| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. து³தியஅனியதஸிக்கா²பத³வண்ணனா
2. Dutiyaaniyatasikkhāpadavaṇṇanā
நஹேவ கோ² பன படிச்ச²ன்னந்தி எத்த² பன யம்பி ப³ஹி பரிக்கி²த்தங் அந்தோ விவடங் பரிவேணங்க³ணாதி³, தம்பி அந்தோக³த⁴ந்தி வேதி³தப்³ப³ங். ‘‘ஏவரூபஞ்ஹி டா²னங் அப்படிச்ச²ன்னேயேவ க³ஹித’’ந்தி மஹாபச்சரியங் (பாரா॰ அட்ட²॰ 2.453) வுத்தங். ஸங்கா⁴தி³ஸேஸேன வாதி காயஸங்ஸக்³க³து³ட்டு²ல்லோபா⁴ஸனஸங்கா²தேன ஸங்கா⁴தி³ஸேஸேன வா. தேனேவ ஹி பத³பா⁴ஜனே ‘‘ஸா சே ஏவங் வதெ³ய்ய ‘அய்யோ, மயா தி³ட்டோ² நிஸின்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’’திஆதி³ (பாரா॰ 455) வுத்தங். இத³ங் ஸிக்கா²பத³ங் து³ட்டு²ல்லவாசாவஸேன ஆக³தங். து³ட்டு²ல்லவாசஞ்ச ஸுத்வா தங் மாதுகா³மோபி ந படிச்சா²தே³தி. ததா² ஹி து³ட்டு²ல்லவாசாஸிக்கா²பதே³ (பாரா॰ 283 ஆத³யோ) யா பன தா இத்தி²யோ ஹிரிமனா, தா நிக்க²மித்வா பி⁴க்கூ² உஜ்ஜா²பேஸுங், தஸ்மா இத⁴ இத்தீ²பி அனாபத்திங் கரோதீதி ஆஹ ‘‘இத்தீ²பீ’’தி. அத² வா இத⁴ அப்படிச்ச²ன்னத்தா இத்தீ²பி அனாபத்திங் கரோதி, பட²மே பன படிச்ச²ன்னத்தா இத்தி²ஸதம்பி அனாபத்திங் ந கரோதீதி ஏவமெத்த² அத்தோ² த³ட்ட²ப்³போ³. அனந்தோ⁴ அப³தி⁴ரோதி எத்த² காயஸங்ஸக்³க³வஸேன அனந்தோ⁴ வுத்தோ, து³ட்டு²ல்லவாசாவஸேன அப³தி⁴ரோ.
Naheva kho pana paṭicchannanti ettha pana yampi bahi parikkhittaṃ anto vivaṭaṃ pariveṇaṅgaṇādi, tampi antogadhanti veditabbaṃ. ‘‘Evarūpañhi ṭhānaṃ appaṭicchanneyeva gahita’’nti mahāpaccariyaṃ (pārā. aṭṭha. 2.453) vuttaṃ. Saṅghādisesena vāti kāyasaṃsaggaduṭṭhullobhāsanasaṅkhātena saṅghādisesena vā. Teneva hi padabhājane ‘‘sā ce evaṃ vadeyya ‘ayyo, mayā diṭṭho nisinno mātugāmena saddhiṃ kāyasaṃsaggaṃ samāpajjanto’’’tiādi (pārā. 455) vuttaṃ. Idaṃ sikkhāpadaṃ duṭṭhullavācāvasena āgataṃ. Duṭṭhullavācañca sutvā taṃ mātugāmopi na paṭicchādeti. Tathā hi duṭṭhullavācāsikkhāpade (pārā. 283 ādayo) yā pana tā itthiyo hirimanā, tā nikkhamitvā bhikkhū ujjhāpesuṃ, tasmā idha itthīpi anāpattiṃ karotīti āha ‘‘itthīpī’’ti. Atha vā idha appaṭicchannattā itthīpi anāpattiṃ karoti, paṭhame pana paṭicchannattā itthisatampi anāpattiṃ na karotīti evamettha attho daṭṭhabbo. Anandho abadhiroti ettha kāyasaṃsaggavasena anandho vutto, duṭṭhullavācāvasena abadhiro.
ஸமுட்டா²னாதீ³ஸு இத³ங் ஸிக்கா²பத³ங் திஸமுட்டா²னங் – காயசித்ததோ வாசாசித்ததோ காயவாசாசித்ததோ ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், ஸுக²மஜ்ஜ²த்தவேத³னாஹி த்³விவேத³னங். தேனாஹ ‘‘ஸமுட்டா²னாதீ³னி பனெத்த² அதி³ன்னாதா³னஸதி³ஸானேவா’’தி. எத்த² ச காயஸங்ஸக்³க³ங் ஸமாபஜ்ஜந்தோ து³ட்டு²ல்லம்பி ப⁴ணதி, து³ட்டு²ல்லங் ப⁴ணந்தோ நிஸீத³தி சாதி ‘‘காயவாசாசித்ததோ ச ஸமுட்டா²தீ’’தி வுத்தங், து³ட்டு²ல்லமேவ வா ஸந்தா⁴ய வுத்தந்தி க³ஹேதப்³ப³ங்.
Samuṭṭhānādīsu idaṃ sikkhāpadaṃ tisamuṭṭhānaṃ – kāyacittato vācācittato kāyavācācittato samuṭṭhāti, kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, sukhamajjhattavedanāhi dvivedanaṃ. Tenāha ‘‘samuṭṭhānādīni panettha adinnādānasadisānevā’’ti. Ettha ca kāyasaṃsaggaṃ samāpajjanto duṭṭhullampi bhaṇati, duṭṭhullaṃ bhaṇanto nisīdati cāti ‘‘kāyavācācittato ca samuṭṭhātī’’ti vuttaṃ, duṭṭhullameva vā sandhāya vuttanti gahetabbaṃ.
து³தியஅனியதஸிக்கா²பத³வண்ணனா நிட்டி²தா.
Dutiyaaniyatasikkhāpadavaṇṇanā niṭṭhitā.
‘‘அனியதுத்³தே³ஸோ சாயங் தி³ட்டா²தி³ஸமூலகசோத³னாய வத்து²ங் படிஜானமானோவ ஆபத்தியா காரேதப்³போ³, ந இதரோதி ஆபத்திரோபனாரோபனலக்க²ணத³ஸ்ஸனத்த²ங் வுத்தோ’’தி வத³ந்தி.
‘‘Aniyatuddeso cāyaṃ diṭṭhādisamūlakacodanāya vatthuṃ paṭijānamānova āpattiyā kāretabbo, na itaroti āpattiropanāropanalakkhaṇadassanatthaṃ vutto’’ti vadanti.
இதி கங்கா²விதரணியா பாதிமொக்க²வண்ணனாய
Iti kaṅkhāvitaraṇiyā pātimokkhavaṇṇanāya
வினயத்த²மஞ்ஜூஸாயங் லீனத்த²ப்பகாஸனியங்
Vinayatthamañjūsāyaṃ līnatthappakāsaniyaṃ
அனியதவண்ணனா நிட்டி²தா.
Aniyatavaṇṇanā niṭṭhitā.
