| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
২. দুতিযঅনিযতসিক্খাপদৰণ্ণনা
2. Dutiyaaniyatasikkhāpadavaṇṇanā
৪৫২. তেন সমযেন বুদ্ধো ভগৰাতি দুতিযঅনিযতসিক্খাপদং। তত্থ ভগৰতা পটিক্খিত্তন্তিআদিম্হি ‘‘যং একো একায রহো পটিচ্ছন্নে আসনে অলংকম্মনিযে নিসজ্জং কপ্পেয্য, তং নিসজ্জং কপ্পেতুং পটিক্খিত্ত’’ন্তি এৰং সম্বন্ধো ৰেদিতব্বো। ইতরথা হি ‘‘একস্স একাযা’’তি ৰত্তব্বং সিযা, কস্মা? ‘‘পটিক্খিত্ত’’ন্তি ৰুত্তত্তা। সামিঅত্থে ৰা এতং পচ্চত্তৰচনং ৰেদিতব্বং।
452.Tena samayena buddho bhagavāti dutiyaaniyatasikkhāpadaṃ. Tattha bhagavatā paṭikkhittantiādimhi ‘‘yaṃ eko ekāya raho paṭicchanne āsane alaṃkammaniye nisajjaṃ kappeyya, taṃ nisajjaṃ kappetuṃ paṭikkhitta’’nti evaṃ sambandho veditabbo. Itarathā hi ‘‘ekassa ekāyā’’ti vattabbaṃ siyā, kasmā? ‘‘Paṭikkhitta’’nti vuttattā. Sāmiatthe vā etaṃ paccattavacanaṃ veditabbaṃ.
৪৫৩. ন হেৰ খো পন পটিচ্ছন্নন্তি এত্থ পন যম্পি বহি পরিক্খিত্তং অন্তো ৰিৰটং পরিৰেণঙ্গণাদি, তম্পি অন্তোগধন্তি ৰেদিতব্বং। এৰরূপঞ্হি ঠানং অপ্পটিচ্ছন্নেযেৰ গহিতন্তি মহাপচ্চরিযং ৰুত্তং। সেসং পঠমসিক্খাপদনযেনেৰ ৰেদিতব্বং। কেৰলঞ্হি ইধ ইত্থীপি পুরিসোপি যো কোচি ৰিঞ্ঞূ অনন্ধো অবধিরো অন্তোদ্ৰাদসহত্থে ওকাসে ঠিতো ৰা নিসিন্নো ৰা ৰিক্খিত্তোপি নিদ্দাযন্তোপি অনাপত্তিং করোতি। বধিরো পন চক্খুমাপি অন্ধো ৰা অবধিরোপি ন করোতি। পারাজিকাপত্তিঞ্চ পরিহাপেত্ৰা দুট্ঠুল্লৰাচাপত্তি ৰুত্তাতি অযং ৰিসেসো। সেসং পুরিমসদিসমেৰ। উভযত্থাপি উম্মত্তকআদিকম্মিকানং অনাপত্তি।
453.Na heva kho pana paṭicchannanti ettha pana yampi bahi parikkhittaṃ anto vivaṭaṃ pariveṇaṅgaṇādi, tampi antogadhanti veditabbaṃ. Evarūpañhi ṭhānaṃ appaṭicchanneyeva gahitanti mahāpaccariyaṃ vuttaṃ. Sesaṃ paṭhamasikkhāpadanayeneva veditabbaṃ. Kevalañhi idha itthīpi purisopi yo koci viññū anandho abadhiro antodvādasahatthe okāse ṭhito vā nisinno vā vikkhittopi niddāyantopi anāpattiṃ karoti. Badhiro pana cakkhumāpi andho vā abadhiropi na karoti. Pārājikāpattiñca parihāpetvā duṭṭhullavācāpatti vuttāti ayaṃ viseso. Sesaṃ purimasadisameva. Ubhayatthāpi ummattakaādikammikānaṃ anāpatti.
সমুট্ঠানাদীসু ইদংসিক্খাপদং তিসমুট্ঠানং – কাযচিত্ততো, ৰাচাচিত্ততো, কাযৰাচাচিত্ততো চ সমুট্ঠাতি। কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, সুখমজ্ঝত্তৰেদনাহি দ্ৰিৰেদনং। সেসং উত্তানত্থমেৰাতি।
Samuṭṭhānādīsu idaṃsikkhāpadaṃ tisamuṭṭhānaṃ – kāyacittato, vācācittato, kāyavācācittato ca samuṭṭhāti. Kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, sukhamajjhattavedanāhi dvivedanaṃ. Sesaṃ uttānatthamevāti.
দুতিযঅনিযতসিক্খাপদৰণ্ণনা নিট্ঠিতা।
Dutiyaaniyatasikkhāpadavaṇṇanā niṭṭhitā.
সমন্তপাসাদিকায ৰিনযসংৰণ্ণনায
Samantapāsādikāya vinayasaṃvaṇṇanāya
অনিযতৰণ্ণনা নিট্ঠিতা।
Aniyatavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ২. দুতিযঅনিযতসিক্খাপদং • 2. Dutiyaaniyatasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. দুতিযঅনিযতসিক্খাপদৰণ্ণনা • 2. Dutiyaaniyatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. দুতিযঅনিযতসিক্খাপদৰণ্ণনা • 2. Dutiyaaniyatasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. দুতিযঅনিযতসিক্খাপদৰণ্ণনা • 2. Dutiyaaniyatasikkhāpadavaṇṇanā
