| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
2. து³தியஅனியதஸிக்கா²பத³வண்ணனா
2. Dutiyaaniyatasikkhāpadavaṇṇanā
453. து³தியே கேஸுசி பொத்த²கேஸு ‘‘ந ஹேவ கோ² பன படிச்ச²ன்னங் ஆஸனங் ஹோதி ஆஸன’’ந்தி லிகி²தங். ‘‘ஆஸனந்தி அதி⁴கங், உத்³த⁴ரிதானுரூப’’ந்தி லிகி²தங். த்³வேபி ரஹா இத⁴ அதி⁴ப்பேதா காயஸங்ஸக்³க³து³ட்டு²ல்லவாசாரஹோனிஸஜ்ஜக்³க³ஹணதோ. யதி³ ஏவங் ‘‘மாதுகா³மோ நாம விஞ்ஞூ படிப³லா’’தி கிமத்த²ங் வுத்தந்தி? அயமேவ ஹி மாதுகா³மோ த்³வின்னம்பி காயஸங்ஸக்³க³து³ட்டு²ல்லவாசானங் ஏகதோ வத்து²பூ⁴தோ, தஸ்மா வுத்தங். காயஸங்ஸக்³க³ஸ்ஸ வத்து²பூ⁴தோ த³ஸ்ஸிதோ, ந இதரஸ்ஸாதி கத்வா து³ட்டு²ல்லவாசமேவ ஸந்தா⁴ய தஸ்ஸா வத்து²ங் த³ஸ்ஸெந்தோ ஏவமாஹ.
453. Dutiye kesuci potthakesu ‘‘na heva kho pana paṭicchannaṃ āsanaṃ hoti āsana’’nti likhitaṃ. ‘‘Āsananti adhikaṃ, uddharitānurūpa’’nti likhitaṃ. Dvepi rahā idha adhippetā kāyasaṃsaggaduṭṭhullavācārahonisajjaggahaṇato. Yadi evaṃ ‘‘mātugāmo nāma viññū paṭibalā’’ti kimatthaṃ vuttanti? Ayameva hi mātugāmo dvinnampi kāyasaṃsaggaduṭṭhullavācānaṃ ekato vatthubhūto, tasmā vuttaṃ. Kāyasaṃsaggassa vatthubhūto dassito, na itarassāti katvā duṭṭhullavācameva sandhāya tassā vatthuṃ dassento evamāha.
எத்தா²ஹ – யதா² பட²மே அனதி⁴ப்பேதாபி து³ட்டு²ல்லவாசா ஸம்ப⁴வவிஸேஸத³ஸ்ஸனத்த²ங் வுத்தா, இதா⁴பி காயஸங்ஸக்³கோ³, கஸ்மா ந தஸ்ஸ வஸேன சக்கு²ஸ்ஸ ரஹோ க³ஹேதப்³போ³தி? ஆம ந க³ஹேதப்³போ³, ந ச க³ஹிதோ, க³ஹிதோ ஏவ பன நிஸஜ்ஜவஸேன, ந ஹி அங்க³ஸ்ஸ நிஸஜ்ஜா விஸேஸோதி. அப்படிச்ச²ன்னே ஸதி கத²ங் சக்கு²ஸ்ஸ ரஹோதி சே? தூ³ரத்தா. பட²மே கஸ்மா இத்தி²ஸதம்பி அனாபத்திங் ந கரோதி, இத⁴ கஸ்மா ஏகாபி கரோதீதி சே? நோ வுச்சதி ஸித்³த⁴த்தா. ஸித்³த⁴ங் ஹோதி, யதி³த³ங் அஞ்ஞதரோ பி⁴க்கு² வேஸாலியங் மஹாவனே…பே॰… த்³வாரங் விவரித்வா நிபன்னோ ஹோதி…பே॰… ஸம்ப³ஹுலா இத்தி²யோ யாவத³த்த²ங் கத்வா பக்கமிங்ஸூதி (பாரா॰ 77). தஸ்மா ந மேது²னஸ்ஸ மாதுகா³மோ து³தியோ ஹோதி. இத்தி²யோ ஹி அஞ்ஞமஞ்ஞிஸ்ஸா வஜ்ஜங் படிச்சா²தெ³ந்தி, தேனேவ பி⁴க்கு²னீனங் வஜ்ஜபடிச்சா²த³னே பாராஜிகங் பஞ்ஞத்தங். ததா² ‘‘ஆயஸ்மா உதா³யீ தா இத்தி²யோ விஹாரங் பெக்கா²பெத்வா தாஸங் இத்தீ²னங் வச்சமக்³க³’’ந்தி (பாரா॰ 283) எத்த² ‘‘யா பன தா இத்தி²யோ ஹிரிமனா, தா நிக்க²மித்வா பி⁴க்கூ² உஜ்ஜா²பெந்தீ’’தி (பாரா॰ 283) வசனதோ து³ட்டு²ல்லஸ்ஸ மாதுகா³மோ து³தியோ ஹோதீதி ஸித்³த⁴ந்தி அதி⁴ப்பாயோ. உப⁴யத்தா²பி உம்மத்தகாதி³கம்மிகானங் அனாபத்தீதி தேஸங் பாடேக்கங் நிதா³னே ஆக³தங், ஆதி³கம்மிகானங் அனாபத்தீதி அத்தோ². அனுக³ண்டி²பதே³ பன ‘‘அசேலகவக்³கே³ ரஹோபடிச்ச²ன்னாஸனஸிக்கா²பதே³ ‘விஞ்ஞூ புரிஸோ து³தியோ ஹோதீ’தி (பாசி॰ 288) இமஸ்ஸ அனுரூபதோ ‘இத்தீ²னங் ஸதம்பி அனாபத்திங் ந கரோதீ’தி வுத்த’’ந்தி ச, ‘‘து³தியானியதே ‘இத்தீ²பி புரிஸோபீ’தி இத³ங் பி⁴க்கு²னீவக்³கே³ ஓஸானஸிக்கா²பத³ஸ்ஸ, அசேலகவக்³கே³ அப்படிச்ச²ன்னாஸனஸிக்கா²பத³ஸ்ஸ ச அனாபத்திவாரே ‘யோ கோசி விஞ்ஞூ புரிஸோ து³தியோ’தி வுத்தங். இமேஸங் அனுரூபதோ வுத்தந்தி வேதி³தப்³ப³’’ந்தி ச வுத்தங்.
Etthāha – yathā paṭhame anadhippetāpi duṭṭhullavācā sambhavavisesadassanatthaṃ vuttā, idhāpi kāyasaṃsaggo, kasmā na tassa vasena cakkhussa raho gahetabboti? Āma na gahetabbo, na ca gahito, gahito eva pana nisajjavasena, na hi aṅgassa nisajjā visesoti. Appaṭicchanne sati kathaṃ cakkhussa rahoti ce? Dūrattā. Paṭhame kasmā itthisatampi anāpattiṃ na karoti, idha kasmā ekāpi karotīti ce? No vuccati siddhattā. Siddhaṃ hoti, yadidaṃ aññataro bhikkhu vesāliyaṃ mahāvane…pe… dvāraṃ vivaritvā nipanno hoti…pe… sambahulā itthiyo yāvadatthaṃ katvā pakkamiṃsūti (pārā. 77). Tasmā na methunassa mātugāmo dutiyo hoti. Itthiyo hi aññamaññissā vajjaṃ paṭicchādenti, teneva bhikkhunīnaṃ vajjapaṭicchādane pārājikaṃ paññattaṃ. Tathā ‘‘āyasmā udāyī tā itthiyo vihāraṃ pekkhāpetvā tāsaṃ itthīnaṃ vaccamagga’’nti (pārā. 283) ettha ‘‘yā pana tā itthiyo hirimanā, tā nikkhamitvā bhikkhū ujjhāpentī’’ti (pārā. 283) vacanato duṭṭhullassa mātugāmo dutiyo hotīti siddhanti adhippāyo. Ubhayatthāpi ummattakādikammikānaṃ anāpattīti tesaṃ pāṭekkaṃ nidāne āgataṃ, ādikammikānaṃ anāpattīti attho. Anugaṇṭhipade pana ‘‘acelakavagge rahopaṭicchannāsanasikkhāpade ‘viññū puriso dutiyo hotī’ti (pāci. 288) imassa anurūpato ‘itthīnaṃ satampi anāpattiṃ na karotī’ti vutta’’nti ca, ‘‘dutiyāniyate ‘itthīpi purisopī’ti idaṃ bhikkhunīvagge osānasikkhāpadassa, acelakavagge appaṭicchannāsanasikkhāpadassa ca anāpattivāre ‘yo koci viññū puriso dutiyo’ti vuttaṃ. Imesaṃ anurūpato vuttanti veditabba’’nti ca vuttaṃ.
து³தியஅனியதஸிக்கா²பத³வண்ணனா நிட்டி²தா.
Dutiyaaniyatasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியஅனியதஸிக்கா²பத³ங் • 2. Dutiyaaniyatasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
