| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. து³தியஆனந்த³ஸுத்தங்
4. Dutiyaānandasuttaṃ
990. அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ஆனந்த³ங் ப⁴க³வா ஏதத³வோச – ‘‘அத்தி² நு கோ², ஆனந்த³, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா, ஸத்த த⁴ம்மே பரிபூரெந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரெந்தீ’’தி. ப⁴க³வங்மூலகா நோ, ப⁴ந்தே, த⁴ம்மா…பே॰… ‘‘அத்தா²னந்த³, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரெந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரெந்தி.
990. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘atthi nu kho, ānanda, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā, satta dhamme paripūrenti, satta dhammā bhāvitā bahulīkatā dve dhamme paripūrentī’’ti. Bhagavaṃmūlakā no, bhante, dhammā…pe… ‘‘atthānanda, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā satta dhamme paripūrenti, satta dhammā bhāvitā bahulīkatā dve dhamme paripūrenti.
‘‘கதமோ சானந்த³, ஏகத⁴ம்மோ பா⁴விதோ ப³ஹுலீகதோ சத்தாரோ த⁴ம்மே பரிபூரேதி, சத்தாரோ த⁴ம்மா பா⁴விதா ப³ஹுலீகதா ஸத்த த⁴ம்மே பரிபூரெந்தி, ஸத்த த⁴ம்மா பா⁴விதா ப³ஹுலீகதா த்³வே த⁴ம்மே பரிபூரெந்தி? ஆனாபானஸ்ஸதிஸமாதி⁴, ஆனந்த³, ஏகத⁴ம்மோ பா⁴விதோ ப³ஹுலீகதோ சத்தாரோ ஸதிபட்டா²னே பரிபூரேதி, சத்தாரோ ஸதிபட்டா²னா பா⁴விதா ப³ஹுலீகதா ஸத்த பொ³ஜ்ஜ²ங்கே³ பரிபூரெந்தி, ஸத்த பொ³ஜ்ஜ²ங்கா³ பா⁴விதா ப³ஹுலீகதா விஜ்ஜாவிமுத்திங் பரிபூரெந்தீ’’தி. ‘‘கத²ங் பா⁴விதோ சானந்த³, ஆனாபானஸ்ஸதிஸமாதி⁴, கத²ங் ப³ஹுலீகதோ சத்தாரோ ஸதிபட்டா²னே பரிபூரேதி? இதா⁴னந்த³, பி⁴க்கு² அரஞ்ஞக³தோ வா…பே॰… ஏவங் பா⁴விதா கோ², ஆனந்த³, ஸத்த பொ³ஜ்ஜ²ங்கா³ ஏவங் ப³ஹுலீகதா விஜ்ஜாவிமுத்திங் பரிபூரெந்தீ’’தி. சதுத்த²ங்.
‘‘Katamo cānanda, ekadhammo bhāvito bahulīkato cattāro dhamme paripūreti, cattāro dhammā bhāvitā bahulīkatā satta dhamme paripūrenti, satta dhammā bhāvitā bahulīkatā dve dhamme paripūrenti? Ānāpānassatisamādhi, ānanda, ekadhammo bhāvito bahulīkato cattāro satipaṭṭhāne paripūreti, cattāro satipaṭṭhānā bhāvitā bahulīkatā satta bojjhaṅge paripūrenti, satta bojjhaṅgā bhāvitā bahulīkatā vijjāvimuttiṃ paripūrentī’’ti. ‘‘Kathaṃ bhāvito cānanda, ānāpānassatisamādhi, kathaṃ bahulīkato cattāro satipaṭṭhāne paripūreti? Idhānanda, bhikkhu araññagato vā…pe… evaṃ bhāvitā kho, ānanda, satta bojjhaṅgā evaṃ bahulīkatā vijjāvimuttiṃ paripūrentī’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3-10. பட²மஆனந்த³ஸுத்தாதி³வண்ணனா • 3-10. Paṭhamaānandasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3-10. பட²மஆனந்த³ஸுத்தாதி³வண்ணனா • 3-10. Paṭhamaānandasuttādivaṇṇanā
