| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
д̣̇ууд̇агат̇ааван̣н̣анаа
Dūtakathāvaṇṇanā
звам̣ аан̣аабзнд̇асса аажарияасса д̇аава д̣̇уггаданд̇и сажз саа аан̣ад̇д̇и яат̇аад̇хиббааяам̣ на г̇ажчад̇и, аажарияасса аан̣ад̇д̇игкан̣з д̣̇уггадам̣. сажз бана саа аан̣ад̇д̇и яат̇аад̇хиббааяам̣ г̇ажчад̇и, яам̣ барад̇о т̇уллажжаяам̣ вуд̇д̇ам̣, аан̣ад̇д̇игкан̣з д̇ад̣̇зва ход̇и. ат̇а со д̇ам̣ авассам̣ гхаад̇зд̇и, яам̣ барад̇о ‘‘саб̣б̣зсам̣ аабад̇д̇и баарааж̇игассаа’’д̇и вуд̇д̇ам̣, д̇ад̇о имасса д̇ан̇кан̣зязва баарааж̇игам̣ ход̇ийд̇и звамзд̇т̇а ад̇т̇о г̇ахзд̇аб̣б̣о. аажариязна бана хздтаа ад̣̇иннаад̣̇аанагат̇ааяам̣ (баараа. 121) вуд̇д̇анаязнзва аяамад̇т̇о саггаа вин̃н̃аад̇унд̇и ид̇ха на вуд̇д̇о. вуд̇д̇ан̃хи д̇ад̇т̇а ‘‘аабад̇д̇и д̣̇уггадассаад̇и звам̣ аан̣аабзнд̇асса аажарияасса д̇аава д̣̇уггадам̣. сажз бана саа аан̣ад̇д̇и яат̇аад̇хиббааяам̣ г̇ажчад̇и, яам̣ барад̇о т̇уллажжаяам̣ вуд̇д̇ам̣, аан̣ад̇д̇игкан̣з д̇ад̣̇зва ход̇и. ат̇а д̇ам̣ бхан̣д̣ам̣ авассам̣ хаарияам̣ ход̇и, яам̣ барад̇о ‘саб̣б̣зсам̣ аабад̇д̇и баарааж̇игассаа’д̇и вуд̇д̇ам̣, д̇ад̇о имасса д̇ан̇кан̣зязва баарааж̇игам̣ ход̇ийд̇и аяам̣ яуд̇д̇и саб̣б̣ад̇т̇а взд̣̇ид̇аб̣б̣аа’’д̇и. д̇зсамби д̣̇уггаданд̇и аарожанабажжаяаа д̣̇уггадам̣. бадиг̇г̇ахид̇амад̇д̇зд̇и зд̇т̇а авассам̣ жз бадиг̇г̇ан̣хаад̇и, д̇ад̇о буб̣б̣зва аажарияасса т̇уллажжаяам̣, на бана бадиг̇г̇ахид̇зд̇и д̣̇адтаб̣б̣ам̣. гасмаа банасса т̇уллажжаяанд̇и ааха ‘‘махааж̇ано хи д̇зна баабз нияож̇ид̇о’’д̇и.
Evaṃ āṇāpentassa ācariyassa tāva dukkaṭanti sace sā āṇatti yathādhippāyaṃ na gacchati, ācariyassa āṇattikkhaṇe dukkaṭaṃ. Sace pana sā āṇatti yathādhippāyaṃ gacchati, yaṃ parato thullaccayaṃ vuttaṃ, āṇattikkhaṇe tadeva hoti. Atha so taṃ avassaṃ ghāteti, yaṃ parato ‘‘sabbesaṃ āpatti pārājikassā’’ti vuttaṃ, tato imassa taṅkhaṇeyeva pārājikaṃ hotīti evamettha attho gahetabbo. Ācariyena pana heṭṭhā adinnādānakathāyaṃ (pārā. 121) vuttanayeneva ayamattho sakkā viññātunti idha na vutto. Vuttañhi tattha ‘‘āpatti dukkaṭassāti evaṃ āṇāpentassa ācariyassa tāva dukkaṭaṃ. Sace pana sā āṇatti yathādhippāyaṃ gacchati, yaṃ parato thullaccayaṃ vuttaṃ, āṇattikkhaṇe tadeva hoti. Atha taṃ bhaṇḍaṃ avassaṃ hāriyaṃ hoti, yaṃ parato ‘sabbesaṃ āpatti pārājikassā’ti vuttaṃ, tato imassa taṅkhaṇeyeva pārājikaṃ hotīti ayaṃ yutti sabbattha veditabbā’’ti. Tesampi dukkaṭanti ārocanapaccayā dukkaṭaṃ. Paṭiggahitamatteti ettha avassaṃ ce paṭiggaṇhāti, tato pubbeva ācariyassa thullaccayaṃ, na pana paṭiggahiteti daṭṭhabbaṃ. Kasmā panassa thullaccayanti āha ‘‘mahājano hi tena pāpe niyojito’’ti.
мууладтассзва д̣̇уггаданд̇и ид̣̇ам̣ махааадтагат̇ааяам̣ ааг̇ад̇анаяад̣̇ассанамад̇д̇ам̣, на бана д̇ам̣ аажарияасса ад̇хиббзд̇ам̣. д̇знааха ‘‘звам̣ санд̇з’’д̇иаад̣̇и, звам̣ махааадтагат̇ааяам̣ вуд̇д̇анаязна ад̇т̇з сад̇ийд̇и ад̇т̇о. бадиг̇г̇ахан̣з аабад̇д̇иязва на сияаад̇и вад̇хагасса ‘‘саад̇ху судтуу’’д̇и мааран̣абадиг̇г̇ахан̣з д̣̇уггадаабад̇д̇и на сияаа, звам̣ анол̣ааригависаязби д̇аава д̣̇уггадам̣ ход̇и, гиман̇г̇ам̣ бана мааран̣абадиг̇г̇ахан̣зд̇и д̣̇ассанад̇т̇ам̣ сан̃жарид̇д̇абадиг̇г̇ахан̣аад̣̇и нид̣̇ассид̇ам̣. ‘‘ахо вад̇а ид̇т̇аннаамо хад̇о ассаа’’д̇и звам̣ маран̣аабхинанд̣̇анзби д̣̇уггадз сад̇и баг̇зва мааран̣абадиг̇г̇ахан̣зд̇и ад̇хиббааяо. бадиг̇г̇ан̣ханд̇ассзвзд̇ам̣ д̣̇уггаданд̇и авад̇хааран̣зна висан̇гзд̇ад̇д̇аа имасса бадиг̇г̇ахан̣абажжаяаа мууладтасса над̇т̇зва аабад̇д̇ийд̇и д̣̇ассзд̇и. гзжи бана ‘‘ид̇ха вуд̇д̇ад̣̇уггадам̣ бадиг̇г̇ан̣ханд̇ассзваад̇и зд̇д̇агамзва авад̇хааран̣зна д̣̇ассид̇ам̣, на бана мууладтасса махааадтагат̇ааяам̣ вуд̇д̇ад̣̇уггадам̣ бадигкид̇д̇а’’нд̇и вад̣̇анд̇и. буриманаязд̇и самананд̇араад̇ийд̇з ависаггияад̣̇ууд̇анид̣̇д̣̇зсз. зд̇анд̇и д̣̇уггадам̣. яад̣̇и звам̣ гасмаа баал̣ияам̣ на вуд̇д̇анд̇и ааха ‘‘огаасаабхаавзнаа’’д̇и. д̇ад̇т̇а мууладтасса т̇уллажжаяаважанад̇о бадиг̇г̇ан̣ханд̇асса д̣̇уггадам̣ вад̇д̇ум̣ огаасо над̇т̇ийд̇и огаасаабхаавзна на вуд̇д̇ам̣, на бана абхаавад̇од̇и ад̇хиббааяо.
Mūlaṭṭhasseva dukkaṭanti idaṃ mahāaṭṭhakathāyaṃ āgatanayadassanamattaṃ, na pana taṃ ācariyassa adhippetaṃ. Tenāha ‘‘evaṃ sante’’tiādi, evaṃ mahāaṭṭhakathāyaṃ vuttanayena atthe satīti attho. Paṭiggahaṇe āpattiyeva na siyāti vadhakassa ‘‘sādhu suṭṭhū’’ti māraṇapaṭiggahaṇe dukkaṭāpatti na siyā, evaṃ anoḷārikavisayepi tāva dukkaṭaṃ hoti, kimaṅgaṃ pana māraṇapaṭiggahaṇeti dassanatthaṃ sañcarittapaṭiggahaṇādi nidassitaṃ. ‘‘Aho vata itthannāmo hato assā’’ti evaṃ maraṇābhinandanepi dukkaṭe sati pageva māraṇapaṭiggahaṇeti adhippāyo. Paṭiggaṇhantassevetaṃ dukkaṭanti avadhāraṇena visaṅketattā imassa paṭiggahaṇapaccayā mūlaṭṭhassa nattheva āpattīti dasseti. Keci pana ‘‘idha vuttadukkaṭaṃ paṭiggaṇhantassevāti ettakameva avadhāraṇena dassitaṃ, na pana mūlaṭṭhassa mahāaṭṭhakathāyaṃ vuttadukkaṭaṃ paṭikkhitta’’nti vadanti. Purimanayeti samanantarātīte avisakkiyadūtaniddese. Etanti dukkaṭaṃ. Yadi evaṃ kasmā pāḷiyaṃ na vuttanti āha ‘‘okāsābhāvenā’’ti. Tattha mūlaṭṭhassa thullaccayavacanato paṭiggaṇhantassa dukkaṭaṃ vattuṃ okāso natthīti okāsābhāvena na vuttaṃ, na pana abhāvatoti adhippāyo.
аан̣ад̇д̇игкан̣з бут̇уж̇ж̇анод̇и зд̇т̇а анааг̇ад̇з воробзд̇аб̣б̣аж̇ийвид̇инд̣̇рияавасзна ад̇т̇асаад̇хигажзд̇анааяа бавад̇д̇ад̇д̇аа араханд̇агхаад̇аго ж̇аад̇од̇и д̣̇адтаб̣б̣ам̣.
Āṇattikkhaṇeputhujjanoti ettha anāgate voropetabbajīvitindriyavasena atthasādhikacetanāya pavattattā arahantaghātako jātoti daṭṭhabbaṃ.
д̣̇ууд̇агат̇ааван̣н̣анаа нидтид̇аа.
Dūtakathāvaṇṇanā niṭṭhitā.
175. саяам̣ сан̇гхад̇т̇зрад̇д̇аа ‘‘убадтаанагаалз’’д̇и вуд̇д̇ам̣. ваажааяа ваажааяа д̣̇уггаданд̇и ‘‘яо гожи мама важанам̣ суд̇ваа имам̣ д̇хаарзд̇уу’’д̇и иминаа ад̇хиббааязна авад̇ваа гзвалам̣ маран̣аабхинанд̣̇анавасзнзва вуд̇д̇ад̇д̇аа ‘‘жорааби наама д̇ам̣ на хананд̇ий’’д̇иаад̣̇иваажаасуби д̣̇уггадамзва вуд̇д̇ам̣. аяамад̇т̇о зд̇зна вуд̇д̇од̇и яат̇аа со ж̇аанаад̇ийд̇и самб̣анд̇хо. ваагяабхзд̣̇анд̇и важийбхзд̣̇ам̣. д̣̇виннам̣ уд̣̇д̣̇иссаад̇и д̣̇вз уд̣̇д̣̇исса, д̣̇виннам̣ ваа маран̣ам̣ уд̣̇д̣̇исса. убхо уд̣̇д̣̇исса маран̣ам̣ сам̣ван̣н̣знд̇асса жзд̇анааяа згад̇д̇зби ‘‘д̣̇вз баан̣аад̇ибаад̇аа’’д̇и вад̇д̇аб̣б̣абхаавад̇о б̣алавабхаавам̣ аабаж̇ж̇ид̇ваа бадисанд̇хивибаагасамананд̇арам̣ бавад̇д̇ияам̣ анзгаасуби ж̇аад̇ийсу абараабарияажзд̇анаавасзна д̣̇угкуббаад̣̇анад̇о махаавибаагад̇д̇аа ‘‘агусалараасий’’д̇и вуд̇д̇ам̣. б̣ахуу уд̣̇д̣̇исса маран̣асам̣ван̣н̣анзби зсзва наяо.
175. Sayaṃ saṅghattherattā ‘‘upaṭṭhānakāle’’ti vuttaṃ. Vācāya vācāya dukkaṭanti ‘‘yo koci mama vacanaṃ sutvā imaṃ dhāretū’’ti iminā adhippāyena avatvā kevalaṃ maraṇābhinandanavaseneva vuttattā ‘‘corāpi nāma taṃ na hanantī’’tiādivācāsupi dukkaṭameva vuttaṃ. Ayamattho etena vuttoti yathā so jānātīti sambandho. Vākyabhedanti vacībhedaṃ. Dvinnaṃ uddissāti dve uddissa, dvinnaṃ vā maraṇaṃ uddissa. Ubho uddissa maraṇaṃ saṃvaṇṇentassa cetanāya ekattepi ‘‘dve pāṇātipātā’’ti vattabbabhāvato balavabhāvaṃ āpajjitvā paṭisandhivipākasamanantaraṃ pavattiyaṃ anekāsupi jātīsu aparāpariyacetanāvasena dukkhuppādanato mahāvipākattā ‘‘akusalarāsī’’ti vuttaṃ. Bahū uddissa maraṇasaṃvaṇṇanepi eseva nayo.
званд̇и ‘‘сийсам̣ ваа чинд̣̇ид̇ваа бабаад̇з ваа бабад̇ид̇ваа’’д̇иаад̣̇инаа. аарожид̇амад̇д̇зд̇и вуд̇д̇амад̇д̇з. яат̇аа арияамаг̇г̇агкан̣з жад̇д̇ааро сад̇ибадтаанаа жад̇д̇ааро саммаббад̇хаанаа жа гижжавасзна иж̇жханд̇и, звам̣ жзд̇анааяа згад̇д̇зби гижжавасзна анзгаа баан̣аад̇ибаад̇аа иж̇жханд̇ийд̇и ааха ‘‘д̇ад̇д̇агаа баан̣аад̇ибаад̇аа’’д̇и. яат̇аа хи ад̇д̇аанам̣ сад̇ам̣ гад̇ваа д̣̇ассзд̇угаамасса ‘‘сад̇ам̣ хоми сад̇ам̣ хомий’’д̇и гад̇абаригаммавасзна лад̣̇д̇хабажжуббаннабарид̇д̇аарамман̣ам̣ абхин̃н̃аажид̇д̇ам̣ сад̇анд̇ог̇ад̇хаанам̣ ван̣н̣зсу згасса ван̣н̣ам̣ аарамман̣ам̣ гад̇вааби сад̇ам̣ нибпаад̣̇зд̇и, яат̇аа жа згасса маран̣з бавад̇д̇амаанааби вад̇хагажзд̇анаа сагаласарийрз уббаж̇ж̇амаанам̣ нируж̇жхамаанан̃жа сагаламби ж̇ийвид̇инд̣̇рияам̣ згаббахаарзнзва ааламб̣ид̇умасаггун̣зяяад̇д̇аа таанаббад̇д̇ам̣ згад̣̇зсаббавад̇д̇ам̣ ж̇ийвид̇инд̣̇рияам̣ аарамман̣ам̣ гад̇ваа аарамман̣абхууд̇ам̣ сагаламби ж̇ийвид̇инд̣̇рияам̣ винаасзд̇и, звамзва бажжуббаннабарид̇д̇аарамман̣ааяа вад̇хагажзд̇анааяа маарзд̇угаамад̇ааяа бариг̇г̇ахид̇асад̇д̇зсу згассзва ж̇ийвид̇инд̣̇рияз аарамман̣з гад̇зби гижжанибпад̇д̇ивасзна саб̣б̣зби маарид̇аава хонд̇и.
Evanti ‘‘sīsaṃ vā chinditvā papāte vā papatitvā’’tiādinā. Ārocitamatteti vuttamatte. Yathā ariyamaggakkhaṇe cattāro satipaṭṭhānā cattāro sammappadhānā ca kiccavasena ijjhanti, evaṃ cetanāya ekattepi kiccavasena anekā pāṇātipātā ijjhantīti āha ‘‘tattakā pāṇātipātā’’ti. Yathā hi attānaṃ sataṃ katvā dassetukāmassa ‘‘sataṃ homi sataṃ homī’’ti kataparikammavasena laddhapaccuppannaparittārammaṇaṃ abhiññācittaṃ satantogadhānaṃ vaṇṇesu ekassa vaṇṇaṃ ārammaṇaṃ katvāpi sataṃ nipphādeti, yathā ca ekassa maraṇe pavattamānāpi vadhakacetanā sakalasarīre uppajjamānaṃ nirujjhamānañca sakalampi jīvitindriyaṃ ekappahāreneva ālambitumasakkuṇeyyattā ṭhānappattaṃ ekadesappavattaṃ jīvitindriyaṃ ārammaṇaṃ katvā ārammaṇabhūtaṃ sakalampi jīvitindriyaṃ vināseti, evameva paccuppannaparittārammaṇāya vadhakacetanāya māretukāmatāya pariggahitasattesu ekasseva jīvitindriye ārammaṇe katepi kiccanipphattivasena sabbepi māritāva honti.
176. язсам̣ хад̇т̇ад̇од̇и язсам̣ н̃аад̇агабаваарид̇аанам̣ хад̇т̇ад̇о. д̇зсам̣ муулам̣ д̣̇ад̇ваа мужжад̇ийд̇и ид̣̇ам̣ д̇зна гад̇абаяог̇асса буна баагад̇игабхааваабаад̣̇анам̣ авасаанам̣ баабзд̇ваа д̣̇ассзд̇ум̣ вуд̇д̇ам̣. ‘‘муулзна гийд̇ам̣ бана бод̇т̇агам̣ бод̇т̇агасаамигаанам̣ д̣̇ад̇ваа мужжад̇иязваа’’д̇и д̇ийсуби г̇ан̣тибад̣̇зсу вуд̇д̇ам̣. гзнажи бана ‘‘сажз бод̇т̇агам̣ саамигаанам̣ д̣̇ад̇ваа муулам̣ на г̇ан̣хаад̇и, на мужжад̇и ад̇д̇анияабхаавад̇о аможид̇ад̇д̇аа’’д̇и вад̇ваа б̣ахуд̇хаа бабан̃жид̇ам̣, на д̇ам̣ саарад̇о бажжзд̇аб̣б̣ам̣. бод̇т̇агасаамигаанан̃хи бод̇т̇агз д̣̇иннз ан̃н̃зна гад̇ам̣ бадилабхид̇ваа ад̇д̇анаа гад̇абаяог̇асса наасид̇ад̇д̇аа гат̇ам̣ со на мужжзяяа, на жа барижжад̇д̇асса ад̇д̇анияабхааво д̣̇идтод̇и. г̇ан̣тибад̣̇з бана ‘‘сажз муулзна гийд̇о ход̇и, бод̇т̇агасаамигаанам̣ бод̇т̇агам̣, язсам̣ хад̇т̇ад̇о муулам̣ г̇ахид̇ам̣, д̇зсам̣ муулам̣ д̣̇ад̇ваа мужжад̇ийд̇и гасмаа вуд̇д̇ам̣. бод̇т̇аганимид̇д̇ам̣ мууласса г̇ахид̇ад̇д̇аа агаббияамзд̇ам̣. яад̣̇и хи бод̇т̇агасаамигасса бод̇т̇агам̣ д̣̇ад̇ваа саяамзва муулам̣ г̇ан̣хзяяа, агаббияамзва д̇ам̣. ат̇ааби бод̇т̇агасаамигасса санд̇игаа муулам̣ аг̇г̇ахзд̇ваа саяамзва д̇ам̣ бод̇т̇агам̣ жхаабзяяа, д̇ат̇ааби ан̃н̃аа язна сад̣̇д̇хаад̣̇зяяавинибаад̇анз аабад̇д̇и, д̇асмаа звамаахаа’’д̇и вуд̇д̇ам̣, д̇амби на саарад̇о бажжзд̇аб̣б̣ам̣. д̇асмаа г̇ан̣тибад̣̇зсу вуд̇д̇анаяовзд̇т̇а саарад̇о д̣̇адтаб̣б̣о. ‘‘маран̣аван̣н̣ам̣ ликиссаамаа’’д̇и згаж̇жхаасаяаа худ̇ваад̇и ид̣̇ам̣ д̇ат̇аа гаронд̇з санд̇хааяа вуд̇д̇ам̣, звам̣ бана асам̣вид̣̇ахид̇вааби маран̣аад̇хиббааязна д̇асмим̣ бод̇т̇агз вуд̇д̇авид̇хим̣ гаронд̇асса баарааж̇игамзва.
176.Yesaṃhatthatoti yesaṃ ñātakapavāritānaṃ hatthato. Tesaṃ mūlaṃ datvā muccatīti idaṃ tena katapayogassa puna pākatikabhāvāpādanaṃ avasānaṃ pāpetvā dassetuṃ vuttaṃ. ‘‘Mūlena kītaṃ pana potthakaṃ potthakasāmikānaṃ datvā muccatiyevā’’ti tīsupi gaṇṭhipadesu vuttaṃ. Kenaci pana ‘‘sace potthakaṃ sāmikānaṃ datvā mūlaṃ na gaṇhāti, na muccati attaniyabhāvato amocitattā’’ti vatvā bahudhā papañcitaṃ, na taṃ sārato paccetabbaṃ. Potthakasāmikānañhi potthake dinne aññena kataṃ paṭilabhitvā attanā katapayogassa nāsitattā kathaṃ so na mucceyya, na ca pariccattassa attaniyabhāvo diṭṭhoti. Gaṇṭhipade pana ‘‘sace mūlena kīto hoti, potthakasāmikānaṃ potthakaṃ, yesaṃ hatthato mūlaṃ gahitaṃ, tesaṃ mūlaṃ datvā muccatīti kasmā vuttaṃ. Potthakanimittaṃ mūlassa gahitattā akappiyametaṃ. Yadi hi potthakasāmikassa potthakaṃ datvā sayameva mūlaṃ gaṇheyya, akappiyameva taṃ. Athāpi potthakasāmikassa santikā mūlaṃ aggahetvā sayameva taṃ potthakaṃ jhāpeyya, tathāpi aññā yena saddhādeyyavinipātane āpatti, tasmā evamāhā’’ti vuttaṃ, tampi na sārato paccetabbaṃ. Tasmā gaṇṭhipadesu vuttanayovettha sārato daṭṭhabbo. ‘‘Maraṇavaṇṇaṃ likhissāmā’’ti ekajjhāsayā hutvāti idaṃ tathā karonte sandhāya vuttaṃ, evaṃ pana asaṃvidahitvāpi maraṇādhippāyena tasmiṃ potthake vuttavidhiṃ karontassa pārājikameva.
бамаан̣зд̇и ад̇д̇анаа саллагкид̇з бамаан̣з. д̇ажчзд̇ваад̇и уннад̇аббад̣̇зсам̣ д̇ажчзд̇ваа. бам̣субажчинд̇и саб̣б̣анд̇имам̣ бам̣субажчим̣. ‘‘зд̇д̇агам̣ ала’’нд̇и нидтаабзд̇угаамад̇ааяа саб̣б̣анд̇имабаяог̇асаад̇хигаа жзд̇анаа саннидтаабагажзд̇анаа . суд̇д̇анд̇игад̇т̇зраад̇и винаяз абагад̇ан̃н̃уно суд̇д̇анд̇абхаан̣агаа. махааадтагат̇аажарияад̇т̇зрзязва санд̇хааяа ‘‘винаяам̣ д̇з на ж̇аананд̇ийд̇и убахаасавасзна суд̇д̇анд̇игад̇т̇зраад̇и вуд̇д̇а’’нд̇иби вад̣̇анд̇и. зд̇т̇а жа махааадтагат̇ааяам̣ ‘‘ааваадз нидтид̇з бад̇ид̇ваа маранд̇у, анидтид̇з маа маранд̇уу’’д̇и иминаа ад̇хиббааязна гаронд̇ам̣ санд̇хааяа саб̣б̣анд̇имаа саннидтаабагажзд̇анаа вуд̇д̇аа, махаабажжарисан̇кзбадтагат̇аасу бана батамаббахаарад̇о бадтааяа ‘‘имасмим̣ ааваадз бад̇ид̇ваа маранд̇уу’’д̇и иминаа ад̇хиббааязна гаронд̇асса яасмим̣ яасмим̣ баяог̇з гад̇з д̇ад̇т̇а бад̇ид̇аа маранд̇и, д̇ам̣д̇ам̣баяог̇асаад̇хигам̣ саннидтаабагажзд̇анам̣ санд̇хааяа ‘‘згасмимби гуд̣̇аалаббахаарз д̣̇иннз’’д̇иаад̣̇и вуд̇д̇анд̇и д̇ийсуби г̇ан̣тибад̣̇зсу вуд̇д̇ам̣. д̇асмаа д̇зна д̇зна барияааязна адтагат̇ааваад̣̇аанам̣ ан̃н̃аман̃н̃аавирод̇хо яуд̇д̇о. ат̇а ваа махааадтагат̇ааяам̣ згасмим̣язва д̣̇ивасз авуубасанд̇знзва баяог̇зна кан̣ид̇ваа нидтаабзнд̇ам̣ санд̇хааяа саб̣б̣анд̇имаа саннидтаабагажзд̇анаа вуд̇д̇аа, ид̇араасу бана ‘‘имасмим̣ бад̇ид̇ваа маранд̇уу’’д̇и ад̇хиббааязна згасмим̣ д̣̇ивасз гин̃жи кан̣ид̇ваа абарасмимби д̣̇ивасз д̇ат̇зва гин̃жи гин̃жи кан̣ид̇ваа нидтаабзнд̇ам̣ санд̇хааяа вуд̇д̇анд̇и. звамби адтагат̇аанам̣ ан̃н̃аман̃н̃аавирод̇хо яуд̇д̇од̇и амхаагам̣ канд̇и.
Pamāṇeti attanā sallakkhite pamāṇe. Tacchetvāti unnatappadesaṃ tacchetvā. Paṃsupacchinti sabbantimaṃ paṃsupacchiṃ. ‘‘Ettakaṃ ala’’nti niṭṭhāpetukāmatāya sabbantimapayogasādhikā cetanā sanniṭṭhāpakacetanā . Suttantikattherāti vinaye apakataññuno suttantabhāṇakā. Mahāaṭṭhakathācariyatthereyeva sandhāya ‘‘vinayaṃ te na jānantīti upahāsavasena suttantikattherāti vutta’’ntipi vadanti. Ettha ca mahāaṭṭhakathāyaṃ ‘‘āvāṭe niṭṭhite patitvā marantu, aniṭṭhite mā marantū’’ti iminā adhippāyena karontaṃ sandhāya sabbantimā sanniṭṭhāpakacetanā vuttā, mahāpaccarisaṅkhepaṭṭhakathāsu pana paṭhamappahārato paṭṭhāya ‘‘imasmiṃ āvāṭe patitvā marantū’’ti iminā adhippāyena karontassa yasmiṃ yasmiṃ payoge kate tattha patitā maranti, taṃtaṃpayogasādhikaṃ sanniṭṭhāpakacetanaṃ sandhāya ‘‘ekasmimpi kudālappahāre dinne’’tiādi vuttanti tīsupi gaṇṭhipadesu vuttaṃ. Tasmā tena tena pariyāyena aṭṭhakathāvādānaṃ aññamaññāvirodho yutto. Atha vā mahāaṭṭhakathāyaṃ ekasmiṃyeva divase avūpasanteneva payogena khaṇitvā niṭṭhāpentaṃ sandhāya sabbantimā sanniṭṭhāpakacetanā vuttā, itarāsu pana ‘‘imasmiṃ patitvā marantū’’ti adhippāyena ekasmiṃ divase kiñci khaṇitvā aparasmimpi divase tatheva kiñci kiñci khaṇitvā niṭṭhāpentaṃ sandhāya vuttanti. Evampi aṭṭhakathānaṃ aññamaññāvirodho yuttoti amhākaṃ khanti.
ад̇д̇ано д̇хаммад̇ааяаад̇и аж̇аанид̇ваа багкалид̇ваа ваа. араханд̇ааби сан̇г̇ахам̣ г̇ажчанд̇ийд̇и ан̃н̃зхи баад̇ияамаанаанам̣ амарид̇угаамаанамби араханд̇аанам̣ маран̣ам̣ самбхавад̇ийд̇и вуд̇д̇ам̣. буриманаязд̇и ‘‘марид̇угаамаа ид̇ха мариссанд̇ий’’д̇и вуд̇д̇анаяз. д̇ад̇т̇а бад̇ид̇ам̣ б̣ахи нийхарид̇ваад̇и зд̇т̇а ‘‘имасмим̣ ааваадзязва маранд̇ууд̇и нияамаабхаавад̇о б̣ахи нийхарид̇ваа маарид̇зби баарааж̇игам̣ вуд̇д̇ам̣. ааваадз бад̇ид̇ваа т̇огам̣ жирааяид̇ваа г̇ажчанд̇ам̣ г̇ахзд̇ваа маарид̇з ааваадасмим̣язва аг̇г̇ахид̇ад̇д̇аа баарааж̇игам̣ на ход̇ий’’д̇и вад̣̇анд̇и, д̇ам̣ бана адтагат̇ааяам̣ ‘‘бад̇ид̇аббаяог̇зна г̇ахид̇ад̇д̇аа’’д̇и вуд̇д̇ахзд̇усса ид̇хааби самбхавад̇о виймам̣сид̇ваа г̇ахзд̇аб̣б̣ам̣. амарид̇угаамаа ваад̇иби ад̇хиббааяасса самбхавад̇о обабаад̇игз уд̇д̇арид̇ум̣ асаггун̣ид̇ваа мад̇зби баарааж̇игам̣ вуд̇д̇ам̣. ниб̣б̣ад̇д̇ид̇ваад̇и вуд̇д̇ад̇д̇аа бад̇анам̣ на д̣̇иссад̇ийд̇и жз? обабаад̇игасса д̇ад̇т̇а ниб̣б̣ад̇д̇иязва бад̇ананд̇и над̇т̇и вирод̇хо. яасмаа маад̇уяаа бад̇ид̇ваа баривад̇д̇ид̇алин̇г̇ааяа мад̇ааяа со маад̇угхаад̇аго ход̇и, на гзвалам̣ мануссабурисагхаад̇аго, д̇асмаа бад̇ид̇ассзва васзна аабад̇д̇ийд̇и ад̇хиббааязна ‘‘бад̇анаруубам̣ бамаан̣а’’нд̇и вуд̇д̇ам̣. ид̣̇ам̣ бана агааран̣ам̣. ‘‘мануссабхууд̇ам̣ маад̇арам̣ ваа бид̇арам̣ ваа аби баривад̇д̇алин̇г̇ам̣ ж̇ийвид̇аа воробзнд̇асса гаммам̣ аананд̇арияам̣ ход̇ий’’д̇и зд̇д̇агамзва хи адтагат̇ааяам̣ вуд̇д̇ам̣.
Attano dhammatāyāti ajānitvā pakkhalitvā vā. Arahantāpi saṅgahaṃ gacchantīti aññehi pātiyamānānaṃ amaritukāmānampi arahantānaṃ maraṇaṃ sambhavatīti vuttaṃ. Purimanayeti ‘‘maritukāmā idha marissantī’’ti vuttanaye. Tattha patitaṃ bahi nīharitvāti ettha ‘‘imasmiṃ āvāṭeyeva marantūti niyamābhāvato bahi nīharitvā māritepi pārājikaṃ vuttaṃ. Āvāṭe patitvā thokaṃ cirāyitvā gacchantaṃ gahetvā mārite āvāṭasmiṃyeva aggahitattā pārājikaṃ na hotī’’ti vadanti, taṃ pana aṭṭhakathāyaṃ ‘‘patitappayogena gahitattā’’ti vuttahetussa idhāpi sambhavato vīmaṃsitvā gahetabbaṃ. Amaritukāmā vātipi adhippāyassa sambhavato opapātike uttarituṃ asakkuṇitvā matepi pārājikaṃ vuttaṃ. Nibbattitvāti vuttattā patanaṃ na dissatīti ce? Opapātikassa tattha nibbattiyeva patananti natthi virodho. Yasmā mātuyā patitvā parivattitaliṅgāya matāya so mātughātako hoti, na kevalaṃ manussapurisaghātako, tasmā patitasseva vasena āpattīti adhippāyena ‘‘patanarūpaṃ pamāṇa’’nti vuttaṃ. Idaṃ pana akāraṇaṃ. ‘‘Manussabhūtaṃ mātaraṃ vā pitaraṃ vā api parivattaliṅgaṃ jīvitā voropentassa kammaṃ ānantariyaṃ hotī’’ti ettakameva hi aṭṭhakathāyaṃ vuttaṃ.
д̇ад̇т̇а жа лин̇г̇з баривад̇д̇зби со зва згагамманиб̣б̣ад̇д̇о бхаван̇г̇аббаб̣анд̇хо ж̇ийвид̇инд̣̇рияаббаб̣анд̇хо жа, на ан̃н̃од̇и ‘‘аби баривад̇д̇алин̇г̇а’’нд̇и вуд̇д̇ам̣. яо хи лин̇г̇з абаривад̇д̇з д̇асмим̣ ад̇д̇абхаавз бхаван̇г̇аж̇ийвид̇инд̣̇рияаббаб̣анд̇хо , со зва баривад̇д̇зби лин̇г̇з д̇ам̣язва жа убаад̣̇ааяа згаж̇аад̇исаман̃н̃аа. на жзд̇т̇а бхаавагалаабаг̇ад̇аж̇ийвид̇инд̣̇рияасса васзна жод̣̇анаа гаад̇аб̣б̣аа д̇ад̣̇ан̃н̃ассзва ад̇хиббзд̇ад̇д̇аа. д̇ан̃хи д̇ад̇т̇а авижчзд̣̇авуд̇д̇ияаа баб̣анд̇хавохаарам̣ лабхад̇и, ид̇арамби ваа бхааваанубаалад̇аасааман̃н̃знаад̇и аногаасаава жод̣̇анаа. д̇асмаа баривад̇д̇зби лин̇г̇з д̇ассзва згагамманиб̣б̣ад̇д̇асса санд̇аанасса ж̇ийвид̇аа воробанад̇о вохаарабхзд̣̇ад̇о со ид̇т̇игхаад̇аго ваа ход̇у бурисагхаад̇аго ваа, аананд̇арияагаммад̇о на мужжад̇ийд̇и зд̇д̇агамзва д̇ад̇т̇а вад̇д̇аб̣б̣ам̣. ид̇ха бана яам̣яам̣ж̇аад̇игаа сад̇д̇аа хонд̇и, д̇з маран̣асамаяз ад̇д̇ано ад̇д̇ано ж̇аад̇ируубзнзва маранд̇и, наан̃н̃аруубзна, ж̇аад̇ивасзнзва жа баажид̇д̇ияат̇уллажжаяабаарааж̇игзхи бхавид̇аб̣б̣ам̣. д̇асмаа нааг̇о ваа субан̣н̣о ваа яагкаруубзна ваа бзд̇аруубзна ваа бад̇ид̇ваа ад̇д̇ано д̇иражчаанаруубзна марад̇и, д̇ад̇т̇а баажид̇д̇ияамзва яуд̇д̇ам̣, на т̇уллажжаяам̣ д̇иражчаанаг̇ад̇ассзва мад̇ад̇д̇аа. д̇знзва д̣̇уд̇ияад̇т̇зраваад̣̇з маран̣аруубам̣ бамаан̣ам̣, д̇асмаа баажид̇д̇ияанд̇и вуд̇д̇ам̣. аяамзва жа ваад̣̇о яуд̇д̇ад̇аро, д̇знзва со бажчаа вуд̇д̇о.
Tattha ca liṅge parivattepi so eva ekakammanibbatto bhavaṅgappabandho jīvitindriyappabandho ca, na aññoti ‘‘api parivattaliṅga’’nti vuttaṃ. Yo hi liṅge aparivatte tasmiṃ attabhāve bhavaṅgajīvitindriyappabandho , so eva parivattepi liṅge taṃyeva ca upādāya ekajātisamaññā. Na cettha bhāvakalāpagatajīvitindriyassa vasena codanā kātabbā tadaññasseva adhippetattā. Tañhi tattha avicchedavuttiyā pabandhavohāraṃ labhati, itarampi vā bhāvānupālatāsāmaññenāti anokāsāva codanā. Tasmā parivattepi liṅge tasseva ekakammanibbattassa santānassa jīvitā voropanato vohārabhedato so itthighātako vā hotu purisaghātako vā, ānantariyakammato na muccatīti ettakameva tattha vattabbaṃ. Idha pana yaṃyaṃjātikā sattā honti, te maraṇasamaye attano attano jātirūpeneva maranti, nāññarūpena, jātivaseneva ca pācittiyathullaccayapārājikehi bhavitabbaṃ. Tasmā nāgo vā supaṇṇo vā yakkharūpena vā petarūpena vā patitvā attano tiracchānarūpena marati, tattha pācittiyameva yuttaṃ, na thullaccayaṃ tiracchānagatasseva matattā. Teneva dutiyattheravāde maraṇarūpaṃ pamāṇaṃ, tasmā pācittiyanti vuttaṃ. Ayameva ca vādo yuttataro, teneva so pacchā vutto.
иминаава наязна мануссавиг̇г̇ахз нааг̇асубан̣н̣асад̣̇исз д̇иражчаанаг̇ад̇з бад̇ид̇ваа ад̇д̇ано руубзна мад̇з баажид̇д̇иязна бхавид̇аб̣б̣ам̣. звам̣ санд̇з баал̣ияам̣ ‘‘яагко ваа бзд̇о ваа д̇иражчаанаг̇ад̇амануссавиг̇г̇ахо ваа д̇асмим̣ бад̇ад̇и, аабад̇д̇и д̣̇уггадасса. бад̇ид̇з д̣̇угкаа взд̣̇анаа уббаж̇ж̇ад̇и, аабад̇д̇и д̣̇уггадасса. марад̇и, аабад̇д̇и т̇уллажжаяассаа’’д̇и гасмаа вуд̇д̇анд̇и жз? д̇ад̇т̇а гзжи вад̣̇анд̇и – яагко ваа бзд̇о ваад̇и батамам̣ сагаруубзнзва тид̇з яагкабзд̇з д̣̇ассзд̇ваа буна ан̃н̃аруубзнаби тид̇з д̇зязва яагкабзд̇з д̣̇ассзд̇ум̣ ‘‘д̇иражчаанаг̇ад̇амануссавиг̇г̇ахо ваа’’д̇и вуд̇д̇ам̣, на бана д̇аад̣̇исам̣ д̇иражчаанаг̇ад̇ам̣ висум̣ д̣̇ассзд̇ум̣. д̇асмаа д̇иражчаанаг̇ад̇авиг̇г̇ахо ваа мануссавиг̇г̇ахо ваа яагко ваа бзд̇о ваад̇и звамзд̇т̇а яож̇анаа гаад̇аб̣б̣аад̇и. г̇ан̣тибад̣̇зсу бана д̇ийсуби ‘‘баал̣ияам̣ мануссавиг̇г̇ахзна тид̇ад̇иражчаанаг̇ад̇аанам̣ аавзн̣игам̣ гад̇ваа т̇уллажжаяам̣ вуд̇д̇ам̣ вияа д̣̇иссад̇ий’’д̇и гат̇ид̇ам̣. яагкаруубабзд̇аруубзна мад̇зби зсзва наяод̇и иминаа маран̣аруубассзва бамаан̣ад̇д̇аа т̇уллажжаяам̣ ад̇ид̣̇иссад̇и.
Imināva nayena manussaviggahe nāgasupaṇṇasadise tiracchānagate patitvā attano rūpena mate pācittiyena bhavitabbaṃ. Evaṃ sante pāḷiyaṃ ‘‘yakkho vā peto vā tiracchānagatamanussaviggaho vā tasmiṃ patati, āpatti dukkaṭassa. Patite dukkhā vedanā uppajjati, āpatti dukkaṭassa. Marati, āpatti thullaccayassā’’ti kasmā vuttanti ce? Tattha keci vadanti – yakkho vā peto vāti paṭhamaṃ sakarūpeneva ṭhite yakkhapete dassetvā puna aññarūpenapi ṭhite teyeva yakkhapete dassetuṃ ‘‘tiracchānagatamanussaviggaho vā’’ti vuttaṃ, na pana tādisaṃ tiracchānagataṃ visuṃ dassetuṃ. Tasmā tiracchānagataviggaho vā manussaviggaho vā yakkho vā peto vāti evamettha yojanā kātabbāti. Gaṇṭhipadesu pana tīsupi ‘‘pāḷiyaṃ manussaviggahena ṭhitatiracchānagatānaṃ āveṇikaṃ katvā thullaccayaṃ vuttaṃ viya dissatī’’ti kathitaṃ. Yakkharūpapetarūpena matepi eseva nayoti iminā maraṇarūpasseva pamāṇattā thullaccayaṃ atidissati.
муд̇хаад̇и амуулзна, гин̃жи муулам̣ аг̇г̇ахзд̇ваад̇и вуд̇д̇ам̣ ход̇и. со нид̣̇д̣̇осод̇и д̇зна д̇ад̇т̇а гад̇абаяог̇асса абхаавад̇о. яад̣̇и бана соби д̇ад̇т̇а гин̃жи гин̃жи гарод̇и, на мужжад̇иязваад̇и д̣̇ассзнд̇о ааха ‘‘звам̣ бад̇ид̇аа’’д̇иаад̣̇и. д̇ад̇т̇а званд̇и звам̣ маяаа гад̇зд̇и ад̇т̇о. на нассиссанд̇ийд̇и ад̣̇ассанам̣ на г̇амиссанд̇и, на балааяиссанд̇ийд̇и ад̇хиббааяо. виббадисаарз уббаннзд̇и мууладтам̣ санд̇хааяа вуд̇д̇ам̣. яад̣̇и бана бажчимоби лабхид̇ваа д̇ад̇т̇а вуд̇д̇аббагаарам̣ гин̃жи гад̇ваа буна виббадисаарз уббаннз звам̣ гарод̇и, д̇ассаби зсзва наяо. бам̣сумхи бад̇ид̇ваа марад̇ийд̇и абхинавабуурид̇з бам̣сумхи баад̣̇з бавзсзд̇ваа уд̣̇д̇харид̇ум̣ асаггонд̇о д̇ад̇т̇зва бад̇ид̇ваа марад̇и. ж̇аад̇абат̇авий ж̇аад̇аад̇и ид̣̇ам̣ саб̣б̣ат̇аа мад̇т̇агаббад̇д̇ам̣ т̇ирабхаавам̣ д̣̇ассзд̇ум̣ вуд̇д̇ам̣. бам̣сунаа буурзнд̇зна бана баад̣̇ад̣̇ан̣д̣аад̣̇ийхи мад̣̇д̣̇анад̇аал̣анаад̣̇инаа судтуд̇арам̣ т̇ирабхаавам̣ аабаад̣̇зд̇ваа багад̇ибат̇авияаа ниб̣б̣исзсз гад̇з ж̇аад̇абат̇авийлагкан̣ам̣ аббад̇д̇зби мужжад̇иязва. обаад̇ам̣ харад̇ийд̇и зд̇т̇а богкаран̣ийсад̣̇исад̇д̇аа мужжад̇и.
Mudhāti amūlena, kiñci mūlaṃ aggahetvāti vuttaṃ hoti. So niddosoti tena tattha katapayogassa abhāvato. Yadi pana sopi tattha kiñci kiñci karoti, na muccatiyevāti dassento āha ‘‘evaṃ patitā’’tiādi. Tattha evanti evaṃ mayā kateti attho. Na nassissantīti adassanaṃ na gamissanti, na palāyissantīti adhippāyo. Vippaṭisāre uppanneti mūlaṭṭhaṃ sandhāya vuttaṃ. Yadi pana pacchimopi labhitvā tattha vuttappakāraṃ kiñci katvā puna vippaṭisāre uppanne evaṃ karoti, tassapi eseva nayo. Paṃsumhi patitvā maratīti abhinavapūrite paṃsumhi pāde pavesetvā uddharituṃ asakkonto tattheva patitvā marati. Jātapathavī jātāti idaṃ sabbathā matthakappattaṃ thirabhāvaṃ dassetuṃ vuttaṃ. Paṃsunā pūrentena pana pādadaṇḍādīhi maddanatāḷanādinā suṭṭhutaraṃ thirabhāvaṃ āpādetvā pakatipathaviyā nibbisese kate jātapathavīlakkhaṇaṃ appattepi muccatiyeva. Opātaṃ haratīti ettha pokkharaṇīsadisattā muccati.
хад̇т̇аа муд̇д̇амад̇д̇зд̇и од̣д̣зд̇ваа хад̇т̇ад̇о муд̇д̇амад̇д̇з. вад̇им̣ гад̇ваад̇и зд̇т̇а яад̣̇и со баасз вуд̇д̇аббагаарам̣ ган̃жи висзсам̣ на гарод̇и, ад̇д̇анаа гад̇авад̇ияаа вид̣̇д̇хам̣сид̇ааяа мужжад̇и. т̇ад̣̇д̇хад̇арам̣ ваа баасаяадтим̣ табзд̇ийд̇и т̇ирабхаавад̇т̇ам̣ абарааяа баасаяадтияаа сад̣̇д̇хим̣ б̣анд̇хид̇ваа ваа д̇амзва ваа сит̇илабхууд̇ам̣ т̇ад̣̇д̇хад̇арам̣ б̣анд̇хид̇ваа табзд̇и. д̣̇ал̣хад̇арам̣ ваа т̇ирад̇арам̣ ваад̇и зд̇т̇ааби зсзва наяо. каан̣уганд̇и баасаяадтиб̣анд̇ханакаан̣угам̣. саб̣б̣ад̇т̇зва мааран̣ад̇т̇ааяа гад̇аббаяог̇ад̇д̇аа на мужжад̇и. виббадисаарз уббаннзд̇и мууладтассзва виббадисаарз уббаннз.
Hatthā muttamatteti oḍḍetvā hatthato muttamatte. Vatiṃ katvāti ettha yadi so pāse vuttappakāraṃ kañci visesaṃ na karoti, attanā katavatiyā viddhaṃsitāya muccati. Thaddhataraṃ vā pāsayaṭṭhiṃ ṭhapetīti thirabhāvatthaṃ aparāya pāsayaṭṭhiyā saddhiṃ bandhitvā vā tameva vā sithilabhūtaṃ thaddhataraṃ bandhitvā ṭhapeti. Daḷhataraṃ vā thirataraṃ vāti etthāpi eseva nayo. Khāṇukanti pāsayaṭṭhibandhanakhāṇukaṃ. Sabbattheva māraṇatthāya katappayogattā na muccati. Vippaṭisāre uppanneti mūlaṭṭhasseva vippaṭisāre uppanne.
д̇зна алаад̇зна…бз… на мужжад̇ийд̇и зд̇т̇а ‘‘буб̣б̣з гад̇аббаяог̇ам̣ винаасзд̇ваа бажчаа гусалажид̇д̇зна баяог̇з гад̇зби на мужжад̇ийд̇и ид̣̇ам̣ санд̇хааяа г̇анд̇аб̣б̣а’’нд̇и д̇ийсуби г̇ан̣тибад̣̇зсу вуд̇д̇ам̣. аяам̣ банзд̇т̇а ад̇хиббааяо яуд̇д̇о сияаа – аад̣̇ид̇оязва мааран̣ад̇т̇ааяа гад̇аббаяог̇ад̇д̇аа гад̇абарияосид̇ааяа баасаяадтияаа д̇аббажжаяаа яз яз сад̇д̇аа мариссанд̇и, д̇зсам̣ д̇зсам̣ васзна батамад̇арам̣язва баан̣аад̇ибаад̇агаммасид̣̇д̇хид̇о бажчаа гусалажид̇д̇зна ан̃н̃ат̇аа гад̇зби на мужжад̇ийд̇и. раж̇ж̇угзд̇и куд̣̇д̣̇агараж̇ж̇угз. саяам̣ ваддид̇анд̇и б̣ахураж̇ж̇угз згад̇о гад̇ваа ад̇д̇анаа ваддид̇ам̣. уб̣б̣аддзд̇ваад̇и д̇з раж̇ж̇угз висум̣ висум̣ гад̇ваа. г̇аругад̇арам̣ гарод̇ийд̇и ад̇ибхаарияам̣ гарод̇и. бариязсид̇ваа гад̇анд̇и аран̃н̃ам̣ г̇анд̇ваа ругкам̣ чинд̣̇ид̇ваа д̇ажчзд̇ваа гад̇ам̣.
Tena alātena…pe… na muccatīti ettha ‘‘pubbe katappayogaṃ vināsetvā pacchā kusalacittena payoge katepi na muccatīti idaṃ sandhāya gantabba’’nti tīsupi gaṇṭhipadesu vuttaṃ. Ayaṃ panettha adhippāyo yutto siyā – āditoyeva māraṇatthāya katappayogattā katapariyositāya pāsayaṭṭhiyā tappaccayā ye ye sattā marissanti, tesaṃ tesaṃ vasena paṭhamataraṃyeva pāṇātipātakammasiddhito pacchā kusalacittena aññathā katepi na muccatīti. Rajjuketi khuddakarajjuke. Sayaṃ vaṭṭitanti bahurajjuke ekato katvā attanā vaṭṭitaṃ. Ubbaṭṭetvāti te rajjuke visuṃ visuṃ katvā. Garukataraṃ karotīti atibhāriyaṃ karoti. Pariyesitvā katanti araññaṃ gantvā rukkhaṃ chinditvā tacchetvā kataṃ.
177. ааламб̣анаругко ваад̇и д̇ад̇т̇аж̇аад̇агам̣ санд̇хааяа вуд̇д̇ам̣. д̇ад̣̇ад̇т̇амзваад̇и мааран̣ад̇т̇амзва. висаман̣д̣аланд̇и ман̃жабийтаад̣̇ийсу аалид̇д̇ам̣ висаман̣д̣алам̣. вад̇ваа асим̣ убанигкибад̇ийд̇и зд̇т̇а мукзна авад̇ваа вуд̇д̇аббагаарам̣ манасаа жинд̇зд̇ваа убанигкибанзби зсзва наяо. буриманаязнаад̇и ‘‘язсам̣ хад̇т̇ад̇о муулам̣ г̇ахид̇а’’нд̇иаад̣̇инаа. сарийрасса вируубабхаавагаран̣ад̇о гудтаад̣̇и висабхааг̇арог̇о наама, ж̇ийвид̇аббавад̇д̇ияаа ваа асабхааг̇ад̇д̇аа ананугуулад̇д̇аа г̇ан̣д̣абил̣агаад̣̇и яо гожи ж̇ийвид̇аббавад̇д̇ибажжанийго висабхааг̇арог̇о.
177.Ālambanarukkho vāti tatthajātakaṃ sandhāya vuttaṃ. Tadatthamevāti māraṇatthameva. Visamaṇḍalanti mañcapīṭhādīsu ālittaṃ visamaṇḍalaṃ. Vatvā asiṃ upanikkhipatīti ettha mukhena avatvā vuttappakāraṃ manasā cintetvā upanikkhipanepi eseva nayo. Purimanayenāti ‘‘yesaṃ hatthato mūlaṃ gahita’’ntiādinā. Sarīrassa virūpabhāvakaraṇato kuṭṭhādi visabhāgarogo nāma, jīvitappavattiyā vā asabhāgattā ananukūlattā gaṇḍapiḷakādi yo koci jīvitappavattipaccanīko visabhāgarogo.
178. барам̣ ваа аманаабаруубанд̇и зд̇т̇а аманаабам̣ руубам̣ зд̇ассаад̇и аманаабаруубод̇и б̣аахирад̇т̇асамаасо д̣̇адтаб̣б̣о. манаабиязби зсзва наяод̇и зд̇зна манаабигам̣ руубам̣ убасам̣харад̇ийд̇и зд̇т̇а барам̣ ваа манаабаруубам̣ д̇асса самийбз табзд̇и, ад̇д̇анаа ваа манаабиязна руубзна саманнааг̇ад̇о д̇идтад̇ийд̇иаад̣̇и яож̇зд̇аб̣б̣анд̇и д̣̇ассзд̇и. д̇знзва ан̃н̃ад̇арасмим̣ г̇ан̣тибад̣̇з вуд̇д̇ам̣ –
178.Paraṃvā amanāparūpanti ettha amanāpaṃ rūpaṃ etassāti amanāparūpoti bāhiratthasamāso daṭṭhabbo. Manāpiyepi eseva nayoti etena manāpikaṃ rūpaṃ upasaṃharatīti ettha paraṃ vā manāparūpaṃ tassa samīpe ṭhapeti, attanā vā manāpiyena rūpena samannāgato tiṭṭhatītiādi yojetabbanti dasseti. Teneva aññatarasmiṃ gaṇṭhipade vuttaṃ –
‘‘мамаалаабхзна зсид̇т̇ий, марад̇ууд̇и самийбаг̇о;
‘‘Mamālābhena esitthī, maratūti samīpago;
д̣̇удтажид̇д̇о сажз яаад̇и, ход̇и со ид̇т̇имаараго.
Duṭṭhacitto sace yāti, hoti so itthimārako.
‘‘бхигкад̇т̇ааяа сажз яаад̇и, ж̇аананд̇оби на маараго;
‘‘Bhikkhatthāya sace yāti, jānantopi na mārako;
анад̇т̇иго хи со д̇ассаа, маран̣зна убзгкаго’’д̇и.
Anatthiko hi so tassā, maraṇena upekkhako’’ti.
абарамби д̇ад̇т̇зва вуд̇д̇ам̣ –
Aparampi tattheva vuttaṃ –
‘‘вияог̇зна жа мз ж̇ааяаа, ж̇ананий жа на ж̇ийвад̇и;
‘‘Viyogena ca me jāyā, jananī ca na jīvati;
ид̇и ж̇аанам̣ вияун̃ж̇анд̇о, д̇ад̣̇ад̇т̇ий ход̇и маараго.
Iti jānaṃ viyuñjanto, tadatthī hoti mārako.
‘‘баб̣б̣аж̇ж̇аад̣̇инимид̇д̇ан̃жз, яаад̇и ж̇аанам̣ на маараго;
‘‘Pabbajjādinimittañce, yāti jānaṃ na mārako;
анад̇т̇иго хи со д̇зсам̣, маран̣зна убзгкаго’’д̇и.
Anatthiko hi so tesaṃ, maraṇena upekkhako’’ti.
алан̇гарид̇ваа убасам̣харад̇ийд̇и ‘‘алаабхагзна суссид̇ваа марад̇уу’’д̇и иминаа ад̇хиббааязна убасам̣харад̇и. д̇знзва ‘‘сажз уд̇д̇асид̇ваа марад̇и, висан̇гзд̇о’’д̇и вуд̇д̇ам̣. алаабхагзна суссид̇ваа марад̇ийд̇и зд̇т̇а жа баарааж̇иганд̇и баатасзсо д̣̇адтаб̣б̣о. гун̣абаг̇анд̇хаа жаад̇и ахиаад̣̇игун̣абаанам̣ г̇анд̇хаа. хам̣сабубпанд̇и хам̣саад̣̇ийнам̣ багкаломам̣ санд̇хааяа вад̣̇ад̇и.
Alaṅkaritvā upasaṃharatīti ‘‘alābhakena sussitvā maratū’’ti iminā adhippāyena upasaṃharati. Teneva ‘‘sace uttasitvā marati, visaṅketo’’ti vuttaṃ. Alābhakena sussitvā maratīti ettha ca pārājikanti pāṭhaseso daṭṭhabbo. Kuṇapagandhā cāti ahiādikuṇapānaṃ gandhā. Haṃsapupphanti haṃsādīnaṃ pakkhalomaṃ sandhāya vadati.
179. асан̃жижжаад̇и ид̣̇ам̣ маран̣асам̣вад̇д̇анигаубаггамасса асаллагкан̣ам̣ санд̇хааяа вуд̇д̇анд̇и ааха ‘‘иминаа убаггамзнаа’’д̇иаад̣̇и. аж̇аананд̇ассаад̇и ид̣̇ам̣ бана маран̣асам̣вад̇д̇анигаубаггамагаран̣асса аж̇аананам̣ санд̇хааяа вуд̇д̇анд̇и ааха ‘‘иминаа аяам̣ мариссад̇ий’’д̇иаад̣̇и. намаран̣аад̇хиббааяассаад̇и ид̣̇ам̣ убаггамам̣ ж̇аананд̇ассаби маран̣аад̇хиббааяасса абхаавам̣ санд̇хааяа вуд̇д̇анд̇и ааха ‘‘маран̣ам̣ анижчанд̇ассаа’’д̇иаад̣̇и.
179.Asañciccāti idaṃ maraṇasaṃvattanikaupakkamassa asallakkhaṇaṃ sandhāya vuttanti āha ‘‘iminā upakkamenā’’tiādi. Ajānantassāti idaṃ pana maraṇasaṃvattanikaupakkamakaraṇassa ajānanaṃ sandhāya vuttanti āha ‘‘iminā ayaṃ marissatī’’tiādi. Namaraṇādhippāyassāti idaṃ upakkamaṃ jānantassapi maraṇādhippāyassa abhāvaṃ sandhāya vuttanti āha ‘‘maraṇaṃ anicchantassā’’tiādi.
бад̣̇абхааж̇анийяаван̣н̣анаа нидтид̇аа.
Padabhājanīyavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 3. д̇ад̇ияабаарааж̇игам̣ • 3. Tatiyapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 3. д̇ад̇ияабаарааж̇игам̣ • 3. Tatiyapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / бад̣̇абхааж̇анийяаван̣н̣анаа • Padabhājanīyavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / бад̣̇абхааж̇анийяаван̣н̣анаа • Padabhājanīyavaṇṇanā
