| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၆. ဒုတိယအက္ခန္တိသုတ္တံ
6. Dutiyaakkhantisuttaṃ
၂၁၆. ‘‘ပဉ္စိမေ , ဘိက္ခဝေ, အာဒီနဝာ အက္ခန္တိယာ။ ကတမေ ပဉ္စ? ဗဟုနော ဇနသ္သ အပ္ပိယော ဟောတိ အမနာပော, လုဒ္ဒော စ ဟောတိ, ဝိပ္ပဋိသာရီ စ, သမ္မူဠ္ဟော ကာလံ ကရောတိ, ကာယသ္သ ဘေဒာ ပရံ မရဏာ အပာယံ ဒုဂ္ဂတိံ ဝိနိပာတံ နိရယံ ဥပပဇ္ဇတိ။ ဣမေ ခော, ဘိက္ခဝေ, ပဉ္စ အာဒီနဝာ အက္ခန္တိယာ။
216. ‘‘Pañcime , bhikkhave, ādīnavā akkhantiyā. Katame pañca? Bahuno janassa appiyo hoti amanāpo, luddo ca hoti, vippaṭisārī ca, sammūḷho kālaṃ karoti, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Ime kho, bhikkhave, pañca ādīnavā akkhantiyā.
‘‘ပဉ္စိမေ, ဘိက္ခဝေ, အာနိသံသာ ခန္တိယာ။ ကတမေ ပဉ္စ? ဗဟုနော ဇနသ္သ ပိယော ဟောတိ မနာပော, အလုဒ္ဒော စ ဟောတိ, အဝိပ္ပဋိသာရီ စ, အသမ္မူဠ္ဟော ကာလံ ကရောတိ, ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ။ ဣမေ ခော, ဘိက္ခဝေ, ပဉ္စ အာနိသံသာ ခန္တိယာ’’တိ။ ဆဋ္ဌံ။
‘‘Pañcime, bhikkhave, ānisaṃsā khantiyā. Katame pañca? Bahuno janassa piyo hoti manāpo, aluddo ca hoti, avippaṭisārī ca, asammūḷho kālaṃ karoti, kāyassa bhedā paraṃ maraṇā sugatiṃ saggaṃ lokaṃ upapajjati. Ime kho, bhikkhave, pañca ānisaṃsā khantiyā’’ti. Chaṭṭhaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၆. ဒုတိယအက္ခန္တိသုတ္တဝဏ္ဏနာ • 6. Dutiyaakkhantisuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃-၁၀. သီလသုတ္တာဒိဝဏ္ဏနာ • 3-10. Sīlasuttādivaṇṇanā
