| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. து³தியஆனந்த³ஸுத்தங்
8. Dutiyaānandasuttaṃ
840. ஏகமந்தங் நிஸின்னங் கோ² ஆயஸ்மந்தங் ஆனந்த³ங் ப⁴க³வா ஏதத³வோச – ‘‘கதமா நு கோ², ஆனந்த³, இத்³தி⁴, கதமோ இத்³தி⁴பாதோ³, கதமா இத்³தி⁴பாத³பா⁴வனா, கதமா இத்³தி⁴பாத³பா⁴வனாகா³மினீ படிபதா³’’தி? ப⁴க³வங்மூலகா நோ, ப⁴ந்தே, த⁴ம்மா ப⁴க³வங்னெத்திகா…பே॰….
840. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘katamā nu kho, ānanda, iddhi, katamo iddhipādo, katamā iddhipādabhāvanā, katamā iddhipādabhāvanāgāminī paṭipadā’’ti? Bhagavaṃmūlakā no, bhante, dhammā bhagavaṃnettikā…pe….
‘‘இதா⁴னந்த³, பி⁴க்கு² அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி…பே॰… யாவ ப்³ரஹ்மலோகாபி காயேன வஸங் வத்தேதி – அயங் வுச்சதானந்த³, இத்³தி⁴.
‘‘Idhānanda, bhikkhu anekavihitaṃ iddhividhaṃ paccanubhoti – ekopi hutvā bahudhā hoti…pe… yāva brahmalokāpi kāyena vasaṃ vatteti – ayaṃ vuccatānanda, iddhi.
‘‘கதமோ சானந்த³, இத்³தி⁴பாதோ³? யோ, ஆனந்த³, மக்³கோ³ யா படிபதா³ இத்³தி⁴லாபா⁴ய இத்³தி⁴படிலாபா⁴ய ஸங்வத்ததி – அயங் வுச்சதானந்த³, இத்³தி⁴பாதோ³.
‘‘Katamo cānanda, iddhipādo? Yo, ānanda, maggo yā paṭipadā iddhilābhāya iddhipaṭilābhāya saṃvattati – ayaṃ vuccatānanda, iddhipādo.
‘‘கதமா சானந்த³, இத்³தி⁴பாத³பா⁴வனா? இதா⁴னந்த³, பி⁴க்கு² ச²ந்த³ஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி, வீரியஸமாதி⁴…பே॰… சித்தஸமாதி⁴…பே॰… வீமங்ஸாஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி – அயங் வுச்சதானந்த³, இத்³தி⁴பாத³பா⁴வனா.
‘‘Katamā cānanda, iddhipādabhāvanā? Idhānanda, bhikkhu chandasamādhippadhānasaṅkhārasamannāgataṃ iddhipādaṃ bhāveti, vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti – ayaṃ vuccatānanda, iddhipādabhāvanā.
‘‘கதமா சானந்த³, இத்³தி⁴பாத³பா⁴வனாகா³மினீ படிபதா³? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴ – அயங் வுச்சதானந்த³, இத்³தி⁴பாத³பா⁴வனாகா³மினீ படிபதா³’’தி. அட்ட²மங்.
‘‘Katamā cānanda, iddhipādabhāvanāgāminī paṭipadā? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi – ayaṃ vuccatānanda, iddhipādabhāvanāgāminī paṭipadā’’ti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-10. பி⁴க்கு²ஸுத்தாதி³வண்ணனா • 3-10. Bhikkhusuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-10. பி⁴க்கு²ஸுத்தாதி³வண்ணனா • 3-10. Bhikkhusuttādivaṇṇanā
