| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. து³ஸ்ஸதா³யகத்தே²ரஅபதா³னவண்ணனா
8. Dussadāyakattheraapadānavaṇṇanā
திவராயங் புரே ரம்மேதிஆதி³கங் ஆயஸ்மதோ து³ஸ்ஸதா³யகத்தே²ரஸ்ஸ அபதா³னங். அயம்பாயஸ்மா புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே ராஜகுலே நிப்³ப³த்தோ வுத்³தி⁴ப்பத்தகாலே யுவராஜபா⁴வங் பத்வா பாகடோ ஏகங் ஜனபத³ங் லபி⁴த்வா தத்ராதி⁴பதிபூ⁴தோ ஸகலஜனபத³வாஸினோ தா³னபியவசனஅத்த²சரியாஸமானத்த²தாஸங்கா²தேஹி சதூஹி ஸங்க³ஹவத்தூ²ஹி ஸங்க³ண்ஹாதி. தஸ்மிங் ஸமயே ஸித்³த⁴த்தோ² ப⁴க³வா தங் ஜனபத³ங் ஸம்பாபுணி. அத² ஸோ யுவராஜா பண்ணாகாரங் லபி⁴த்வா தத்த² ஸுகு²மவத்தே²ன ப⁴க³வந்தங் பூஜேஸி. ப⁴க³வா தங் வத்த²ங் ஹத்தே²ன பராமஸித்வா ஆகாஸங் பக்க²ந்தி³. தம்பி வத்த²ங் ப⁴க³வந்தமேவ அனுப³ந்தி⁴. அத² ஸோ யுவராஜா தங் அச்ச²ரியங் தி³ஸ்வா அதீவ பஸன்னோ அஞ்ஜலிங் பக்³க³ய்ஹ அட்டா²ஸி. ப⁴க³வதோ ஸம்பத்தஸம்பத்தட்டா²னே ஸப்³பே³ ஜனா தங் அச்ச²ரியங் தி³ஸ்வா அச்ச²ரியப்³பு⁴தசித்தா அஞ்ஜலிங் பக்³க³ய்ஹ அட்ட²ங்ஸு. ப⁴க³வா விஹாரமேவ அக³மாஸி. யுவராஜா தேனேவ குஸலகம்மேன ததோ சுதோ தே³வலோகே உப்பன்னோ தத்த² தி³ப்³ப³ஸம்பத்திங் அனுப⁴வித்வா மனுஸ்ஸேஸு சக்கவத்திஆதி³ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலே நிப்³ப³த்தோ விஞ்ஞுதங் பத்தோ க⁴ராவாஸங் ஸண்ட²பெத்வா ரதனத்தயே பஸன்னோ ப⁴க³வதோ த⁴ம்மதே³ஸனங் ஸுத்வா படிலத்³த⁴ஸத்³தோ⁴ பப்³ப³ஜித்வா வாயமந்தோ நசிரஸ்ஸேவ அரஹா அஹோஸி.
Tivarāyaṃpure rammetiādikaṃ āyasmato dussadāyakattherassa apadānaṃ. Ayampāyasmā purimajinavaresu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle rājakule nibbatto vuddhippattakāle yuvarājabhāvaṃ patvā pākaṭo ekaṃ janapadaṃ labhitvā tatrādhipatibhūto sakalajanapadavāsino dānapiyavacanaatthacariyāsamānatthatāsaṅkhātehi catūhi saṅgahavatthūhi saṅgaṇhāti. Tasmiṃ samaye siddhattho bhagavā taṃ janapadaṃ sampāpuṇi. Atha so yuvarājā paṇṇākāraṃ labhitvā tattha sukhumavatthena bhagavantaṃ pūjesi. Bhagavā taṃ vatthaṃ hatthena parāmasitvā ākāsaṃ pakkhandi. Tampi vatthaṃ bhagavantameva anubandhi. Atha so yuvarājā taṃ acchariyaṃ disvā atīva pasanno añjaliṃ paggayha aṭṭhāsi. Bhagavato sampattasampattaṭṭhāne sabbe janā taṃ acchariyaṃ disvā acchariyabbhutacittā añjaliṃ paggayha aṭṭhaṃsu. Bhagavā vihārameva agamāsi. Yuvarājā teneva kusalakammena tato cuto devaloke uppanno tattha dibbasampattiṃ anubhavitvā manussesu cakkavattiādisampattiyo anubhavitvā imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā ratanattaye pasanno bhagavato dhammadesanaṃ sutvā paṭiladdhasaddho pabbajitvā vāyamanto nacirasseva arahā ahosi.
38. ஸோ ஏகதி³வஸங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ திவராயங் புரே ரம்மேதிஆதி³மாஹ. தத்த² திவரனாமகே நக³ரே ரமணீயே அஹங் ராஜபுத்தோ ஹுத்வா ஸித்³த⁴த்த²ங் ப⁴க³வந்தங் வத்தே²ன பூஜேஸிந்தி அத்தோ². ஸேஸங் ஸுவிஞ்ஞெய்யமேவாதி.
38. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento tivarāyaṃ pure rammetiādimāha. Tattha tivaranāmake nagare ramaṇīye ahaṃ rājaputto hutvā siddhatthaṃ bhagavantaṃ vatthena pūjesinti attho. Sesaṃ suviññeyyamevāti.
து³ஸ்ஸதா³யகத்தே²ரஅபதா³னவண்ணனா ஸமத்தா.
Dussadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. து³ஸ்ஸதா³யகத்தே²ரஅபதா³னங் • 8. Dussadāyakattheraapadānaṃ
