| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
2. து³தியஅனியதஸிக்கா²பத³வண்ணனா
2. Dutiyaaniyatasikkhāpadavaṇṇanā
452. ‘‘ந லப⁴தி மாதுகா³மேன ஸத்³தி⁴ங் ஏகோ ஏகாய…பே॰… நிஸஜ்ஜங் கப்பேது’’ந்தி அவத்வா ‘‘படிக்கி²த்தங் மாதுகா³மேனா’’திஆதி³னா வுத்தத்தா ‘‘ஏகோ’’தி பச்சத்தபத³ங் படிக்கி²த்தபதே³ன ந ஸமேதி, ‘‘ஏகஸ்ஸா’’தி வத்தப்³போ³தி ஸாதெ⁴ந்தோ ஆஹ ‘‘இதரதா² ஹீ’’திஆதி³.
452. ‘‘Na labhati mātugāmena saddhiṃ eko ekāya…pe… nisajjaṃ kappetu’’nti avatvā ‘‘paṭikkhittaṃ mātugāmenā’’tiādinā vuttattā ‘‘eko’’ti paccattapadaṃ paṭikkhittapadena na sameti, ‘‘ekassā’’ti vattabboti sādhento āha ‘‘itarathā hī’’tiādi.
453. பரிவேணங்க³ணாதீ³தி பரிவேணஸ்ஸ மாளகங். ஆதி³-ஸத்³தே³ன பாகாராதி³பரிக்கி²த்தங் சேதியமாளகாதி³ங் ஸங்க³ண்ஹாதி. அந்தோக³த⁴ந்தி அப்படிச்ச²ன்னட்டா²னே ஏவ பரியாபன்னங். இத⁴ இத்தீ²பி அனாபத்திங் கரோதீதி ஸம்ப³ந்தோ⁴. கஸ்மா பன இத்தீ² இதே⁴வ அனாபத்திங் கரோதி, ந புரிமஸிக்கா²பதே³தி? இமஸ்ஸ ஸிக்கா²பத³ஸ்ஸ மேது²னங் வினா து³ட்டு²ல்லவாசாய வஸேன ஆக³தத்தா. மேது²னமேவ ஹி இத்தி²யோ அஞ்ஞமஞ்ஞங் படிச்சா²தெ³ந்தி மஹாவனே த்³வாரங் விவரித்வா நித்³தூ³பக³தம்ஹி பி⁴க்கு²ம்ஹி விய. து³ட்டு²ல்லங் பன ந படிச்சா²தெ³ந்தி, தேனேவ து³ட்டு²ல்லவாசாஸிக்கா²பதே³ ‘‘யா தா இத்தி²யோ ஹிரிமனா, தா நிக்க²மித்வா பி⁴க்கூ² உஜ்ஜா²பேஸு’’ந்தி (பாரா॰ 283) வுத்தங், தஸ்மா ‘‘இத்தீ²பி அனாபத்திங் கரோதீ’’தி வுத்தங், ‘‘அப்படிச்ச²ன்னட்டா²னத்தா’’திபி காரணங் வத³ந்தி.
453.Pariveṇaṅgaṇādīti pariveṇassa māḷakaṃ. Ādi-saddena pākārādiparikkhittaṃ cetiyamāḷakādiṃ saṅgaṇhāti. Antogadhanti appaṭicchannaṭṭhāne eva pariyāpannaṃ. Idha itthīpi anāpattiṃ karotīti sambandho. Kasmā pana itthī idheva anāpattiṃ karoti, na purimasikkhāpadeti? Imassa sikkhāpadassa methunaṃ vinā duṭṭhullavācāya vasena āgatattā. Methunameva hi itthiyo aññamaññaṃ paṭicchādenti mahāvane dvāraṃ vivaritvā niddūpagatamhi bhikkhumhi viya. Duṭṭhullaṃ pana na paṭicchādenti, teneva duṭṭhullavācāsikkhāpade ‘‘yā tā itthiyo hirimanā, tā nikkhamitvā bhikkhū ujjhāpesu’’nti (pārā. 283) vuttaṃ, tasmā ‘‘itthīpi anāpattiṃ karotī’’ti vuttaṃ, ‘‘appaṭicchannaṭṭhānattā’’tipi kāraṇaṃ vadanti.
காயேனாபி து³ட்டு²ல்லோபா⁴ஸஸம்ப⁴வதோ இமஸ்மிங் ஸிக்கா²பதே³ சக்கு²ஸ்ஸ ரஹோ, ஸோதஸ்ஸ ரஹோ ச அதி⁴ப்பேதோதி ஆஹ ‘‘அனந்தோ⁴ அப³தி⁴ரோ’’திஆதி³. கேசி பன விப⁴ங்கே³ ‘‘நாலங் கம்மனியந்தி ந ஸக்கா ஹோதி மேது²னங் த⁴ம்மங் படிஸேவிது’ந்தி (பாரா॰ 454) எத்தகமேவ வத்வா ‘ந ஸக்கா ஹோதி காயஸங்ஸக்³க³ங் ஸமாபஜ்ஜிது’ந்தி அவுத்தத்தா அப்படிச்ச²ன்னேபி டா²னே ரஹோ அஞ்ஞேஸங் அபா⁴வங் தி³ஸ்வா ஏகாய இத்தி²யா காயஸங்ஸக்³கோ³பி ஸக்கா ஆபஜ்ஜிதுந்தி அந்தொத்³வாத³ஸஹத்தே² ஸவனூபசாரே டி²தோ அப³தி⁴ரோபி அந்தோ⁴ காயஸங்ஸக்³க³ஸ்ஸாபி ஸப்³பா⁴வாபா⁴வங் ந ஜானாதீதி காயேன து³ட்டு²ல்லோபா⁴ஸனஸப்³பா⁴வங் அமனஸிகத்வாபி காயஸங்ஸக்³கா³பத்தியாபி பரிஹாராய அனந்தோ⁴ அப³தி⁴ரோதிஆதி³ வுத்த’’ந்தி வத³ந்தி. யங் பன ஸாரத்த²தீ³பனியங் ‘‘காயஸங்ஸக்³க³வஸேன அனந்தோ⁴ வுத்தோ’’தி (ஸாரத்த²॰ டீ॰ 2.453) வுத்தங், தங் பன காயேன து³ட்டு²ல்லோபா⁴ஸனஸம்ப⁴வங் அமனஸிகத்வா வுத்தங், காயஸங்ஸக்³க³வஸேனாபீதி க³ஹேதப்³ப³ங். தேனேவ ‘‘இமஸ்மிங் ஸிக்கா²பதே³ ஸோதஸ்ஸ ரஹோ ஏவ அதி⁴ப்பேதோ…பே॰… கேனசி பன ‘த்³வேபி ரஹா இத⁴ அதி⁴ப்பேதா’தி வுத்தங், தங் ந க³ஹேதப்³ப³’’ந்தி வுத்தங். யங் பன சக்கு²ஸ்ஸ ரஹாபா⁴வஸாத⁴னத்த²ங் ‘‘ந ஹி அப்படிச்ச²ன்னே ஓகாஸே சக்கு²ஸ்ஸ ரஹோ ஸம்ப⁴வதீ’’திஆதி³ வுத்தங், தங் ந யுத்தங் அதிதூ³ரதரே டி²தஸ்ஸ காயேன ஓபா⁴ஸனம்பி ஹத்த²க்³கா³ஹாதீ³னிபி ஸல்லக்கே²துங் அஸக்குணெய்யத்தா. தேனேவ பாளியங் ‘‘சக்கு²ஸ்ஸ ரஹோ’’தி வுத்தங், அட்ட²கதா²யங் அப்படிக்கி²த்தங். ந கேவலஞ்ச அப்படிக்கி²த்தங், அத² கோ² ‘‘அனந்தோ⁴ ப³தி⁴ரோதி ச அந்தோ⁴ வா அப³தி⁴ரோபி ந கரோதீ’’தி ச வுத்தங், தஸ்மா த்³வேபி ரஹா இத⁴ க³ஹேதப்³பா³. ‘‘அந்தொத்³வாத³ஸஹத்தே²’’திஇமினா ஸோதஸ்ஸ ரஹோ த்³வாத³ஸஹத்தே²ன பரிச்சி²ன்னோதி இத³ங் த³ஸ்ஸேதி. சக்கு²ஸ்ஸ ரஹோ பன யத்த² டி²தஸ்ஸ காயவிகாராத³யோ ந பஞ்ஞாயந்தி, தேன பரிச்சி²ந்தி³தப்³போ³தி த³ட்ட²ப்³ப³ங். ப³தி⁴ரோ பன சக்கு²மாபீதி து³ட்டு²ல்லவாசாஸங்கா⁴தி³ஸேஸங் ஸந்தா⁴ய வுத்தங். து³ட்டு²ல்லாபத்தி வுத்தாதி புரிமஸிக்கா²பதே³ வுத்தேஹி அதி⁴கவஸேன து³ட்டு²ல்லாபத்தி ச வுத்தாதி ஏவமத்தோ² க³ஹேதப்³போ³, ந பன து³ட்டு²ல்லாபத்தி ஏவாதி காயஸங்ஸக்³க³ஸ்ஸாபி இத⁴ க³ஹேதப்³ப³தோ. தேனேவ ‘‘பாராஜிகாபத்திஞ்ச பரிஹாபெத்வா’’தி எத்தகமேவ வுத்தங், இதரதா² ‘‘காயஸங்ஸக்³க³ஞ்சா’’தி வத்தப்³ப³ங் ப⁴வெய்ய.
Kāyenāpi duṭṭhullobhāsasambhavato imasmiṃ sikkhāpade cakkhussa raho, sotassa raho ca adhippetoti āha ‘‘anandho abadhiro’’tiādi. Keci pana vibhaṅge ‘‘nālaṃ kammaniyanti na sakkā hoti methunaṃ dhammaṃ paṭisevitu’nti (pārā. 454) ettakameva vatvā ‘na sakkā hoti kāyasaṃsaggaṃ samāpajjitu’nti avuttattā appaṭicchannepi ṭhāne raho aññesaṃ abhāvaṃ disvā ekāya itthiyā kāyasaṃsaggopi sakkā āpajjitunti antodvādasahatthe savanūpacāre ṭhito abadhiropi andho kāyasaṃsaggassāpi sabbhāvābhāvaṃ na jānātīti kāyena duṭṭhullobhāsanasabbhāvaṃ amanasikatvāpi kāyasaṃsaggāpattiyāpi parihārāya anandho abadhirotiādi vutta’’nti vadanti. Yaṃ pana sāratthadīpaniyaṃ ‘‘kāyasaṃsaggavasena anandho vutto’’ti (sārattha. ṭī. 2.453) vuttaṃ, taṃ pana kāyena duṭṭhullobhāsanasambhavaṃ amanasikatvā vuttaṃ, kāyasaṃsaggavasenāpīti gahetabbaṃ. Teneva ‘‘imasmiṃ sikkhāpade sotassa raho eva adhippeto…pe… kenaci pana ‘dvepi rahā idha adhippetā’ti vuttaṃ, taṃ na gahetabba’’nti vuttaṃ. Yaṃ pana cakkhussa rahābhāvasādhanatthaṃ ‘‘na hi appaṭicchanne okāse cakkhussa raho sambhavatī’’tiādi vuttaṃ, taṃ na yuttaṃ atidūratare ṭhitassa kāyena obhāsanampi hatthaggāhādīnipi sallakkhetuṃ asakkuṇeyyattā. Teneva pāḷiyaṃ ‘‘cakkhussa raho’’ti vuttaṃ, aṭṭhakathāyaṃ appaṭikkhittaṃ. Na kevalañca appaṭikkhittaṃ, atha kho ‘‘anandho badhiroti ca andho vā abadhiropi na karotī’’ti ca vuttaṃ, tasmā dvepi rahā idha gahetabbā. ‘‘Antodvādasahatthe’’tiiminā sotassa raho dvādasahatthena paricchinnoti idaṃ dasseti. Cakkhussa raho pana yattha ṭhitassa kāyavikārādayo na paññāyanti, tena paricchinditabboti daṭṭhabbaṃ. Badhiro pana cakkhumāpīti duṭṭhullavācāsaṅghādisesaṃ sandhāya vuttaṃ. Duṭṭhullāpatti vuttāti purimasikkhāpade vuttehi adhikavasena duṭṭhullāpatti ca vuttāti evamattho gahetabbo, na pana duṭṭhullāpatti evāti kāyasaṃsaggassāpi idha gahetabbato. Teneva ‘‘pārājikāpattiñca parihāpetvā’’ti ettakameva vuttaṃ, itarathā ‘‘kāyasaṃsaggañcā’’ti vattabbaṃ bhaveyya.
திஸமுட்டா²னந்திஆதி³ பன புரிமஸிக்கா²பதே³ ஆக³தேஹி அதி⁴கஸ்ஸ து³ட்டு²ல்லவாசாஸங்கா⁴தி³ஸேஸஸ்ஸ வஸேன வுத்தங் காயஸங்ஸக்³கா³தீ³னம்பி புரிமஸிக்கா²பதே³ ஏவ வுத்தத்தா, இத⁴ பன ந வுத்தந்திபி வத³ந்தி, வீமங்ஸித்வா க³ஹேதப்³ப³ங்.
Tisamuṭṭhānantiādi pana purimasikkhāpade āgatehi adhikassa duṭṭhullavācāsaṅghādisesassa vasena vuttaṃ kāyasaṃsaggādīnampi purimasikkhāpade eva vuttattā, idha pana na vuttantipi vadanti, vīmaṃsitvā gahetabbaṃ.
து³தியஅனியதஸிக்கா²பத³வண்ணனா நிட்டி²தா.
Dutiyaaniyatasikkhāpadavaṇṇanā niṭṭhitā.
நிட்டி²தோ அனியதவண்ணனானயோ.
Niṭṭhito aniyatavaṇṇanānayo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியஅனியதஸிக்கா²பத³ங் • 2. Dutiyaaniyatasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியஅனியதஸிக்கா²பத³வண்ணனா • 2. Dutiyaaniyatasikkhāpadavaṇṇanā
