| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[122] 2. д̣̇уммзд̇хаж̇аад̇агаван̣н̣анаа
[122] 2. Dummedhajātakavaṇṇanā
яасам̣ лад̣̇д̇хаана д̣̇уммзд̇ход̇и ид̣̇ам̣ сад̇т̇аа взл̣уванз вихаранд̇о д̣̇звад̣̇ад̇д̇ам̣ аараб̣бха гат̇зси. д̇хаммасабхааяан̃хи бхигкуу ‘‘аавусо д̣̇звад̣̇ад̇д̇о, д̇ат̇ааг̇ад̇асса бун̣н̣ажанд̣̇асассиригамукам̣ асийд̇аануб̣яан̃ж̇анад̣̇вад̇д̇им̣самахаабурисалагкан̣абадиман̣д̣ид̇ам̣ б̣яаамаббабхаабаригкид̇д̇ам̣ аавзл̣аавзл̣аабхууд̇аа яамагаяамагабхууд̇аа гханаб̣уд̣̇д̇харасмияо виссаж̇ж̇знд̇ам̣ барамасобхаг̇г̇аббад̇д̇ам̣ ад̇д̇абхааван̃жа ологзд̇ваа жид̇д̇ам̣ басаад̣̇зд̇ум̣ на саггод̇и, усууяамзва гарод̇и. ‘б̣уд̣̇д̇хаа наама зваруубзна сийлзна самаад̇хинаа бан̃н̃ааяа вимуд̇д̇ияаа вимуд̇д̇ин̃аан̣ад̣̇ассанзна саманнааг̇ад̇аа’д̇и вужжамаанз ван̣н̣ам̣ сахид̇ум̣ на саггод̇и, усууяамзва гарод̇ий’’д̇и д̣̇звад̣̇ад̇д̇асса аг̇ун̣агат̇ам̣ гат̇аяим̣су. сад̇т̇аа ааг̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчид̇ваа ‘‘имааяа наамаа’’д̇и вуд̇д̇з ‘‘на, бхигкавз , ид̣̇аанзва д̣̇звад̣̇ад̇д̇о мама ван̣н̣з бхан̃н̃амаанз усууяам̣ гарод̇и, буб̣б̣зби агаасиязваа’’д̇и вад̇ваа ад̇ийд̇ам̣ аахари.
Yasaṃladdhāna dummedhoti idaṃ satthā veḷuvane viharanto devadattaṃ ārabbha kathesi. Dhammasabhāyañhi bhikkhū ‘‘āvuso devadatto, tathāgatassa puṇṇacandasassirikamukhaṃ asītānubyañjanadvattiṃsamahāpurisalakkhaṇapaṭimaṇḍitaṃ byāmappabhāparikkhittaṃ āveḷāveḷābhūtā yamakayamakabhūtā ghanabuddharasmiyo vissajjentaṃ paramasobhaggappattaṃ attabhāvañca oloketvā cittaṃ pasādetuṃ na sakkoti, usūyameva karoti. ‘Buddhā nāma evarūpena sīlena samādhinā paññāya vimuttiyā vimuttiñāṇadassanena samannāgatā’ti vuccamāne vaṇṇaṃ sahituṃ na sakkoti, usūyameva karotī’’ti devadattassa aguṇakathaṃ kathayiṃsu. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave , idāneva devadatto mama vaṇṇe bhaññamāne usūyaṃ karoti, pubbepi akāsiyevā’’ti vatvā atītaṃ āhari.
ад̇ийд̇з маг̇ад̇харадтз рааж̇аг̇аханаг̇арз згасмим̣ маг̇ад̇харааж̇з раж̇ж̇ам̣ гаарзнд̇з б̣од̇хисад̇д̇о хад̇т̇ияонияам̣ ниб̣б̣ад̇д̇ид̇ваа саб̣б̣асзд̇о ахоси хздтаа ван̣н̣ид̇асад̣̇исааяа руубасамбад̇д̇ияаа саманнааг̇ад̇о. ат̇а нам̣ ‘‘лагкан̣асамбанно аяа’’нд̇и со рааж̇аа ман̇г̇алахад̇т̇им̣ агааси. ат̇згасмим̣ чан̣ад̣̇ивасз сагаланаг̇арам̣ д̣̇званаг̇арам̣ вияа алан̇гаараабзд̇ваа саб̣б̣аалан̇гаарабадиман̣д̣ид̇ам̣ ман̇г̇алахад̇т̇им̣ абхирухид̇ваа маханд̇зна рааж̇аанубхаавзна наг̇арам̣ бад̣̇агкин̣ам̣ агааси. махааж̇ано д̇ад̇т̇а д̇ад̇т̇а тад̇ваа ман̇г̇алахад̇т̇ино руубасобхаг̇г̇аббад̇д̇ам̣ сарийрам̣ д̣̇исваа ‘‘ахо руубам̣, ахо г̇ад̇и, ахо лийл̣аа, ахо лагкан̣асамбад̇д̇и, зваруубо наама саб̣б̣асзд̇аваравааран̣о жаггавад̇д̇иран̃н̃о анужчавиго’’д̇и ман̇г̇алахад̇т̇имзва ван̣н̣зси.
Atīte magadharaṭṭhe rājagahanagare ekasmiṃ magadharāje rajjaṃ kārente bodhisatto hatthiyoniyaṃ nibbattitvā sabbaseto ahosi heṭṭhā vaṇṇitasadisāya rūpasampattiyā samannāgato. Atha naṃ ‘‘lakkhaṇasampanno aya’’nti so rājā maṅgalahatthiṃ akāsi. Athekasmiṃ chaṇadivase sakalanagaraṃ devanagaraṃ viya alaṅkārāpetvā sabbālaṅkārapaṭimaṇḍitaṃ maṅgalahatthiṃ abhiruhitvā mahantena rājānubhāvena nagaraṃ padakkhiṇaṃ akāsi. Mahājano tattha tattha ṭhatvā maṅgalahatthino rūpasobhaggappattaṃ sarīraṃ disvā ‘‘aho rūpaṃ, aho gati, aho līḷā, aho lakkhaṇasampatti, evarūpo nāma sabbasetavaravāraṇo cakkavattirañño anucchaviko’’ti maṅgalahatthimeva vaṇṇesi.
рааж̇аа ман̇г̇алахад̇т̇исса ван̣н̣ам̣ суд̇ваа сахид̇ум̣ асаггонд̇о усууяам̣ уббаад̣̇зд̇ваа ‘‘аж̇ж̇зва д̇ам̣ баб̣б̣ад̇абаад̣̇з баад̇зд̇ваа ж̇ийвид̇агкаяам̣ баабзссаамий’’д̇и хад̇т̇аажарияам̣ баггосаабзд̇ваа ‘‘гинд̇и гад̇ваа д̇аяаа аяам̣ нааг̇о сигкаабид̇о’’д̇и ааха. ‘‘сусигкаабид̇о, д̣̇зваа’’д̇и. ‘‘на сусигкид̇о, д̣̇усигкид̇о’’д̇и. ‘‘сусигкид̇о, д̣̇зваа’’д̇и. ‘‘яад̣̇и сусигкид̇о , сагкиссаси нам̣ взбуллабаб̣б̣ад̇амад̇т̇агам̣ ааробзд̇у’’нд̇и. ‘‘аама, д̣̇зваа’’д̇и. ‘‘д̇зна хи зхий’’д̇и саяам̣ од̇арид̇ваа хад̇т̇аажарияам̣ ааробзд̇ваа баб̣б̣ад̇абаад̣̇ам̣ г̇анд̇ваа хад̇т̇аажариязна хад̇т̇ибидтияам̣ нисийд̣̇ид̇ваава хад̇т̇имхи взбуллабаб̣б̣ад̇амад̇т̇агам̣ ааробид̇з саяамби амажжаг̇ан̣абаривуд̇о баб̣б̣ад̇амад̇т̇агам̣ абхирухид̇ваа хад̇т̇им̣ бабаад̇аабхимукам̣ гаарзд̇ваа ‘‘д̇вам̣ ‘маяаа зса сусигкаабид̇о’д̇и вад̣̇зси, д̇ийхиязва д̇аава нам̣ баад̣̇зхи табзхий’’д̇и ааха. хад̇т̇аажарияо бидтияам̣ нисийд̣̇ид̇ваава ‘‘бхо д̇ийхи баад̣̇зхи д̇идтаа’’д̇и хад̇т̇исса бан̣хигааяа сан̃н̃ам̣ ад̣̇ааси, махаасад̇д̇о д̇ат̇аа агааси. буна рааж̇аа ‘‘д̣̇вийхи буримабаад̣̇зхиязва табзхий’’д̇и ааха, махаасад̇д̇о д̣̇вз бажчимабаад̣̇з угкибид̇ваа буримабаад̣̇зхи адтааси. ‘‘бажчимабаад̣̇зхиязваа’’д̇и вуд̇д̇зби д̣̇вз буримабаад̣̇з угкибид̇ваа бажчимабаад̣̇зхи адтааси, ‘‘згзнаа’’д̇и вуд̇д̇зби д̇аяо баад̣̇з угкибид̇ваа згзнзва адтааси. ат̇асса абад̇анабхаавам̣ н̃ад̇ваа ‘‘сажз бахоси, аагаасз нам̣ табзхий’’д̇и ааха.
Rājā maṅgalahatthissa vaṇṇaṃ sutvā sahituṃ asakkonto usūyaṃ uppādetvā ‘‘ajjeva taṃ pabbatapāde pātetvā jīvitakkhayaṃ pāpessāmī’’ti hatthācariyaṃ pakkosāpetvā ‘‘kinti katvā tayā ayaṃ nāgo sikkhāpito’’ti āha. ‘‘Susikkhāpito, devā’’ti. ‘‘Na susikkhito, dusikkhito’’ti. ‘‘Susikkhito, devā’’ti. ‘‘Yadi susikkhito , sakkhissasi naṃ vepullapabbatamatthakaṃ āropetu’’nti. ‘‘Āma, devā’’ti. ‘‘Tena hi ehī’’ti sayaṃ otaritvā hatthācariyaṃ āropetvā pabbatapādaṃ gantvā hatthācariyena hatthipiṭṭhiyaṃ nisīditvāva hatthimhi vepullapabbatamatthakaṃ āropite sayampi amaccagaṇaparivuto pabbatamatthakaṃ abhiruhitvā hatthiṃ papātābhimukhaṃ kāretvā ‘‘tvaṃ ‘mayā esa susikkhāpito’ti vadesi, tīhiyeva tāva naṃ pādehi ṭhapehī’’ti āha. Hatthācariyo piṭṭhiyaṃ nisīditvāva ‘‘bho tīhi pādehi tiṭṭhā’’ti hatthissa paṇhikāya saññaṃ adāsi, mahāsatto tathā akāsi. Puna rājā ‘‘dvīhi purimapādehiyeva ṭhapehī’’ti āha, mahāsatto dve pacchimapāde ukkhipitvā purimapādehi aṭṭhāsi. ‘‘Pacchimapādehiyevā’’ti vuttepi dve purimapāde ukkhipitvā pacchimapādehi aṭṭhāsi, ‘‘ekenā’’ti vuttepi tayo pāde ukkhipitvā ekeneva aṭṭhāsi. Athassa apatanabhāvaṃ ñatvā ‘‘sace pahosi, ākāse naṃ ṭhapehī’’ti āha.
аажарияо жинд̇зси – ‘‘сагалаж̇амб̣уд̣̇ийбз иминаа сад̣̇исо сусигкид̇о хад̇т̇ий наама над̇т̇и, ниссам̣саяам̣ банзд̇ам̣ зса бабаад̇з баад̇зд̇ваа маарзд̇угаамо бхависсад̇ий’’д̇и. со д̇асса ган̣н̣амуулз манд̇зси ‘‘д̇аад̇а, аяам̣ рааж̇аа д̇ам̣ бабаад̇з баад̇зд̇ваа маарзд̇угаамо, на д̇вам̣ зд̇асса анужчавиго. сажз д̇з аагаасзна г̇анд̇ум̣ б̣алам̣ ад̇т̇и, мам̣ яат̇аанисиннам̣язва аад̣̇ааяа взхаасам̣ аб̣бхуг̇г̇анд̇ваа б̣аараан̣асим̣ г̇ажчаа’’д̇и. бун̃н̃ид̣̇д̇хияаа саманнааг̇ад̇о махаасад̇д̇о д̇ан̇кан̣ан̃н̃зва аагаасз адтааси. хад̇т̇аажарияо ‘‘махаарааж̇а, аяам̣ хад̇т̇ий бун̃н̃ид̣̇д̇хияаа саманнааг̇ад̇о, на д̇аад̣̇исасса манд̣̇абун̃н̃асса д̣̇уб̣б̣уд̣̇д̇хино анужчавиго, бан̣д̣ид̇асса бун̃н̃асамбаннасса ран̃н̃о анужчавиго, д̇аад̣̇исаа наама манд̣̇абун̃н̃аа зваруубам̣ вааханам̣ лабхид̇ваа д̇асса г̇ун̣ам̣ аж̇аананд̇аа д̇ан̃жзва вааханам̣ авасзсан̃жа яасасамбад̇д̇им̣ наасзнд̇иязваа’’д̇и вад̇ваа хад̇т̇игканд̇хз нисиннова имам̣ г̇аат̇амааха –
Ācariyo cintesi – ‘‘sakalajambudīpe iminā sadiso susikkhito hatthī nāma natthi, nissaṃsayaṃ panetaṃ esa papāte pātetvā māretukāmo bhavissatī’’ti. So tassa kaṇṇamūle mantesi ‘‘tāta, ayaṃ rājā taṃ papāte pātetvā māretukāmo, na tvaṃ etassa anucchaviko. Sace te ākāsena gantuṃ balaṃ atthi, maṃ yathānisinnaṃyeva ādāya vehāsaṃ abbhuggantvā bārāṇasiṃ gacchā’’ti. Puññiddhiyā samannāgato mahāsatto taṅkhaṇaññeva ākāse aṭṭhāsi. Hatthācariyo ‘‘mahārāja, ayaṃ hatthī puññiddhiyā samannāgato, na tādisassa mandapuññassa dubbuddhino anucchaviko, paṇḍitassa puññasampannassa rañño anucchaviko, tādisā nāma mandapuññā evarūpaṃ vāhanaṃ labhitvā tassa guṇaṃ ajānantā tañceva vāhanaṃ avasesañca yasasampattiṃ nāsentiyevā’’ti vatvā hatthikkhandhe nisinnova imaṃ gāthamāha –
122.
122.
‘‘яасам̣ лад̣̇д̇хаана д̣̇уммзд̇хо, анад̇т̇ам̣ жарад̇и ад̇д̇ано;
‘‘Yasaṃ laddhāna dummedho, anatthaṃ carati attano;
ад̇д̇ано жа барзсан̃жа, хим̣сааяа бадибаж̇ж̇ад̇ий’’д̇и.
Attano ca paresañca, hiṃsāya paṭipajjatī’’ti.
д̇ад̇рааяам̣ сан̇кзбад̇т̇о – махаарааж̇а, д̇аад̣̇исо д̣̇уммзд̇хо ниббан̃н̃о буг̇г̇ало бариваарасамбад̇д̇им̣ лабхид̇ваа ад̇д̇ано анад̇т̇ам̣ жарад̇и. гим̣гааран̣аа? со хи яасамад̣̇амад̇д̇о гад̇д̇аб̣б̣аагад̇д̇аб̣б̣ам̣ аж̇аананд̇о ад̇д̇ано жа барзсан̃жа хим̣сааяа бадибаж̇ж̇ад̇и. хим̣саа вужжад̇и гиламанам̣ д̣̇угкуббаад̣̇анам̣, д̇ад̣̇ад̇т̇ааяа зва бадибаж̇ж̇ад̇ийд̇и.
Tatrāyaṃ saṅkhepattho – mahārāja, tādiso dummedho nippañño puggalo parivārasampattiṃ labhitvā attano anatthaṃ carati. Kiṃkāraṇā? So hi yasamadamatto kattabbākattabbaṃ ajānanto attano ca paresañca hiṃsāya paṭipajjati. Hiṃsā vuccati kilamanaṃ dukkhuppādanaṃ, tadatthāya eva paṭipajjatīti.
звам̣ имааяа г̇аат̇ааяа ран̃н̃о д̇хаммам̣ д̣̇зсзд̇ваа ‘‘д̇идта д̣̇аани д̇ва’’нд̇и вад̇ваа аагаасз уббад̇ид̇ваа б̣аараан̣асинаг̇арам̣ г̇анд̇ваа рааж̇ан̇г̇ан̣з аагаасз адтааси. сагаланаг̇арам̣ сан̇кубхид̇ваа ‘‘амхаагам̣ ран̃н̃о аагаасзна сзд̇аваравааран̣о ааг̇анд̇ваа рааж̇ан̇г̇ан̣з тид̇о’’д̇и згаголаахалам̣ ахоси. взг̇зна ран̃н̃оби аарожзсум̣. рааж̇аа нигкамид̇ваа ‘‘сажз маяхам̣ убабхог̇ад̇т̇ааяа ааг̇ад̇оси, бхуумияам̣ бад̇идтаахий’’д̇и ааха. б̣од̇хисад̇д̇о бхуумияам̣ бад̇идтааси, аажарияо од̇арид̇ваа рааж̇аанам̣ ванд̣̇ид̇ваа ‘‘гуд̇о ааг̇ад̇оси, д̇аад̇аа’’д̇и вуд̇д̇з ‘‘рааж̇аг̇ахад̇о’’д̇и вад̇ваа саб̣б̣ам̣ бавад̇д̇им̣ аарожзси. рааж̇аа ‘‘манаабам̣ д̇з, д̇аад̇а, гад̇ам̣ ид̇хааг̇ажчанд̇знаа’’д̇и д̇удтахадто наг̇арам̣ саж̇ж̇аабзд̇ваа вааран̣ам̣ ман̇г̇алахад̇т̇идтаанз табзд̇ваа сагалараж̇ж̇ам̣ д̇аяо годтаасз гад̇ваа згам̣ б̣од̇хисад̇д̇асса ад̣̇ааси, згам̣ аажарияасса, згам̣ ад̇д̇анаа аг̇г̇ахзси. б̣од̇хисад̇д̇асса ааг̇ад̇агаалад̇о бадтааязва бана ран̃н̃о сагалаж̇амб̣уд̣̇ийбз раж̇ж̇ам̣ хад̇т̇аг̇ад̇амзва ж̇аад̇ам̣. со ж̇амб̣уд̣̇ийбз аг̇г̇арааж̇аа худ̇ваа д̣̇аанаад̣̇ийни бун̃н̃аани гад̇ваа яат̇аагаммам̣ аг̇амааси.
Evaṃ imāya gāthāya rañño dhammaṃ desetvā ‘‘tiṭṭha dāni tva’’nti vatvā ākāse uppatitvā bārāṇasinagaraṃ gantvā rājaṅgaṇe ākāse aṭṭhāsi. Sakalanagaraṃ saṅkhubhitvā ‘‘amhākaṃ rañño ākāsena setavaravāraṇo āgantvā rājaṅgaṇe ṭhito’’ti ekakolāhalaṃ ahosi. Vegena raññopi ārocesuṃ. Rājā nikkhamitvā ‘‘sace mayhaṃ upabhogatthāya āgatosi, bhūmiyaṃ patiṭṭhāhī’’ti āha. Bodhisatto bhūmiyaṃ patiṭṭhāsi, ācariyo otaritvā rājānaṃ vanditvā ‘‘kuto āgatosi, tātā’’ti vutte ‘‘rājagahato’’ti vatvā sabbaṃ pavattiṃ ārocesi. Rājā ‘‘manāpaṃ te, tāta, kataṃ idhāgacchantenā’’ti tuṭṭhahaṭṭho nagaraṃ sajjāpetvā vāraṇaṃ maṅgalahatthiṭṭhāne ṭhapetvā sakalarajjaṃ tayo koṭṭhāse katvā ekaṃ bodhisattassa adāsi, ekaṃ ācariyassa, ekaṃ attanā aggahesi. Bodhisattassa āgatakālato paṭṭhāyeva pana rañño sakalajambudīpe rajjaṃ hatthagatameva jātaṃ. So jambudīpe aggarājā hutvā dānādīni puññāni katvā yathākammaṃ agamāsi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа маг̇ад̇харааж̇аа д̣̇звад̣̇ад̇д̇о ахоси, б̣аараан̣асирааж̇аа саарибуд̇д̇о, хад̇т̇аажарияо аананд̣̇о, хад̇т̇ий бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā magadharājā devadatto ahosi, bārāṇasirājā sāriputto, hatthācariyo ānando, hatthī pana ahameva ahosi’’nti.
д̣̇уммзд̇хаж̇аад̇агаван̣н̣анаа д̣̇уд̇ияаа.
Dummedhajātakavaṇṇanā dutiyā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 122. д̣̇уммзд̇хаж̇аад̇агам̣ • 122. Dummedhajātakaṃ
