| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. দুতিযঅগারৰসুত্তং
2. Dutiyaagāravasuttaṃ
২২. ‘‘সো ৰত, ভিক্খৰে, ভিক্খু অগারৰো অপ্পতিস্সো অসভাগৰুত্তিকো ‘সব্রহ্মচারীসু আভিসমাচারিকং ধম্মং পরিপূরেস্সতী’তি নেতং ঠানং ৰিজ্জতি। ‘আভিসমাচারিকং ধম্মং অপরিপূরেত্ৰা সেখং ধম্মং পরিপূরেস্সতী’তি নেতং ঠানং ৰিজ্জতি। ‘সেখং ধম্মং অপরিপূরেত্ৰা সীলক্খন্ধং পরিপূরেস্সতী’তি নেতং ঠানং ৰিজ্জতি। ‘সীলক্খন্ধং অপরিপূরেত্ৰা সমাধিক্খন্ধং পরিপূরেস্সতী’তি নেতং ঠানং ৰিজ্জতি। ‘সমাধিক্খন্ধং অপরিপূরেত্ৰা পঞ্ঞাক্খন্ধং পরিপূরেস্সতী’তি নেতং ঠানং ৰিজ্জতি।
22. ‘‘So vata, bhikkhave, bhikkhu agāravo appatisso asabhāgavuttiko ‘sabrahmacārīsu ābhisamācārikaṃ dhammaṃ paripūressatī’ti netaṃ ṭhānaṃ vijjati. ‘Ābhisamācārikaṃ dhammaṃ aparipūretvā sekhaṃ dhammaṃ paripūressatī’ti netaṃ ṭhānaṃ vijjati. ‘Sekhaṃ dhammaṃ aparipūretvā sīlakkhandhaṃ paripūressatī’ti netaṃ ṭhānaṃ vijjati. ‘Sīlakkhandhaṃ aparipūretvā samādhikkhandhaṃ paripūressatī’ti netaṃ ṭhānaṃ vijjati. ‘Samādhikkhandhaṃ aparipūretvā paññākkhandhaṃ paripūressatī’ti netaṃ ṭhānaṃ vijjati.
‘‘সো ৰত, ভিক্খৰে, ভিক্খু সগারৰো সপ্পতিস্সো সভাগৰুত্তিকো ‘সব্রহ্মচারীসু আভিসমাচারিকং ধম্মং পরিপূরেস্সতী’তি ঠানমেতং ৰিজ্জতি। ‘আভিসমাচারিকং ধম্মং পরিপূরেত্ৰা সেখং ধম্মং পরিপূরেস্সতী’তি ঠানমেতং ৰিজ্জতি। সেখং ধম্মং পরিপূরেত্ৰা সীলক্খন্ধং পরিপূরেস্সতী’তি ঠানমেতং ৰিজ্জতি। ‘সীলক্খন্ধং পরিপূরেত্ৰা সমাধিক্খন্ধং পরিপূরেস্সতী’তি ঠানমেতং ৰিজ্জতি। ‘সমাধিক্খন্ধং পরিপূরেত্ৰা পঞ্ঞাক্খন্ধং পরিপূরেস্সতী’তি ঠানমেতং ৰিজ্জতী’’তি। দুতিযং।
‘‘So vata, bhikkhave, bhikkhu sagāravo sappatisso sabhāgavuttiko ‘sabrahmacārīsu ābhisamācārikaṃ dhammaṃ paripūressatī’ti ṭhānametaṃ vijjati. ‘Ābhisamācārikaṃ dhammaṃ paripūretvā sekhaṃ dhammaṃ paripūressatī’ti ṭhānametaṃ vijjati. Sekhaṃ dhammaṃ paripūretvā sīlakkhandhaṃ paripūressatī’ti ṭhānametaṃ vijjati. ‘Sīlakkhandhaṃ paripūretvā samādhikkhandhaṃ paripūressatī’ti ṭhānametaṃ vijjati. ‘Samādhikkhandhaṃ paripūretvā paññākkhandhaṃ paripūressatī’ti ṭhānametaṃ vijjatī’’ti. Dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. দুতিযঅগারৰসুত্তৰণ্ণনা • 2. Dutiyaagāravasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-২. পঠমঅগারৰসুত্তাদিৰণ্ণনা • 1-2. Paṭhamaagāravasuttādivaṇṇanā
