| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. து³தியஅக்³கி³ஸுத்தவண்ணனா
4. Dutiyaaggisuttavaṇṇanā
47. சதுத்தே² உக்³க³தஸரீரஸ்ஸாதி ஸோ கிர ப்³ராஹ்மணமஹாஸாலோ அத்தபா⁴வேனபி போ⁴கே³ஹிபி உக்³க³தோ ஸாரப்பத்தோ அஹோஸி, தஸ்மா உக்³க³தஸரீரொத்வேவ பஞ்ஞாயித்த². உபக்க²டோதி பச்சுபட்டி²தோ. தூ²ணூபனீதானீதி யூபஸங்கா²தங் தூ²ணங் உபனீதானி. யஞ்ஞத்தா²யாதி வதி⁴த்வா யஜனத்தா²ய. உபஸங்கமீதி ஸோ கிர ஸப்³ப³ங் தங் யஞ்ஞஸம்பா⁴ரங் ஸஜ்ஜெத்வா சிந்தேஸி – ‘‘ஸமணோ கிர கோ³தமோ மஹாபஞ்ஞோ, கிங் நு கோ² மே யஞ்ஞஸ்ஸ வண்ணங் கதெ²ஸ்ஸதி உதா³ஹு அவண்ணங், புச்சி²த்வா ஜானிஸ்ஸாமீ’’தி இமினா காரணேன யேன ப⁴க³வா தேனுபஸங்கமி. அக்³கி³ஸ்ஸ ஆதா³னந்தி யஞ்ஞயஜனத்தா²ய நவஸ்ஸ மங்க³லக்³கி³னோ ஆதி³யனங். ஸப்³பே³ன ஸப்³ப³ந்தி ஸப்³பே³ன ஸுதேன ஸப்³ப³ங் ஸுதங் ஸமேதி ஸங்ஸந்த³தி, ஏகஸதி³ஸங் ஹோதீதி த³ஸ்ஸேதி. ஸத்தா²னீதி விஹிங்ஸனட்டே²ன ஸத்தா²னி வியாதி ஸத்தா²னி. ஸயங் பட²மங் ஸமாரம்ப⁴தீதி அத்தனாவ பட²மதரங் ஆரப⁴தி. ஹந்துந்தி ஹனிதுங்.
47. Catutthe uggatasarīrassāti so kira brāhmaṇamahāsālo attabhāvenapi bhogehipi uggato sārappatto ahosi, tasmā uggatasarīrotveva paññāyittha. Upakkhaṭoti paccupaṭṭhito. Thūṇūpanītānīti yūpasaṅkhātaṃ thūṇaṃ upanītāni. Yaññatthāyāti vadhitvā yajanatthāya. Upasaṅkamīti so kira sabbaṃ taṃ yaññasambhāraṃ sajjetvā cintesi – ‘‘samaṇo kira gotamo mahāpañño, kiṃ nu kho me yaññassa vaṇṇaṃ kathessati udāhu avaṇṇaṃ, pucchitvā jānissāmī’’ti iminā kāraṇena yena bhagavā tenupasaṅkami. Aggissaādānanti yaññayajanatthāya navassa maṅgalaggino ādiyanaṃ. Sabbena sabbanti sabbena sutena sabbaṃ sutaṃ sameti saṃsandati, ekasadisaṃ hotīti dasseti. Satthānīti vihiṃsanaṭṭhena satthāni viyāti satthāni. Sayaṃ paṭhamaṃ samārambhatīti attanāva paṭhamataraṃ ārabhati. Hantunti hanituṃ.
பஹாதப்³பா³தி பரிஹரிதப்³பா³. அதோஹயந்தி அதோ ஹி மாதாபிதிதோ அயங். ஆஹுதோதி ஆக³தோ. ஸம்பூ⁴தோதி உப்பன்னோ. அயங் வுச்சதி, ப்³ராஹ்மண, க³ஹபதக்³கீ³தி அயங் புத்ததா³ராதி³க³ணோ யஸ்மா, க³ஹபதி, விய கே³ஹஸாமிகோ விய ஹுத்வா அக்³க³தி விசரதி, தஸ்மா க³ஹபதக்³கீ³தி வுச்சதி. அத்தானந்தி சித்தங். த³மெந்தீதி இந்த்³ரியத³மனேன த³மெந்தி. ஸமெந்தீதி ராகா³தி³ஸமனேன ஸமெந்தி. தேஸஞ்ஞேவ பரினிப்³பா³பனேன பரினிப்³பா³பெந்தி. நிக்கி²பிதப்³போ³தி யதா² ந வினஸ்ஸதி, ஏவங் ட²பேதப்³போ³. உபவாயதந்தி உபவாயது. ஏவஞ்ச பன வத்வா ப்³ராஹ்மணோ ஸப்³பே³ஸம்பி தேஸங் பாணானங் ஜீவிதங் த³த்வா யஞ்ஞஸாலங் வித்³த⁴ங்ஸெத்வா ஸத்து² ஸாஸனே ஓபானபூ⁴தோ அஹோஸீதி.
Pahātabbāti pariharitabbā. Atohayanti ato hi mātāpitito ayaṃ. Āhutoti āgato. Sambhūtoti uppanno. Ayaṃ vuccati, brāhmaṇa, gahapataggīti ayaṃ puttadārādigaṇo yasmā, gahapati, viya gehasāmiko viya hutvā aggati vicarati, tasmā gahapataggīti vuccati. Attānanti cittaṃ. Damentīti indriyadamanena damenti. Samentīti rāgādisamanena samenti. Tesaññeva parinibbāpanena parinibbāpenti. Nikkhipitabboti yathā na vinassati, evaṃ ṭhapetabbo. Upavāyatanti upavāyatu. Evañca pana vatvā brāhmaṇo sabbesampi tesaṃ pāṇānaṃ jīvitaṃ datvā yaññasālaṃ viddhaṃsetvā satthu sāsane opānabhūto ahosīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. து³தியஅக்³கி³ஸுத்தங் • 4. Dutiyaaggisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-5. து³தியஅக்³கி³ஸுத்தாதி³வண்ணனா • 4-5. Dutiyaaggisuttādivaṇṇanā
