| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৮. দুস্সদাযকত্থেরঅপদানৰণ্ণনা
8. Dussadāyakattheraapadānavaṇṇanā
তিৰরাযং পুরে রম্মেতিআদিকং আযস্মতো দুস্সদাযকত্থেরস্স অপদানং। অযম্পাযস্মা পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে রাজকুলে নিব্বত্তো ৰুদ্ধিপ্পত্তকালে যুৰরাজভাৰং পত্ৰা পাকটো একং জনপদং লভিত্ৰা তত্রাধিপতিভূতো সকলজনপদৰাসিনো দানপিযৰচনঅত্থচরিযাসমানত্থতাসঙ্খাতেহি চতূহি সঙ্গহৰত্থূহি সঙ্গণ্হাতি। তস্মিং সমযে সিদ্ধত্থো ভগৰা তং জনপদং সম্পাপুণি। অথ সো যুৰরাজা পণ্ণাকারং লভিত্ৰা তত্থ সুখুমৰত্থেন ভগৰন্তং পূজেসি। ভগৰা তং ৰত্থং হত্থেন পরামসিত্ৰা আকাসং পক্খন্দি। তম্পি ৰত্থং ভগৰন্তমেৰ অনুবন্ধি। অথ সো যুৰরাজা তং অচ্ছরিযং দিস্ৰা অতীৰ পসন্নো অঞ্জলিং পগ্গয্হ অট্ঠাসি। ভগৰতো সম্পত্তসম্পত্তট্ঠানে সব্বে জনা তং অচ্ছরিযং দিস্ৰা অচ্ছরিযব্ভুতচিত্তা অঞ্জলিং পগ্গয্হ অট্ঠংসু। ভগৰা ৰিহারমেৰ অগমাসি। যুৰরাজা তেনেৰ কুসলকম্মেন ততো চুতো দেৰলোকে উপ্পন্নো তত্থ দিব্বসম্পত্তিং অনুভৰিত্ৰা মনুস্সেসু চক্কৰত্তিআদিসম্পত্তিযো অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা রতনত্তযে পসন্নো ভগৰতো ধম্মদেসনং সুত্ৰা পটিলদ্ধসদ্ধো পব্বজিত্ৰা ৰাযমন্তো নচিরস্সেৰ অরহা অহোসি।
Tivarāyaṃpure rammetiādikaṃ āyasmato dussadāyakattherassa apadānaṃ. Ayampāyasmā purimajinavaresu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle rājakule nibbatto vuddhippattakāle yuvarājabhāvaṃ patvā pākaṭo ekaṃ janapadaṃ labhitvā tatrādhipatibhūto sakalajanapadavāsino dānapiyavacanaatthacariyāsamānatthatāsaṅkhātehi catūhi saṅgahavatthūhi saṅgaṇhāti. Tasmiṃ samaye siddhattho bhagavā taṃ janapadaṃ sampāpuṇi. Atha so yuvarājā paṇṇākāraṃ labhitvā tattha sukhumavatthena bhagavantaṃ pūjesi. Bhagavā taṃ vatthaṃ hatthena parāmasitvā ākāsaṃ pakkhandi. Tampi vatthaṃ bhagavantameva anubandhi. Atha so yuvarājā taṃ acchariyaṃ disvā atīva pasanno añjaliṃ paggayha aṭṭhāsi. Bhagavato sampattasampattaṭṭhāne sabbe janā taṃ acchariyaṃ disvā acchariyabbhutacittā añjaliṃ paggayha aṭṭhaṃsu. Bhagavā vihārameva agamāsi. Yuvarājā teneva kusalakammena tato cuto devaloke uppanno tattha dibbasampattiṃ anubhavitvā manussesu cakkavattiādisampattiyo anubhavitvā imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā ratanattaye pasanno bhagavato dhammadesanaṃ sutvā paṭiladdhasaddho pabbajitvā vāyamanto nacirasseva arahā ahosi.
৩৮. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো তিৰরাযং পুরে রম্মেতিআদিমাহ। তত্থ তিৰরনামকে নগরে রমণীযে অহং রাজপুত্তো হুত্ৰা সিদ্ধত্থং ভগৰন্তং ৰত্থেন পূজেসিন্তি অত্থো। সেসং সুৰিঞ্ঞেয্যমেৰাতি।
38. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento tivarāyaṃ pure rammetiādimāha. Tattha tivaranāmake nagare ramaṇīye ahaṃ rājaputto hutvā siddhatthaṃ bhagavantaṃ vatthena pūjesinti attho. Sesaṃ suviññeyyamevāti.
দুস্সদাযকত্থেরঅপদানৰণ্ণনা সমত্তা।
Dussadāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৮. দুস্সদাযকত্থেরঅপদানং • 8. Dussadāyakattheraapadānaṃ
