| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၈. ဒုသ္သဒာယကတ္ထေရအပဒာနဝဏ္ဏနာ
8. Dussadāyakattheraapadānavaṇṇanā
တိဝရာယံ ပုရေ ရမ္မေတိအာဒိကံ အာယသ္မတော ဒုသ္သဒာယကတ္ထေရသ္သ အပဒာနံ။ အယမ္ပာယသ္မာ ပုရိမဇိနဝရေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော သိဒ္ဓတ္ထသ္သ ဘဂဝတော ကာလေ ရာဇကုလေ နိဗ္ဗတ္တော ဝုဒ္ဓိပ္ပတ္တကာလေ ယုဝရာဇဘာဝံ ပတ္ဝာ ပာကဋော ဧကံ ဇနပဒံ လဘိတ္ဝာ တတ္ရာဓိပတိဘူတော သကလဇနပဒဝာသိနော ဒာနပိယဝစနအတ္ထစရိယာသမာနတ္ထတာသင္ခာတေဟိ စတူဟိ သင္ဂဟဝတ္ထူဟိ သင္ဂဏ္ဟာတိ။ တသ္မိံ သမယေ သိဒ္ဓတ္ထော ဘဂဝာ တံ ဇနပဒံ သမ္ပာပုဏိ။ အထ သော ယုဝရာဇာ ပဏ္ဏာကာရံ လဘိတ္ဝာ တတ္ထ သုခုမဝတ္ထေန ဘဂဝန္တံ ပူဇေသိ။ ဘဂဝာ တံ ဝတ္ထံ ဟတ္ထေန ပရာမသိတ္ဝာ အာကာသံ ပက္ခန္ဒိ။ တမ္ပိ ဝတ္ထံ ဘဂဝန္တမေဝ အနုဗန္ဓိ။ အထ သော ယုဝရာဇာ တံ အစ္ဆရိယံ ဒိသ္ဝာ အတီဝ ပသန္နော အဉ္ဇလိံ ပဂ္ဂယ္ဟ အဋ္ဌာသိ။ ဘဂဝတော သမ္ပတ္တသမ္ပတ္တဋ္ဌာနေ သဗ္ဗေ ဇနာ တံ အစ္ဆရိယံ ဒိသ္ဝာ အစ္ဆရိယဗ္ဘုတစိတ္တာ အဉ္ဇလိံ ပဂ္ဂယ္ဟ အဋ္ဌံသု။ ဘဂဝာ ဝိဟာရမေဝ အဂမာသိ။ ယုဝရာဇာ တေနေဝ ကုသလကမ္မေန တတော စုတော ဒေဝလောကေ ဥပ္ပန္နော တတ္ထ ဒိဗ္ဗသမ္ပတ္တိံ အနုဘဝိတ္ဝာ မနုသ္သေသု စက္ကဝတ္တိအာဒိသမ္ပတ္တိယော အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဝိဘဝသမ္ပန္နေ ဧကသ္မိံ ကုလေ နိဗ္ဗတ္တော ဝိညုတံ ပတ္တော ဃရာဝာသံ သဏ္ဌပေတ္ဝာ ရတနတ္တယေ ပသန္နော ဘဂဝတော ဓမ္မဒေသနံ သုတ္ဝာ ပဋိလဒ္ဓသဒ္ဓော ပဗ္ဗဇိတ္ဝာ ဝာယမန္တော နစိရသ္သေဝ အရဟာ အဟောသိ။
Tivarāyaṃpure rammetiādikaṃ āyasmato dussadāyakattherassa apadānaṃ. Ayampāyasmā purimajinavaresu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle rājakule nibbatto vuddhippattakāle yuvarājabhāvaṃ patvā pākaṭo ekaṃ janapadaṃ labhitvā tatrādhipatibhūto sakalajanapadavāsino dānapiyavacanaatthacariyāsamānatthatāsaṅkhātehi catūhi saṅgahavatthūhi saṅgaṇhāti. Tasmiṃ samaye siddhattho bhagavā taṃ janapadaṃ sampāpuṇi. Atha so yuvarājā paṇṇākāraṃ labhitvā tattha sukhumavatthena bhagavantaṃ pūjesi. Bhagavā taṃ vatthaṃ hatthena parāmasitvā ākāsaṃ pakkhandi. Tampi vatthaṃ bhagavantameva anubandhi. Atha so yuvarājā taṃ acchariyaṃ disvā atīva pasanno añjaliṃ paggayha aṭṭhāsi. Bhagavato sampattasampattaṭṭhāne sabbe janā taṃ acchariyaṃ disvā acchariyabbhutacittā añjaliṃ paggayha aṭṭhaṃsu. Bhagavā vihārameva agamāsi. Yuvarājā teneva kusalakammena tato cuto devaloke uppanno tattha dibbasampattiṃ anubhavitvā manussesu cakkavattiādisampattiyo anubhavitvā imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā ratanattaye pasanno bhagavato dhammadesanaṃ sutvā paṭiladdhasaddho pabbajitvā vāyamanto nacirasseva arahā ahosi.
၃၈. သော ဧကဒိဝသံ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော တိဝရာယံ ပုရေ ရမ္မေတိအာဒိမာဟ။ တတ္ထ တိဝရနာမကေ နဂရေ ရမဏီယေ အဟံ ရာဇပုတ္တော ဟုတ္ဝာ သိဒ္ဓတ္ထံ ဘဂဝန္တံ ဝတ္ထေန ပူဇေသိန္တိ အတ္ထော။ သေသံ သုဝိညေယ္ယမေဝာတိ။
38. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento tivarāyaṃ pure rammetiādimāha. Tattha tivaranāmake nagare ramaṇīye ahaṃ rājaputto hutvā siddhatthaṃ bhagavantaṃ vatthena pūjesinti attho. Sesaṃ suviññeyyamevāti.
ဒုသ္သဒာယကတ္ထေရအပဒာနဝဏ္ဏနာ သမတ္တာ။
Dussadāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၈. ဒုသ္သဒာယကတ္ထေရအပဒာနံ • 8. Dussadāyakattheraapadānaṃ
