| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൩. ദുക്ഖസുത്തവണ്ണനാ
3. Dukkhasuttavaṇṇanā
൪൩. തതിയേ ദുക്ഖസ്സാതി വട്ടദുക്ഖസ്സ. സമുദയന്തി ദ്വേ സമുദയാ ഖണികസമുദയോ ച പച്ചയസമുദയോ ച. പച്ചയസമുദയം പസ്സന്തോപി ഭിക്ഖു ഖണികസമുദയം പസ്സതി, ഖണികസമുദയം പസ്സന്തോപി പച്ചയസമുദയം പസ്സതി. അത്ഥങ്ഗമോപി അച്ചന്തത്ഥങ്ഗമോ ഭേദത്ഥങ്ഗമോതി ദുവിധോ. അച്ചന്തത്ഥങ്ഗമം പസ്സന്തോപി ഭേദത്ഥങ്ഗമം പസ്സതി, ഭേദത്ഥങ്ഗമം പസ്സന്തോപി അച്ചന്തത്ഥങ്ഗമം പസ്സതി. ദേസേസ്സാമീതി ഇദം വട്ടദുക്ഖസ്സ സമുദയഅത്ഥങ്ഗമം നിബ്ബത്തിഭേദം നാമ ദേസേസ്സാമി, തം സുണാഥാതി അത്ഥോ. പടിച്ചാതി നിസ്സയവസേന ചേവ ആരമ്മണവസേന ച പച്ചയം കത്വാ. തിണ്ണം സങ്ഗതി ഫസ്സോതി തിണ്ണം സങ്ഗതിയാ ഫസ്സോ. അയം ഖോ, ഭിക്ഖവേ, ദുക്ഖസ്സ സമുദയോതി അയം വട്ടദുക്ഖസ്സ നിബ്ബത്തി നാമ. അത്ഥങ്ഗമോതി ഭേദോ. ഏവഞ്ഹി വട്ടദുക്ഖം ഭിന്നം ഹോതി അപ്പടിസന്ധിയം. തതിയം.
43. Tatiye dukkhassāti vaṭṭadukkhassa. Samudayanti dve samudayā khaṇikasamudayo ca paccayasamudayo ca. Paccayasamudayaṃ passantopi bhikkhu khaṇikasamudayaṃ passati, khaṇikasamudayaṃ passantopi paccayasamudayaṃ passati. Atthaṅgamopi accantatthaṅgamo bhedatthaṅgamoti duvidho. Accantatthaṅgamaṃ passantopi bhedatthaṅgamaṃ passati, bhedatthaṅgamaṃ passantopi accantatthaṅgamaṃ passati. Desessāmīti idaṃ vaṭṭadukkhassa samudayaatthaṅgamaṃ nibbattibhedaṃ nāma desessāmi, taṃ suṇāthāti attho. Paṭiccāti nissayavasena ceva ārammaṇavasena ca paccayaṃ katvā. Tiṇṇaṃ saṅgati phassoti tiṇṇaṃ saṅgatiyā phasso. Ayaṃ kho, bhikkhave, dukkhassa samudayoti ayaṃ vaṭṭadukkhassa nibbatti nāma. Atthaṅgamoti bhedo. Evañhi vaṭṭadukkhaṃ bhinnaṃ hoti appaṭisandhiyaṃ. Tatiyaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൩. ദുക്ഖസുത്തം • 3. Dukkhasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൩. ദുക്ഖസുത്തവണ്ണനാ • 3. Dukkhasuttavaṇṇanā
