апаасум̣ д̣̇угкавихаарам̣ гаамзнд̇и ижчанд̇ийд̇и апаасугаамаа. жад̇уухи яог̇зхи кзмам̣ ниб̣бхаяам̣ виваддам̣ на гаамзнд̇и, сабхаяам̣ ваддамзва нзсам̣ гаамзнд̇и ижчанд̇ийд̇и аяог̇агкзмагаамаа. абижа сад̣̇д̇хаад̣̇ийнам̣ вуд̣̇д̇хисан̇каад̇асса ад̇т̇асса агааманад̇о, д̇зсам̣язва хаанисан̇каад̇асса анад̇т̇асса жа гааманад̇о анад̇т̇агаамаа. сад̣̇д̇хаад̣̇ийнам̣язва убааяабхууд̇асса хид̇асса агааманад̇о, сад̣̇д̇хаахааниаад̣̇ийнам̣ убааяабхууд̇асса ахид̇асса жа гааманад̇о ахид̇агаамаа. паасувихаарасса агааманад̇о, апаасувихаарасса жа гааманад̇о апаасугаамаа. яасса гассажи ниб̣бхаяасса агааманад̇о, бхаяасса жа гааманад̇о аяог̇агкзмагаамаад̇и звамзд̇т̇а ад̇т̇о д̣̇адтаб̣б̣о.

сан̇г̇ад̇ийд̇и г̇анд̇ваа сам̣яог̇о. самааг̇амод̇и ааг̇ад̇зхи сам̣яог̇о. самод̇хаананд̇и таананисаж̇ж̇аад̣̇ийсу сахабхааво. миссийбхаавод̇и саб̣б̣агижжаанам̣ сахагаран̣ам̣. аяам̣ сад̇д̇авасзна яож̇анаа. сан̇кааравасзна бана яам̣ лаб̣бхад̇и, д̇ам̣ г̇ахзд̇аб̣б̣ам̣. со бана аббияасамбаяог̇о ад̇т̇ад̇о зго д̇хаммо наама над̇т̇и, гзвалам̣ аббияасамбаяуд̇д̇аанам̣ д̣̇увид̇хассааби д̣̇угкасса вад̇т̇убхаавад̇о д̣̇угкод̇и вуд̇д̇о.

бияавиббаяог̇анид̣̇д̣̇зсо вуд̇д̇абадибагканаязна взд̣̇ид̇аб̣б̣о. маад̇аа ваад̇иаад̣̇и банзд̇т̇а ад̇т̇агаамз саруубзна д̣̇ассзд̇ум̣ вуд̇д̇ам̣. д̇ад̇т̇а мамааяад̇ийд̇и маад̇аа, бияааяад̇ийд̇и бид̇аа. бхаж̇ад̇ийд̇и бхаад̇аа, д̇ат̇аа бхаг̇иний. мзд̇д̇ааяанд̇ийд̇и мид̇д̇аа, минанд̇и ваа саб̣б̣аг̇уяхзсу анд̇о багкибанд̇ийд̇и мид̇д̇аа. гижжагаран̣ийязсу сахабхаавадтзна амаа хонд̇ийд̇и амажжаа. ‘‘аяам̣ амхаагам̣ аж̇жхад̇д̇иго’’д̇и звам̣ ж̇аананд̇и, н̃ааяанд̇ийд̇и ваа н̃аад̇ий. лохид̇зна самб̣анд̇хаад̇и саалохид̇аа. бид̇убагкигаа н̃аад̇ий, маад̇убагкигаа саалохид̇аа. маад̇аабид̇убагкигаа ваа н̃аад̇ий, сассусасурабагкигаа саалохид̇аа. аяамби бияавиббаяог̇о ад̇т̇ад̇о зго д̇хаммо наама над̇т̇и, гзвалам̣ бияавиббаяуд̇д̇аанам̣ д̣̇увид̇хассааби д̣̇угкасса вад̇т̇убхаавад̇о д̣̇угкод̇и вуд̇д̇о. ид̣̇амзд̇т̇а саб̣б̣аадтагат̇ааважанам̣. сажжаанам̣ бана д̇ат̇алагкан̣ад̇д̇аа самбаяог̇авиббаяог̇аважанзхи аббияабияавад̇т̇ууниязва висзсид̇аанийд̇и вад̇д̇ум̣ яуж̇ж̇ад̇ийд̇и.

ижчид̇аалаабханид̣̇д̣̇зсз ж̇аад̇ид̇хаммаананд̇и ж̇аад̇исабхааваанам̣ ж̇аад̇ибагад̇игаанам̣. ижчаа уббаж̇ж̇ад̇ийд̇и д̇ан̣хаа уббаж̇ж̇ад̇и. ахо вад̇аад̇и бад̇т̇анаа. ассаамаад̇и бхавзяяаама. на ко банзд̇ам̣ ижчааяа бад̇д̇аб̣б̣анд̇и яам̣ зд̇ам̣ ‘‘ахо вад̇а маяам̣ на ж̇аад̇ид̇хаммаа ассаама, на жа вад̇а но ж̇аад̇и ааг̇ажчзяяаа’’д̇и звам̣ бахийнасамуд̣̇аязсу саад̇хуусу виж̇ж̇амаанам̣ аж̇аад̇ид̇хаммад̇д̇ам̣ бариниб̣б̣уд̇зсу жа виж̇ж̇амаанам̣ ж̇аад̇ияаа анааг̇аманам̣ ижчид̇ам̣, д̇ам̣ ижчанд̇ассааби маг̇г̇абхааванааяа винаа аббад̇д̇аб̣б̣ад̇о, анижчанд̇ассааби жа бхааванааяа бад̇д̇аб̣б̣ад̇о на ижчааяа бад̇д̇аб̣б̣ам̣ наама ход̇и. ид̣̇амбийд̇и зд̇амби. убари сзсаани убаад̣̇ааяа абисад̣̇д̣̇о.

убаад̣̇аанагканд̇ханид̣̇д̣̇зсз сзяяат̇ид̣̇анд̇и нибаад̇о, д̇асса д̇з гад̇амз ид̇и жзд̇и ад̇т̇о. руубамзва убаад̣̇аанагканд̇ход̇и руубубаад̣̇аанагканд̇хо. зсзва наяо сзсзсуби.

д̣̇угкасажжанид̣̇д̣̇зсаван̣н̣анаа нидтид̇аа.