| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. দুতিযআনন্দসুত্তং
10. Dutiyaānandasuttaṃ
৪০. ‘‘‘সঙ্ঘসামগ্গী সঙ্ঘসামগ্গী’তি, ভন্তে, ৰুচ্চতি। কিত্তাৰতা নু খো, ভন্তে, সঙ্ঘো সমগ্গো হোতী’’তি? ‘‘ইধানন্দ, ভিক্খূ অধম্মং অধম্মোতি দীপেন্তি, ধম্মং ধম্মোতি দীপেন্তি, অৰিনযং অৰিনযোতি দীপেন্তি , ৰিনযং ৰিনযোতি দীপেন্তি, অভাসিতং অলপিতং তথাগতেন অভাসিতং অলপিতং তথাগতেনাতি দীপেন্তি, ভাসিতং লপিতং তথাগতেন ভাসিতং লপিতং তথাগতেনাতি দীপেন্তি, অনাচিণ্ণং তথাগতেন অনাচিণ্ণং তথাগতেনাতি দীপেন্তি, আচিণ্ণং তথাগতেন আচিণ্ণং তথাগতেনাতি দীপেন্তি, অপঞ্ঞত্তং তথাগতেন অপঞ্ঞত্তং তথাগতেনাতি দীপেন্তি, পঞ্ঞত্তং তথাগতেন পঞ্ঞত্তং তথাগতেনাতি দীপেন্তি। তে ইমেহি দসহি ৰত্থূহি ন অৰকস্সন্তি ন অপকস্সন্তি ন আৰেনি কম্মানি করোন্তি ন আৰেনি পাতিমোক্খং উদ্দিসন্তি। এত্তাৰতা খো, আনন্দ, সঙ্ঘো সমগ্গো হোতী’’তি।
40. ‘‘‘Saṅghasāmaggī saṅghasāmaggī’ti, bhante, vuccati. Kittāvatā nu kho, bhante, saṅgho samaggo hotī’’ti? ‘‘Idhānanda, bhikkhū adhammaṃ adhammoti dīpenti, dhammaṃ dhammoti dīpenti, avinayaṃ avinayoti dīpenti , vinayaṃ vinayoti dīpenti, abhāsitaṃ alapitaṃ tathāgatena abhāsitaṃ alapitaṃ tathāgatenāti dīpenti, bhāsitaṃ lapitaṃ tathāgatena bhāsitaṃ lapitaṃ tathāgatenāti dīpenti, anāciṇṇaṃ tathāgatena anāciṇṇaṃ tathāgatenāti dīpenti, āciṇṇaṃ tathāgatena āciṇṇaṃ tathāgatenāti dīpenti, apaññattaṃ tathāgatena apaññattaṃ tathāgatenāti dīpenti, paññattaṃ tathāgatena paññattaṃ tathāgatenāti dīpenti. Te imehi dasahi vatthūhi na avakassanti na apakassanti na āveni kammāni karonti na āveni pātimokkhaṃ uddisanti. Ettāvatā kho, ānanda, saṅgho samaggo hotī’’ti.
‘‘ভিন্নং পন, ভন্তে, সঙ্ঘং সমগ্গং কত্ৰা কিং সো পসৰতী’’তি? ‘‘ব্রহ্মং, আনন্দ, পুঞ্ঞং পসৰতী’’তি। ‘‘কিং পন, ভন্তে, ব্রহ্মং পুঞ্ঞ’’ন্তি? ‘‘কপ্পং, আনন্দ, সগ্গম্হি মোদতীতি –
‘‘Bhinnaṃ pana, bhante, saṅghaṃ samaggaṃ katvā kiṃ so pasavatī’’ti? ‘‘Brahmaṃ, ānanda, puññaṃ pasavatī’’ti. ‘‘Kiṃ pana, bhante, brahmaṃ puñña’’nti? ‘‘Kappaṃ, ānanda, saggamhi modatīti –
‘‘সুখা সঙ্ঘস্স সামগ্গী, সমগ্গানঞ্চ অনুগ্গহো।
‘‘Sukhā saṅghassa sāmaggī, samaggānañca anuggaho;
সমগ্গরতো ধম্মট্ঠো, যোগক্খেমা ন ধংসতি।
Samaggarato dhammaṭṭho, yogakkhemā na dhaṃsati;
সঙ্ঘং সমগ্গং কত্ৰান, কপ্পং সগ্গম্হি মোদতী’’তি॥ দসমং।
Saṅghaṃ samaggaṃ katvāna, kappaṃ saggamhi modatī’’ti. dasamaṃ;
উপালিৰগ্গো চতুত্থো।
Upālivaggo catuttho.
তস্সুদ্দানং –
Tassuddānaṃ –
উপালি ঠপনা উব্বাহো, উপসম্পদনিস্সযা।
Upāli ṭhapanā ubbāho, upasampadanissayā;
সামণেরো চ দ্ৰে ভেদা, আনন্দেহি পরে দুৰেতি॥
Sāmaṇero ca dve bhedā, ānandehi pare duveti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯-১০. আনন্দসুত্তদ্ৰযৰণ্ণনা • 9-10. Ānandasuttadvayavaṇṇanā
