| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. දුස්‌සීලපඤ්‌හො
8. Dussīlapañho
8. ‘‘භන්‌තෙ නාගසෙන, ගිහිදුස්‌සීලස්‌ස ච සමණදුස්‌සීලස්‌ස ච කො විසෙසො, කිං නානාකරණං, උභොපෙතෙ සමසමගතිකා, උභින්‌නම්‌පි සමසමො විපාකො හොති, උදාහු කිඤ්‌චි නානාකාරණං අත්‌ථී’’ති?
8. ‘‘Bhante nāgasena, gihidussīlassa ca samaṇadussīlassa ca ko viseso, kiṃ nānākaraṇaṃ, ubhopete samasamagatikā, ubhinnampi samasamo vipāko hoti, udāhu kiñci nānākāraṇaṃ atthī’’ti?
‘‘දස යිමෙ, මහාරාජ, ගුණා සමණදුස්‌සීලස්‌ස ගිහිදුස්‌සීලතො විසෙසෙන අතිරෙකා, දසහි ච කාරණෙහි උත්‌තරිං දක්‌ඛිණං විසොධෙති.
‘‘Dasa yime, mahārāja, guṇā samaṇadussīlassa gihidussīlato visesena atirekā, dasahi ca kāraṇehi uttariṃ dakkhiṇaṃ visodheti.
‘‘කතමෙ දස ගුණා සමණදුස්‌සීලස්‌ස ගිහිදුස්‌සීලතො විසෙසෙන අතිරෙකා? ඉධ, මහාරාජ, සමණදුස්‌සීලො බුද්‌ධෙ සගාරවො හොති, ධම්‌මෙ සගාරවො හොති, සඞ්‌ඝෙ සගාරවො හොති, සබ්‍රහ්‌මචාරීසු සගාරවො හොති, උද්‌දෙසපරිපුච්‌ඡාය වායමති, සවනබහුලො හොති, භින්‌නසීලොපි, මහාරාජ, දුස්‌සීලො පරිසගතො ආකප්‌පං උපට්‌ඨපෙති, ගරහභයා කායිකං වාචසිකං රක්‌ඛති, පධානාභිමුඛඤ්‌චස්‌ස හොති චිත්‌තං, භික්‌ඛුසාමඤ්‌ඤං උපගතො හොති. කරොන්‌තොපි, මහාරාජ, සමණදුස්‌සීලො පාපං පටිච්‌ඡන්‌නං ආචරති. යථා, මහාරාජ, ඉත්‌ථී සපතිකා නිලීයිත්‌වා රහස්‌සෙනෙව පාපමාචරති; එවමෙව ඛො, මහාරාජ, කරොන්‌තොපි සමණදුස්‌සීලො පාපං පටිච්‌ඡන්‌නං ආචරති. ඉමෙ ඛො, මහාරාජ, දස ගුණා සමණදුස්‌සීලස්‌ස ගිහිදුස්‌සීලතො විසෙසෙන අතිරෙකා.
‘‘Katame dasa guṇā samaṇadussīlassa gihidussīlato visesena atirekā? Idha, mahārāja, samaṇadussīlo buddhe sagāravo hoti, dhamme sagāravo hoti, saṅghe sagāravo hoti, sabrahmacārīsu sagāravo hoti, uddesaparipucchāya vāyamati, savanabahulo hoti, bhinnasīlopi, mahārāja, dussīlo parisagato ākappaṃ upaṭṭhapeti, garahabhayā kāyikaṃ vācasikaṃ rakkhati, padhānābhimukhañcassa hoti cittaṃ, bhikkhusāmaññaṃ upagato hoti. Karontopi, mahārāja, samaṇadussīlo pāpaṃ paṭicchannaṃ ācarati. Yathā, mahārāja, itthī sapatikā nilīyitvā rahasseneva pāpamācarati; evameva kho, mahārāja, karontopi samaṇadussīlo pāpaṃ paṭicchannaṃ ācarati. Ime kho, mahārāja, dasa guṇā samaṇadussīlassa gihidussīlato visesena atirekā.
‘‘කතමෙහි දසහි කාරණෙහි උත්‌තරිං දක්‌ඛිණං විසොධෙති? අනවජ්‌ජකවචධාරණතායපි දක්‌ඛිණං විසොධෙති, ඉසිසාමඤ්‌ඤභණ්‌ඩුලිඞ්‌ගධාරණතොපි දක්‌ඛිණං විසොධෙති, සඞ්‌ඝසමයමනුප්‌පවිට්‌ඨතායපි දක්‌ඛිණං විසොධෙති, බුද්‌ධධම්‌මසඞ්‌ඝසරණගතතායපි දක්‌ඛිණං විසොධෙති, පධානාසයනිකෙතවාසිතායපි දක්‌ඛිණං විසොධෙති, ජිනසාසනධර 1 පරියෙසනතොපි දක්‌ඛිණං විසොධෙති, පවරධම්‌මදෙසනතොපි දක්‌ඛිණං විසොධෙති, ධම්‌මදීපගතිපරායණතායපි දක්‌ඛිණං විසොධෙති, ‘අග්‌ගො බුද්‌ධො’ති එකන්‌තඋජුදිට්‌ඨිතායපි දක්‌ඛිණං විසොධෙති, උපොසථසමාදානතොපි දක්‌ඛිණං විසොධෙති. ඉමෙහි ඛො, මහාරාජ, දසහි කාරණෙහි උත්‌තරිං දක්‌ඛිණං විසොධෙති .
‘‘Katamehi dasahi kāraṇehi uttariṃ dakkhiṇaṃ visodheti? Anavajjakavacadhāraṇatāyapi dakkhiṇaṃ visodheti, isisāmaññabhaṇḍuliṅgadhāraṇatopi dakkhiṇaṃ visodheti, saṅghasamayamanuppaviṭṭhatāyapi dakkhiṇaṃ visodheti, buddhadhammasaṅghasaraṇagatatāyapi dakkhiṇaṃ visodheti, padhānāsayaniketavāsitāyapi dakkhiṇaṃ visodheti, jinasāsanadhara 2 pariyesanatopi dakkhiṇaṃ visodheti, pavaradhammadesanatopi dakkhiṇaṃ visodheti, dhammadīpagatiparāyaṇatāyapi dakkhiṇaṃ visodheti, ‘aggo buddho’ti ekantaujudiṭṭhitāyapi dakkhiṇaṃ visodheti, uposathasamādānatopi dakkhiṇaṃ visodheti. Imehi kho, mahārāja, dasahi kāraṇehi uttariṃ dakkhiṇaṃ visodheti .
‘‘සුවිපන්‌නොපි හි, මහාරාජ, සමණදුස්‌සීලො දායකානං දක්‌ඛිණං විසොධෙති. යථා, මහාරාජ, උදකං සුබහලම්‌පි කලලකද්‌දමරජොජල්‌ලං අපනෙති; එවමෙව ඛො, මහාරාජ, සුවිපන්‌නොපි සමණදුස්‌සීලො දායකානං දක්‌ඛිණං විසොධෙති.
‘‘Suvipannopi hi, mahārāja, samaṇadussīlo dāyakānaṃ dakkhiṇaṃ visodheti. Yathā, mahārāja, udakaṃ subahalampi kalalakaddamarajojallaṃ apaneti; evameva kho, mahārāja, suvipannopi samaṇadussīlo dāyakānaṃ dakkhiṇaṃ visodheti.
‘‘යථා වා පන, මහාරාජ, උණ්‌හොදකං සුකුධිතම්‌පි 3 ජ්‌ජලන්‌තං මහන්‌තං අග්‌ගික්‌ඛන්‌ධං නිබ්‌බාපෙති, එවමෙව ඛො, මහාරාජ, සුවිපන්‌නොපි සමණදුස්‌සීලො දායකානං දක්‌ඛිණං විසොධෙති.
‘‘Yathā vā pana, mahārāja, uṇhodakaṃ sukudhitampi 4 jjalantaṃ mahantaṃ aggikkhandhaṃ nibbāpeti, evameva kho, mahārāja, suvipannopi samaṇadussīlo dāyakānaṃ dakkhiṇaṃ visodheti.
‘‘යථා වා පන, මහාරාජ, භොජනං විරසම්‌පි ඛුදාදුබ්‌බල්‍යං අපනෙති, එවමෙව ඛො, මහාරාජ, සුවිපන්‌නොපි සමණදුස්‌සීලො දායකානං දක්‌ඛිණං විසොධෙති.
‘‘Yathā vā pana, mahārāja, bhojanaṃ virasampi khudādubbalyaṃ apaneti, evameva kho, mahārāja, suvipannopi samaṇadussīlo dāyakānaṃ dakkhiṇaṃ visodheti.
‘‘භාසිතම්‌පෙතං, මහාරාජ, තථාගතෙන දෙවාතිදෙවෙන මජ්‌ඣිමනිකායවරලඤ්‌ඡකෙ දක්‌ඛිණවිභඞ්‌ගෙ වෙය්‍යාකරණෙ –
‘‘Bhāsitampetaṃ, mahārāja, tathāgatena devātidevena majjhimanikāyavaralañchake dakkhiṇavibhaṅge veyyākaraṇe –
‘‘‘යො සීලවා දුස්‌සීලෙසු දදාති දානං, ධම්‌මෙන ලද්‌ධං සුපසන්‌නචිත්‌තො;
‘‘‘Yo sīlavā dussīlesu dadāti dānaṃ, dhammena laddhaṃ supasannacitto;
අභිසද්‌දහං කම්‌මඵලං උළාරං, සා දක්‌ඛිණා දායකතො විසුජ්‌ඣතී’’’ති 5.
Abhisaddahaṃ kammaphalaṃ uḷāraṃ, sā dakkhiṇā dāyakato visujjhatī’’’ti 6.
‘‘අච්‌ඡරියං , භන්‌තෙ නාගසෙන, අබ්‌භුතං, භන්‌තෙ නාගසෙන, තාවතකං මයං පඤ්‌හං අපුච්‌ඡිම්‌හ, තං ත්‌වං ඔපම්‌මෙහි කාරණෙහි විභාවෙන්‌තො අමතමධුරං සවනූපගං අකාසි. යථා නාම, භන්‌තෙ, සූදො වා සූදන්‌තෙවාසී වා තාවතකං මංසං ලභිත්‌වා නානාවිධෙහි සම්‌භාරෙහි සම්‌පාදෙත්‌වා රාජූපභොගං කරොති; එවමෙව ඛො, භන්‌තෙ නාගසෙන, තාවතකං මයං පඤ්‌හං අපුච්‌ඡිම්‌හ, තං ත්‌වං ඔපම්‌මෙහි කාරණෙහි විභාවෙත්‌වා අමතමධුරං සවනූපගං අකාසී’’ති.
‘‘Acchariyaṃ , bhante nāgasena, abbhutaṃ, bhante nāgasena, tāvatakaṃ mayaṃ pañhaṃ apucchimha, taṃ tvaṃ opammehi kāraṇehi vibhāvento amatamadhuraṃ savanūpagaṃ akāsi. Yathā nāma, bhante, sūdo vā sūdantevāsī vā tāvatakaṃ maṃsaṃ labhitvā nānāvidhehi sambhārehi sampādetvā rājūpabhogaṃ karoti; evameva kho, bhante nāgasena, tāvatakaṃ mayaṃ pañhaṃ apucchimha, taṃ tvaṃ opammehi kāraṇehi vibhāvetvā amatamadhuraṃ savanūpagaṃ akāsī’’ti.
දුස්‌සීලපඤ්‌හො අට්‌ඨමො.
Dussīlapañho aṭṭhamo.
Footnotes:
