| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
2. து³தியஅனியதஸிக்கா²பத³ங்
2. Dutiyaaniyatasikkhāpadaṃ
452. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ – ‘‘ப⁴க³வதா படிக்கி²த்தங் மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜங் கப்பேது’’ந்தி தஸ்ஸாயேவ குமாரிகாய ஸத்³தி⁴ங் ஏகோ ஏகாய ரஹோ நிஸஜ்ஜங் கப்பேஸி காலயுத்தங் ஸமுல்லபந்தோ காலயுத்தங் த⁴ம்மங் ப⁴ணந்தோ. து³தியம்பி கோ² விஸாகா² மிகா³ரமாதா நிமந்திதா தங் குலங் அக³மாஸி. அத்³த³ஸா கோ² விஸாகா² மிகா³ரமாதா ஆயஸ்மந்தங் உதா³யிங் தஸ்ஸாயேவ குமாரிகாய ஸத்³தி⁴ங் ஏகங் ஏகாய ரஹோ நிஸின்னங். தி³ஸ்வான ஆயஸ்மந்தங் உதா³யிங் ஏதத³வோச – ‘‘இத³ங், ப⁴ந்தே, நச்ச²ன்னங் நப்பதிரூபங் யங் அய்யோ மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பேதி. கிஞ்சாபி, ப⁴ந்தே, அய்யோ அனத்தி²கோ தேன த⁴ம்மேன, அபிச து³ஸ்ஸத்³தா⁴பயா அப்பஸன்னா மனுஸ்ஸா’’தி. ஏவம்பி கோ² ஆயஸ்மா உதா³யீ விஸாகா²ய மிகா³ரமாதுயா வுச்சமானோ நாதி³யி. அத² கோ² விஸாகா² மிகா³ரமாதா நிக்க²மித்வா பி⁴க்கூ²னங் ஏதமத்த²ங் ஆரோசேஸி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பெஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உதா³யிங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங் …பே॰… ‘‘ஸச்சங் கிர த்வங், உதா³யி, மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பேஸீ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம த்வங், மோக⁴புரிஸ, மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பெஸ்ஸஸி! நேதங், மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
452. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī – ‘‘bhagavatā paṭikkhittaṃ mātugāmena saddhiṃ eko ekāya raho paṭicchanne āsane alaṃkammaniye nisajjaṃ kappetu’’nti tassāyeva kumārikāya saddhiṃ eko ekāya raho nisajjaṃ kappesi kālayuttaṃ samullapanto kālayuttaṃ dhammaṃ bhaṇanto. Dutiyampi kho visākhā migāramātā nimantitā taṃ kulaṃ agamāsi. Addasā kho visākhā migāramātā āyasmantaṃ udāyiṃ tassāyeva kumārikāya saddhiṃ ekaṃ ekāya raho nisinnaṃ. Disvāna āyasmantaṃ udāyiṃ etadavoca – ‘‘idaṃ, bhante, nacchannaṃ nappatirūpaṃ yaṃ ayyo mātugāmena saddhiṃ eko ekāya raho nisajjaṃ kappeti. Kiñcāpi, bhante, ayyo anatthiko tena dhammena, apica dussaddhāpayā appasannā manussā’’ti. Evampi kho āyasmā udāyī visākhāya migāramātuyā vuccamāno nādiyi. Atha kho visākhā migāramātā nikkhamitvā bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmena saddhiṃ eko ekāya raho nisajjaṃ kappessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ …pe… ‘‘saccaṃ kira tvaṃ, udāyi, mātugāmena saddhiṃ eko ekāya raho nisajjaṃ kappesī’’ti? ‘‘Saccaṃ bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, mātugāmena saddhiṃ eko ekāya raho nisajjaṃ kappessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
453. ‘‘ந ஹேவ கோ² பன படிச்ச²ன்னங் ஆஸனங் ஹோதி நாலங் கம்மனியங், அலஞ்ச கோ² ஹோதி மாதுகா³மங் து³ட்டு²ல்லாஹி வாசாஹி ஓபா⁴ஸிதுங். யோ பன பி⁴க்கு² ததா²ரூபே ஆஸனே மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பெய்ய, தமேனங் ஸத்³தெ⁴ய்யவசஸா உபாஸிகா தி³ஸ்வா த்³வின்னங் த⁴ம்மானங் அஞ்ஞதரேன வதெ³ய்ய – ஸங்கா⁴தி³ஸேஸேன வா பாசித்தியேன வா. நிஸஜ்ஜங் பி⁴க்கு² படிஜானமானோ த்³வின்னங் த⁴ம்மானங் அஞ்ஞதரேன காரேதப்³போ³ – ஸங்கா⁴தி³ஸேஸேன வா பாசித்தியேன வா. யேன வா ஸா ஸத்³தெ⁴ய்யவசஸா உபாஸிகா வதெ³ய்ய தேன ஸோ பி⁴க்கு² காரேதப்³போ³. அயம்பி த⁴ம்மோ அனியதோ’’தி.
453.‘‘Na heva kho pana paṭicchannaṃ āsanaṃ hoti nālaṃ kammaniyaṃ, alañca kho hoti mātugāmaṃ duṭṭhullāhi vācāhi obhāsituṃ. Yo pana bhikkhu tathārūpe āsane mātugāmena saddhiṃ eko ekāya raho nisajjaṃ kappeyya, tamenaṃ saddheyyavacasā upāsikā disvā dvinnaṃ dhammānaṃ aññatarena vadeyya – saṅghādisesena vā pācittiyena vā. Nisajjaṃ bhikkhu paṭijānamāno dvinnaṃ dhammānaṃ aññatarena kāretabbo – saṅghādisesena vā pācittiyena vā. Yena vā sāsaddheyyavacasā upāsikā vadeyya tena so bhikkhu kāretabbo. Ayampi dhammo aniyato’’ti.
454. ந ஹேவ கோ² பன படிச்ச²ன்னங் ஆஸனங் ஹோதீதி அப்படிச்ச²ன்னங் ஹோதி குட்டேன வா கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கொத்த²ளியா வா யேன கேனசி அப்படிச்ச²ன்னங் ஹோதி.
454.Na hevakho pana paṭicchannaṃ āsanaṃ hotīti appaṭicchannaṃ hoti kuṭṭena vā kavāṭena vā kilañjena vā sāṇipākārena vā rukkhena vā thambhena vā kotthaḷiyā vā yena kenaci appaṭicchannaṃ hoti.
நாலங் கம்மனியந்தி ந ஸக்கா ஹோதி மேது²னங் த⁴ம்மங் படிஸேவிதுங்.
Nālaṃkammaniyanti na sakkā hoti methunaṃ dhammaṃ paṭisevituṃ.
அலஞ்ச கோ² ஹோதி மாதுகா³மங் து³ட்டு²ல்லாஹி வாசாஹி ஓபா⁴ஸிதுந்தி ஸக்கா ஹோதி மாதுகா³மங் து³ட்டு²ல்லாஹி வாசாஹி ஓபா⁴ஸிதுங்.
Alañca kho hoti mātugāmaṃ duṭṭhullāhi vācāhi obhāsitunti sakkā hoti mātugāmaṃ duṭṭhullāhi vācāhi obhāsituṃ.
யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.
Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ததா²ரூபே ஆஸனேதி ஏவரூபே ஆஸனே.
Tathārūpe āsaneti evarūpe āsane.
மாதுகா³மோ நாம மனுஸ்ஸித்தீ², ந யக்கீ² ந பேதீ ந திரச்சா²னக³தா, விஞ்ஞூ படிப³லா ஸுபா⁴ஸிதது³ப்³பா⁴ஸிதங் து³ட்டு²ல்லாது³ட்டு²ல்லங் ஆஜானிதுங்.
Mātugāmo nāma manussitthī, na yakkhī na petī na tiracchānagatā, viññū paṭibalā subhāsitadubbhāsitaṃ duṭṭhullāduṭṭhullaṃ ājānituṃ.
ஸத்³தி⁴ந்தி ஏகதோ.
Saddhinti ekato.
ஏகோ ஏகாயாதி பி⁴க்கு² சேவ ஹோதி மாதுகா³மோ ச.
Eko ekāyāti bhikkhu ceva hoti mātugāmo ca.
ரஹோ நாம சக்கு²ஸ்ஸ ரஹோ, ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ங் வா நிக²ணீயமானே ப⁴முகங் வா உக்கி²பீயமானே ஸீஸங் வா உக்கி²பீயமானே பஸ்ஸிதுங். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோதுங்.
Raho nāma cakkhussa raho, sotassa raho. Cakkhussa raho nāma na sakkā hoti akkhiṃ vā nikhaṇīyamāne bhamukaṃ vā ukkhipīyamāne sīsaṃ vā ukkhipīyamāne passituṃ. Sotassa raho nāma na sakkā hoti pakatikathā sotuṃ.
நிஸஜ்ஜங் கப்பெய்யாதி மாதுகா³மே நிஸின்னே பி⁴க்கு² உபனிஸின்னோ வா ஹோதி உபனிபன்னோ வா. பி⁴க்கு² நிஸின்னே மாதுகா³மோ உபனிஸின்னோ வா ஹோதி உபனிபன்னோ வா. உபோ⁴ வா நிஸின்னா ஹொந்தி உபோ⁴ வா நிபன்னா.
Nisajjaṃ kappeyyāti mātugāme nisinne bhikkhu upanisinno vā hoti upanipanno vā. Bhikkhu nisinne mātugāmo upanisinno vā hoti upanipanno vā. Ubho vā nisinnā honti ubho vā nipannā.
ஸத்³தெ⁴ய்யவசஸா நாம ஆக³தப²லா அபி⁴ஸமேதாவினீ விஞ்ஞாதஸாஸனா.
Saddheyyavacasā nāma āgataphalā abhisametāvinī viññātasāsanā.
உபாஸிகா நாம பு³த்³த⁴ங் ஸரணங் க³தா, த⁴ம்மங் ஸரணங் க³தா, ஸங்க⁴ங் ஸரணங் க³தா.
Upāsikā nāma buddhaṃ saraṇaṃ gatā, dhammaṃ saraṇaṃ gatā, saṅghaṃ saraṇaṃ gatā.
தி³ஸ்வாதி பஸ்ஸித்வா.
Disvāti passitvā.
த்³வின்னங் த⁴ம்மானங் அஞ்ஞதரேன வதெ³ய்ய ஸங்கா⁴தி³ஸேஸேன வா பாசித்தியேன வா. நிஸஜ்ஜங் பி⁴க்கு² படிஜானமானோ த்³வின்னங் த⁴ம்மானங் அஞ்ஞதரேன காரேதப்³போ³ – ஸங்கா⁴தி³ஸேஸேன வா பாசித்தியேன வா. யேன வா ஸா ஸத்³தெ⁴ய்யவசஸா உபாஸிகா வதெ³ய்ய, தேன ஸோ பி⁴க்கு² காரேதப்³போ³.
Dvinnaṃ dhammānaṃ aññatarena vadeyya saṅghādisesena vā pācittiyena vā. Nisajjaṃ bhikkhu paṭijānamāno dvinnaṃ dhammānaṃ aññatarena kāretabbo – saṅghādisesena vā pācittiyena vā. Yena vā sā saddheyyavacasā upāsikā vadeyya, tena so bhikkhu kāretabbo.
455. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’தி, ஸோ ச தங் படிஜானாதி, ஆபத்தியா காரேதப்³போ³. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’தி, ஸோ சே ஏவங் வதெ³ய்ய – ‘‘ஸச்சாஹங் நிஸின்னோ, நோ ச கோ² காயஸங்ஸக்³க³ங் ஸமாபஜ்ஜி’’ந்தி, நிஸஜ்ஜாய காரேதப்³போ³…பே॰… நாஹங் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே॰… நாஹங் நிஸின்னோ, அபிச கோ² டி²தோதி, ந காரேதப்³போ³.
455. Sā ce evaṃ vadeyya – ‘‘ayyo mayā diṭṭho nisinno mātugāmena saddhiṃ kāyasaṃsaggaṃ samāpajjanto’’ti, so ca taṃ paṭijānāti, āpattiyā kāretabbo. Sā ce evaṃ vadeyya – ‘‘ayyo mayā diṭṭho nisinno mātugāmena saddhiṃ kāyasaṃsaggaṃ samāpajjanto’’ti, so ce evaṃ vadeyya – ‘‘saccāhaṃ nisinno, no ca kho kāyasaṃsaggaṃ samāpajji’’nti, nisajjāya kāretabbo…pe… nāhaṃ nisinno, apica kho nipannoti, nipajjāya kāretabbo…pe… nāhaṃ nisinno, apica kho ṭhitoti, na kāretabbo.
ஸா சே ஏவங் வதெ³ய்ய – ‘‘அய்யோ மயா தி³ட்டோ² நிபன்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’தி, ஸோ ச தங் படிஜானாதி, ஆபத்தியா காரேதப்³போ³…பே॰… ஸச்சாஹங் நிபன்னோ, நோ ச கோ² காயஸங்ஸக்³க³ங் ஸமாபஜ்ஜிந்தி, நிபஜ்ஜாய காரேதப்³போ³…பே॰… நாஹங் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³ …பே॰… நாஹங் நிபன்னோ, அபிச கோ² டி²தோதி, ந காரேதப்³போ³.
Sā ce evaṃ vadeyya – ‘‘ayyo mayā diṭṭho nipanno mātugāmena saddhiṃ kāyasaṃsaggaṃ samāpajjanto’’ti, so ca taṃ paṭijānāti, āpattiyā kāretabbo…pe… saccāhaṃ nipanno, no ca kho kāyasaṃsaggaṃ samāpajjinti, nipajjāya kāretabbo…pe… nāhaṃ nipanno, apica kho nisinnoti, nisajjāya kāretabbo …pe… nāhaṃ nipanno, apica kho ṭhitoti, na kāretabbo.
ஸா சே ஏவங் வதெ³ய்ய – ‘‘அய்யஸ்ஸ மயா ஸுதங் நிஸின்னஸ்ஸ மாதுகா³மங் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ ச தங் படிஜானாதி, ஆபத்தியா காரேதப்³போ³. ஸா சே ஏவங் வதெ³ய்ய – ‘‘அய்யஸ்ஸ மயா ஸுதங் நிஸின்னஸ்ஸ மாதுகா³மங் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ சே ஏவங் வதெ³ய்ய – ‘‘ஸச்சாஹங் நிஸின்னோ, நோ ச கோ² து³ட்டு²ல்லாஹி வாசாஹி ஓபா⁴ஸி’’ந்தி, நிஸஜ்ஜாய காரேதப்³போ³…பே॰… நாஹங் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே॰… நாஹங் நிஸின்னோ, அபிச கோ² டி²தோதி, ந காரேதப்³போ³.
Sā ce evaṃ vadeyya – ‘‘ayyassa mayā sutaṃ nisinnassa mātugāmaṃ duṭṭhullāhi vācāhi obhāsantassā’’ti, so ca taṃ paṭijānāti, āpattiyā kāretabbo. Sā ce evaṃ vadeyya – ‘‘ayyassa mayā sutaṃ nisinnassa mātugāmaṃ duṭṭhullāhi vācāhi obhāsantassā’’ti, so ce evaṃ vadeyya – ‘‘saccāhaṃ nisinno, no ca kho duṭṭhullāhi vācāhi obhāsi’’nti, nisajjāya kāretabbo…pe… nāhaṃ nisinno, apica kho nipannoti, nipajjāya kāretabbo…pe… nāhaṃ nisinno, apica kho ṭhitoti, na kāretabbo.
ஸா சே ஏவங் வதெ³ய்ய – ‘‘அய்யஸ்ஸ மயா ஸுதங் நிபன்னஸ்ஸ மாதுகா³மங் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ ச தங் படிஜானாதி, ஆபத்தியா காரேதப்³போ³…பே॰… ஸச்சாஹங் நிபன்னோ நோ ச கோ² து³ட்டு²ல்லாஹி வாசாஹி ஓபா⁴ஸிந்தி, நிபஜ்ஜாய காரேதப்³போ³…பே॰… நாஹங் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே॰… நாஹங் நிபன்னோ, அபிச கோ² டி²தோதி, ந காரேதப்³போ³.
Sā ce evaṃ vadeyya – ‘‘ayyassa mayā sutaṃ nipannassa mātugāmaṃ duṭṭhullāhi vācāhi obhāsantassā’’ti, so ca taṃ paṭijānāti, āpattiyā kāretabbo…pe… saccāhaṃ nipanno no ca kho duṭṭhullāhi vācāhi obhāsinti, nipajjāya kāretabbo…pe… nāhaṃ nipanno, apica kho nisinnoti, nisajjāya kāretabbo…pe… nāhaṃ nipanno, apica kho ṭhitoti, na kāretabbo.
456. ஸா சே ஏவங் வதெ³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ங் ஏகோ ஏகாய ரஹோ நிஸின்னோ’’தி, ஸோ ச தங் படிஜானாதி, நிஸஜ்ஜாய காரேதப்³போ³…பே॰… நாஹங் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே॰… நாஹங் நிஸின்னோ, அபிச கோ² டி²தோதி, ந காரேதப்³போ³.
456. Sā ce evaṃ vadeyya – ‘‘ayyo mayā diṭṭho mātugāmena saddhiṃ eko ekāya raho nisinno’’ti, so ca taṃ paṭijānāti, nisajjāya kāretabbo…pe… nāhaṃ nisinno, apica kho nipannoti, nipajjāya kāretabbo…pe… nāhaṃ nisinno, apica kho ṭhitoti, na kāretabbo.
ஸா சே ஏவங் வதெ³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ங் ஏகோ ஏகாய ரஹோ நிபன்னோ’’தி, ஸோ ச தங் படிஜானாதி, நிபஜ்ஜாய காரேதப்³போ³…பே॰… நாஹங் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே॰… நாஹங் நிபன்னோ, அபிச கோ² டி²தோதி, ந காரேதப்³போ³.
Sā ce evaṃ vadeyya – ‘‘ayyo mayā diṭṭho mātugāmena saddhiṃ eko ekāya raho nipanno’’ti, so ca taṃ paṭijānāti, nipajjāya kāretabbo…pe… nāhaṃ nipanno, apica kho nisinnoti, nisajjāya kāretabbo…pe… nāhaṃ nipanno, apica kho ṭhitoti, na kāretabbo.
அயம்பீதி புரிமங் உபாதா³ய வுச்சதி.
Ayampīti purimaṃ upādāya vuccati.
அனியதோதி ந நியதோ, ஸங்கா⁴தி³ஸேஸோ வா பாசித்தியங் வா.
Aniyatoti na niyato, saṅghādiseso vā pācittiyaṃ vā.
457. க³மனங் படிஜானாதி நிஸஜ்ஜங் படிஜானாதி ஆபத்திங் படிஜானாதி, ஆபத்தியா காரேதப்³போ³. க³மனங் படிஜானாதி நிஸஜ்ஜங் ந படிஜானாதி ஆபத்திங் படிஜானாதி, ஆபத்தியா காரேதப்³போ³. க³மனங் படிஜானாதி நிஸஜ்ஜங் படிஜானாதி ஆபத்திங் ந படிஜானாதி, நிஸஜ்ஜாய காரேதப்³போ³. க³மனங் படிஜானாதி நிஸஜ்ஜங் ந படிஜானாதி ஆபத்திங் ந படிஜானாதி, ந காரேதப்³போ³.
457. Gamanaṃ paṭijānāti nisajjaṃ paṭijānāti āpattiṃ paṭijānāti, āpattiyā kāretabbo. Gamanaṃ paṭijānāti nisajjaṃ na paṭijānāti āpattiṃ paṭijānāti, āpattiyā kāretabbo. Gamanaṃ paṭijānāti nisajjaṃ paṭijānāti āpattiṃ na paṭijānāti, nisajjāya kāretabbo. Gamanaṃ paṭijānāti nisajjaṃ na paṭijānāti āpattiṃ na paṭijānāti, na kāretabbo.
க³மனங் ந படிஜானாதி நிஸஜ்ஜங் படிஜானாதி ஆபத்திங் படிஜானாதி, ஆபத்தியா காரேதப்³போ³. க³மனங் ந படிஜானாதி நிஸஜ்ஜங் ந படிஜானாதி ஆபத்திங் படிஜானாதி, ஆபத்தியா காரேதப்³போ³. க³மனங் ந படிஜானாதி நிஸஜ்ஜங் படிஜானாதி ஆபத்திங் ந படிஜானாதி , நிஸஜ்ஜாய காரேதப்³போ³. க³மனங் ந படிஜானாதி நிஸஜ்ஜங் ந படிஜானாதி ஆபத்திங் ந படிஜானாதி, ந காரேதப்³போ³தி.
Gamanaṃ na paṭijānāti nisajjaṃ paṭijānāti āpattiṃ paṭijānāti, āpattiyā kāretabbo. Gamanaṃ na paṭijānāti nisajjaṃ na paṭijānāti āpattiṃ paṭijānāti, āpattiyā kāretabbo. Gamanaṃ na paṭijānāti nisajjaṃ paṭijānāti āpattiṃ na paṭijānāti , nisajjāya kāretabbo. Gamanaṃ na paṭijānāti nisajjaṃ na paṭijānāti āpattiṃ na paṭijānāti, na kāretabboti.
து³தியோ அனியதோ நிட்டி²தோ.
Dutiyo aniyato niṭṭhito.
458. உத்³தி³ட்டா² கோ² ஆயஸ்மந்தோ த்³வே அனியதா த⁴ம்மா. தத்தா²யஸ்மந்தே புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தெ⁴த்தா²யஸ்மந்தோ; தஸ்மா துண்ஹீ, ஏவமேதங் தா⁴ரயாமீதி.
458. Uddiṭṭhā kho āyasmanto dve aniyatā dhammā. Tatthāyasmante pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyasmanto; tasmā tuṇhī, evametaṃ dhārayāmīti.
தஸ்ஸுத்³தா³னங் –
Tassuddānaṃ –
அலங் கம்மனியஞ்சேவ, ததே²வ ச நஹேவ கோ²;
Alaṃ kammaniyañceva, tatheva ca naheva kho;
அனியதா ஸுபஞ்ஞத்தா, பு³த்³த⁴ஸெட்டே²ன தாதி³னாதி.
Aniyatā supaññattā, buddhaseṭṭhena tādināti.
அனியதகண்ட³ங் நிட்டி²தங்.
Aniyatakaṇḍaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
