| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. དུཀྑསུཏྟཾ
2. Dukkhasuttaṃ
༡༠༤. སཱཝཏྠིནིདཱནཾ། ‘‘དུཀྑཉྩ ཝོ, བྷིཀྑཝེ, དེསེསྶཱམི དུཀྑསམུདཡཉྩ དུཀྑནིརོདྷཉྩ དུཀྑནིརོདྷགཱམིནིཉྩ པཊིཔདཾ། ཏཾ སུཎཱཐ། ཀཏམཉྩ, བྷིཀྑཝེ, དུཀྑཾ? པཉྩུཔཱདཱནཀྑནྡྷཱཏིསྶ ཝཙནཱིཡཾ། ཀཏམེ པཉྩ? སེཡྻཐིདཾ – རཱུཔུཔཱདཱནཀྑནྡྷོ…པེ॰… ཝིཉྙཱཎུཔཱདཱནཀྑནྡྷོ། ཨིདཾ ཝུཙྩཏི, བྷིཀྑཝེ, དུཀྑཾ། ཀཏམོ ཙ, བྷིཀྑཝེ, དུཀྑསམུདཡོ? ཡཱཡཾ ཏཎྷཱ པོནོབྷཝིཀཱ…པེ॰… ཀཱམཏཎྷཱ, བྷཝཏཎྷཱ, ཝིབྷཝཏཎྷཱ – ཨཡཾ ཝུཙྩཏི, བྷིཀྑཝེ, དུཀྑསམུདཡོ། ཀཏམོ ཙ, བྷིཀྑཝེ, དུཀྑནིརོདྷོ? ཡོ ཏསྶཱཡེཝ ཏཎྷཱཡ ཨསེསཝིརཱགནིརོདྷོ ཙཱགོ པཊིནིསྶགྒོ མུཏྟི ཨནཱལཡོ – ཨཡཾ ཝུཙྩཏི, བྷིཀྑཝེ, དུཀྑནིརོདྷོ། ཀཏམཱ ཙ, བྷིཀྑཝེ, དུཀྑནིརོདྷགཱམིནཱི པཊིཔདཱ? ཨཡམེཝ ཨརིཡོ ཨཊྛངྒིཀོ མགྒོ། སེཡྻཐིདཾ – སམྨཱདིཊྛི…པེ॰… སམྨཱསམཱདྷི། ཨཡཾ ཝུཙྩཏི, བྷིཀྑཝེ, དུཀྑནིརོདྷགཱམིནཱི པཊིཔདཱ’’ཏི། དུཏིཡཾ།
104. Sāvatthinidānaṃ. ‘‘Dukkhañca vo, bhikkhave, desessāmi dukkhasamudayañca dukkhanirodhañca dukkhanirodhagāminiñca paṭipadaṃ. Taṃ suṇātha. Katamañca, bhikkhave, dukkhaṃ? Pañcupādānakkhandhātissa vacanīyaṃ. Katame pañca? Seyyathidaṃ – rūpupādānakkhandho…pe… viññāṇupādānakkhandho. Idaṃ vuccati, bhikkhave, dukkhaṃ. Katamo ca, bhikkhave, dukkhasamudayo? Yāyaṃ taṇhā ponobhavikā…pe… kāmataṇhā, bhavataṇhā, vibhavataṇhā – ayaṃ vuccati, bhikkhave, dukkhasamudayo. Katamo ca, bhikkhave, dukkhanirodho? Yo tassāyeva taṇhāya asesavirāganirodho cāgo paṭinissaggo mutti anālayo – ayaṃ vuccati, bhikkhave, dukkhanirodho. Katamā ca, bhikkhave, dukkhanirodhagāminī paṭipadā? Ayameva ariyo aṭṭhaṅgiko maggo. Seyyathidaṃ – sammādiṭṭhi…pe… sammāsamādhi. Ayaṃ vuccati, bhikkhave, dukkhanirodhagāminī paṭipadā’’ti. Dutiyaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢-༣. དུཀྑསུཏྟཱདིཝཎྞནཱ • 2-3. Dukkhasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢-༣. དུཀྑསུཏྟཱདིཝཎྞནཱ • 2-3. Dukkhasuttādivaṇṇanā
